บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |
| |
[328] 57 Ekaṃ samayaṃ bhagavā rājagahe viharati gijjhakūṭe pabbate. Atha kho āyasmā ānando yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi ekamantaṃ nisinno kho āyasmā ānando bhagavantaṃ etadavoca pūraṇena bhante kassapena chaḷābhijātiyo paññattā kaṇhābhijāti paññattā nīlābhijāti paññattā lohitābhijāti paññattā haliddābhijāti paññattā sukkābhijāti paññattā paramasukkābhijāti paññattā tatridaṃ bhante pūraṇena kassapena kaṇhābhijāti paññattā orabbhikā sokarikā 1- sākuṇikā māgavikā luddā macchaghātakā corā coraghātakā bandhanāgārikā ye vā panaññepi keci kurūrakammantā tatridaṃ bhante pūraṇena kassapena nīlābhijāti paññattā bhikkhū kaṇhādhimuttikā 2- ye vā panaññepi keci kammavādā kiriyavādā tatridaṃ bhante pūraṇena kassapena lohitābhijāti paññattā nigaṇṭhā ekasāṭakā tatridaṃ bhante pūraṇena kassapena haliddābhijāti paññattā gihī odātavasanā @Footnote: 1 Ma. Yu. sūkarikā . 2 Ma. Yu. kaṇḍakavuttikā. Acelakasāvakā tatridaṃ bhante pūraṇena kassapena sukkābhijāti paññattā ājīvakā ājīvakiniyo tatridaṃ bhante pūraṇena kassapena paramasukkābhijāti paññattā nando vaccho kacco 1- saṅkicco makkhali gosālo pūraṇena bhante kassapena imā chaḷābhijātiyo paññattāti. {328.1} Kiṃ panānanda pūraṇassa kassapassa sabbo loko etadabbhanujānāti imā chaḷābhijātiyo paññāpetunti. No hetaṃ bhante. Seyyathāpi ānanda puriso daḷiddo assako anaddhiyo 2- tassa akāmakassa bilaṃ olabheyyuṃ 3- idaṃ te ambho purisa maṃsañca khāditabbaṃ mūlañca anuppadātabbanti evameva kho ānanda pūraṇena kassapena appaṭiññāya etesaṃ samaṇabrāhmaṇānaṃ imā chaḷābhijātiyo paññattā yathā taṃ bālena abyattena akhettaññunā akusalena ahaṃ kho panānanda chaḷābhijātiyo paññāpemi taṃ suṇāhi sādhukaṃ manasikarohi bhāsissāmīti . evaṃ bhanteti kho āyasmā ānando bhagavato paccassosi . bhagavā etadavoca katamā cānanda chaḷābhijātiyo idhānanda ekacco kaṇhābhijātiyo samāno kaṇhaṃ dhammaṃ abhijāyati idha panānanda ekacco kaṇhābhijātiyo samāno sukkaṃ dhammaṃ abhijāyati idha panānanda ekacco kaṇhābhijātiyo samāno akaṇhaṃ asukkaṃ nibbānaṃ abhijāyati idha panānanda ekacco sukkābhijātiyo samāno kaṇhaṃ dhammaṃ abhijāyati idha panānanda ekacco sukkābhijātiyo samāno @Footnote: 1 Po. kicco. Ma. Yu. kiso . 2 Ma. anāḷhiko. Yu. anāḷiko. @3 Ma. Yu. olaggeyyuṃ. Sukkaṃ dhammaṃ abhijāyati idha panānanda ekacco sukkābhijātiyo samāno akaṇhaṃ asukkaṃ nibbānaṃ abhijāyati. {328.2} Kathañcānanda kaṇhābhijātiyo samāno kaṇhaṃ dhammaṃ abhijāyati idhānanda ekacco nīce kule paccājāto 1- hoti caṇḍālakule vā nesādakule vā veṇakule 2- vā rathakārakule vā pukkusakule vā daḷidde appannapānabhojane kasiravuttike yattha kasirena ghāsacchādo labbhati so ca hoti dubbaṇṇo duddasiko okoṭimako bahvābādho kāṇo vā kuṇī vā khañjo vā pakkhahato vā na lābhī annassa pānassa vatthassa yānassa mālāgandhavilepanassa seyyāvasathapadīpeyyassa so kāyena duccaritaṃ carati vācāya duccaritaṃ carati manasā duccaritaṃ carati so kāyena duccaritaṃ caritvā vācāya duccaritaṃ caritvā manasā duccaritaṃ caritvā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati evaṃ kho ānanda kaṇhābhijātiyo samāno kaṇhaṃ dhammaṃ abhijāyati. {328.3} Kathañcānanda kaṇhābhijātiyo samāno sukkaṃ dhammaṃ abhijāyati idhānanda ekacco nīce kule paccājāto hoti caṇḍālakule vā .pe. seyyāvasathapadīpeyyassa so kāyena sucaritaṃ carati vācāya sucaritaṃ carati manasā sucaritaṃ carati so kāyena sucaritaṃ caritvā vācāya sucaritaṃ caritvā manasā sucaritaṃ caritvā kāyassa bhedā parammaraṇā sugatiṃ saggaṃ lokaṃ upapajjati evaṃ kho ānanda kaṇhābhijātiyo samāno sukkaṃ dhammaṃ abhijāyati . kathañcānanda kaṇhābhijātiyo samāno akaṇhaṃ asukkaṃ @Footnote: 1 Po. pacchājāto. aparaṃpi īdisameva . 