Suttantapiṭake dīghanikāyassa
paṭhamo bhāgo
-------
sīlakkhandhavaggo paṭhamo
namo tassa bhagavato arahato sammāsambuddhassa.
Brahmajālasuttaṃ paṭhamaṃ
[1] Evamme sutaṃ . ekaṃ samayaṃ bhagavā antarā ca rājagahaṃ
antarā ca nāḷandaṃ addhānamaggapaṭipanno hoti mahatā bhikkhusaṃghena
saddhiṃ pañcamattehi bhikkhusatehi . suppiyopi kho paribbājako antarā
ca rājagahaṃ antarā ca nāḷandaṃ addhānamaggapaṭipanno hoti saddhiṃ
antevāsinā brahmadattena māṇavena . tatra sudaṃ suppiyo
paribbājako anekapariyāyena buddhassa avaṇṇaṃ bhāsati dhammassa
avaṇṇaṃ bhāsati saṃghassa avaṇṇaṃ bhāsati . suppiyassa pana
paribbājakassa antevāsī brahmadatto māṇavo anekapariyāyena
buddhassa vaṇṇaṃ bhāsati dhammassa vaṇṇaṃ bhāsati saṃghassa vaṇṇaṃ
bhāsati . Itiha te ubho ācariyantevāsī aññamaññassa ujuvipaccanikavādā 1-
bhagavantaṃ piṭṭhito piṭṭhito anubandhā 2- honti bhikkhusaṃghañca.
{1.1} Athakho bhagavā ambalaṭṭhikāyaṃ rājāgārake ekarattivāsaṃ upagañchi
@Footnote: 1 Sī. ujuvipaccanīkavādā. 2 anubaddhātipi pāṭho.
Saddhiṃ bhikkhusaṃghena . suppiyopi kho paribbājako ambalaṭṭhikāyaṃ
rājāgārake ekarattivāsaṃ upagañchi 1- saddhiṃ antevāsinā brahmadattena
māṇavena . tatrapi sudaṃ suppiyo paribbājako anekapariyāyena
buddhassa avaṇṇaṃ bhāsati dhammassa avaṇṇaṃ bhāsati saṃghassa avaṇṇaṃ
bhāsati . suppiyassa pana paribbājakassa antevāsī brahmadatto
māṇavo anekapariyāyena buddhassa vaṇṇaṃ bhāsati dhammassa vaṇṇaṃ
bhāsati saṃghassa vaṇṇaṃ bhāsati . itiha te ubho ācariyantevāsī
aññamaññassa ujuvipaccanikavādā bhagavantaṃ piṭṭhito piṭṭhito anubandhā
honti bhikkhusaṃghañca.
{1.2} Athakho sambahulānaṃ bhikkhūnaṃ rattiyā paccūsasamayaṃ paccuṭṭhitānaṃ
maṇḍalamāḷe sannisinnānaṃ sannipatitānaṃ ayaṃ saṃkhiyadhammo 2- udapādi
acchariyaṃ āvuso abbhūtaṃ 3- āvuso yāvañcidaṃ tena bhagavatā jānatā
passatā arahatā sammāsambuddhena sattānaṃ nānādhimuttikatā
supaṭividitā 4- ayaṃ hi suppiyo paribbājako anekapariyāyena
buddhassa avaṇṇaṃ bhāsati dhammassa avaṇṇaṃ bhāsati saṃghassa avaṇṇaṃ
bhāsati suppiyassa pana paribbājakassa antevāsī brahmadatto
māṇavo anekapariyāyena buddhassa vaṇṇaṃ bhāsati dhammassa vaṇṇaṃ
bhāsati saṃghassa vaṇṇaṃ bhāsati itiha ime ubho 5- ācariyantevāsī
aññamaññassa ujuvipaccanikavādā bhagavantaṃ piṭṭhito piṭṭhito
@Footnote: 1 upagacchītipi pāṭho. 2 saṃkhiyādhammotipi pāṭho. 3 Yu. abbhutaṃ.
@4 suppaṭividitātipi pāṭho. 5 itiha te ime ubhotipi pāṭho.
Anubandhā honti bhikkhusaṃghañcāti.
{1.3} Athakho bhagavā tesaṃ bhikkhūnaṃ imaṃ saṃkhiyadhammaṃ viditvā yena
maṇḍalamāḷo tenupasaṅkami upasaṅkamitvā paññatte āsane nisīdi .
Nisajja kho bhagavā bhikkhū āmantesi kāya nuttha bhikkhave etarahi kathāya
sannisinnā sannipatitā kā ca pana vo antarā kathā vippakatāti .
Evaṃ vutte te bhikkhū bhagavantaṃ etadavocuṃ idha bhante amhākaṃ rattiyā
paccūsasamayaṃ paccuṭṭhitānaṃ maṇḍalamāḷe sannisinnānaṃ sannipatitānaṃ
ayaṃ saṃkhiyadhammo udapādi acchariyaṃ āvuso abbhūtaṃ āvuso yāvañcidaṃ
tena bhagavatā jānatā passatā arahatā sammāsambuddhena sattānaṃ
nānādhimuttikatā supaṭividitā ayaṃ hi suppiyo paribbājako anekapariyāyena
buddhassa avaṇṇaṃ bhāsati dhammassa avaṇṇaṃ bhāsati saṃghassa avaṇṇaṃ
bhāsati suppiyassa pana paribbājakassa antevāsī brahmadatto māṇavo
anekapariyāyena buddhassa vaṇṇaṃ bhāsati dhammassa vaṇṇaṃ bhāsati saṃghassa
vaṇṇaṃ bhāsati itiha ime ubho ācariyantevāsī aññamaññassa
ujuvipaccanikavādā bhagavantaṃ piṭṭhito piṭṭhito anubandhā honti
bhikkhusaṃghañcāti ayaṃ kho no bhante antarā kathā vippakatā atha bhagavā
anuppattoti.
{1.4} Mamaṃ vā bhikkhave pare avaṇṇaṃ bhāseyyuṃ dhammassa vā
avaṇṇaṃ bhāseyyuṃ saṃghassa vā avaṇṇaṃ bhāseyyuṃ tatra tumhehi
na āghāto na apaccayo na cetaso anabhiraddhi karaṇīyā . mamaṃ vā
Bhikkhave pare avaṇṇaṃ bhāseyyuṃ dhammassa vā avaṇṇaṃ bhāseyyuṃ
saṃghassa vā avaṇṇaṃ bhāseyyuṃ tatra ce tumhe assatha kupitā
vā anattamanā vā tumhaññevassa tena antarāyo . Mamaṃ vā bhikkhave
pare avaṇṇaṃ bhāseyyuṃ dhammassa vā avaṇṇaṃ bhāseyyuṃ saṃghassa vā
avaṇṇaṃ bhāseyyuṃ tatra ce tumhe assatha kupitā vā anattamanā
vā apinu tumhe paresaṃ subhāsitaṃ vā dubbhāsitaṃ vā ājāneyyāthāti.
Nohetaṃ bhante . mamaṃ vā bhikkhave pare avaṇṇaṃ bhāseyyuṃ
dhammassa vā avaṇṇaṃ bhāseyyuṃ saṃghassa vā avaṇṇaṃ bhāseyyuṃ
tatra tumhehi abhūtaṃ abhūtato nibbeṭhetabbaṃ itipetaṃ abhūtaṃ
itipetaṃ atacchaṃ natthipetaṃ amhesu na ca panetaṃ amhesu saṃvijjatīti.
{1.5} Mamaṃ vā bhikkhave pare vaṇṇaṃ bhāseyyuṃ dhammassa vā vaṇṇaṃ
bhāseyyuṃ saṃghassa vā vaṇṇaṃ bhāseyyuṃ tatra tumhehi na ānando na
somanassaṃ na cetaso ubbilāvitattaṃ karaṇīyaṃ . mamaṃ vā bhikkhave pare
vaṇṇaṃ bhāseyyuṃ dhammassa vā vaṇṇaṃ bhāseyyuṃ saṃghassa vā vaṇṇaṃ
bhāseyyuṃ tatra ce tumhe bhikkhave assatha ānandino sumanā
ubbilāvitattā tumhaññevassa tena antarāyo . mamaṃ vā bhikkhave
pare vaṇṇaṃ bhāseyyuṃ dhammassa vā vaṇṇaṃ bhāseyyuṃ saṃghassa vā
vaṇṇaṃ bhāseyyuṃ tatra tumhehi bhūtaṃ bhūtato paṭijānitabbaṃ itipetaṃ
bhūtaṃ itipetaṃ tacchaṃ atthipetaṃ amhesu saṃvijjati ca panetaṃ amhesūti.
[2] Appamattakaṃ kho panetaṃ bhikkhave oramattakaṃ sīlamattakaṃ yena
Puthujjano tathāgatassa vaṇṇaṃ vadamāno vadeyya . katamañcetaṃ
bhikkhave appamattakaṃ oramattakaṃ sīlamattakaṃ yena puthujjano tathāgatassa
vaṇṇaṃ vadamāno vadeyya.
[3] Pāṇātipātaṃ pahāya pāṇātipātā paṭivirato samaṇo gotamo
nihitadaṇḍo nihitasattho lajjī dayāpanno sabbapāṇabhūtahitānukampī
viharatīti . iti vā hi bhikkhave puthujjano tathāgatassa vaṇṇaṃ vadamāno
vadeyya . adinnādānaṃ pahāya adinnādānā paṭivirato samaṇo
gotamo dinnādāyī dinnapāṭikaṃkhī athenena sucibhūtena attanā
viharatīti . iti vā hi bhikkhave puthujjano tathāgatassa vaṇṇaṃ vadamāno
vadeyya . abrahmacariyaṃ pahāya brahmacārī samaṇo gotamo ārācārī
virato methunā gāmadhammāti . iti vā hi bhikkhave puthujjano tathāgatassa
vaṇṇaṃ vadamāno vadeyya.
[4] Musāvādaṃ pahāya musāvādā paṭivirato samaṇo gotamo
saccavādī saccasandho ṭheto 1- paccayiko avisaṃvādako lokassāti .
Iti vā hi bhikkhave puthujjano tathāgatassa vaṇṇaṃ vadamāno
vadeyya . pisuṇaṃ vācaṃ pahāya pisuṇāya vācāya paṭivirato samaṇo
gotamo ito sutvā na amutra akkhātā imesaṃ bhedāya amutra
vā sutvā na imesaṃ akkhātā amūsaṃ bhedāya . iti bhinnānaṃ
vā sandhātā sahitānaṃ vā anuppadātā samaggārāmo samaggarato
@Footnote: 1 Sī. theto.
Samagganandī samaggakaraṇiṃ vācaṃ bhāsitāti . iti vā hi bhikkhave
puthujjano tathāgatassa vaṇṇaṃ vadamāno vadeyya . pharusaṃ vācaṃ pahāya
pharusāya vācāya paṭivirato samaṇo gotamo yā sā vācā nelā
kaṇṇasukhā pemanīyā hadayaṅgamā porī bahujanakantā bahujanamanāpā
tathārūpiṃ vācaṃ bhāsitāti . iti vā hi bhikkhave puthujjano tathāgatassa
vaṇṇaṃ vadamāno vadeyya.
{4.1} Samphappalāpaṃ pahāya samphappalāpā paṭivirato samaṇo
gotamo kālavādī bhūtavādī atthavādī dhammavādī vinayavādī nidhānavatiṃ
vācaṃ bhāsitā kālena sāpadesaṃ pariyantavatiṃ atthasañhitanti . iti vā
hi bhikkhave puthujjano tathāgatassa vaṇṇaṃ vadamāno vadeyya.
[5] Bījagāmabhūtagāmasamārambhā paṭivirato samaṇo gotamoti .
Iti vā hi bhikkhave .pe.
[6] Ekabhattiko samaṇo gotamo rattūparato virato vikālabhojanā.
Naccagītavāditavisūkadassanā paṭivirato samaṇo gotamo .
Mālāgandhavilepanadhāraṇamaṇḍanavibhūsanaṭṭhānā paṭivirato samaṇo gotamo .
Uccāsayanamahāsayanā paṭivirato samaṇo gotamo . jātarūparajatapaṭiggahaṇā
paṭivirato samaṇo gotamo.
[7] Āmakadhaññapaṭiggahaṇā paṭivirato samaṇo gotamo .
Āmakamaṃsapaṭiggahaṇā paṭivirato samaṇo gotamo . itthīkumārikapaṭiggahaṇā
paṭivirato samaṇo gotamo . dāsīdāsapaṭiggahaṇā paṭivirato samaṇo
Gotamo . ajeḷakapaṭiggahaṇā paṭivirato samaṇo gotamo .
Kukkuṭasūkarapaṭiggahaṇā paṭivirato samaṇo gotamo .
Hatthigavassavaḷavāpaṭiggahaṇā paṭivirato samaṇo gotamo .
Khettavatthupaṭiggahaṇā paṭivirato samaṇo gotamo.
[8] Dūteyyapahiṇagamanānuyogā paṭivirato samaṇo gotamo .
Kayavikkayā paṭivirato samaṇo gotamo . tulākūṭakaṃsakūṭamānakūṭā
paṭivirato samaṇo gotamo . ukkoṭanavañcananikatisāviyogā paṭivirato
samaṇo gotamo . chedanavadhabandhanaviparāmosaālopasahasākārā paṭivirato
samaṇo gotamoti . iti vā hi bhikkhave puthujjano tathāgatassa
vaṇṇaṃ vadamāno vadeyya.
Cūḷasīlaṃ niṭṭhitaṃ.
[9] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ bījagāmabhūtagāmasamārambhaṃ anuyuttā
viharanti . seyyathīdaṃ . mūlabījaṃ khandhabījaṃ phalabījaṃ aggabījaṃ bījabījameva
pañcamaṃ iti vā . iti evarūpā bījagāmabhūtagāmasamārambhā paṭivirato
samaṇo gotamoti . iti vā hi bhikkhave puthujjano tathāgatassa
vaṇṇaṃ vadamāno vadeyya.
[10] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ sannidhikārakaparibhogaṃ 1- anuyuttā
@Footnote: 1 sannidhikāraparibhogantipi pāṭho.
Viharanti . seyyathīdaṃ . annasannidhi 1- pānasannidhi vatthasannidhi
yānasannidhi sayanasannidhi vilepanasannidhi gandhasannidhi āmisasannidhi iti
vā . iti evarūpā sannidhikārakaparibhogā paṭivirato samaṇo
gotamoti . iti vā hi bhikkhave puthujjano tathāgatassa vaṇṇaṃ
vadamāno vadeyya.
[11] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ visūkadassanaṃ anuyuttā viharanti .
Seyyathīdaṃ . naccaṃ gītaṃ vāditaṃ pekkhaṃ akkhānaṃ pāṇissaraṃ vetāḷaṃ
kumbhathūnaṃ sobhanagarakaṃ 2- caṇḍālaṃ vaṃsaṃ dhovanaṃ hatthiyuddhaṃ assayuddhaṃ
mahisayuddhaṃ usabhayuddhaṃ ajayuddhaṃ meṇḍayuddhaṃ kukkuṭayuddhaṃ vaṭṭakayuddhaṃ
daṇḍayuddhaṃ muṭṭhiyuddhaṃ nibbuddhaṃ uyyodhikaṃ balaggaṃ senābyūhaṃ
anīkadassanaṃ iti vā . iti evarūpā visūkadassanā paṭivirato
samaṇo gotamoti . iti vā hi bhikkhave puthujjano tathāgatassa
vaṇṇaṃ vadamāno vadeyya.
[12] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ jūtappamādaṭṭhānānuyogamanuyuttā
viharanti . seyyathīdaṃ . aṭṭhapadaṃ dasapadaṃ ākāsaṃ parihārapathaṃ
santikaṃ khalikaṃ 3- ghaṭikaṃ salākahatthaṃ akkhaṃ paṅgacīraṃ vaṅkakaṃ mokkhacikaṃ
@Footnote: 1 annasannidhintipi annasannidhītipi dissati. 2 sobhananaṅgarakantipi
@sobhaṇagarakantipi sobhanakaraṇantipi sobhaṇakantipi pāṭhantaraṃ. 3 balikaṃ.
Ciṅgulikaṃ 1- pattāḷhakaṃ rathakaṃ dhanukaṃ akkhalikaṃ manesikaṃ 2- yathāvajjaṃ iti
vā . iti evarūpā jūtappamādaṭṭhānānuyogā paṭivirato samaṇo
gotamoti . iti vā hi bhikkhave puthujjano tathāgatassa vaṇṇaṃ
vadamāno vadeyya.
[13] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ uccāsayanamahāsayanaṃ anuyuttā
viharanti . seyyathīdaṃ . āsandiṃ pallaṅkaṃ goṇakaṃ cittakaṃ paṭikaṃ paṭalikaṃ
tūlikaṃ vikatikaṃ uddhalomiṃ 3- ekantalomiṃ kaṭṭhissaṃ 4- koseyyaṃ kuttakaṃ 5-
hatthattharaṃ assattharaṃ rathattharaṃ ajinappaveṇiṃ kādalimigapavarapaccattharaṇaṃ
sauttaracchadaṃ ubhatolohitakūpadhānaṃ iti vā . iti evarūpā
uccāsayanamahāsayanā paṭivirato samaṇo gotamoti . iti
vā hi bhikkhave puthujjano tathāgatassa vaṇṇaṃ vadamāno vadeyya.
[14] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ maṇḍanavibhūsanaṭṭhānānuyogaṃ anuyuttā
viharanti . seyyathīdaṃ . ucchādanaṃ parimaddanaṃ nahāpanaṃ sambāhanaṃ ādāsaṃ
añjanaṃ mālāvilepanaṃ mukhacuṇṇakaṃ mukhālepaṃ 6- hatthabandhaṃ sikhābandhaṃ
daṇḍaṃ nālikaṃ asiṃ khaggaṃ chattaṃ citrupāhanaṃ uṇhīsaṃ maṇiṃ vālavījaniṃ
odātāni vatthāni dīghadasāni iti vā . iti evarūpā
@Footnote: 1 ciṅgulakaṃ. 2 mānesikaṃ. 3 uddalomiṃ. 4 kaṭṭissaṃ.
@5 kuṭṭakaṃ. 6 mukhālepanaṃ.
Maṇḍanavibhūsanaṭṭhānānuyogā paṭivirato samaṇo gotamoti . iti
vā hi bhikkhave puthujjano tathāgatassa vaṇṇaṃ vadamāno vadeyya.
[15] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ tiracchānakathaṃ anuyuttā viharanti .
Seyyathīdaṃ . rājakathaṃ corakathaṃ mahāmattakathaṃ senākathaṃ bhayakathaṃ
yuddhakathaṃ annakathaṃ pānakathaṃ vatthakathaṃ sayanakathaṃ mālākathaṃ gandhakathaṃ
ñātikathaṃ yānakathaṃ gāmakathaṃ nigamakathaṃ nagarakathaṃ janapadakathaṃ itthīkathaṃ
purisakathaṃ 1- sūrakathaṃ visikhākathaṃ kumbhaṭṭhānakathaṃ pubbapetakathaṃ nānattakathaṃ
lokakkhāyikaṃ samuddakkhāyikaṃ iti bhavābhavakathaṃ iti vā . iti
evarūpāya tiracchānakathāya paṭivirato samaṇo gotamoti . iti
vā hi bhikkhave puthujjano tathāgatassa vaṇṇaṃ vadamāno vadeyya.
[16] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ viggāhikakathaṃ anuyuttā viharanti .
Seyyathīdaṃ . na tvaṃ imaṃ dhammavinayaṃ ājānāsi ahaṃ imaṃ dhammavinayaṃ
ājānāmi . kiṃ tvaṃ imaṃ dhammavinayaṃ ājānissasi micchāpaṭipanno
tvamasi ahamasmi sammāpaṭipanno . sahitaṃ me asahitante . pure
vacanīyaṃ pacchā avaca . pacchā vacanīyaṃ pure avaca . adhiciṇṇante
vipparāvattaṃ . āropito te vādo . niggahito tvamasi . cara
vādappamokkhāya nibbeṭhehi vā sace pahosīti . iti evarūpāya
@Footnote: 1 Sī. purisakathanti idaṃ natthi.
Viggāhikakathāya paṭivirato samaṇo gotamoti . iti vā hi bhikkhave
puthujjano tathāgatassa vaṇṇaṃ vadamāno vadeyya.
[17] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ dūteyyapahiṇagamanānuyogaṃ anuyuttā
viharanti . seyyathīdaṃ . raññaṃ rājamahāmattānaṃ khattiyānaṃ brāhmaṇānaṃ
gahapatikānaṃ kumārānaṃ idha gaccha amutra gaccha idaṃ hara amutra idaṃ
āharāti . iti evarūpā dūteyyapahiṇagamanānuyogā paṭivirato
samaṇo gotamoti . iti vā hi bhikkhave puthujjano tathāgatassa
vaṇṇaṃ vadamāno vadeyya.
[18] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te kuhakā ca honti lapakā ca nemittikā
ca nippesikā ca lābhena ca lābhaṃ nijigiṃsitāro . iti evarūpā
kuhanalapanā paṭivirato samaṇo gotamoti . iti vā hi bhikkhave
puthujjano tathāgatassa vaṇṇaṃ vadamāno vadeyya.
Majjhimasīlaṃ niṭṭhitaṃ.
[19] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . aṅgaṃ nimittaṃ uppādaṃ supinaṃ
lakkhaṇaṃ mūsikacchinnaṃ aggihomaṃ dabbihomaṃ thusahomaṃ kaṇahomaṃ
taṇḍulahomaṃ sappihomaṃ telahomaṃ mukhahomaṃ lohitahomaṃ aṅgavijjā
Vatthuvijjā khettavijjā sivavijjā bhūtavijjā bhūrivijjā ahivijjā
visavijjā vicchikavijjā mūsikavijjā sakuṇavijjā vāyasavijjā pakkajjhānaṃ
saraparittānaṃ migacakkaṃ iti vā . iti evarūpāya tiracchānavijjāya
micchājīvā paṭivirato samaṇo gotamoti . iti vā hi bhikkhave
puthujjano tathāgatassa vaṇṇaṃ vadamāno vadeyya.
[20] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . maṇilakkhaṇaṃ daṇḍalakkhaṇaṃ vatthalakkhaṇaṃ
satthalakkhaṇaṃ 1- asilakkhaṇaṃ usulakkhaṇaṃ dhanulakkhaṇaṃ āvudhalakkhaṇaṃ 2-
itthīlakkhaṇaṃ purisalakkhaṇaṃ kumāralakkhaṇaṃ kumārīlakkhaṇaṃ dāsalakkhaṇaṃ
dāsīlakkhaṇaṃ hatthilakkhaṇaṃ assalakkhaṇaṃ mahisalakkhaṇaṃ usabhalakkhaṇaṃ
golakkhaṇaṃ ajalakkhaṇaṃ meṇḍalakkhaṇaṃ kukkuṭalakkhaṇaṃ vaṭṭakalakkhaṇaṃ
godhālakkhaṇaṃ kaṇṇikālakkhaṇaṃ kacchapalakkhaṇaṃ migalakkhaṇaṃ iti vā .
Iti evarūpāya tiracchānavijjāya micchājīvā paṭivirato samaṇo
gotamoti . iti vā hi bhikkhave puthujjano tathāgatassa vaṇṇaṃ
vadamāno vadeyya.
[21] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . raññaṃ niyyānaṃ bhavissati .
@Footnote: 1 Sī. Yu. satthalakkhaṇanti idaṃ na dissati. 2 Sī. āyudhalakkhaṇaṃ.
Raññaṃ aniyyānaṃ bhavissati . abbhantarānaṃ raññaṃ upayānaṃ bhavissati .
Bāhirānaṃ raññaṃ apayānaṃ bhavissati . bāhirānaṃ raññaṃ upayānaṃ
bhavissati . abbhantarānaṃ raññaṃ apayānaṃ bhavissati . abbhantarānaṃ
raññaṃ jayo bhavissati . bāhirānaṃ raññaṃ parājayo bhavissati .
Bāhirānaṃ raññaṃ jayo bhavissati . abbhantarānaṃ raññaṃ parājayo
bhavissati . iti imassa jayo bhavissati imassa parājayo bhavissati
iti vā . iti evarūpāya tiracchānavijjāya micchājīvā paṭivirato
samaṇo gotamoti . iti vā hi bhikkhave puthujjano tathāgatassa vaṇṇaṃ
vadamāno vadeyya.
[22] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . candaggāho bhavissati . suriyaggāho
bhavissati . nakkhattaggāho bhavissati . candimasuriyānaṃ pathagamanaṃ
bhavissati . candimasuriyānaṃ uppathagamanaṃ bhavissati . nakkhattānaṃ
pathagamanaṃ bhavissati . nakkhattānaṃ uppathagamanaṃ bhavissati . ukkāpāto
bhavissati . disāḍāho bhavissati . bhūmicālo bhavissati . devadundubhi
bhavissati . candimasuriyanakkhattānaṃ uggamanaṃ oggamanaṃ saṃkilesaṃ
vodānaṃ bhavissati . evaṃvipāko candaggāho bhavissati . evaṃvipāko
suriyaggāho bhavissati . evaṃvipāko nakkhattaggāho bhavissati .
Evaṃvipākaṃ candimasuriyānaṃ pathagamanaṃ bhavissati . evaṃvipākaṃ candimasuriyānaṃ
Uppathagamanaṃ bhavissati . evaṃvipākaṃ nakkhattānaṃ pathagamanaṃ
bhavissati . evaṃvipākaṃ nakkhattānaṃ uppathagamanaṃ bhavissati . evaṃvipāko
ukkāpāto bhavissati . evaṃvipāko disāḍāho bhavissati .
Evaṃvipāko bhūmicālo bhavissati . evaṃvipāko 1- devadundubhi bhavissati.
Evaṃvipākaṃ candimasuriyanakkhattānaṃ uggamanaṃ oggamanaṃ saṃkilesaṃ vodānaṃ
bhavissati iti vā . iti evarūpāya tiracchānavijjāya micchājīvā
paṭivirato samaṇo gotamoti . iti vā hi bhikkhave puthujjano
tathāgatassa vaṇṇaṃ vadamāno vadeyya.
[23] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena jīvikaṃ
kappenti . seyyathīdaṃ . suvuṭṭhikā bhavissati . dubbuṭṭhikā bhavissati.
Subhikkhaṃ bhavissati . dubbhikkhaṃ bhavissati . khemaṃ bhavissati .
Bhayaṃ bhavissati . rogo bhavissati . ārogyaṃ bhavissati . muddā
gaṇanā saṃkhānaṃ kāveyyaṃ lokāyataṃ iti vā . iti evarūpāya
tiracchānavijjāya micchājīvā paṭivirato samaṇo gotamoti . iti
vā hi bhikkhave puthujjano tathāgatassa vaṇṇaṃ vadamāno vadeyya.
[24] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . āvāhanaṃ vivāhanaṃ saṃvadanaṃ vivadanaṃ
@Footnote: 1 evaṃvipākāti pāṭhena bhavitabbaṃ.
Saṅkiraṇaṃ vikiraṇaṃ subhagakaraṇaṃ dubbhagakaraṇaṃ viruddhagabbhakaraṇaṃ jivhānibandhanaṃ
hanusaṃhananaṃ hatthābhijappanaṃ kaṇṇajappanaṃ ādāsapañhaṃ -* kumārīpaṇhaṃ
devapaṇhaṃ ādiccupaṭṭhānaṃ mahatupaṭṭhānaṃ abbhujjalanaṃ sirīvhāyanaṃ
iti vā . iti evarūpāya tiracchānavijjāya micchājīvā paṭivirato samaṇo
gotamoti . iti vā hi bhikkhave puthujjano tathāgatassa vaṇṇaṃ vadamāno
vadeyya.
[25] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . santikammaṃ paṇidhikammaṃ bhūttikammaṃ 1-
bhūrikammaṃ vassakammaṃ vossakammaṃ vatthukammaṃ vatthuparikaraṇaṃ ācamanaṃ
nahāpanaṃ jūhanaṃ vamanaṃ virecanaṃ uddhavirecanaṃ adhovirecanaṃ sīsavirecanaṃ
kaṇṇatelaṃ nettappānaṃ natthukammaṃ añjanaṃ paccañjanaṃ sālākiyaṃ
sallakattiyaṃ dārakatikicchā mūlabhesajjānaṃ anuppadānaṃ osadhīnaṃ
paṭimokkho iti vā . iti evarūpāya tiracchānavijjāya micchājīvā
paṭivirato samaṇo gotamoti . iti vā hi bhikkhave puthujjano
tathāgatassa vaṇṇaṃ vadamāno vadeyya . idaṃ kho taṃ bhikkhave
appamattakaṃ oramattakaṃ sīlamattakaṃ yena puthujjano tathāgatassa
vaṇṇaṃ vadamāno vadeyya.
Mahāsīlaṃ niṭṭhitaṃ.
@Footnote: 1 Sī. Yu. bhūttikammanti idaṃ natthi.
@* mīkārkṛ´์ khagœ ādāsapaṇhaṃ peḌna ādāsapañhaṃ
[26] Atthi bhikkhave aññe va dhammā gambhīrā duddasā duranubodhā
santā paṇītā atakkāvacarā nipuṇā paṇḍitavedanīyā ye tathāgato
sayaṃ abhiññā sacchikatvā pavedeti yehi tathāgatassa yathābhuccaṃ
vaṇṇaṃ sammā vadamānā vadeyyuṃ . katame ca te bhikkhave dhammā
gambhīrā duddasā duranubodhā santā paṇītā atakkāvacarā nipuṇā
paṇḍitavedanīyā ye tathāgato sayaṃ abhiññā sacchikatvā pavedeti
yehi tathāgatassa yathābhuccaṃ vaṇṇaṃ sammā vadamānā vadeyyuṃ.
[27] Santi bhikkhave eke samaṇabrāhmaṇā pubbantakappikā
pubbantānudiṭṭhino pubbantaṃ ārabbha anekavihitāni adhimuttipadāni
abhivadanti aṭṭhārasahi vatthūhi . te ca bhonto samaṇabrāhmaṇā
kimāgamma kimārabbha pubbantakappikā pubbantānudiṭṭhino pubbantaṃ
ārabbha anekavihitāni adhimuttipadāni abhivadanti aṭṭhārasahi vatthūhi.
{27.1} Santi bhikkhave eke samaṇabrāhmaṇā sassatavādā sassataṃ
attānañca lokañca paññapenti 1- catūhi vatthūhi . te ca bhonto
samaṇabrāhmaṇā kimāgamma kimārabbha sassatavādā sassataṃ
attānañca lokañca paññapenti catūhi vatthūhi.
{27.2} Idha bhikkhave ekacco samaṇo vā brāhmaṇo vā
ātappamanvāya padhānamanvāya anuyogamanvāya appamādamanvāya
sammāmanasikāramanvāya tathārūpaṃ cetosamādhiṃ phusati yathā
samāhite citte (2- parisuddhe pariyodāte anaṅgaṇe
@Footnote: 1 paññāpenti. 2 Sī. parisuddhetyādīni natthi.
Vigatūpakkilese) anekavihitaṃ pubbenivāsaṃ anussarati . seyyathīdaṃ .
Ekampi jātiṃ dvepi jātiyo tissopi jātiyo catassopi jātiyo
pañcapi jātiyo dasapi jātiyo vīsampi 1- jātiyo tiṃsampi 2- jātiyo
cattāḷīsampi 3- jātiyo paññāsampi jātiyo jātisatampi jātisahassampi
jātisatasahassampi anekānipi jātisatāni anekānipi jātisahassāni
anekānipi jātisatasahassāni . amutrāsiṃ evaṃnāmo evaṃgotto
evaṃvaṇṇo evamāhāro evaṃsukhadukkhapaṭisaṃvedī evamāyupariyanto
so tato cuto amutra udapādiṃ 4- tatrāpāsiṃ evaṃnāmo evaṃgotto
evaṃvaṇṇo evamāhāro evaṃsukhadukkhapaṭisaṃvedī evamāyupariyanto
so tato cuto idhūpapannoti . iti sākāraṃ sauddesaṃ anekavihitaṃ
pubbenivāsaṃ anussarati.
{27.3} So evamāha sassato attā ca loko ca vañjho kūṭaṭṭho
esikaṭṭhāyī ṭhito 5- te ca sattā sandhāvanti saṃsaranti cavanti upapajjanti
atthitveva sassatisamaṃ. Taṃ kissa hetu. Ahaṃ hi ātappamanvāya padhānamanvāya
anuyogamanvāya appamādamanvāya sammāmanasikāramanvāya tathārūpaṃ
cetosamādhiṃ phusāmi yathā samāhite citte anekavihitaṃ pubbenivāsaṃ
anussarāmi . seyyathīdaṃ . ekampi jātiṃ dvepi jātiyo tissopi
jātiyo catassopi jātiyo pañcapi jātiyo dasapi jātiyo
@Footnote: 1 vīsatimpi. 2 Yu. tīsampi. 3 cattārīsampi. 4 uppādiṃ.
@5 ekaṭṭhāyiṭṭhito.
Vīsampi jātiyo tiṃsampi jātiyo cattāḷīsampi jātiyo paññāsampi
jātiyo jātisatampi jātisahassampi jātisatasahassampi anekānipi
jātisatāni anekānipi jātisahassāni anekānipi jātisatasahassāni .
Amutrāsiṃ evaṃnāmo evaṃgotto evaṃvaṇṇo evamāhāro
evaṃsukhadukkhapaṭisaṃvedī evamāyupariyanto so tato cuto amutra
udapādiṃ tatrāpāsiṃ evaṃnāmo evaṃgotto evaṃvaṇṇo evamāhāro
evaṃsukhadukkhapaṭisaṃvedī evamāyupariyanto so tato cuto idhūpapannoti .
Iti sākāraṃ sauddesaṃ anekavihitaṃ pubbenivāsaṃ anussarāmi .
Imināmahaṃ etaṃ jānāmi yathā sassato attā ca loko ca vañjho
kūṭaṭṭho esikaṭṭhāyī ṭhito te ca sattā sandhāvanti saṃsaranti
cavanti upapajjanti atthitveva sassatisamanti . idaṃ bhikkhave paṭhamaṃ
ṭhānaṃ yaṃ āgamma yaṃ ārabbha eke samaṇabrāhmaṇā sassatavādā
sassataṃ attānañca lokañca paññapenti.
[28] Dutiye ca bhonto samaṇabrāhmaṇā kimāgamma kimārabbha
sassatavādā sassataṃ attānañca lokañca paññapenti . idha
bhikkhave ekacco samaṇo vā brāhmaṇo vā ātappamanvāya
padhānamanvāya anuyogamanvāya appamādamanvāya sammāmanasikāramanvāya
tathārūpaṃ cetosamādhiṃ phusati yathā samāhite citte anekavihitaṃ
pubbenivāsaṃ anussarati . seyyathīdaṃ . ekampi saṃvaṭṭavivaṭṭaṃ dvepi
saṃvaṭṭavivaṭṭāni tīṇipi saṃvaṭṭavivaṭṭāni cattāripi saṃvaṭṭavivaṭṭāni
Pañcapi saṃvaṭṭavivaṭṭāni dasapi saṃvaṭṭavivaṭṭāni . amutrāsiṃ evaṃnāmo
evaṃgotto evaṃvaṇṇo evamāhāro evaṃsukhadukkhapaṭisaṃvedī evamāyupariyanto
so tato cuto amutra udapādiṃ tatrāpāsiṃ evaṃnāmo evaṃgotto evaṃvaṇṇo
evamāhāro evaṃsukhadukkhapaṭisaṃvedī evamāyupariyanto so tato cuto
idhūpapannoti. Iti sākāraṃ sauddesaṃ anekavihitaṃ pubbenivāsaṃ anussarati.
{28.1} So evamāha sassato attā ca loko ca vañjho kūṭaṭṭho
esikaṭṭhāyī ṭhito te ca sattā sandhāvanti saṃsaranti cavanti upapajjanti
atthitveva sassatisamaṃ. Taṃ kissa hetu. Ahañhi ātappamanvāya padhānamanvāya
anuyogamanvāya appamādamanvāya sammāmanasikāramanvāya tathārūpaṃ
cetosamādhiṃ phusāmi yathā samāhite citte anekavihitaṃ pubbenivāsaṃ
anussarāmi . seyyathīdaṃ . ekampi saṃvaṭṭavivaṭṭaṃ dvepi saṃvaṭṭavivaṭṭāni
tīṇipi saṃvaṭṭavivaṭṭāni cattāripi saṃvaṭṭavivaṭṭāni pañcapi saṃvaṭṭavivaṭṭāni
dasapi saṃvaṭṭavivaṭṭāni amutrāsiṃ evaṃnāmo evaṃgotto evaṃvaṇṇo
evamāhāro evaṃsukhadukkhapaṭisaṃvedī evamāyupariyanto so tato cuto amutra
udapādiṃ tatrāpāsiṃ evaṃnāmo evaṃgotto evaṃvaṇṇo evamāhāro
evaṃsukhadukkhapaṭisaṃvedī evamāyupariyanto so tato cuto idhūpapannoti . iti
sākāraṃ sauddesaṃ anekavihitaṃ pubbenivāsaṃ anussarāmi. Imināmahaṃ etaṃ
jānāmi yathā sassato attā ca loko ca vañjho kūṭaṭṭho esikaṭṭhāyī ṭhito te
Ca sattā sandhāvanti saṃsaranti cavanti upapajjanti atthitveva
sassatisamanti . idaṃ bhikkhave dutiyaṃ ṭhānaṃ yaṃ āgamma yaṃ ārabbha
eke samaṇabrāhmaṇā sassatavādā sassataṃ attānañca lokañca
paññapenti.
[29] Tatiye ca bhonto samaṇabrāhmaṇā kimāgamma kimārabbha
sassatavādā sassataṃ attānañca lokañca paññapenti . idha bhikkhave
ekacco samaṇo vā brāhmaṇo vā ātappamanvāya padhānamanvāya
anuyogamanvāya appamādamanvāya sammāmanasikāramanvāya
tathārūpaṃ cetosamādhiṃ phusati yathā samāhite citte anekavihitaṃ
pubbenivāsaṃ anussarati . seyyathīdaṃ . dasapi saṃvaṭṭavivaṭṭāni vīsampi
saṃvaṭṭavivaṭṭāni tiṃsampi saṃvaṭṭavivaṭṭāni cattāḷīsampi saṃvaṭṭavivaṭṭāni .
Amutrāsiṃ evaṃnāmo evaṃgotto evaṃvaṇṇo evamāhāro
evaṃsukhadukkhapaṭisaṃvedī evamāyupariyanto so tato cuto amutra
udapādiṃ tatrāpāsiṃ evaṃnāmo evaṃgotto evaṃvaṇṇo evamāhāro
evaṃsukhadukkhapaṭisaṃvedī evamāyupariyanto so tato cuto idhūpapannoti .
Iti sākāraṃ sauddesaṃ anekavihitaṃ pubbenivāsaṃ anussarati.
{29.1} So evamāha sassato attā ca loko ca vañjho kūṭaṭṭho
esikaṭṭhāyī ṭhito te ca sattā sandhāvanti saṃsaranti cavanti upapajjanti
atthitveva sassatisamaṃ . taṃ kissa hetu . ahañhi ātappamanvāya
padhānamanvāya anuyogamanvāya appamādamanvāya sammāmanasikāramanvāya
Tathārūpaṃ cetosamādhiṃ phusāmi yathā samāhite citte anekavihitaṃ
pubbenivāsaṃ anussarāmi . seyyathīdaṃ . dasapi saṃvaṭṭavivaṭṭāni
vīsampi saṃvaṭṭavivaṭṭāni tiṃsampi saṃvaṭṭavivaṭṭāni cattāḷīsampi
saṃvaṭṭavivaṭṭāni . amutrāsiṃ evaṃnāmo evaṃgotto evaṃvaṇṇo
evamāhāro evaṃsukhadukkhapaṭisaṃvedī evamāyupariyanto so tato cuto
amutra udapādiṃ tatrāpāsiṃ evaṃnāmo evaṃgotto evaṃvaṇṇo evamāhāro
evaṃsukhadukkhapaṭisaṃvedī evamāyupariyanto so tato cuto idhūpapannoti .
Iti sākāraṃ sauddesaṃ anekavihitaṃ pubbenivāsaṃ anussarāmi .
Imināmahaṃ etaṃ jānāmi yathā sassato attā ca loko ca
vañjho kūṭaṭṭho esikaṭṭhāyī ṭhito te ca sattā sandhāvanti
saṃsaranti cavanti upapajjanti atthitveva sassatisamanti . idaṃ
bhikkhave tatiyaṃ ṭhānaṃ yaṃ āgamma yaṃ ārabbha eke samaṇabrāhmaṇā
sassatavādā sassataṃ attānañca lokañca paññapenti.
[30] Catutthe ca bhonto samaṇabrāhmaṇā kimāgamma kimārabbha
sassatavādā sassataṃ attānañca lokañca paññapenti . idha
bhikkhave ekacco samaṇo vā brāhmaṇo vā takkī hoti vimaṃsī 1-
so takkapariyāhataṃ vimaṃsānucaritaṃ sayaṃ pāṭibhāṇaṃ evamāha sassato
attā ca loko ca vañjho kūṭaṭṭho esikaṭṭhāyī ṭhito te
ca sattā sandhāvanti saṃsaranti cavanti upapajjanti atthitveva
@Footnote: 1 Sī. vīmaṃsī.
Sassatisamanti . idaṃ bhikkhave catutthaṃ ṭhānaṃ yaṃ āgamma yaṃ ārabbha
eke samaṇabrāhmaṇā sassatavādā sassataṃ attānañca lokañca
paññapenti . imehi kho te bhikkhave samaṇabrāhmaṇā sassatavādā
sassataṃ attānañca lokañca paññapenti catūhi vatthūhi . ye hi
keci bhikkhave samaṇabrāhmaṇā sassatavādā sassataṃ attānañca
lokañca paññapenti sabbe te imeheva catūhi vatthūhi etesaṃ
vā aññatarena natthi ito bahiddhā.
{30.1} Tayidaṃ bhikkhave tathāgato pajānāti ime diṭṭhiṭṭhānā
evaṃgahitā evaṃparāmaṭṭhā evaṃgatikā bhavanti evaṃabhisamparāyāti .
Tañca tathāgato pajānāti tato ca uttaritaraṃ pajānāti tañca pajānanaṃ 1-
na parāmasati . aparāmasato cassa paccattaññeva nibbuti viditā vedanānaṃ
samudayañca atthaṅgamañca assādañca ādīnavañca nissaraṇañca yathābhūtaṃ
viditvā. Anupādā vimutto bhikkhave tathāgato. Ime kho te bhikkhave dhammā
gambhīrā duddasā duranubodhā santā paṇītā atakkāvacarā nipuṇā
paṇḍitavedanīyā ye tathāgato sayaṃ abhiññā sacchikatvā pavedeti
yehi tathāgatassa yathābhuccaṃ vaṇṇaṃ sammā vadamānā vadeyyuṃ.
Paṭhamabhāṇavāraṃ.
[31] Santi bhikkhave eke samaṇabrāhmaṇā ekaccasassatikā
ekaccaasassatikā ekaccaṃ sassataṃ ekaccaṃ asassataṃ attānañca
@Footnote: 1 jānanaṃ.
Lokañca paññapenti catūhi vatthūhi . te ca bhonto samaṇabrāhmaṇā
kimāgamma kimārabbha ekaccasassatikā ekaccaasassatikā ekaccaṃ
sassataṃ ekaccaṃ asassataṃ attānañca lokañca paññapenti catūhi
vatthūhi.
{31.1} Hoti kho so bhikkhave samayo yaṃ kadāci karahaci dīghassa addhuno
accayena ayaṃ loko saṃvaṭṭati . saṃvaṭṭamāne loke yebhuyyena sattā
ābhassarasaṃvattanikā honti . te tattha honti manomayā pītibhakkhā
sayampabhā antalikkhacarā subhaṭṭhāyino ciraṃ dīghamaddhānaṃ tiṭṭhanti .
Hoti kho so bhikkhave samayo yaṃ kadāci karahaci dīghassa addhuno accayena
ayaṃ loko vivaṭṭati.
{31.2} Vivaṭṭamāne loke suññaṃ brahmavimānaṃ pātubhavati. Atha
aññataro satto āyukkhayā vā puññakkhayā vā ābhassarakāyā
cavitvā suññaṃ brahmavimānaṃ upapajjati . sopi tattha hoti manomayo
pītibhakkho sayampabho antalikkhacaro subhaṭṭhāyī ciraṃ dīghamaddhānaṃ
tiṭṭhati.
{31.3} Tattha tassa ekassa dīgharattaṃ nivusitattā anabhirati paritassanā
uppajjati aho vata aññepi sattā itthattaṃ āgaccheyyunti .
Athaññepi sattā āyukkhayā vā puññakkhayā vā ābhassarakāyā
cavitvā brahmavimānaṃ upapajjanti tassa sattassa sahabyataṃ .
Tepi tattha honti manomayā pītibhakkhā sayampabhā antalikkhacarā
subhaṭṭhāyino ciraṃ dīghamaddhānaṃ tiṭṭhanti . tatra bhikkhave yo so
satto paṭhamaṃ upapanno tassa evaṃ hoti ahamasmi brahmā
Mahābrahmā abhibhū anabhibhūto aññadatthudaso vasavatti issaro
kattā nimmitā 1- seṭṭho sajjitā 2- vasī pitā bhūtabhabyānaṃ mayā
ime sattā nimmitā . taṃ kissa hetu . mamaṃ hi pubbe etadahosi
aho vata aññepi sattā itthattaṃ āgaccheyyunti . iti mamaṃ ca
manopaṇidhi ime ca sattā itthattaṃ āgatāti.
{31.4} Yepi te sattā pacchā upapannā tesampi evaṃ hoti ayaṃ kho
bhavaṃ brahmā mahābrahmā abhibhū anabhibhūto aññadatthudaso vasavatti
issaro kattā nimmitā seṭṭho sajjitā vasī pitā bhūtabhabyānaṃ
iminā mayaṃ bhotā brahmunā nimmitā . taṃ kissa hetu. Imañhi mayaṃ
addasāma idha paṭhamaṃ upapannaṃ mayaṃ panamhā pacchā upapannāti .
Tatra bhikkhave yo so satto paṭhamaṃ upapanno so dīghāyukataro ca hoti
vaṇṇavantataro ca mahesakkhataro ca . Ye pana te sattā pacchā upapannā
te appāyukatarā ca honti dubbaṇṇatarā ca appesakkhatarā ca.
{31.5} Ṭhānaṃ kho panetaṃ bhikkhave vijjati yaṃ aññataro satto tamhā
kāyā cavitvā itthattaṃ āgacchati itthattaṃ āgato samāno agārasmā
anagāriyaṃ pabbajati agārasmā anagāriyaṃ pabbajito samāno ātappamanvāya
padhānamanvāya anuyogamanvāya appamādamanvāya sammāmanasikāramanvāya
tathārūpaṃ cetosamādhiṃ phusati yathā samāhite citte taṃ pubbenivāsaṃ
@Footnote: 1 Sī. Yu. nimmātā. 2 Sī. Yu. sañjitā.
Anussarati tato parannānussarati.
{31.6} So evamāha yo kho so bhavaṃ brahmā mahābrahmā abhibhū
anabhibhūto aññadatthudaso vasavatti issaro kattā nimmitā seṭṭho
sajjitā vasī pitā bhūtabhabyānaṃ yena mayaṃ bhotā brahmunā nimmitā so
nicco dhuvo sassato avipariṇāmadhammo sassatisamaṃ tatheva ṭhassati. Ye pana
mayaṃ ahumhā tena bhotā brahmunā nimmitā te mayaṃ aniccā addhuvā
appāyukā cavanadhammā itthattaṃ āgatāti . idaṃ bhikkhave paṭhamaṃ
ṭhānaṃ yaṃ āgamma yaṃ ārabbha eke samaṇabrāhmaṇā ekaccasassatikā
ekaccaasassatikā ekaccaṃ sassataṃ ekaccaṃ asassataṃ attānañca
lokañca paññapenti.
[32] Dutiye ca bhonto samaṇabrāhmaṇā kimāgamma kimārabbha
ekaccasassatikā ekaccaasassatikā ekaccaṃ sassataṃ ekaccaṃ asassataṃ
attānañca lokañca paññapenti . santi bhikkhave khiḍḍāpadosikā
nāma devā . te ativelaṃ hassakhiḍḍāratidhammasamāpannā viharanti .
Tesaṃ ativelaṃ hassakhiḍḍāratidhammasamāpannānaṃ viharataṃ sati pamussati 1-.
Satiyā sammosā te devā tamhā kāyā cavanti.
{32.1} Ṭhānaṃ kho panetaṃ bhikkhave vijjati yaṃ aññataro satto tamhā
kāyā cavitvā itthattaṃ āgacchati itthattaṃ āgato samāno agārasmā
anagāriyaṃ pabbajati agārasmā anagāriyaṃ pabbajito samāno ātappamanvāya
@Footnote: 1 sammussati.
Padhānamanvāya anuyogamanvāya appamādamanvāya sammāmanasikāramanvāya
tathārūpaṃ cetosamādhiṃ phusati yathā samāhite citte taṃ pubbenivāsaṃ anussarati
tato paraṃ nānussarati.
{32.2} So evamāha ye kho te bhonto devā na khiḍḍāpadosikā
te na ativelaṃ hassakhiḍḍāratirammasamāpannā viharanti . Tesaṃ na ativelaṃ
hassakhiḍḍāratidhammasamāpannānaṃ viharataṃ sati na pamussati . satiyā
asammosā te devā tamhā kāyā na cavanti niccā dhuvā sassatā
avipariṇāmadhammā sassatisamaṃ tatheva ṭhassanti . ye pana mayaṃ ahumhā 1-
khiḍḍāpadosikā te mayaṃ ativelaṃ hassakhiḍḍāratidhammasamāpannā
viharimhā 2- . tesanno ativelaṃ hassakhiḍḍāratidhammasamāpannānaṃ
viharataṃ sati pamussati . satiyā sammosā evaṃ mayaṃ tamhā kāyā cutā
aniccā addhuvā appāyukā cavanadhammā itthattaṃ āgatāti . idaṃ
bhikkhave dutiyaṃ ṭhānaṃ yaṃ āgamma yaṃ ārabbha eke samaṇabrāhmaṇā
ekaccasassatikā ekaccaasassatikā ekaccaṃ sassataṃ ekaccaṃ asassataṃ
attānañca lokañca paññapenti.
[33] Tatiye ca bhonto samaṇabrāhmaṇā kimāgamma kimārabbha
ekaccasassatikā ekaccaasassatikā ekaccaṃ sassataṃ ekaccaṃ asassataṃ
attānañca lokañca paññapenti . santi bhikkhave manopadosikā
@Footnote: 1 Sī. ahumha. 2 Sī. viharimha.
Nāma devā . te ativelaṃ aññamaññaṃ upanijjhāyanti . te ativelaṃ
aññamaññaṃ upanijjhāyantā aññamaññamhi cittāni padosenti .
Te aññamaññaṃ paduṭṭhacittā kilantakāyā kilantacittā . te devā
tamhā kāyā cavanti.
{33.1} Ṭhānaṃ kho panetaṃ bhikkhave vijjati yaṃ aññataro satto tamhā
kāyā cavitvā itthattaṃ āgacchati itthattaṃ āgato samāno agārasmā
anagāriyaṃ pabbajati agārasmā anagāriyaṃ pabbajito samāno ātappamanvāya
padhānamanvāya anuyogamanvāya appamādamanvāya sammāmanasikāramanvāya
tathārūpaṃ cetosamādhiṃ phusati yathā samāhite citte taṃ pubbenivāsaṃ
anussarati tato paraṃ nānussarati.
{33.2} So evamāha ye kho te bhonto devā na manopadosikā
te nātivelaṃ aññamaññaṃ upanijjhāyanti . te nātivelaṃ aññamaññaṃ
upanijjhāyantā aññamaññamhi *- cittāni nappadussenti 1- . te
aññamaññaṃ *- appaduṭṭhacittā akilantakāyā akilantacittā . te
devā tamhā kāyā na cavanti niccā dhuvā sassatā avipariṇāmadhammā
sassatisamaṃ tatheva ṭhassanti . ye pana mayaṃ ahumhā 2- manopadosikā te
mayaṃ ativelaṃ aññamaññaṃ upanijjhāyimhā 3- . te mayaṃ ativelaṃ
aññamaññaṃ upanijjhāyantā aññamaññamhi cittāni
padosimhā 4- . te mayaṃ aññamaññaṃ paduṭṭhacittā kilantakāyā
@Footnote: 1 Sī. nappadūsenti. 2 Sī. ahumha. 3 Sī. upanijjhāyimha.
@4 Sī. padosimha.
@* mīkārkṛ´์ khagœ añmaññamhi peḌna aññamaññamhi
@* mīkārkṛ´์ khagœ añmaññaṃ peḌna aññamaññaṃ
Kilantacittā . evaṃ mayaṃ tamhā kāyā cutā aniccā addhuvā
appāyukā cavanadhammā itthattaṃ āgatāti . idaṃ bhikkhave tatiyaṃ
ṭhānaṃ yaṃ āgamma yaṃ ārabbha eke samaṇabrāhmaṇā ekaccasassatikā
ekaccaasassatikā ekaccaṃ sassataṃ ekaccaṃ asassataṃ attānañca
lokañca paññapenti.
[34] Catutthe ca bhonto samaṇabrāhmaṇā kimāgamma kimārabbha
ekaccasassatikā ekaccaasassatikā ekaccaṃ sassataṃ ekaccaṃ asassataṃ
attānañca lokañca paññapenti . idha bhikkhave ekacco samaṇo
vā brāhmaṇo vā takkī hoti vimaṃsī . so takkapariyāhataṃ
vimaṃsānucaritaṃ sayaṃpāṭibhāṇaṃ 1- evamāha yaṃ kho idaṃ vuccati cakkhuntipi
sotantipi ghānantipi jivhātipi kāyotipi ayaṃ attā anicco
addhuvo asassato vipariṇāmadhammo . yañca kho idaṃ vuccati
cittanti vā manoti vā viññāṇanti vā ayaṃ attā nicco
dhuvo sassato avipariṇāmadhammo sassatisamaṃ tatheva ṭhassatīti .
Idaṃ bhikkhave catutthaṃ ṭhānaṃ yaṃ āgamma yaṃ ārabbha eke samaṇabrāhmaṇā
ekaccasassatikā ekaccaasassatikā ekaccaṃ sassataṃ ekaccaṃ asassataṃ
attānañca lokañca paññapenti . imehi kho te bhikkhave
samaṇabrāhmaṇā ekaccasassatikā ekaccaasassatikā ekaccaṃ
sassataṃ ekaccaṃ asassataṃ attānañca lokañca paññapenti
@Footnote: 1 Sī. Yu. sayaṃpaṭibhānaṃ.
Catūhi vatthūhi . ye hi keci bhikkhave samaṇā vā brāhmaṇā vā
ekaccasassatikā ekaccaasassatikā ekaccaṃ sassataṃ ekaccaṃ
asassataṃ attānañca lokañca paññapenti sabbe te imeheva
catūhi vatthūhi etesaṃ vā aññatarena natthi ito bahiddhā.
{34.1} Tayidaṃ bhikkhave tathāgato pajānāti ime diṭṭhiṭṭhānā
evaṃgahitā evaṃparāmaṭṭhā evaṃgatikā bhavanti evaṃabhisamparāyāti .
Tañca tathāgato pajānāti tato ca uttaritaraṃ pajānāti tañca pajānanaṃ
na parāmasati . aparāmasato cassa paccattaññeva nibbuti viditā
vedanānaṃ samudayañca atthaṅgamañca assādañca ādīnavañca
nissaraṇañca yathābhūtaṃ viditvā . anupādā vimutto bhikkhave
tathāgato . ime kho bhikkhave dhammā gambhīrā duddasā duranubodhā
santā paṇītā atakkāvacarā nipuṇā paṇḍitavedanīyā ye tathāgato
sayaṃ abhiññā sacchikatvā pavedeti yehi tathāgatassa yathābhuccaṃ
vaṇṇaṃ sammā vadamānā vadeyyuṃ.
[35] Santi bhikkhave eke samaṇabrāhmaṇā antānantikā antānantaṃ
lokassa paññapenti catūhi vatthūhi . te ca bhonto samaṇabrāhmaṇā
kimāgamma kimārabbha antānantikā antānantaṃ lokassa paññapenti
catūhi vatthūhi . idha bhikkhave ekacco samaṇo vā brāhmaṇo vā
ātappamanvāya padhānamanvāya anuyogamanvāya appamādamanvāya
sammāmanasikāramanvāya tathārūpaṃ cetosamādhiṃ phusati
Yathā samāhite citte antasaññī lokasmiṃ viharati . so evamāha
antavā ayaṃ loko parivaṭumo . taṃ kissa hetu. Ahaṃ hi ātappamanvāya
padhānamanvāya anuyogamanvāya appamādamanvāya sammāmanasikāramanvāya
tathārūpaṃ cetosamādhiṃ phusāmi yathā samāhite citte antasaññī lokasmiṃ
viharāmi . imināmahaṃ etaṃ jānāmi yathā antavā ayaṃ loko parivaṭumoti.
Idaṃ bhikkhave paṭhamaṃ ṭhānaṃ yaṃ āgamma yaṃ ārabbha eke samaṇabrāhmaṇā
antānantikā antānantaṃ lokassa paññapenti.
