ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๑๒ ภาษาบาลี อักษรไทย สํ.อ. (สารตฺถ.๒)

หน้าที่ ๑๓๔.

คเหตฺวา นครํ อชฺฌาวุตฺถกาโล วิย ตถาคเตน ธมฺมจกฺเก ปวตฺติเต เถรสฺส
อฏฺฐารสหิ พฺรหฺมโกฏีหิ สทฺธึ โสตาปตฺติผเล ปติฏฺฐิตกาโล, เอวํ นิพฺพานนครํ
ปฐมํ อาวาสิตํ, ตโต สมฺปุณฺณํ นครนฺติ ปุจฺฉิตฺวา น ตาวาติ วุตฺเต ปญฺจ
กุลานิ อาทึ กตฺวา ยาว จตุราสีติกุลสหสฺสเปสนํ วิย ตถาคตสฺส ปญฺจมทิวสโต
ปฏฺฐาย อนตฺตลกฺขณสุตฺตาทีนิ เทเสตฺวา ปญฺจวคฺคิเย อาทึ กตฺวา ยสปมุขา
ปญฺจปญฺญาสกุลปุตฺตา ตึสภทฺทวคฺคิยา สหสฺสปุราณชฏิลา พิมฺพิสารปมุขานิ
เอกาทสปุริสนหุตานิ ติโรกุฑฺฑานุโมทเน จตุราสีติสหสฺสานีติ เอตฺตกสฺส
ชนสฺส อริยมคฺคํ โอตาเรตฺวา นิพฺพานนครํ เปสิตกาโล, อถ เตน นเยน
นคเร อปูริยมาเน เภรึ จาราเปตฺวา ๑- นครสฺส วณฺณโฆสนํ กุลานํ ปริหารลาภโฆสนํ
วิย ๒- มาสสฺส อฏฺฐ ทิวเส ตตฺถ ตตฺถ นิสีทิตฺวา ธมฺมกถิกานํ นิพฺพานวณฺณสฺส
เจว นิพฺพานปฺปตฺตานํ ชาติกนฺตาราทินิตฺถรณอานิสํสสฺส จ โฆสนํ, ตโต สพฺพทิสาหิ
อาคนฺตฺวา มนุสฺสานํ นครสโมสรณํ วิย ตตฺถ ตตฺถ ธมฺมกถํ สุตฺวา ตโต ๓-
นิกฺขมิตฺวา ปพฺพชฺชํ อาทึ กตฺวา อนุโลมปฏิปทํ ปฏิปนฺนานํ อปริมาณานํ
กุลปุตฺตานํ นิพฺพานสโมสรณํ ทฏฺฐพฺพํ.
    ปุราณมคฺคนฺติ อริยํ อฏฺฐงฺคิกํ มคฺคํ. อยํ หิ อริยมคฺโค ปวารณสุตฺเต ๔-
อวตฺตมานกฏฺเฐน "อนุปฺปนฺนมคฺโค"ติ วุตฺโต, อิมสฺมึ สุตฺเต อวฬญฺชนฏฺเฐน
"ปุราณมคฺโค"ติ. พฺรหฺมจริยนฺติ สิกฺขตฺตยสงฺคหํ สกลสาสนํ. อิทฺธนฺติ ฌานสฺสาเทน
สมิทฺธํ สุภิกฺขํ, ผีตนฺติ อภิญฺญาภรเณหิ ปุปฺผิตํ. วิตฺถาริกนฺติ วิตฺถิณฺณํ.
พหุชญฺญนฺติ พหุชนวิญฺเญยฺยํ. ยาว เทวมนุสฺเสหิ สุปกาสิตนฺติ ยาว
ทสสหสฺสจกฺกวาเฬ เทวมนุสฺเสหิ ปริจฺเฉโท อตฺถิ, เอตสฺมึ อนฺตเร สุปกาสิตํ
สุเทสิตํ ตถาคเตนาติ. ปญฺจมํ.
@เชิงอรรถ:  ฉ.ม., อิ. จราเปตฺวา      ฉ.ม., อิ. วิย จ   ฉ.ม., อิ. ตโต ตโต
@ สํ.ส. ๑๕/๒๑๕/๒๓๐



เนื้อความอรรถกถาฉบับภาษาบาลี อักษรไทย เล่มที่ ๑๒ หน้าที่ ๑๓๔. http://84000.org/tipitaka/read/attha_page.php?book=12&page=134&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=12&A=2997&modeTY=2&pagebreak=1 http://84000.org/tipitaka/atthapali/th_line.php?B=12&A=2997&modeTY=2&pagebreak=1#p134


จบการแสดงผล หน้าที่ ๑๓๔.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]