PaliRoman Vol.1

tassa mayhaṃ āvuso etadahosi acchariyaṃ vata bho abbhūtaṃ vata bho evarūpopi nāma satto bhavissati evarūpopi nāma yakkho bhavissati evarūpopi nāma peto bhavissati evarūpopi nāma attabhāvapaṭilābho bhavissatīti . bhikkhū ujjhāyanti khīyanti vipācenti uttarimanussadhammaṃ āyasmā mahāmoggallāno ullapatīti. {295.16} Athakho bhagavā bhikkhū āmantesi cakkhubhūtā vata bhikkhave sāvakā viharanti ñāṇabhūtā vata bhikkhave sāvakā viharanti yatra hi nāma sāvako evarūpaṃ ñassati vā dakkhati vā sakkhiṃ vā karissati pubbe va me sā bhikkhave sāmaṇerī diṭṭhā ahosi apicāhaṃ na byākāsiṃ ahañcetaṃ byākareyyaṃ pare ca me na saddaheyyuṃ ye me na saddaheyyuṃ tesantaṃ assa dīgharattaṃ ahitāya dukkhāya esā bhikkhave sāmaṇerī kassapassa sammāsambuddhassa pāvacane pāpasāmaṇerī ahosi sā tassa kammassa vipākena bahūni vassāni bahūni vassasatāni bahūni vassasahassāni bahūni vassasatasahassāni niraye pacitvā tasseva kammassa vipākāvasesena evarūpaṃ attabhāvapaṭilābhaṃ paṭisaṃvedeti saccaṃ bhikkhave moggallāno āha anāpatti bhikkhave moggallānassāti. [296] Athakho āyasmā mahāmoggallāno bhikkhū āmantesi yatāyaṃ āvuso tapodā sandati so daho acchodako sītodako sātodako setodako supatittho ramaṇīyo pahūtamacchakacchapo cakkamattāni Ca padumāni pupphanti atha ca panāyaṃ tapodā kuthitā sandatīti . Bhikkhū ujjhāyanti khīyanti vipācenti kathaṃ hi nāma āyasmā mahāmoggallāno evaṃ vakkhati yatāyaṃ āvuso tapodā sandati so daho acchodako sītodako sātodako setodako supatittho ramaṇīyo pahūtamacchakacchapo cakkamattāni ca padumāni pupphanti atha ca panāyaṃ tapodā kuthitā sandatīti uttarimanussadhammaṃ āyasmā mahāmoggallāno ullapatīti . bhagavato etamatthaṃ ārocesuṃ . Yatāyaṃ bhikkhave tapodā sandati so daho acchodako sītodako sātodako setodako supatittho ramaṇīyo pahūtamacchakacchapo cakkamattāni ca padumāni pupphanti apicāyaṃ bhikkhave tapodā dvinnaṃ mahānirayānaṃ antarikāya āgacchati tenāyaṃ tapodā kuthitā sandati saccaṃ bhikkhave moggallāno āha anāpatti bhikkhave moggallānassāti. [297] Tena kho pana samayena rājā māgadho seniyo bimbisāro licchavīhi saddhiṃ saṅgāmento pabhaggo hoti . atha rājā pacchā senaṃ saṅkaḍḍhitvā licchaviyo ^1- parājesi . saṅgāme ca nandi carati raññā licchaviyo ^2- pabhaggāti . athakho āyasmā mahāmoggallāno bhikkhū āmantesi rājā āvuso licchavīhi pabhaggo saṅgāme ca nandi carati raññā licchaviyo pabhaggāti . bhikkhū ujjhāyanti khīyanti vipācenti kathaṃ hi nāma āyasmā mahāmoggallāno evaṃ vakkhati @Footnote: ¹ licchavī vā licchavino vāti amhākaṃ khanti. ² Yu. Ma. licchavī. Rājā āvuso licchavīhi pabhaggo saṅgāme ca nandi carati raññā licchaviyo pabhaggāti uttarimanussadhammaṃ āyasmā mahāmoggallāno ullapatīti . bhagavato etamatthaṃ ārocesuṃ . paṭhamaṃ bhikkhave rājā licchavīhi pabhaggo atha rājā pacchā senaṃ saṅkaḍḍhitvā licchaviyo parājesi saccaṃ bhikkhave moggallāno āha anāpatti bhikkhave moggallānassāti. [298] Athakho āyasmā mahāmoggallāno bhikkhū āmantesi idhāhaṃ āvuso sappinikāya nadiyā tīre āneñjaṃ ^1- samādhiṃ samāpanno nāgānaṃ ogayha uttarantānaṃ koñcaṃ karontānaṃ saddaṃ assosinti . Bhikkhū ujjhāyanti khīyanti vipācenti kathaṃ hi nāma āyasmā mahāmoggallāno evaṃ vakkhati idhāhaṃ āvuso sappinikāya nadiyā tīre āneñjaṃ samādhiṃ samāpanno nāgānaṃ ogayha uttarantānaṃ koñcaṃ karontānaṃ saddaṃ assosinti uttarimanussadhammaṃ āyasmā mahāmoggallāno ullapatīti . bhagavato etamatthaṃ ārocesuṃ . Attheso bhikkhave samādhi so ca kho aparisuddho saccaṃ bhikkhave moggallāno āha anāpatti bhikkhave moggallānassāti. [299] Athakho āyasmā sobhito bhikkhū āmantesi ahaṃ āvuso pañca kappasatāni anussarāmīti . bhikkhū ujjhāyanti khīyanti vipācenti kathaṃ hi nāma āyasmā sobhito evaṃ vakkhati ahaṃ @Footnote: ¹ Yu. Ma. ānañjaṃ. Āvuso pañca kappasatāni anussarāmīti uttarimanussadhammaṃ āyasmā sobhito ullapatīti . bhagavato etamatthaṃ ārocesuṃ. Atthesā bhikkhave sobhitassa sā ca kho ekāyeva jāti saccaṃ bhikkhave sobhito āha anāpatti bhikkhave sobhitassāti. Catutthapārājikaṃ niṭṭhitaṃ. -------------

The Pali Tipitaka in Roman Character Volume 1 page 217-220. https://84000.org/tipitaka/pitaka_item/roman_read.php?B=1&A=4271&w=etadahosi Compare with The Pali Tipitaka in Thai Character :- https://84000.org/tipitaka/pitaka_item/pali_read.php?B=1&A=4271 Compare with The Royal Version of Thai Tipitaka :- https://84000.org/tipitaka/read/byitem.php?book=1&item=295&items=5 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=1&siri=32 Study Atthakatha :- https://84000.org/tipitaka/attha/attha.php?b=1&i=281 The Pali Atthakatha in Thai :- https://84000.org/tipitaka/atthapali/read_th.php?B=1&A=12893 The Pali Atthakatha in Roman :- https://84000.org/tipitaka/atthapali/read_rm.php?B=1&A=12893 Contents of The Tipitaka Volume 1 https://84000.org/tipitaka/read/?index_1 https://84000.org/tipitaka/english/?index_1