[36] Dutiye ca bhonto samaṇabrāhmaṇā kimāgamma kimārabbha
antānantikā antānantaṃ lokassa paññapenti . idha bhikkhave
ekacco samaṇo vā brāhmaṇo vā ātappamanvāya padhānamanvāya
anuyogamanvāya appamādamanvāya sammāmanasikāramanvāya tathārūpaṃ
cetosamādhiṃ phusati yathā samāhite citte anantasaññī lokasmiṃ
viharati . so evamāha ananto ayaṃ loko apariyanto ye te
samaṇabrāhmaṇā evamāhaṃsu antavā ayaṃ loko parivaṭumoti . tesaṃ
musā . ananto ayaṃ loko apariyanto . taṃ kissa hetu. Ahaṃ hi
ātappamanvāya padhānamanvāya anuyogamanvāya appamādamanvāya
sammāmanasikāramanvāya tathārūpaṃ cetosamādhiṃ phusāmi yathā
samāhite citte anantasaññī lokasmiṃ viharāmi . imināmahaṃ etaṃ
jānāmi yathā ananto ayaṃ loko apariyantoti . idaṃ bhikkhave
Dutiyaṃ ṭhānaṃ yaṃ āgamma yaṃ ārabbha eke samaṇabrāhmaṇā
antānantikā antānantaṃ lokassa paññapenti.
[37] Tatiye ca bhonto samaṇabrāhmaṇā kimāgamma kimārabbha
antānantikā antānantaṃ lokassa paññapenti . idha bhikkhave
ekacco samaṇo vā brāhmaṇo vā ātappamanvāya padhānamanvāya
anuyogamanvāya appamādamanvāya sammāmanasikāramanvāya tathārūpaṃ
cetosamādhiṃ phusati yathā samāhite citte uddhamadho antasaññī
lokasmiṃ viharati tiriyaṃ anantasaññī . so evamāha antavā ca
ayaṃ loko ananto ca ye te samaṇabrāhmaṇā evamāhaṃsu antavā
ayaṃ loke parivaṭumoti . tesaṃ musā . yepi te samaṇabrāhmaṇā
evamāhaṃsu ananto ayaṃ loko apariyantoti . tesaṃpi musā .
Antavā ca ayaṃ loko ananto ca . taṃ kissa hetu . ahaṃ hi
ātappamanvāya padhānamanvāya anuyogamanvāya appamādamanvāya
sammāmanasikāramanvāya tathārūpaṃ cetosamādhiṃ phusāmi yathā samāhite
citte uddhamadho antasaññī lokasmiṃ viharāmi tiriyaṃ anantasaññī .
Imināmahaṃ etaṃ jānāmi yathā antavā ca ayaṃ loko ananto cāti.
Idaṃ bhikkhave tatiyaṃ ṭhānaṃ yaṃ āgamma yaṃ ārabbha eke samaṇabrāhmaṇā
antānantikā antānantaṃ lokassa paññapenti.
[38] Catutthe ca bhonto samaṇabrāhmaṇā kimāgamma kimārabbha
antānantikā antānantaṃ lokassa paññapenti . idha bhikkhave
Ekacco samaṇo vā brāhmaṇo vā takkī hoti vimaṃsī . so
takkapariyāhataṃ vimaṃsānucaritaṃ sayaṃpāṭibhāṇaṃ evamāha nevāyaṃ
loko antavā na panānanto ye te samaṇabrāhmaṇā evamāhaṃsu
antavā ayaṃ loko parivaṭumoti . tesampi musā . yepi te
samaṇabrāhmaṇā evamāhaṃsu ananto ayaṃ loko apariyantoti .
Tesampi musā . yepi te samaṇabrāhmaṇā evamāhaṃsu antavā
ca ayaṃ loko ananto cāti . Tesampi musā. Nevāyaṃ loko antavā
na panānantoti . idaṃ bhikkhave catutthaṃ ṭhānaṃ yaṃ āgamma yaṃ ārabbha
eke samaṇabrāhmaṇā antānantikā antānantaṃ lokassa
paññapenti.
{38.1} Imehi kho te bhikkhave samaṇabrāhmaṇā antānantikā
antānantaṃ lokassa paññapenti catūhi vatthūhi . ye hi keci
bhikkhave samaṇā vā brāhmaṇā vā antānantikā antānantaṃ
lokassa paññapenti sabbe te imeheva catūhi vatthūhi etesaṃ
vā aññatarena natthi ito bahiddhā.
{38.2} Tayidaṃ bhikkhave tathāgato pajānāti ime diṭṭhiṭṭhānā
evaṃgahitā evaṃparāmaṭṭhā evaṃgatikā bhavanti evaṃabhisamparāyāti .
Tañca tathāgato pajānāti tato ca uttaritaraṃ pajānāti tañca
pajānanaṃ na parāmasati . aparāmasato cassa paccattaññeva nibbuti
viditā vedanānaṃ samudayañca atthaṅgamañca assādañca
ādīnavañca nissaraṇañca yathābhūtaṃ viditvā . anupādā
vimutto bhikkhave tathāgato . ime kho te bhikkhave dhammā gambhīrā
Duddasā duranubodhā santā paṇītā atakkāvacarā nipuṇā
paṇḍitavedanīyā ye tathāgato sayaṃ abhiññā sacchikatvā pavedeti
yehi tathāgatassa yathābhuccaṃ vaṇṇaṃ sammā vadamānā vadeyyuṃ.
[39] Santi bhikkhave eke samaṇabrāhmaṇā amarāvikkhepikā tattha
tattha paṇhaṃ puṭṭhā samānā vācāvikkhepaṃ āpajjanti amarāvikkhepaṃ
catūhi vatthūhi . te ca bhonto samaṇabrāhmaṇā kimāgamma kimārabbha
amarāvikkhepikā tattha tattha paṇhaṃ puṭṭhā samānā vācāvikkhepaṃ
āpajjanti amarāvikkhepaṃ catūhi vatthūhi.
{39.1} Idha bhikkhave ekacco samaṇo vā brāhmaṇo vā idaṃ
kusalanti yathābhūtaṃ nappajānāti idaṃ akusalanti yathābhūtaṃ nappajānāti .
Tassa evaṃ hoti ahaṃ kho idaṃ kusalanti yathābhūtaṃ nappajānāmi idaṃ akusalanti
yathābhūtaṃ nappajānāmi ahañce kho 1- pana idaṃ kusalanti yathābhūtaṃ
appajānanto idaṃ akusalanti yathābhūtaṃ appajānanto idaṃ kusalanti
vā byākareyyaṃ idaṃ akusalanti vā byākareyyaṃ taṃ mamassa musā yaṃ
mamassa musā so mamassa vighāto yo mamassa vighāto so mamassa
antarāyoti . iti so musāvādabhayā musāvādaparijegucchā nevidaṃ
kusalanti byākaroti na panidaṃ akusalanti byākaroti tattha tattha
paṇhaṃ puṭṭho samāno vācāvikkhepaṃ āpajjati amarāvikkhepaṃ
evantipi me no . tathātipi me no. Aññathātipi me no. Notipi
@Footnote: 1 Sī. Yu. ahañceva kho.
Me no . no notipi me noti . idaṃ bhikkhave paṭhamaṃ ṭhānaṃ yaṃ
āgamma yaṃ ārabbha eke samaṇabrāhmaṇā amarāvikkhepikā tattha
tattha paṇhaṃ puṭṭhā samānā vācāvikkhepaṃ āpajjanti amarāvikkhepaṃ.
[40] Dutiye ca bhonto samaṇabrāhmaṇā kimāgamma kimārabbha
amarāvikkhepikā tattha tattha paṇhaṃ puṭṭhā samānā vācāvikkhepaṃ
āpajjanti amarāvikkhepaṃ . idha bhikkhave ekacco samaṇo vā
brāhmaṇo vā idaṃ kusalanti yathābhūtaṃ nappajānāti idaṃ akusalanti
yathābhūtaṃ nappajānāti . tassa evaṃ hoti ahaṃ kho idaṃ kusalanti
yathābhūtaṃ nappajānāmi idaṃ akusalanti yathābhūtaṃ nappajānāmi
ahañce kho 1- pana idaṃ kusalanti yathābhūtaṃ appajānanto idaṃ
akusalanti yathābhūtaṃ appajānanto idaṃ kusalanti vā byākareyyaṃ idaṃ
akusalanti vā byākareyyaṃ tattha me assa chando vā rāgo vā doso
vā paṭigho vā yattha me assa chando vā rāgo vā doso vā paṭigho
vā taṃ mamassa upādānaṃ yaṃ mamassa upādānaṃ so mamassa vighāto
yo mamassa vighāto so mamassa antarāyoti . iti so upādānabhayā
upādānaparijegucchā nevidaṃ kusalanti byākaroti na panidaṃ
akusalanti byākaroti tattha tattha paṇhaṃ puṭṭho samāno vācāvikkhepaṃ
āpajjati amarāvikkhepaṃ evantipi me no . tathātipi me no .
@Footnote: 1 Sī. Yu. ahañceva kho.
Aññathātipi me no . notipi me no . no notipi me noti.
Idaṃ bhikkhave dutiyaṃ ṭhānaṃ yaṃ āgamma yaṃ ārabbha eke samaṇabrāhmaṇā
amarāvikkhepikā tattha tattha paṇhaṃ puṭṭhā samānā vācāvikkhepaṃ
āpajjanti amarāvikkhepaṃ.
[41] Tatiye ca bhonto samaṇabrāhmaṇā kimāgamma kimārabbha
amarāvikkhepikā tattha tattha paṇhaṃ puṭṭhā samānā vācāvikkhepaṃ
āpajjanti amarāvikkhepaṃ . idha bhikkhave ekacco samaṇo vā
brāhmaṇo vā idaṃ kusalanti yathābhūtaṃ nappajānāti idaṃ akusalanti
yathābhūtaṃ nappajānāti . tassa evaṃ hoti ahaṃ kho idaṃ kusalanti
yathābhūtaṃ nappajānāmi idaṃ akusalanti yathābhūtaṃ nappajānāmi
ahañce kho 1- pana idaṃ kusalanti yathābhūtaṃ appajānanto idaṃ
akusalanti yathābhūtaṃ appajānanto idaṃ kusalanti vā byākareyyaṃ
idaṃ akusalanti vā byākareyyaṃ santi hi kho samaṇabrāhmaṇā
paṇḍitā nipuṇā kataparappavādā vālavedhirūpā te bhindantā
maññe caranti paññāgatena diṭṭhigatāni te maṃ tattha samanuyuñjeyyuṃ
samanuggāheyyuṃ samanubhāseyyuṃ ye maṃ tattha samanuyuñjeyyuṃ
samanuggāheyyuṃ samanubhāseyyuṃ tesāhaṃ na sampāyeyyaṃ 2- yañcāhaṃ 3-
na sampāyeyyaṃ so mamassa vighāto yo mamassa vighāto so
@Footnote: 1 Sī. Yu. ahañceva kho. 2 sampāheyyaṃ sampāpeyyaṃ sampayeyyaṃ
@ sampādeyyaṃ. 3 Sī. Yu. yesāhaṃ.
Mamassa antarāyoti . iti so anuyogabhayā anuyogaparijegucchā
nevidaṃ kusalanti byākaroti na panidaṃ akusalanti byākaroti tattha
tattha paṇhaṃ puṭṭho samāno vācāvikkhepaṃ āpajjati amarāvikkhepaṃ
evantipi me no . tathātipi me no . aññathātipi me no .
Notipi me no . no notipi me noti . idaṃ bhikkhave tatiyaṃ ṭhānaṃ
yaṃ āgamma yaṃ ārabbha eke samaṇabrāhmaṇā amarāvikkhepikā
tattha tattha paṇhaṃ puṭṭhā samānā vācāvikkhepaṃ āpajjanti
amarāvikkhepaṃ.
[42] Catutthe ca bhonto samaṇabrāhmaṇā kimāgamma kimārabbha
amarāvikkhepikā tattha tattha paṇhaṃ puṭṭhā samānā vācāvikkhepaṃ
āpajjanti amarāvikkhepaṃ . idha bhikkhave ekacco samaṇo vā
brāhmaṇo vā mando hoti momūho . so mandattā momūhattā
tattha tattha paṇhaṃ puṭṭho samāno vācāvikkhepaṃ āpajjati
amarāvikkhepaṃ atthi paro lokoti iti ce maṃ pucchasi atthi paro lokoti
iti ce me assa atthi paro lokoti iti tena 1- byākareyyaṃ
evantipi me no . tathātipi me no . aññathātipi me no.
Notipi me no . no notipi me no. Natthi paro loko .pe. Atthi
ca natthi ca paro loko . Nevatthi na natthi paro loko. Atthi sattā
@Footnote: 1 tena te naṃ.
Opapātikā . natthi sattā opapātikā . atthi ca natthi
ca sattā opapātikā. Nevatthi na natthi sattā opapātikā.
{42.1} Atthi sukaṭadukkaṭānaṃ kammānaṃ phalaṃ vipāko . natthi
sukaṭadukkaṭānaṃ kammānaṃ phalaṃ vipāko . atthi ca natthi ca sukaṭadukkaṭānaṃ
kammānaṃ phalaṃ vipāko . nevatthi na natthi sukaṭadukkaṭānaṃ kammānaṃ
phalaṃ vipāko . hoti tathāgato parammaraṇā . na hoti tathāgato
parammaraṇā . hoti ca na ca hoti tathāgato parammaraṇā . neva
hoti na na hoti tathāgato parammaraṇāti iti ce maṃ pucchasi. Neva
hoti na na hoti tathāgato parammaraṇāti iti ce me assa neva
hoti na na hoti tathāgato parammaraṇāti iti te na 1- byākareyyaṃ
evantipi me no . tathātipi me no . aññathātipi me no .
Notipi me no . no notipi me noti . Idaṃ bhikkhave catutthaṃ ṭhānaṃ
yaṃ āgamma yaṃ ārabbha eke samaṇabrāhmaṇā amarāvikkhepikā
tattha tattha paṇhaṃ puṭṭhā samānā vācāvikkhepaṃ āpajjanti
amarāvikkhepaṃ.
{42.2} Imehi kho te bhikkhave samaṇabrāhmaṇā amarāvikkhepikā
tattha tattha paṇhaṃ puṭṭhā samānā vācāvikkhepaṃ āpajjanti amarāvikkhepaṃ
catūhi vatthūhi. Ye hi keci bhikkhave samaṇā vā brāhmaṇā vā amarāvikkhepikā
tattha tattha paṇhaṃ puṭṭhā samānā vācāvikkhepaṃ āpajjanti
@Footnote: 1 te nantipi tenātipi pāṭho.
Amarāvikkhepaṃ sabbe te imeheva catūhi vatthūhi etesaṃ vā
aññatarena natthi ito bahiddhā .pe. yehi tathāgatassa
yathābhuccaṃ vaṇṇaṃ sammā vadamānā vadeyyuṃ.
[43] Santi bhikkhave eke samaṇabrāhmaṇā adhiccasamuppannikā
adhiccasamuppannaṃ attānañca lokañca paññapenti dvīhi vatthūhi .
Te ca bhonto samaṇabrāhmaṇā kimāgamma kimārabbha adhiccasamuppannikā
adhiccasamuppannaṃ attānañca lokañca paññapenti
dvīhi vatthūhi.
{43.1} Santi bhikkhave asaññīsattā 1- nāma devā
saññuppādā ca pana te devā tamhā kāyā cavanti . ṭhānaṃ
kho panetaṃ bhikkhave vijjati yaṃ aññataro satto tamhā kāyā
cavitvā itthattaṃ āgacchati itthattaṃ āgato samāno agārasmā
anagāriyaṃ pabbajati agārasmā anagāriyaṃ pabbajito samāno
ātappamanvāya padhānamanvāya anuyogamanvāya appamādamanvāya
sammāmanasikāramanvāya tathārūpaṃ cetosamādhiṃ phusati yathā samāhite
citte saññuppādaṃ anussarati tato paraṃ nānussarati . so
evamāha adhiccasamuppanno attā ca loko ca . taṃ kissa hetu.
Ahaṃ hi pubbe nāhosiṃ somhi etarahi ahutvā santatāya
pariṇatoti . idaṃ bhikkhave paṭhamaṃ ṭhānaṃ yaṃ āgamma yaṃ ārabbha
eke samaṇabrāhmaṇā adhiccasamuppannikā adhiccasamuppannaṃ
@Footnote: 1 Sī. Yu. asaññasattā.
Attānañca lokañca paññapenti.
[44] Dutiye ca bhonto samaṇabrāhmaṇā kimāgamma kimārabbha
adhiccasamuppannikā adhiccasamuppannaṃ attānañca lokañca paññapenti .
Idha bhikkhave ekacco samaṇo vā brāhmaṇo vā takkī hoti vimaṃsī. So
takkapariyāhataṃ vimaṃsānucaritaṃ sayaṃpāṭibhāṇaṃ evamāha adhiccasamuppanno
attā ca loko cāti . Idaṃ bhikkhave dutiye ṭhānaṃ yaṃ āgamma yaṃ ārabbha
eke samaṇabrāhmaṇā adhiccasamuppannikā adhiccasamuppannaṃ attānañca
lokañca paññapenti.
{44.1} Imehi kho bhikkhave samaṇabrāhmaṇā adhiccasamuppannikā
adhiccasamuppannaṃ attānañca lokañca paññapenti dvīhi vatthūhi .
Ye hi keci bhikkhave samaṇā vā brāhmaṇā vā adhiccasamuppannikā
adhiccasamuppannaṃ attānañca lokañca paññapenti sabbe te
imeheva dvīhi vatthūhi etesaṃ vā aññatarena natthi ito
bahiddhā .pe. yehi tathāgatassa yathābhuccaṃ vaṇṇaṃ sammā
vadamānā vadeyyuṃ . imehi kho te bhikkhave samaṇabrāhmaṇā
pubbantakappikā pubbantānudiṭṭhino pubbantaṃ ārabbha anekavihitāni
adhimuttipadāni abhivadanti aṭṭhārasahi vatthūhi . ye hi keci bhikkhave
samaṇā vā brāhmaṇā vā pubbantakappikā pubbantānudiṭṭhino
pubbantaṃ ārabbha anekavihitāni adhimuttipadāni abhivadanti sabbe
te imeheva aṭṭhārasahi vatthūhi etesaṃ vā aññatarena natthi
Ito bahiddhā.
{44.2} Tayidaṃ bhikkhave tathāgato pajānāti ime diṭṭhiṭṭhānā
evaṃgahitā evaṃparāmaṭṭhā evaṃgatikā bhavanti evaṃabhisamparāyāti .
Tañca tathāgato pajānāti tato ca uttaritaraṃ pajānāti tañca
pajānanaṃ na parāmasati . aparāmasato cassa paccattaññeva
nibbuti viditā vedanānaṃ samudayañca atthaṅgamañca assādañca
ādīnavañca nissaraṇañca yathābhūtaṃ viditvā . anupādā vimutto
bhikkhave tathāgato . ime kho te bhikkhave dhammā gambhīrā duddasā
duranubodhā santā paṇītā atakkāvacarā nipuṇā paṇḍitavedanīyā
ye tathāgato sayaṃ abhiññā sacchikatvā pavedeti yehi tathāgatassa
yathābhuccaṃ vaṇṇaṃ sammā vadamānā vadeyyuṃ.
[45] Santi bhikkhave eke samaṇabrāhmaṇā aparantakappikā
aparantānudiṭṭhino aparantaṃ ārabbha anekavihitāni adhimuttipadāni
abhivadanti catucattāḷīsāya vatthūhi . te ca bhonto samaṇabrāhmaṇā
kimāgamma kimārabbha aparantakappikā aparantānudiṭṭhino aparantaṃ
ārabbha anekavihitāni adhimuttipadāni abhivadanti catucattāḷīsāya
vatthūhi.
[46] Santi bhikkhave eke samaṇabrāhmaṇā uddhamāghatanikā
saññīvādā uddhamāghatanā saññimattānaṃ paññapenti soḷasahi
vatthūhi . te ca bhonto samaṇabrāhmaṇā kimāgamma kimārabbha
uddhamāghatanikā saññīvādā uddhamāghatanā saññimattānaṃ paññapenti
Soḷasahi vatthūhi.
{46.1} Rūpī attā hoti arogo paraṃ maraṇā saññīti naṃ paññapenti.
Arūpī attā hoti arogo paraṃ maraṇā saññīti naṃ paññapenti. Rūpī ca arūpī
ca attā hoti .pe. nevarūpīnārūpī attā hoti . antavā attā
hoti . anantavā attā hoti. Antavā ca anantavā ca attā hoti.
Nevantavānānantavā attā hoti . ekattasaññī attā hoti .
Nānattasaññī attā hoti . parittasaññī attā hoti .
Appamāṇasaññī attā hoti . ekantasukhī attā hoti .
Ekantadukkhī attā hoti . sukhadukkhī attā hoti . adukkhamasukhī
attā hoti arogo paraṃ maraṇā saññīti naṃ paññapenti.
{46.2} Imehi kho te bhikkhave samaṇabrāhmaṇā uddhamāghatanikā
saññīvādā uddhamāghatanā saññimattānaṃ paññapenti soḷasahi
vatthūhi . ye hi keci bhikkhave samaṇā vā brāhmaṇā vā uddhamāghatanikā
saññīvādā uddhamāghatanā saññimattānaṃ paññapenti
sabbe te imeheva soḷasahi vatthūhi etesaṃ vā aññatarena
natthi ito bahiddhā .pe. yehi tathāgatassa yathābhuccaṃ vaṇṇaṃ
sammā vadamānā vadeyyuṃ.
[47] Santi bhikkhave eke samaṇabrāhmaṇā uddhamāghatanikā
asaññīvādā uddhamāghatanā asaññimattānaṃ paññapenti aṭṭhahi
vatthūhi . te ca bhonto samaṇabrāhmaṇā kimāgamma kimārabbha uddhamāghatanikā
Asaññīvādā uddhamāghatanā asaññimattānaṃ paññapenti
aṭṭhahi vatthūhi.
{47.1} Rūpī attā hoti arogo paraṃ maraṇā asaññīti naṃ
paññapenti . arūpī attā hoti arogo paraṃ maraṇā asaññīti
naṃ paññapenti . rūpī ca arūpī ca attā hoti .pe. Nevarūpīnārūpī
attā hoti . antavā attā hoti . anantavā attā hoti .
Antavā ca anantavā ca attā hoti . nevantavā nānantavā
attā hoti arogo paraṃ maraṇā asaññīti naṃ paññapenti.
{47.2} Imehi kho te bhikkhave samaṇabrāhmaṇā uddhamāghatanikā 1-
asaññīvādā uddhamāghatanā 2- asaññimattānaṃ paññapenti aṭṭhahi
vatthūhi . ye hi keci bhikkhave samaṇā vā brāhmaṇā vā uddhamāghatanikā
asaññīvādā uddhamāghatanā asaññimattānaṃ paññapenti sabbe te
imeheva aṭṭhahi vatthūhi etesaṃ vā aññatarena natthi ito bahiddhā
.pe. Yehi tathāgatassa yathābhuccaṃ vaṇṇaṃ sammā vadamānā vadeyyuṃ.
[48] Santi bhikkhave eke samaṇabrāhmaṇā uddhamāghatanikā
nevasaññīnāsaññīvādā uddhamāghatanā nevasaññīnāsaññimattānaṃ
paññapenti aṭṭhahi vatthūhi.
{48.1} Te ca bhonto samaṇabrāhmaṇā kimāgamma kimārabbha
uddhamāghatanikā nevasaññīnāsaññīvādā uddhamāghatanā
nevasaññīnāsaññimattānaṃ paññapenti aṭṭhahi vatthūhi . rūpī attā
hoti arogo paraṃ maraṇā nevasaññīnāsaññīti naṃ paññapenti .
@Footnote: 1 Yu. uddhamāghātanikā. 2 Yu. uddhamāghātanā.
Arūpī attā hoti .pe. rūpī ca arūpī ca attā hoti. Nevarūpīnārūpī
attā hoti . antavā attā hoti . anantavā attā hoti .
Antavā ca anantavā ca attā hoti . nevantavānānantavā
attā hoti arogo parammaraṇā nevasaññīnāsaññīti naṃ
paññapenti.
{48.2} Imehi kho te bhikkhave samaṇabrāhmaṇā uddhamāghatanikā
nevasaññīnāsaññīvādā uddhamāghatanā nevasaññīnāsaññimattānaṃ
paññapenti aṭṭhahi vatthūhi . ye hi keci bhikkhave samaṇā vā brāhmaṇā
vā uddhamāghatanikā nevasaññīnāsaññīvādā uddhamāghatanā
nevasaññīnāsaññimattānaṃ paññapenti sabbe te imeheva aṭṭhahi
vatthūhi etesaṃ vā aññatarena natthi ito bahiddhā .pe. yehi
tathāgatassa yathābhuccaṃ vaṇṇaṃ sammā vadamānā vadeyyuṃ.
[49] Santi bhikkhave eke samaṇabrāhmaṇā ucchedavādā sato
sattassa ucchedaṃ vināsaṃ vibhavaṃ paññapenti sattahi vatthūhi . te ca
bhonto samaṇabrāhmaṇā kimāgamma kimārabbha ucchedavādā sato
sattassa ucchedaṃ vināsaṃ vibhavaṃ paññapenti sattahi vatthūhi . idha
bhikkhave ekacco samaṇo vā brāhmaṇo vā evaṃvādī hoti evaṃdiṭṭhi
yato kho bho ayaṃ attā rūpī cātummahābhūtiko mātāpettikasambhavo
kāyassa bhedā ucchijjati vinassati na hoti parammaraṇā ettāvatā
kho bho ayaṃ attā sammā samucchinno hotīti . ittheke sato
sattassa ucchedaṃ vināsaṃ vibhavaṃ paññapenti . tamañño evamāha
Atthi kho bho eso attā yaṃ tvaṃ vadesi neso natthīti
vadāmi no ca kho bho ayaṃ attā ettāvatā sammā samucchinno
hoti atthi kho bho añño attā dibbo rūpī kāmāvacaro
kavaḷiṅkārāhārabhakkho taṃ tvaṃ na jānāsi na passasi tamahaṃ
jānāmi passāmi so kho bho attā yato kāyassa bhedā
ucchijjati vinassati na hoti paraṃ maraṇā ettāvatā kho bho
ayaṃ attā sammā samucchinno hotīti . ittheke sato sattassa
ucchedaṃ vināsaṃ vibhavaṃ paññapenti.
{49.1} Tamañño evamāha atthi kho bho eso attā yaṃ
tvaṃ vadesi neso natthīti vadāmi no ca kho bho ayaṃ attā ettāvatā
sammā samucchinno hoti atthi kho bho añño attā dibbo rūpī
manomayo sabbaṅgapaccaṅgī ahīnindriyo taṃ tvaṃ na jānāsi na
passasi tamahaṃ jānāmi passāmi so kho bho attā yato kāyassa
bhedā ucchijjati vinassati na hoti parammaraṇā ettāvatā kho
bho ayaṃ attā sammā samucchinno hotīti . ittheke sato sattassa
ucchedaṃ vināsaṃ vibhavaṃ paññapenti.
{49.2} Tamañño evamāha atthi kho bho eso attā yaṃ tvaṃ
vadesi neso natthīti vadāmi no ca kho bho ayaṃ attā ettāvatā
sammā samucchinno hoti atthi kho bho añño attā sabbaso
rūpasaññānaṃ samatikkamā paṭighasaññānaṃ atthaṅgamā
@Footnote:Sī. Yu. taṃ tvaṃ (catūsu ṭhānesu).
Nānattasaññānaṃ amanasikārā ananto ākāsoti
ākāsānañcāyatanūpago yaṃ tvaṃ na jānāsi na passasi
tamahaṃ jānāmi passāmi so kho bho attā yato kāyassa
bhedā ucchijjati vinassati na hoti parammaraṇā ettāvatā
kho bho ayaṃ attā sammā samucchinno hotīti . ittheke
sato sattassa ucchedaṃ vināsaṃ vibhavaṃ paññapenti.
{49.3} Tamañño evamāha atthi kho bho eso attā
yaṃ tvaṃ vadesi neso natthīti vadāmi no ca kho bho ayaṃ attā
ettāvatā sammā samucchinno hoti atthi kho bho añño
attā sabbaso ākāsānañcāyatanaṃ samatikkamma anantaṃ
viññāṇanti viññāṇañcāyatanūpago yaṃ tvaṃ na jānāsi na passasi
tamahaṃ jānāmi passāmi so kho bho attā yato kāyassa bhedā
ucchijjati vinassati na hoti parammaraṇā ettāvatā kho bho
ayaṃ attā sammā samucchinno hotīti . ittheke sato sattassa
ucchedaṃ vināsaṃ vibhavaṃ paññapenti.
{49.4} Tamañño evamāha atthi kho bho eso attā yaṃ tvaṃ
vadesi neso natthīti vadāmi no ca kho bho ayaṃ attā ettāvatā sammā
samucchinno hoti atthi kho bho añño attā sabbaso viññāṇañcāyatanaṃ
samatikkamma natthi kiñcīti ākiñcaññāyatanūpago yaṃ tvaṃ na jānāsi
na passasi tamahaṃ jānāmi passāmi so kho bho attā yato kāyassa
bhedā ucchijjati vinassati na hoti parammaraṇā ettāvatā
Kho bho ayaṃ attā sammā samucchinno hotīti . ittheke sato
sattassa ucchedaṃ vināsaṃ vibhavaṃ paññapenti.
{49.5} Tamañño evamāha atthi kho bho eso attā yaṃ tvaṃ
vadesi neso natthīti vadāmi no ca kho bho ayaṃ attā ettāvatā
sammā samucchinno hoti atthi kho bho añño attā sabbaso
ākiñcaññāyatanaṃ samatikkamma 1- nevasaññānāsaññāyatanūpago
yaṃ tvaṃ na jānāsi na passasi tamahaṃ jānāmi passāmi so kho bho ayaṃ 2-
attā yato kāyassa bhedā ucchijjati vinassati na hoti parammaraṇā
ettāvatā kho bho ayaṃ attā sammā samucchinno hotīti. Ittheke
sato sattassa ucchedaṃ vināsaṃ vibhavaṃ paññapenti.
{49.6} Imehi kho te bhikkhave samaṇabrāhmaṇā ucchedavādā
sato sattassa ucchedaṃ vināsaṃ vibhavaṃ paññapenti sattahi vatthūhi . Ye
hi keci bhikkhave samaṇā vā brāhmaṇā vā ucchedavādā sato sattassa
ucchedaṃ vināsaṃ vibhavaṃ paññapenti sabbe te imeheva sattahi vatthūhi .p.
Yehi tathāgatassa yathābhuccaṃ vaṇṇaṃ sammā vadamānā vadeyyuṃ.
[50] Santi bhikkhave eke samaṇabrāhmaṇā diṭṭhadhammanibbānavādā
sato sattassa paramadiṭṭhadhammanibbānaṃ paññapenti pañcahi
vatthūhi . te ca bhonto samaṇabrāhmaṇā kimāgamma kimārabbha
@Footnote: 1 Yu. santametaṃ paṇītametanti neva-go. 2 Sī. Yu. ayanti pāṭho
@na dissati.
Diṭṭhadhammanibbānavādā sato sattassa paramadiṭṭhadhammanibbānaṃ
paññapenti pañcahi vatthūhi.
{50.1} Idha bhikkhave ekacco samaṇo vā brāhmaṇo vā
evaṃvādī hoti evaṃdiṭṭhi yato kho bho ayaṃ attā pañcahi
kāmaguṇehi samappito samaṅgībhūto paricāreti ettāvatā kho
bho ayaṃ attā paramadiṭṭhadhammanibbānappatto 1- hotīti .
Ittheke sato sattassa paramadiṭṭhadhammanibbānaṃ paññapenti.
{50.2} Tamañño evamāha atthi kho bho eso attā yaṃ
tvaṃ vadesi neso natthīti vadāmi no ca kho bho ayaṃ attā ettāvatā
paramadiṭṭhadhammanibbānappatto hoti taṃ kissa hetu kāmā hi bho aniccā
dukkhā vipariṇāmadhammā tesaṃ vipariṇāmaññathābhāvā uppajjanti
sokaparidevadukkhadomanassupāyāsā yato kho bho ayaṃ attā vivicceva
kāmehi vivicca akusalehi dhammehi savitakkaṃ savicāraṃ vivekajaṃ
pītisukhaṃ paṭhamaṃ jhānaṃ upasampajja viharati ettāvatā kho bho
ayaṃ attā paramadiṭṭhadhammanibbānappatto hotīti . ittheke sato
sattassa paramadiṭṭhadhammanibbānaṃ paññapenti.
{50.3} Tamañño evamāha atthi kho bho eso attā yaṃ tvaṃ
vadesi neso natthīti vadāmi no ca kho bho ayaṃ attā ettāvatā
paramadiṭṭhadhammanibbānappatto hoti taṃ kissa hetu yadeva tattha vitakkitaṃ
vicāritaṃ etena etaṃ oḷārikaṃ akkhāyati yato kho bho ayaṃ attā
@Footnote: 1 paramadiṭṭhadhammanibbānaṃ pattotipi pāṭho.
Vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ
avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharati
ettāvatā kho bho ayaṃ attā paramadiṭṭhadhammanibbānappatto
hotīti. Ittheke sato sattassa paramadiṭṭhadhammanibbānaṃ paññapenti.
{50.4} Tamañño evamāha atthi kho bho eso attā yaṃ
tvaṃ vadesi neso natthīti vadāmi no ca kho bho ayaṃ attā ettāvatā
paramadiṭṭhadhammanibbānappatto hoti taṃ kissa hetu yadeva tattha
pītigataṃ cetaso ubbilāvitattaṃ etenetaṃ oḷārikaṃ akkhāyati
yato kho bho ayaṃ attā pītiyā ca virāgā upekkhako ca viharati
sato ca sampajāno sukhañca kāyena paṭisaṃvedeti yantaṃ ariyā
ācikkhanti upekkhako satimā sukhavihārīti tatiyaṃ jhānaṃ upasampajja
viharati ettāvatā kho bho ayaṃ attā paramadiṭṭhadhammanibbānappatto
hotīti. Ittheke sato sattassa paramadiṭṭhadhammanibbānaṃ paññapenti.
{50.5} Tamañño evamāha atthi kho bho eso attā
yaṃ tvaṃ vadesi neso natthīti vadāmi no ca kho bho ayaṃ attā
ettāvatā paramadiṭṭhadhammanibbānappatto hoti taṃ kissa
hetu yadeva tattha sukhamiti cetaso ābhogo etenetaṃ oḷārikaṃ
akkhāyati yato kho bho ayaṃ attā sukhassa ca pahānā dukkhassa ca
pahānā pubbe va somanassadomanassānaṃ atthaṅgamā adukkhamasukhaṃ
upekkhāsatipārisuddhiṃ catutthaṃ jhānaṃ upasampajja viharati
Ettāvatā kho bho ayaṃ attā paramadiṭṭhadhammanibbānappatto
hotīti. Ittheke sato sattassa paramadiṭṭhadhammanibbānaṃ paññapenti.
{50.6} Imehi kho te bhikkhave samaṇabrāhmaṇā diṭṭhadhammanibbānavādā
sato sattassa paramadiṭṭhadhammanibbānaṃ paññapenti pañcahi vatthūhi . Ye hi
keci bhikkhave samaṇā vā brāhmaṇā vā diṭṭhadhammanibbānavādā sato
sattassa paramadiṭṭhadhammanibbānaṃ paññapenti sabbe te imeheva pañcahi
vatthūhi .pe. Yehi tathāgatassa yathābhuccaṃ vaṇṇaṃ sammā vadamānā vadeyyuṃ.
{50.7} Imehi kho te bhikkhave samaṇabrāhmaṇā aparantakappikā
aparantānudiṭṭhino aparantaṃ ārabbha anekavihitāni adhimuttipadāni
abhivadanti catucattāḷīsāya vatthūhi . ye hi keci bhikkhave samaṇā vā
brāhmaṇā vā aparantakappikā aparantānudiṭṭhino aparantaṃ ārabbha
anekavihitāni adhimuttipadāni abhivadanti sabbe te imeheva catucattāḷīsāya
vatthūhi .pe. Ye hi tathāgatassa yathābhuccaṃ vaṇṇaṃ sammā vadamānā vadeyyuṃ.
{50.8} Imehi kho te bhikkhave samaṇabrāhmaṇā pubbantakappikā ca
aparantakappikā ca pubbantāparantakappikā ca pubbantāparantānudiṭṭhino
pubbantāparantaṃ ārabbha anekavihitāni adhimuttipadāni abhivadanti
dvāsaṭṭhiyā vatthūhi.
{50.9} Ye hi keci bhikkhave samaṇā vā brāhmaṇā vā pubbantakappikā
vā aparantakappikā vā pubbantāparantakappikā vā pubbantāparantānudiṭṭhino
pubbantāparantaṃ ārabbha anekavihitāni adhimuttipadāni
Abhivadanti sabbe te imeheva dvāsaṭṭhiyā vatthūhi etesaṃ vā aññatarena
natthi ito bahiddhā.
{50.10} Tayidaṃ bhikkhave tathāgato pajānāti ime diṭṭhiṭṭhānā
evaṃgahitā evaṃparāmaṭṭhā evaṃgatikā bhavanti evaṃ abhisamparāyāti .
Tañca tathāgato pajānāti tato ca uttaritaraṃ pajānāti tañca pajānanaṃ
na parāmasati aparāmasato cassa paccattaññeva nibbuti viditā vedanānaṃ
samudayañca atthaṅgamañca assādañca ādīnavañca nissaraṇañca yathābhūtaṃ
viditvā. Anupādā vimutto bhikkhave tathāgato.
{50.11} Ime kho te bhikkhave dhammā gambhīrā duddasā duranubodhā
santā paṇītā atakkāvacarā nipuṇā paṇḍitavedanīyā ye tathāgato
sayaṃ abhiññā sacchikatvā pavedeti yehi tathāgatassa yathābhuccaṃ vaṇṇaṃ
sammā vadamānā vadeyyuṃ.
[51] Tatra bhikkhave ye te samaṇabrāhmaṇā sassatavādā
sassataṃ attānañca lokañca paññapenti catūhi vatthūhi tadapi tesaṃ
bhavataṃ samaṇabrāhmaṇānaṃ ajānataṃ apassataṃ vedayitaṃ taṇhāgatānaṃ
paritassitaṃ vipphanditameva 1-.
[52] Tatra bhikkhave ye te samaṇabrāhmaṇā ekaccasassatikā
ekaccaasassatikā ekaccaṃ sassataṃ ekaccaṃ asassataṃ attānañca
lokañca paññapenti catūhi vatthūhi tadapi tesaṃ bhavataṃ samaṇabrāhmaṇānaṃ
ajānataṃ apassataṃ vedayitaṃ taṇhāgatānaṃ paritassitaṃ vipphanditameva.
@Footnote: 1 Sī. paritasitavipphanditameva.
[53] Tatra bhikkhave ye te samaṇabrāhmaṇā antānantikā
antānantaṃ lokassa paññapenti catūhi vatthūhi tadapi tesaṃ bhavataṃ
samaṇabrāhmaṇānaṃ ajānataṃ apassataṃ vedayitaṃ taṇhāgatānaṃ paritassitaṃ
vipphanditameva.
[54] Tatra bhikkhave ye te samaṇabrāhmaṇā amarāvikkhepikā
tattha tattha paṇhaṃ puṭṭhā samānā vācāvikkhepaṃ āpajjanti
amarāvikkhepaṃ catūhi vatthūhi tadapi tesaṃ bhavataṃ samaṇabrāhmaṇānaṃ
ajānataṃ apassataṃ vedayitaṃ taṇhāgatānaṃ paritassitaṃ vipphanditameva.
[55] Tatra bhikkhave ye te samaṇabrāhmaṇā adhiccasamuppannikā
adhiccasamuppannaṃ attānañca lokañca paññapenti dvīhi vatthūhi
tadapi tesaṃ bhavataṃ samaṇabrāhmaṇānaṃ ajānataṃ apassataṃ vedayitaṃ
taṇhāgatānaṃ paritassitaṃ vipphanditameva.
[56] Tatra bhikkhave ye te samaṇabrāhmaṇā pubbantakappikā
pubbantānudiṭṭhino pubbantaṃ ārabbha anekavihitāni adhimuttipadāni
abhivadanti aṭṭhārasahi vatthūhi tadapi tesaṃ bhavataṃ samaṇabrāhmaṇānaṃ
ajānataṃ apassataṃ vedayitaṃ taṇhāgatānaṃ paritassitaṃ vipphanditameva.
[57] Tatra bhikkhave ye te samaṇabrāhmaṇā uddhamāghatanikā
saññīvādā uddhamāghatanā saññimattānaṃ paññapenti soḷasahi
vatthūhi tadapi tesaṃ bhavataṃ samaṇabrāhmaṇānaṃ ajānataṃ apassataṃ
vedayitaṃ taṇhāgatānaṃ paritassitaṃ vipphanditameva.
[58] Tatra bhikkhave ye te samaṇabrāhmaṇā uddhamāghatanikā
asaññīvādā uddhamāghatanā asaññimattānaṃ paññapenti aṭṭhahi
vatthūhi tadapi tesaṃ bhavataṃ samaṇabrāhmaṇānaṃ ajānataṃ apassataṃ
vedayitaṃ taṇhāgatānaṃ paritassitaṃ vipphanditameva.
[59] Tatra bhikkhave ye te samaṇabrāhmaṇā uddhamāghatanikā
nevasaññīnāsaññīvādā uddhamāghatanā nevasaññīnāsaññimattānaṃ
paññapenti aṭṭhahi vatthūhi tadapi tesaṃ bhavataṃ samaṇabrāhmaṇānaṃ
ajānataṃ apassataṃ vedayitaṃ taṇhāgatānaṃ paritassitaṃ vipphanditameva.
[60] Tatra bhikkhave ye te samaṇabrāhmaṇā ucchedavādā sato
sattassa ucchedaṃ vināsaṃ vibhavaṃ paññapenti sattahi vatthūhi tadapi
tesaṃ bhavataṃ samaṇabrāhmaṇānaṃ ajānataṃ apassataṃ vedayitaṃ taṇhāgatānaṃ
paritassitaṃ vipphanditameva.
[61] Tatra bhikkhave ye te samaṇabrāhmaṇā diṭṭhadhammanibbānavādā
sato sattassa paramadiṭṭhadhammanibbānaṃ paññapenti pañcahi
vatthūhi tadapi tesaṃ bhavataṃ samaṇabrāhmaṇānaṃ ajānataṃ apassataṃ
vedayitaṃ taṇhāgatānaṃ paritassitaṃ vipphanditameva.
[62] Tatra bhikkhave ye te samaṇabrāhmaṇā aparantakappikā
aparantānudiṭṭhino aparantaṃ ārabbha anekavihitāni adhimuttipadāni
abhivadanti catucattāḷīsāya vatthūhi tadapi tesaṃ bhavataṃ samaṇabrāhmaṇānaṃ
ajānataṃ apassataṃ vedayitaṃ taṇhāgatānaṃ paritassitaṃ vipphanditameva.
[63] Tatra bhikkhave ye te samaṇabrāhmaṇā pubbantakappikā
ca aparantakappikā ca pubbantāparantakappikā ca pubbantāparantānudiṭṭhino
pubbantāparantaṃ ārabbha anekavihitāni adhimuttipadāni abhivadanti
dvāsaṭṭhiyā vatthūhi tadapi tesaṃ bhavataṃ samaṇabrāhmaṇānaṃ ajānataṃ
apassataṃ vedayitaṃ taṇhāgatānaṃ paritassitaṃ vipphanditameva.
[64] Tatra bhikkhave ye te samaṇabrāhmaṇā sassatavādā sassataṃ
attānañca lokañca paññapenti catūhi vatthūhi tadapi phassapaccayā.
[65] Tatra bhikkhave ye te samaṇabrāhmaṇā ekaccasassatikā
ekaccaasassatikā ekaccaṃ sassataṃ ekaccaṃ asassataṃ attānañca
lokañca paññapenti catūhi vatthūhi tadapi phassapaccayā.
[66] Tatra bhikkhave ye te samaṇabrāhmaṇā antānantikā
antānantaṃ lokassa paññapenti catūhi vatthūhi tadapi phassapaccayā.
[67] Tatra bhikkhave ye te samaṇabrāhmaṇā amarāvikkhepikā
tattha tattha paṇhaṃ puṭṭhā samānā vācāvikkhepaṃ āpajjanti
amarāvikkhepaṃ catūhi vatthūhi tadapi phassapaccayā.
[68] Tatra bhikkhave ye te samaṇabrāhmaṇā adhiccasamuppannikā
adhiccasamuppannaṃ attānañca lokañca paññapenti dvīhi vatthūhi tadapi
phassapaccayā.
[69] Tatra bhikkhave ye te samaṇabrāhmaṇā pubbantakappikā
pubbantānudiṭṭhino pubbantaṃ ārabbha anekavihitāni adhimuttipadāni
Abhivadanti aṭṭhārasahi vatthūhi tadapi phassapaccayā.
[70] Tatra bhikkhave ye te samaṇabrāhmaṇā uddhamāghatanikā
saññīvādā uddhamāghatanā saññimattānaṃ paññapenti soḷasahi
vatthūhi tadapi phassapaccayā.
[71] Tatra bhikkhave ye te samaṇabrāhmaṇā uddhamāghatanikā
asaññīvādā uddhamāghatanā asaññimattānaṃ paññapenti aṭṭhahi
vatthūhi tadapi phassapaccayā.
[72] Tatra bhikkhave ye te samaṇabrāhmaṇā uddhamāghatanikā
nevasaññīnāsaññīvādā uddhamāghatanā nevasaññīnāsaññimattānaṃ
paññapenti aṭṭhahi vatthūhi tadapi phassapaccayā.
[73] Tatra bhikkhave ye te samaṇabrāhmaṇā ucchedavādā sato
sattassa ucchedaṃ vināsaṃ vibhavaṃ paññapenti sattahi vatthūhi tadapi
phassapaccayā.
[74] Tatra bhikkhave ye te samaṇabrāhmaṇā diṭṭhadhammanibbānavādā
sato sattassa paramadiṭṭhadhammanibbānaṃ paññapenti pañcahi vatthūhi tadapi
phassapaccayā.
[75] Tatra bhikkhave ye te samaṇabrāhmaṇā aparantakappikā
aparantānudiṭṭhino aparantaṃ ārabbha anekavihitāni adhimuttipadāni
abhivadanti catucattāḷīsāya vatthūhi tadapi phassapaccayā.
[76] Tatra bhikkhave ye te samaṇabrāhmaṇā pubbantakappikā ca
Aparantakappikā ca pubbantāparantakappikā ca pubbantāparantānudiṭṭhino
pubbantāparantaṃ ārabbha anekavihitāni adhimuttipadāni abhivadanti
dvāsaṭṭhiyā vatthūhi tadapi phassapaccayā.
[77] Tatra bhikkhave ye te samaṇabrāhmaṇā sassatavādā sassataṃ
attānañca lokañca paññapenti catūhi vatthūhi te vata aññatra
phassā paṭisaṃvedissantīti netaṃ ṭhānaṃ vijjati.
[78] Tatra bhikkhave ye te samaṇabrāhmaṇā ekaccasassatikā
ekaccaasassatikā ekaccaṃ sassataṃ ekaccaṃ asassataṃ attānañca
lokañca paññapenti catūhi vatthūhi te vata aññatra phassā
paṭisaṃvedissantīti netaṃ ṭhānaṃ vijjati.
[79] Tatra bhikkhave ye te samaṇabrāhmaṇā antānantikā
antānantaṃ lokassa paññapenti catūhi vatthūhi te vata aññatra
phassā paṭisaṃvedissantīti netaṃ ṭhānaṃ vijjati.
[80] Tatra bhikkhave ye te samaṇabrāhmaṇā amarāvikkhepikā
tattha tattha paṇhaṃ puṭṭhā samānā vācāvikkhepaṃ āpajjanti
amarāvikkhepaṃ catūhi vatthūhi te vata aññatra phassā paṭisaṃvedissantīti
netaṃ ṭhānaṃ vijjati.
[81] Tatra bhikkhave ye te samaṇabrāhmaṇā adhiccasamuppannikā
adhiccasamuppannaṃ attānañca lokañca paññapenti dvīhi vatthūhi
te vata aññatra phassā paṭisaṃvedissantīti netaṃ ṭhānaṃ vijjati.
[82] Tatra bhikkhave ye te samaṇabrāhmaṇā pubbantakappikā
pubbantānudiṭṭhino pubbantaṃ ārabbha anekavihitāni adhimuttipadāni
abhivadanti aṭṭhārasahi vatthūhi te vata aññatra phassā paṭisaṃvedissantīti
netaṃ ṭhānaṃ vijjati.
[83] Tatra bhikkhave ye te samaṇabrāhmaṇā uddhamāghatanikā
saññīvādā uddhamāghatanā saññimattānaṃ paññapenti soḷasahi vatthūhi
te vata aññatra phassā paṭisaṃvedissantīti netaṃ ṭhānaṃ vijjati.
[84] Tatra bhikkhave ye te samaṇabrāhmaṇā uddhamāghatanikā
asaññīvādā uddhamāghatanā asaññimattānaṃ paññapenti aṭṭhahi
vatthūhi te vata aññatra phassā paṭisaṃvedissantīti netaṃ ṭhānaṃ vijjati.
[85] Tatra bhikkhave ye te samaṇabrāhmaṇā uddhamāghatanikā
nevasaññīnāsaññīvādā uddhamāghatanā nevasaññīnāsaññimattānaṃ
paññapenti aṭṭhahi vatthūhi te vata aññatra phassā paṭisaṃvedissantīti
netaṃ ṭhānaṃ vijjati.
[86] Tatra bhikkhave ye te samaṇabrāhmaṇā ucchedavādā sato
sattassa ucchedaṃ vināsaṃ vibhavaṃ paññapenti sattahi vatthūhi te vata
aññatra phassā paṭisaṃvedissantīti netaṃ ṭhānaṃ vijjati.
[87] Tatra bhikkhave ye te samaṇabrāhmaṇā diṭṭhadhammanibbānavādā
sato sattassa paramadiṭṭhadhammanibbānaṃ paññapenti pañcahi vatthūhi
te vata aññatra phassā paṭisaṃvedissantīti netaṃ ṭhānaṃ vijjati.
[88] Tatra bhikkhave ye te samaṇabrāhmaṇā aparantakappikā
aparantānudiṭṭhino aparantaṃ ārabbha anekavihitāni adhimuttipadāni
abhivadanti catucattāḷīsāya vatthūhi te vata aññatra phassā
paṭisaṃvedissantīti ne ṭhānaṃ vijjati.
[89] Tatra bhikkhave ye te samaṇabrāhmaṇā pubbantakappikā ca
aparantakappikā ca pubbantāparantakappikā ca pubbantāparantānudiṭṭhino
pubbantāparantaṃ ārabbha anekavihitāni adhimuttipadāni abhivadanti
dvāsaṭṭhiyā vatthūhi te vata aññatra phassā paṭisaṃvedissantīti ne
ṭhānaṃ vijjati.
[90] Tatra bhikkhave ye te samaṇabrāhmaṇā sassatavādā sassataṃ
attānañca lokañca paññapenti catūhi vatthūhi yepi te samaṇabrāhmaṇā
ekaccasassatikā ekaccaasassatikā yepi te samaṇabrāhmaṇā
antānantikā yepi te samaṇabrāhmaṇā amarāvikkhepikā yepi te
samaṇabrāhmaṇā adhiccasamuppannikā yepi te samaṇabrāhmaṇā
pubbantakappikā yepi te samaṇabrāhmaṇā uddhamāghatanikā
saññīvādā yepi te samaṇabrāhmaṇā uddhamāghatanikā asaññīvādā
yepi te samaṇabrāhmaṇā uddhamāghatanikā nevasaññīnāsaññīvādā
yepi te samaṇabrāhmaṇā ucchedavādā yepi te samaṇabrāhmaṇā
diṭṭhadhammanibbānavādā yepi te samaṇabrāhmaṇā
aparantakappikā yepi te samaṇabrāhmaṇā pubbantakappikā ca
Aparantakappikā ca pubbantāparantakappikā ca pubbantāparantānudiṭṭhino
pubbantāparantaṃ ārabbha anekavihitāni adhimuttipadāni abhivadanti
dvāsaṭṭhiyā vatthūhi sabbe te chahi phassāyatanehi phussāphussā 1-
paṭisaṃvedenti . tesaṃ vedanāpaccayā taṇhā taṇhāpaccayā upādānaṃ
upādānapaccayā bhavo bhavapaccayā jāti jātipaccayā jarāmaraṇaṃ
sokaparidevadukkhadomanassupāyāsā sambhavanti.
{90.1} Yato kho bhikkhave bhikkhu channaṃ phassāyatanānaṃ samudayañca
atthaṅgamañca assādañca ādīnavañca nissaraṇañca yathābhūtaṃ pajānāti .
Ayaṃ imehi sabbeheva uttaritaraṃ pajānāti. Ye hi keci bhikkhave samaṇā
vā brāhmaṇā vā pubbantakappikā vā aparantakappikā vā
pubbantāparantakappikā vā pubbantāparantānudiṭṭhino pubbantāparantaṃ
ārabbha anekavihitāni adhimuttipadāni abhivadanti sabbe te imeheva
dvāsaṭṭhiyā vatthūhi antojālikatā ettha sitā va ummujjamānā
ummujjanti ettha pariyāpannā antojālikatā va ummujjamānā
ummujjanti
{90.2} seyyathāpi bhikkhave dakkho kevaṭṭo vā kevaṭṭantevāsī
vā sukhumacchiddakena 2- jālena parittaṃ udakarahadaṃ otthareyya
tassa evamassa ye kho keci imasmiṃ udakarahade oḷārikā
pāṇā sabbepete antojālikatā ettha sitā va
@Footnote: 1 Sī. phussa phussa. aṭṭhakathāyaṃ phussā phussā. 2 Sī. sukhumacchinnena.
@A. sukhumacchikena.
Ummujjamānā ummujjanti ettha pariyāpannā antojālikatā va
ummujjamānā ummujjantīti evameva kho bhikkhave ye hi keci samaṇā
vā brāhmaṇā vā pubbantakappikā vā aparantakappikā vā
pubbantāparantakappikā vā pubbantāparantānudiṭṭhino
pubbantāparantaṃ ārabbha anekavihitāni adhimuttipadāni abhivadanti
sabbe te imeheva dvāsaṭṭhiyā vatthūhi antojālikatā ettha
sitā va ummujjamānā ummujjanti ettha pariyāpannā antojālikatā
va ummujjamānā ummujjanti.
{90.3} Ucchinnabhavanettiko bhikkhave tathāgatassa kāyo tiṭṭhati
yāvassa kāyo ṭhassati tāva naṃ dakkhanti devamanussā kāyassa bhedā
uddhaṃ jīvitapariyādānā na naṃ dakkhanti devamanussā seyyathāpi bhikkhave
ambapiṇḍiyā vaṇṭacchinnāya yāni kānici ambāni vaṇṭapaṭibandhāni 1-
sabbāni tāni tadanvayāni bhavanti evameva kho bhikkhave ucchinnabhavanettiko
tathāgatassa kāyo tiṭṭhati yāvassa kāyo ṭhassati tāva naṃ dakkhanti devamanussā
kāyassa bhedā uddhaṃ jīvitapariyādānā na naṃ dakkhanti devamanussāti.
{90.4} Evaṃ vutte āyasmā ānando bhagavantaṃ etadavoca acchariyaṃ
bhante abbhūtaṃ 2- bhante konāmo ayaṃ bhante dhammapariyāyoti. Tasmātiha
tvaṃ ānanda imaṃ dhammapariyāyaṃ atthajālantipi naṃ dhārehi dhammajālantipi
naṃ dhārehi brahmajālantipi naṃ dhārehi diṭṭhijālantipi naṃ dhārehi
@Footnote: 1 Sī. vaṇṭūpanibandhanāni. 2 Sī. Yu. abbhutaṃ.
Anuttaro saṅgāmavijayotipi naṃ dhārehīti . idamavoca bhagavā .
Attamanā te bhikkhū bhagavato bhāsitaṃ abhinandunti . imasmiṃ ca pana
veyyākaraṇasmiṃ bhaññamāne dasasahassī 1- lokadhātu akampitthāti.
Brahmajālasuttaṃ paṭhamaṃ niṭṭhitaṃ.
------------
@Footnote:Sī. sahassī.
Sāmaññaphalasuttaṃ dutiyaṃ
[91] Evamme sutaṃ . Ekaṃ samayaṃ bhagavā rājagahe viharati jīvakassa
komārabhaccassa ambavane mahatā bhikkhusaṃghena saddhiṃ aḍḍhateḷasehi
bhikkhusatehi . tena kho pana samayena rājā māgadho ajātasattu
vedehiputto tadahuposathe paṇṇarase komudiyā cātummāsiniyā
puṇṇāya puṇṇamāya rattiyā rājāmaccaparivuto uparipāsādavaragato
nisinno hoti . athakho rājā māgadho ajātasattu vedehiputto
udānaṃ udānesi ramaṇīyā vata bho dosinā ratti abhirūpā vata
bho dosinā ratti dassanīyā vata bho dosinā ratti pāsādikā
vata bho dosinā ratti lakkhaññā vata bho dosinā ratti kaṃ nu
khvajja samaṇaṃ vā brāhmaṇaṃ vā payirupāseyyāma 1- yanno
payirupāsato cittaṃ pasīdeyyāti.
{91.1} Evaṃ vutte aññataro rājāmacco rājānaṃ māgadhaṃ
ajātasattuṃ vedehiputtaṃ etadavoca ayaṃ deva pūraṇo kassapo saṃghī
ceva gaṇī ca gaṇācariyo ca ñāto yasassī titthakaro sādhusammato
bahujanassa rattaññū cirapabbajito addhagato vayoanuppatto taṃ
devo pūraṇaṃ kassapaṃ payirupāsatu appevanāma devassa pūraṇaṃ kassapaṃ
payirupāsato cittaṃ pasīdeyyāti . evaṃ vutte rājā māgadho
ajātasattu vedehiputto tuṇhī ahosi . aññataropi kho rājāmacco
@Footnote: 1 Yu. payirūpāseyyāma.
