อรรถกถาเล่มที่ ๑๑ หน้าที่ ๕๗.

สจฺจวาที อธิมุตฺโต ยํ ทิสฺวา น นิวารเย อธิมุตฺตสฺส สุจิณฺเณน สจฺจวาทิสฺส ภิกฺขุโน. สพฺเพว อภยํ ปตฺตา โสตฺถึ คจฺฉนฺตุ ญาตโยติ. เอวํ เต โจเรหิ วิสฺสชฺชิตา คนฺตฺวา อธิมุตฺตํ อาหํสุ:- "ตว ตาต สุจิณฺเณน สจฺจวาทิสฺส ภิกฺขุโน สพฺเพว อภยํ ปตฺตา โสตฺถิปจฺจาคมามฺหเส"ติ. ^๑- เต ^๒- ปญฺจสตา โจรา ปสาทํ อาปชฺชิตฺวา อธิมุตฺตสฺส สามเณรสฺส สนฺติเก ปพฺพชึสุ. โส เต อาทาย อุปชฺฌายสฺส สนฺติกํ คนฺตฺวา ปฐมํ อตฺตนา อุปสมฺปนฺโน ปจฺฉา เต ปญฺจสเต อตฺตโน อนฺเตวาสิเก กตฺวา อุปสมฺปาเทสิ. เต อธิมุตฺตตฺเถรสฺส โอวาเท ฐิตา สพฺเพ อคฺคผลํ อรหตฺตํ ปาปุณึสุ. อิมมตฺถํ คเหตฺวา เทวตา "สตํ สทฺธมฺมมญฺญาย, ญาติมชฺเฌ วิโรจตี"ติ อาห. สาตตนฺติ สตตํ สุขํ วา จิรํ สุขํ วา ^๓- ติฏฺฐนฺตีติ วทติ. สพฺพาสํ โวติ สพฺพาสํ ตุมฺหากํ. ปริยาเยนาติ การเณน. สพฺพทุกฺขา ปมุจฺจตีติ น เกวลํ เสยฺโยว โหติ, น จ เกวลํ ปญฺญํ ลภติ, โสกมชฺเฌ น โสจติ, ญาติมชฺเฌ วิโรจติ, สุคติยํ นิพฺพตฺตติ, จิรํ สุขํ ติฏฺฐติ, สกลสฺมา ปน วฏฺฏทุกฺขาปิ ปมุจฺจตีติ. ปฐมํ. ๒. มจฺฉริสุตฺตวณฺณนา [๓๒] ทุติเย มจฺเฉรา จ ปมาทา จาติ อตฺตสมฺปตฺตินิคูหนลกฺขเณน มจฺเฉเรน เจว สติวิปฺปวาสลกฺขเณน ปมาเทน จ. เอกจฺโจ หิ "อิมํ ^๔- เม เทนฺตสฺส ปริกฺขยํ คมิสฺสติ, มยฺหํ วา ฆรมานุสกานํ วา น ภวิสฺสตี"ติ มจฺฉริเยน ^๕- ทานํ น เทติ. เอกจฺโจ ขิฑฺฑาทิปสุตตฺตา "ทานํ ทาตพฺพนฺ"ติ จิตฺตมฺปิ น อุปฺปาเทติ. เอวํ ทานํ น ทียตีติ เอวเมตํ ยสทายกํ สิริทายกํ สมฺปตฺติทายกํ สุขทายกํ ทานํ นาม น ทียตีติอาทินา การณํ กเถสิ. ปุญฺญํ อากงฺขมาเนนาติ ปุพฺพเจตนาทิเภทํ ปุญฺญํ อิจฺฉมาเนน. เทยฺยํ โหติ วิชานตาติ อตฺถิ ทานสฺส ผลนฺติ ชานนฺเตน ทาตพฺพเมวาติ วทติ. @เชิงอรรถ: ^๑ ฉ.ม. โสตฺถึ ปจฺจาคมมฺหเสติ, อิ. โสตฺถึ ปจฺจาคมามฺหเสติ ^๒ ฉ.ม., อิ. เตปิ @^๓ ฉ.ม., อิ. สุขํ วาติ น ทิสฺสติ ^๔ ฉ.ม. อิทํ ^๕ ม. มจฺฉเรน

เนื้อความอรรถกถาฉบับภาษาบาลี อักษรไทย เล่มที่ ๑๑ หน้าที่ ๕๗. http://84000.org/tipitaka/read/attha_page.php?book=11&page=57&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=11&A=1492&modeTY=2&pagebreak=1 http://84000.org/tipitaka/atthapali/th_line.php?B=11&A=1492&modeTY=2&pagebreak=1#p57