บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 11 : PALI ROMAN Saṃ.A. (sārattha.1) Page 257.
Gandharasā gahitā, mutapadena phoṭṭhabbārammaṇaṃ. Yo ettha na limpatīti yo etesu pañcakāmaguṇesu taṇhādiṭṭhilepehi 1- na limpati. Atha saṭṭhisitā 2- savitakkā, puthū janatāya adhammā niviṭṭhāti atha chaārammaṇanissitā puthū adhammavitakkā janatāya niviṭṭhāti attho. Na ca vaggagatassa kuhiñcīti tesaṃ vasena na katthaci kilesavaggato bhaveyya. No pana duṭṭhullabhāṇīti duṭṭhullaṃ vācaṃ bhāṇīpi 3- na siyā. Sa bhikkhūti so evaṃ citto 4- bhikkhu nāma hoti. Dabboti dabbajātiko paṇḍito. Cirarattasamāhitoti dīgharattaṃ samāhitacitto. Nipakoti nepakkena samannāgato pariṇatapañño. Apihālūti nittaṇho. Santaṃ padanti nibbānaṃ. Ajjhagamā munīti adhigato muni. Paṭicca parinibbuto kaṅkhati kālanti nibbānaṃ paṭicca kilesaparinibbānena parinibbuto parinibbānakālaṃ āgameti. Dutiyaṃ. 3. Pesalātimaññanāsuttavaṇṇanā *- [211] Tatiye atimaññatīti "kiṃ ime mahallakā, na imesaṃ 5- pāli, na aṭṭhakathā, na padabyañjanamadhuratā, amhākaṃ pana pāḷipi aṭṭhakathāpi nayasatena nayasahassena upaṭṭhātī"ti atikkamitvā maññati. Gotamāti gotamabuddhasāvakattā attānaṃ ālapati. Mānapathanti mānārammaṇañceva mānasahabhuno ca dhamme. Vippaṭisārīhuvāti vippaṭisārī ahuvā, ahosīti attho. Maggajinoti maggena jitakileso. Kittiñca sukhañcāti vaṇṇabhaṇanañca kāyikacetasikasukhañca. Akhīlodha padhānavāti akhilo idha padhānavā viriyasampanno. Visuddhoti visuddho bhaveyya. Asesanti nissesaṃ navavidhaṃ. Vijjāyantakaroti vijjāya kilesānaṃ antakaroti. Samitāvīti rāgādīnaṃ samitatāya samitāvī. Tatiyaṃ. @Footnote: 1 ka. taṇhādiṭṭhikilesehi * cha.Ma. pesalasutta... 2 cha.Ma. saṭṭhinissitā @3 cha.Ma. duṭṭhullavacanabhāṇīpi 4 cha.Ma. evaṃvidho 5 cha.Ma. etesaṃThe Pali Atthakatha in Roman Character Volume 11 Page 257. http://84000.org/tipitaka/read/attha_page.php?book=11&page=257&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=11&A=6649&pagebreak=1 http://84000.org/tipitaka/atthapali/rm_line.php?B=11&A=6649&pagebreak=1#p257
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]