Rājānaṃ māgadhaṃ ajātasattuṃ vedehiputtaṃ etadavoca ayaṃ deva
makkhali gosālo saṃghī ceva gaṇī ca gaṇācariyo ca ñāto
yasassī titthakaro sādhusammato bahujanassa rattaññū cirapabbajito
addhagato vayoanuppatto taṃ devo makkhaliṃ gosālaṃ payirupāsatu
appevanāma devassa makkhaliṃ gosālaṃ payirupāsato cittaṃ pasīdeyyāti.
Evaṃ vutte rājā māgadho ajātasattu vedehiputto tuṇhī ahosi.
{91.2} Aññataropi kho rājāmacco rājānaṃ māgadhaṃ ajātasattuṃ
vedehiputtaṃ etadavoca ayaṃ deva ajito kesakambalo saṃghī ceva gaṇī ca
gaṇācariyo ca ñāto yasassī titthakaro sādhusammato bahujanassa
rattaññū cirapabbajito addhagato vayoanuppatto taṃ devo ajitaṃ
kesakambalaṃ payirupāsatu appevanāma devassa ajitaṃ kesakambalaṃ
payirupāsato cittaṃ pasīdeyyāti . evaṃ vutte rājā māgadho
ajātasattu vedehiputto tuṇhī ahosi.
{91.3} Aññataropi kho rājāmacco rājānaṃ māgadhaṃ
ajātasattuṃ vedehiputtaṃ etadavoca ayaṃ deva pakudho kaccāyano
saṃghī ceva gaṇī ca gaṇācariyo ca ñāto yasassī titthakaro sādhusammato
bahujanassa rattaññū cirapabbajito addhagato vayoanuppatto taṃ devo
pakudhaṃ kaccāyanaṃ payirupāsatu appevanāma devassa pakudhaṃ kaccāyanaṃ
payirupāsato cittaṃ pasīdeyyāti . evaṃ vutte rājā māgadho ajātasattu
vedehiputto tuṇhī ahosi . aññataropi kho rājāmacco rājānaṃ māgadhaṃ
Ajātasattuṃ vedehiputtaṃ etadavoca ayaṃ deva sañjayo velaṭṭhaputto 1-
saṃghī ceva gaṇī ca gaṇācariyo ca ñāto yasassī titthakaro sādhusammato
bahujanassa rattaññū cirapabbajito addhagato vayoanuppatto taṃ devo
sañjayaṃ velaṭṭhaputtaṃ payirupāsatu appevanāma devassa sañjayaṃ
velaṭṭhaputtaṃ payirupāsato cittaṃ pasīdeyyāti . evaṃ vutte rājā
māgadho ajātasattu vedehiputto tuṇhī ahosi.
{91.4} Aññataropi kho rājāmacco rājānaṃ māgadhaṃ ajātasattuṃ
vedehiputtaṃ etadavoca ayaṃ deva nigaṇṭho nāṭaputto saṃghī ceva gaṇī ca
gaṇācariyo ca ñāto yasassī titthakaro sādhusammato bahujanassa
rattaññū cirapabbajito addhagato vayoanuppatto taṃ devo nigaṇṭhaṃ
nāṭaputtaṃ payirupāsatu appevanāma devassa nigaṇṭhaṃ nāṭaputtaṃ
payirupāsato cittaṃ pasīdeyyāti . evaṃ vutte rājā māgadho
ajātasattu vedehiputto tuṇhī ahosi.
[92] Tena kho pana samayena jīvako komārabhacco rañño māgadhassa
ajātasattussa vedehiputtassa avidūre tuṇhībhūto nisinno hoti .
Athakho rājā māgadho ajātasattu vedehiputto jīvakaṃ komārabhaccaṃ
etadavoca tvaṃ pana samma jīvaka kiṃ tuṇhīti . ayaṃ deva bhagavā
arahaṃ sammāsambuddho amhākaṃ ambavane viharati mahatā bhikkhusaṃghena
saddhiṃ aḍḍhateḷasehi bhikkhusatehi taṃ kho pana bhagavantaṃ evaṃ kalyāṇo
@Footnote: 1 Sī. velaṭṭhiputto.
Kittisaddo abbhuggato itipi so bhagavā arahaṃ sammāsambuddho
vijjācaraṇasampanno sugato lokavidū anuttaro purisadammasārathi
satthā devamanussānaṃ buddho bhagavāti taṃ devo bhagavantaṃ payirupāsatu
appevanāma devassa bhagavantaṃ payirupāsato cittaṃ pasīdeyyāti.
{92.1} Tenahi samma jīvaka hatthiyānāni kappāpehīti . evaṃ
devāti kho jīvako komārabhacco rañño māgadhassa ajātasattussa
vedehiputtassa paṭisuṇitvā 1- pañcamattāni hatthiniyāsatāni 2-
kappāpetvā rañño ca ārohaṇīyaṃ 3- nāgaṃ rañño māgadhassa
ajātasattussa vedehiputtassa paṭivedesi kappitāni kho te deva
hatthiyānāni yassadāni kālaṃ maññasīti.
{92.2} Athakho rājā māgadho ajātasattu vedehiputto pañcasu
hatthiniyāsatesu paccekā itthiyo āropetvā ārohaṇīyaṃ nāgaṃ
abhirūhitvā ukkāsu dhāriyamānāsu rājagahamhā niyyāsi
mahaccarājānubhāvena yena jīvakassa komārabhaccassa ambavanaṃ tena
pāyāsi . athakho rañño māgadhassa ajātasattussa vedehiputtassa
avidūre ambavanassa ahudeva bhayaṃ ahu chambhitattaṃ ahu lomahaṃso. Athakho
rājā māgadho ajātasattu vedehiputto bhīto saṃviggo lomahaṭṭhajāto
jīvakaṃ komārabhaccaṃ etadavoca kacci maṃ samma jīvaka na vañcesi
kacci maṃ samma jīvaka na palambhesi kacci maṃ samma jīvaka na paccatthikānaṃ
@Footnote: 1 Sī. Yu. paṭissutvā. 2 Sī. Yu. hatthinikāsatāni. 3 Sī. ārohiniyaṃ
@ārohaniyaṃ.
Desi kathaṃ hi nāma tāvamahato bhikkhusaṃghassa aḍḍhateḷasānaṃ bhikkhusatānaṃ
neva khipitasaddo bhavissati na ukkāsitasaddo na nigghosoti .
Mā bhāyi mahārāja mā bhāyi mahārāja na taṃ deva vañcemi na
taṃ deva palambhāmi na taṃ deva paccatthikānaṃ demi abhikkama mahārāja
abhikkama mahārāja ete maṇḍalamāḷe padīpā jhāyantīti.
{92.3} Athakho rājā māgadho ajātasattu vedehiputto yāvatikā
nāgassa bhūmi nāgena gantvā nāgā paccorohitvā padiko va 1- yena
maṇḍalamāḷassa dvāraṃ tenupasaṅkami upasaṅkamitvā jīvakaṃ komārabhaccaṃ
etadavoca kahaṃ pana samma jīvaka bhagavāti . eso mahārāja bhagavā
majjhimaṃ thambhaṃ nissāya puratthābhimukho nisinno purakkhato bhikkhusaṃghassāti.
Athakho rājā māgadho ajātasattu vedehiputto yena bhagavā tenupasaṅkami
upasaṅkamitvā ekamantaṃ aṭṭhāsi . ekamantaṃ ṭhito kho rājā māgadho
ajātasattu vedehiputto tuṇhībhūtaṃ tuṇhībhūtaṃ bhikkhusaṃghaṃ anuviloketvā
rahadamiva vippasannaṃ udānaṃ udānesi iminā me upasamena udayabhaddo 2-
kumāro samannāgato hotu yenetarahi upasamena bhikkhusaṃgho samannāgatoti.
Āgamā kho tvaṃ mahārāja yathāpemanti . piyo me bhante udayabhaddo
kumāro iminā me bhante upasamena udayabhaddo kumāro samannāgato
hotu yenetarahi upasamena bhikkhusaṃgho samannāgatoti.
@Footnote: 1 Sī. pattiko va. 2 Sī. udāyibhaddo.
[93] Athakho rājā māgadho ajātasattu vedehiputto bhagavantaṃ
abhivādetvā bhikkhusaṃghassa añjaliṃ upanāmetvā 1- ekamantaṃ nisīdi .
Ekamantaṃ nisinno kho rājā māgadho ajātasattu vedehiputto bhagavantaṃ
etadavoca puccheyyāmahaṃ bhante bhagavantaṃ kiñcideva desaṃ lesamattaṃ 2-
sace me bhagavā okāsaṃ koroti paṇhassa veyyākaraṇāyāti .
Puccha mahārāja yadākaṃkhasīti.
{93.1} Yathā nu kho imāni bhante puthusippāyatanāni seyyathīdaṃ
hatthārohā assārohā rathikā dhanuggahā 3- celakā calakā
piṇḍadāyikā 4- uggā rājaputtā pakkhandino mahānāgā
surā cammayodhino dāsakaputtā āḷārikā kappakā nhāpikā 5- sūdā
mālākārā rajakā pesakārā nalakārā kumbhakārā gaṇakā muddikā
yāni vā panaññānipi evaṃgatāni puthusippāyatanāni te diṭṭhe va
dhamme sandiṭṭhikaṃ sippaphalaṃ upajīvanti te tena attānaṃ sukhenti
piṇenti 6- mātāpitaro sukhenti piṇenti puttadāraṃ sukhenti piṇenti
mittāmacce sukhenti piṇenti samaṇabrāhmaṇesu uddhaggikaṃ dakkhiṇaṃ
patiṭṭhapenti sovaggikaṃ sukhavipākaṃ saggasaṃvattanikaṃ sakkā nu kho bhante
evameva diṭṭhe va dhamme sandiṭṭhikaṃ sāmaññaphalaṃ paññapetunti .
Abhijānāsi no tvaṃ mahārāja imaṃ paṇhaṃ aññepi samaṇabrāhmaṇe
@Footnote: 1 Sī. panāmetvā. Yu. paṇāmetvā. 2 Sī. kañcideva desaṃ.
@lesamattanti pāṭho na dissati. 3 Sī. dhanuggāhā. 4 Sī. piṇḍadāvikā.
@5 Sī. nahāpikā. 6 Sī. pīnenti. A. pīṇenti.
Pucchitāti . abhijānāmahaṃ bhante imaṃ paṇhaṃ aññe samaṇabrāhmaṇe
pucchitāti. Yathā kathaṃ pana te mahārāja byākariṃsu sace te agaru bhāsassūti.
Na kho me bhante garu yatthassa bhagavā nisinno bhagavantarūpo vāti. Tenahi
mahārāja bhāsassūti.
[94] Ekamidāhaṃ bhante samayaṃ yena pūraṇo kassapo tenupasaṅkamiṃ
upasaṅkamitvā pūraṇena kassapena saddhiṃ sammodiṃ sammodanīyaṃ kathaṃ
sārāṇīyaṃ vītisāretvā ekamantaṃ nisīdiṃ ekamantaṃ nisinno kho ahaṃ
bhante pūraṇaṃ kassapaṃ etadavocaṃ yathā nu kho imāni bho kassapa
puthusippāyatanāni seyyathīdaṃ hatthārohā assārohā rathikā dhanuggahā
celakā calakā piṇḍadāyikā uggā rājaputtā pakkhandino mahānāgā
surā cammayodhino dāsakaputtā āḷārikā kappakā nhāpakā
sūdā mālākārā rajakā pesakārā nalakārā kumbhakārā gaṇakā
muddikā yāni vā panaññānipi evaṃgatāni puthusippāyatanāni te
diṭṭhe va dhamme sandiṭṭhikaṃ sippaphalaṃ upajīvanti te 1- tena
attānaṃ sukhenti piṇenti mātāpitaro sukhenti piṇenti puttadāraṃ
sukhenti piṇenti mittāmacce sukhenti piṇenti samaṇabrāhmaṇesu 2-
uddhaggikaṃ dakkhiṇaṃ patiṭṭhapenti 3- sovaggikaṃ sukhavipākaṃ saggasaṃvattanikaṃ
sakkā nu kho bho kassapa evameva diṭṭhe va dhamme sandiṭṭhikaṃ
@Footnote: 1 sīhalapotthake teti pāṭho na hoti. 2 samaṇabrāhmaṇesu
@vāti pāṭho dissati. 3 Sī. patiṭṭhāpenti.
Sāmaññaphalaṃ paññapetunti
{94.1} evaṃ vutte bhante pūraṇo kassapo maṃ etadavoca karoto
kho mahārāja kārayato chindato chedāpayato pacato pacāpayato
socayato socāpayato kilamayato kilamāpayato phandato phandāpayato
pāṇamatipāpayato 1- adinnaṃ ādiyato sandhiṃ chindato nillopaṃ harato
ekāgārikaṃ karoto paripanthe tiṭṭhato paradāraṃ gacchato musā bhaṇato
karato na kariyati 2- pāpaṃ khurapariyantena cepi cakkena yo imissā paṭhaviyā
pāṇe ekaṃ maṃsakhalaṃ ekaṃ maṃsapuñjaṃ kareyya natthi tatonidānaṃ pāpaṃ natthi
pāpassa āgamo dakkhiṇañcepi gaṅgāya tīraṃ 3- gaccheyya 4- hananto
ghātento chindanto chedāpento pacanto pacāpento 5- natthi
tatonidānaṃ pāpaṃ natthi pāpassa āgamo uttarañcepi gaṅgāya tīraṃ 6-
gaccheyya dadanto dadāpento 7- yajanto yajāpento 8- natthi
tatonidānaṃ puññaṃ natthi puññassa āgamo dānena damena saṃyamena
saccavācena 9- natthi tatonidānaṃ puññaṃ natthi puññassa āgamoti
itthaṃ kho me bhante pūraṇo kassapo sandiṭṭhikaṃ sāmaññaphalaṃ puṭṭho
samāno akiriyaṃ byākāsi seyyathāpi bhante ambaṃ vā puṭṭho labujaṃ
@Footnote: 1 sīhalapotthake pacato pācayato socayato kilamayato phandāpayato
@pāṇamatimāpayatoti pāṭho dissati. 2 Sī. karīyati. 3 Sī. gaṅgātīraṃ.
@4 Sī. āgaccheyya. 5 Sī. pācanto. 6 Sī. gaṅgātīraṃ.
@7 Sī. dāpento. 8 Sī. yājento. 9 Sī. saccavajjena.
Byākareyya labujaṃ vā puṭṭho ambaṃ byākareyya evameva kho
me bhante pūraṇo kassapo sandiṭṭhikaṃ sāmaññaphalaṃ puṭṭho samāno
akiriyaṃ byākāsi tassa mayhaṃ bhante etadahosi kathaṃ hi nāma
mādiso samaṇaṃ vā brāhmaṇaṃ vā vijite vasantaṃ apasādetabbaṃ
maññeyyāti so kho ahaṃ bhante pūraṇassa kassapassa bhāsitaṃ
neva abhinandiṃ nappaṭikkosiṃ anabhinanditvā appaṭikkositvā anattamano
anattamanavācaṃ anicchāretvā tameva vācaṃ anuggaṇhanto
anikkujjento 1- uṭṭhāyāsanā pakkāmiṃ.
[95] Ekamidāhaṃ bhante samayaṃ yena makkhali gosālo tenupasaṅkamiṃ
upasaṅkamitvā makkhalinā gosālena saddhiṃ sammodiṃ sammodanīyaṃ
kathaṃ sārāṇīyaṃ vītisāretvā ekamantaṃ nisīdiṃ ekamantaṃ nisinno
kho ahaṃ bhante makkhaliṃ gosālaṃ etadavocaṃ yathā nu kho imāni
bho gosāla puthusippāyatanāni .pe. sakkā nu kho bho gosāla
evameva diṭṭhe va dhamme sandiṭṭhikaṃ sāmaññaphalaṃ paññapetunti
{95.1} evaṃ vutte bhante makkhali gosālo maṃ etadavoca natthi
mahārāja hetu natthi paccayo sattānaṃ saṃkilesāya ahetū appaccayā
sattā saṃkilissanti natthi hetu natthi paccayo sattānaṃ visuddhiyā
ahetū appaccayā sattā visujjhanti natthi attakāre natthi parakāre
natthi purisakāre natthi balaṃ natthi viriyaṃ natthi purisathāmo natthi
@Footnote: 1 Sī. anikkujjanto.
Purisaparakkamo sabbe sattā sabbe pāṇā sabbe bhūtā sabbe
jīvā avasā abalā aviriyā niyatisaṅgatibhāvapariṇatā chasvevābhijātīsu
sukhañca dukkhañca paṭisaṃvedenti cuddasa kho panimāni mahārāja 1-
yonipamukhasatasahassāni saṭṭhī ca 2- satāni cha satāni pañca ca kammuno
satāni pañca ca kammāni tīṇi ca kammāni kamme ca upaḍḍhakamme 3-
ca dvaṭṭhipaṭipadā dvaṭṭhantarakappā 4- chaḷābhijātiyo aṭṭhapurisabhūmiyo
ekūnapaññāsa ājīvakasate ekūnapaññāsa paribbājakasate ekūnapaññāsa
nāgavāsasate 5- vīse indriyasate tiṃse nirayasate chattiṃsarajodhātuyo
sattasaññīgabbhā sattaasaññīgabbhā sattanigaṇṭhigabbhā
sattadevā sattamanussā 6- sattapisācā 7- sattasarā sattapavuṭā
sattapapātā sattapapātasatāni sattasupinā sattasupinasatāni
cullāsītimahākappino 8- satasahassāni yāni bāle ca paṇḍite ca
sandhāvitvā saṃsaritvā dukkhassantaṃ karissanti tattha natthi imināhaṃ
sīlena vā vattena vā tapena vā brahmacariyena vā aparipakkaṃ
vā kammaṃ paripācessāmi paripakkaṃ vā kammaṃ phussā phussā
byantikarissāmīti 9- hevaṃ natthi doṇamite sukhadukkhe pariyantakate
@Footnote: 1 Sī. mahārājāti pāṭho na dissati. 2 Sī. saṭṭhiñca. 3 Sī. aḍḍhakamme
@ca. 4 Sī. vaṭṭhipaṭipadā vaṭṭhantarakappā. 5 Sī. nāgāvasasate.
@Yu. nāgāvāsasate. 6 Sī. mānusā. 7 Sī. pesācā.
@8 Sī. mahākappuno. 9 Sī. phussa phussa byantikarissāmīti.
Saṃsāre natthi hānavaḍḍhane 1- natthi ukkaṃsāvakkaṃse seyyathāpi nāma
suttagule khitte nibbeṭhiyamānameva paleti 2- evameva bāle ca
paṇḍite ca sandhāvitvā saṃsaritvā dukkhassantaṃ karissantīti
{95.2} itthaṃ kho me bhante makkhali gosālo sandiṭṭhikaṃ
sāmaññaphalaṃ puṭṭho samāno saṃsārasuddhiṃ byākāsi seyyathāpi
bhante ambaṃ vā puṭṭho labujaṃ byākareyya labujaṃ vā puṭṭho ambaṃ
byākareyya evameva kho me bhante makkhali gosālo sandiṭṭhikaṃ
sāmaññaphalaṃ puṭṭho samāno saṃsārasuddhiṃ byākāsi tassa mayhaṃ
bhante etadahosi kathaṃ hi nāma mādiso samaṇaṃ vā brāhmaṇaṃ vā vijite
vasantaṃ apasādetabbaṃ maññeyyāti so kho ahaṃ bhante makkhalissa
gosālassa bhāsitaṃ neva abhinandiṃ nappaṭikkosiṃ anabhinanditvā
appaṭikkositvā anattamano anattamanavācaṃ anicchāretvā tameva
vācaṃ anuggaṇhanto anikkujjento uṭṭhāyāsanā pakkāmiṃ.
[96] Ekamidāhaṃ bhante samayaṃ yena ajito kesakambalo 3-
tenupasaṅkamiṃ upasaṅkamitvā ajitena kesakambalena saddhiṃ sammodiṃ sammodanīyaṃ
kathaṃ sārāṇīyaṃ vītisāretvā ekamantaṃ nisīdiṃ ekamantaṃ nisinno
kho ahaṃ bhante ajitaṃ kesakambalaṃ etadavocaṃ yathā nu kho imāni
bho ajita puthusippāyatanāni .pe. sakkā nu kho bho ajita
evameva diṭṭhe va dhamme sandiṭṭhikaṃ sāmaññaphalaṃ paññapetunti
@Footnote: 1 Sī. hāyanavaddhane. 2 Sī. phaleti. 3 Sī. ajito kesakambali.
{96.1} Evaṃ vutte bhante ajito kesakambalo maṃ etadavoca natthi
mahārāja dinnaṃ natthi yiṭṭhaṃ natthi huttaṃ natthi sukaṭadukkaṭānaṃ kammānaṃ
phalaṃ vipāko natthi ayaṃ loko natthi paraloko 1- natthi mātā natthi
pitā natthi sattā opapātikā natthi loke samaṇabrāhmaṇā
samaggagatā 2- sammāpaṭipannā ye imañca lokaṃ parañca lokaṃ
sayaṃ abhiññā sacchikatvā pavedenti cātummahābhūtiko ayaṃ puriso
yadā kālaṃ karoti paṭhavī paṭhavikāyaṃ anupeti anupagacchati 3- āpo
āpokāyaṃ anupeti anupagacchati tejo tejokāyaṃ anupeti anupagacchati
vāyo vāyokāyaṃ anupeti anupagacchati ākāsaṃ indriyāni saṃkamanti
āsandipañcamā purisā taṃ 4- ādāya gacchanti yāva āḷāhanā
padāni paññāyanti 5- kāpotakāni aṭṭhīni bhavanti bhassantā hutiyo
dattupaññattamidaṃ 6- dānaṃ tesaṃ tucchaṃ musā vilāpo 7- ye keci
atthikavādaṃ vadanti bāle ca paṇḍite ca kāyassa bhedā ucchijjanti
vinassanti na honti paraṃ maraṇāti
{96.2} itthaṃ kho me bhante ajito kesakambalo sandiṭṭhikaṃ sāmaññaphalaṃ puṭṭho
samāno ucchedaṃ 8- byākāsi seyyathāpi bhante ambaṃ vā puṭṭho labujaṃ byākareyya
@Footnote: 1 Sī. paro loko. 2 samaggatā sammaggatātipi dve pāṭhā
@dissanti. 3 Sī. anupigacchati. 4 Sī. mataṃ. 5 Sī. ālāhanā
@padāni paññāpentīti pāṭho dissati. 6 Sī. dattupaññattaṃ
@yadidaṃ. 7 Sī. musāvilopo. 8 Sī. ucchedavādaṃ.
Labujaṃ vā puṭṭho ambaṃ byākareyya evameva kho me bhante ajito
kesakambalo sandiṭṭhikaṃ sāmaññaphalaṃ puṭṭho samāno ucchedaṃ
byākāsi tassa mayhaṃ bhante etadahosi kathaṃ hi nāma mādiso
samaṇaṃ vā brāhmaṇaṃ vā vijite vasantaṃ apasādetabbaṃ maññeyyāti
so kho ahaṃ bhante ajitassa kesakambalassa bhāsitaṃ neva abhinandiṃ
nappaṭikkosiṃ anabhinanditvā appaṭikkositvā anattamano anattamanavācaṃ
anicchāretvā tameva vācaṃ anuggaṇhanto anikkujjento uṭṭhāyāsanā
pakkāmiṃ.
[97] Ekamidāhaṃ bhante samayaṃ yena pakudho kaccāyano tenupasaṅkamiṃ
upasaṅkamitvā pakudhena kaccāyanena saddhiṃ sammodiṃ sammodanīyaṃ kathaṃ
sārāṇīyaṃ vītisāretvā ekamantaṃ nisīdiṃ ekamantaṃ nisinno kho ahaṃ
bhante pakudhaṃ kaccāyanaṃ etadavocaṃ yathā nu kho imāni bho kaccāyana
puthusippāyatanāni .pe. sakkā nu kho bho kaccāyana evameva
diṭṭhe va dhamme sandiṭṭhikaṃ sāmaññaphalaṃ paññapetunti
{97.1} evaṃ vutte bhante pakudho kaccāyano maṃ etadavoca sattime
mahārāja kāyā akaṭā akaṭavidhā animmitā animmātā vañjhā kūṭaṭṭhā
esikaṭṭhāyiṭṭhitā 1- te na iñjanti na vipariṇamanti na aññamaññaṃ
byābādhenti nālaṃ aññamaññassa sukhāya vā dukkhāya vā sukhadukkhāya
vā katame satta paṭhavikāyo āpokāyo tejokāyo vāyokāyo sukhe dukkhe jīve
@Footnote: 1 esikaṭṭhāyiṭṭhikātipi pāṭho.
Sattame ime sattakāyā 1- akaṭā akaṭavidhā animmitā animmātā
vañjhā kūṭaṭṭhā esikaṭṭhāyiṭṭhitā te na iñjanti na vipariṇamanti
na aññamaññaṃ byābādhenti nālaṃ aññamaññassa sukhāya vā
dukkhāya vā sukhadukkhāya vā tattha natthi hantā vā ghātetā vā
sotā vā sāvetā vā 2- viññātā vā viññāpetā vā so hi 3-
tiṇhena satthena sīsaṃ chindati na koci kañci jīvitā 4- voropeti
sattannaṃyeva kāyānaṃ antarena satthamanupattatīti 5-
{97.2} itthaṃ kho me bhante pakudho kaccāyano sandiṭṭhikaṃ sāmaññaphalaṃ
puṭṭho samāno aññena aññaṃ byākāsi seyyathāpi bhante ambaṃ vā
puṭṭho labujaṃ byākareyya labujaṃ vā puṭṭho ambaṃ byākareyya evameva
kho me bhante pakudho kaccāyano sandiṭṭhikaṃ sāmaññaphalaṃ puṭṭho samāno
aññena aññaṃ byākāsi tassa mayhaṃ bhante etadahosi kathaṃ hi nāma
mādiso samaṇaṃ vā brāhmaṇaṃ vā vijite vasantaṃ apasādetabbaṃ maññeyyāti
so kho ahaṃ bhante pakudhassa kaccāyanassa bhāsitaṃ neva abhinandiṃ nappaṭikkosiṃ
anabhinanditvā appaṭikkositvā anattamano anattamanavācaṃ anicchāretvā
tameva vācaṃ anuggaṇhanto anikkujjento uṭṭhāyāsanā pakkāmiṃ.
[98] Ekamidāhaṃ bhante samayaṃ yena nigaṇṭho nāṭaputto
@Footnote: 1 Sī. santime sattakāyā. 2 Sī. sovetā vā. 3 Sī. sopi.
@4 Sī. kāci jīvitā. 5 Sī. satthavivaramanupatanti.
Tenupasaṅkamiṃ upasaṅkamitvā nigaṇṭhena nāṭaputtena saddhiṃ sammodiṃ
sammodanīyaṃ kathaṃ sārāṇīyaṃ vītisāretvā ekamantaṃ nisīdiṃ ekamantaṃ
nisinno kho ahaṃ bhante nigaṇṭhaṃ nāṭaputtaṃ etadavocaṃ yathā nu kho
imāni bho aggivessana puthusippāyatanāni .pe. sakkā nu kho
bho aggivessana evameva diṭṭhe va dhamme sandiṭṭhikaṃ sāmaññaphalaṃ
paññapetunti
{98.1} evaṃ vutte bhante nigaṇṭho nāṭaputto maṃ etadavoca idha
mahārāja nigaṇṭho cātuyāmasaṃvarasaṃvuto hoti kathañca kho 1-
mahārāja nigaṇṭho cātuyāmasaṃvarasaṃvuto hoti idha mahārāja nigaṇṭho
sabbavārivārito ca hoti sabbavāriyutto ca sabbavāridhuto ca
sabbavāriphuṭo 2- ca evaṃ kho 3- mahārāja nigaṇṭho cātuyāmasaṃvarasaṃvuto
hoti yato kho mahārāja nigaṇṭho evaṃ cātuyāmasaṃvarasaṃvuto hoti ayaṃ vuccati
mahārāja nigaṇṭho nāṭaputto 4- gatatto ca yatatto ca ṭhitatto cāti
{98.2} itthaṃ kho me bhante nigaṇṭho nāṭaputto sandiṭṭhikaṃ sāmaññaphalaṃ
puṭṭho samāno cātuyāmasaṃvaraṃ byākāsi seyyathāpi bhante ambaṃ vā
puṭṭho labujaṃ byākareyya labujaṃ vā puṭṭho ambaṃ byākareyya evameva kho
bhante nigaṇṭho nāṭaputto sandiṭṭhikaṃ sāmaññaphalaṃ puṭṭho samāno
cātuyāmasaṃvaraṃ byākāsi tassa mayhaṃ bhante etadahosi kathaṃ hi nāma
mādiso samaṇaṃ vā brāhmaṇaṃ vā vijite vasantaṃ apasādetabbaṃ
@Footnote: 1 Sī. khosaddo natthi. 2 Sī. sabbavāripuṭṭho. 3 Sī. khosaddo
@natthi. 4 Yu. -phuṭṭho. Sī. nāṭaputtoti pāṭho natthi.
Maññeyyāti so kho ahaṃ bhante nigaṇṭhassa nāṭaputtassa bhāsitaṃ neva
abhinandiṃ nappaṭikkosiṃ anabhinanditvā appaṭikkositvā anattamano
anattamanavācaṃ anicchāretvā tameva vācaṃ anuggaṇhanto anikkujjento
uṭṭhāyāsanā pakkāmiṃ.
[99] Ekamidāhaṃ bhante samayaṃ yena sañjayo velaṭṭhaputto 1-
tenupasaṅkamiṃ upasaṅkamitvā sañjayena velaṭṭhaputtena saddhiṃ sammodiṃ
sammodanīyaṃ kathaṃ sārāṇīyaṃ vītisāretvā ekamantaṃ nisīdiṃ ekamantaṃ
nisinno kho ahaṃ bhante sañjayaṃ velaṭṭhaputtaṃ etadavocaṃ yathā nu kho
imāni bho sañjaya puthusippāyatanāni .pe. sakkā nu kho bho sañjaya
evameva diṭṭhe va dhamme sandiṭṭhikaṃ sāmaññaphalaṃ paññapetunti
{99.1} evaṃ vutte bhante sañjayo velaṭṭhaputto maṃ etadavoca
atthi paro lokoti iti ce maṃ pucchasi atthi paro lokoti iti ce me
assa atthi paro lokoti iti tena 2- byākareyyaṃ evantipi me no
tathātipi me no aññathātipi me no notipi me no no notipi me no
natthi paro loko atthi ca natthi ca paro loko neva atthi na natthi
paro loko atthi sattā opapātikā natthi sattā opapātikā
atthi ca natthi ca sattā opapātikā neva atthi na natthi sattā
opapātikā atthi sukaṭadukkaṭānaṃ kammānaṃ phalaṃ vipāko iti ce
maṃ pucchasi atthi sukaṭadukkaṭānaṃ kammānaṃ phalaṃ vipāko iti ce
@Footnote: 1 Sī. velaṭṭhiputto. 2 te naṃ.
Me assa atthi sukaṭadukkaṭānaṃ kammānaṃ phalaṃ vipāko iti tena
byākareyyaṃ natthi sukaṭadukkaṭānaṃ kammānaṃ phalaṃ vipāko atthi ca
natthi ca sukaṭadukkaṭānaṃ kammānaṃ phalaṃ vipāko neva atthi na natthi
sukaṭadukkaṭānaṃ kammānaṃ phalaṃ vipāko hoti tathāgato parammaraṇā
na hoti tathāgato parammaraṇā hoti ca na ca hoti tathāgato
parammaraṇā neva hoti na na hoti tathāgato parammaraṇāti iti ce
maṃ pucchasi neva hoti na na hoti tathāgato parammaraṇāti iti ce me
assa neva hoti na na hoti tathāgato parammaraṇāti iti tena byākareyyaṃ
evantipi me no tathātipi me no aññathātipi me no notipi
me no no notipi me noti
{99.2} itthaṃ kho me bhante sañjayo velaṭṭhaputto sandiṭṭhikaṃ
sāmaññaphalaṃ puṭṭho samāno vikkhepaṃ byākāsi seyyathāpi bhante
ambaṃ vā puṭṭho labujaṃ byākareyya labujaṃ vā puṭṭho ambaṃ byākareyya
evameva kho bhante sañjayo velaṭṭhaputto sandiṭṭhikaṃ sāmaññaphalaṃ
puṭṭho samāno vikkhepaṃ byākāsi tassa mayhaṃ bhante etadahosi
ayañca imesaṃ samaṇabrāhmaṇānaṃ sabbabālo sabbamūḷho kathaṃ hi
nāma sandiṭṭhikaṃ sāmaññaphalaṃ puṭṭho samāno vikkhepaṃ byākarissatīti
tassa mayhaṃ bhante etadahosi kathañhi nāma mādiso samaṇaṃ vā
brāhmaṇaṃ vā vijite vasantaṃ apasādetabbaṃ maññeyyāti so kho
ahaṃ bhante sañjayassa velaṭṭhaputtassa bhāsitaṃ neva abhinandiṃ nappaṭikkosiṃ
anabhinanditvā appaṭikkositvā anattamano anattamanavācaṃ
Anicchāretvā tameva vācaṃ anuggaṇhanto anikkujjento uṭṭhāyāsanā
pakkāmiṃ.
[100] Sohaṃ bhante bhagavantampi pucchāmi yathā nu kho imāni bhante
puthusippāyatanāni seyyathīdaṃ hatthārohā assārohā rathikā dhanuggahā
celakā calakā piṇḍadāyikā uggā rājaputtā pakkhandino mahānāgā
surā cammayodhino dāsakaputtā āḷārikā kappakā nhāpakā sūdā
mālākārā rajakā pesakārā nalakārā kumbhakārā gaṇakā muddikā
yāni vā panaññānipi evaṃgatāni puthusippāyatanāni te diṭṭhe va
dhamme sandiṭṭhikaṃ sippaphalaṃ upajīvanti te tena attānaṃ sukhenti
piṇenti mātāpitaro sukhenti piṇenti puttadāraṃ sukhenti piṇenti
mittāmacce sukhenti piṇenti samaṇabrāhmaṇesu uddhaggikaṃ dakkhiṇaṃ
patiṭṭhāpenti sovaggikaṃ sukhavipākaṃ saggasaṃvattanikaṃ sakkā nu kho bhante
evameva diṭṭhe va dhamme sandiṭṭhikaṃ sāmaññaphalaṃ paññapetunti.
{100.1} Sakkā mahārāja tenahi mahārāja taññevettha
paṭipucchissāmi yathā te khameyya tathā taṃ byākareyyāsi taṃ kiṃ
maññasi mahārāja idha te assa puriso dāso kammakaro pubbuṭṭhāyī
pacchānipātī kiṃkārapaṭissāvī manāpacārī piyavādī mukhullokiko 1-
tassa evamassa acchariyaṃ vata bho abbhūtaṃ vata bho puññānaṃ gati
puññānaṃ vipāko ayaṃ hi rājā māgadho ajātasattu vedehiputto
@Footnote: 1 Sī. mukhullokako.
Manusso ahaṃpi manusso ayaṃ hi rājā māgadho ajātasattu vedehiputto
pañcahi kāmaguṇehi samappito samaṅgībhūto paricāreti devo maññe
ahaṃ panamhissa 1- dāso kammakaro pubbuṭṭhāyī pacchānipātī
kiṃkārapaṭissāvī manāpacārī piyavādī mukhullokiko so vatassāhaṃ puññāni
kareyyaṃ yannūnāhaṃ kesamassuṃ ohāretvā kāsāyāni vatthāni
acchādetvā agārasmā anagāriyaṃ pabbajeyyanti . so aparena
samayena kesamassuṃ ohāretvā kāsāyāni vatthāni acchādetvā
agārasmā anagāriyaṃ pabbajeyya . so evaṃ pabbajito samāno
kāyena saṃvuto vihareyya vācāya saṃvuto vihareyya manasā saṃvuto
vihareyya ghāsacchādanaparamatāya santuṭṭho 2- abhirato paviveke.
{100.2} Tañceke 3- purisā evamāroceyyuṃ yagghe deva
jāneyyāsi yo te so puriso dāso kammakaro pubbuṭṭhāyī
pacchānipātī kiṃkārapaṭissāvī manāpacārī piyavādī mukhullokiko
so deva kesamassuṃ ohāretvā kāsāyāni vatthāni acchādetvā
agārasmā anagāriyaṃ pabbajito so evaṃ pabbajito samāno kāyena
saṃvuto viharati vācāya saṃvuto viharati manasā saṃvuto viharati ghāsacchādana-
paramatāya santuṭṭho abhirato paviveketi. Apinu tvaṃ evaṃ vadeyyāsi etu
me bho so puriso punadeva hotu dāso kammakaro pubbuṭṭhāyī pacchānipātī
kiṃkārapaṭissāvī manāpacārī piyavādī mukhullokikoti . nohetaṃ bhante
@Footnote: 1 ahaṃ panamhassātipi pāṭho. 2 Sī. saṇṭhito. 3 Sī. tañce te.
Athakho naṃ mayameva abhivādeyyāmapi paccuṭṭheyyāmapi āsanenapi
nimanteyyāma abhinimanteyyāmapi naṃ cīvarapiṇḍapātasenāsanagilānapaccaya-
bhesajjaparikkhārehi dhammikaṃpissa rakkhāvaraṇaguttiṃ saṃvidaheyyāmāti .
Taṃ kiṃ maññasi mahārāja yadi evaṃ sante hoti vā sandiṭṭhikaṃ sāmaññaphalaṃ
no vāti . Addhā kho bhante evaṃ sante hoti sandiṭṭhikaṃ sāmaññaphalanti.
Idaṃ kho te mahārāja mayā paṭhamaṃ diṭṭhe va dhamme sandiṭṭhikaṃ sāmaññaphalaṃ
paññattanti.
[101] Sakkā pana bhante aññaṃpi evameva diṭṭhe va dhamme
sandiṭṭhikaṃ sāmaññaphalaṃ paññapetunti . sakkā mahārāja tenahi
mahārāja taññevettha paṭipucchissāmi yathā te khameyya tathā
naṃ byākareyyāsi . taṃ kiṃ maññasi mahārāja idha te assa
puriso kassako gahapatiko kārakārako rāsivaḍḍhako . tassa
evamassa acchariyaṃ vata bho abbhūtaṃ vata bho puññānaṃ gati puññānaṃ
vipāko ayaṃ hi rājā māgadho ajātasattu vedehiputto manusso
ahampi manusso ayaṃ hi rājā māgadho ajātasattu vedehiputto
pañcahi kāmaguṇehi samappito samaṅgībhūto paricāreti devo maññe
ahaṃ panamhissa kassako gahapatiko kārakārako rāsivaḍḍhako so
vatassāhaṃ puññāni kareyyaṃ yannūnāhaṃ kesamassuṃ ohāretvā
kāsāyāni vatthāni acchādetvā agārasmā anagāriyaṃ pabbajeyyanti.
{101.1} So aparena samayena appaṃ vā bhogakkhandhaṃ pahāya
Mahantaṃ vā bhogakkhandhaṃ pahāya appaṃ vā ñātiparivaṭṭaṃ pahāya
mahantaṃ vā ñātiparivaṭṭaṃ pahāya kesamassuṃ ohāretvā kāsāyāni
vatthāni acchādetvā agārasmā anagāriyaṃ pabbajeyya . so
evaṃ pabbajito samāno kāyena saṃvuto vihareyya vācāya saṃvuto
vihareyya manasā saṃvuto vihareyya ghāsacchādanaparamatāya santuṭṭho
abhirato paviveke . tañceke purisā evamāroceyyuṃ yagghe deva
jāneyyāsi yo te so puriso kassako gahapatiko kārakārako
rāsivaḍḍhako so deva kesamassuṃ ohāretvā kāsāyāni vatthāni
acchādetvā agārasmā anagāriyaṃ pabbajito so evaṃ pabbajito
samāno kāyena saṃvuto viharati vācāya saṃvuto viharati manasā
saṃvuto viharati ghāsacchādanaparamatāya santuṭṭho abhirato paviveketi .
Apinu tvaṃ evaṃ vadeyyāsi etu me bho so puriso punadeva
hotu kassako gahapatiko kārakārako rāsivaḍḍhakoti.
{101.2} No hetaṃ bhante athakho naṃ mayameva abhivādeyyāmapi
paccuṭṭheyyāmapi āsanenapi nimanteyyāma abhinimanteyyāmapi naṃ
cīvarapiṇḍapātasenāsanagilānapaccayabhesajjaparikkhārehi dhammikaṃpissa
rakkhāvaraṇaguttiṃ saṃvidaheyyāmāti . taṃ kiṃ maññasi mahārāja yadi evaṃ
sante hoti vā sandiṭṭhikaṃ sāmaññaphalaṃ no vāti . Addhā kho bhante
evaṃ sante hoti sandiṭṭhikaṃ sāmaññaphalanti . idaṃ kho te mahārāja
mayā dutiyaṃ diṭṭhe va dhamme sandiṭṭhikaṃ sāmaññaphalaṃ paññattanti.
[102] Sakkā pana bhante aññaṃpi diṭṭhe va dhamme sandiṭṭhikaṃ
sāmaññaphalaṃ paññapetuṃ imehi sandiṭṭhikehi sāmaññaphalehi
abhikkantatarañca paṇītatarañcāti . sakkā mahārāja tenahi mahārāja
suṇāhi 1- sādhukaṃ manasikarohi bhāsissāmīti . evaṃ bhanteti kho
rājā 2- māgadho ajātasattu vedehiputto bhagavato paccassosi.
{102.1} Bhagavā etadavoca idha mahārāja tathāgato loke uppajjati
arahaṃ sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṃ buddho bhagavāti 3- so imaṃ
lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ
sayaṃ abhiññā sacchikatvā pavedeti . so dhammaṃ deseti ādikalyāṇaṃ
majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ
parisuddhaṃ brahmacariyaṃ pakāseti.
{102.2} Taṃ dhammaṃ suṇāti gahapati vā gahapatiputto vā aññatarasmiṃ
vā kule pacchā 4- jāto. So taṃ dhammaṃ sutvā tathāgate saddhaṃ paṭilabhati. So
tena saddhāpaṭilābhena samannāgato iti paṭisañcikkhati sambādho gharāvāso
rajāpatho 5- abbhokāso pabbajjā nayidaṃ sukaraṃ agāraṃ ajjhāvasatā
ekantaparipuṇṇaṃ ekantaparisuddhaṃ saṃkhalikhitaṃ brahmacariyaṃ carituṃ yannūnāhaṃ
kesamassuṃ ohāretvā kāsāyāni vatthāni acchādetvā agārasmā
@Footnote: 1 Sī. suṇohīti vā pāṭho. 2 Sī. mahārājā. 3 Sī. bhagavā.
@4 Sī. paccā. 5 Sī. rajopatho.
Anagāriyaṃ pabbajeyyanti.
{102.3} So aparena samayena appaṃ vā bhogakkhandhaṃ pahāya
mahantaṃ vā bhogakkhandhaṃ pahāya appaṃ vā ñātiparivaṭṭaṃ pahāya mahantaṃ
vā ñātiparivaṭṭaṃ pahāya kesamassuṃ ohāretvā kāsāyāni vatthāni
acchādetvā agārasmā anagāriyaṃ pabbajati . so evaṃ pabbajito
samāno pātimokkhasaṃvarasaṃvuto viharati ācāragocarasampanno aṇumattesu
vajjesu bhayadassāvī samādāya sikkhati sikkhāpadesu kāyakammavacīkammena 1-
samannāgato kusalena parisuddhājīvo sīlasampanno indriyesu guttadvāro
satisampajaññena samannāgato santuṭṭho.
[103] Kathañca mahārāja bhikkhu sīlasampanno hoti idha mahārāja
bhikkhu pāṇātipātaṃ pahāya pāṇātipātā paṭivirato hoti nihitadaṇḍo
nihitasattho lajjī dayāpanno sabbapāṇabhūtahitānukampī viharati . idaṃpissa
hoti sīlasmiṃ.
{103.1} Adinnādānaṃ pahāya adinnādānā paṭivirato hoti
dinnādāyī dinnapāṭikaṅkhī athenena sucibhūtena attanā viharati. Idaṃpissa
hoti sīlasmiṃ.
{103.2} Abrahmacariyaṃ pahāya brahmacārī hoti ārācārī virato
methunā gāmadhammā. Idaṃpissa hoti sīlasmiṃ.
{103.3} Musāvādaṃ pahāya musāvādā paṭivirato hoti saccavādī
saccasandho ṭheto 2- paccayiko avisaṃvādako lokassa . Idaṃpissa hoti
sīlasmiṃ.
{103.4} Pisuṇaṃ vācaṃ pahāya pisuṇāya vācāya
paṭivirato hoti ito sutvā na amutra akkhātā
@Footnote: 1 Sī. kāyavacīkammena. 2 Sī. theto.
Imesaṃ bhedāya amutra vā sutvā na imesaṃ akkhātā amūsaṃ bhedāya
iti bhinnānaṃ vā sandhātā sahitānaṃ vā anuppadātā samaggārāmo
samaggarato samagganandī samaggakaraṇiṃ vācaṃ bhāsitā hoti . idaṃpissa
hoti sīlasmiṃ.
{103.5} Pharusaṃ vācaṃ pahāya pharusāya vācāya paṭivirato hoti yā
sā vācā nelā kaṇṇasukhā pemanīyā hadayaṅgamā porī bahujanakantā
bahujanamanāpā tathārūpiṃ vācaṃ bhāsitā hoti. Idaṃpissa hoti sīlasmiṃ.
{103.6} Samphappalāpaṃ pahāya samphappalāpā paṭivirato hoti
kālavādī bhūtavādī atthavādī dhammavādī vinayavādī nidhānavatiṃ vācaṃ
bhāsitā hoti kālena sāpadesaṃ pariyantavatiṃ atthasañhitaṃ . idaṃpissa
hoti sīlasmiṃ.
{103.7} Bījagāmabhūtagāmasamārambhā paṭivirato hoti. Ekabhattiko
hoti rattūparato virato vikālabhojanā. Naccagītavāditavisūkadassanā paṭivirato
hoti . mālāgandhavilepanadhāraṇamaṇḍanavibhūsanaṭṭhānā paṭivirato hoti .
Uccāsayanamahāsayanā paṭivirato hoti. Jātarūparajaṭapaṭiggahaṇā 1- paṭivirato
hoti . āmakadhaññapaṭiggahaṇā paṭivirato hoti . āmakamaṃsapaṭiggahaṇā
paṭivirato hoti . itthīkumārikapaṭiggahaṇā 2- paṭivirato hoti .
Dāsīdāsapaṭiggahaṇā paṭivirato hoti . ajeḷakapaṭiggahaṇā paṭivirato
hoti . kukkuṭasūkarapaṭiggahaṇā paṭivirato hoti . hatthigavāssavaḷavā-
paṭiggahaṇā paṭivirato hoti . khettavatthupaṭiggahaṇā paṭivirato
@Footnote: 1 Sī. jātarūparajatapaṭiggahaṇā. 2 Sī. itthīkumārīpaṭiggahaṇā.
Hoti . dūteyyapahiṇagamanānuyogā paṭivirato hoti . kayavikkayā
paṭivirato hoti . tulākūṭakaṃsakūṭamānakūṭā paṭivirato hoti .
Ukkoṭanavañcananikatisāviyogā paṭivirato hoti . chedanavadhabandhana-
viparāmosaālopasahasākārā paṭivirato hoti. Idaṃpissa hoti sīlasmiṃ.
Cullasīlaṃ niṭṭhitaṃ 1-.
[104] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ bījagāmabhūtagāmasamārambhaṃ anuyuttā
viharanti . seyyathīdaṃ . mūlabījaṃ khandhabījaṃ phalabījaṃ aggabījaṃ bījabījameva
pañcamaṃ iti vā . iti evarūpā bījagāmabhūtagāmasamārambhā paṭivirato
hoti. Idaṃpissa hoti sīlasmiṃ.
[105] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ sannidhikāraparibhogaṃ anuyuttā
viharanti . seyyathīdaṃ . annasannidhi 2- pānasannidhi vatthasannidhi
yānasannidhi sayanasannidhi gandhasannidhi āmisasannidhi iti vā . iti
evarūpā sannidhikāraparibhogā paṭivirato hoti . idaṃpissa hoti
sīlasmiṃ.
[106] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ visūkadassanaṃ anuyuttā viharanti .
@Footnote: 1 Sī. cullasīlaṃ niṭṭhitanti idaṃ natthi. 2 annasannidhintipi annasannadhitipi
@pāṭho dissati.
Seyyathīdaṃ . naccaṃ gītaṃ vāditaṃ pekkhaṃ akkhānaṃ pāṇissaraṃ vetāḷaṃ
kumbhathūnaṃ sobhanagarakaṃ caṇḍālaṃ vaṃsaṃ dhovanaṃ hatthiyuddhaṃ assayuddhaṃ
mahisayuddhaṃ usabhayuddhaṃ ajayuddhaṃ meṇḍayuddhaṃ kukkuṭayuddhaṃ vaṭṭakayuddhaṃ
daṇḍayuddhaṃ muṭṭhiyuddhaṃ nibbuddhaṃ uyyodhikaṃ balaggaṃ senābyūhaṃ
anīkadassanaṃ iti vā . iti evarūpā visūkadassanā paṭivirato
hoti. Idaṃpissa hoti sīlasmiṃ.
[107] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ jūtappamādaṭṭhānānuyogamanuyuttā
viharanti . seyyathīdaṃ . aṭṭhapadaṃ dasapadaṃ ākāsaṃ parihārapathaṃ
santikaṃ khalikaṃ ghaṭikaṃ salākahatthaṃ akkhaṃ paṅkacīraṃ vaṅkakaṃ mokkhacikaṃ
ciṅgulakaṃ pattāḷhakaṃ rathakaṃ dhanukaṃ akkharikaṃ mānesikaṃ 1- yathāvajjaṃ iti
vā . iti evarūpā jūtappamādaṭṭhānānuyogā paṭivirato hoti .
Idaṃpissa hoti sīlasmiṃ.
[108] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ uccāsayanamahāsayanaṃ anuyuttā
viharanti . seyyathīdaṃ . āsandiṃ pallaṅkaṃ goṇakaṃ cittakaṃ paṭikaṃ paṭalikaṃ
tūlikaṃ vikatikaṃ uddhalomiṃ 2- ekantalomiṃ kaṭissaṃ koseyyaṃ kuttakaṃ hatthattharaṃ
assattharaṃ rathattharaṃ ajinappaveṇiṃ kādalimigapavarapaccattharaṇaṃ sauttaracchadaṃ
ubhatolohitakūpadhānaṃ iti vā . iti evarūpā uccāsayanamahāsayanā
@Footnote: 1 Sī. manosikaṃ. (manesikanti pāṭhena bhavitabbaṃ). 2 Sī. uddalomiṃ.
Paṭivirato hoti. Idaṃpissa hoti sīlasmiṃ.
[109] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ maṇḍanavibhūsanaṭṭhānānuyogaṃ anuyuttā
viharanti . seyyathīdaṃ . ucchādanaṃ parimaddanaṃ nhāpanaṃ sambāhanaṃ
ādāsaṃ añjanaṃ mālāgandhavilepanaṃ mukhacuṇṇaṃ mukhavilepanaṃ hatthabandhaṃ 1-
sikhābandhaṃ daṇḍaṃ nālikaṃ asiṃ khaggaṃ chattaṃ citrupāhanaṃ uṇhīsaṃ maṇiṃ
vālavījaniṃ odātāni vatthāni dīghadasāni iti vā . iti evarūpā
maṇḍanavibhūsanaṭṭhānānuyogā paṭivirato hoti. Idaṃpissa hoti sīlasmiṃ.
[110] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ tiracchānakathaṃ anuyuttā viharanti .
Seyyathīdaṃ . rājakathaṃ corakathaṃ mahāmattakathaṃ senākathaṃ bhayakathaṃ yuddhakathaṃ
annakathaṃ pānakathaṃ vatthakathaṃ sayanakathaṃ mālākathaṃ gandhakathaṃ ñātikathaṃ
yānakathaṃ gāmakathaṃ nigamakathaṃ nagarakathaṃ janapadakathaṃ itthīkathaṃ purisakathaṃ 2-
sūrakathaṃ visikhākathaṃ kumbhaṭṭhānakathaṃ pubbapetakathaṃ nānattakathaṃ lokakkhāyikaṃ
samuddakkhāyikaṃ iti bhavābhavakathaṃ iti vā . Iti evarūpāya tiracchānakathāya
paṭivirato hoti. Idaṃpissa hoti sīlasmiṃ.
[111] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ viggāhikakathaṃ anuyuttā viharanti .
@Footnote: 1 Sī. mālāvilepanaṃ mukhacuṇṇakaṃ mukhālepaṃ hatthabandhanaṃ. 2 Sī.
@purisakathanti pāṭho na dissati.
Seyyathīdaṃ . tvaṃ imaṃ dhammavinayaṃ ājānāsi ahaṃ imaṃ dhammavinayaṃ
ājānāmi kiṃ tvaṃ imaṃ dhammavinayaṃ ājānissasi micchāpaṭipanno
tvamasi ahamasmi sammāpaṭipanno sahitaṃ me asahitante pure
vacanīyaṃ pacchā avaca pacchā vacanīyaṃ pure avaca adhiciṇṇante
viparāvattaṃ āropito te vādo niggahitosi caravādappamokkhāya
nibbeṭhehi vā sace pahosīti iti vā. Iti evarūpāya viggāhikakathāya
paṭivirato hoti. Idaṃpissa hoti sīlasmiṃ.
[112] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpaṃ dūteyyapahiṇagamanānuyogamanuyuttā
viharanti . seyyathīdaṃ . raññaṃ rājamahāmattānaṃ khattiyānaṃ brāhmaṇānaṃ
gahapatikānaṃ kumārānaṃ idha gaccha amutra gaccha idaṃ hara amutra idaṃ āharāti
iti vā . iti evarūpā dūteyyapahiṇagamanānuyogā paṭivirato hoti.
Idaṃpissa hoti sīlasmiṃ.
[113] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te kuhakā ca honti lapakā ca nemittikā ca nipphesikā
ca 1- lābhena ca lābhaṃ nijigiṃsitāro iti vā 2-. Iti evarūpā kuhanalapanā
paṭivirato hoti. Idaṃpissa hoti sīlasmiṃ.
Majjhimasīlaṃ niṭṭhitaṃ 3-.
@Footnote: 1 Sī. nimittakā ca nippesikā ca. 2 Sī. iti vāti idaṃ natthi.
@3 Sī. majjhimasīlaṃ niṭṭhitanti idaṃpi natthi.
[114] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . aṅgaṃ nimittaṃ uppāṭaṃ 1- supinaṃ
lakkhaṇaṃ mūsikacchinnaṃ aggihomaṃ dabbihomaṃ thusahomaṃ kaṇahomaṃ
taṇḍulahomaṃ sappihomaṃ telahomaṃ mukhahomaṃ lohitahomaṃ aṅgavijjā
vatthuvijjā khettavijjā sivavijjā bhūtavijjā bhūrivijjā ahivijjā
visavijjā vicchikavijjā mūsikavijjā sakuṇavijjā vāyasavijjā pakkajjhānaṃ
saraparittānaṃ migapakkaṃ iti vā . iti evarūpāya tiracchānavijjāya
micchājīvā paṭivirato hoti. Idaṃpissa hoti sīlasmiṃ.
[115] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . maṇilakkhaṇaṃ vatthalakkhaṇaṃ daṇḍalakkhaṇaṃ
satthalakkhaṇaṃ asilakkhaṇaṃ usulakkhaṇaṃ dhanulakkhaṇaṃ āvudhalakkhaṇaṃ 2- itthīlakkhaṇaṃ
purisalakkhaṇaṃ kumāralakkhaṇaṃ kumārīlakkhaṇaṃ dāsalakkhaṇaṃ dāsīlakkhaṇaṃ
hatthilakkhaṇaṃ assalakkhaṇaṃ mahisalakkhaṇaṃ usabhalakkhaṇaṃ golakkhaṇaṃ ajalakkhaṇaṃ
meṇḍalakkhaṇaṃ kukkuṭalakkhaṇaṃ vaṭṭakalakkhaṇaṃ godhālakkhaṇaṃ kaṇṇikalakkhaṇaṃ
kacchapalakkhaṇaṃ migalakkhaṇaṃ iti vā . iti evarūpāya tiracchānavijjāya
micchājīvā paṭivirato hoti. Idaṃpissa hoti sīlasmiṃ.
@Footnote: 1 Sī. uppādaṃ. 2 sī āyudhalakkhaṇaṃ.
[116] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . raññaṃ niyyānaṃ bhavissati raññaṃ
aniyyānaṃ bhavissati abbhantarānaṃ raññaṃ upayānaṃ bhavissati bāhirānaṃ
raññaṃ apayānaṃ bhavissati bāhirānaṃ raññaṃ upayānaṃ bhavissati
abbhantarānaṃ raññaṃ apayānaṃ bhavissati abbhantarānaṃ raññaṃ jayo
bhavissati bāhirānaṃ raññaṃ parājayo bhavissati bāhirānaṃ raññaṃ
jayo bhavissati abbhantarānaṃ raññaṃ parājayo bhavissati iti imassa
jayo bhavissati 1- imassa parājayo bhavissati iti vā . iti
evarūpāya tiracchānavijjāya micchājīvā paṭivirato hoti . idaṃpissa
hoti sīlasmiṃ.