2 Ma. venakule. Nibbānaṃ abhijāyati idhānanda ekacco nīce kule paccājāto hoti caṇḍālakule vā .pe. so ca hoti dubbaṇṇo duddasiko okoṭimako so kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajjati 1- so evaṃ pabbajito samāno pañca nīvaraṇe pahāya cetaso upakkilese paññāya dubbalīkaraṇe catūsu satipaṭṭhānesu sūpaṭṭhitacitto satta bojjhaṅge yathābhūtaṃ bhāvetvā akaṇhaṃ asukkaṃ nibbānaṃ abhijāyati evaṃ kho ānanda kaṇhābhijātiyo samāno akaṇhaṃ asukkaṃ nibbānaṃ abhijāyati. {328.4} Kathañcānanda sukkābhijātiyo samāno kaṇhaṃ dhammaṃ abhijāyati idhānanda ekacco ucce kule paccājāto hoti khattiyamahāsālakule vā brāhmaṇamahāsālakule vā gahapatimahāsālakule vā addhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe so ca hoti abhirūpo dassanīyo pāsādiko paramāya vaṇṇapokkharatāya samannāgato lābhī annassa pānassa vatthassa yānassa mālāgandhavilepanassa seyyāvasathapadīpeyyassa so kāyena duccaritaṃ carati vācāya duccaritaṃ carati manasā duccaritaṃ carati so kāyena duccaritaṃ caritvā vācāya duccaritaṃ caritvā manasā duccaritaṃ caritvā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati evaṃ kho ānanda sukkābhijātiyo samāno kaṇhaṃ dhammaṃ abhijāyati. {328.5} Kathañcānanda sukkābhijātiyo samāno sukkaṃ dhammaṃ abhijāyati idhānanda ekacco ucce kule paccājāto hoti @Footnote: 1 Ma. Yu. pabbajati. Khattiyamahāsālakule vā .pe. seyyāvasathapadīpeyyassa so kāyena sucaritaṃ carati vācāya sucaritaṃ carati manasā sucaritaṃ carati so kāyena sucaritaṃ caritvā vācāya sucaritaṃ caritvā manasā sucaritaṃ caritvā kāyassa bhedā parammaraṇā sugatiṃ saggaṃ lokaṃ upapajjati evaṃ kho ānanda sukkābhijātiyo samāno sukkaṃ dhammaṃ abhijāyati. {328.6} Kathañcānanda sukkābhijātiyo samāno akaṇhaṃ asukkaṃ nibbānaṃ abhijāyati idhānanda ekacco ucce kule paccājāto hoti khattiyamahāsālakule vā brāhmaṇamahāsālakule vā gahapatimahāsālakule vā addhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe so ca hoti abhirūpo dassanīyo pāsādiko paramāya vaṇṇapokkharatāya samannāgato lābhī annassa pānassa vatthassa yānassa mālāgandhavilepanassa seyyāvasathapadīpeyyassa so kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajjati so evaṃ pabbajito samāno pañca nīvaraṇe pahāya cetaso upakkilese paññāya dubbalīkaraṇe catūsu satipaṭṭhānesu sūpaṭṭhitacitto satta bojjhaṅge yathābhūtaṃ bhāvetvā akaṇhaṃ asukkaṃ nibbānaṃ abhijāyati evaṃ kho ānanda sukkābhijātiyo samāno akaṇhaṃ asukkaṃ nibbānaṃ abhijāyati. Imā kho ānanda chaḷābhijātiyoti.The Pali Tipitaka in Roman Character Volume 22 page 429-433. https://84000.org/tipitaka/pitaka_item/roman_read.php?B=22&A=9034 Compare with The Pali Tipitaka in Thai Character :- https://84000.org/tipitaka/pitaka_item/pali_read.php?B=22&A=9034 Compare with The Royal Version of Thai Tipitaka :- https://84000.org/tipitaka/read/byitem.php?book=22&item=328&items=1 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=22&siri=308 Study Atthakatha :- https://84000.org/tipitaka/attha/attha.php?b=22&i=328 The Pali Atthakatha in Thai :- https://84000.org/tipitaka/atthapali/read_th.php?B=16&A=3132 The Pali Atthakatha in Roman :- https://84000.org/tipitaka/atthapali/read_rm.php?B=16&A=3132 Contents of The Tipitaka Volume 22 https://84000.org/tipitaka/read/?index_22 https://84000.org/tipitaka/english/?index_22
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]