[117] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . candaggāho bhavissati suriyaggāho
bhavissati nakkhattaggāho bhavissati candimasuriyānaṃ pathagamanaṃ bhavissati
candimasuriyānaṃ uppathagamanaṃ bhavissati nakkhattānaṃ pathagamanaṃ bhavissati
nakkhattānaṃ uppathagamanaṃ bhavissati ukkāpāto bhavissati disāḍāho
bhavissati bhūmicālo bhavissati devadundubhi bhavissati candimasuriyanakkhattānaṃ
uggamanaṃ oggamanaṃ saṃkilesaṃ vodānaṃ bhavissati evaṃvipāko
@Footnote: 1 Sī. bhavissatīti pāṭho na dissati.
Candaggāho bhavissati evaṃvipāko suriyaggāho bhavissati
evaṃvipāko nakkhattaggāho bhavissati evaṃvipākaṃ candimasuriyānaṃ
pathagamanaṃ bhavissati evaṃvipākaṃ candimasuriyānaṃ uppathagamanaṃ bhavissati
evaṃvipākaṃ nakkhattānaṃ pathagamanaṃ bhavissati evaṃvipākaṃ nakkhattānaṃ
uppathagamanaṃ bhavissati evaṃvipāko ukkāpāto bhavissati evaṃvipāko
disāḍāho bhavissati evaṃvipāko bhūmicālo bhavissati evaṃvipāko
devadundubhi bhavissati evaṃvipākaṃ candimasuriyanakkhattānaṃ uggamanaṃ
oggamanaṃ saṃkilesaṃ vodānaṃ bhavissati iti vā . iti evarūpāya
tiracchānavijjāya micchājīvā paṭivirato hoti. Idaṃpissa hoti sīlasmiṃ.
[118] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . suvuṭṭhikā bhavissati dubbuṭṭhikā bhavissati
subhikkhaṃ bhavissati dubbhikkhaṃ bhavissati khemaṃ bhavissati bhayaṃ bhavissati rogo
bhavissati ārogyaṃ bhavissati muddā gaṇanā saṃkhānaṃ kāveyyaṃ lokāyataṃ
iti vā . iti evarūpāya tiracchānavijjāya micchājīvā paṭivirato hoti.
Idaṃpissa hoti sīlasmiṃ.
[119] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . āvāhanaṃ vivāhanaṃ saṃvadanaṃ vivadanaṃ
Saṃkiraṇaṃ vikiraṇaṃ subhatakaraṇaṃ dubbhatakaraṇaṃ viruddhagabbhakaraṇaṃ jivhānibandhanaṃ
hanusaṃhananaṃ hatthābhijappanaṃ kaṇṇajappanaṃ ādāsapañhaṃ kumārīpañhaṃ
devapañhaṃ ādiccupaṭṭhānaṃ mahatupaṭṭhānaṃ abbhujjalanaṃ sirivhāyanaṃ iti
vā . iti evarūpāya tiracchānavijjāya micchājīvā paṭivirato hoti.
Idaṃpissa hoti sīlasmiṃ.
[120] Yathā vā paneke bhonto samaṇabrāhmaṇā saddhādeyyāni
bhojanāni bhuñjitvā te evarūpāya tiracchānavijjāya micchājīvena
jīvikaṃ kappenti . seyyathīdaṃ . santikammaṃ paṇidhikammaṃ bhūmikammaṃ
bhūrikammaṃ vassakammaṃ vossakammaṃ vatthukammaṃ vatthuparikiraṇaṃ ācamanaṃ
nhāpanaṃ juhanaṃ 1- vamanaṃ virecanaṃ uddhavirecanaṃ adhovirecanaṃ sīsavirecanaṃ
kaṇṇatelaṃ nettappānaṃ 2- natthukammaṃ añjanaṃ paccañjanaṃ sālākiyaṃ
sallakattiyaṃ dārakatikicchaṃ 3- mūlabhesajjānaṃ anuppadānaṃ osadhīnaṃ
paṭimokkho iti vā . iti evarūpāya tiracchānavijjāya micchājīvā
paṭivirato hoti. Idaṃpissa hoti sīlasmiṃ.
[121] Sa kho so mahārāja bhikkhu evaṃ sīlasampanno na kutoci
bhayaṃ samanupassati yadidaṃ sīlasaṃvarato . seyyathāpi mahārāja khattiyo
muddhāvasitto nihatapaccāmitto na kutoci bhayaṃ samanupassati yadidaṃ
paccatthikato evameva kho mahārāja bhikkhu evaṃ sīlasampanno
@Footnote: 1 Sī. nahāpanaṃ duhanaṃ. 2 Sī. nettatappanaṃ. 3 Sī. sallakattikaṃ
@dārakatikicchā.
Na kutoci bhayaṃ samanupassati yadidaṃ sīlasaṃvarato . so iminā ariyena
sīlakkhandhena samannāgato ajjhattaṃ anavajjasukhaṃ paṭisaṃvedeti .
Evaṃ kho mahārāja bhikkhu sīlasampanno hoti.
Mahāsīlaṃ niṭṭhitaṃ.
[122] Kathañca mahārāja bhikkhu indriyesu guttadvāro hoti.
Idha mahārāja bhikkhu cakkhunā rūpaṃ disvā na nimittaggāhī hoti
nānubyañjanaggāhī yatvādhikaraṇamenaṃ cakkhundriyaṃ asaṃvutaṃ viharantaṃ
abhijjhādomanassā pāpakā akusalā dhammā anvāssaveyyuṃ tassa
saṃvarāya paṭipajjati rakkhati cakkhundriyaṃ cakkhundriye saṃvaraṃ āpajjati .
Sotena saddaṃ sutvā na nimittaggāhī hoti nānubyañjanaggāhī
yatvādhikaraṇamenaṃ sotindriyaṃ asaṃvutaṃ viharantaṃ abhijjhādomanassā
pāpakā akusalā dhammā anvāssaveyyuṃ tassa saṃvarāya paṭipajjati
rakkhati sotindriyaṃ sotindriye saṃvaraṃ āpajjati . ghānena gandhaṃ
ghāyitvā na nimittaggāhī hoti nānubyañjanaggāhī yatvādhikaraṇamenaṃ
ghānindriyaṃ asaṃvutaṃ viharantaṃ abhijjhādomanassā pāpakā akusalā
dhammā anvāssaveyyuṃ tassa saṃvarāya paṭipajjati rakkhati ghānindriyaṃ
ghānindriye saṃvaraṃ āpajjati . jivhāya rasaṃ sāyitvā na nimittaggāhī
hoti nānubyañjanaggāhī yatvādhikaraṇamenaṃ jivhindriyaṃ
asaṃvutaṃ viharantaṃ abhijjhādomanassā pāpakā akusalā dhammā
anvāssaveyyuṃ tassa saṃvarāya paṭipajjati rakkhati jivhindriyaṃ
Jivhindriye saṃvaraṃ āpajjati . kāyena phoṭṭhabbaṃ phusitvā na
nimittaggāhī hoti nānubyañjanaggāhī yatvādhikaraṇamenaṃ kāyindriyaṃ
asaṃvutaṃ viharantaṃ abhijjhādomanassā pāpakā akusalā dhammā
anvāssaveyyuṃ tassa saṃvarāya paṭipajjati rakkhati kāyindriyaṃ kāyindriye
saṃvaraṃ āpajjati . manasā dhammaṃ viññāya na nimittaggāhī hoti
nānubyañjanaggāhī yatvādhikaraṇamenaṃ manindriyaṃ asaṃvutaṃ viharantaṃ
abhijjhādomanassā pāpakā akusalā dhammā anvāssaveyyuṃ tassa
saṃvarāya paṭipajjati rakkhati manindriyaṃ manindriye saṃvaraṃ āpajjati .
So iminā ariyena indriyasaṃvarena samannāgato ajjhattaṃ abyāsekasukhaṃ
paṭisaṃvedeti evaṃ kho mahārāja bhikkhu indriyesu guttadvāro hoti.
[123] Kathañca mahārāja bhikkhu satisampajaññena samannāgato
hoti idha mahārāja bhikkhu abhikkante paṭikkante sampajānakārī
hoti ālokite vilokite sampajānakārī hoti sammiñjite pasārite
sampajānakārī hoti saṃghāṭipattacīvaradhāraṇe sampajānakārī hoti asite
pīte khāyite sāyite sampajānakārī hoti uccārapassāvakamme
sampajānakārī hoti gate ṭhite nisinne sutte jāgarite bhāsite
tuṇhībhāve sampajānakārī hoti . evaṃ kho mahārāja bhikkhu
satisampajaññena samannāgato hoti.
[124] Kathañca mahārāja bhikkhu santuṭṭho hoti idha mahārāja
bhikkhu santuṭṭho hoti kāyaparihārikena cīvarena kucchiparihārikena
Piṇḍapātena so yena yeneva pakkamati samādāyeva pakkamati .
Seyyathāpi mahārāja pakkhī sakuṇo yena yeneva ḍeti sapattabhāro va
ḍeti evameva kho mahārāja bhikkhu santuṭṭho hoti kāyaparihārikena
cīvarena kucchiparihārikena piṇḍapātena so yena yeneva pakkamati
samādāyeva pakkamati. Evaṃ kho mahārāja bhikkhu santuṭṭho hoti.
[125] So iminā ca ariyena sīlakkhandhena samannāgato iminā
ca ariyena indriyasaṃvarena samannāgato iminā ca ariyena
satisampajaññena samannāgato imāya ca ariyāya santuṭṭhiyā
samannāgato vivittaṃ senāsanaṃ bhajati araññaṃ rukkhamūlaṃ pabbataṃ
kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ . so
pacchābhattaṃ piṇḍapātapaṭikkanto nisīdati pallaṅkaṃ ābhujitvā
ujuṃ kāyaṃ paṇidhāya parimukhaṃ satiṃ upaṭṭhapetvā.
{125.1} So abhijjhaṃ loke pahāya vigatābhijjhena cetasā viharati
abhijjhāya cittaṃ parisodheti byāpādapadosaṃ pahāya abyāpannacitto
viharati sabbapāṇabhūtahitānukampī byāpādapadosā cittaṃ parisodheti
thīnamiddhaṃ pahāya vigatathīnamiddho viharati ālokasaññī sato sampajāno
thīnamiddhā cittaṃ parisodheti uddhaccakukkuccaṃ pahāya anuddhato viharati
ajjhattaṃ vūpasantacitto uddhaccakukkuccā cittaṃ parisodheti vicikicchaṃ
pahāya tiṇṇavicikiccho viharati akathaṅkathī kusalesu dhammesu vicikicchāya
cittaṃ parisodheti.
[126] Seyyathāpi mahārāja puriso iṇaṃ ādāya kammante payojeyya
tassa te kammantā 1- samijjheyyuṃ so yāni ca porāṇāni iṇamūlāni
tāni ca byantīkareyya siyā cassa 2- uttariṃ avasiṭṭhaṃ dārabharaṇāya
tassa evamassa ahaṃ kho pubbe iṇamādāya kammante payojesiṃ
tassa me te kammantā samijjhiṃsu sohaṃ yāni ca porāṇāni iṇamūlāni
tāni ca byantīakāsiṃ atthi ca me uttariṃ avasiṭṭhaṃ dārabharaṇāyāti.
So tatonidānaṃ labhetha pāmojjaṃ adhigaccheyya 3- somanassaṃ.
{126.1} Seyyathāpi mahārāja puriso ābādhiko assa dukkhito
bāḷhagilāno bhattañcassa nacchādeyya na cassa kāye balamattā .
So aparena samayena tamhā ābādhā mucceyya bhattañcassa chādeyya
siyā cassa kāye balamattā tassa evamassa ahaṃ kho pubbe ābādhiko
ahosiṃ dukkhito bāḷhagilāno bhattañca me na chādesi na ca me āsi
kāye balamattā somhi etarahi tamhā ābādhā mutto kattañca me
chādeti atthi ca me kāye balamattāti. So tatonidānaṃ labhetha pāmojjaṃ
adhigaccheyya somanassaṃ.
{126.2} Seyyathāpi mahārāja puriso bandhanāgāre bandho assa
so aparena samayena tamhā bandhanā mucceyya sotthinā abbhayena na
cassa kiñci bhogānaṃ vayo tassa evamassa ahaṃ kho pubbe bandhanāgāre
bandho ahosiṃ somhi etarahi tamhā bandhanā mutto sotthinā abbhayena
@Footnote: 1 kammantotipi pāṭho. 2 Sī. siyā tassa. 3 adhigacchepiti pāṭho.
Natthi ca me kiñci bhogānaṃ vayoti . so tatonidānaṃ labhetha pāmojjaṃ
adhigaccheyya somanassaṃ.
{126.3} Seyyathāpi mahārāja puriso dāso assa anattādhīno
parādhīno na yenakāmaṃgamo so aparena samayena tamhā dāsabyā mucceyya
attādhīno aparādhīno bhujisso yenakāmaṃgamo tassa evamassa ahaṃ kho
pubbe dāso ahosiṃ anattādhīno parādhīno na yenakāmaṃgamo somhi
etarahi tamhā dāsabyā mutto attādhīno aparādhīno bhujisso
yenakāmaṃgamoti so tatonidānaṃ labhetha pāmojjaṃ adhigaccheyya somanassaṃ.
{126.4} Seyyathāpi mahārāja puriso sadhano sabhogo kantāraṃ
addhānamaggaṃ paṭipajjeyya dubbhikkhaṃ sappaṭibhayaṃ so aparena samayena
taṃ kantāraṃ nitthareyya sotthinā gāmantaṃ anupāpuṇeyya khemaṃ appaṭibhayaṃ
tassa evamassa ahaṃ kho pubbe sadhano sabhogo kantāraṃ addhānamaggaṃ
paṭipajjiṃ dubbhikkhaṃ sappaṭibhayaṃ somhi etarahi taṃ kantāraṃ nitthiṇṇo
sotthinā gāmantaṃ anuppatto khemaṃ appaṭibhayanti so tatonidānaṃ
labhetha pāmojjaṃ adhigaccheyya somanassaṃ . evameva kho mahārāja bhikkhu
yathāiṇaṃ yathārogaṃ yathābandhanāgāraṃ yathādāsabyaṃ yathākantāraddhānamaggaṃ
evaṃ ime pañca nīvaraṇe appahīne attani samanupassati.
{126.5} Seyyathāpi mahārāja yathāānaṇyaṃ yathāārogyaṃ
yathābandhanāmokkhaṃ yathābhujissaṃ yathākhemantabhūmiṃ evameva kho
mahārāja bhikkhu ime pañca nīvaraṇe pahīne attani samanupassati.
[127] Tassime pañca nīvaraṇe pahīne attani samanupassato
pāmojjaṃ jāyati pamuditassa pīti jāyati pītimanassa kāyo passambhati
passaddhakāyo sukhaṃ paṭisaṃvedeti sukhino cittaṃ samādhiyati.
{127.1} So vivicceva kāmehi vivicca akusalehi dhammehi savitakkaṃ
savicāraṃ vivekajaṃ pītisukhaṃ paṭhamajjhānaṃ upasampajja viharati . so imameva
kāyaṃ vivekajena pītisukhena abhisandeti parisandeti paripūreti parippharati
nāssa kiñci sabbāvato kāyassa vivekajena pītisukhena apphuṭaṃ hoti.
Seyyathāpi mahārāja dakkho nhāpako vā nhāpakantevāsī vā
kaṃsathāle nhānīyacuṇṇāni ākiritvā udakena paripphosakaṃ sanneyya
sāyaṃ nhānīyapiṇḍisnehānugatā snehaparetā 1- santarabāhirā phuṭṭhā
snehena na ca paggharati 2- evameva kho mahārāja bhikkhu imameva
kāyaṃ vivekajena pītisukhena abhisandeti parisandeti paripūreti parippharati
nāssa kiñci sabbāvato kāyassa vivekajena pītisukhena apphuṭaṃ hoti.
Idaṃpi kho mahārāja sandiṭṭhikaṃ sāmaññaphalaṃ purimehi sandiṭṭhikehi
sāmaññaphalehi abhikkantatarañca paṇītatarañca.
[128] Puna caparaṃ mahārāja bhikkhu vitakkavicārānaṃ vūpasamā
ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ
pītisukhaṃ dutiyajjhānaṃ upasampajja viharati . so imameva kāyaṃ
samādhijena pītisukhena abhisandeti parisandeti paripūreti parippharati
@Footnote: 1 Sī. yāssa nahānīyapiṇḍisinehānusenaparetā. 2 Sī. paggharaṇī.
Nāssa kiñci sabbāvato kāyassa samādhijena pītisukhena apphuṭaṃ
hoti.
{128.1} Seyyathāpi mahārāja udakarahado gambhīro ubbhitodako
tassa nevassa puratthimāya disāya udakassa āyamukhaṃ na dakkhiṇāya
disāya udakassa āyamukhaṃ na pacchimāya disāya udakassa āyamukhaṃ
na uttarāya disāya udakassa āyamukhaṃ devo vā naṃ kālena kālaṃ
sammādhāraṃ anuppaveccheyya athakho tamhā vā udakarahadā sītā
vāridhārā ubbhijjitvā tameva udakarahadaṃ sītena vārinā abhisandeyya
parisandeyya paripūreyya paripphareyya nāssa kiñci sabbāvato
udakarahadassa sītena vārinā apphuṭaṃ assa evameva kho mahārāja
bhikkhu imameva kāyaṃ samādhijena pītisukhena abhisandeti parisandeti
paripūreti parippharati nāssa kiñci sabbāvato kāyassa samādhijena
pītisukhena apphuṭaṃ hoti . idaṃpi kho mahārāja sandiṭṭhikaṃ sāmaññaphalaṃ
purimehi sandiṭṭhikehi sāmaññaphalehi abhikkantatarañca paṇītatarañca.
[129] Puna caparaṃ mahārāja bhikkhu pītiyā ca virāgā upekkhako ca
viharati sato ca sampajāno sukhañca kāyena paṭisaṃvedeti yantaṃ ariyā
ācikkhanti upekkhako satimā sukhavihārīti tatiyajjhānaṃ upasampajja
viharati . so imameva kāyaṃ nippītikena sukhena abhisandeti parisandeti
paripūreti parippharati nāssa kiñci sabbāvato kāyassa nippītikena
sukhena apphuṭaṃ hoti.
{129.1} Seyyathāpi mahārāja uppaliniyaṃ vā paduminiyaṃ vā
puṇḍarīkiniyaṃ vā appekaccāni uppalāni vā padumāni vā puṇḍarīkāni
Vā udake jātāni udake saṃvaḍḍhāni udakānugatāni antonimuggaposīni
tāni yāva ca aggā yāva ca mūlā sītena vārinā abhisannāni
paripūrāni paripphaṭāni nāssa kiñci sabbāvataṃ uppalānaṃ vā
padumānaṃ vā puṇḍarīkānaṃ vā sītena vārinā apphuṭaṃ assa evameva
kho mahārāja bhikkhu imeva kāyaṃ nippītikena sukhena abhisandeti
parisandeti paripūreti parippharati nāssa kiñci sabbāvato kāyassa
nippītikena sukhena apphuṭaṃ hoti . idaṃpi kho mahārāja sandiṭṭhikaṃ
sāmaññaphalaṃ purimehi sandiṭṭhikehi sāmaññaphalehi abhikkantatarañca
paṇītatarañca.
[130] Puna caparaṃ mahārāja bhikkhu sukhassa ca pahānā dukkhassa
ca pahānā pubbeva somanassadomanassānaṃ atthaṅgamā adukkhamasukhaṃ
upekkhāsatipārisuddhiṃ catutthajjhānaṃ upasampajja viharati . so imameva
kāyaṃ parisuddhena cetasā pariyodātena pharitvā nisinno hoti nāssa
kiñci sabbāvato kāyassa parisuddhena cetasā pariyodātena apphuṭaṃ
hoti.
{130.1} Seyyathāpi mahārāja puriso odātena vatthena sasīsaṃ
pārupitvā nisinno assa nāssa kiñci sabbāvato kāyassa odātena
vatthena apphuṭaṃ assa evameva kho mahārāja bhikkhu imameva kāyaṃ
parisuddhena cetasā pariyodātena pharitvā nisinno hoti nāssa
kiñci sabbāvato kāyassa parisuddhena cetasā pariyodātena apphuṭaṃ
hoti . idaṃpi kho mahārāja sandiṭṭhikaṃ sāmaññaphalaṃ purimehi
Sandiṭṭhikehi sāmaññaphalehi abhikkantatarañca paṇītatarañca.
[131] So evaṃ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte ñāṇadassanāya
cittaṃ abhinīharati abhininnāmeti . so evaṃ pajānāti ayaṃ kho me kāyo
rūpī cātummahābhūtiko mātāpettikasambhavo odanakummāsupacayo
aniccucchādanaparimaddanabhedanaviddhaṃsanadhammo idañca pana me viññāṇaṃ
ettha nissitaṃ ettha paṭibaddhanti.
{131.1} Seyyathāpi mahārāja maṇiveḷuriyo subho jātimā aṭṭhaṃso
suparikammakato accho vippasanno sabbākārasampanno tatrassa suttaṃ
āvutaṃ nīlaṃ vā pītaṃ vā lohitaṃ vā odātaṃ vā paṇḍarasuttaṃ 1- vā tamenaṃ
cakkhumā puriso hatthe karitvā paccavekkheyya ayaṃ kho maṇiveḷuriyo subho
jātimā aṭṭhaṃso suparikammakato accho vippasanno sabbākārasampanno
tatridaṃ suttaṃ āvutaṃ nīlaṃ vā pītaṃ vā lohitaṃ vā odātaṃ vā paṇḍarasuttaṃ
vāti evameva kho mahārāja bhikkhu evaṃ samāhite citte parisuddhe pariyodāte
anaṅgaṇe vigatūpakkilese mudubhūte kammaniye ṭhite āneñjappatte
ñāṇadassanāya cittaṃ abhinīharati abhininnāmeti so evaṃ pajānāti
ayaṃ kho me kāyo rūpī cātummahābhūtiko mātāpettikasambhavo
odanakummāsupacayo aniccucchādanaparimaddanabhedanaviddhaṃsanadhammo
idañca pana me viññāṇaṃ ettha nissitaṃ ettha paṭibaddhanti. Idaṃpi kho
@Footnote: 1 Sī. paṇḍusuttaṃ.
Mahārāja sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi
abhikkantatarañca paṇītatarañca.
[132] So evaṃ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte manomayaṃ
abhinimminanāya cittaṃ abhinīharati abhininnāmeti . so imamhā kāyā
aññaṃ kāyaṃ abhinimmināti rūpiṃ manomayaṃ sabbaṅgapaccaṅgaṃ ahīnindriyaṃ
{132.1} seyyathāpi mahārāja puriso muñjamhā isikaṃ pabbāheyya
tassa evamassa ayaṃ muñjo ayaṃ isikā añño muñjo aññā isikā
muñjamhā tveva isikā pabāḷhāti 1- seyyathā vā pana mahārāja
puriso asiṃ kosiyā pabāheyya tassa evamassa ayaṃ asi ayaṃ kosi añño
asi aññā kosi kosiyā tveva asi pabbāḷhāti seyyathā vā pana
mahārāja puriso ahiṃ karaṇḍā uddhareyya tassa evamassa ayaṃ ahi ayaṃ
karaṇḍo añño ahi añño karaṇḍo karaṇḍā tveva ahi uddharitoti
evameva kho mahārāja bhikkhu evaṃ samāhite citte parisuddhe pariyodāte
anaṅgaṇe vigatūpakkilese mudubhūte kammaniye ṭhite āneñjappatte
manomayaṃ abhinimminanāya cittaṃ abhinīharati abhininnāmeti . so imamhā
kāyā aññaṃ kāyaṃ abhinimmināti rūpiṃ manomayaṃ sabbaṅgapaccaṅgaṃ ahīnindriyaṃ.
Idaṃpi kho mahārāja sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi
@Footnote: 1 Sī. pavālhāti.
Abhikkantatarañca paṇītatarañca.
[133] So evaṃ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte iddhividhāya
cittaṃ abhinīharati abhininnāmeti so anekavihitaṃ iddhividhaṃ paccanubhoti
ekopi hutvā bahudhā hoti bahudhāpi hutvā eko hoti āvibhāvaṃ
tirobhāvaṃ tirokuḍḍaṃ tiropākāraṃ tiropabbataṃ asajjamāno gacchati
seyyathāpi ākāse paṭhaviyāpi ummujjanimmujjaṃ karoti seyyathāpi
udake udakepi abhijjamāne gacchati seyyathāpi paṭhaviyaṃ ākāsepi
pallaṅkena kamati seyyathāpi pakkhīsakuṇo imepi candimasuriye
evaṃmahiddhike evaṃmahānubhāve pāṇinā parimasati parimajjati yāva
brahmalokāpi kāyena vasaṃ vatteti
{133.1} seyyathāpi mahārāja dakkho kumbhakāro vā kumbhakārantevāsī
vā suparikammakatāya mattikāya yaṃ yadeva bhājanavikatiṃ ākaṅkheyya tantadeva
kareyya abhinipphādeyya seyyathā vā pana mahārāja dakkho dantakāro vā
dantakārantevāsī vā suparikammakatasmiṃ dantasmiṃ yaṃ yadeva dantavikatiṃ
ākaṅkheyya tantadeva kareyya abhinipphādeyya seyyathā vā pana mahārāja
dakkho suvaṇṇakāro vā suvaṇṇakārantevāsī vā suparikammakatasmiṃ
suvaṇṇasmiṃ yaṃ yadeva suvaṇṇavikatiṃ ākaṅkheyya tantadeva kareyya abhinipphādeyya
evameva kho mahārāja bhikkhu evaṃ samāhite citte parisuddhe pariyodāte
anaṅgaṇe vigatūpakkilese mudubhūte kammaniye ṭhite āneñjappatte
Iddhividhāya cittaṃ abhinīharati abhininnāmeti . so anekavihitaṃ iddhividhaṃ
paccanubhoti ekopi hutvā bahudhā hoti bahudhāpi hutvā eko hoti
āvibhāvaṃ tirobhāvaṃ tirokuḍḍaṃ tiropākāraṃ tiropabbataṃ asajjamāno
gacchati seyyathāpi ākāse paṭhaviyāpi ummujjanimmujjaṃ karoti
seyyathāpi udake udakepi abhijjamāne gacchati seyyathāpi paṭhaviyaṃ
ākāsepi pallaṅkena kamati seyyathāpi pakkhīsakuṇo imepi candimasuriye
evaṃmahiddhike evaṃmahānubhāve pāṇinā parimasati parimajjati yāva
brahmalokāpi kāyena vasaṃ vatteti . idaṃpi kho mahārāja sandiṭṭhikaṃ
sāmaññaphalaṃ purimehi sandiṭṭhikehi sāmaññaphalehi abhikkantatarañca
paṇītatarañca.
[134] So evaṃ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte dibbāya
sotadhātuyā cittaṃ abhinīharati abhininnāmeti . so dibbāya sotadhātuyā
visuddhāya atikkantamānusikāya ubho sadde suṇāti dibbe ca mānuse ca
ye dūre santike ca
{134.1} seyyathāpi mahārāja puriso addhānamaggapaṭipanno
so suṇeyya bherisaddaṃpi mudiṅgasaddaṃpi saṃkhasaddaṃpi paṇavasaddaṃpi
deṇḍimasaddaṃpi tassa evamassa bherisaddo itipi mudiṅgasaddo itipi
saṃkhasaddo itipi paṇavasaddo itipi deṇḍimasaddo itipi evameva kho
mahārāja bhikkhu evaṃ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte dibbāya
Sotadhātuyā cittaṃ abhinīharati abhininnāmeti so dibbāya sotadhātuyā
visuddhāya atikkantamānusikāya ubho sadde suṇāti dibbe ca mānuse
ca ye dūre santike ca . idaṃpi kho mahārāja sandiṭṭhikaṃ sāmaññaphalaṃ
purimehi sandiṭṭhikehi sāmaññaphalehi abhikkantatarañca paṇītatarañca.
[135] So evaṃ samāhite citte parisuddhe pariyodāte
anaṅgaṇe vigatūpakkilese mudubhūte kammaniye ṭhite āneñjappatte
cetopariyañāṇāya cittaṃ abhinīharati abhininnāmeti . so parasattānaṃ
parapuggalānaṃ cetasā ceto paricca pajānāti sarāgaṃ vā cittaṃ
sarāgaṃ cittanti pajānāti vītarāgaṃ vā cittaṃ vītarāgaṃ cittanti
pajānāti sadosaṃ vā cittaṃ sadosaṃ cittanti pajānāti vītadosaṃ
vā cittaṃ vītadosaṃ cittanti pajānāti samohaṃ vā cittaṃ samohaṃ
cittanti pajānāti vītamohaṃ vā cittaṃ vītamohaṃ cittanti pajānāti
saṃkhittaṃ vā cittaṃ saṃkhittaṃ cittanti pajānāti vikkhittaṃ vā cittaṃ
vikkhittaṃ cittanti pajānāti mahaggataṃ vā cittaṃ mahaggataṃ cittanti
pajānāti amahaggataṃ vā cittaṃ amahaggataṃ cittanti pajānāti sauttaraṃ
vā cittaṃ sauttaraṃ cittanti pajānāti anuttaraṃ vā cittaṃ anuttaraṃ
cittanti pajānāti samāhitaṃ vā cittaṃ samāhitaṃ cittanti pajānāti
asamāhitaṃ vā cittaṃ asamāhitaṃ cittanti pajānāti vimuttaṃ vā cittaṃ
vimuttaṃ cittanti pajānāti avimuttaṃ vā cittaṃ avimuttaṃ cittanti
pajānāti.
{135.1} Seyyathāpi mahārāja itthī vā puriso vā daharo
Vā yuvā maṇḍanakajātiko ādāse vā parisuddhe pariyodāte acche
vā udakapatte sakaṃ mukhanimittaṃ paccavekkhamāno sakaṇikaṃ vā sakaṇikanti
jāneyya akaṇikaṃ vā akaṇikanti jāneyya evameva kho mahārāja bhikkhu
evaṃ samāhite citte parisuddhe pariyodāte anaṅgaṇe vigatūpakkilese
mudubhūte kammaniye ṭhite āneñjappatte cetopariyañāṇāya cittaṃ
abhinīharati abhininnāmeti so parasattānaṃ parapuggalānaṃ cetasā ceto
paricca pajānāti sarāgaṃ vā cittaṃ sarāgaṃ cittanti pajānāti vītarāgaṃ
vā cittaṃ vītarāgaṃ cittanti pajānāti sadosaṃ vā cittaṃ sadosaṃ
cittanti pajānāti vītadosaṃ vā cittaṃ vītadosaṃ cittanti pajānāti
samohaṃ vā cittaṃ samohaṃ cittanti pajānāti vītamohaṃ vā cittaṃ
vītamohaṃ cittanti pajānāti saṃkhittaṃ vā cittaṃ saṃkhittaṃ cittanti
pajānāti vikkhittaṃ vā cittaṃ vikkhittaṃ cittanti pajānāti mahaggataṃ
vā cittaṃ mahaggataṃ cittanti pajānāti amahaggataṃ vā cittaṃ amahaggataṃ
cittanti pajānāti sauttaraṃ vā cittaṃ sauttaraṃ cittanti pajānāti
anuttaraṃ vā cittaṃ anuttaraṃ cittanti pajānāti samāhitaṃ vā cittaṃ
samāhitaṃ cittanti pajānāti asamāhitaṃ vā cittaṃ asamāhitaṃ cittanti
pajānāti vimuttaṃ vā cittaṃ vimuttaṃ cittanti pajānāti avimuttaṃ vā
cittaṃ avimuttaṃ cittanti pajānāti . idaṃpi kho mahārāja sandiṭṭhikaṃ
sāmaññaphalaṃ purimehi sandiṭṭhikehi sāmaññaphalehi abhikkantatarañca
paṇītatarañca.
[136] So evaṃ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte
pubbenivāsānussatiñāṇāya cittaṃ abhinīharati abhininnāmeti . so
anekavihitaṃ pubbenivāsaṃ anussarati seyyathīdaṃ ekaṃpi jātiṃ dvepi
jātiyo tissopi jātiyo catassopi jātiyo pañcapi jātiyo dasapi
jātiyo vīsampi jātiyo tiṃsampi jātiyo cattāḷīsaṃpi jātiyo paññāsaṃpi
jātiyo sataṃpi jātiyo sahassaṃpi jātiyo satasahassampi jātiyo 1-
anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe
amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkha-
paṭisaṃvedī evamāyupariyanto so tato cuto amutra udapādiṃ tatrāpāsiṃ
evaṃnāmo evaṃgotto evaṃvaṇṇo evamāhāro evaṃsukhadukkhapaṭisaṃvedī
evamāyupariyanto so tato cuto idhūpapannoti . iti sākāraṃ
sauddesaṃ anekavihitaṃ pubbenivāsaṃ anussarati.
{136.1} Seyyathāpi mahārāja puriso sakamhā gāmā aññaṃ gāmaṃ
gaccheyya tamhāpi gāmā aññaṃpi gāmaṃ gaccheyya so tamhā gāmā
sakaṃyeva gāmaṃ paccāgaccheyya tassa evamassa ahaṃ kho sakamhā gāmā amuṃ
gāmaṃ agañchiṃ tatrāhaṃ evaṃ aṭṭhāsiṃ evaṃ nisīdiṃ evaṃ abhāsiṃ evaṃ tuṇhī ahosiṃ
tamhāpi gāmā amuṃ gāmaṃ agañchiṃ tatrāpāhaṃ evaṃ aṭṭhāsiṃ 2- evaṃ nisīdiṃ
@Footnote: 1 Sī. jātisatampi jātisahassampi jātisatasahassampi. 2 Sī. āgacchiṃ
@tatrāpāsiṃ evaṃ aṭṭhāsiṃ.
Evaṃ abhāsiṃ evaṃ tuṇhī ahosiṃ somhi tamhā gāmā sakaṃyeva gāmaṃ
paccāgatoti evameva kho mahārāja bhikkhu evaṃ samāhite citte
parisuddhe pariyodāte anaṅgaṇe vigatūpakkilese mudubhūte kammaniye
ṭhite āneñjappatte pubbenivāsānussatiñāṇāya cittaṃ abhinīharati
abhininnāmeti so anekavihitaṃ pubbenivāsaṃ anussarati seyyathīdaṃ ekaṃpi
jātiṃ dvepi jātiyo tissopi jātiyo catassopi jātiyo pañcapi
jātiyo dasapi jātiyo vīsaṃpi jātiyo tiṃsaṃpi jātiyo cattāḷīsaṃpi
jātiyo paññāsaṃpi jātiyo sataṃpi jātiyo sahassaṃpi jātiyo satasahassaṃpi
jātiyo anekepi saṃvaṭṭakappe anekepi vivaṭṭakappe anekepi
saṃvaṭṭavivaṭṭakappe amutrāsiṃ evaṃnāmo evaṃgotto evaṃvaṇṇo
evamāhāro evaṃsukhadukkhapaṭisaṃvedī evamāyupariyanto so tato cuto
amutra udapādiṃ tatrāpāsiṃ evaṃnāmo evaṃgotto evaṃvaṇṇo
evamāhāro evaṃsukhadukkhapaṭisaṃvedī evamāyupariyanto so tato cuto
idhūpapannoti iti sākāraṃ sauddesaṃ anekavihitaṃ pubbenivāsaṃ anussarati.
Idaṃpi kho mahārāja sandiṭṭhikaṃ sāmaññaphalaṃ purimehi sandiṭṭhikehi
sāmaññaphalehi abhikkantatarañca paṇītatarañca.
[137] So evaṃ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte sattānaṃ
cutūpapātañāṇāya cittaṃ abhinīharati abhininnāmeti . so dibbena
cakkhunā visuddhena atikkantamānusakena satte passati cavamāne
Upapajjamāne hīne paṇīte suvaṇṇe dubbaṇṇe sugate duggate
yathākammūpage satte pajānāti ime vata bhonto sattā kāyaduccaritena
samannāgatā vacīduccaritena samannāgatā manoduccaritena samannāgatā
ariyānaṃ upavādakā micchādiṭṭhikā micchādiṭṭhikammasamādānā te
kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā
ime vā pana bhonto sattā kāyasucaritena samannāgatā vacīsucaritena
samannāgatā manosucaritena samannāgatā ariyānaṃ anupavādakā
sammādiṭṭhikā sammādiṭṭhikammasamādānā te kāyassa bhedā
parammaraṇā sugatiṃ saggaṃ lokaṃ upapannāti iti dibbena cakkhunā visuddhena
atikkantamānusakena satte passati cavamāne upapajjamāne hīne
paṇīte suvaṇṇe dubbaṇṇe sugate duggate yathākammūpage satte
pajānāti.
{137.1} Seyyathāpi mahārāja majjhe siṅghāṭake pāsādo
tatra cakkhumā puriso ṭhito passeyya manusse gehaṃ pavisantepi
nikkhamantepi rathiyāya vithiṃ sañcarantepi majjhe siṅghāṭake nisinnepi
tassa evamassa ete manussā gehaṃ pavisanti ete nikkhamanti
ete rathiyāya vithiṃ sañcaranti ete majjhe siṅghāṭake nisinnāti
evameva kho mahārāja bhikkhu evaṃ samāhite citte parisuddhe pariyodāte
anaṅgaṇe vigatūpakkilese mudubhūte kammaniye ṭhite āneñjappatte
sattānaṃ cutūpapātañāṇāya cittaṃ abhinīharati abhininnāmeti
so dibbena cakkhunā visuddhena atikkantamānusakena satte
Passati cavamāne upapajjamāne hīne paṇīte suvaṇṇe dubbaṇṇe
sugate duggate yathākammūpage satte pajānāti ime vata bhonto
sattā kāyaduccaritena samannāgatā vacīduccaritena samannāgatā
manoduccaritena samannāgatā ariyānaṃ upavādakā micchādiṭṭhikā
micchādiṭṭhikammasamādānā te kāyassa bhedā paraṃ maraṇā apāyaṃ
duggatiṃ vinipātaṃ nirayaṃ upapannā ime vā pana bhonto sattā
kāyasucaritena samannāgatā vacīsucaritena samannāgatā manosucaritena
samannāgatā ariyānaṃ anupavādakā sammādiṭṭhikā sammādiṭṭhikammasamādānā
te kāyassa bhedā paraṃ maraṇā sugatiṃ saggaṃ lokaṃ upapannāti iti
dibbena cakkhunā visuddhena atikkantamānusakena satte passati
cavamāne upapajjamāne hīne paṇīte suvaṇṇe dubbaṇṇe sugate
duggate yathākammūpage satte pajānāti . idaṃpi kho mahārāja sandiṭṭhikaṃ
sāmaññaphalaṃ purimehi sandiṭṭhikehi sāmaññaphalehi abhikkantatarañca
paṇītatarañca.
[138] So evaṃ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte āsavānaṃ
khayañāṇāya cittaṃ abhinīharati abhininnāmeti . so idaṃ dukkhanti
yathābhūtaṃ pajānāti ayaṃ dukkhasamudayoti yathābhūtaṃ pajānāti ayaṃ
dukkhanirodhoti yathābhūtaṃ pajānāti ayaṃ dukkhanirodhagāminī paṭipadāti
yathābhūtaṃ pajānāti ime āsavāti yathābhūtaṃ pajānāti ayaṃ āsavasamudayoti
Yathābhūtaṃ pajānāti ayaṃ āsavanirodhoti yathābhūtaṃ pajānāti
ayaṃ āsavanirodhagāminī paṭipadāti yathābhūtaṃ pajānāti . tassa evaṃ
jānato evaṃ passato kāmāsavāpi cittaṃ vimuccati bhavāsavāpi
cittaṃ vimuccati avijjāsavāpi cittaṃ vimuccati . vimuttasmiṃ vimuttamiti
ñāṇaṃ hoti . khīṇā jāti vusitaṃ brahmacariyaṃ kataṃ karaṇīyaṃ nāparaṃ
itthattāyāti pajānāti.
{138.1} Seyyathāpi mahārāja pabbatasaṃkhepe udakarahado
accho vippasanno anāvilo tattha cakkhumā puriso tīre ṭhito passeyya
sippikasambukaṃpi sakkharakaṭhalaṃpi macchagumbaṃpi carantaṃpi tiṭṭhantaṃpi
tassa evamassa ayaṃ kho udakarahado accho vippasanno anāvilo
tatthime sippikasambukāpi sakkharakaṭhalaṃpi 1- macchagumbāpi carantipi
tiṭṭhantipīti evameva kho mahārāja bhikkhu evaṃ samāhite citte
parisuddhe pariyodāte anaṅgaṇe vigatūpakkilese mudubhūte kammaniye
ṭhite āneñjappatte āsavānaṃ khayañāṇāya cittaṃ abhinīharati
abhininnāti so idaṃ dukkhanti yathābhūtaṃ pajānāti ayaṃ dukkhasamudayoti
yathābhūtaṃ pajānāti ayaṃ dukkhanirodhoti yathābhūtaṃ pajānāti ayaṃ
dukkhanirodhagāminī paṭipadāti yathābhūtaṃ pajānāti ime āsavāti
yathābhūtaṃ pajānāti ayaṃ āsavasamudayoti yathābhūtaṃ pajānāti ayaṃ
āsavanirodhoti yathābhūtaṃ pajānāti ayaṃ āsavanirodhagāminī paṭipadāti
yathābhūtaṃ pajānāti . tassa evaṃ jānato evaṃ passato kāmāsavāpi
@Footnote: 1 Sī. sakkharakaṭhalāpi.
Cittaṃ vimuccati bhavāsavāpi cittaṃ vimuccati avijjāsavāpi cittaṃ
vimuccati . vimuttasmiṃ vimuttamiti ñāṇaṃ hoti . khīṇā jāti vusitaṃ
brahmacariyaṃ kataṃ karaṇīyaṃ nāparaṃ itthattāyāti pajānāti . idaṃpi
kho mahārāja sandiṭṭhikaṃ sāmaññaphalaṃ purimehi sandiṭṭhikehi
sāmaññaphalehi abhikkantatarañca paṇītatarañca . imasmā ca pana 1-
mahārāja sandiṭṭhikā sāmaññaphalā aññaṃ sandiṭṭhikaṃ sāmaññaphalaṃ
uttaritaraṃ vā paṇītataraṃ vā natthīti.
[139] Evaṃ vutte rājā māgadho ajātasattu vedehiputto
bhagavantaṃ etadavoca abhikkantaṃ bhante abhikkantaṃ bhante seyyathāpi
bhante nikkujjitaṃ vā ukkujjeyya paṭicchannaṃ vā vivareyya mūḷhassa
vā maggaṃ ācikkheyya andhakāre vā telapajjotaṃ dhāreyya cakkhumanto
rūpāni dakkhantīti evameva bhagavatā anekapariyāyena dhammo pakāsito
esāhaṃ bhante bhagavantaṃ saraṇaṃ gacchāmi dhammañca bhikkhusaṃghañca
upāsakaṃ maṃ bhagavā dhāretu ajjatagge pāṇupetaṃ saraṇaṅgataṃ accayo
maṃ bhante accagamā yathābālaṃ yathāmūḷhaṃ yathāakusalaṃ yohaṃ bhante 2-
pitaraṃ dhammikaṃ dhammarājānaṃ issariyassa kāraṇā jīvitā voropesiṃ
tassa me bhante bhagavā accayaṃ accayato paṭiggaṇhātu āyatiṃ
saṃvarāyāti . taggha tvaṃ mahārāja accayo accagamā yathābālaṃ
@Footnote: 1 sīhalapotthake idaṃ nipātadvayaṃ taṃ dissati. 2 Sī. bhanteti
@pāṭho na dissati.
Yathāmūḷhaṃ yathāakusalaṃ yo 1- tvaṃ pitaraṃ dhammikaṃ dhammarājānaṃ issariyassa
kāraṇā jīvitā voropesi yato ca kho tvaṃ mahārāja accayaṃ
accayato disvā yathādhammaṃ paṭikarosi tante mayaṃ paṭiggaṇhāma
vuḍḍhi hesā mahārāja ariyassa vinaye yo accayaṃ accayato disvā
yathādhammaṃ paṭikaroti āyatiṃ saṃvaraṃ āpajjatīti.
[140] Evaṃ vutte rājā māgadho ajātasattu vedehiputto
bhagavantaṃ etadavoca handa cadāni mayaṃ bhante gacchāma bahukiccā
mayaṃ bahukaraṇīyāti . yassadāni tvaṃ mahārāja kālaṃ maññasīti .
Athakho rājā māgadho ajātasattu vedehiputto bhagavato bhāsitaṃ
abhinanditvā anumoditvā uṭṭhāyāsanā bhagavantaṃ abhivādetvā
padakkhiṇaṃ katvā pakkāmi . athakho bhagavā acirapakkantassa rañño
māgadhassa ajātasattussa vedehiputtassa bhikkhū āmantesi khatāyaṃ
bhikkhave rājā upahatāyaṃ bhikkhave rājā sacāyaṃ bhikkhave rājā
pitaraṃ dhammikaṃ dhammarājānaṃ jīvitā na voropessatha imasmiṃyevassa
āsane vīrajaṃ vītamalaṃ dhammacakkhuṃ uppajjissathāti . idamavoca
bhagavā. Attamanā te bhikkhū bhagavato bhāsitaṃ abhinandunti.
Sāmaññaphalasuttaṃ niṭṭhitaṃ dutiyaṃ.
------------
@Footnote: 1 Sī. yaṃ.
Sīlakkhandhavagge ambaṭṭhasuttaṃ tatiyaṃ
[141] Evamme sutaṃ. Ekaṃ samayaṃ bhagavā kosalesu cārikañcaramāno
mahatā bhikkhusaṃghena saddhiṃ pañcamattehi bhikkhusatehi yena
icchānaṅgalannāma 1- kosalānaṃ brāhmaṇagāmo tadavasari . tatra
sudaṃ bhagavā icchānaṅgale viharati icchānaṅgalavanasaṇḍe.
[142] Tena kho pana samayena brāhmaṇo pokkharasāti ukkaṭṭhaṃ
ajjhāvasati sattussadaṃ satiṇakaṭṭhodakaṃ sadhaññaṃ rājabhoggaṃ raññā
pasenadikosalena dinnaṃ rājadāyaṃ brahmadeyyaṃ . assosi kho
brāhmaṇo pokkharasāti samaṇo khalu bho gotamo sakyaputto
sakyakulā pabbajito kosalesu cārikañcaramāno mahatā bhikkhusaṃghena
saddhiṃ pañcamattehi bhikkhusatehi icchānaṅgalaṃ anuppatto icchānaṅgale
viharati icchānaṅgalavanasaṇḍe taṃ kho pana bhavantaṃ gotamaṃ evaṃkalyāṇo
kittisaddo abbhuggato itipi so bhagavā arahaṃ sammāsambuddho
vijjācaraṇasampanno sugato lokavidū anuttaro purisadammasārathi
satthā devamanussānaṃ buddho bhagavāti so imaṃ lokaṃ sadevakaṃ
samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā
sacchikatvā pavedeti so dhammaṃ deseti ādikalyāṇaṃ majjhekalyāṇaṃ
pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ
@Footnote: 1 Sī. icchānaṅkalaṃ nāma.
Pakāseti sādhu kho pana tathārūpānaṃ arahataṃ dassanaṃ hotīti.
[143] Tena kho pana samayena brāhmaṇassa pokkharasātissa
ambaṭṭho nāma māṇavo antevāsī hoti ajjhāyako mantadharo
tiṇṇaṃ vedānaṃ pāragū sanighaṇḍuketubhānaṃ sākkharappabhedānaṃ
itihāsapañcamānaṃ padako veyyākaraṇo lokāyatamahāpurisalakkhaṇesu
anavayo anuññātapaṭiññāto sake ācariyake tevijjake pāvacane
yamahaṃ jānāmi taṃ tvaṃ jānāsi yaṃ tvaṃ jānāsi tamahaṃ jānāmīti.
{143.1} Athakho brāhmaṇo pokkharasāti ambaṭṭhaṃ māṇavaṃ
āmantesi ayaṃ tāta ambaṭṭha samaṇo gotamo sakyaputto sakyakulā
pabbajito kosalesu cārikañcaramāno mahatā bhikkhusaṃghena saddhiṃ
pañcamattehi bhikkhusatehi icchānaṅgalaṃ anuppatto icchānaṅgale
viharati icchānaṅgalavanasaṇḍe taṃ kho pana bhavantaṃ gotamaṃ evaṃkalyāṇo
kittisaddo abbhuggato itipi so bhagavā arahaṃ sammāsambuddho
vijjācaraṇasampanno sugato lokavidū anuttaro purisadammasārathi
satthā devamanussānaṃ buddho bhagavāti so imaṃ lokaṃ sadevakaṃ samārakaṃ
sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā
sacchikatvā pavedeti so dhammaṃ deseti ādikalyāṇaṃ majjhekalyāṇaṃ
pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ
pakāseti sādhu kho pana tathārūpānaṃ arahataṃ dassanaṃ hotīti ehi tvaṃ
tāta ambaṭṭha māṇava yena samaṇo gotamo tenupasaṅkama
Upasaṅkamitvā samaṇaṃ gotamaṃ jānāhi yadi vā taṃ bhavantaṃ gotamaṃ
tathāsantaṃyeva saddo abbhuggato yadi vā no tathā yadi vā
so bhavaṃ gotamo tādiso yadi vā na tādiso tathā mayantaṃ
bhavantaṃ gotamaṃ vedissāmāti.
{143.2} Yathākathaṃ panāhaṃ bho taṃ bhavantaṃ gotamaṃ jānissāmi
yadi vā taṃ bhavantaṃ gotamaṃ tathāsantaṃyeva saddo abbhuggato yadi
vā no tathā yadi vā so bhavaṃ gotamo tādiso yadi vā na tādisoti.
Āgatāni kho tāta ambaṭṭha amhākaṃ mantesu dvattiṃsamahāpurisalakkhaṇāni
yehi samannāgatassa mahāpurisassa dve va gatiyo bhavanti anaññā
sace agāraṃ ajjhāvasati rājā hoti cakkavatti dhammiko dhammarājā
cāturanto vijitāvī janapadaṭṭhāvariyappatto sattaratanasamannāgato
tassimāni satta ratanāni bhavanti seyyathīdaṃ cakkaratanaṃ hatthiratanaṃ
assaratanaṃ maṇiratanaṃ itthīratanaṃ gahapatiratanaṃ pariṇāyakaratanameva sattamaṃ
parosahassaṃ kho panassa puttā bhavanti sūrā vīraṅgarūpā parasenappamaddanā
so imaṃ paṭhaviṃ sāgarapariyantaṃ adaṇḍena asatthena dhammena abhivijiya
ajjhāvasati sace pana agārasmā anagāriyaṃ pabbajati arahaṃ hoti
sammāsambuddho loke vivaṭacchado ahaṃ kho pana tāta ambaṭṭha mantānaṃ
dātā tvaṃ mantānaṃ paṭiggahitāti.
{143.3} Evaṃ bhoti kho ambaṭṭho māṇavo brāhmaṇassa
pokkharasātissa paṭissutvā uṭṭhāyāsanā brāhmaṇaṃ
pokkharasātiṃ abhivādetvā padakkhiṇaṃ katvā vaḷavārathamāruyha
Sambahulehi māṇavehi saddhiṃ yena icchānaṅgalavanasaṇḍo tena
pāyāsi yāvatikā yānassa bhūmi yānena gantvā yānā paccorohitvā
pattiko va ārāmaṃ pāvisi.
[144] Tena kho pana samayena sambahulā bhikkhū abbhokāse
caṅkamanti . athakho ambaṭṭho māṇavo yena te bhikkhū tenupasaṅkami
upasaṅkamitvā te bhikkhū etadavoca kahaṃ nu kho bho etarahi so bhavaṃ
gotamo viharati taṃ hi mayaṃ bhavantaṃ gotamaṃ dassanāya idhūpasaṅkantāti.
Athakho tesaṃ bhikkhūnaṃ etadahosi ayaṃ kho ambaṭṭho māṇavo
abhiññātakolañño ceva abhiññātassa ca brāhmaṇassa pokkharasātissa
antevāsī agaru kho pana bhagavato evarūpehi kulaputtehi
saddhiṃ kathāsallāpo hotīti . te ambaṭṭhaṃ māṇavaṃ etadavocuṃ
eso ambaṭṭha vihāro saṃvutadvāro tena appasaddo upasaṅkamitvā
ataramāno āḷindaṃ pavisitvā ukkāsitvā aggaḷaṃ ākoṭehi
vivarissati te bhagavā dvāranti . athakho ambaṭṭho māṇavo yena
so vihāro saṃvutadvāro tena appasaddo upasaṅkamitvā ataramāno
āḷindaṃ pavisitvā ukkāsitvā aggaḷaṃ ākoṭesi . vivari bhagavā
dvāraṃ . pāvisi ambaṭṭho māṇavo . māṇavakāpi kho pavisitvā
bhagavatā saddhiṃ sammodiṃsu sammodanīyaṃ kathaṃ sārāṇīyaṃ vītisāretvā
ekamantaṃ nisīdiṃsu.
[145] Ambaṭṭho pana māṇavo caṅkamantopi nisinnena bhagavatā
Kañci kañci kathaṃ sārāṇīyaṃ vītisāreti ṭhitopi nisinnena bhagavatā
kañci kañci kathaṃ sārāṇīyaṃ vītisāreti . athakho bhagavā ambaṭṭhaṃ
māṇavaṃ etadavoca evaṃ nu te ambaṭṭha brāhmaṇehi vuḍḍhehi
mahallakehi ācariyapācariyehi saddhiṃ kathāsallāpo hoti yathayidaṃ caraṃ
tiṭṭhaṃ nisinnena mayā kañci kañci kathaṃ sārāṇīyaṃ vītisāresīti.
{145.1} No hidaṃ bho gotama gacchanto vā hi bho gotama gacchantena
brāhmaṇo brāhmaṇena saddhiṃ sallapitumarahati ṭhito vā hi bho
gotama ṭhitena brāhmaṇo brāhmaṇena saddhiṃ sallapitumarahati nisinno
vā hi bho gotama nisinnena brāhmaṇo brāhmaṇena saddhiṃ
sallapitumarahati sayāno vā hi bho gotama sayānena brāhmaṇo
brāhmaṇena saddhiṃ sallapitumarahati ye ca kho bho gotama muṇḍakā
samaṇakā ibbhā kaṇhā bandhupādapaccā tehipi me saddhiṃ evaṃ
kathāsallāpo hoti yathariva bhotā gotamenāti . atthikavato kho pana
te ambaṭṭha idhāgamanaṃ ahosi yāyeva kho panatthāya āgaccheyyātha
tameva atthaṃ sādhukaṃ manasikareyyātha avusitavāyeva kho pana ambaṭṭho
māṇavo vusitamānī kimaññatra avusitattāti.
{145.2} Athakho ambaṭṭho māṇavo bhagavatā avusitavādena vuccamāno
kupito anattamano bhagavantaṃyeva khuṃsento bhagavantaṃyeva vambhento
bhagavantaṃyeva vadamāno samaṇo ca me bho gotamo pāpito bhavissatīti bhagavantaṃ
etadavoca caṇḍā bho gotama sakyajāti pharusā bho gotama sakyajāti lahusā
Bho gotama sakyajāti rabhasā bho gotama sakyajāti ibbhā santā
ibbhā samānā na brāhmaṇe sakkaronti na brāhmaṇe garukaronti
na brāhmaṇe mānenti na brāhmaṇe pūjenti na brāhmaṇe
apacāyanti tayidaṃ bho gotama na channaṃ 1- tayidaṃ nappaṭirūpaṃ yadime
sakyā ibbhā santā ibbhā samānā na brāhmaṇe sakkaronti
na brāhmaṇe garukaronti na brāhmaṇe mānenti na brāhmaṇe
pūjenti na brāhmaṇe apacāyantīti . itiha ambaṭṭho māṇavo
imaṃ paṭhamaṃ sakyesu ibbhāvādaṃ nipātesi.
[146] Kiṃ pana te ambaṭṭha sakyā aparaddhunti . ekamidāhaṃ
bho gotama samayaṃ ācariyassa brāhmaṇassa pokkharasātissa kenacideva
karaṇīyena kapilavatthuṃ agamāsiṃ yena sakyānaṃ saṇṭhāgāraṃ tenupasaṅkamiṃ
tena kho pana samayena sambahulā sakyā ceva sakyakumārā ca saṇṭhāgāre
uccesu āsanesu nisinnā honti aññamaññaṃ aṅgulipatodakehi 2-
sañjagghantā saṅkīḷantā aññadatthuṃ mamaññeva maññe anujagghantā
na maṃ koci āsanenapi nimantesi tayidaṃ bho gotama na channaṃ tayidaṃ
nappaṭirūpaṃ yadime sakyā ibbhā santā ibbhā samānā na brāhmaṇe
sakkaronti na brāhmaṇe garukaronti na brāhmaṇe mānenti na
brāhmaṇe pūjenti na brāhmaṇe apacāyantīti . itiha ambaṭṭho
māṇavo idaṃ dutiyaṃ sakyesu ibbhāvādaṃ nipātesi.
@Footnote: 1 Sī. na ca channaṃ. 2 aṅgulipatodakenātipi pāṭho.
[147] Laṭukikāpi kho ambaṭṭha sakuṇikā sake kulāvake kāmalāpinī
hoti sakaṃ kho panetaṃ ambaṭṭha sakyānaṃ yadidaṃ kapilavatthuṃ na arahatāyasmā
ambaṭṭho imāya appamattāya abhisajjitunti cattārome bho gotama
vaṇṇā khattiyā brāhmaṇā vessā suddā . imesaṃ hi bho
gotama catunnaṃ vaṇṇānaṃ tayo vaṇṇā khattiyā ca vessā ca suddā
ca aññadatthuṃ brāhmaṇasseva paricārakā sampajjanti tayidaṃ bho
gotama na channaṃ tayidaṃ nappaṭirūpaṃ yadime sakyā ibbhā santā
ibbhā samānā na brāhmaṇe sakkaronti na brāhmaṇe garukaronti
na brāhmaṇe mānenti na brāhmaṇe pūjenti na brāhmaṇe
apacāyantīti . itiha ambaṭṭho māṇavo idaṃ tatiyaṃ sakyesu
ibbhāvādaṃ nipātesi.
[148] Athakho bhagavato etadahosi atibāḷhaṃ kho ayaṃ ambaṭṭho
māṇavo sakyesu ibbhāvādena nimmadeti yannūnāhaṃ gottaṃ puccheyyanti.
Athakho bhagavā ambaṭṭhaṃ māṇavaṃ etadavoca kathaṃgottosi ambaṭṭhāti .
Kaṇhāyanohamasmi bho gotamāti . porāṇaṃ kho pana te ambaṭṭha
mātāpettikaṃ nāma gottaṃ anussarato ayyaputtā sakyā bhavanti
dāsiputto tvamasi sakyānaṃ sakyā kho pana ambaṭṭha rājānaṃ
ukkākaṃ 1- pitāmahaṃ dahanti 2-.
[149] Bhūtapubbaṃ ambaṭṭha rājā ukkāko yā sā mahesī
@Footnote: 1 Sī. okkākaṃ. 2 Sī. dissanti.
Piyā manāpā tassā puttassa rajjaṃ pariṇāmetukāmo jeṭṭhakumāre
raṭṭhasmā pabbājesi ukkāmukhaṃ karakaṇḍuṃ hatthinikaṃsinipuraṃ . te
raṭṭhasmā pabbājitā himavantapasse pokkharaṇiyā tīre mahāsākavanasaṇḍo
tattha vāsaṃ kappesuṃ . te jātisambhedabhayā sakāhi bhaganīhi
saddhiṃ saṃvāsaṃ kappesuṃ.
{149.1} Athakho ambaṭṭha rājā ukkāko amacce pārisajje
āmantesi kahaṃ nu kho bho etarahi kumārā sammantīti . Atthi deva
himavantapasse pokkharaṇiyā tīre mahāsākavanasaṇḍo tatthetarahi
kumārā sammanti te jātisambhedabhayā sakāhi bhaginīhi
saddhiṃ saṃvāsaṃ kappentīti . athakho ambaṭṭha rājā ukkāko udānaṃ
udānesi sakyā vata bho kumārā paramasakyā vata bho kumārāti .
Tadagge kho pana ambaṭṭha sakyā paññāyanti . so ca sakyānaṃ
pubbapuriso . rañño kho pana ambaṭṭha ukkākassa disā nāma
dāsī ahosi sā kaṇhaṃ nāma janesi . jāto kaṇho pabyāhāsi
dhovatha maṃ amma nhāpetha maṃ amma imasmā maṃ amma asucismā
parimocetha atthāya te 1- bhavissāmīti . yathā kho pana ambaṭṭha
etarahi manussā pisāce pisācāti sañjānanti evameva kho ambaṭṭha
tena kho pana samayena manussā pisāce kaṇhāti sañjānanti .
Te evamāhaṃsu ayaṃ jāto pabyāhāsi kaṇho jāto pisāco
jātoti . tadagge kho pana ambaṭṭha kaṇhāyanā paññāyanti . so
@Footnote: 1 votipi pāṭho.
Ca kaṇhāyanānaṃ pubbapuriso . iti kho te ambaṭṭha porāṇaṃ
mātāpettikaṃ nāma gottaṃ anussarato ayyaputtā sakyā bhavanti
dāsiputto tvamasi sakyānanti.
[150] Evaṃ vutte te māṇavakā bhagavantaṃ etadavocuṃ mā bhavaṃ
gotamo ambaṭṭhaṃ māṇavaṃ atibāḷhaṃ dāsiputtavādena nimmādesi
sujāto ca bho gotama ambaṭṭho māṇavo kulaputto ca ambaṭṭho
māṇavo bahussuto ca ambaṭṭho māṇavo kalyāṇavākkaraṇo ca
ambaṭṭho māṇavo paṇḍito ca ambaṭṭho māṇavo pahoti ca
ambaṭṭho māṇavo bhotā gotamena saddhiṃ asmiṃ vacane patimantetunti.
{150.1} Athakho bhagavā te māṇavake etadavoca sace kho tumhākaṃ
māṇavakānaṃ evaṃ hoti dujjāto ca ambaṭṭho māṇavo akulaputto ca
ambaṭṭho māṇavo appassuto ca ambaṭṭho māṇavo akalyāṇa-
vākkaraṇo ca ambaṭṭho māṇavo duppañño ca ambaṭṭho māṇavo
na ca pahoti ambaṭṭho māṇavo samaṇena gotamena saddhiṃ asmiṃ
vacane patimantetunti tiṭṭhatu ambaṭṭho māṇavo tumhe mayā saddhiṃ
mantavho asmiṃ vacane sace pana tumhākaṃ māṇavakānaṃ evaṃ hoti
sujāto ca ambaṭṭho māṇavo kulaputto ca ambaṭṭho māṇavo
bahussuto ca ambaṭṭho māṇavo kalyāṇavākkaraṇo ca ambaṭṭho
māṇavo paṇḍito ca ambaṭṭho māṇavo pahoti ca ambaṭṭho
māṇavo samaṇena gotamena saddhiṃ asmiṃ vacane patimantetunti
Tiṭṭhatha tumhe ambaṭṭho māṇavo mayā saddhiṃ asmiṃ vacane patimantetūti.
Sujāto ca bho gotama ambaṭṭho māṇavo kulaputto ca ambaṭṭho
māṇavo bahussuto ca ambaṭṭho māṇavo kalyāṇavākkaraṇo
ca ambaṭṭho māṇavo paṇḍito ca ambaṭṭho māṇavo pahoti ca
ambaṭṭho māṇavo bhotā gotamena saddhiṃ asmiṃ vacane patimantetuṃ
tuṇhī mayaṃ bhavissāma ambaṭṭho māṇavo bhotā gotamena saddhiṃ
asmiṃ vacane patimantetūti.
[151] Athakho bhagavā ambaṭṭhaṃ māṇavaṃ etadavoca ayaṃ kho pana
te ambaṭṭha sahadhammiko pañho āgacchati akāmāpi byākātabbo
sace tvaṃ na byākarissasi aññena vā aññaṃ paticarissasi tuṇhī
vā bhavissasi pakkamissasi vā ettheva te sattadhā muddhā phalīssati
taṃ kiṃ maññasi ambaṭṭha kinti te sutaṃ brāhmaṇānaṃ vuḍḍhānaṃ
mahallakānaṃ ācariyapācariyānaṃ bhāsamānānaṃ kutopabhūtikā kaṇhāyanā
ko ca kaṇhāyanānaṃ pubbapurisoti.
{151.1} Evaṃ vutte ambaṭṭho māṇavo tuṇhī ahosi .
Dutiyampi kho bhagavā ambaṭṭhaṃ māṇavaṃ etadavoca taṃ kiṃ maññasi
ambaṭṭha kinti te sutaṃ brāhmaṇānaṃ vuḍḍhānaṃ mahallakānaṃ
ācariyapācariyānaṃ bhāsamānānaṃ kutopabhūtikā kaṇhāyanā
ko ca kaṇhāyanānaṃ pubbapurisoti . dutiyampi kho ambaṭṭho
māṇavo tuṇhī ahosi . athakho bhagavā ambaṭṭhaṃ māṇavaṃ etadavoca
byākarohidāni ambaṭṭha nadāni te tuṇhībhāvassa kālo
Yo kho ambaṭṭha tathāgatena yāvatatiyakaṃ sahadhammikaṃ pañhaṃ puṭṭho
na byākaroti etthevassa sattadhā muddhā phalissatīti.
[152] Tena kho pana samayena vajirapāṇi yakkho mahantaṃ
ayokūṭaṃ ādāya ādittaṃ sampajjalitaṃ saṃjotibhūtaṃ ambaṭṭhassa
māṇavassa uparivehāsaṃ ṭhito hoti sacāyaṃ ambaṭṭho māṇavo
bhagavatā yāvatatiyakaṃ sahadhammikaṃ pañhaṃ puṭṭho na byākarissati
etthevassa sattadhā muddhaṃ phālessāmīti . taṃ kho pana vajirapāṇiṃ
yakkhaṃ bhagavā ceva passati ambaṭṭho ca māṇavo . athakho
ambaṭṭho māṇavo bhīto saṃviggo lomahaṭṭhajāto bhagavantaṃyeva
tāṇaṃ gavesi bhagavantaṃyeva leṇaṃ gavesi bhagavantaṃyeva saraṇaṃ gavesi
upanisīditvā bhagavantaṃ etadavoca kimetaṃ bhavaṃ gotamo āha puna
bhavaṃ gotamo brūtūti . taṃ kiṃ maññasi ambaṭṭha kinti te sutaṃ
brāhmaṇānaṃ vuḍḍhānaṃ mahallakānaṃ ācariyapācariyānaṃ bhāsamānānaṃ
kutopabhūtikā kaṇhāyanā ko ca kaṇhāyanānaṃ pubbapurisoti .
Evameva bho gotama sutaṃ yadeva bhavaṃ gotamo āha tatopabhūtikā
kaṇhāyanā so ca kaṇhāyanānaṃ pubbapurisoti.
[153] Evaṃ vutte te māṇavakā unnādino uccāsaddā
mahāsaddā ahesuṃ dujjāto kira bho ambaṭṭho māṇavo akulaputto
kira bho ambaṭṭho māṇavo dāsiputto kira bho ambaṭṭho
māṇavo sakyānaṃ ayyaputtā kira bho ambaṭṭhassa māṇavassa
Sakyā bhavanti dhammavādīyeva 1- kira mayaṃ samaṇaṃ gotamaṃ apasādetabbaṃ
amaññimhāti . athakho bhagavato etadahosi atibāḷhaṃ kho ime
māṇavakā ambaṭṭhaṃ māṇavaṃ dāsiputtavādena nimmādenti yannūnāhaṃ
parimoceyyanti . athakho bhagavā te māṇavake etadavoca mā
kho tumhe māṇavakā ambaṭṭhaṃ māṇavakaṃ atibāḷhaṃ dāsiputtavādena
nimmādetha uḷāro ca so kaṇho isi ahosi so dakkhiṇaṃ janapadaṃ
gantvā brahmamante adhiyitvā rājānaṃ ukkākaṃ upasaṅkamitvā
maddarūpiṃ 2- dhītaraṃ yāci . tassa rājā ukkāko nevare mayhaṃ
dāsiputto samāno maddarūpiṃ dhītaraṃ yācatīti kupito anattamano khurappaṃ
sannayhi. So taṃ khurappaṃ neva asakkhi muñcituṃ no patisaṃharituṃ.
[154] Athakho māṇavakā amaccā pārisajjā kaṇhaṃ isiṃ
upasaṅkamitvā etadavocuṃ sotthi bhadante hotu rañño sotthi
bhadante hotu raññoti . sotthi bhavissati rañño apica rājā
yadi adho khurappaṃ muñcissati yāvatā rañño vijitaṃ ettāvatā paṭhavī
udiyissatīti . sotthi bhadante hotu rañño sotthi janapadassāti .
Sotthi bhavissati rañño sotthi janapadassa apica rājā yadi uddhaṃ
khurappaṃ muñcissati yāvatā rañño vijitaṃ ettāvatā satta vassāni
devo na vassissatīti . sotthi bhadante hotu rañño sotthi
janapadassa devo pavassatūti . sotthi bhavissati rañño sotthi
@Footnote: 1 Sī. dhammavādiññeva. 2 Sī. khuddarūpiṃ.
Janapadassa devo pavassissati apica rājā jeṭṭhakumāre khurappaṃ
patiṭṭhāpetu sotthikumāro pallomo bhavissatīti . athakho māṇavakā
rājā ukkāko jeṭṭhakumāre khurappaṃ patiṭṭhāpesi sotthikumāro
pallomo bhavissatīti . athakho māṇavakā rājā ukkāko jeṭṭhakumāre
khurappaṃ patiṭṭhāpesi . sotthikumāro pallomo samabhavi . tassa
rājā ukkāko bhīto brahmadaṇḍena tajjito maddarūpiṃ dhītaraṃ adāsi.
Mā kho tumhe māṇavakā ambaṭṭhaṃ māṇavaṃ atibāḷhaṃ dāsiputtavādena
nimmādetha uḷāro so kaṇho isi ahosīti.
[155] Athakho bhagavā ambaṭṭhaṃ māṇavaṃ āmantesi taṃ kiṃ
maññasi ambaṭṭha idha khattiyakumāro brāhmaṇakaññāya saddhiṃ
saṃvāsaṃ kappeyya tesaṃ saṃvāsamanvāya putto jāyetha yo so
khattiyakumārena brāhmaṇakaññāya putto uppanno apinu so
labhetha brāhmaṇesu āsanaṃ vā udakaṃ vāti . labhetha bho gotama.
Apinu naṃ brāhmaṇā bhojeyyuṃ sadde vā thālipāke vā yaññe
vā pāhune vāti . bhojeyyuṃ bho gotama . apinu naṃ brāhmaṇā
mante vāceyyuṃ vā no vāti . vāceyyuṃ bho gotama . Apinussa
itthīsu āvaṭaṃ vā assa anāvaṭaṃ vāti . anāvaṭaṃ hissa bho
gotama . apinu khattiyābhisekena abhisiñceyyunti . no hidaṃ bho
gotama. Taṃ kissa hetu. Mātito hi bho gotama anupapannoti.
[156] Taṃ kimmaññasi ambaṭṭha idha brāhmaṇakumāro khattiyakaññāya
Saddhiṃ saṃvāsaṃ kappeyya tesaṃ saṃvāsamanvāya putto jāyetha
yo so brāhmaṇakumārena khattiyakaññāya putto uppanno apinu
so labhetha brāhmaṇesu āsanaṃ vā udakaṃ vāti . labhetha bho
gotama . apinu naṃ brāhmaṇā bhojeyyuṃ sadde vā thālipāke
vā yaññe vā pāhune vāti . bhojeyyuṃ bho gotama . apinu naṃ
brāhmaṇā mante vāceyyuṃ vā no vāti . vāceyyuṃ bho gotama.
Apinussa itthīsu āvaṭaṃ vā assa anāvaṭaṃ vāti . anāvaṭaṃ hissa
bho gotama . apinu naṃ khattiyābhisekena abhisiñceyyunti . no hidaṃ
bho gotama. Taṃ kissa hetu. Pitito hi bho gotama anupapannoti.
[157] Iti kho ambaṭṭha itthiyā vā itthiṃ karitvā purisena
vā purisaṃ karitvā khattiyā va seṭṭhā hīnā brāhmaṇā . taṃ
kiṃ maññasi ambaṭṭha idha brāhmaṇā brāhmaṇaṃ kismiñcideva
pakaraṇe khuramuṇḍaṃ karitvā bhassapuṭena vadhitvā raṭṭhā vā nagarā
vā pabbājeyyuṃ apinu so labhetha brāhmaṇesu āsanaṃ vā udakaṃ
vāti . no hidaṃ bho gotama . apinu naṃ brāhmaṇā bhojeyyuṃ
sadde vā thālipāke vā yaññe vā pāhune vāti . no hidaṃ
bho gotama . apinu naṃ brāhmaṇā mante vāceyyuṃ vā no
vāti . no hidaṃ bho gotama . apinussa itthīsu āvaṭaṃ vā
assa anāvaṭaṃ vāti. Āvaṭaṃ hissa bho gotama.
[158] Taṃ kiṃ maññasi ambaṭṭha idha khattiyā khattiyaṃ kismiñcideva
Pakaraṇe khuramuṇḍaṃ karitvā bhassapuṭena vadhitvā raṭṭhā vā nagarā
vā pabbājeyyuṃ apinu so labhetha brāhmaṇesu āsanaṃ vā udakaṃ
vāti . labhetha bho gotama . apinu naṃ brāhmaṇā bhojeyyuṃ
sadde vā thālipāke vā yaññe vā pāhune vāti . bhojeyyuṃ
bho gotama . apinu naṃ brāhmaṇā mante vāceyyuṃ vā no
vāti . vāceyyuṃ bho gotama . apinussa itthīsu āvaṭaṃ vā
assa anāvaṭaṃ vāti . anāvaṭañhissa bho gotama . ettāvatā
kho ambaṭṭha khattiyo paramanihīnatappatto hoti yadidaṃ khattiyā
khuramuṇḍaṃ karitvā bhassapuṭena vadhitvā raṭṭhā vā nagarā vā
pabbājenti . iti kho ambaṭṭha yadāpi khattiyo paramanihīnatappatto
hoti tadāpi khattiyā va seṭṭhā hīnā brāhmaṇā . brahmunā
cesā ambaṭṭha sanaṅkumārena gāthā bhāsitā
[159] Khattiyo seṭṭho janetasmiṃ ye gottapaṭisārino
vijjācaraṇasampanno so seṭṭho devamānuseti.
[160] Sā kho panesā ambaṭṭha brahmunā sanaṅkumārena gāthā
sugītā na duggītā subhāsitā na dubbhāsitā atthasañhitā no
anatthasañhitā anumatā mayā ahaṃpi ambaṭṭha evaṃ vadāmi
[161] Khattiyo seṭṭho janetasmiṃ ye gottapaṭisārino
vijjācaraṇasampanno so seṭṭho devamānuseti.
Bhāṇavāraṃ paṭhamaṃ.
[162] Katamaṃ pana taṃ bho gotama caraṇaṃ katamā sā vijjāti.
Na kho ambaṭṭha anuttarāya vijjācaraṇasampadāya jātivādo vā
vuccati gottavādo vā vuccati mānavādo vā vuccati arahasi vā
maṃ tvaṃ na vā maṃ tvaṃ arahasīti yattha kho ambaṭṭha āvāho vā
hoti vivāho vā hoti āvāhavivāho vā hoti etthetaṃ vuccati
jātivādo vā itipi gottavādo vā itipi mānavādo vā itipi
arahasi vā maṃ tvaṃ na vā maṃ tvaṃ arahasīti ye hi keci ambaṭṭha
jātivādavinibaddhā vā gottavādavinibaddhā vā mānavādavinibaddhā
vā āvāhavivāhavinibaddhā vā ārakā te anuttarāya vijjācaraṇa-
sampadāya pahāya kho ambaṭṭha jātivādavinibaddhañca gottavāda-
vinibaddhañca mānavādavinibaddhañca āvāhavivāhavinibaddhañca
anuttarāya vijjācaraṇasampadāya sacchikiriyā hotīti.
[163] Katamaṃ pana taṃ bho gotama caraṇaṃ katamā sā vijjāti.
Idha ambaṭṭha tathāgato loke uppajjati arahaṃ sammāsambuddho
.pe. (yathā sāmaññaphale 1- evaṃ vitthāretabbaṃ) .pe. evaṃ kho
ambaṭṭha bhikkhu sīlasampanno hoti .pe. paṭhamaṃ jhānaṃ upasampajja
viharati idaṃpissa hoti caraṇasmiṃ .pe. vitakkavicārānaṃ vūpasamā
dutiyaṃ jhānaṃ tatiyaṃ jhānaṃ catutthaṃ jhānaṃ upasampajja viharati .
Idaṃpissa hoti caraṇasmiṃ . idaṃpi kho taṃ ambaṭṭha caraṇaṃ .
@Footnote: 1 Sī. sāmaññaphalaṃ.
Ñāṇadassanāya cittaṃ abhinīharati abhininnāmeti .pe. idaṃpissa
hoti vijjāya .pe. nāparaṃ itthattāyāti pajānāti . idaṃpissa
hoti vijjāya . ayaṃ kho sā ambaṭṭha vijjā . Ayaṃ vuccati ambaṭṭha
vijjāsampanno itipi caraṇasampanno itipi vijjācaraṇasampanno
itipi . imāya ca ambaṭṭha vijjāsampadāya caraṇasampadāya aññā
vijjāsampadā caraṇasampadā uttaritarā vā paṇītatarā vā natthi.
{163.1} Imāya kho ambaṭṭha anuttarāya vijjācaraṇasampadāya
cattāri apāyamukhāni bhavanti . katamāni cattāri. Idha ambaṭṭha ekacco
samaṇo vā brāhmaṇo vā imaṃyeva anuttaraṃ vijjācaraṇasampadaṃ
anabhisambhūṇamāno khārivividhamādāya araññavanamajjhogāhati
pavattaphalabhojano bhavissāmīti . so aññadatthuṃ vijjācaraṇasampannasseva
paricārako sampajjati . imāya kho ambaṭṭha anuttarāya vijjācaraṇasampadāya
idaṃ paṭhamaṃ apāyamukhaṃ bhavati.
[164] Puna caparaṃ ambaṭṭha idhekacco samaṇo vā brāhmaṇo vā
imañceva anuttaraṃ vijjācaraṇasampadaṃ anabhisambhūṇamāno
pavattaphalabhojanattañca anabhisambhūṇamāno kuddālapiṭakaṃ ādāya
araññavanamajjhogāhati kaṇḍamūlaphalabhojano bhavissāmīti . so
aññadatthuṃ vijjācaraṇasampannasseva paricārako sampajjati . imāya
kho ambaṭṭha anuttarāya vijjācaraṇasampadāya idaṃ dutiyaṃ apāyamukhaṃ bhavati.
[165] Puna caparaṃ ambaṭṭha idhekacco samaṇo vā brāhmaṇo
Vā imañceva anuttaraṃ vijjācaraṇasampadaṃ anabhisambhūṇamāno
pavattaphalabhojanattañca anabhisambhūṇamāno kaṇḍamūlaphalabhojanattañca
anabhisambhūṇamāno gāmasāmantaṃ vā nigamasāmantaṃ vā agyāgāraṃ karitvā
aggiṃ paricaranto acchati . so aññadatthuṃ vijjācaraṇasampannasseva
paricārako sampajjati . imāya kho ambaṭṭha anuttarāya vijjācaraṇasampadāya
idaṃ tatiyaṃ apāyamukhaṃ bhavati.
[166] Puna caparaṃ ambaṭṭha idhekacco samaṇo vā brāhmaṇo
vā imañceva anuttaraṃ vijjācaraṇasampadaṃ anabhisambhūṇamāno
pavattaphalabhojanattañca anabhisambhūṇamāno kaṇḍamūlaphalabhojanattañca
anabhisambhūṇamāno aggiparicariyañca anabhisambhūṇamāno cātummahāpathe
catudvāraṃ agāraṃ karitvā acchati yo imāhi catūhi disāhi āgamissati
samaṇo vā brāhmaṇo vā tamahaṃ yathāsatti yathābalaṃ paṭipūjissāmīti .
So aññadatthuṃ vijjācaraṇasampannasseva paricārako sampajjati .
Imāya kho ambaṭṭha anuttarāya vijjācaraṇasampadāya idaṃ catutthaṃ
apāyamukhaṃ bhavati . imāya kho ambaṭṭha anuttarāya vijjācaraṇasampadāya
imāni cattāri apāyamukhāni bhavanti.
[167] Taṃ kiṃ maññasi ambaṭṭha apinu tvaṃ imāya anuttarāya
vijjācaraṇasampadāya sandissasi sācariyakoti . no hidaṃ bho gotama
ko cāhaṃ bho gotama sācariyako kā ca anuttarā vijjācaraṇasampadā
ārakāhaṃ bho gotama imāya anuttarāya vijjācaraṇasampadāya
Sācariyakoti . taṃ kiṃ maññasi ambaṭṭha apinu tvaṃ imaṃyeva anuttaraṃ
vijjācaraṇasampadaṃ anabhisambhūṇamāno khārivividhamādāya
araññavanamajjhogāhasi sācariyako pavattaphalabhojanā bhavissāmāti .
No hidaṃ bho gotama . taṃ kiṃ maññasi ambaṭṭha apinu tvaṃ imañceva
anuttaraṃ vijjācaraṇasampadaṃ anabhisambhūṇamāno pavattaphalabhojanattañca
anabhisambhūṇamāno kuddālapiṭakaṃ ādāya araññavanamajjhogāhasi
sācariyako kaṇḍamūlaphalabhojanā bhavissāmāti. No hidaṃ bho gotama.
{167.1} Taṃ kiṃ maññasi ambaṭṭha apinu tvaṃ imañceva anuttaraṃ
vijjācaraṇasampadaṃ anabhisambhūṇamāno pavattaphalabhojanattañca
anabhisambhūṇamāno kaṇḍamūlaphalabhojanattañca anabhisambhūṇamāno
gāmasāmantaṃ vā nigamasāmantaṃ vā agyāgāraṃ karitvā aggiṃ paricaranto
acchasi sācariyakoti . no hidaṃ bho gotama . taṃ kiṃ maññasi ambaṭṭha
apinu tvaṃ imañceva anuttaraṃ vijjācaraṇasampadaṃ anabhisambhūṇamāno
pavattaphalabhojanattañca anabhisambhūṇamāno kaṇḍamūlaphalabhojanattañca
anabhisambhūṇamāno aggiparicariyañca anabhisambhūṇamāno cātummahāpathe
catudvāraṃ agāraṃ karitvā acchasi sācariyako yo imāhi catūhi disāhi
āgamissati samaṇo vā brāhmaṇo vā tamahaṃ yathāsatti yathābalaṃ
paṭipūjissāmīti. No hidaṃ bho gotama.
{167.2} Iti kho ambaṭṭha imāya ceva tvaṃ anuttarāya
vijjācaraṇasampadāya parihīno sācariyako ye hi kecime
anuttarāya vijjācaraṇasampadāya cattāri apāyamukhāni
Bhavanti tato ca parihīno sācariyako.
[168] Bhāsitā kho pana te esā ambaṭṭha ācariyena
brāhmaṇena pokkharasātinā vācā keci muṇḍakā samaṇakā ibbhā
kaṇhā bandhupādapaccā kā ca te vijjānaṃ brāhmaṇānaṃ sākacchāti.
Attanā āpāyikopi aparipūramāno . passa ambaṭṭha yāva aparaddhañca
te idaṃ ācariyassa brāhmaṇassa pokkharasātissa.
{168.1} Brāhmaṇo kho pana ambaṭṭha pokkharasāti rañño
pasenadikosalassa dattikaṃ bhuñjati tassa rājā pasenadikosalo
sammukhībhāvaṃpi na dadāti yadāpi tena manteti tirodussantena
manteti . yassa kho pana ambaṭṭha dhammikaṃ payātaṃ bhikkhaṃ paṭiggaṇheyya
kathaṃ tassa rājā pasenadikosalo sammukhībhāvaṃpi na dadeyya . passa
ambaṭṭha yāva aparaddhañca te idaṃ ācariyassa brāhmaṇassa
pokkharasātissa.
[169] Taṃ kiṃ maññasi ambaṭṭha idha rājā pasenadikosalo
hatthigīvāyaṃ vā nisinno rathūpatthare vā ṭhito uggehi vā rājaññehi
vā kiñcideva mantanaṃ manteyya . so tamhā padesā apakkamma
ekamantaṃ tiṭṭheyya atha āgaccheyya suddo vā suddadāso
vā so tasmiṃ padese ṭhito mantanaṃ manteyya evaṃpi rājā
pasenadikosalo āha evaṃpi rājā pasenadikosalo āhāti .
Apinu kho rājabhaṇitaṃ vā bhaṇati rājamantanaṃ vā manteti tāvatā
So assa rājā vā rājamahāmatto vāti . no hidaṃ bho gotama.
Evameva kho tvaṃ ambaṭṭha ye tepi ahesuṃ brāhmaṇānaṃ pubbakā
isayo mantānaṃ kattāro mantānaṃ pavattāro yesamidaṃ etarahi
brāhmaṇā porāṇaṃ mantapadaṃ gītaṃ pavuttaṃ samihitaṃ tadanugāyanti
tadanubhāsanti bhāsitamanubhāsanti vācitamanuvācenti seyyathīdaṃ
aṭṭhako vāmako vāmadevo vessāmitto yamataggī aṅgīraso
bhāradvājo vāseṭṭho kassapo bhagu tyāhaṃ mante adhiyāmi
sācariyako tāvatā tvaṃ bhavissasi isi vā isitāya vā paṭipannoti
netaṃ ṭhānaṃ vijjati.
{169.1} Taṃ kiṃ maññasi ambaṭṭha kinti te sutaṃ brāhmaṇānaṃ
vuḍḍhānaṃ mahallakānaṃ ācariyapācariyānaṃ bhāsamānānaṃ ye te ahesuṃ
brāhmaṇānaṃ pubbakā isayo mantānaṃ kattāro mantānaṃ pavattāro
yesamidaṃ etarahi brāhmaṇā porāṇamantapadaṃ gītaṃ pavuttaṃ samihitaṃ
tadanugāyanti tadanubhāsanti bhāsitamanubhāsanti vācitamanuvācenti
seyyathīdaṃ aṭṭhako vāmako vāmadevo vessāmitto yamataggī aṅgīraso
bhāradvājo vāseṭṭho kassapo bhagu evaṃ su te sunhātā suvilittā
kappitakesamassū āmuttamālābharaṇā odātavatthavasanā pañcahi
kāmaguṇehi samappitā samaṅgibhūtā paricārenti seyyathāpi tvaṃ etarahi
sācariyakoti. No hidaṃ bho gotama .pe. Evaṃ su te sālīnaṃ odanaṃ vicittakāḷakaṃ
anekasūpaṃ anekabyañjanaṃ paribhuñjanti seyyathāpi tvaṃ etarahi
Sācariyakoti . no hidaṃ bho gotama .pe. Evaṃ su te veṭṭhakanatapassāhi
nārīhi paricārenti seyyathāpi tvaṃ etarahi sācariyakoti . no hidaṃ
bho gotama .pe. evaṃ su te kuttavālehi vaḷavārathehi dīghāhi
patodalaṭṭhīhi vāhane vitudantā vicarissanti seyyathāpi tvaṃ etarahi
sācariyakoti . no hidaṃ bho gotama .pe. Evaṃ su te ukkiṇṇaparikkhāsu
ukkhittapalighāsu nagarūpakārikāsu dīghāsibaddhehi purisehi rakkhāpenti
seyyathāpi tvaṃ etarahi sācariyakoti. No hidaṃ bho gotama .pe. Iti kho
ambaṭṭha neva tvaṃ isi na pana isitāya paṭipanno sācariyako yassa kho
pana ambaṭṭha mayi kaṅkhā vā vimati vā so maṃ pañhena ahaṃ veyyākaraṇena
sodhissāmīti.
[170] Athakho bhagavā vihārā nikkhamma caṅkamaṃ abbhuṭṭhāsi .
Ambaṭṭhopi māṇavo vihārā nikkhamma caṅkamaṃ abbhuṭṭhāsi .
Athakho ambaṭṭho māṇavo bhagavantaṃ caṅkamantaṃ anucaṅkamamāno
bhagavato kāye dvattiṃsamahāpurisalakkhaṇāni sammannesi . addasā
kho ambaṭṭho māṇavo bhagavato kāye dvattiṃsamahāpurisalakkhaṇāni
yebhuyyena ṭhapetvā dve dvīsu mahāpurisalakkhaṇesu kaṅkhati vicikicchati
nādhimuccati na sampasīdati kosohite ca vatthaguyhe pahūtajivhatāya
ca . athakho bhagavato etadahosi passati kho me ayaṃ ambaṭṭho
māṇavo dvattiṃsamahāpurisalakkhaṇāni yebhuyyena ṭhapetvā dve
Dvīsu mahāpurisalakkhaṇesu ambaṭṭho kaṅkhati vicikicchati nādhimuccati
na sampasīdati kosohite ca vatthaguyhe pahūtajivhatāya cāti .
Athakho bhagavā tathārūpaṃ iddhābhisaṃkhāraṃ abhisaṃkhāresi yathā addasa
ambaṭṭho māṇavo bhagavato kosohitavatthaguyhaṃ . athakho bhagavā
jivhaṃ ninnāmetvā ubhopi kaṇṇasotāni anumasi paṭimasi ubhopi
nāsikasotāni anumasi paṭimasi kevalampi nalāṭamaṇḍalaṃ jivhāya
chādesi.
[171] Athakho ambaṭṭhassa māṇavassa etadahosi samannāgato
kho samaṇo gotamo dvattiṃsamahāpurisalakkhaṇehi paripuṇṇehi no
aparipuṇṇehīti . bhagavantaṃ etadavoca handa cadāni mayaṃ bho gotama
gacchāma bahukiccā mayaṃ bahukaraṇīyāti . yassadāni tvaṃ ambaṭṭha
kālaṃ maññasīti . athakho ambaṭṭho māṇavo vaḷavārathamāruyha
pakkāmi.
[172] Tena kho pana samayena brāhmaṇo pokkharasāti uṭṭhāya
nikkhamitvā mahatā brāhmaṇagaṇena saddhiṃ sake ārāme nisinno
hoti ambaṭṭhaṃyeva māṇavaṃ patimānento . athakho ambaṭṭho
māṇavo yena sako ārāmo tena pāyāsi yāvatikā yānassa bhūmi
yānena gantvā yānā paccorohitvā pattiko va yena brāhmaṇo
pokkharasāti tenupasaṅkami upasaṅkamitvā brāhmaṇaṃ pokkharasātiṃ
abhivādetvā ekamantaṃ nisīdi . ekamantaṃ nisinnaṃ kho ambaṭṭhaṃ
Māṇavaṃ brāhmaṇo pokkharasāti etadavoca kacci tāta ambaṭṭha
addasa taṃ bhavantaṃ gotamanti . addasāma kho mayaṃ bho taṃ bhavantaṃ
gotamanti . kacci tāta ambaṭṭha taṃ bhavantaṃ gotamaṃ tathāsantaṃyeva
saddo abbhuggato no aññathā kacci pana bho so bhavaṃ gotamo
tādiso no aññādisoti . tathāsantaṃyeva bho taṃ bhavantaṃ gotamaṃ
tathāsaddo abbhuggato no aññathā tādiso va bho so bhavaṃ
gotamo no aññādiso samannāgato va bho so bhavaṃ gotamo
dvattiṃsamahāpurisalakkhaṇehi paripuṇṇehi no aparipuṇṇehīti . ahu
pana te tāta ambaṭṭha samaṇena gotamena saddhiṃ kocideva kathāsallāpoti.
Ahu kho me bho samaṇena gotamena saddhiṃ kocideva kathāsallāpoti.
Yathākathaṃ pana te tāta ambaṭṭha ahu samaṇena gotamena saddhiṃ kocideva
kathāsallāpoti . athakho ambaṭṭho māṇavo yāvatako ahosi bhagavatā
saddhiṃ kathāsallāpo taṃ sabbaṃ brāhmaṇassa pokkharasātissa ārocesi.
[173] Evaṃ vutte brāhmaṇo pokkharasāti ambaṭṭhaṃ māṇavaṃ
etadavoca aho vata re amhākaṃ paṇḍitaka aho vata re amhākaṃ
bahussutaka aho vata re amhākaṃ tevijjaka evarūpena kira bho
puriso atthacarakena kāyassa bhedā paraṃ maraṇā apāyaṃ duggatiṃ
vinipātaṃ nirayaṃ upapajjeyya yadeva kho tvaṃ ambaṭṭha taṃ bhavantaṃ
gotamaṃ evaṃ āsajja āsajja avacāsi athakho bhavaṃ gotamo amhehi
Evaṃ upaneyyaṃ upaneyyaṃ avaca aho vata re amhākaṃ paṇḍitaka
ahosi vata re amhākaṃ bahussutaka aho vata re amhākaṃ tevijjaka
evarūpena kira bho puriso atthacarakena kāyassa bhedā paraṃ maraṇā
apāyaṃ duggatiṃ vinipātaṃ nirayaṃ upapajjeyyāti . kupito anattamano
ambaṭṭhaṃ māṇavaṃ padasāyeva pavattesi icchati ca tāvadeva bhagavantaṃ
dassanāya upasaṅkamituṃ . athakho te brāhmaṇā brāhmaṇaṃ
pokkharasātiṃ etadavocuṃ ativikālo kho bho ajja samaṇaṃ gotamaṃ
dassanāya upasaṅkamituṃ svedāni bhavaṃ pokkharasāti samaṇaṃ gotamaṃ
dassanāya upasaṅkamissatīti.
[174] Athakho brāhmaṇo pokkharasāti sake nivesane paṇītaṃ
khādanīyaṃ bhojanīyaṃ paṭiyādāpetvā yāne āropetvā ukkāsu
dhāriyamānāsu ukkaṭṭhāya niyyāsi yena icchānaṅgalavanasaṇḍo tena
pāyāsi yāvatikā yānassa bhūmi yānena gantvā yānā paccorohitvā
pattiko va yena bhagavā tenupasaṅkami upasaṅkamitvā bhagavatā saddhiṃ
sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi .
Ekamantaṃ nisinno kho brāhmaṇo pokkharasāti bhagavantaṃ etadavoca
āgamā nu khvidha bho gotama amhākaṃ antevāsī ambaṭṭho
māṇavoti . āgamā kho tedha brāhmaṇa antevāsī ambaṭṭho
māṇavoti . ahu pana te bho gotama ambaṭṭhena māṇavena saddhiṃ
kocideva kathāsallāpoti . ahu kho me brāhmaṇa ambaṭṭhena
Māṇavena saddhiṃ kocideva kathāsallāpoti . yathākathaṃ pana te bho
gotama ahu ambaṭṭhena māṇavena saddhiṃ kocideva kathāsallāpoti .
Athakho bhagavā yāvatako ahosi ambaṭṭhena māṇavena saddhiṃ kathāsallāpo
taṃ sabbaṃ brāhmaṇassa pokkharasātissa ārocesi.
[175] Evaṃ vutte brāhmaṇo pokkharasāti bhagavantametadavoca
bālo bho gotama ambaṭṭho māṇavo khamatu bhavaṃ gotamo ambaṭṭhassa
māṇavassāti . sukhī hotu brāhmaṇa ambaṭṭho māṇavoti . athakho
brāhmaṇo pokkharasāti bhagavato kāye dvattiṃsamahāpurisalakkhaṇāni
sammannesi . addasā kho brāhmaṇo pokkharasāti bhagavato kāye
dvattiṃsamahāpurisalakkhaṇāni yebhuyyena ṭhapetvā dve dvīsu
mahāpurisalakkhaṇesu kaṅkhati vicikicchati nādhimuccati na sampasīdati
kosohite ca vatthaguyhe pahūtajivhatāya ca.
{175.1} Athakho bhagavato etadahosi passati kho me ayaṃ brāhmaṇo
pokkharasāti dvattiṃsamahāpurisalakkhaṇāni yebhuyyena ṭhapetvā dve dvīsu
mahāpurisalakkhaṇesu kaṅkhati vicikicchati nādhimuccati na sampasīdati kosohite
ca vatthaguyhe pahūtajivhatāya cāti . Athakho bhagavā tathārūpaṃ iddhābhisaṃkhāraṃ
abhisaṃkhāresi yathā addasa brāhmaṇo pokkharasāti bhagavato kosohitaṃ
vatthaguyhaṃ . athakho bhagavā jivhaṃ ninnāmetvā ubhopi kaṇṇasotāni
anumasi paṭimasi ubhopi nāsikasotāni anumasi paṭimasi kevalampi
nalāṭamaṇḍalaṃ jivhāya chādesi . athakho brāhmaṇassa pokkharasātissa
Etadahosi samannāgato kho samaṇo gotamo dvattiṃsamahāpurisalakkhaṇehi
paripuṇṇehi no aparipuṇṇehīti . bhagavantaṃ etadavoca adhivāsetu bhavaṃ
gotamo ajjatanāya bhattaṃ saddhiṃ bhikkhusaṃghenāti . adhivāsesi bhagavā
tuṇhībhāvena . athakho brāhmaṇo pokkharasāti bhagavato adhivāsanaṃ
viditvā bhagavato kālaṃ ārocesi kālo bho gotama niṭṭhitaṃ bhattanti.
[176] Athakho bhagavā pubbaṇhasamayaṃ nivāsetvā pattacīvaramādāya
saddhiṃ bhikkhusaṃghena yena brāhmaṇassa pokkharasātissa nivesanaṃ
tenupasaṅkami upasaṅkamitvā paññatte āsane nisīdi . athakho
brāhmaṇo pokkharasāti bhagavantaṃ paṇītena khādanīyena bhojanīyena
sahatthā santappesi sampavāresi māṇavakā ca bhikkhusaṃghaṃ . athakho
brāhmaṇo pokkharasāti bhagavantaṃ bhuttāviṃ onītapattapāṇiṃ aññataraṃ
nīcaṃ āsanaṃ gahetvā ekamantaṃ nisīdi.
{176.1} Ekamantaṃ nisinnassa kho brāhmaṇassa pokkharasātissa
bhagavā anupubbīkathaṃ kathesi seyyathīdaṃ dānakathaṃ sīlakathaṃ saggakathaṃ kāmānaṃ
ādīnavaṃ okāraṃ saṃkilesaṃ nekkhamme ānisaṃsaṃ pakāsesi . Yadā bhagavā
aññāsi brāhmaṇaṃ pokkharasātiṃ kallacittaṃ muducittaṃ vinīvaraṇacattaṃ
udaggacittaṃ pasannacittaṃ athassa yā buddhānaṃ sāmukkaṃsikā dhammadesanā taṃ
pakāsesi dukkhaṃ samudayaṃ nirodhaṃ maggaṃ. Seyyathāpi nāma suddhaṃ vatthaṃ apagatakāḷakaṃ
sammadeva rajanaṃ paṭiggaṇheyya evameva kho brāhmaṇassa pokkharasātissa
Tasmiṃyeva āsane virajaṃ vītamalaṃ dhammacakkhuṃ udapādi yaṃ kiñci samudayadhammaṃ
sabbantaṃ nirodhadhammanti.
[177] Athakho brāhmaṇo pokkharasāti diṭṭhadhammo pattadhammo
viditadhammo pariyogāḷhadhammo tiṇṇavicikiccho vigatakathaṃkatho
vesārajjappatto aparappaccayo satthu sāsane bhagavantaṃ etadavoca
abhikkantaṃ bho gotama abhikkantaṃ bho gotama seyyathāpi bho gotama
nikkujjitaṃ vā ukkujjeyya paṭicchannaṃ vā vivareyya mūḷhassa vā
maggaṃ ācikkheyya andhakāre vā telapajjotaṃ dhāreyya cakkhumanto
rūpāni dakkhantīti evameva kho bhotā gotamena anekapariyāyena
dhammo pakāsito esāhaṃ bho gotama saputto sabhariyo sapariso
sāmacco bhavantaṃ gotamaṃ saraṇaṃ gacchāmi dhammañca bhikkhusaṃghañca
upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṅgataṃ
yathā ca bhavaṃ gotamo ukkaṭṭhāyaṃ aññāni upāsakakulāni upasaṅkamati
evameva kho bhavaṃ gotamo pokkharasātikulaṃ upasaṅkamatu tattha ye
te māṇavakā vā māṇavikā vā bhavantaṃ gotamaṃ abhivādessanti
vā paccuṭṭhissanti vā āsanaṃ vā udakaṃ vā dassanti cittaṃ vā
pasādessanti tesaṃ taṃ bhavissati dīgharattaṃ hitāya sukhāyāti . kalyāṇaṃ
vuccati brāhmaṇāti.
Ambaṭṭhasuttaṃ tatiyaṃ niṭṭhitaṃ.
-------------
Soṇadaṇḍasuttaṃ catutthaṃ
[178] Evamme sutaṃ. Ekaṃ samayaṃ bhagavā aṅgesu cārikañcaramāno
mahatā bhikkhusaṃghena saddhiṃ pañcamattehi bhikkhusatehi yena
campā tadavasari . tatra sudaṃ bhagavā campāyaṃ viharati gaggarāya
pokkharaṇiyā tīre.
[179] Tena kho pana samayena soṇadaṇḍo brāhmaṇo campaṃ
ajjhāvasati sattussadaṃ satiṇakaṭṭhodakaṃ sadhaññaṃ rājabhoggaṃ raññā
māgadhena seniyena bimbisārena dinnaṃ rājadāyaṃ brahmadeyyaṃ .
Assosuṃ kho campeyyakā brāhmaṇagahapatikā samaṇo khalu bho
gotamo sakyaputto sakyakulā pabbajito aṅgesu cārikañcaramāno
mahatā bhikkhusaṃghena saddhiṃ pañcamattehi bhikkhusatehi campaṃ anuppatto
campāyaṃ viharati gaggarāya pokkharaṇiyā tīre taṃ kho pana bhavantaṃ
gotamaṃ evaṃkalyāṇo kittisaddo abbhuggato itipi so bhagavā
arahaṃ sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṃ buddho bhagavāti so imaṃ lokaṃ
sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ
sayaṃ abhiññā sacchikatvā pavedeti so dhammaṃ deseti ādikalyāṇaṃ
majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ
parisuddhaṃ brahmacariyaṃ pakāseti sādhu kho pana tathārūpānaṃ arahataṃ
Dassanaṃ hotīti . athakho campeyyakā brāhmaṇagahapatikā campāya
nikkhamitvā saṃghāsaṃghīgaṇībhūtā yena gaggarā pokkharaṇī tenupasaṅkamanti.
[180] Tena kho pana samayena soṇadaṇḍo brāhmaṇo uparipāsāde
divāseyyaṃ upagato hoti . addasā kho soṇadaṇḍo brāhmaṇo
campeyyake brāhmaṇagahapatike campāya nikkhamitvā saṃghāsaṃghīgaṇībhūte
yena gaggarā pokkharaṇī tenupasaṅkamante disvā khattaṃ āmantesi kiṃ
nu kho bho khatte campeyyakā brāhmaṇagahapatikā campāya nikkhamitvā
saṃghāsaṃghīgaṇībhūtā yena gaggarā pokkharaṇī tenupasaṅkamantīti . atthi kho
bho samaṇo gotamo sakyaputto sakyakulā pabbajito aṅgesu cārikañcaramāno
mahatā bhikkhusaṃghena saddhiṃ pañcamattehi bhikkhusatehi campaṃ anuppatto
campāyaṃ viharati gaggarāya pokkharaṇiyā tīre taṃ kho pana bhavantaṃ gotamaṃ
evaṃkalyāṇo kittisaddo abbhuggato itipi so bhagavā arahaṃ
sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṃ buddho bhagavāti tamete bhavantaṃ
gotamaṃ dassanāya upasaṅkamantīti . tenahi bho khatte yena campeyyakā
brāhmaṇagahapatikā tenupasaṅkami upasaṅkamitvā campeyyake
brāhmaṇagahapatike evaṃ vadesi soṇadaṇḍo bho brāhmaṇo evamāha
āgamentu kira bhavanto soṇadaṇḍopi brāhmaṇo samaṇaṃ gotamaṃ
dassanāya upasaṅkamissatīti . evaṃ bhoti kho so khatto soṇadaṇḍassa
Brāhmaṇassa paṭissutvā yena campeyyakā brāhmaṇagahapatikā
tenupasaṅkami upasaṅkamitvā campeyyake brāhmaṇagahapatike
etadavoca soṇadaṇḍo bho brāhmaṇo evamāha āgamentu kira
bhavanto soṇadaṇḍopi brāhmaṇo samaṇaṃ gotamaṃ dassanāya
upasaṅkamissatīti.
[181] Tena kho pana samayena nānāverajjakānaṃ brāhmaṇānaṃ
pañcamattāni brāhmaṇasatāni campāyaṃ paṭivasanti kenacideva
karaṇīyena . assosuṃ kho te brāhmaṇā soṇadaṇḍo brāhmaṇo
samaṇaṃ gotamaṃ dassanāya upasaṅkamissatīti . athakho te brāhmaṇā
yena soṇadaṇḍo brāhmaṇo tenupasaṅkamiṃsu upasaṅkamitvā soṇadaṇḍaṃ
brāhmaṇaṃ etadavocuṃ saccaṃ kira bhavaṃ soṇadaṇḍo samaṇaṃ gotamaṃ
dassanāya upasaṅkamissatīti . evaṃ kho me bho hoti ahampi samaṇaṃ
gotamaṃ dassanāya upasaṅkamissāmīti . mā bhavaṃ soṇadaṇḍo
samaṇaṃ gotamaṃ dassanāya upasaṅkami na arahati bhavaṃ soṇadaṇḍo
samaṇaṃ gotamaṃ dassanāya upasaṅkamituṃ sace bhavaṃ soṇadaṇḍo samaṇaṃ
gotamaṃ dassanāya upasaṅkamissati bhoto soṇadaṇḍassa yaso hāyissati
samaṇassa gotamassa yaso abhivaḍḍhissati yampi bhoto soṇadaṇḍassa
yaso hāyissati samaṇassa gotamassa yaso abhivaḍḍhissati iminā
caṅgena na arahati bhavaṃ soṇadaṇḍo samaṇaṃ gotamaṃ dassanāya
upasaṅkamituṃ samaṇo tveva gotamo arahati bhavantaṃ soṇadaṇḍaṃ
Dassanāya upasaṅkamituṃ bhavaṃ hi soṇadaṇḍo ubhato sujāto mātito
ca pitito ca saṃsuddhagahaṇiko yāva sattamā pitāmahayugā akkhitto
anupakkuṭṭho jātivādena yampi bhavaṃ soṇadaṇḍo ubhato sujāto
mātito ca pitito ca saṃsuddhagahaṇiko yāva sattamā pitāmahayugā
akkhitto anupakkuṭṭho jātivādena iminā caṅgena na arahati bhavaṃ
soṇadaṇḍo samaṇaṃ gotamaṃ dassanāya upasaṅkamituṃ samaṇo tveva
gotamo arahati bhavantaṃ soṇadaṇḍaṃ dassanāya upasaṅkamituṃ bhavaṃ hi
soṇadaṇḍo aḍḍho mahaddhano mahābhogo .pe. bhavaṃ hi soṇadaṇḍo
ajjhāyako mantadharo tiṇṇaṃ vedānaṃ pāragū sanighaṇḍuketubhānaṃ
sākkharappabhedānaṃ itihāsapañcamānaṃ padako veyyākaraṇo
lokāyatamahāpurisalakkhaṇesu anavayo bhavaṃ hi soṇadaṇḍo abhirūpo
dassanīyo pāsādiko paramāya vaṇṇapokkharatāya samannāgato
brahmavaṇṇi brahmavacchasi 1- akkhuddāvakāso dassanāya bhavañhi
soṇadaṇḍo sīlavā vuḍḍhasīlī 2- vuḍḍhasīlena samannāgato bhavaṃ
hi soṇadaṇḍo kalyāṇavāco kalyāṇavākkaraṇo poriyā vācāya
samannāgato vissaṭṭhāya anelagalāya atthassa viññāpaniyā bhavaṃ
hi soṇadaṇḍo bahūnaṃ ācariyapācariyo tīṇi māṇavakasatāni mante
vāceti bahukā kho pana nānādisā nānājanapadā māṇavakā
āgacchanti bhoto soṇadaṇḍassa santike mantatthikā mante
@Footnote: 1 Sī. brahmavaṇṇī brahmavaḍḍhī. 2 Sī. vuddhasīlī.
Adhiyitukāmā bhavañhi soṇadaṇḍo jiṇṇo vuḍḍho mahallako
addhagato vayoanuppatto samaṇo gotamo taruṇo ceva taruṇapabbajito
ca bhavañhi soṇadaṇḍo rañño māgadhassa seniyassa bimbisārassa
sakkato garukato mānito pūjito apacito bhavañhi soṇadaṇḍo
brāhmaṇassa pokkharasātissa sakkato garukato mānito pūjito apacito
bhavañhi soṇadaṇḍo campaṃ ajjhāvasati sattussadaṃ satiṇakaṭṭhodakaṃ
sadhaññaṃ rājabhoggaṃ raññā māgadhena seniyena bimbisārena dinnaṃ
rājadāyaṃ brahmadeyyaṃ yampi bhavaṃ soṇadaṇḍo campaṃ ajjhāvasati
sattussadaṃ satiṇakaṭṭhodakaṃ sadhaññaṃ rājabhoggaṃ raññā māgadhena
seniyena bimbisārena dinnaṃ rājadāyaṃ brahmadeyyaṃ iminā caṅgena
na arahati bhavaṃ soṇadaṇḍo samaṇaṃ gotamaṃ dassanāya upasaṅkamituṃ
samaṇo tveva gotamo arahati bhavantaṃ soṇadaṇḍaṃ dassanāya
upasaṅkamitunti.
[182] Evaṃ vutte soṇadaṇḍo brāhmaṇo te brāhmaṇe
etadavoca tenahi bho mamapi suṇātha yathā mayameva arahāma taṃ
bhavantaṃ gotamaṃ dassanāya upasaṅkamituṃ na tveva arahati so bhavaṃ
gotamo amhākaṃ dassanāya upasaṅkamituṃ samaṇo khalu bho gotamo
ubhato sujāto mātito ca pitito ca saṃsuddhagahaṇiko yāva sattamā
pitāmahayugā akkhitto anupakkuṭṭho jātivādena yaṃpi bho samaṇo
gotamo ubhato sujāto mātito ca pitito ca saṃsuddhagahaṇiko yāva
Sattamā pitāmahayugā akkhitto anupakkuṭṭho jātivādena iminā
caṅgena na aharati so bhavaṃ gotamo amhākaṃ dassanāya upasaṅkamituṃ
athakho mayameva arahāma taṃ bhavantaṃ gotamaṃ dassanāya upasaṅkamituṃ
{182.1} samaṇo khalu bho gotamo mahantaṃ ñātisaṃghaṃ ohāya pabbajito
.pe. samaṇo khalu bho gotamo pahūtaṃ hiraññaṃ suvaṇṇaṃ ohāya pabbajito
bhūmigatañca vehāsaṭṭhañca samaṇo khalu bho gotamo daharo va samāno susū
kāḷakeso bhadrena yobbanena samannāgato paṭhamena vayasā agārasmā
anagāriyaṃ pabbajito samaṇo khalu bho gotamo akāmakānaṃ mātāpitūnaṃ
assumukhānaṃ rudantānaṃ kesamassuṃ ohāretvā kāsāyāni vatthāni
acchādetvā agārasmā anagāriyaṃ pabbajito samaṇo khalu bho gotamo
abhirūpo dassanīyo pāsādiko paramāya vaṇṇapokkharatāya samannāgato
brahmavaṇṇi brahmavacchasi akkhuddāvakāso dassanāya samaṇo khalu bho
gotamo sīlavā ariyasīlī kusalasīlī kusalasīlena samannāgato samaṇo khalu
bho gotamo kalyāṇavāco kalyāṇavākkaraṇo poriyā vācāya
samannāgato vissaṭṭhāya anelagalāya atthassa viññāpaniyā samaṇo
khalu bho gotamo bahūnaṃ ācariyapācariyo samaṇo khalu bho gotamo
khīṇakāmarāgo vigatacāpallo samaṇo khalu bho gotamo kammavādī
kiriyavādī apāpapurekkhāro brahmaññāya pajāya samaṇo khalu bho
gotamo uccākulā pabbajito abhinnakhattiyakulā samaṇo khalu bho gotamo
Aḍḍhā 1- kulā pabbajito mahaddhanā mahābhogā samaṇaṃ khalu bho
gotamaṃ tiroraṭṭhā tirojanapadā saṃpucchituṃ āgacchanti samaṇaṃ khalu
bho gotamaṃ anekāni devatāsahassāni pāṇehi saraṇaṅgatāni samaṇaṃ
khalu bho gotamaṃ evaṃkalyāṇo kittisaddo abbhuggato itipi so
bhagavā arahaṃ sammāsambuddho vijjācaraṇasampanno sugato lokavidū
anuttaro purisadammasārathi satthā devamanussānaṃ buddho bhagavāti
{182.2} samaṇo khalu bho gotamo dvattiṃsamahāpurisalakkhaṇehi
samannāgato samaṇo khalu bho gotamo ehisāgatavādī sakhilo 2- sammodako
abbhākuṭiko uttānamukho pubbabhāsī samaṇo khalu bho gotamo catunnaṃ
parisānaṃ sakkato garukato mānito pūjito apacito samaṇaṃ khalu bho gotamaṃ
bahū devā ca manussā ca abhippasannā samaṇo khalu bho gotamo yasmiṃ
gāme vā nigame vā paṭivasati na tasmiṃ gāme vā nigame vā amanussā
manusse viheṭhenti samaṇo khalu bho gotamo saṃghīgaṇīgaṇācariyo
puthutitthakarānaṃ aggamakkhāyati yathā kho pana bho etesaṃ
samaṇabrāhmaṇānaṃ yathā vā tathā vā yaso samudāgacchati na hevaṃ
samaṇassa gotamassa yaso samudāgato athakho anuttarāya
vijjācaraṇasampadāya samaṇassa gotamassa yaso samudāgato samaṇaṃ
khalu bho gotamaṃ rājā māgadho seniyo bimbisāro saputto sabhariyo
@Footnote: 1 addhātipi addhakulātipi aḍḍhakulātipi pāṭho. 2 Sī. ehisāhatavādī
@sukhilo.
Sapariso sāmacco pāṇehi saraṇaṅgato samaṇaṃ khalu bho gotamaṃ
rājā pasenadikosalo saputto sabhariyo sapariso sāmacco pāṇehi
saraṇaṅgato samaṇaṃ khalu bho gotamaṃ brāhmaṇo pokkharasāti saputto
sabhariyo sapariso sāmacco pāṇehi saraṇaṅgato samaṇo khalu bho
gotamo rañño māgadhassa seniyassa bimbisārassa sakkato garukato
mānito pūjito apacito samaṇo khalu bho gotamo rañño pasenadikosalassa
sakkato garukato mānito pūjito apacito samaṇo khalu bho gotamo
brāhmaṇassa pokkharasātissa sakkato garukato mānito
pūjito apacito samaṇo khalu bho gotamo campaṃ anuppatto campāyaṃ
viharati gaggarāya pokkharaṇiyā tīre ye kho pana bho keci samaṇā
vā brāhmaṇā vā amhākaṃ gāmakkhettaṃ āgacchanti atithino te
honti atithino panamhehi sakkātabbā garukātabbā mānetabbā
pūjetabbā apacetabbā yampi bho samaṇo gotamo campaṃ anuppatto
campāyaṃ viharati gaggarāya pokkharaṇiyā tīre atithismākaṃ samaṇo
gotamo atithi kho panamhehi sakkātabbo garukātabbo mānetabbo
pūjetabbo apacitabbo iminā caṅgena na arahati so bhavaṃ gotamo
amhākaṃ dassanāya upasaṅkamituṃ athakho mayameva arahāma taṃ bhavantaṃ
gotamaṃ dassanāya upasaṅkamituṃ ettake kho ahaṃ bhoto gotamassa
vaṇṇe pariyāpuṇāmi no ca kho so bhavaṃ gotamo ettakavaṇṇo
aparimāṇavaṇṇo hi so bhavaṃ gotamoti.
[183] Evaṃ vutte te brāhmaṇā soṇaḍaṇḍaṃ brāhmaṇaṃ
etadavocuṃ yathā kho bhavaṃ soṇadaṇḍo samaṇassa gotamassa vaṇṇe
bhāsati ito cepi so bhavaṃ gotamo yojanasate viharati alameva
saddhena kulaputtena dassanāya upasaṅkamituṃ api puṭosenāti 1-. Tenahi
bho sabbe va mayaṃ samaṇaṃ gotamaṃ dassanāya upasaṅkamissāmāti.
{183.1} Athakho soṇadaṇḍo brāhmaṇo mahatā brāhmaṇagaṇena
saddhiṃ yena gaggarā pokkharaṇī tenupasaṅkami . athakho soṇadaṇḍassa
brāhmaṇassa tirovanasaṇḍagatassa evaṃ cetaso parivitakko udapādi
ahañceva kho pana samaṇaṃ gotamaṃ pañhaṃ puccheyyaṃ tatra ce maṃ
samaṇo gotamo evaṃ vadeyya na kho esa brāhmaṇa pañho
evaṃ pucchitabbo evaṃ nāmesa brāhmaṇa pañho pucchitabboti
tena maṃ ayaṃ parisā paribhaveyya bālo soṇadaṇḍo brāhmaṇo
abyatto nāsakkhi samaṇaṃ gotamaṃ yoniso pañhaṃ pucchitunti yaṃ kho
panāyaṃ parisā paribhaveyya yasopi tassa hāyetha yassa kho pana yaso
hāyetha bhogāpi tassa hāyeyyuṃ yasoladdhā kho panamhākaṃ bhogā
mañceva pana samaṇo gotamo pañhaṃ puccheyya tassa cāhaṃ pañhassa
veyyākaraṇena cittaṃ na ārādheyyaṃ tatra ce maṃ samaṇo gotamo
evaṃ vadeyya na kho esa brāhmaṇa pañho evaṃ byākātabbo
evaṃ nāmesa brāhmaṇa pañho byākātabboti tena maṃ ayaṃ parisā
@Footnote: 1 Sī. puṭaṃsenāti.
Paribhaveyya bālo soṇadaṇḍo brāhmaṇo abyatto nāsakkhi
samaṇassa gotamassa pañhassa veyyākaraṇena cittaṃ ārādhetunti
yaṃ kho panāyaṃ parisā paribhaveyya yasopi tassa hāyetha yassa kho
pana yaso hāyetha bhogāpi tassa hāyeyyuṃ yasoladdhā kho panamhākaṃ
bhogā ahañceva kho pana evaṃ samīpagato samāno adisvā va
samaṇaṃ gotamaṃ nivatteyyaṃ tena maṃ ayaṃ parisā paribhaveyya bālo
soṇadaṇḍo brāhmaṇo abyatto mānathaddho bhīto no visahi
samaṇaṃ gotamaṃ dassanāya upasaṅkamituṃ kathañhi nāma evaṃ samīpagato
samāno adisvā samaṇaṃ gotamaṃ nivattissatīti yaṃ kho panāyaṃ parisā
paribhaveyya yasopi tassa hāyetha yassa kho pana yaso hāyetha bhogāpi
tassa hāyeyyuṃ yasoladdhā kho panamhākaṃ bhogāti.
[184] Athakho soṇadaṇḍo brāhmaṇo yena bhagavā tenupasaṅkami
upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ
vītisāretvā ekamantaṃ nisīdi . campeyyakāpi kho brāhmaṇagahapatikā
appekacce bhagavantaṃ abhivādetvā ekamantaṃ nisīdiṃsu appekacce
bhagavatā saddhiṃ sammodiṃsu sammodanīyaṃ kathaṃ sārāṇīyaṃ vītisāretvā
ekamantaṃ nisīdiṃsu appekacce yena bhagavā tenañjalimpaṇāmetvā
ekamantaṃ nisīdiṃsu appekacce nāmagottaṃ sāvetvā ekamantaṃ nisīdiṃsu
appekacce tuṇhībhūtā ekamantaṃ nisīdiṃsu . tatra sudaṃ soṇadaṇḍo
brāhmaṇo etadeva bahulamanuvitakkento nisinno hoti ahañceva
Kho pana samaṇaṃ gotamaṃ pañhaṃ puccheyyaṃ tatra ce maṃ samaṇo
gotamo evaṃ vadeyya na kho esa brāhmaṇa pañho evaṃ
pucchitabbo evaṃ nāmesa brāhmaṇa pañho pucchitabboti tena maṃ
ayaṃ parisā paribhaveyya bālo soṇadaṇḍo brāhmaṇo abyatto
nāsakkhi samaṇaṃ gotamaṃ yoniso pañhaṃ pucchitunti yaṃ kho panāyaṃ
parisā paribhaveyya yasopi tassa hāyetha yassa kho pana yaso
hāyetha bhogāpi tassa hāyeyyuṃ yasoladdhā kho panamhākaṃ bhogā
mañceva kho pana samaṇo gotamo pañhaṃ puccheyya tassa cāhaṃ
pañhassa veyyākaraṇena cittaṃ na ārādheyyaṃ tatra ce maṃ samaṇo
gotamo evaṃ vadeyya na kho esa brāhmaṇa pañho evaṃ
byākātabbo evaṃ nāmesa brāhmaṇa pañho byākātabboti
tena maṃ ayaṃ parisā paribhaveyya bālo soṇadaṇḍo brāhmaṇo
abyatto nāsakkhi samaṇassa gotamassa pañhassa veyyākaraṇena
cittaṃ ārādhetunti yaṃ kho panāyaṃ parisā paribhaveyya yasopi tassa
hāyetha yassa kho pana yaso hāyetha bhogāpi tassa hāyeyyuṃ
yasoladdhā kho panamhākaṃ bhogā aho vata maṃ samaṇo gotamo
sake ācariyake tevijjake maṃ pañhaṃ puccheyya addhā va tassāhaṃ
cittaṃ ārādheyya pañhassa veyyākaraṇenāti.
[185] Athakho bhagavato soṇadaṇḍassa brāhmaṇassa cetasā
cetoparivitakkamaññāya etadahosi vihaññati kho ayaṃ soṇadaṇḍo
Brāhmaṇo sakena cittena yananūnāhaṃ soṇadaṇḍaṃ brāhmaṇaṃ sake
ācariyake tevijjake pañhaṃ puccheyyanti . athakho bhagavā soṇadaṇḍaṃ
brāhmaṇaṃ etadavoca katīhi pana brāhmaṇa aṅgehi samannāgataṃ
brāhmaṇā brāhmaṇaṃ paññapenti brāhmaṇosmīti ca vadamāno
sammā vadeyya na ca pana musāvādaṃ āpajjeyyāti . athakho
soṇadaṇḍassa brāhmaṇassa etadahosi yaṃ vata no ahosi icchitaṃ
yaṃ ākaṅkhitaṃ yaṃ adhippetaṃ yaṃ abhipatthitaṃ aho vata maṃ samaṇo
gotamo sake ācariyake tevijjake pañhaṃ puccheyya addhā va
tassāhaṃ cittaṃ ārādheyyaṃ pañhassa veyyākaraṇena tatra ce maṃ
samaṇo gotamo sake ācariyake tevijjake pañhaṃ pucchati addhā
va tassāhaṃ cittaṃ ārādhessāmi pañhassa veyyākaraṇenāti.
[186] Athakho soṇadaṇḍo brāhmaṇo abbhunnāmetvā kāyaṃ
anuviloketvā parisaṃ bhagavantaṃ etadavoca pañcahi bho gotama aṅgehi
samannāgataṃ brāhmaṇā brāhmaṇaṃ paññapenti brāhmaṇosmīti ca
vadamāno sammā vadeyya na ca pana musāvādaṃ āpajjeyya katamehi
pañcahi idha bho gotama brāhmaṇo ubhato sujāto hoti mātito
ca pitito ca saṃsuddhagahaṇiko yāva sattamā pitāmahayugā akkhitto
anupakkuṭṭho jātivādena ajjhāyako ca hoti mantadharo tiṇṇaṃ
vedānaṃ pāragū sanighaṇḍuketubhānaṃ sākkharappabhedānaṃ itihāsapañcamānaṃ
padako veyyākaraṇo lokāyatamahāpurisalakkhaṇesu anavayo abhirūpo
Ca hoti dassanīyo pāsādiko paramāya vaṇṇapokkharatāya samannāgato
brahmavaṇṇi brahmavacchasi akkhuddāvakāso dassanāya sīlavā ca
hoti vuḍḍhasīlī vuḍḍhasīlena samannāgato paṇḍito ca hoti medhāvī
paṭhamo vā dutiyo vā pūjaṃ paggaṇhantānaṃ imehi kho bho gotama
pañcahi aṅgehi samannāgataṃ brāhmaṇā brāhmaṇaṃ paññapenti
brāhmaṇosmīti ca vadamāno sammā vadeyya na ca pana musāvādaṃ
āpajjeyyāti.
[187] Imesaṃ pana brāhmaṇa pañcannaṃ aṅgānaṃ sakkā ekaṃ
aṅgaṃ ṭhapayitvā catūhi aṅgehi samannāgataṃ brāhmaṇaṃ paññapetuṃ
brāhmaṇosmīti ca vadamāno sammā vadeyya na ca pana musāvādaṃ
āpajjeyyāti . sakkā bho gotama imesaṃ hi bho gotama pañcannaṃ
aṅgānaṃ vaṇṇaṃ ṭhapayāma kiṃ hi vaṇṇo karissati yato kho bho gotama
brāhmaṇo ubhato sujāto hoti mātito ca pitito ca saṃsuddhagahaṇiko
yāva sattamā pitāmahayugā akkhitto anupakkuṭṭho jātivādena
ajjhāyako ca hoti mantadharo tiṇṇaṃ vedānaṃ pāragū sanighaṇḍuketubhānaṃ
sākkharappabhedānaṃ itihāsapañcamānaṃ padako veyyākaraṇo
lokāyatamahāpurisalakkhaṇesu anavayo sīlavā ca hoti vuḍḍhasīlī
vuḍḍhasīlena samannāgato paṇḍito ca hoti medhāvī paṭhamo vā
dutiyo vā pūjaṃ paggaṇhantānaṃ imehi kho bho gotama catūhi aṅgehi
samannāgataṃ brāhmaṇā brāhmaṇaṃ paññapenti brāhmaṇosmīti ca
Vadamāno sammā vadeyya na ca pana musāvādaṃ āpajjeyyāti.
[188] Imesaṃ pana brāhmaṇa catunnaṃ aṅgānaṃ sakkā ekaṃ
aṅgaṃ ṭhapayitvā tīhi aṅgehi samannāgataṃ brāhmaṇaṃ paññapetuṃ
brāhmaṇosmīti ca vadamāno sammā vadeyya na ca pana musāvādaṃ
āpajjeyyāti . sakkā bho gotama imesaṃ hi bho gotama catunnaṃ
aṅgānaṃ mante ṭhapayāma kiṃ hi mantā karissanti yato kho bho
gotama brāhmaṇo ubhato sujāto hoti mātito ca pitito ca
saṃsuddhagahaṇiko yāva sattamā pitāmahayugā akkhitto anupakkuṭṭho
jātivādena sīlavā ca hoti vuḍḍhasīlī vuḍḍhasīlena samannāgato
paṇḍito ca hoti medhāvī paṭhamo vā dutiyo vā pūjaṃ paggaṇhantānaṃ
imehi kho bho gotama tīhi aṅgehi samannāgataṃ brāhmaṇā
brāhmaṇaṃ paññapenti brāhmaṇosmīti ca vadamāno sammā vadeyya
na ca pana musāvādaṃ āpajjeyyāti.
[189] Imesaṃ pana brāhmaṇa tiṇṇaṃ aṅgānaṃ sakkā ekaṃ
aṅgaṃ ṭhapayitvā dvīhi aṅgehi samannāgataṃ brāhmaṇaṃ paññapetuṃ
brāhmaṇosmīti ca vadamāno sammā vadeyya na ca pana musāvādaṃ
āpajjeyyāti . sakkā bho gotama imesaṃ hi bho gotama tiṇṇaṃ
aṅgānaṃ jātiṃ ṭhapayāma kiṃ hi jāti karissati yato kho bho gotama
brāhmaṇo sīlavā ca hoti vuḍḍhasīlī vuḍḍhasīlena samannāgato
paṇḍito ca hoti medhāvī paṭhamo vā dutiyo vā pūjaṃ paggaṇhantānaṃ
Imehi kho bho gotama dvīhi aṅgehi samannāgataṃ brāhmaṇā
brāhmaṇaṃ paññapenti brāhmaṇosmīti ca vadamāno sammā vadeyya
na ca pana musāvādaṃ āpajjeyyāti.
[190] Evaṃ vutte te brāhmaṇā soṇadaṇḍaṃ brāhmaṇaṃ
etadavocuṃ mā bhavaṃ soṇadaṇḍo evaṃ avaca mā bhavaṃ soṇadaṇḍo
evaṃ avaca apavadati bhavaṃ soṇadaṇḍo vaṇṇaṃ apavadati mante
apavadati jātiṃ ekaṃsena bhavaṃ soṇadaṇḍo samaṇassayeva gotamassa
vādaṃ anupakkhandatīti.
{190.1} Athakho bhagavā te brāhmaṇe etadavoca sace
kho tumhākaṃ brāhmaṇānaṃ evaṃ hoti appassuto ca soṇadaṇḍo
brāhmaṇo akalyāṇavākkaraṇo ca soṇadaṇḍo brāhmaṇo
duppañño ca soṇadaṇḍo brāhmaṇo na ca pahoti soṇadaṇḍo
brāhmaṇo samaṇena gotamena saddhiṃ asmiṃ vacane patimantetunti
tiṭṭhatu soṇadaṇḍo brāhmaṇo tumhe mayā saddhiṃ mantavho sace
pana tumhākaṃ brāhmaṇānaṃ evaṃ hoti bahussuto ca soṇadaṇḍo
brāhmaṇo kalyāṇavākkaraṇo ca soṇadaṇḍo brāhmaṇo paṇḍito
ca soṇadaṇḍo brāhmaṇo pahoti ca soṇadaṇḍo brāhmaṇo
samaṇena gotamena saddhiṃ asmiṃ vacane patimantetunti tiṭṭhatha tumhe
soṇadaṇḍo brāhmaṇo mayā saddhiṃ patimantetūti.
[191] Evaṃ vutte soṇadaṇḍo brāhmaṇo bhagavantaṃ etadavoca
tiṭṭhatu bhavaṃ gotamo tuṇhī bhavaṃ gotamo hotu ahameva tesaṃ
Sahadhammena paṭivacanaṃ karissāmīti . athakho soṇadaṇḍo te brāhmaṇe
etadavoca mā bhavanto evaṃ avacuttha mā bhavanto evaṃ avacuttha
apavadati bhavaṃ soṇadaṇḍo brāhmaṇo vaṇṇaṃ apavadati mante
apavadati jātiṃ ekaṃsena bhavaṃ soṇadaṇḍo brāhmaṇo samaṇasseva
gotamassa vādaṃ anupakkhandatīti nāhaṃ bho apavadāmi vaṇṇaṃ vā
mante vā jātiṃ vāti.
[192] Tena kho pana samayena soṇadaṇḍassa brāhmaṇassa
bhāgineyyo aṅgako nāma māṇavako tassaṃ parisāyaṃ nisinno
hoti . athakho soṇadaṇḍo brāhmaṇo te brāhmaṇe etadavoca
passanti no bhonto imaṃ aṅgakaṃ māṇavakaṃ amhākaṃ bhāgineyyanti .
Evaṃ bho aṅgako kho bho māṇavako abhirūpo dassanīyo pāsādiko
paramāya vaṇṇapokkharatāya samannāgato brahmavaṇṇi brahmavacchasi
akkhuddāvakāso dassanāya nāssa imissaṃ parisāyaṃ samasamo atthi
vaṇṇena ṭhapetvā samaṇaṃ gotamaṃ . aṅgako kho māṇavako ajjhāyako
mantadharo tiṇṇaṃ vedānaṃ pāragū sanighaṇḍuketubhānaṃ sākkharappabhedānaṃ
itihāsapañcamānaṃ padako veyyākaraṇo lokāyatamahāpurisalakkhaṇesu
anavayo ahamassa mante vācetā aṅgako kho māṇavako ubhato sujāto
mātito ca pitito ca saṃsuddhagahaṇiko yāva sattamā pitāmahayugā
akkhitto anupakkuṭṭho jātivādena ahamassa mātāpitaro
jānāmi aṅgako kho māṇavako pāṇaṃpi haneyya adinnaṃpi
Ādiyeyya paradāraṃpi gaccheyya musāpi bhāseyya majjaṃpi piveyya
etthadāni kiṃ vaṇṇo karissati kiṃ mantā kiṃ jāti yato kho bho
brāhmaṇo sīlavā ca hoti vuḍḍhasīlī vuḍḍhasīlena samannāgato
paṇḍito ca hoti medhāvī paṭhamo vā dutiyo vā pūjaṃ paggaṇhantānaṃ
imehi kho bho dvīhi aṅgehi samannāgataṃ brāhmaṇā brāhmaṇaṃ
paññapenti brāhmaṇosmīti ca vadamāno sammā vadeyya na ca
pana musāvādaṃ āpajjeyyāti.
[193] Imesaṃ pana brāhmaṇa dvinnaṃ aṅgānaṃ sakkā ekaṃ
aṅgaṃ ṭhapayitvā ekena aṅgena samannāgataṃ brāhmaṇaṃ paññapetuṃ
brāhmaṇosmīti ca vadamāno sammā vadeyya na ca pana musāvādaṃ
āpajjeyyāti . no hidaṃ bho gotama sīlaparidhotā hi bho gotama
paññā paññāparidhotaṃ sīlaṃ yattha sīlaṃ tattha paññā yattha paññā
tattha sīlaṃ sīlavato paññā paññavato sīlaṃ sīlapaññānañca pana
lokasmiṃ aggamakkhāyati seyyathāpi bho gotama hatthena vā hatthaṃ
dhoveyya pādena vā pādaṃ dhoveyya evameva kho bho gotama
sīlaparidhotā paññā paññāparidhotaṃ sīlaṃ yattha sīlaṃ tattha paññā
yattha paññā tattha sīlaṃ sīlavato paññā paññavato sīlaṃ
sīlapaññānañca pana lokasmiṃ aggamakkhāyatīti.
[194] Evametaṃ brāhmaṇa evametaṃ brāhmaṇa sīlaparidhotā
hi brāhmaṇa paññā paññāparidhotaṃ sīlaṃ yattha sīlaṃ tattha
Paññā yattha paññā tattha sīlaṃ sīlavato paññā paññavato
sīlaṃ sīlapaññānañca pana lokasmiṃ aggamakkhāyati seyyathāpi
brāhmaṇa hatthena vā hatthaṃ dhoveyya pādena vā pādaṃ dhoveyya
evameva kho brāhmaṇa sīlaparidhotā paññā paññāparidhotaṃ sīlaṃ
yattha sīlaṃ tattha paññā yattha paññā tattha sīlaṃ sīlavato paññā
paññavato sīlaṃ sīlapaññānañca pana lokasmiṃ aggamakkhāyatīti
katamaṃ pana taṃ brāhmaṇa sīlaṃ katamā pana sā paññāti .
Ettakaparamā ca mayaṃ bho gotama kismiṃ atthe sādhu vata bhavantaṃyeva
gotamaṃ paṭibhātu etassa bhāsitassa atthoti.
[195] Tenahi brāhmaṇa suṇāhi sādhukaṃ manasikarohi bhāsissāmīti.
Evaṃ bhoti kho soṇadaṇḍo brāhmaṇo bhagavato paccassosi . bhagavā
etadavoca idha brāhmaṇa tathāgato loke uppajjati arahaṃ
sammāsambuddho .pe. (yathā sāmaññaphale evaṃ vitthāretabbaṃ)
.pe. evaṃ kho pana brāhmaṇa bhikkhu sīlasampanno hoti . idaṃpi
kho taṃ brāhmaṇa sīlaṃ . paṭhamaṃ jhānaṃ upasampajja viharati . dutiyaṃ
jhānaṃ . tatiyaṃ jhānaṃ . catutthaṃ jhānaṃ upasampajja viharati .pe.
Ñāṇadassanāya cittaṃ abhinīharati abhininnāmeti .pe. idampissa
hoti paññāya .pe. nāparaṃ itthattāyāti pajānāti . idampissa
hoti paññāya. Ayaṃ kho sā brāhmaṇa paññāti.
[196] Evaṃ vutte soṇadaṇḍo brāhmaṇo bhagavantaṃ etadavoca
Abhikkantaṃ bho gotama abhikkantaṃ bho gotama seyyathāpi bho gotama
nikkujjitaṃ vā ukkujjeyya paṭicchannaṃ vā vivareyya mūḷhassa vā
maggaṃ ācikkheyya andhakāre vā telapajjotaṃ dhāreyya cakkhumanto
rūpāni dakkhantīti evameva bhotā gotamena anekapariyāyena dhammo
pakāsito esāhaṃ bhavantaṃ gotamaṃ saraṇaṃ gacchāmi dhammañca bhikkhusaṃghañca
upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṅgataṃ
adhivāsetu ca me bhavaṃ gotamo svātanāya bhattaṃ saddhiṃ bhikkhusaṃghenāti.
Adhivāsesi bhagavā tuṇhībhāvena . athakho soṇadaṇḍo brāhmaṇo
bhagavato adhivāsanaṃ viditvā uṭṭhāyāsanā bhagavantaṃ abhivādetvā
padakkhiṇaṃ katvā pakkāmi.
[197] Athakho soṇadaṇḍo brāhmaṇo tassā rattiyā accayena
sake nivesane paṇītaṃ khādanīyaṃ bhojanīyaṃ paṭiyādāpetvā bhagavato
kālaṃ ārocāpesi kālo bho gotama niṭṭhitaṃ bhattanti . athakho
bhagavā pubbaṇhasamayaṃ nivāsetvā pattacīvaramādāya saddhiṃ bhikkhusaṃghena
yena soṇadaṇḍassa brāhmaṇassa nivesanaṃ tenupasaṅkami upasaṅkamitvā
paññatte āsane nisīdi . athakho soṇadaṇḍo brāhmaṇo
buddhappamukhaṃ bhikkhusaṃghaṃ paṇītena khādanīyena bhojanīyena sahatthā
santappesi sampavāresi.
[198] Athakho soṇadaṇḍo brāhmaṇo bhagavantaṃ bhuttāviṃ
onītapattapāṇiṃ aññataraṃ nīcaṃ āsanaṃ gahetvā ekamantaṃ nisīdi.
{198.1} Ekamantaṃ nisinno kho soṇadaṇḍo brāhmaṇo
bhagavantaṃ etadavoca ahañceva kho pana bho gotama parisagato samāno
āsanā vuṭṭhahitvā bhavantaṃ gotamaṃ abhivādeyyaṃ tena maṃ sā parisā
paribhaveyya yaṃ kho pana sā parisā paribhaveyya yasopi tassa hāyetha yassa
kho pana yaso hāyetha bhogāpi tassa hāyeyyuṃ yasoladdhā kho panamhākaṃ
bhogā ahañceva kho pana ko gotama parisagato samāno añjaliṃ
paggaṇheyyaṃ āsanā me taṃ bhavaṃ gotamo paccuṭṭhānaṃ dhāretu ahañceva
kho pana bho gotama parisagato samāno veṭṭhanaṃ omuñceyyaṃ sirasā me
taṃ bhavaṃ gotamo abhivādanaṃ dhāretu ahañceva kho pana bho gotama yānagato
samāno yānā paccorohitvā bhavantaṃ gotamaṃ abhivādeyyaṃ tena maṃ
sā parisā paribhaveyya yaṃ kho pana sā parisā paribhaveyya yasopi tassa
hāyetha yassa kho pana yaso hāyetha bhogāpi tassa hāyeyyuṃ yasoladdhā
kho panamhākaṃ bhogā ahañceva kho pana bho gotama yānagato samāno
patodalaṭṭhiṃ abbhunnameyyaṃ yānā me taṃ bhavaṃ gotamo paccorohanaṃ
dhāretu ahañceva kho pana bho gotama yānagato samāno chattaṃ
apanāmeyyaṃ sirasā me taṃ bhavaṃ gotamo abhivādanaṃ dhāretūti .
Athakho bhagavā soṇadaṇḍaṃ brāhmaṇaṃ dhammiyā kathāya sandassetvā
samādapetvā samuttejetvā sampahaṃsetvā uṭṭhāyāsanā pakkāmīti.
Soṇadaṇḍasuttaṃ catutthaṃ niṭṭhitaṃ.
-------------
Kūṭadantasuttaṃ pañcamaṃ
[199] Evamme sutaṃ. Ekaṃ samayaṃ bhagavā magadhesu cārikañcaramāno
mahatā bhikkhusaṃghena saddhiṃ pañcamattehi bhikkhusatehi yena khānumattaṃ
nāma magadhānaṃ brāhmaṇagāmo tadavasari . tatra sudaṃ bhagavā khānumatte
viharati ambalaṭṭhikāyaṃ . tena kho pana samayena kūṭadanto brāhmaṇo
khānumattaṃ ajjhāvasati sattussadaṃ satiṇakaṭṭhodakaṃ sadhaññaṃ rājabhoggaṃ
raññā māgadhena seniyena bimbisārena dinnaṃ rājadāyaṃ brahmadeyyaṃ.
[200] Tena kho pana samayena kūṭadantassa brāhmaṇassa
mahāyañño upakkhaṭo hoti . satta ca usabhasatāni satta ca
vacchatarasatāni satta ca vacchatarisatāni satta ca ajasatāni satta
ca urabbhasatāni thūnūpanītāni honti yaññatthāya . assosuṃ kho
khānumattakā brāhmaṇagahapatikā samaṇo khalu bho gotamo sakyaputto
sakyakulā pabbajito magadhesu cārikañcaramāno mahatā bhikkhusaṃghena
saddhiṃ pañcamattehi bhikkhusatehi khānumattaṃ anuppatto khānumatte
viharati ambalaṭṭhikāyaṃ
{200.1} taṃ kho pana bhavantaṃ gotamaṃ evaṃkalyāṇo kittisaddo
abbhuggato
{200.2} itipi so bhagavā arahaṃ sammāsambuddho vijjācaraṇa-
sampanno sugato lokavidū anuttaro purisadammasārathi satthā
devamanussānaṃ buddho bhagavāti so imaṃ lokaṃ sadevakaṃ
Samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ
sayaṃ abhiññā sacchikatvā pavedeti so dhammaṃ deseti ādikalyāṇaṃ
majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ
parisuddhaṃ brahmacariyaṃ pakāseti sādhu kho pana tathārūpānaṃ arahataṃ dassanaṃ
hotīti . athakho khānumattakā brāhmaṇagahapatikā khānumattā
nikkhamitvā saṃghāsaṃghīgaṇībhūtā yena ambalaṭṭhikā tenupasaṅkamanti.
[201] Tena kho pana samayena kūṭadanto brāhmaṇo uparipāsāde
divāseyyaṃ upagato hoti . addasā kho so kūṭadanto brāhmaṇo
khānumatte brāhmaṇagahapatike khānumattā nikkhamitvā saṃghāsaṃghīgaṇībhūte
yena ambalaṭṭhikā tenupasaṅkamante disvā khattaṃ āmantesi
kinnu kho bho khatte khānumattakā brāhmaṇagahapatikā khānumattā
nikkhamitvā saṃghāsaṃghīgaṇībhūtā yena ambalaṭṭhikā tenupasaṅkamantīti.
{201.1} Atthi kho bho samaṇo gotamo sakyaputto sakyakulā pabbajito
magadhesu cārikañcaramāno mahatā bhikkhusaṃghena saddhiṃ pañcamattehi
bhikkhusatehi khānumattaṃ anuppatto khānumatte viharati ambalaṭṭhikāyaṃ
{201.2} taṃ kho pana bhavantaṃ gotamaṃ evaṃkalyāṇo kittisaddo abbhuggato
itipi so bhagavā arahaṃ sammāsambuddho vijjācaraṇasampanno sugato
lokavidū anuttaro purisadammasārathi satthā devamanussānaṃ buddho bhagavāti
{201.3} tamete bhavantaṃ bho gotamaṃ dassanāya upasaṅkamantīti.
Athakho kūṭadantassa brāhmaṇassa etadahosi sutaṃ kho pana metaṃ
Samaṇo gotamo tividhaṃ yaññasampadaṃ soḷasaparikkhāraṃ jānātīti na
kho panāhaṃ jānāmi tividhaṃ yaññasampadaṃ soḷasaparikkhāraṃ icchāmi
cāhaṃ mahāyaññaṃ yajituṃ yannūnāhaṃ samaṇaṃ gotamaṃ upasaṅkamitvā
tividhaṃ yaññasampadaṃ soḷasaparikkhāraṃ puccheyyanti.
{201.4} Athakho kūṭadanto brāhmaṇo khattaṃ āmantesi tenahi
bho khatte yena khānumattakā brāhmaṇagahapatikā tenupasaṅkama
upasaṅkamitvā khānumattake brāhmaṇagahapatike evaṃ vadehi kūṭadanto
bho brāhmaṇo evamāha āgamentu kira bhavanto kūṭadantopi brāhmaṇo
samaṇaṃ gotamaṃ dassanāya upasaṅkamissatīti . evaṃ bhoti kho so khattā
kūṭadantassa brāhmaṇassa paṭissutvā yena khānumattakā brāhmaṇagahapatikā
tenupasaṅkami upasaṅkamitvā khānumattake brāhmaṇagahapatike etadavoca
kūṭadanto bho brāhmaṇo evamāha āgamentu kira bhavanto kūṭadantopi
brāhmaṇo samaṇaṃ gotamaṃ dassanāya upasaṅkamissatīti.
[202] Tena kho pana samayena anekāni brāhmaṇasatāni khānumatte
paṭivasanti kūṭadantassa brāhmaṇassa mahāyaññaṃ anubhavissāmāti .
Assosuṃ kho te brāhmaṇā kūṭadanto kira brāhmaṇo samaṇaṃ gotamaṃ
dassanāya upasaṅkamissatīti . athakho te brāhmaṇā yena
kūṭadanto brāhmaṇo tenupasaṅkamiṃsu upasaṅkamitvā kūṭadantaṃ
brāhmaṇaṃ etadavocuṃ saccaṃ kira bhavaṃ kūṭadanto samaṇaṃ gotamaṃ dassanāya
upasaṅkamissatīti . evaṃ kho me bho hoti ahaṃpi samaṇaṃ gotamaṃ
Dassanāya upasaṅkamissāmīti.
{202.1} Mā bhavaṃ kūṭadanto samaṇaṃ gotamaṃ dassanāya upasaṅkama na
arahati bhavaṃ kūṭadanto samaṇaṃ gotamaṃ dassanāya upasaṅkamituṃ sace bhavaṃ
kūṭadanto samaṇaṃ gotamaṃ dassanāya upasaṅkamissati bhoto kūṭadantassa
yaso hāyissati samaṇassa gotamassa yaso abhivaḍḍhissati yampi bhoto
kūṭadantassa yaso hāyissati samaṇassa gotamassa yaso abhivaḍḍhissati
iminā caṅgena na arahati bhavaṃ kūṭadanto samaṇaṃ gotamaṃ dassanāya
upasaṅkamituṃ samaṇo tveva gotamo arahati bhavantaṃ kūṭadantaṃ dassanāya
upasaṅkamituṃ
{202.2} bhavaṃ hi kūṭadanto ubhato sujāto mātito ca pitito ca
saṃsuddhagahaṇiko yāva sattamā pitāmahayugā akkhitto anupakkuṭṭho
jātivādena yaṃpi bhavaṃ kūṭadanto ubhato sujāto mātito ca pitito ca
saṃsuddhagahaṇiko yāva sattamā pitāmahayugā akkhitto anupakkuṭṭho
jātivādena iminā caṅgena na arahati bhavaṃ kūṭadanto samaṇaṃ gotamaṃ
dassanāya upasaṅkamituṃ samaṇo tveva gotamo arahati bhavantaṃ kūṭadantaṃ
dassanāya upasaṅkamituṃ
{202.3} bhavaṃ hi kūṭadanto aḍḍho mahaddhano mahābhogo
pahūtavittūpakaraṇo pahūtajātarūparajato bhavañhi kūṭadanto ajjhāyako
mantadharo tiṇṇaṃ vedānaṃ pāragū sanighaṇḍuketubhānaṃ sākkharappabhedānaṃ
itihāsapañcamānaṃ padako veyyākaraṇo lokāyatamahāpurisalakkhaṇesu
anavayo bhavañhi kūṭadanto abhirūpo dassanīyo pāsādiko paramāya
vaṇṇapokkharatāya samannāgato brahmavaṇṇi brahmavacchasi akkhuddāvakāso
Dassanāya bhavañhi kūṭadanto sīlavā vuḍḍhasīlī vuḍḍhasīlena
samannāgato bhavañhi kūṭadanto kalyāṇavāco kalyāṇavākkaraṇo
poriyā vācāya samannāgato vissaṭṭhāya anelagalāya atthassa
viññāpaniyā bhavañhi kūṭadanto bahūnaṃ ācariyapācariyo tīṇi
māṇavakasatāni mante vācesi bahū kho pana nānādisā nānājanapadā
māṇavakā āgacchanti bhoto kūṭadantassa santike mantatthikā mante
adhiyitukāmā bhavañhi kūṭadanto jiṇṇo vuḍḍho mahallako addhagato
vayoanuppatto samaṇo gotamo taruṇo ceva taruṇapabbajito ca
bhavañhi kūṭadanto rañño māgadhassa seniyassa bimbisārassa sakkato
garukato mānito pūjito apacito bhavañhi kūṭadanto brāhmaṇassa
pokkharasātissa sakkato garukato mānito pūjito apacito
{202.4} bhavañhi kūṭadanto khānumattaṃ ajjhāvasati sattussadaṃ
satiṇakaṭṭhodakaṃ sadhaññaṃ rājabhoggaṃ raññā māgadhena seniyena
bimbisārena dinnaṃ rājadāyaṃ brahmadeyyaṃ yampi bhavaṃ kūṭadanto
khānumattaṃ ajjhāvasati sattussadaṃ satiṇakaṭṭhodakaṃ sadhaññaṃ rājabhoggaṃ
raññā māgadhena seniyena bimbisārena dinnaṃ rājadāyaṃ brahmadeyyaṃ
iminā caṅgena na arahati bhavaṃ kūṭadanto samaṇaṃ gotamaṃ dassanāya
upasaṅkamituṃ samaṇo tveva gotamo arahati bhavantaṃ kūṭadantaṃ dassanāya
upasaṅkamitunti.
[203] Evaṃ vutte kūṭadanto brāhmaṇo te brāhmaṇe
etadavoca tenahi bho mamapi suṇātha yathā mayameva arahāma taṃ
Bhavantaṃ gotamaṃ dassanāya upasaṅkamituṃ na tveva arahati so bhavaṃ
gotamo amhākaṃ dassanāya upasaṅkamituṃ
{203.1} samaṇo khalu bho gotamo ubhato sujāto mātito ca
pitito ca saṃsuddhagahaṇiko yāva sattamā pitāmahayugā akkhitto
anupakkuṭṭho jātivādena yampi bho samaṇo gotamo ubhato sujāto
mātito ca pitito ca saṃsuddhagahaṇiko yāva sattamā pitāmahayugā
akkhitto anupakkuṭṭho jātivādena iminā caṅgena na arahati so
bhavaṃ gotamo amhākaṃ dassanāya upasaṅkamituṃ athakho mayameva arahāma
taṃ bhavantaṃ gotamaṃ dassanāya upasaṅkamituṃ samaṇo khalu bho gotamo mahantaṃ
ñātisaṃghaṃ ohāya pabbajito
{203.2} samaṇo khalu bho gotamo pahūtaṃ hiraññasuvaṇṇaṃ ohāya
pabbajito bhūmigatañca vehāsaṭṭhañca samaṇo khalu bho gotamo daharo va
samāno susū kāḷakeso bhadrena yobbanena samannāgato paṭhamena
vayasā agārasmā anagāriyaṃ pabbajito samaṇo khalu bho gotamo
akāmakānaṃ mātāpitūnaṃ assumukhānaṃ rudantānaṃ kesamassuṃ ohāretvā
kāsāyāni vatthāni acchādetvā agārasmā anagāriyaṃ pabbajito
{203.3} samaṇo khalu bho gotamo abhirūpo dassanīyo pāsādiko
paramāya vaṇṇapokkharatāya samannāgato brahmavaṇṇi brahmavacchasi
akkhuddāvakāso dassanāya samaṇo khalu bho gotamo sīlavā
ariyasīlī kusalasīlī kusalasīlena samannāgato samaṇo khalu bho gotamo
kalyāṇavāco kalyāṇavākkaraṇo poriyā vācāya samannāgato
Vissaṭṭhāya anelagalāya atthassa viññāpaniyā samaṇo khalu bho
gotamo bahūnaṃ ācariyapācariyo samaṇo khalu bho gotamo khīṇakāmarāgo
vigatacāpallo
{203.4} samaṇo khalu bho gotamo kammavādī kiriyavādī
apāpapurekkhāro brahmamaññāya pajāya samaṇo khalu bho gotamo
uccākulā pabbajito abhinnakhattiyakulā samaṇo khalu bho gotamo
aḍḍhakulā pabbajito mahaddhanā mahābhogā samaṇaṃ khalu bho gotamaṃ
tiroraṭṭhā tirojanapadā saṃpucchituṃ āgacchanti samaṇaṃ khalu bho gotamaṃ
anekāni devatāsahassāni pāṇehi saraṇaṅgatāni samaṇaṃ khalu bho
gotamaṃ evaṃkalyāṇo kittisaddo abbhuggato
{203.5} itipi so bhagavā arahaṃ sammāsambuddho vijjācaraṇasampanno
sugato lokavidū anuttaro purisadammasārathi satthā devamanussānaṃ buddho
bhagavāti
{203.6} samaṇo khalu bho gotamo dvattiṃsamahāpurisalakkhaṇehi
samannāgato samaṇo khalu bho gotamo ehisāgatavādī sakhilo sammodako
abbhākuṭiko uttānamukho pubbabhāsī samaṇo khalu bho gotamo catunnaṃ
parisānaṃ sakkato garukato mānito pūjito apacito samaṇaṃ khalu bho gotamaṃ
bahū devā ca manussā ca abhippasannā samaṇo khalu bho gotamo yasmiṃ
gāme vā nigame vā paṭivasati na tasmiṃ gāme vā nigame vā amanussā
manusse viheṭhenti samaṇo khalu bho gotamo saṃghīgaṇīgaṇācariyo
puthutitthakarānaṃ aggamakkhāyati yathā kho pana bho etesaṃ
samaṇabrāhmaṇānaṃ yathā vā tathā vā yaso samudāgacchati
Na hevaṃ samaṇassa gotamassa yaso samudāgato athakho anuttarāya
vijjācaraṇasampadāya samaṇassa gotamassa yaso samudāgato samaṇaṃ
khalu bho gotamaṃ rājā māgadho seniyo bimbisāro saputto
sabhariyo sapariso sāmacco pāṇehi saraṇaṅgato samaṇaṃ khalu bho
gotamaṃ rājā pasenadikosalo saputto sabhariyo sapariso sāmacco
pāṇehi saraṇaṅgato samaṇaṃ khalu bho gotamaṃ brāhmaṇo pokkharasāti
saputto sabhariyo sapariso sāmacco pāṇehi saraṇaṅgato
{203.7} samaṇo khalu bho gotamo rañño māgadhassa seniyassa
bimbisārassa sakkato garukato mānito pūjito apacito samaṇo khalu
bho gotamo rañño pasenadikosalassa sakkato garukato mānito pūjito
apacito samaṇo khalu bho gotamo brāhmaṇassa pokkharasātissa
sakkato garukato mānito pūjito apacito samaṇo khalu bho gotamo
khānumattaṃ anuppatto khānumatte viharati ambalaṭṭhikāyaṃ ye kho
pana keci samaṇā vā brāhmaṇā vā amhākaṃ gāmakkhettaṃ āgacchanti
atithino te honti atithī kho pana amhehi sakkātabbā garukātabbā
mānetabbā pūjetabbā apacetabbā ayaṃ kho samaṇo gotamo
khānumattaṃ anuppatto khānumatte viharati ambalaṭṭhikāyaṃ atithi amhākaṃ
samaṇo gotamo atithi kho panamhehi sakkātabbo garukātabbo
mānetabbo pūjetabbo apacetabbo iminā caṅgena na arahati so
bhavaṃ samaṇo gotamo amhākaṃ dassanāya upasaṅkamituṃ athakho mayameva
Arahāma taṃ bhavantaṃ gotamaṃ dassanāya upasaṅkamituṃ ettake kho
ahaṃ bhoto gotamassa vaṇṇe pariyāpuṇāmi no ca kho so bhavaṃ
gotamo ettakavaṇṇo aparimāṇavaṇṇo hi so bhavaṃ gotamoti.
[204] Evaṃ vutte te brāhmaṇā kūṭadantaṃ brāhmaṇaṃ
etadavocuṃ yathā kho bhavaṃ kūṭadanto samaṇassa gotamassa vaṇṇaṃ
bhāsati ito cepi so bhavaṃ gotamo yojanasate viharati alameva
saddhena kulaputtena dassanāya upasaṅkamituṃ api puṭosenāti . tenahi
bho sabbe va mayaṃ samaṇaṃ gotamaṃ dassanāya upasaṅkamissāmāti.
{204.1} Athakho kūṭadanto brāhmaṇo mahatā brāhmaṇagaṇena
saddhiṃ yena ambalaṭṭhikā yena bhagavā tenupasaṅkami upasaṅkamitvā bhagavatā
saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ
nisīdi . ekamantaṃ nisinnā kho pana khānumattakā brāhmaṇagahapatikā
appekacce bhagavantaṃ abhivādetvā ekamantaṃ nisīdiṃsu appekacce
bhagavatā saddhiṃ sammodiṃsu sammodanīyaṃ kathaṃ sārāṇīyaṃ vītisāretvā
ekamantaṃ nisīdiṃsu appekacce yena bhagavā tenañjalimpaṇāmetvā
ekamantaṃ nisīdiṃsu appekacce nāmagottaṃ sāvetvā ekamantaṃ nisīdiṃsu
appekacce tuṇhībhūtā ekamantaṃ nisīdiṃsu . ekamantaṃ nisinno kho
kūṭadanto brāhmaṇo bhagavantaṃ etadavoca sutaṃ metaṃ bho gotama
samaṇo gotamo tividhaṃ yaññasampadaṃ soḷasaparikkhāraṃ jānātīti na
kho panāhaṃ jānāmi tividhaṃ yaññasampadaṃ soḷasaparikkhāraṃ icchāmahaṃ
Mahāyaññaṃ yajituṃ sādhu me bhavaṃ gotamo tividhaṃ yaññasampadaṃ
soḷasaparikkhāraṃ desetūti.
[205] Tenahi brāhmaṇa suṇāhi sādhukaṃ manasikarohi bhāsissāmīti.
Evaṃ bhoti kho kūṭadanto brāhmaṇo bhagavato paccassosi . bhagavā
etadavoca bhūtapubbaṃ brāhmaṇa rājā mahāvijito nāma ahosi aḍḍho
mahaddhano mahābhogo pahūtajātarūparajato pahūtavittūpakaraṇo pahūtadhanadhañño
paripuṇṇakosakoṭṭhāgāro . athakho brāhmaṇa rañño mahāvijitassa
rahogatassa paṭisallīnassa evaṃ cetaso parivitakko udapādi adhigatā
kho me vipulā mānusakā bhogā mahantaṃ paṭhavimaṇḍalaṃ abhivijiya ajjhāvasāmi
yannūnāhaṃ mahāyaññaṃ yajeyyaṃ yaṃ mama assa dīgharattaṃ hitāya sukhāyāti.
Athakho brāhmaṇa rājā mahāvijito purohitaṃ brāhmaṇaṃ āmantāpetvā
etadavoca idha mayhaṃ brāhmaṇa rahogatassa paṭisallīnassa evaṃ cetaso
parivitakko udapādi adhigatā kho me vipulā mānusakā bhogā mahantaṃ
paṭhavimaṇḍalaṃ abhivijiya ajjhāvasāmi yannūnāhaṃ mahāyaññaṃ yajeyyaṃ yaṃ
mama assa dīgharattaṃ hitāya sukhāyāti icchāmahaṃ brāhmaṇa mahāyaññaṃ
yajituṃ anusāsatu maṃ bhavaṃ yaṃ mama assa dīgharattaṃ hitāya sukhāyāti.
[206] Evaṃ vutte brāhmaṇa purohito brāhmaṇo rājānaṃ
mahāvijitaṃ etadavoca bhoto kho rañño janapado sakaṇṭako
sauppīḷo gāmaghātāpi dissanti nigamaghātāpi dissanti nagaraghātāpi
Dissanti panthaduhanāpi dissanti . bhavaṃ kho pana rājā evaṃ
sakaṇṭake janapade sauppīḷe valiṃ uddhareyya akiccakārī assa tena
bhavaṃ rājā . siyā kho pana bhoto rañño evamassa ahametaṃ
dussukhilaṃ vadhena vā bandhena vā jāniyā vā garahāya vā pabbājanāya
vā samūhanissāmīti . na kho panetassa dussukhilassa evaṃ sammā
samugghāto hoti . ye te hatāvasesakā bhavissanti te pacchā
rañño janapade viheṭhessanti . apica kho idaṃ saṃvidhānaṃ āgamma
evametassa dussukhilassa sammā samugghāto hoti . tenahi bhavaṃ
rājā siyā kho pana ye bhoto rañño janapade ussahanti
kasigorakkhe tesaṃ bhavaṃ rājā vījabhattaṃ anuppadetu ye bhoto
rañño janapade ussahanti vāṇijjāya tesaṃ bhavaṃ rājā pābhataṃ
anuppadetu ye bhoto rañño janapade ussahanti rājaporisā tesaṃ
bhavaṃ rājā bhattavettanaṃ kappetu te va manussā sakammapasutā rañño
janapadaṃ na viheṭhessanti . mahā ca rañño kāsiko bhavissati
khemaṭṭhitā janapadā akaṇṭakā anuppīḷā manussā ca mudā modamānā
ure putte naccentā apārutagharā maññe viharissantīti . evaṃ
bhoti kho brāhmaṇa rājā mahāvijito purohitassa brāhmaṇassa
paṭissutvā ye pana rañño janapade ussahiṃsu kasigorakkhe tesaṃ
rājā mahāvijito bījabhattaṃ anuppadāsi ye rañño janapade ussahiṃsu
vāṇijjāya tesaṃ rājā mahāvijito pābhataṃ anuppadāsi ye rañño
Janapade ussahiṃsu rājaporisā tesaṃ rājā mahāvijito bhattavettanaṃ
kappesi te va manussā sakammapasutā rañño janapadaṃ na viheṭhesuṃ .
Mahā ca rañño rāsiko ahosi khemaṭṭhitā janapadā akaṇṭakā
anuppīḷā manussā mudā modamānā ure putte naccentā
apārutagharā maññe vihariṃsu.
[207] Athakho brāhmaṇa rājā mahāvijito purohitaṃ brāhmaṇaṃ
āmantāpetvā etadavoca samūhato kho me bho so dussukhilo
bhoto saṃvidhānaṃ āgamma mahā ca me rāsiko khemaṭṭhitā janapadā
akaṇṭakā anuppīḷā manussā mudā modamānā ure putte naccentā
apārutagharā maññe viharanti icchāmahaṃ brāhmaṇa mahāyaññaṃ yajituṃ
anusāsatu maṃ bhavaṃ yaṃ mama assa dīgharattaṃ hitāya sukhāyāti.
{207.1} Tenahi bhavaṃ ye bhoto rañño janapade khattiyā anuyantā
negamā ceva jānapadā ca te bhavaṃ rājā āmantayataṃ. Icchāmahaṃ bho
mahāyaññaṃ yajituṃ anujānantu me bhavanto yaṃ mama assa dīgharattaṃ
hitāya sukhāyāti . ye bhoto rañño janapade amaccā pārisajjā
negamā ceva jānapadā ca .pe. brāhmaṇamahāsālā negamā
ceva jānapadā ca .pe. gahapatikā necayikā negamā ceva jānapadā
ca te bhavaṃ rājā āmantayataṃ . icchāmahaṃ bho mahāyaññaṃ yajituṃ
anujānantu me bhavanto yaṃ mama assa dīgharattaṃ hitāya sukhāyāti .
Evaṃ bhoti kho brāhmaṇa rājā mahāvijito purohitassa brāhmaṇassa
Paṭissutvā ye rañño janapade khattiyā anuyantā negamā ceva
jānapadā ca te rājā mahāvijito āmantesi icchāmahaṃ bho
mahāyaññaṃ yajituṃ anujānantu me bhavanto yaṃ mama assa dīgharattaṃ
hitāya sukhāyāti . yajataṃ bhavaṃ rājā yaññaṃ yaññakālo mahārājāti.
Ye rañño janapade amaccā pārisajjā negamā ceva jānapadā ca .pe.
Brāhmaṇamahāsālā negamā ceva jānapadā ca .pe. gahapatikā
necayikā negamā ceva jānapadā ca te rājā mahāvijito āmantesi
icchāmahaṃ bho mahāyaññaṃ yajituṃ anujānantu me bhavanto yaṃ mama assa
dīgharattaṃ hitāya sukhāyāti . yajataṃ bhavaṃ rājā yaññaṃ yaññakālo
mahārājāti . iti ime cattāro anumatipakkhā tasseva yaññassa
parikkhārā bhavanti.
[208] Rājā mahāvijito aṭṭhahi aṅgehi samannāgato ubhato
sujāto mātito ca pitito ca saṃsuddhagahaṇiko yāva sattamā pitāmahayugā
akkhitto anupakkuṭṭho jātivādena abhirūpo dassanīyo .pe.
Akkhuddāvakāso dassanāya aḍḍho mahaddhano mahābhogo
pahūtajātarūparajato pahūtavittūpakaraṇo pahūtadhanadhañño
paripuṇṇakosakoṭṭhāgāro balavā caturaṅginiyā senāya
samannāgato assavāya ovādapaṭikārāya tapati maññe
paccatthike yasasā saddho dāyako dānapatiko anāvaṭadvāro
samaṇabrāhmaṇakapaṇaddhikavaṇibbakayācakānaṃ opānabhūto
puññāni karoti bahussuto tassa tassa sutajātassa tassa
Tasseva kho pana bhāsitassa atthaṃ jānāti ayaṃ imassa bhāsitassa
attho ayaṃ imassa bhāsitassa atthoti paṇḍito viyatto medhāvī
paṭibalo atītānāgatapaccuppanne atthe cintetuṃ . rājā mahāvijito
imehi aṭṭhahi aṅgehi samannāgato . iti imānipi aṭṭhaṅgāni
tasseva yaññassa parikkhārā bhavanti.
[209] Purohito brāhmaṇo catūhaṅgehi samannāgato ubhato
sujāto mātito ca pitito ca saṃsuddhagahaṇiko yāva sattamā pitāmahayugā
akkhitto anupakkuṭṭho jātivādena ajjhāyako mantadharo tiṇṇaṃ vedānaṃ
pāragū sanighaṇḍuketubhānaṃ sākkharappabhedānaṃ itihāsapañcamānaṃ
padako veyyākaraṇo lokāyatamahāpurisalakkhaṇesu anavayo sīlavā
vuḍḍhasīlī vuḍḍhasīlena samannāgato paṇḍito byatto medhāvī paṭhamo
vā dutiyo vā pūjampaggaṇhantānaṃ . purohito brāhmaṇo imehi
catūhi aṅgehi samannāgato . iti imānipi cattāri aṅgāni tasseva
yaññassa parikkhārā bhavanti.
[210] Athakho brāhmaṇa purohito brāhmaṇo rañño
mahāvijitassa pubbe va yaññā tisso vidhā desesi siyā kho
pana bhoto rañño mahāyaññaṃ yajamānassa 1- kocideva vippaṭisāro
mahā vata me bhogakkhandho vigacchissatīti so bhotā raññā
vippaṭisāro na karaṇīyo . siyā kho pana bhoto rañño
@Footnote: 1 Sī. yiṭṭhukāmassa.
Mahāyaññaṃ yajamānassa kocideva vippaṭisāro mahā vata me
bhogakkhandho vigacchatīti so bhotā raññā vippaṭisāro na
karaṇīyo . siyā kho pana bhoto rañño mahāyaññaṃ yajamānassa
kocideva vippaṭisāro mahā vata me bhogakkhandho vigatoti so
bhotā raññā vippaṭisāro na karaṇīyo . ime 1- brāhmaṇa
purohito brāhmaṇo rañño mahāvijitassa pubbe va yaññā
tisso vidhā desesi.
[211] Athakho brāhmaṇa purohito brāhmaṇo rañño
mahāvijitassa pubbe va yaññā dasahākārehi paṭiggāhakesu
vippaṭisāraṃ paṭivinesi . āgamissanti kho bhoto yaññaṃ pāṇātipātinopi
pāṇātipātāpi paṭiviratā . ye tattha pāṇātipātino tesaṃyeva
ye tattha pāṇātipātino tesaṃyeva tena ye tattha pāṇātipātā
paṭiviratā te ārabbha yajataṃ bhavaṃ sajjataṃ bhavaṃ modataṃ bhavaṃ cittameva
bhavaṃ antaraṃ pasādetu.
[212] Āgamissanti kho bhoto yaññaṃ adinnādāyinopi
adinnādānāpi paṭiviratā ye tattha adinnādāyino tesaṃyeva tena
ye tattha adinnādānā paṭiviratā te ārabbha yajataṃ bhavaṃ sajjataṃ bhavaṃ
modataṃ bhavaṃ cittameva bhavaṃ antaraṃ pasādetu.
[213] Āgamissanti kho bhoto yaññaṃ kāmesu micchācārinopi
@Footnote: 1 imā khotipi pāṭhena bhavitabbaṃ.
Kāmesu micchācārāpi paṭiviratā ye tattha kāmesu micchācārino
tesaṃyeva tena ye tattha kāmesu micchācārā paṭiviratā te
ārabbha yajataṃ bhavaṃ sajjataṃ bhavaṃ modataṃ bhavaṃ cittameva bhavaṃ antaraṃ
pasādetu.
[214] Āgamissanti kho bhoto yaññaṃ musāvādinopi musāvādā
paṭiviratāpi ye tattha musāvādino tesaṃyeva tena ye tattha musāvādā
paṭiviratā te ārabbha yajataṃ bhavaṃ sajjataṃ bhavaṃ modataṃ bhavaṃ cittameva
bhavaṃ antaraṃ pasādetu.
[215] Āgamissanti kho bhoto yaññaṃ pisuṇavācinopi pisuṇāya
vācāya paṭiviratāpi ye tattha pisuṇavācino tesaṃyeva tena ye tattha
pisuṇāya vācāya paṭiviratā te ārabbha yajataṃ bhavaṃ sajjataṃ bhavaṃ
modataṃ bhavaṃ cittameva bhavaṃ antaraṃ pasādetu.
[216] Āgamissanti kho bhoto yaññaṃ pharusavācinopi pharusāya
vācāya paṭiviratāpi ye tattha pharusavācino tesaṃyeva tena ye tattha
pharusavācāya paṭiviratā te ārabbha yajataṃ bhavaṃ sajjataṃ bhavaṃ modataṃ
bhavaṃ cittameva bhavaṃ antaraṃ pasādetu.
[217] Āgamissanti kho bhoto yaññaṃ samphappalāpinopi
samphappalāpā paṭiviratāpi ye tattha samphappalāpino tesaṃyeva tena
ye tattha samphappalāpā paṭiviratā te ārabbha yajataṃ bhavaṃ sajjataṃ
bhavaṃ modataṃ bhavaṃ cittameva bhavaṃ antaraṃ pasādetu.
[218] Āgamissanti kho bhoto yaññaṃ abhijjhālunopi
anabhijjhālunopi ye tattha abhijjhāluno tesaṃyeva tena ye tattha
anabhijjhāluno te ārabbha yajataṃ bhavaṃ sajjataṃ bhavaṃ modataṃ bhavaṃ
cittameva bhavaṃ antaraṃ pasādetu.
[219] Āgamissanti kho bhoto yaññaṃ byāpannacittāpi
abyāpannacittāpi ye tattha byāpannacittāpi tesaṃyeva tena ye
tattha abyāpannacittā te ārabbha yajataṃ bhavaṃ sajjataṃ bhavaṃ modataṃ
bhavaṃ cittameva bhavaṃ antaraṃ pasādetu.
[220] Āgamissanti kho bhoto yaññaṃ micchādiṭṭhikāpi
sammādiṭṭhikāpi ye tattha micchādiṭṭhikā tesaṃyeva tena ye tattha
sammādiṭṭhikā te ārabbha yajataṃ bhavaṃ sajjataṃ bhavaṃ modataṃ bhavaṃ
cittameva bhavaṃ antaraṃ pasādetūti . imehi kho brāhmaṇa purohito
brāhmaṇo rañño mahāvijitassa pubbe va yaññā dasahākārehi
paṭiggāhakesu vippaṭisāraṃ paṭivinesi.
[221] Athakho brāhmaṇa purohito brāhmaṇo rañño
mahāvijitassa mahāyaññaṃ yajamānassa soḷasahi ākārehi cittaṃ
sandassesi samādapesi samuttejesi sampahaṃsesi siyā kho pana bhoto
rañño mahāyaññaṃ yajamānassa kocideva vattā rājā kho mahāvijito
mahāyaññaṃ yajati no ca khvassa āmantitā khattiyā anuyantā
negamā ceva jānapadā ca atha ca pana bhavaṃ rājā evarūpaṃ mahāyaññaṃ
Yajatīti . evaṃpi kho bhoto rañño vattā dhammato natthi .
Bhoto kho pana rañño āmantitā khattiyā anuyantā negamā
ceva jānapadā ca imināpetaṃ bhavaṃ rājā jānātu yajataṃ bhavaṃ sajjataṃ
bhavaṃ modataṃ bhavaṃ cittameva bhavaṃ antaraṃ pasādetu.
[222] Siyā kho pana bhoto rañño mahāyaññaṃ yajamānassa
kocideva vattā rājā kho mahāvijito mahāyaññaṃ yajati no ca
khvassa āmantitā amaccā pārisajjā negamā ceva jānapadā ca
.pe. brāhmaṇamahāsālā negamā ceva jānapadā ca. Gahapatinecayikā
negamā ceva jānapadā ca atha ca pana bhavaṃ rājā evarūpaṃ
mahāyaññaṃ yajatīti . evaṃpi kho bhoto rañño vattā dhammato
natthi . bhoto kho pana rañño āmantitā gahapatinecayikā negamā
ceva jānapadā ca . imināpetaṃ bhavaṃ rājā jānātu yajataṃ bhavaṃ
sajjataṃ bhavaṃ modataṃ bhavaṃ cittameva bhavaṃ antaraṃ pasādetu.
[223] Siyā kho pana bhoto rañño mahāyaññaṃ yajamānassa
kocideva vattā rājā kho mahāvijito mahāyaññaṃ yajati no ca
kho ubhato sujāto mātito ca pitito ca saṃsuddhagahaṇiko yāva
sattamā pitāmahayugā akkhitto anupakkuṭṭho jātivādena atha ca
pana bhavaṃ rājā evarūpaṃ mahāyaññaṃ yajatīti . evampi kho bhoto
rañño vattā dhammato natthi . bhavaṃ kho pana rājā ubhato
sujāto mātito ca pitito ca saṃsuddhagahaṇiko yāva sattamā
Pitāmahayugā akkhitto anupakkuṭṭho jātivādena . imināpetaṃ bhavaṃ
rājā jānātu yajataṃ bhavaṃ sajjataṃ bhavaṃ modataṃ bhavaṃ cittameva bhavaṃ
antaraṃ pasādetu.
[224] Siyā kho pana bhoto rañño mahāyaññaṃ yajamānassa
kocideva vattā rājā kho mahāvijito mahāyaññaṃ yajati no ca kho
abhirūpo dassanīyo pāsādiko paramāya vaṇṇapokkharatāya samannāgato
brahmavaṇṇi brahmavacchasi akkhuddāvakāso dassanāya .pe. no ca
kho aḍḍho mahaddhano mahābhogo pahūtajātarūparajato pahūtavittūpakaraṇo
pahūtadhanadhañño paripuṇṇakosakoṭṭhāgāro .pe. no ca kho balavā
caturaṅginiyā senāya samannāgato assavāya ovādapaṭikārāya tapati
maññe paccatthike yasasā no ca kho saddho dāyako dānapati anāvaṭadvāro
samaṇabrāhmaṇakapaṇaddhikavaṇibbakayācakānaṃ opānabhūto puññāni
karoti no ca kho bahussuto tassa tassa sutajātassa no ca kho tassa tasseva
kho pana bhāsitassa atthaṃ jānāti ayaṃ imassa bhāsitassa attho ayaṃ
imassa bhāsitassa atthoti no ca kho paṇḍito viyatto medhāvī paṭibalo
atītānāgatapaccuppanne atthe cintetuṃ atha ca pana bhavaṃ rājā
evarūpaṃ mahāyaññaṃ yajatīti . evaṃpi kho bhoto rañño vattā dhammato
natthi . bhavaṃ kho pana rājā paṇḍito viyatto medhāvī paṭibalo
atītānāgatapaccuppanne atthe cintetuṃ imināpetaṃ bhavaṃ rājā
Jānātu yajataṃ bhavaṃ sajjataṃ bhavaṃ modataṃ bhavaṃ cittameva bhavaṃ
antaraṃ pasādetu.
[225] Siyā kho pana bhoto rañño mahāyaññaṃ yajamānassa
kocideva vattā rājā kho mahāvijito mahāyaññaṃ yajati no ca
khvassa purohito brāhmaṇo ubhato sujāto mātito ca pitito
ca saṃsuddhagahaṇiko yāva sattamā pitāmahayugā akkhitto anupakkuṭṭho
jātivādena atha ca pana bhavaṃ rājā evarūpaṃ mahāyaññaṃ yajatīti .
Evaṃpi kho bhoto rañño vattā dhammato natthi . bhoto kho
pana rañño purohito brāhmaṇo ubhato sujāto mātito ca
pitito ca saṃsuddhagahaṇiko yāva sattamā pitāmahayugā akkhitto
anupakkuṭṭho jātivādena imināpetaṃ bhavaṃ rājā jānātu yajataṃ bhavaṃ
sajjataṃ bhavaṃ modataṃ bhavaṃ cittameva bhavaṃ antaraṃ pasādetu.
[226] Siyā kho pana bhoto rañño mahāyaññaṃ yajamānassa
kocideva vattā rājā kho mahāvijito mahāyaññaṃ yajati no ca
khvassa purohito brāhmaṇo ajjhāyako mantadharo tiṇṇaṃ vedānaṃ
pāragū sanighaṇḍuketubhānaṃ sākkharappabhedānaṃ itihāsapañcamānaṃ padako
veyyākaraṇo lokāyatamahāpurisalakkhaṇesu anavayo no ca khvassa
purohito brāhmaṇo sīlavā vuḍḍhasīlī vuḍḍhasīlena samannāgato
no ca khvassa purohito brāhmaṇo paṇḍito viyatto medhāvī
paṭhamo vā dutiyo vā pūjaṃ paggaṇhantānaṃ atha ca pana bhavaṃ
Rājā evarūpaṃ mahāyaññaṃ yajatīti . evaṃpi bhoto rañño vattā
dhammato natthi . bhoto kho pana rañño purohito brāhmaṇo
paṇḍito viyatto medhāvī paṭhamo vā dutiyo vā pūjaṃ paggaṇhantānaṃ
imināpetaṃ bhavaṃ rājā jānātu yajataṃ bhavaṃ sajjataṃ bhavaṃ modataṃ bhavaṃ
cittameva bhavaṃ antaraṃ pasādetūti . imehi kho brāhmaṇa purohito
brāhmaṇo rañño mahāvijitassa mahāyaññaṃ yajamānassa soḷasahi
ākārehi cittaṃ sandassesi samādapesi samuttejesi sampahaṃsesi.
[227] Tasmiṃ kho pana brāhmaṇa yaññe neva gāvo haññiṃsu
na ajeḷakā haññiṃsu na kukkuṭasūkarā haññiṃsu na vividhā pāṇā
saṃghātaṃ āpajjiṃsu na rukkhā chindiṃsu 1- yūpatthāya na dabbā lāyiṃsu
parihiṃsatthāya . yepissa ahesuṃ dāsāti vā pessāti vā kammakarāti
vā tepi na daṇḍatajjitā na bhayatajjitā na assumukhā rodamānā
parikammāni akaṃsu . athakho ye icchiṃsu te akaṃsu ye na icchiṃsu
na te akaṃsu . yaṃ icchiṃsu taṃ akaṃsu yaṃ na icchiṃsu na taṃ akaṃsu.
Sappitelanavanītadadhimadhuphāṇitena ceva so yañño niṭṭhānamagamāsi.
[228] Athakho brāhmaṇa khattiyā anuyantā negamā ceva
jānapadā ca . amaccā pārisajjā negamā ceva jānapadā ca .
Brāhmaṇamahāsālā negamā ceva jānapadā ca . gahapatinecayikā
@Footnote: 1 chijjiṃsūti vā pāṭho.
Negamā ceva jānapadā ca pahūtaṃ sāpateyyaṃ ādāya rājānaṃ
mahāvijitaṃ upasaṅkamitvā evamāhaṃsu idaṃ te deva pahūtaṃ sāpateyyaṃ
devaṃyeva uddissa ābhataṃ taṃ devo paṭiggaṇhātūti . alaṃ bho
mamāpi idaṃ pahūtaṃ sāpateyyaṃ dhammikena balinā abhisaṃkhataṃ tañca
vo hotu ito ca bhiyyo harathāti . te raññā paṭikkhittā
ekamantaṃ apakkamma evaṃ samacintesuṃ na kho etaṃ amhākaṃ paṭirūpaṃ
yaṃ mayaṃ imāni sāpateyyāni punadeva sakāni gharāni paṭiggaṇheyyāma
rājā kho mahāvijito mahāyaññaṃ yajati handassa mayaṃ anuyāgino
homāti.
[229] Athakho brāhmaṇa puratthimena yaññavātassa khattiyā
anuyantā negamā ceva jānapadā ca dānāni paṭṭhapesuṃ . dakkhiṇena
yaññavātassa amaccā pārisajjā negamā ceva jānapadā ca dānāni
paṭṭhapesuṃ . pacchimena yaññavātassa brāhmaṇamahāsālā negamā
ceva jānapadā ca dānāni paṭṭhapesuṃ . uttarena yaññavātassa
gahapatinecayikā negamā ceva jānapadā ca dānāni paṭṭhapesuṃ .
Tesupi kho brāhmaṇa yaññesu neva gāvo haññiṃsu na ajeḷakā
haññiṃsu na kukkuṭasūkarā haññiṃsu na vividhā pāṇā saṃghātaṃ
āpajjiṃsu na rukkhā chindiṃsu yūpatthāya na dabbā lāyiṃsu parihiṃsatthāya.
Ye nesaṃ ahesuṃ dāsāti vā pessāti vā kammakarāti
vā tepi na daṇḍatajjitā na bhayatajjitā na assumukhā rodamānā
Parikammāni akaṃsu . athakho ye icchiṃsu te akaṃsu ye na icchiṃsu
na te akaṃsu . yaṃ icchiṃsu taṃ akaṃsu yaṃ na icchiṃsu taṃ na akaṃsu.
Sappitelanavanītadadhimadhuphāṇitena ceva so yañño niṭṭhānamagamāsi .
Iti cattāro ca anumatipakkhā rājā mahāvijito aṭṭhahi aṅgehi
samannāgato purohito brāhmaṇo catūhaṅgehi samannāgato tisso
vidhā ayaṃ vuccati brāhmaṇa tividhā yaññasampadā soḷasaparikkhārāti.
[230] Evaṃ vutte te brāhmaṇā unnādino uccāsaddā
mahāsaddā ahesuṃ aho yañño aho yaññasampadāti . kūṭadanto
pana brāhmaṇo tuṇhībhūto va nisinno hoti . athakho te
brāhmaṇā kūṭadantaṃ brāhmaṇaṃ etadovacuṃ kasmā pana bhavaṃ kūṭadanto
samaṇassa gotamassa subhāsitaṃ subhāsitato nābbhanumodatīti . nāhaṃ
bho samaṇassa gotamassa subhāsitaṃ subhāsitato na abbhanumodāmi
muddhāpi tassa nippateyya 1- yo samaṇassa gotamassa subhāsitaṃ
subhāsitato na abbhānumodeyya apica me bho evaṃ hoti samaṇo
gotamo evamāha evaṃ me sutanti vā evaṃ arahati bhavitunti vā
apica samaṇo gotamo evaṃ tadā āsi itthaṃ tadā āsitveva
bhāsati tassa mayhaṃ bho evaṃ hoti addhā samaṇo gotamo tena
samayena rājā hoti mahāvijito yaññasāmī purohito tassa yaññassa
yājetāti abhijānāti pana bhavaṃ gotamo evarūpaṃ yaññaṃ yajitvā
@Footnote: 1 Sī. vipateyya.
Vā yājetvā vā kāyassa bhedā paraṃ maraṇā sugatiṃ saggaṃ lokaṃ
uppajjitāti . abhijānāmāhaṃ brāhmaṇa evarūpaṃ yaññaṃ yajitvā
ca yājetvā ca kāyassa bhedā paraṃ maraṇā sugatiṃ saggaṃ lokaṃ
upapajjitāti ahaṃ tena samayena brāhmaṇa purohito brāhmaṇo
ahosiṃ tassa yaññassa yājetāti.
[231] Atthi pana bho gotama añño yañño imāya tividhāya
yaññasampadāya soḷasaparikkhārāya appatthataro ca appasamārambhataro
ca mahapphalataro ca mahānisaṃsataro cāti . atthi brāhmaṇa añño
yañño imāya tividhāya yaññasampadāya soḷasaparikkhārāya appatthataro
ca appasamārambhataro ca mahapphalataro ca mahānisaṃsataro cāti.
{231.1} Katamo pana bho gotama so yañño imāya tividhāya
yaññasampadāya soḷasaparikkhārāya appatthataro ca appasamārambhataro
ca mahapphalataro ca mahānisaṃsataro cāti . yāni kho tāni brāhmaṇa
niccadānāni anukūlayaññāni sīlavante pabbajite uddissa dīyanti
ayaṃ kho pana brāhmaṇa yañño imāya tividhāya yaññasampadāya
soḷasaparikkhārāya appatthataro ca appasamārambhataro ca mahapphalataro
ca mahānisaṃsataro cāti . ko nu kho bho gotama hetu ko paccayo
yenataṃ 1- niccadānaṃ anukūlayaññaṃ imāya tividhāya yaññasampadāya
soḷasaparikkhārāya appatthatarañca appasamārambhatarañca mahapphalatarañca
@Footnote: 1 yenetanti vā pāṭho.
Mahānisaṃsatarañcāti . na kho brāhmaṇa evarūpaṃ yaññaṃ upasaṅkamanti
arahanto vā arahattamaggaṃ vā samāpannā taṃ kissa hetu
dissanti hettha brāhmaṇa daṇḍappahārāpi galaggahāpi tasmā
evarūpaṃ yaññaṃ na upasaṅkamanti arahanto vā arahattamaggaṃ vā
samāpannā yāni kho pana tāni brāhmaṇa niccadānāni anukūlayaññāni
sīlavante pabbajite uddissa dīyanti evarūpaṃ kho pana brāhmaṇa
yaññaṃ upasaṅkamanti arahanto vā arahattamaggaṃ vā samāpannā
taṃ kissa hetu na hettha brāhmaṇa dissanti daṇḍappahārāpi
galaggahāpi tasmā evarūpaṃ yaññaṃ upasaṅkamanti arahanto vā
arahattamaggaṃ vā samāpannā ayaṃ kho brāhmaṇa hetu ayaṃ paccayo
yenataṃ niccadānaṃ anukūlayaññaṃ imāya tividhāya yaññasampadāya
soḷasaparikkhārāya appatthatarañca appasamārambhatarañca
mahapphalatarañca mahānisaṃsatarañcāti.
[232] Atthi pana bho gotama añño yañño imāya ca
tividhāya yaññasampadāya soḷasaparikkhārāya iminā ca niccadānena
anukūlayaññena appatthataro ca appasamārambhataro ca mahapphalataro
ca mahānisaṃsataro cāti . atthi kho brāhmaṇa añño yañño
imāya ca tividhāya yaññasampadāya .pe. katamo pana so bho
gotama añño yañño imāya ca tividhāya yaññasampadāya .pe.
Yo kho brāhmaṇa cātuddisaṃ saṃghaṃ uddissa vihāraṃ karoti ayañca
Kho brāhmaṇa yañño imāya ca tividhāya yaññasampadāya
soḷasaparikkhārāya iminā ca niccadānena anukūlayaññena
appatthataro ca appasamārambhataro ca mahapphalataro ca mahānisaṃsataro
cāti.
[233] Atthi pana bho gotama añño yañño imāya ca
tividhāya .pe. mahānisaṃsataro cāti . atthi kho brāhmaṇa
añño yañño .pe. katamo pana so bho gotama añño
yañño .pe. yo kho brāhmaṇa pasannacitto buddhaṃ saraṇaṃ
gacchati dhammaṃ saraṇaṃ gacchati saṃghaṃ saraṇaṃ gacchati ayaṃ kho brāhmaṇa
yañño imāya ca tividhāya yaññasampadāya soḷasaparikkhārāya iminā
ca niccadānena anukūlayaññena iminā ca vihāradānena appatthataro
ca appasamārambhataro ca mahapphalataro ca mahānisaṃsataro cāti.
[234] Atthi pana bho gotama añño yañño imāya ca
tividhāya yaññasampadāya soḷasaparikkhārāya iminā ca niccadānena
anukūlayaññena .pe. appatthataro ca appasamārambhataro ca
mahapphalataro ca mahānisaṃsataro cāti . atthi kho brāhmaṇa añño
yañño imāya ca tividhāya .pe. katamo pana so bho gotama añño
yañño imāya ca tividhāya .pe. yo kho brāhmaṇa pasannacitto
sikkhāpadāni samādiyati pāṇātipātā veramaṇī adinnādānā
veramaṇī kāmesu micchācārā veramaṇī musāvādā veramaṇī
surāmerayamajjapamādaṭṭhānā veramaṇī ayaṃ kho brāhmaṇa
Yañño imāya ca tividhāya yaññasampadāya soḷasaparikkhārāya
iminā ca niccadānena anukūlayaññena .pe. appatthataro ca
appasamārambhataro ca mahapphalataro ca mahānisaṃsataro cāti.
[235] Atthi pana bho gotama añño yañño imāya ca
tividhāya yaññasampadāya soḷasaparikkhārāya iminā ca niccadānena
anukūlayaññena .pe. atthi kho brāhmaṇa añño yañño imāya
ca tividhāya yaññasampadāya soḷasaparikkhārāya iminā ca niccadānena
anukūlayaññena iminā ca vihāradānena imehi ca saraṇagamanehi imehi
ca sikkhāpadehi appatthataro ca appasamārambhataro ca mahapphalataro
ca mahānisaṃsataro cāti.
{235.1} Katamo pana so bho gotama añño yañño imāya
ca tividhāya yaññasampadāya .pe. appatthataro ca appasamārambhataro
ca mahapphalataro ca mahānisaṃsataro cāti . idha brāhmaṇa tathāgato
loke uppajjati arahaṃ sammāsambuddho .pe. (yathā sāmaññaphale
evaṃ sabbaṃ vitthāretabbaṃ) .pe. evaṃ kho brāhmaṇa bhikkhu sīlasampanno
hoti . paṭhamaṃ jhānaṃ upasampajja viharati . ayaṃ kho brāhmaṇa yañño
purimehi yaññehi appatthataro ca appasamārambhataro ca mahapphalataro
ca mahānisaṃsataro ca . dutiyaṃ jhānaṃ . tatiyaṃ jhānaṃ . catutthaṃ jhānaṃ
upasampajja viharati . ayaṃpi kho brāhmaṇa yañño purimehi
yaññehi appatthataro ca appasamārambhataro ca mahapphalataro ca
Mahānisaṃsataro ca . ñāṇadassanāya cittaṃ abhinīharati abhininnāmeti
khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti
pajānāti . ayaṃ kho brāhmaṇa yañño purimehi yaññehi
appatthataro ca appasamārambhataro ca mahapphalataro ca mahānisaṃsataro
ca imāya ca brāhmaṇa yaññasampadāya aññā yaññasampadā
uttaritarā vā paṇītatarā vā natthīti.
[236] Evaṃ vutte kūṭadanto brāhmaṇo bhagavantaṃ etadavoca
abhikkantaṃ bho gotama abhikkantaṃ bho gotama seyyathāpi bho gotama
nikkujjitaṃ vā ukkujjeyya paṭicchannaṃ vā vivareyya mūḷhassa vā
maggaṃ ācikkheyya andhakāre vā telapajjotaṃ dhāreyya cakkhumanto
rūpāni dakkhantīti evameva bhotā gotamena anekapariyāyena dhammo
pakāsito esāhaṃ bhavantaṃ gotamaṃ saraṇaṃ gacchāmi dhammañca bhikkhusaṃghañca
upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṅgataṃ
esāhaṃ bho gotama satta ca usabhasatāni satta ca vacchatarasatāni satta
ca vacchatarisatāni satta ca ajasatāni satta ca urabbhasatāni muñcāmi 1-
jīvitaṃ demi haritāni ceva tiṇāni khādantu sītāni ca pānīyāni pivantu
sīto nesaṃ vāto upavāyatūti.
[237] Athakho bhagavā kūṭadantassa brāhmaṇassa anupubbīkathaṃ
kathesi seyyathīdaṃ dānakathaṃ sīlakathaṃ saggakathaṃ kāmānaṃ ādīnavaṃ okāraṃ
@Footnote: 1 Sī. muñcāpemi.
Saṅkilesaṃ nikkhame 1- ānisaṃsaṃ pakāsesi . yadā bhagavā aññāsi
kūṭadantaṃ brāhmaṇaṃ kallacittaṃ muducittaṃ vinīvaraṇacittaṃ udaggacittaṃ
pasannacittaṃ atha yā buddhānaṃ sāmukkaṃsikā dhammadesanā taṃ pakāsesi
dukkhaṃ samudayaṃ nirodhaṃ maggaṃ . seyyathāpi nāma suddhaṃ vatthaṃ
apagatakāḷakaṃ sammadeva rajanaṃ paṭiggaṇheyya evameva kūṭadantassa
brāhmaṇassa tasmiṃyeva āsane virajaṃ vītamalaṃ dhammacakkhuṃ udapādi
yaṃ kiñci samudayadhammaṃ sabbantaṃ nirodhadhammanti . athakho kūṭadanto
brāhmaṇo diṭṭhadhammo pattadhammo viditadhammo pariyogāḷhadhammo
tiṇṇavicikiccho vigatakathaṃkatho vesārajjappatto aparappaccayo satthusāsane
bhavantaṃ etadavoca adhivāsetu me bhavaṃ gotamo svātanāya bhattaṃ
saddhiṃ bhikkhusaṃghenāti . adhivāsesi bhagavā tuṇhībhāvena . athakho
kūṭadanto brāhmaṇo bhagavato adhivāsanaṃ viditvā uṭṭhāyāsanā
bhagavantaṃ abhivādetvā padakkhiṇaṃ katvā pakkāmi.
[238] Athakho kūṭadanto brāhmaṇo tassā rattiyā accayena
sake yaññavāte paṇītaṃ khādanīyabhojanīyaṃ paṭiyādāpetvā bhagavato
kālaṃ ārocāpesi kālo bho gotama niṭṭhitaṃ bhattanti . athakho
bhagavā pubbaṇhasamayaṃ nivāsetvā pattacīvaramādāya saddhiṃ
bhikkhusaṃghena yena kūṭadantassa brāhmaṇassa yaññavāto tenupasaṅkami
upasaṅkamitvā paññatte āsane nisīdi . athakho kūṭadanto
@Footnote: 1 nekkhammetipi pāṭhena bhavitabbaṃ.
Brāhmaṇo buddhappamukhaṃ bhikkhusaṃghaṃ paṇītena khādanīyena bhojanīyena
sahatthā santappesi sampavāresi . athakho kūṭadanto brāhmaṇo
bhagavantaṃ bhuttāviṃ onītapattapāṇiṃ aññataraṃ nīcaṃ āsanaṃ gahetvā
ekamantaṃ nisīdi . ekamantaṃ nisinnaṃ kho kūṭadantaṃ brāhmaṇaṃ bhagavā
dhammiyā kathāya sandassetvā samādapetvā samuttejetvā sampahaṃsetvā
uṭṭhāyāsanā pakkāmīti.
Kūṭadantasuttaṃ pañcamaṃ niṭṭhitaṃ.
-----------
Mahālisuttaṃ chaṭṭhaṃ
[239] Evamme sutaṃ . ekaṃ samayaṃ bhagavā vesāliyaṃ viharati
mahāvane kūṭāgārasālāyaṃ . tena kho pana samayena sambahulā
kosalakā ca brāhmaṇadūtā māgadhakā ca brāhmaṇadūtā vesāliyaṃ
paṭivisanti kenacideva karaṇīyena . assosuṃ kho te kosalakā ca
brāhmaṇadūtā māgadhakā ca brāhmaṇadūtā samaṇo khalu bho
gotamo sakyaputto sakyakulā pabbajito vesāliyaṃ viharati mahāvane
kūṭāgārasālāyaṃ taṃ kho pana bhavantaṃ gotamaṃ evaṃkalyāṇo kittisaddo
abbhuggato itipi so bhagavā .pe. buddho bhagavāti so imaṃ lokaṃ
sadevakaṃ samārakaṃ .pe. tathārūpānaṃ arahataṃ dassanaṃ hotīti . athakho
te kosalakā ca brāhmaṇadūtā māgadhakā ca brāhmaṇadūtā yena
mahāvanaṃ kūṭāgārasālā tenupasaṅkamiṃsu.
[240] Tena kho pana samayena āyasmā nāgito bhagavato upaṭṭhāko
hoti . athakho te kosalakā ca brāhmaṇadūtā māgadhakā ca
brāhmaṇadūtā yenāyasmā nāgito tenupasaṅkamiṃsu upasaṅkamitvā
āyasmantaṃ nāgitaṃ etadavocuṃ kahaṃ nu kho bho nāgita etarahi so bhavaṃ
gotamo viharati dassanakāmā hi mayaṃ taṃ bhavantaṃ gotamanti . akālo
kho āvuso bhagavantaṃ dassanāya paṭisallīno bhagavāti . athakho te
kosalakā ca brāhmaṇadūtā māgadhakā ca brāhmaṇadūtā tattheva
Ekamantaṃ nisīdiṃsu disvā va mayaṃ taṃ bhavantaṃ gotamaṃ gacchissāmāti.
[241] Oṭṭhaddhopi kho licchavi mahatiyā licchaviparisāya saddhiṃ
yena mahāvanaṃ kūṭāgārasālā yenāyasmā nāgito tenupasaṅkami
upasaṅkamitvā āyasmantaṃ nāgitaṃ abhivādetvā ekamantaṃ aṭṭhāsi .
Ekamantaṃ ṭhito kho oṭṭhaddhopi licchavi āyasmantaṃ nāgitaṃ etadavoca
kahannu kho bhante nāgita etarahi so bhagavā viharati arahaṃ
sammāsambuddho dassanakāmā hi mayaṃ taṃ bhagavantaṃ arahantaṃ
sammāsambuddhanti . akālo kho mahāli bhagavantaṃ dassanāya
paṭisallīno bhagavāti . oṭṭhaddhopi licchavi tattheva ekamantaṃ
nisīdi disvā vāhaṃ taṃ bhagavantaṃ gamissāmi arahantaṃ sammāsambuddhanti.
[242] Athakho sīho samaṇuddeso yenāyasmā nāgito tenupasaṅkami
upasaṅkamitvā āyasmantaṃ nāgitaṃ abhivādetvā ekamantaṃ aṭṭhāsi .
Ekamantaṃ ṭhito kho sīho samaṇuddeso āyasmantaṃ nāgitaṃ etadavoca
ete bhante kassapa sambahulā kosalakā ca brāhmaṇadūtā māgadhakā
ca brāhmaṇadūtā idhūpasaṅkantā bhagavantaṃ dassanāya oṭṭhaddhopi
licchavi mahatiyā licchaviparisāya saddhiṃ idhūpasaṅkanto bhagavantaṃ dassanāya
sādhu bhante kassapa labhataṃ esā janatā bhagavantaṃ dassanāyāti .
Tenahi sīha tvaññeva bhagavato ārocehīti . evaṃ bhanteti kho
sīho samaṇuddeso āyasmato nāgitassa paṭissutvā yena bhagavā
tenupasaṅkami upasaṅkamitvā bhagavantaṃ abhivādetvā ekamantaṃ aṭṭhāsi .
Ekamantaṃ ṭhito kho sīho samaṇuddeso bhagavantaṃ etadavoca ete bhante
sambahulā kosalakā ca brāhmaṇadūtā māgadhakā ca brāhmaṇadūtā
idhūpasaṅkantā bhagavantaṃ dassanāya oṭṭhaddhopi licchavi mahatiyā
licchaviparisāya saddhiṃ idhūpasaṅkanto bhagavantaṃ dassanāya sādhu bhante
labhataṃ esā janatā bhagavantaṃ dassanāyāti . Tenahi sīha vihārapacchāyāyaṃ
āsanaṃ paññapehīti . evaṃ bhanteti kho sīho samaṇuddeso
bhagavato paṭissutvā vihārapacchāyāyaṃ āsanaṃ paññapesi . athakho
bhagavā vihārā nikkhamma vihārapacchāyāyaṃ paññattāsane nisīdi .
Athakho te kosalakā ca brāhmaṇadūtā māgadhakā ca brāhmaṇadūtā
yena bhagavā tenupasaṅkamiṃsu upasaṅkamitvā bhagavatā saddhiṃ sammodiṃsu
sammodanīyaṃ kathaṃ sārāṇīyaṃ vītisāretvā ekamantaṃ nisīdiṃsu.
[243] Oṭṭhaddhopi licchavi mahatiyā licchaviparisāya saddhiṃ yena
bhagavā tenupasaṅkami upasaṅkamitvā bhagavantaṃ abhivādetvā ekamantaṃ
nisīdi . ekamantaṃ nisinno kho oṭṭhaddhopi licchavi bhagavantaṃ
etadavoca purimāni bhante divasāni purimatarāni sunakkhatto licchaviputto
yenāhaṃ tenupasaṅkami upasaṅkamitvā maṃ etadavoca yadagge ahaṃ
mahāli bhagavantaṃ upanissāya viharāmi na ciraṃ tīṇi vassāni dibbāni hi
kho rūpāni passāmi piyarūpāni kāmūpasañhitāni rajaniyāni no ca
kho dibbāni saddāni suṇāmi piyarūpāni kāmūpasañhitāni rajaniyāni
santāneva nu kho bhante sunakkhatto licchaviputto dibbāni saddāni
Nāssosi piyarūpāni kāmūpasañhitāni rajaniyāni tāni udāhu
asantānīti.
{243.1} Santāneva kho mahāli sunakkhatto licchaviputto dibbāni
saddāni nāssosi piyarūpāni kāmūpasañhitāni rajaniyāni no
asantānīti . ko nu kho bhante hetu ko paccayo yena sunakkhatto
licchaviputto santāneva dibbāni saddāni na assosi piyarūpāni
kāmūpasañhitāni rajaniyāni no asantānīti.
[244] Idha mahāli bhikkhuno puratthimāya disāya ekaṃsabhāvito
samādhi hoti dibbānaṃ rūpānaṃ dassanāya piyarūpānaṃ kāmūpasañhitānaṃ
rajaniyānaṃ no ca kho dibbānaṃ saddānaṃ savanāya piyarūpānaṃ
kāmūpasañhitānaṃ rajaniyānaṃ so puratthimāya disāya ekaṃsabhāvite
samādhimhi dibbānaṃ rūpānaṃ dassanāya piyarūpānaṃ kāmūpasañhitānaṃ
rajaniyānaṃ no ca kho dibbānaṃ saddānaṃ savanāya piyarūpānaṃ
kāmūpasañhitānaṃ rajaniyānaṃ puratthimāya disāya dibbāni rūpāni
passati piyarūpāni kāmūpasañhitāni rajaniyāni no ca kho dibbāni
saddāni suṇāti piyarūpāni kāmūpasañhitāni rajaniyāni taṃ kissa
hetu evaṃ hetaṃ mahāli hoti bhikkhuno puratthimāya disāya ekaṃsabhāvite
samādhimhi dibbānaṃ rūpānaṃ dassanāya piyarūpānaṃ kāmūpasañhitānaṃ
rajaniyānaṃ no ca kho dibbānaṃ saddānaṃ savanāya piyarūpānaṃ
kāmūpasañhitānaṃ rajaniyānaṃ.
[245] Puna caparaṃ mahāli bhikkhuno dakkhiṇāya disāya .pe.
Pacchimāya disāya .pe. uttarāya disāya .pe. uddhamadho
tiriyaṃ ekaṃsabhāvito samādhi hoti dibbānaṃ rūpānaṃ dassanāya piyarūpānaṃ
kāmūpasañhitānaṃ rajaniyānaṃ no ca kho dibbānaṃ saddānaṃ
savanāya piyarūpānaṃ kāmūpasañhitānaṃ rajaniyānaṃ so uddhamadho
tiriyaṃ ekaṃsabhāvite samādhimhi dibbānaṃ rūpānaṃ dassanāya piyarūpānaṃ
kāmūpasañhitānaṃ rajaniyānaṃ no ca kho dibbānaṃ saddānaṃ savanāya
piyarūpānaṃ kāmūpasañhitānaṃ rajaniyānaṃ uddhamadho tiriyaṃ dibbāni
rūpāni passati piyarūpāni kāmūpasañhitāni rajaniyāni no ca kho
dibbāni saddāni suṇāti piyarūpāni kāmūpasañhitāni rajaniyāni
taṃ kissa hetu evaṃ hetaṃ mahāli hoti bhikkhuno uddhamadho tiriyaṃ
ekaṃsabhāvite samādhimhi dibbānaṃ rūpānaṃ dassanāya piyarūpānaṃ
kāmūpasañhitānaṃ rajaniyānaṃ no ca kho dibbānaṃ saddānaṃ savanāya
piyarūpānaṃ kāmūpasañhitānaṃ rajaniyānaṃ.
[246] Idha mahāli bhikkhuno puratthimāya disāya ekaṃsabhāvito
samādhi hoti dibbānaṃ saddānaṃ savanāya piyarūpānaṃ kāmūpasañhitānaṃ
rajaniyānaṃ no ca kho dibbānaṃ rūpānaṃ dassanāya piyarūpānaṃ
kāmūpasañhitānaṃ rajaniyānaṃ so puratthimāya disāya ekaṃsabhāvite
samādhimhi dibbānaṃ saddānaṃ savanāya piyarūpānaṃ kāmūpasañhitānaṃ
rajaniyānaṃ no ca kho dibbānaṃ rūpānaṃ dassanāya piyarūpānaṃ
kāmūpasañhitānaṃ rajaniyānaṃ puratthimāya disāya dibbāni saddāni
Suṇāti piyarūpāni kāmūpasañhitāni rajaniyāni no ca kho dibbāni
rūpāni passati piyarūpāni kāmūpasañhitāni rajaniyāni taṃ kissa
hetu evaṃ hetaṃ mahāli hoti bhikkhuno puratthimāya disāya ekaṃsabhāvite
samādhimhi dibbānaṃ saddānaṃ savanāya piyarūpānaṃ kāmūpasañhitānaṃ
rajaniyānaṃ no ca kho dibbānaṃ rūpānaṃ dassanāya piyarūpānaṃ kāmūpasañhitānaṃ
rajaniyānaṃ.
[247] Puna caparaṃ mahāli bhikkhuno dakkhiṇāya disāya .pe.
Pacchimāya disāya .pe. uttarāya disāya .pe. uddhamadho
tiriyaṃ ekaṃsabhāvito samādhi hoti dibbānaṃ saddānaṃ savanāya piyarūpānaṃ
kāmūpasañhitānaṃ rajaniyānaṃ no ca kho dibbānaṃ rūpānaṃ dassanāya
piyarūpānaṃ kāmūpasañhitānaṃ rajaniyānaṃ so uddhamadho tiriyaṃ ekaṃsabhāvite
samādhimhi dibbānaṃ saddānaṃ savanāya piyarūpānaṃ kāmūpasañhitānaṃ
rajaniyānaṃ no ca kho dibbānaṃ rūpānaṃ dassanāya piyarūpānaṃ
kāmūpasañhitānaṃ rajaniyānaṃ uddhamadho tiriyaṃ dibbāni saddāni suṇāti
piyarūpāni kāmūpasañhitāni rajaniyāni no ca kho dibbāni rūpāni
passati piyarūpāni kāmūpasañhitāni rajaniyāni taṃ kissa hetu evaṃ
hetaṃ mahāli hoti bhikkhuno uddhamadho tiriyaṃ ekaṃsabhāvite samādhimhi
dibbānaṃ saddānaṃ savanāya piyarūpānaṃ kāmūpasañhitānaṃ rajaniyānaṃ no ca
kho dibbānaṃ rūpānaṃ dassanāya piyarūpānaṃ kāmūpasañhitānaṃ rajaniyānaṃ.
[248] Idha mahāli bhikkhuno puratthimāya disāya ubhayaṃsabhāvito
samādhi hoti dibbānañca rūpānaṃ dassanāya piyarūpānaṃ kāmūpasañhitānaṃ
rajaniyānaṃ dibbānañca saddānaṃ savanāya piyarūpānaṃ kāmūpasañhitānaṃ
rajaniyānaṃ so puratthimāya disāya ubhayaṃsabhāvite samādhimhi dibbānañca
rūpānaṃ dassanāya .pe. dibbānañca saddānaṃ savanāya .pe.
Puratthimāya disāya dibbāni ca rūpāni passati piyarūpāni kāmūpasañhitāni
rajaniyāni dibbāni ca saddāni suṇāti piyarūpāni kāmūpasañhitāni
rajaniyāni taṃ kissa hetu evaṃ hetaṃ mahāli hoti bhikkhuno puratthimāya
disāya ubhayaṃsabhāvite samādhimhi dibbānañca rūpānaṃ dassanāya .pe.
Dibbānañca saddānaṃ savanāya piyarūpānaṃ kāmūpasañhitānaṃ rajaniyānaṃ.
[249] Puna caparaṃ mahāli bhikkhuno dakkhiṇāya disāya .pe.
Pacchimāya disāya .pe. uttarāya disāya .pe. uddhamadho tiriyaṃ
ubhayaṃsabhāvito samādhi hoti dibbānañca rūpānaṃ dassanāya piyarūpānaṃ
kāmūpasañhitānaṃ rajaniyānaṃ dibbānañca saddānaṃ savanāya piyarūpānaṃ
kāmūpasañhitānaṃ rajaniyānaṃ so uddhamadho tiriyaṃ ubhayaṃsabhāvite
samādhimhi dibbānañca rūpānaṃ dassanāya piyarūpānaṃ kāmūpasañhitānaṃ
rajaniyānaṃ dibbānañca saddānaṃ savanāya piyarūpānaṃ kāmūpasañhitānaṃ
rajaniyānaṃ uddhamadho tiriyaṃ dibbāni rūpāni passati piyarūpāni
kāmūpasañhitāni rajaniyāni dibbāni ca saddāni suṇāti
Piyarūpāni kāmūpasañhitāni rajaniyāni taṃ kissa hetu evaṃ hetaṃ
mahāli hoti bhikkhuno uddhamadho tiriyaṃ ubhayaṃsabhāvite samādhimhi
dibbānañca rūpānaṃ dassanāya piyarūpānaṃ kāmūpasañhitānaṃ rajaniyānaṃ
dibbānañca saddānaṃ savanāya piyarūpānaṃ kāmūpasañhitānaṃ rajaniyānaṃ
ayaṃ kho mahāli hetu ayaṃ paccayo yena santāneva sunakkhatto licchaviputto
dibbāni saddāni na assosi piyarūpāni kāmūpasañhitāni rajaniyāni
no asantānīti.
[250] Etāsaṃ nūna bhante samādhibhāvanānaṃ sacchikiriyāhetu bhikkhū
bhagavati brahmacariyaṃ carantīti . na kho mahāli etāsaṃ samādhibhāvanānaṃ
sacchikiriyāhetu bhikkhū mayi brahmacariyaṃ caranti atthi kho mahāli
aññe dhammā uttaritarā ca paṇītatarā ca yesaṃ sacchikiriyāhetu
bhikkhū mayi brahmacariyaṃ carantīti.
{250.1} Katame pana bhante dhammā uttaritarā ca paṇītatarā ca
yesaṃ sacchikiriyāhetu bhikkhū bhagavati brahmacariyaṃ carantīti . idha mahāli
bhikkhu tiṇṇaṃ saññojanānaṃ parikkhayā sotāpanno hoti avinipātadhammo
niyato sambodhiparāyano ayaṃ kho mahāli dhammo uttaritaro ca paṇītataro
ca yassa sacchikiriyāhetu bhikkhū mayi brahmacariyaṃ caranti.
[251] Puna caparaṃ mahāli bhikkhu tiṇṇaṃ saññojanānaṃ parikkhayā
rāgadosamohānaṃ tanuttā sakadāgāmī hoti sakideva imaṃ lokaṃ
āgantvā dukkhassantaṃ karoti ayaṃ kho mahāli dhammo uttaritaro ca
Paṇītataro ca yassa sacchikiriyāhetu bhikkhū mayi brahmacariyaṃ caranti.
[252] Puna caparaṃ mahāli bhikkhu pañcannaṃ orambhāgiyānaṃ
saññojanānaṃ parikkhayā opapātiko hoti tattha parinibbāyī
anāvattidhammo tasmā lokā ayaṃ kho mahāli dhammo uttaritaro ca
paṇītataro ca yassa sacchikiriyāhetu bhikkhū mayi brahmacariyaṃ caranti.
[253] Puna caparaṃ mahāli bhikkhu āsavānaṃ khayā anāsavaṃ
cetovimuttiṃ paññāvimuttiṃ diṭṭhe va dhamme sayaṃ abhiññā
sacchikatvā upasampajja viharati ayaṃpi kho mahāli dhammo uttaritaro
ca paṇītataro ca yassa sacchikiriyāhetu bhikkhū mayi brahmacariyaṃ
caranti ime kho te mahāli dhammā uttaritarā ca paṇītatarā ca
yesaṃ sacchikiriyāhetu bhikkhū mayi brahmacariyaṃ carantīti.
[254] Atthi nu kho bhante maggo atthi paṭipadā etesaṃ
dhammānaṃ sacchikiriyāyāti . atthi kho mahāli maggo atthi paṭipadā
etesaṃ dhammānaṃ sacchikiriyāyāti . katamo pana bhante maggo
katamā paṭipadā etesaṃ dhammānaṃ sacchikiriyāyāti . ayameva
ariyo aṭṭhaṅgiko maggo seyyathīdaṃ sammādiṭṭhi sammāsaṅkappo
sammāvācā sammākammanto sammāājīvo sammāvāyāmo
sammāsati sammāsamādhi ayaṃ kho mahāli maggo ayaṃ paṭipadā
etesaṃ dhammānaṃ sacchikiriyāya.
[255] Ekamidāhaṃ mahāli samayaṃ kosambiyaṃ viharāmi ghositārāme.
Athakho dve pabbajitā maṇḍiyo ca paribbājako jāliyo
ca dārupattikantevāsī yenāhaṃ tenupasaṅkamiṃsu upasaṅkamitvā mayā
saddhiṃ sammodiṃsu sammodanīyaṃ kathaṃ sārāṇīyaṃ vītisāretvā ekamantaṃ
aṭṭhaṃsu . ekamantaṃ ṭhitā kho te dve pabbajitā maṃ etadavocuṃ
kinnu kho āvuso gotama taṃ jīvaṃ taṃ sarīraṃ udāhu aññaṃ jīvaṃ aññaṃ
sarīranti.
{255.1} Tenahāvuso suṇātha sādhukaṃ manasikarotha bhāsissāmi .
Idhāvuso tathāgato loke uppajjati arahaṃ sammāsambuddho .pe. (yathā
sāmaññaphale evaṃ vitthāretabbaṃ) .pe. evaṃ kho āvuso bhikkhu
sīlasampanno hoti .pe. Paṭhamaṃ jhānaṃ upasampajja viharati.
{255.2} Yo nu kho āvuso bhikkhu evaṃ jānāti evaṃ passati
kallannu kho tassetaṃ vacanāya taṃ jīvaṃ taṃ sarīranti vā aññaṃ jīvaṃ
aññaṃ sarīranti vāti . yo so āvuso bhikkhu evaṃ jānāti evaṃ
passati na kallaṃ tassetaṃ vacanāya taṃ jīvaṃ taṃ sarīranti vā aññaṃ
jīvaṃ aññaṃ sarīranti vā . ahaṃ kho panetaṃ āvuso evaṃ jānāmi
evaṃ passāmi atha ca panāhaṃ na vadāmi taṃ jīvaṃ taṃ sarīranti vā aññaṃ
jīvaṃ aññaṃ sarīranti vāti . dutiyaṃ jhānaṃ . tatiyaṃ jhānaṃ . catutthaṃ
jhānaṃ upasampajja viharati . yo nu kho āvuso bhikkhu evaṃ jānāti evaṃ
passati kallannu kho tassetaṃ vacanāya taṃ jīvaṃ taṃ sarīranti vā aññaṃ
jīvaṃ aññaṃ sarīranti vāti . yo so āvuso bhikkhu evaṃ jānāti evaṃ
Passati na kallaṃ tassetaṃ vacanāya taṃ jīvaṃ taṃ sarīranti vā aññaṃ
jīvaṃ aññaṃ sarīranti vāti . ahaṃ kho panetaṃ āvuso evaṃ
jānāmi evaṃ passāmi atha ca panāhaṃ na vadāmi taṃ jīvaṃ taṃ sarīranti
vā aññaṃ jīvaṃ aññaṃ sarīranti vāti . ñāṇadassanāya cittaṃ
abhinīharati abhininnāmeti . yo nu kho āvuso bhikkhu .pe. nāparaṃ
itthattāyāti pajānāti.
{255.3} Yo nu kho āvuso bhikkhu evaṃ jānāti evaṃ passati
kallaṃ nu kho tassetaṃ vacanāya taṃ jīvaṃ taṃ sarīranti vā aññaṃ jīvaṃ
aññaṃ sarīranti vāti . yo so āvuso bhikkhu evaṃ jānāti evaṃ
passati na kallaṃ tassetaṃ vacanāya taṃ jīvaṃ taṃ sarīranti vā aññaṃ
jīvaṃ aññaṃ sarīranti vāti . ahaṃ kho panetaṃ āvuso evaṃ jānāmi
evaṃ passāmi atha ca panāhaṃ na vadāmi taṃ jīvaṃ taṃ sarīranti vā aññaṃ
jīvaṃ aññaṃ sarīranti vāti . idamavoca bhagavā . attamano
oṭṭhaddho licchavi bhagavato bhāsitaṃ abhinandīti.
Mahālisuttaṃ chaṭṭhaṃ niṭṭhitaṃ.
--------------
Jāliyasuttaṃ sattamaṃ
[256] Evamme sutaṃ . ekaṃ samayaṃ bhagavā kosambiyaṃ viharati
ghositārāme . athakho dve pabbajitā maṇḍiyo ca paribbājako
jāliyo ca dārupattikantevāsī yena bhagavā tenupasaṅkamiṃsu upasaṅkamitvā
bhagavatā saddhiṃ sammodiṃsu sammodanīyaṃ kathaṃ sārāṇīyaṃ vītisāretvā
ekamantaṃ aṭṭhaṃsu . ekamantaṃ ṭhitā kho te dve pabbajitā
bhagavantaṃ etadavocuṃ kinnu kho āvuso bho gotama taṃ jīvaṃ taṃ
sarīraṃ udāhu aññaṃ jīvaṃ aññaṃ sarīranti.
{256.1} Tenahāvuso suṇātha sādhukaṃ manasikarotha bhāsissāmīti.
Evamāvusoti kho te dve pabbajitā bhagavato paccassosuṃ . bhagavā
etadavoca idha āvuso tathāgato loke uppajjati arahaṃ sammāsambuddho
.pe. (yathā sāmaññaphale evaṃ vitthāretabbaṃ) .pe. Evaṃ kho āvuso
bhikkhu sīlasampanno hoti. Paṭhamaṃ jhānaṃ upasampajja viharati.
[257] Yo nu kho āvuso bhikkhu evaṃ jānāti evaṃ passati
kallannu kho tassetaṃ vacanāya taṃ jīvaṃ taṃ sarīranti vā aññaṃ jīvaṃ
aññaṃ sarīranti vāti . yo so āvuso bhikkhu evaṃ jānāti
evaṃ passati na kallaṃ tassetaṃ vacanāya .pe. ahaṃ kho panetaṃ
āvuso evaṃ jānāmi evaṃ passāmi atha ca panāhaṃ na vadāmi
taṃ jīvaṃ taṃ sarīranti vā aññaṃ jīvaṃ aññaṃ sarīranti vāti . dutiyaṃ
Jhānaṃ. Tatiyaṃ jhānaṃ. Catutthaṃ jhānaṃ upasampajja viharati.
[258] Yo nu kho āvuso bhikkhu evaṃ jānāti evaṃ passati
kallaṃ nu kho tassetaṃ vacanāya taṃ jīvaṃ taṃ sarīranti vā aññaṃ jīvaṃ
aññaṃ sarīranti vāti . yo so āvuso bhikkhu evaṃ jānāti evaṃ
passati na kallaṃ tassetaṃ vacanāya taṃ jīvaṃ taṃ sarīranti vā aññaṃ
jīvaṃ aññaṃ sarīranti vā . ahaṃ kho panetaṃ āvuso evaṃ jānāmi
evaṃ passāmi atha ca panāhaṃ na vadāmi taṃ jīvaṃ taṃ sarīranti
vā aññaṃ jīvaṃ aññaṃ sarīranti vāti . ñāṇadassanāya cittaṃ
abhinīharati abhininnāmeti . yo nu kho āvuso bhikkhu .pe.
Nāparaṃ itthattāyāti pajānāti.
[259] Yo nu kho āvuso bhikkhu evaṃ jānāti evaṃ passati
kallaṃ nu kho tassetaṃ vacanāya taṃ jīvaṃ taṃ sarīranti vā aññaṃ jīvaṃ
aññaṃ sarīranti vāti . yo so āvuso bhikkhu evaṃ jānāti evaṃ
passati na kallaṃ tassetaṃ vacanāya taṃ jīvaṃ taṃ sarīranti vā aññaṃ
jīvaṃ aññaṃ sarīranti vāti . ahaṃ kho panetaṃ āvuso evaṃ jānāmi
evaṃ passāmi atha ca panāhaṃ na vadāmi taṃ jīvaṃ taṃ sarīranti vā
aññaṃ jīvaṃ aññaṃ sarīranti vāti . idamavoca bhagavā . attamanā
te dve pabbajitā bhagavato bhāsitaṃ abhinandunti.
Jāliyasuttaṃ sattamaṃ niṭṭhitaṃ.
---------------
Mahāsīhanādasuttaṃ aṭṭhamaṃ
[260] Evamme sutaṃ . ekaṃ samayaṃ bhagavā ujuññāyaṃ viharati
kaṇṇakathale migadāye . athakho acelo kassapo yena bhagavā
tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ
sārāṇīyaṃ vītisāretvā ekamantaṃ aṭṭhāsi . ekamantaṃ ṭhito kho
acelo kassapo bhagavantaṃ etadavoca sutametaṃ bho gotama samaṇo
gotamo sabbantapaṃ garahati sabbantapassiṃ lūkhājīviṃ ekaṃsena upakkosati
upavadatīti ye te bho gotama evamāhaṃsu samaṇo gotamo
sabbantapaṃ garahati sabbantapassiṃ lūkhājīviṃ ekaṃsena upakkosati
upavadatīti kacci te bhoto gotamassa vuttavādino na ca bhavantaṃ
gotamaṃ abhūtena abbhācikkhanti dhammassa ca anudhammaṃ byākaronti
na ca koci sahadhammiko vādānuvādo gārayhaṃ ṭhānaṃ āgacchati
anabbhakkhātukāmā hi mayaṃ bhavantaṃ gotamanti.
{260.1} Ye te kassapa evamāhaṃsu samaṇo gotamo sabbantapaṃ
garahati sabbantapassiṃ lūkhājīviṃ ekaṃsena upakkosati upavadatīti na me
te vuttavādino abbhācikkhanti na ca maṃ te asatā abhūtena. Idhāhaṃ kassapa
ekaccaṃ tapassiṃ lūkhājīviṃ passāmi dibbena cakkhunā visuddhena atikkantamānusakena
kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannaṃ idha
panāhaṃ kassapa ekaccaṃ tapassiṃ lūkhājīviṃ passāmi dibbena cakkhunā
Visuddhena atikkantamānusakena kāyassa bhedā paraṃ maraṇā sugatiṃ
saggaṃ lokaṃ upapannaṃ.
{260.2} Idha panāhaṃ kassapa ekaccaṃ tapassiṃ appadukkhavihāriṃ
passāmi dibbena cakkhunā visuddhena atikkantamānusakena kāyassa
bhedā paraṃ maraṇā apāyaṃ duggatiṃ vinipātaṃ nirayaṃ upapannaṃ. Idha panāhaṃ
kassapa ekaccaṃ tapassiṃ appadukkhavihāriṃ passāmi dibbena cakkhunā
visuddhena atikkantamānusakena kāyassa bhedā paraṃ maraṇā sugatiṃ
saggaṃ lokaṃ upapannaṃ . sohaṃ kassapa imesaṃ tapassīnaṃ evaṃ āgatiñca
gatiñca cutiñca upapattiñca yathābhūtaṃ pajānāmi sohaṃ kiṃ sabbantapaṃ
garahissāmi sabbantapassiṃ lūkhājīviṃ ekaṃsena upakkosissāmi
upavadissāmi.
[261] Santi kassapa eke samaṇabrāhmaṇā paṇḍitā nipuṇā
kataparappavādā vālavedhirūpā te bhindantā maññe caranti paññāgatena
diṭṭhigatāni . tehipime saddhiṃ ekaccesu ṭhānesu samenti
ethaccesu ṭhānesu na samenti . yante ekaccaṃ 1- vadenti sādhūti
mayaṃpi taṃ ekaccaṃ vadema sādhūti . yante ekaccaṃ vadenti na
sādhūti mayaṃpi taṃ ekaccaṃ vadema na sādhūti . yante ekaccaṃ
vadenti sādhūti mayaṃ taṃ ekaccaṃ vadema na sādhūti . yante ekaccaṃ
vadenti na sādhūti mayaṃ taṃ ekaccaṃ vadema sādhūti . yaṃ mayaṃ
ekaccaṃ vadema sādhūti parepi taṃ ekaccaṃ vadenti sādhūti . yaṃ
@Footnote: 1 Sī. yantekacce.
Mayaṃ ekaccaṃ vadema na sādhūti parepi taṃ ekaccaṃ vadenti na
sādhūti . yaṃ mayaṃ ekaccaṃ vadema sādhūti parepi taṃ ekaccaṃ
vadenti na sādhūti . yaṃ mayaṃ ekaccaṃ vadema na sādhūti parepi
taṃ ekaccaṃ vadenti sādhūti.
{261.1} Tyāhaṃ upasaṅkamitvā evaṃ vadāmi yesu no āvuso
ṭhānesu na samenti tiṭṭhantu tāni ṭhānāni yesu ṭhānesu samenti
tattha viññū samanuyuñjantaṃ samanuggāhantaṃ samanubhāsantaṃ
satthārā vā satthāraṃ saṃghena vā saṃghaṃ ye imesaṃ bhavataṃ dhammā
akusalā akusalasaṃkhātā sāvajjā sāvajjasaṃkhātā asevitabbā
asevitabbasaṃkhātā naalamariyā naalamariyasaṃkhātā kaṇhā kaṇhasaṃkhātā
ko ime dhamme anavasesaṃ pahāya vattati samaṇo gotamo pare
vā pana bhonto gaṇācariyāti.
[262] Ṭhānaṃ kho panetaṃ kassapa vijjati yaṃ viññū samanuyuñjantā
samanuggāhantā samanubhāsantā evaṃ vadeyyuṃ ye imesaṃ bhavataṃ
dhammā akusalā akusalasaṃkhātā sāvajjā sāvajjasaṃkhātā asevitabbā
asevitabbasaṃkhātā naalamariyā naalamariyasaṃkhātā kaṇhā kaṇhasaṃkhātā
samaṇo gotamo ime dhamme anavasesaṃ pahāya vattati yaṃ vā pana
bhonto pare gaṇācariyāti . itiha kassapa viññū samanuyuñjantā
samanuggāhantā samanubhāsantā amhe va tattha yebhuyyena pasaṃseyyuṃ.
[263] Aparaṃpi no kassapa viññū samanuyuñjantaṃ samanuggāhantaṃ
samanubhāsantaṃ satthārā vā satthāraṃ saṃghena vā saṃghaṃ ye imesaṃ
Bhavataṃ dhammā kusalā kusalasaṃkhātā anavajjasaṃkhātā sevitabbā
sevitabbasaṃkhātā alamariyā alamariyasaṃkhātā sukkā sukkasaṃkhātā
ko ime dhamme anavasesaṃ bhonto samādāya vattati samaṇo gotamo
pare vā pana bhonto gaṇācariyāti.
{263.1} Ṭhānaṃ kho panetaṃ kassapa vijjati yaṃ viññū samanuyuñjantā
samanuggāhantā samanubhāsantā evaṃ vadeyyuṃ ye imesaṃ bhavataṃ dhammā kusalā
kusalasaṃkhātā anavajjā anavajjasaṃkhātā sevitabbā sevitabbasaṃkhātā
alamariyā alamariyasaṃkhātā sukkā sukkasaṃkhātā samaṇo gotamo
ime dhamme anavasesaṃ samādāya vattati yaṃ vā pana bhonto pare
gaṇācariyāti . itiha kassapa viññū samanuyuñjantā samanuggāhantā
samanubhāsantā amhe va tattha yebhuyyena pasaṃseyyuṃ.
[264] Aparaṃpi no kassapa viññū samanuyuñjantaṃ samanuggāhantaṃ
samanubhāsantaṃ satthārā vā satthāraṃ saṃghena vā saṃghaṃ ye imesaṃ
bhavataṃ dhammā kusalā kusalasaṃkhātā sāvajjā sāvajjasaṃkhātā
asevitabbā asevitabbasaṃkhātā naalamariyā naalamariyasaṃkhātā
kaṇhā kaṇhasaṃkhātā ko ime dhamme anavasesaṃ pahāya vattati
gotamasāvakasaṃgho vā pare vā pana bhonto gaṇācariyasāvakasaṃghāti .
Ṭhānaṃ kho panetaṃ kassapa vijjati yaṃ viññū samanuyuñjantā samanuggāhantā
samanubhāsantā evaṃ vadeyyuṃ ye imesaṃ bhavataṃ dhammā akusalā
akusalasaṃkhātā sāvajjā sāvajjasaṃkhātā asevitabbā
Asevitabbasaṃkhātā naalamariyā naalamariyasaṃkhātā kaṇhā kaṇhasaṃkhātā
gotamasāvakasaṃgho ime dhamme anavasesaṃ pahāya vattati yaṃ vā
pana bhonto pare gaṇācariyasāvakasaṃghāti . itiha kassapa viññū
samanuyuñjantā samanuggāhantā samanubhāsantā amhe va tattha
yebhuyyena pasaṃseyyuṃ.
[265] Aparaṃpi no kassapa viññū samanuyuñjantaṃ samanuggāhantaṃ
samanubhāsantaṃ satthārā vā satthāraṃ saṃghena vā saṃghaṃ ye imesaṃ bhavataṃ
dhammā kusalā kusalasaṃkhātā anavajjā anavajjasaṃkhātā sevitabbā
sevitabbasaṃkhātā alamariyā alamariyasaṃkhātā sukkā sukkasaṃkhātā ko
ime dhamme anavasesaṃ samādāya vattati gotamasāvakasaṃgho vā pare vā
pana bhonto gaṇācariyasāvakasaṃghāti.
{265.1} Ṭhānaṃ kho panetaṃ kassapa vijjati yaṃ viññū samanuyuñjantā
samanuggāhantā samanubhāsantā evaṃ vadeyyuṃ ye imesaṃ bhavataṃ dhammā
kusalā kusalasaṃkhātā anavajjā anavajjasaṃkhātā sevitabbā sevitabbasaṃkhātā
alamariyā alamariyasaṃkhātā sukkā sukkasaṃkhātā gotamasāvakasaṃgho
ime dhamme anavasesaṃ samādāya vattati yaṃ vā pana bhonto pare
gaṇācariyasāvakasaṃghāti . itiha kassapa viññū samanuyuñjantā
samanuggāhantā samanubhāsantā amhe va tattha yebhuyyena pasaṃseyyuṃ.
{265.2} Atthi kassapa maggo atthi paṭipadā yathāpaṭipanno
sāmaññeva ñassati sāmaṃ dakkhati samaṇo gotamo
Kālavādī bhūtavādī atthavādī dhammavādī vinayavādīti . katamo ca
kassapa maggo katamā ca paṭipadā yathāpaṭipanno sāmaññeva
ñassati sāmaṃ dakkhati samaṇo gotamo kālavādī bhūtavādī atthavādī
dhammavādī vinayavādīti . ayameva ariyo aṭṭhaṅgiko maggo seyyathīdaṃ
sammādiṭṭhi sammāsaṅkappo sammāvācā sammākammanto sammāājīvo
sammāvāyāmo sammāsati sammāsamādhi . ayaṃ kho kassapa maggo
ayaṃ paṭipadā yathāpaṭipanno sāmaññeva ñassati sāmaṃ dakkhati
samaṇo gotamo kālavādī bhūtavādī atthavādī dhammavādī vinayavādīti.
[266] Evaṃ vutte acelo kassapo bhagavantaṃ etadavoca imepi
kho āvuso gotama tapopakkamā etesaṃ samaṇabrāhmaṇānaṃ sāmaññasaṃkhātā
ca brahmaññasaṃkhātā ca acelako ca hoti muttācāro hatthāvalekhano na
ehibhadantiko na tiṭṭhabhadantiko nābhihataṃ na uddissa kataṃ na nimantanaṃ
sādiyati so na kumbhimukhā paṭiggaṇhāti na kalopimukhā paṭiggaṇhāti
na eḷakamantaraṃ na daṇḍakamantaraṃ na musalamantaraṃ na dvinnaṃ bhuñjamānānaṃ
na gabbhiniyā na pāyamānāya na purisantaragatāya na saṃkittīsu na yattha sā
upaṭṭhito hoti na yattha makkhikā saṇḍasaṇḍacārinī na macchaṃ na maṃsaṃ na suraṃ
na merayaṃ na thusodakaṃ pivati . So ekāgāriko vā hoti ekālopiko
dvāgāriko vā hoti dvālopiko sattāgāriko vā hoti sattālopiko
Ekissāpi dattiyā yāpeti dvīhipi dattīhi yāpeti sattahipi
dattīhi yāpeti ekāhikaṃpi āhāraṃ āhāreti dvīhikaṃpi āhāraṃ
āhāreti sattāhikaṃpi āhāraṃ āhāreti . iti evarūpaṃ addhamāsikaṃpi
pariyāyabhattabhojanānuyogamanuyutto viharati imepi kho āvuso gotama
tapopakkamā etesaṃ samaṇabrāhmaṇānaṃ sāmaññasaṃkhātā ca
brahmaññasaṃkhātā ca sākabhakkho vā hoti sāmākabhakkho vā hoti
nivārabhakkho vā hoti daddulabhakkho vā hoti niyāsabhakkho vā hoti
hatabhakkho vā hoti kaṇṇabhakkho vā hoti ācāmabhakkho vā hoti
piññākabhakkho vā hoti tiṇabhakkho vā hoti gomayabhakkho vā hoti
vanamūlaphalāhāro yāpeti pavattaphalabhojī.
{266.1} Ime kho āvuso gotama tapopakkamā etesaṃ
samaṇabrāhmaṇānaṃ sāmaññasaṃkhātā ca brahmaññasaṃkhātā ca
sāṇānipi dhāreti masāṇānipi dhāreti chavadussānipi dhāreti
paṃsukūlānipi dhāreti tiriṭānipi dhāreti ajinānipi dhāreti
ajinakkhipaṃpi dhāreti kusacīraṃpi dhāreti vākacīraṃpi dhāreti phalakacīraṃpi
dhāreti kesakambalaṃpi dhāreti vālakambalaṃpi dhāreti ulūkapakkhaṃpi
dhāreti kesamassulocakopi hoti kesamassulocanānuyogamanuyutto
ubbhaṭṭhakopi hoti āsanapaṭikkhitto ukkuṭikopi hoti ukkuṭikap-
padhānamanuyutto kaṇṭakapassayikopi hoti kaṇṭakapassaye
seyyaṃ kappeti phalakaseyyaṃpi kappeti taṇḍilaseyyaṃpi kappeti
ekapassayikopi hoti rajojalladharo abbhokāsiko hoti yathāsanthatiko
Vekaṭikopi hoti vikaṭabhojanānuyogamanuyutto āpānakopi hoti
āpānakamanuyutto sāyaṃ tatiyakaṃpi udakorohanānuyogamanuyutto
viharatīti.
[267] Acelako cepi kassapa hoti muttācāro hatthāvalekhano
.pe. iti evarūpaṃ addhamāsikaṃpi pariyāyabhattabhojanānuyogamanuyutto
viharati . tassa vāyaṃ sīlasampadā cittasampadā paññāsampadā
abhāvitā hoti asacchikatā . athakho so ārakā ca sāmaññā
ārakā ca brahmaññā . yato kho kassapa bhikkhu averaṃ abyāpajjhaṃ
mettacittaṃ bhāveti āsavānañca khayā anāsavañcetovimuttiṃ
paññāvimuttiṃ diṭṭhe va dhamme sayaṃ abhiññā sacchikatvā upasampajja
viharati. Ayaṃ vuccati kassapa bhikkhu samaṇo itipi brāhmaṇo itipi.
{267.1} Sākabhakkho cepi kassapa hoti sāmākabhakkho .pe.
Vanamūlaphalāhāro yāpeti pavattaphalabhojī . tassa vāyaṃ sīlasampadā
cittasampadā paññāsampadā abhāvitā hoti asacchikatā . athakho
so ārakā ca sāmaññā ārakā ca brahmaññā . yato kho
kassapa bhikkhu averaṃ abyāpajjhaṃ mettacittaṃ bhāveti āsavānañca
khayā anāsavañcetovimuttiṃ paññāvimuttiṃ diṭṭhe va dhamme sayaṃ
abhiññā sacchikatvā upasampajja viharati . ayaṃ vuccati kassapa
bhikkhu samaṇo itipi brāhmaṇo itipi.
{267.2} Sāṇāni cepi kassapa dhāreti masāṇānipi
dhāreti .pe. sāyaṃ tatiyakaṃpi udakorohanānuyogamanuyutto
Viharati . tassa vāyaṃ sīlasampadā cittasampadā paññāsampadā
abhāvitā hoti asacchikatā . athakho so ārakā ca sāmaññā
ārakā ca brahmaññā . yato kho kassapa bhikkhu *- averaṃ abyāpajjhaṃ
mettacittaṃ bhāveti āsavānañca khayā anāsavañcetovimuttiṃ
paññāvimuttiṃ diṭṭhe va dhamme sayaṃ abhiññā sacchikatvā upasampajja
viharati. Ayaṃ vuccati kassapa bhikkhu samaṇo itipi brāhmaṇo itipīti.
[268] Evaṃ vutte acelo kassapo bhagavantaṃ etadavoca
dukkaraṃ bho gotama sāmaññaṃ dukkaraṃ brahmaññanti . pakati kho
esā kassapa lokasmiṃ dukkaraṃ sāmaññaṃ dukkaraṃ brahmaññanti .
Acelako cepi kassapa hoti muttācāro hatthāvalekhano .pe.
Iti evarūpaṃ addhamāsikaṃpi pariyāyabhattabhojanānuyogamanuyutto viharati .
Imāya ca kassapa mattāya iminā ca tapopakkamena sāmaññaṃ vā
abhavissa brahmaññaṃ vā dukkaraṃ sudukkaraṃ netaṃ abhavissa kallaṃ
vacanāya dukkaraṃ sāmaññaṃ dukkaraṃ brahmaññanti sakkā ca panetaṃ
abhavissa kātuṃ gahapatinā vā gahapatiputtena vā antamaso
kumbhadāsiyāpi handāhaṃ acelako homi muttācāro hatthāvalekhano
.pe. iti evarūpaṃ addhamāsikaṃpi pariyāyabhattabhojanānuyogamanuyutto
viharāmīti.
{268.1} Yasmā ca kho kassapa aññatreva imāya ca mattāya
aññatra iminā ca tapopakkamena sāmaññaṃ vā hoti brahmaññaṃ
@Footnote:* mīkārkṛ´์ khagœ bhakkhu peḌna bhikkhu
Vā dukkaraṃ sudukkaraṃ tasmā etaṃ kallaṃ vacanāya dukkaraṃ sāmaññaṃ
dukkaraṃ brahmaññanti . yato kho kassapa bhikkhu averaṃ abyāpajjhaṃ
mettacittaṃ bhāveti āsavānañca khayā anāsavañcetovimuttiṃ
paññāvimuttiṃ diṭṭhe va dhamme sayaṃ abhiññā sacchikatvā upasampajja
viharati. Ayaṃ vuccati kassapa bhikkhu samaṇo itipi brāhmaṇo itipi.
{268.2} Sākabhakkho cepi kassapa hoti sāmākabhakkho .pe.
Vanamūlaphalāhāro yāpeti pavattaphalabhojī . imāya ca kassapa mattāya
iminā ca tapopakkamena sāmaññaṃ vā abhavissa brahmaññaṃ vā
dukkaraṃ sudukkaraṃ netaṃ abhavissa kallaṃ vacanāya dukkaraṃ sāmaññaṃ
dukkaraṃ brahmaññanti . sakkā ca panetaṃ abhavissa kātuṃ gahapatinā
vā gahapatiputtena vā antamaso kumbhadāsiyāpi handāhaṃ sākabhakkho
homi sāmākabhakkho vā .pe. Vanamūlaphalāhāro yāpemi pavattaphalabhojīti.
{268.3} Yasmā ca kho kassapa aññatreva imāya mattāya
aññatra iminā ca tapopakkamena sāmaññaṃ vā hoti brahmaññaṃ
vā dukkaraṃ sudukkaraṃ tasmā etaṃ kallaṃ vacanāya dukkaraṃ sāmaññaṃ
dukkaraṃ brahmaññanti . yato kho kassapa bhikkhu averaṃ abyāpajjhaṃ
mettacittaṃ bhāveti āsavānañca khayā anāsavañcetovimuttiṃ
paññāvimuttiṃ diṭṭhe va dhamme sayaṃ abhiññā sacchikatvā upasampajja
viharati. Ayaṃ vuccati kassapa bhikkhu samaṇo itipi brāhmaṇo itipi.
{268.4} Sāṇāni cepi kassapa dhāreti masāṇānipi dhāreti .pe.
Sāyaṃ tatiyakaṃpi udakorohanānuyogamanuyutto viharati . imāya ca
kassapa mattāya iminā ca tapopakkamena sāmaññaṃ vā abhavissa
brahmaññaṃ vā dukkaraṃ sudukkaraṃ netaṃ abhavissa kallaṃ vacanāya dukkaraṃ
sāmaññaṃ dukkaraṃ brahmaññanti . sakkā ca panetaṃ abhavissa kātuṃ
gahapatinā vā gahapatiputtena vā antamaso kumbhadāsiyāpi handāhaṃ
sāṇānipi dhāremi masāṇānipi dhāremi .pe. sāyaṃ tatiyakaṃpi
udakorohanānuyogamanuyutto viharāmīti.
{268.5} Yasmā ca kho kassapa aññatreva imāya ca mattāya
aññatra iminā ca tapopakkamena sāmaññaṃ vā hoti brahmaññaṃ
vā dukkaraṃ sudukkaraṃ tasmā etaṃ kallaṃ vacanāya dukkaraṃ sāmaññaṃ
dukkaraṃ brahmaññanti . yato kho kassapa bhikkhu averaṃ abyāpajjhaṃ
mettacittaṃ bhāveti āsavānañca khayā anāsavañcetovimuttiṃ
paññāvimuttiṃ diṭṭhe va dhamme sayaṃ abhiññā sacchikatvā upasampajja
viharati. Ayaṃ vuccati kassapa bhikkhu samaṇo itipi brāhmaṇo itipīti.
[269] Evaṃ vutte acelo kassapo bhagavantaṃ etadavoca
dujjāno bho gotama samaṇo dujjāno brāhmaṇoti . pakati kho
esā kassapa lokasmiṃ dujjāno samaṇo dujjāno brāhmaṇoti .
Acelako cepi kassapa hoti muttācāro hatthāvalekhano .pe.
Iti evarūpaṃ addhamāsikaṃpi pariyāyabhattabhojanānuyogamanuyutto viharati
imāya ca kassapa mattāya iminā ca tapopakkamena samaṇo vā
Abhavissa brāhmaṇo vā dujjāno sudujjāno netaṃ abhavissa kallaṃ
vacanāya dujjāno samaṇo dujjāno brāhmaṇoti . sakkā ca
panetaṃ abhavissa ñātuṃ gahapatinā vā gahapatiputtena vā antamaso
kumbhadāsiyāpi ayaṃpi acelo muttācāro hatthāvalekhano .pe. iti
evarūpaṃ addhamāsikaṃpi pariyāyabhattabhojanānuyogamanuyutto viharatīti.
{269.1} Yasmā ca kho kassapa aññatreva imāya ca mattāya aññatra
iminā ca tapopakkamena samaṇo vā hoti brāhmaṇo vā dujjāno
sudujjāno tasmā etaṃ kallaṃ vacanāya dujjāno samaṇo dujjāno
brāhmaṇoti . yato kho kassapa bhikkhu averaṃ abyāpajjhaṃ mettacittaṃ
bhāveti āsavānañca khayā anāsavañcetovimuttiṃ paññāvimuttiṃ diṭṭhe
va dhamme sayaṃ abhiññā sacchikatvā upasampajja viharati . ayaṃ vuccati
kassapa bhikkhu samaṇo itipi brāhmaṇo itipi.
{269.2} Sākabhakkho cepi kassapa hoti sāmākabhakkho .pe.
Vanamūlaphalāhāro yāpeti pavattaphalabhojī . imāya ca kassapa mattāya
iminā ca tapopakkamena samaṇo vā abhavissa brāhmaṇo vā dujjāno
sudujjāno netaṃ abhavissa kallaṃ vacanāya dujjāno samaṇo dujjāno
brāhmaṇoti . sakkā ca paneso abhavissa ñātuṃ gahapatinā vā
gahapatiputtena vā antamaso kumbhadāsiyāpi ayaṃ sākabhakkho vā hoti
sāmākabhakkho .pe. vanamūlaphalāhāro yāpeti pavattaphalabhojīti .
Yasmā ca kho kassapa aññatreva imāya ca mattāya aññatra iminā ca
Tapopakkamena samaṇo vā hoti brāhmaṇo vā dujjāno
sudujjāno tasmā etaṃ kallaṃ vacanāya dujjāno samaṇo
dujjāno brāhmaṇoti . yato ca kho kassapa bhikkhu averaṃ
abyāpajjhaṃ mettacittaṃ bhāveti āsavānañca khayā
anāsavañcetovimuttiṃ paññāvimuttiṃ diṭṭhe va dhamme sayaṃ
abhiññā sacchikatvā upasampajja viharati . ayaṃ vuccati
kassapa bhikkhu samaṇo itipi brāhmaṇo itipi.
{269.3} Sāṇāni cepi kassapa dhāreti masāṇānipi dhāreti .pe.
Sāyaṃ tatiyakaṃpi udakorohanānuyogamanuyutto viharati . imāya ca
kassapa mattāya iminā ca tapopakkamena samaṇo vā abhavissa
brāhmaṇo vā dujjāno sudujjāno netaṃ abhavissa kallaṃ vacanāya
dujjāno samaṇo dujjāno brāhmaṇoti . sakkā ca paneso
abhavissa ñātuṃ gahapatinā vā gahapatiputtena vā antamaso
kumbhadāsiyāpi ayaṃ sāṇānipi dhāreti masāṇānipi dhāreti .pe.
Sāyaṃ tatiyakaṃpi udakorohanānuyogamanuyutto viharatīti.
{269.4} Yasmā ca kho kassapa aññatreva imāya ca mattāya aññatra
iminā ca tapopakkamena samaṇo vā hoti brāhmaṇo vā dujjāno
sudujjāno tasmā etaṃ kallaṃ vacanāya dujjāno samaṇo dujjāno
brāhmaṇoti yato ca kho kassapa bhikkhu averaṃ abyāpajjhaṃ mettacittaṃ
bhāveti āsavānañca khayā anāsavañcetovimuttiṃ paññāvimuttiṃ diṭṭhe
va dhamme sayaṃ abhiññā sacchikatvā upasampajja viharati . ayaṃ vuccati
Kassapa bhikkhu samaṇo itipi brāhmaṇo itipīti.
[270] Evaṃ vutte acelo kassapo bhagavantaṃ etadavoca katamā
pana sā bho gotama sīlasampadā katamā cittasampadā katamā
paññāsampadāti . idha kassapa tathāgato loke uppajjati arahaṃ
sammāsambuddho .pe. Vitthāretabbo.
{270.1} Kathañca kassapa bhikkhu sīlasampanno hoti idha kassapa
bhikkhu pāṇātipātaṃ pahāya pāṇātipātā paṭivirato hoti nihitadaṇḍo
nihitasattho lajjī dayāpanno sabbapāṇabhūtahitānukampī viharati idaṃpissa
hoti sīlasampadāya .pe. so iminā ariyena sīlakkhandhena samannāgato
ajjhattaṃ anavajjasukhaṃ paṭisaṃvedeti evaṃ kassapa bhikkhu sīlasampanno
hoti ayaṃ kho sā kassapa sīlasampadā .pe. paṭhamaṃ jhānaṃ upasampajja
viharati idaṃpissa hoti cittasampadāya ayaṃ kho kassapa cittasampadā
.pe. ñāṇadassanāya cittaṃ abhinīharati abhininnāmeti idaṃpissa
hoti paññāsampadāya .pe. nāparaṃ itthattāyāti pajānāti
idaṃpissa hoti paññāsampadā ayaṃ kho kassapa ñāṇasampadā .
Imāya ca kassapa sīlasampadāya cittasampadāya paññāsampadāya
aññā sīlasampadā cittasampadā paññāsampadā uttaritarā vā
paṇītatarā vā natthi.
[271] Santi kassapa eke samaṇabrāhmaṇā sīlavādā te
anekapariyāyena sīlavaṇṇaṃ bhāsanti . yāvatā kassapa ariyaṃ paramaṃ
sīlaṃ nāhaṃ tattha attano samasamaṃ samanupassāmi kuto bhiyyo athakho
Ahameva tattha bhiyyo yadidaṃ adhisīlaṃ . santi kassapa eke
samaṇabrāhmaṇā tapojigucchavādā te anekapariyāyena tapojigucchāya
vaṇṇaṃ bhāsanti . yāvatā kassapa ariyā paramā tapojigucchā
nāhaṃ tattha attano samasamaṃ samanupassāmi kuto bhiyyo athakho
ahameva tattha bhiyyo yadidaṃ adhijegucchaṃ . santi kassapa eke
samaṇabrāhmaṇā paññāvādā te anekapariyāyena paññāya
vaṇṇaṃ bhāsanti . yāvatā kassapa ariyā paramā paññā nāhaṃ tattha
attano samasamaṃ samanupassāmi kuto bhiyyo athakho ahameva tattha
bhiyyo yadidaṃ adhipaññaṃ . santi kassapa eke samaṇabrāhmaṇā
vimuttivādā te anekapariyāyena vimuttiyā vaṇṇaṃ bhāsanti .
Yāvatā kassapa ariyā paramā vimutti nāhaṃ tattha attano samasamaṃ
samanupassāmi kuto bhiyyo athakho ahameva tattha bhiyyo yadidaṃ adhivimutti.
[272] Ṭhānaṃ kho panetaṃ kassapa vijjati yaṃ aññatitthiyā
paribbājakā evaṃ vadeyyuṃ sīhanādaṃ kho samaṇo gotamo nadati
tañca kho suññāgāre nadati no ca parisāsūti . te mā
hevantissu vacanīyā . sīhanādañca samaṇo gotamo nadati parisāsu
ca nadati no ca suññāgāre nadatīti evamassu kassapa vacanīyā .
Ṭhānaṃ kho panetaṃ kassapa vijjati yaṃ aññatitthiyā paribbājakā
evaṃ vadeyyuṃ sīhanādaṃ samaṇo gotamo nadati parisāsu ca nadati
No ca kho visārado nadatīti . te mā hevantissu vacanīyā .
Sīhanādañca samaṇo gotamo nadati parisāsu ca nadati visārado ca
nadatīti evamassu kassapa vacanīyā.
{272.1} Ṭhānaṃ kho panetaṃ kassapa vijjati yaṃ aññatitthiyā
paribbājakā evaṃ vadeyyuṃ sīhanādañca samaṇo gotamo nadati
parisāsu ca nadati visārado ca nadati no ca kho naṃ pañhaṃ pucchanti
pañhañca naṃ pucchanti no ca kho nesaṃ pañhaṃ puṭṭho byākaroti
pañhañca nesaṃ puṭṭho byākaroti no ca pañhassa byākaraṇena
cittaṃ ārādheti pañhassa ca byākaraṇena cittaṃ ārādheti no ca
kho sotabbaṃ maññanti sotabbañcassa maññanti no ca kho sutvā
pasīdanti sutvā cassa pasīdanti no ca kho pasannā pasannākāraṃ
karonti pasannā ca pasannākāraṃ karonti no ca kho tathattāya
paṭipajjanti tathattāya ca paṭipajjanti no ca kho paṭipannā
ārādhentīti . te mā hevantissu vacanīyā . sīhanādañca samaṇo
gotamo nadati parisāsu ca nadati visārado ca nadati pañhañca naṃ
pucchanti pañhañca nesaṃ puṭṭho byākaroti pañhassa ca veyyākaraṇena
cittaṃ ārādheti sotabbañcassa maññanti sutvā cassa pasīdanti
pasannā ca pasannākāraṃ karonti tathattāya paṭipajjanti paṭipannā
ca ārādhentīti evamassu kassapa vacanīyā.
{272.2} Ekamidāhaṃ kassapa samayaṃ rājagahe viharāmi gijjhakūṭe pabbate.
Tatra maṃ aññataro te sabrahmacārī nigrodho nāma paribbājako
Adhijegucche pañhaṃ pucchi tassāhaṃ adhijegucche pañhaṃ puṭṭho byākāsiṃ
byākate ca pana me attamano ahosi paraṃ viya mattāyāti.
[273] Ko hi bhante bhagavato dhammaṃ sutvā na attamano assa
paraṃ viya mattāya ahaṃpi bhante bhagavato dhammaṃ sutvā attamano
paraṃ viya mattāya abhikkantaṃ bhante abhikkantaṃ bhante seyyathāpi
bhante nikkujjitaṃ vā ukkujjeyya paṭicchannaṃ vā vivareyya mūḷhassa
vā maggaṃ ācikkheyya andhakāre vā telapajjotaṃ dhāreyya cakkhumanto
rūpāni dakkhantīti evameva bhagavatā anekapariyāyena dhammo desito
esāhaṃ bhante bhagavantaṃ saraṇaṃ gacchāmi dhammañca bhikkhusaṃghañca
labheyyāhaṃ bhante bhagavato santike pabbajjaṃ labheyyaṃ upasampadanti.
[274] Yo kho kassapa aññatitthiyapubbo imasmiṃ dhammavinaye
ākaṅkhati pabbajjaṃ ākaṅkhati upasampadaṃ so cattāro māse
parivasati catunnaṃ māsānaṃ accayena āraddhacittā bhikkhū pabbājenti
upasampādenti bhikkhubhāvāya apica mettha puggalavemattatā viditāti .
Sace bhante aññatitthiyapubbo imasmiṃ dhammavinaye ākaṅkhati pabbajjaṃ
ākaṅkhati upasampadaṃ cattāro māse parivasati catunnaṃ māsānaṃ accayena
āraddhacittā bhikkhū pabbājenti upasampādenti bhikkhubhāvāya ahaṃ
cattāri vassāni parivasissāmi catunnaṃ vassānaṃ accayena āraddhacittā
bhikkhū pabbājenti upasampādenti bhikkhubhāvāyāti . alattha kho
acelo kassapo bhagavato santike pabbajjaṃ alattha upasampadaṃ .
Acirūpasampanno kho panāyasmā kassapo eko vūpakaṭṭho appamatto
ātāpī pahitatto viharanto nacirasseva yassatthāya kulaputtā sammadeva
agārasmā anagāriyaṃ pabbajanti tadanuttaraṃ brahmacariyapariyosānaṃ
diṭṭhe va dhamme sayaṃ abhiññā sacchikatvā upasampajja viharati
khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti
abbhaññāsi. Aññataro kho panāyasmā kassapo arahataṃ ahosīti.
Mahāsīhanādasuttaṃ aṭṭhamaṃ niṭṭhitaṃ.
---------------
Poṭṭhapādasuttaṃ navamaṃ
[275] Evamme sutaṃ . ekaṃ samayaṃ bhagavā sāvatthiyaṃ viharati
jetavane anāthapiṇḍikassārāme . tena kho pana samayena poṭṭhapādo
paribbājako samayappavādake tiṇḍukācire ekasārike mallikārāme
paṭivasati mahatiyā paribbājakaparisāya saddhiṃ tiṃsamattehi paribbājakasatehi.
Athakho bhagavā pubbaṇhasamayaṃ nivāsetvā pattacīvaramādāya sāvatthiyaṃ
piṇḍāya pāvisi . athakho bhagavato etadahosi atippago kho tāva
sāvatthiyaṃ piṇḍāya carituṃ yannūnāhaṃ yena samayappavādako tiṇḍukāciro
ekasāliko mallikārāmo yena poṭṭhapādo paribbājako tenupasaṅkameyyanti.
Athakho bhagavā yena samayappavādako tiṇḍukāciro ekasāliko mallikārāmo
tenupasaṅkami.
[276] Tena kho pana samayena poṭṭhapādo paribbājako mahatiyā
paribbājakaparisāya saddhiṃ nisinno hoti unnādiniyā uccāsaddamahāsaddāya
anekavihitaṃ tiracchānakathaṃ kathentiyā . seyyathīdaṃ . rājakathaṃ corakathaṃ
mahāmattakathaṃ senākathaṃ bhayakathaṃ yuddhakathaṃ annakathaṃ pānakathaṃ
vatthakathaṃ sayanakathaṃ mālākathaṃ gandhakathaṃ ñātikathaṃ yānakathaṃ gāmakathaṃ
nigamakathaṃ nagarakathaṃ janapadakathaṃ itthīkathaṃ purisakathaṃ surākathaṃ visikhākathaṃ
kumbhaṭṭhānakathaṃ pubbapetakathaṃ nānattakathaṃ lokakkhāyikaṃ samuddakkhāyikaṃ
itibhavābhavakathaṃ iti vā . addasā kho poṭṭhapādo paribbājako
Bhagavantaṃ dūrato va āgacchantaṃ disvāna sakaparisaṃ saṇṭhapesi
appasaddā bhonto hontu mā bhonto saddamakattha ayaṃ samaṇo
gotamo āgacchati appasaddakāmo kho panāyasmā so appasaddassa
vaṇṇavādī appevanāma appasaddaṃ parisaṃ viditvā upasaṅkamitabbaṃ
maññeyyāti. Evaṃ vutte te paribbājakā tuṇhī ahesuṃ.
[277] Athakho bhagavā yena poṭṭhapādo paribbājako tenupasaṅkami.
Athakho poṭṭhapādo paribbājako bhagavantaṃ etadavoca etu kho bhante
bhagavā svāgataṃ bhante bhagavato cirassaṃ kho bhante bhagavā imaṃ
pariyāyamakāsi yadidaṃ idhāgamanāya nisīdatu bhante bhagavā idamāsanaṃ
paññattanti . nisīdi bhagavā paññatte āsane . poṭṭhapādopi
kho paribbājako aññataraṃ nīcaṃ āsanaṃ gahetvā ekamantaṃ nisīdi .
Ekamantaṃ nisinnaṃ kho poṭṭhapādaṃ paribbājakaṃ bhagavā etadavoca
kāya nottha poṭṭhapāda etarahi kathāya sannisinnā kā ca pana
vo antarākathā vippakatāti.
[278] Evaṃ vutte poṭṭhapādo paribbājako bhagavantaṃ etadavoca
tiṭṭhatesā bhante kathā yāya mayaṃ etarahi kathāya sannisinnā
nesā bhante kathā bhagavato dullabhā bhavissati pacchāpi savanāya
purimāni bhante divasāni purimatarāni nānātitthiyānaṃ samaṇabrāhmaṇānaṃ
kotuhalasālāya sannisinnānaṃ sannipatitānaṃ abhisaññānirodhe kathā
udapādi kathaṃ nu kho bho abhisaññānirodho hotīti tatrekacce
Evamāhaṃsu ahetu appaccayā purisassa saññā uppajjatipi nirujjhatipi
yasmiṃ samaye uppajjati saññī tasmiṃ samaye hoti yasmiṃ samaye
nirujjhati asaññī tasmiṃ samaye hotīti ittheke abhisaññānirodhaṃ
paññapenti tamañño evamāha na kho pana metaṃ bho evaṃ bhavissati
saññā hi bho purisassa attā so ca kho upetipi apetipi
yasmiṃ samaye upeti saññī tasmiṃ samaye hoti yasmiṃ samaye apeti
asaññī tasmiṃ samaye hotīti ittheke abhisaññānirodhaṃ paññapenti
{278.1} tamañño evamāha na kho pana metaṃ bho evaṃ bhavissati
santi hi bho samaṇabrāhmaṇā mahiddhikā mahānubhāvā te imassa
purisassa saññaṃ upakaḍḍhantipi apakaḍḍhantipi yasmiṃ samaye
upakaḍḍhanti saññī tasmiṃ samaye hoti yasmiṃ samaye apakaḍḍhanti
asaññī tasmiṃ samaye hotīti ittheke abhisaññānirodhaṃ paññapenti
tamañño evamāha na kho pana metaṃ bho evaṃ bhavissati santi hi bho devā
mahiddhikā mahānubhāvā te imassa purisassa saññaṃ upakkaḍḍhantipi
apakkaḍḍhantipi yasmiṃ samaye upakkaḍḍhanti saññī tasmiṃ samaye
hoti yasmiṃ samaye apakkaḍḍhanti asaññī tasmiṃ samaye hotīti
ittheke abhisaññānirodhaṃ paññapenti tassa mayhaṃ bhante bhagavantaṃyeva
ārabbha sati udapādi aho nūna bhagavā aho nūna sugato yo imesaṃ
dhammānaṃ sukusaloti bhagavā bhante kusalo bhagavā pakataññū
abhisaññānirodhassa kathannu kho bhante abhisaññānirodho hotīti.
[279] Tatra poṭṭhapāda ye te samaṇabrāhmaṇā evamāhaṃsu
ahetu appaccayā purisassa saññā uppajjatipi nirujjhatipīti ādito
va nesaṃ aparaddhaṃ . taṃ kissa hetu . Sahetu hi poṭṭhapāda sappaccayā
purisassa saññā uppajjatipi nirujjhatipi sikkhā ekā saññā
uppajjatipi sikkhā ekā saññā nirujjhatipi
{279.1} kā ca sikkhāti bhagavā avoca. Idha poṭṭhapāda tathāgato
loke uppajjati arahaṃ sammāsambuddho .pe. (yathā sāmaññaphale evaṃ
vitthāretabbaṃ) . evaṃ kho poṭṭhapāda bhikkhu sīlasampanno hoti .pe.
Tassime pañca nīvaraṇe pahīne attani samanupassato pāmojjaṃ jāyati
pamuditassa pīti jāyati pītimanassa kāyo passambhati passaddhakāyo
sukhaṃ vedayati sukhino cittaṃ samādhiyati . so vivicceva kāmehi vivicca
akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ
upasampajja viharati tassa yā purimā kāmasaññā sā nirujjhati
vivekajapītisukhasukhumasaccasaññā tasmiṃ samaye hoti
vivekajapītisukhasukhumasaccasaññīyeva tasmiṃ hoti evaṃpi sikkhā ekā
saññā uppajjati sikkhā ekā saññā nirujjhati ayaṃpi sikkhāti
bhagavā avoca.
[280] Puna caparaṃ poṭṭhapāda bhikkhu vitakkavicārānaṃ vūpasamā
ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ
pītisukhaṃ dutiyaṃ jhānaṃ upasampajja viharati tassa yā purimā vivekajapītisukha-
sukhumasaccasaññā sā nirujjhati samādhijapītisukhasukhumasaccasaññā
Tasmiṃ samaye hoti samādhijapītisukhasukhumasaccasaññīyeva tasmiṃ samaye
hoti evaṃpi sikkhā ekā saññā uppajjati sikkhā ekā saññā
nirujjhati ayaṃpi sikkhāti bhagavā avoca.
[281] Puna caparaṃ poṭṭhapāda bhikkhu pītiyā ca virāgā upekkhako
ca viharati sato ca sampajāno sukhañca kāyena paṭisaṃvedeti yaṃ taṃ
ariyā ācikkhanti upekkhako satimā sukhavihārīti tatiyaṃ jhānaṃ
upasampajja viharati tassa yā purimā samādhijapītisukhasukhumasaccasaññā
sā nirujjhati upekkhāsukhasukhumasaccasaññā tasmiṃ samaye hoti
upekkhāsukhasukhumasaccasaññīyeva tasmiṃ samaye hoti evaṃpi sikkhā
ekā saññā uppajjati sikkhā ekā saññā nirujjhati ayaṃpi
sikkhāti bhagavā avoca.
[282] Puna caparaṃ poṭṭhapāda bhikkhu sukhassa ca pahānā dukkhassa
ca pahānā pubbe va somanassadomanassānaṃ atthaṅgamā adukkhamasukhaṃ
upekkhāsatipārisuddhiṃ catutthaṃ jhānaṃ upasampajja viharati tassa yā purimā
upekkhāsukhasukhumasaccasaññā sā nirujjhati adukkhamasukhasukhumasaccasaññā
tasmiṃ samaye hoti adukkhamasukhasukhumasaccasaññīyeva tasmiṃ samaye hoti
evaṃpi sikkhā ekā saññā uppajjati sikkhā ekā saññā nirujjhati
ayaṃpi sikkhāti bhagavā avoca.
[283] Puna caparaṃ poṭṭhapāda bhikkhu sabbaso rūpasaññānaṃ
samatikkamā paṭighasaññānaṃ atthaṅgamā nānattasaññānaṃ amanasikārā
Ananto ākāsoti ākāsānañcāyatanaṃ upasampajja viharati tassa yā
purimā rūpasaññā sā nirujjhati ākāsānañcāyatanasukhumasaccasaññā
tasmiṃ samaye hoti ākāsānañcāyatanasukhumasaccasaññīyeva tasmiṃ
samaye hoti evaṃpi sikkhā ekā saññā uppajjati sikkhā ekā
saññā nirujjhati ayaṃpi sikkhāti bhagavā avoca.
[284] Puna caparaṃ poṭṭhapāda bhikkhu sabbaso ākāsānañcāyatanaṃ
samatikkamma anantaṃ viññāṇanti viññāṇañcāyatanaṃ upasampajja
viharati tassa yā purimā ākāsānañcāyatanasukhumasaccasaññā sā
nirujjhati viññāṇañcāyatanasukhumasaccasaññā tasmiṃ samaye hoti
viññāṇañcāyatanasukhumasaccasaññīyeva tasmiṃ samaye hoti evaṃpi
sikkhā ekā saññā uppajjati sikkhā ekā saññā nirujjhati
ayaṃpi sikkhāti bhagavā avoca.
[285] Puna caparaṃ poṭṭhapāda bhikkhu sabbaso viññāṇañcāyatanaṃ
samatikkamma natthi kiñcīti ākiñcaññāyatanaṃ upasampajja viharati
tassa yā purimā viññāṇañcāyatanasukhumasaccasaññā sā nirujjhati
ākiñcaññāyatanasukhumasaccasaññā tasmiṃ samaye hoti
ākiñcaññāyatanasukhumasaccasaññīyeva tasmiṃ samaye hoti evaṃpi sikkhā
ekā saññā uppajjati sikkhā ekā saññā nirujjhati ayaṃpi sikkhāti
bhagavā avoca.
[286] Yathā kho poṭṭhapāda bhikkhu idha sakasaññī hoti so
Tato amutra tato amutra anupubbena saññaggaṃ phusati tassa saññagge
ṭhitassa evaṃ hoti cetayamānassa me pāpiyo acetayamānassa me
seyyo ahañceva kho pana ceteyyaṃ abhisaṃkhareyyaṃ imā ca me
saññā nirujjheyyuṃ aññā ca oḷārikā saññā uppajjeyyuṃ
yannūnāhaṃ na ceva ceteyyaṃ na ca abhisaṃkhareyyanti . so na ceva
ceteti na ca abhisaṃkharoti tassa acetayato anabhisaṃkharato tā ceva
saññā nirujjhanti aññā ca oḷārikā saññā na uppajjanti
so nirodhaṃ phusati . evaṃ kho poṭṭhapāda anupubbābhisaññānirodha-
sampajānasamāpatti hoti . taṃ kiṃ maññasi poṭṭhapāda api nu kho
te ito pubbe evarūpā anupubbābhisaññānirodhasampajānasamāpatti
sutapubbāti . No hetaṃ bhante evaṃ kho ahaṃ bhante bhagavatā dhammaṃ desitaṃ 1-
ājānāmīti.
{286.1} Yato kho poṭṭhapāda bhikkhu sakasaññī hoti so tato
amutra tato amutra anupubbena saññaggaṃ phusati tassa saññagge
ṭhitassa evaṃ hoti cetayamānassa me pāpiyo acetayamānassa me seyyo
ahañceva kho pana ceteyyaṃ abhisaṃkhareyyaṃ imā ca me saññā nirujjheyyuṃ
aññā ca oḷārikā saññā uppajjeyyuṃ yannūnāhaṃ na ceva ceteyyaṃ
na ca abhisaṃkhareyyanti. So na ceva ceteti na ca abhisaṃkharoti tassa acetayato
anabhisaṃkharato tā ceva saññā nirujjhanti aññā ca oḷārikā saññā na
@Footnote: 1 Sī. bhagavato bhāsitaṃ.
Uppajjanti so nirodhaṃ phusati . evaṃ kho poṭṭhapāda anupubbābhisaññā-
nirodhasampajānasamāpatti hotīti.
[287] Evaṃ poṭṭhapādāti . ekañceva nu kho bhante bhagavā
saññaggaṃ paññapeti udāhu puthūpi saññagge paññapetīti .
Ekaṃpi kho poṭṭhapāda ahaṃ saññaggaṃ paññapemi puthūpi saññagge
paññapemīti . yathākathaṃ pana bhante bhagavā ekaṃpi saññaggaṃ
paññapeti puthūpi saññagge paññapetīti . yathā yathā kho
poṭṭhapāda nirodhaṃ phusati tathā tathā ahaṃ saññaggaṃ paññapemi
evaṃ kho ahaṃ poṭṭhapāda ekaṃpi saññaggaṃ paññapemi puthūpi
saññagge paññapemīti.
[288] Saññā nu kho bhante paṭhamaṃ uppajjati pacchā ñāṇaṃ
udāhu ñāṇaṃ paṭhamaṃ uppajjati pacchā saññā udāhu saññā ca
ñāṇaṃ ca apubbaṃ acarimaṃ uppajjantīti . saññā kho poṭṭhapāda
paṭhamaṃ uppajjati pacchā ñāṇaṃ saññuppādā ca pana ñāṇuppādo
hoti so evaṃ pajānāti idappaccayā kira me ñāṇaṃ udapādīti .
Iminā ca kho etaṃ poṭṭhapāda pariyāyena veditabbaṃ yathā saññā paṭhamaṃ
uppajjati pacchā ñāṇaṃ saññuppādā ca pana ñāṇuppādo hotīti.
[289] Saññā nu kho bhante purisassa attā udāhu aññā
saññā añño attāti . kiṃ pana tvaṃ poṭṭhapāda attānaṃ
Paccesīti . oḷārikaṃ kho ahaṃ bhante attānaṃ paccemi rūpiṃ
cātummahābhūtikaṃ kavalīkārabhakkhanti . oḷāriko ca hi te poṭṭhapāda
attā abhavissa rūpī cātummahābhūtiko kavalīkārabhakkho . evaṃ
santaṃ kho te poṭṭhapāda aññā ca saññā abhavissa añño
attā . tadimināpetaṃ poṭṭhapāda pariyāyena veditabbaṃ yathā ca
aññā saññā bhavissati añño attā . tiṭṭhateva ayaṃ
poṭṭhapāda oḷāriko attā rūpī cātummahābhūtiko kavalīkārabhakkho
atha imassa purisassa aññā va saññā uppajjati aññā va
saññā nirujjhati iminā kho etaṃ poṭṭhapāda pariyāyena veditabbaṃ
yathā aññā va saññā bhavissati añño attāti.
[290] Manomayaṃ kho ahaṃ bhante attānaṃ paccemi sabbaṅgapaccaṅgaṃ
ahīnindriyanti . manomayo ca hi te poṭṭhapāda attā abhavissa
sabbaṅgapaccaṅgī ahīnindriyo . evaṃ santaṃpi kho te poṭṭhapāda
aññā ca saññā bhavissati añño attā . tadimināpetaṃ
poṭṭhapāda pariyāyena veditabbaṃ yathā aññā va saññā bhavissati
añño attā . tiṭṭhateva sāyaṃ ca poṭṭhapāda manomayo attā
sabbaṅgapaccaṅgī ahīnindriyo . athakho imassa purisassa aññā va
saññā uppajjati aññā saññā nirujjhati . Imināpi kho etaṃ poṭṭhapāda
pariyāyena veditabbaṃ yathā aññā ca saññā bhavissati añño attāti.
[291] Arūpiṃ kho ahaṃ bhante attānaṃ paccemi saññāmayanti.
Arūpī ca hi te poṭṭhapāda attā bhavissati saññāmayo . evaṃ
santaṃpi kho te poṭṭhapāda aññā va saññā bhavissati añño
attā . tadimināpetaṃ poṭṭhapāda pariyāyena veditabbaṃ yathā aññā
va saññā bhavissati añño attā . tiṭṭhateva sāyaṃ poṭṭhapāda
arūpī attā saññāmayo atha imassa purisassa aññā va saññā
uppajjati aññā va saññā nirujjhati . imināpi kho etaṃ
poṭṭhapāda pariyāyena veditabbaṃ yathā aññā va saññā bhavissati
añño attāti.
[292] Sakkā ca panetaṃ bhante mayā ñātuṃ saññā purisassa
attāti vā aññā ca saññā añño ca attāti vāti . dujjānaṃ
kho etaṃ poṭṭhapāda tayā aññadiṭṭhikena aññakhantikena aññarucikena
aññattha āyogena aññatthācariyakena saññā purisassa attāti
vā aññā ca saññā añño ca attāti vāti . sace taṃ bhante
mayā dujjānaṃ aññadiṭṭhikena aññakhantikena aññarucikena
aññattha āyogena aññatthācariyakena saññā purisassa
attāti vā aññā ca saññā añño ca attāti vā . kiṃ
pana bhante sassato loko idameva saccaṃ moghamaññanti . etaṃpi
kho poṭṭhapāda mayā abyākataṃ sassato loko idameva saccaṃ
moghamaññanti . kiṃ pana bhante asassato loko idameva saccaṃ
Moghamaññanti . etaṃpi kho poṭṭhapāda mayā abyākataṃ asassato
loko idameva saccaṃ moghamaññanti . kiṃ pana bhante antavā loko
.pe. anantavā loko . taṃ jīvaṃ taṃ sarīraṃ. Aññaṃ jīvaṃ aññaṃ sarīraṃ.
Hoti tathāgato parammaraṇā . na hoti tathāgato parammaraṇā . Hoti
ca na ca hoti tathāgato parammaraṇā . Neva hoti na na hoti tathāgato
parammaraṇā idameva saccaṃ moghamaññanti . etaṃpi kho poṭṭhapāda mayā
abyākataṃ neva hoti na na hoti tathāgato parammaraṇā idameva saccaṃ
moghamaññanti . kasmā panetaṃ bhante bhagavatā abyākatanti . Na hetaṃ
poṭṭhapāda atthasañhitaṃ na dhammasañhitaṃ na ādibrahmacariyakaṃ na
nibbidāya na virāgāya na nirodhāya na upasamāya na abhiññāya na
sambodhāya na nibbānāya saṃvattati tasmātaṃ mayā abyākatanti.
[293] Kiṃ pana bhante bhagavatā byākatanti . idaṃ dukkhanti
kho poṭṭhapāda mayā byākataṃ ayaṃ dukkhasamudayoti kho poṭṭhapāda
mayā byākataṃ ayaṃ dukkhanirodhoti kho poṭṭhapāda mayā byākataṃ
ayaṃ dukkhanirodhagāminī paṭipadāti kho poṭṭhapāda mayā byākatanti .
Kasmā panetaṃ bhante bhagavatā byākatanti . etaṃ hi poṭṭhapāda
atthasañhitaṃ etaṃ dhammasañhitaṃ etaṃ ādibrahmacariyakaṃ nibbidāya
virāgāya nirodhāya upasamāya abhiññāya sambodhāya nibbānāya
saṃvattati tasmā hetaṃ mayā byākatanti . evametaṃ bhagavā evametaṃ
Sugata yassadāni bhante bhagavā kālaṃ maññatīti . athakho bhagavā
uṭṭhāyāsanā pakkāmi.
[294] Athakho te paribbājakā acirapakkantassa bhagavato
poṭṭhapādaṃ paribbājakaṃ samantato vācāya sannipatodakena
sañjambharimakaṃsu evameva panāyaṃ bhavaṃ poṭṭhapādo yaññadeva samaṇo
gotamo bhāsati tantadevassa abbhanumodati evametaṃ bhagavā evametaṃ
sugatāti na kho pana mayaṃ kiñci samaṇassa gotamassa ekaṃsikaṃ
dhammaṃ desitaṃ ājānāma sassato lokoti vā asassato lokoti
vā .pe. Neva hoti na na hoti tathāgato parammaraṇāti vāti.
[295] Evaṃ vutte poṭṭhapādo paribbājako te paribbājake
etadavoca ahaṃpi kho bho na kiñci samaṇassa gotamassa ekaṃsikaṃ
dhammaṃ desitaṃ ājānāmi sassato lokoti vā .pe. neva hoti
na na hoti tathāgato parammaraṇāti vā apica samaṇo gotamo
bhūtaṃ tacchaṃ tathaṃ paṭipadaṃ paññapeti dhammaṭṭhitataṃ dhammaniyāmataṃ bhūtaṃ
kho pana tacchaṃ tathaṃ paṭipadaṃ paññapentassa dhammaṭṭhitataṃ dhammaniyāmataṃ
kathaṃ hi nāma mādiso viññū puriso samaṇassa gotamassa subhāsitaṃ
subhāsitato na abbhanumodeyyāti.
[296] Athakho dvīhatīhassa accayena citto ca hatthisāriputto
poṭṭhapādo ca paribbājako yena bhagavā tenupasaṅkamiṃsu upasaṅkamitvā
citto hatthisāriputto bhagavantaṃ abhivādetvā ekamantaṃ nisīdi .
Poṭṭhapādo pana paribbājako bhagavatā saddhiṃ sammodi sammodanīyaṃ
kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno
kho poṭṭhapādo paribbājako bhagavantaṃ etadavoca tadā maṃ bhante
te paribbājakā acirapakkantassa bhagavato samantato vācāya
sannipatodakena sañjambharimakaṃsu evameva panāyaṃ bhavaṃ poṭṭhapādo
paribbājako yaññadeva samaṇo gotamo bhāsati tantadevassa
abbhanumodati evametaṃ bhagavā evametaṃ sugatāti na kho pana mayaṃ
kiñci samaṇassa gotamassa ekaṃsikaṃ dhammaṃ desitaṃ ājānāma sassato
lokoti vā asassato lokoti vā .pe. neva hoti na na
hoti tathāgato paraṃ maraṇāti vāti evaṃ vuttāhaṃ bhante te
paribbājake etadavocaṃ ahaṃpi kho bho na kiñci samaṇassa gotamassa
ekaṃsikaṃ dhammaṃ desitaṃ ājānāmi sassato lokoti vā .pe.
Neva hoti na na hoti tathāgato paraṃ maraṇāti vā apica samaṇo
gotamo bhūtaṃ tacchaṃ tathaṃ paṭipadaṃ paññapeti dhammaṭṭhitataṃ dhammaniyāmataṃ
bhūtaṃ kho pana tacchaṃ tathaṃ paṭipadaṃ paññapentassa dhammaṭṭhitataṃ
dhammaniyāmataṃ kathaṃ hi nāma mādiso viññū puriso samaṇassa
gotamassa subhāsitaṃ subhāsitato na anumodeyyāti.
[297] Sabbeheva kho ete poṭṭhapāda paribbājakā andhā
acakkhukā tvaññeva nesaṃ eko cakkhumā . ekaṃsikāpi hi kho
poṭṭhapāda mayā dhammā desitā paññattā . anekaṃsikāpi hi
Kho poṭṭhapāda mayā dhammā desitā paññattā.
{297.1} Katame ca poṭṭhapāda mayā anekaṃsikā dhammā desitā
paññattā . sassato lokoti kho poṭṭhapāda mayā anekaṃsiko dhammo
desito paññatto . asassato lokoti kho poṭṭhapāda mayā anekaṃsiko
dhammo desito paññatto . antavā lokoti kho poṭṭhapāda mayā
anekaṃsiko dhammo desito paññatto . Anantavā lokoti kho poṭṭhapāda
mayā anekaṃsiko dhammo desito paññatto . taṃ jīvaṃ taṃ sarīranti kho
poṭṭhapāda mayā anekaṃsiko dhammo desito paññatto . aññaṃ
jīvaṃ aññaṃ sarīranti kho poṭṭhapāda mayā anekaṃsiko dhammo desito
paññatto . hoti tathāgato paraṃ maraṇāti kho poṭṭhapāda mayā
.pe. na hoti tathāgato paraṃ maraṇāti kho poṭṭhapāda mayā .pe.
Hoti ca na ca hoti tathāgato paraṃ maraṇāti kho poṭṭhapāda mayā
.pe. neva hoti na na hoti tathāgato paraṃ maraṇāti kho
poṭṭhapāda mayā anekaṃsiko dhammo desito paññatto.
{297.2} Kasmā cete poṭṭhapāda mayā anekaṃsikā dhammā desitā
paññattā . na hete poṭṭhapāda atthasañhitā na dhammasañhitā na
ādibrahmacariyakā na nibbidāya na virāgāya na nirodhāya na upasamāya
na abhiññāya na sambodhāya na nibbānāya saṃvattanti tasmā ete mayā
anekaṃsikā dhammā desitā paññattā.
[298] Katame ca poṭṭhapāda mayā ekaṃsikā dhammā desitā
Paññattā . idaṃ dukkhanti kho poṭṭhapāda mayā ekaṃsiko dhammo
desito paññatto . ayaṃ dukkhasamudayoti kho poṭṭhapāda mayā
ekaṃsiko dhammo desito paññatto . ayaṃ dukkhanirodhoti kho
poṭṭhapāda mayā ekaṃsiko dhammo desito paññatto . ayaṃ
dukkhanirodhagāminī paṭipadāti kho poṭṭhapāda mayā ekaṃsiko dhammo
desito paññatto.
{298.1} Kasmā cete poṭṭhapāda mayā ekaṃsikā dhammā desitā
paññattā . ete poṭṭhapāda mayā atthasañhitā ete dhammasañhitā
ete ādibrahmacariyakā ete nibbidāya virāgāya nirodhāya upasamāya
abhiññāya sambodhāya nibbānāya saṃvattanti tasmā ete mayā ekaṃsikā
dhammā desitā paññattā.
[299] Santi kho poṭṭhapāda ete samaṇabrāhmaṇā evaṃvādino
evaṃdiṭṭhino ekantasukhī attā hoti arogo parammaraṇāti tyāhaṃ
upasaṅkamitvā evaṃ vadāmi saccaṃ kira tumhe āyasmanto evaṃvādino
evaṃdiṭṭhino ekantasukhī attā hoti arogo parammaraṇāti . te
ce me evaṃ puṭṭhā āmāti paṭijānanti tyāhaṃ evaṃ vadāmi
apica pana tumhe āyasmanto ekantasukhaṃ lokaṃ jānaṃ passaṃ
viharathāti . iti puṭṭhā noti vadanti tyāhaṃ evaṃ vadāmi apica pana
tumhe āyasmanto ekaṃ vā rattiṃ ekaṃ vā divasaṃ upaḍḍhaṃ vā
rattiṃ upaḍḍhaṃ vā divasaṃ ekantasukhiṃ attānaṃ sampajānathāti .
Iti puṭṭhā noti vadanti tyāhaṃ evaṃ vadāmi apica pana tumhe
Āyasmanto jānātha ayaṃ maggo ayaṃ paṭipadā ekantasukhassa lokassa
sacchikiriyāyāti . iti puṭṭhā noti vadanti tyāhaṃ evaṃ vadāmi apica
pana tumhe āyasmanto yā tā devatā ekantasukhaṃ lokaṃ upapannā
tāsaṃ bhāsamānānaṃ saddaṃ suṇātha supaṭipannattha mārisā ujupaṭipannattha
mārisā ekantasukhassa lokassa sacchikiriyāya mayaṃpi hi mārisā evaṃpaṭipannā
ekantasukhaṃ lokaṃ upapannāti . iti puṭṭhā noti vadanti. Taṃ kiṃ maññasi
poṭṭhapāda nanu evaṃ sante tesaṃ samaṇabrāhmaṇānaṃ appāṭihirikataṃ
bhāsitaṃ sampajjatīti . addhā kho bhante evaṃ sante tesaṃ samaṇabrāhmaṇānaṃ
appāṭihirikataṃ bhāsitaṃ sampajjatīti.
[300] Seyyathāpi poṭṭhapāda puriso evaṃ vadeyya ahaṃ yā
imasmiṃ janapade janapadakalyāṇī taṃ icchāmi taṃ kāmemīti tamenaṃ
evaṃ vadeyyuṃ ambho purisa yaṃ tvaṃ janapadakalyāṇiṃ icchasi kāmesi
jānāsi taṃ janapadakalyāṇiṃ khattiyiṃ vā brāhmaṇiṃ vā vessiṃ vā
suddiṃ vāti . iti puṭṭho noti vadeyya tamenaṃ evaṃ vadeyyuṃ
ambho purisa yaṃ tvaṃ janapadakalyāṇiṃ icchasi kāmesi jānāsi taṃ
janapadakalyāṇiṃ evaṃnāmā vā evaṃgottā vā dīghā vā rassā
vā majjhimā vā kaṇhā vā sāmā vā maṅguracchavi vāti asukasmiṃ
gāme vā nigame vā nagare vāti . iti puṭṭho noti vadeyya
tamenaṃ evaṃ vadeyyuṃ ambho purisa yaṃ tvaṃ na jānāsi na passasi
taṃ tvaṃ icchasi kāmesīti . iti puṭṭho āmāti vadeyya . taṃ kiṃ
Maññasi poṭṭhapāda nanu evaṃ sante tassa purisassa appāṭihirikataṃ
bhāsitaṃ sampajjatīti . addhā kho bhante evaṃ sante tassa purisassa
appāṭihirikataṃ bhāsitaṃ sampajjatīti . evameva kho poṭṭhapāda ye
te samaṇabrāhmaṇā evaṃvādino evaṃdiṭṭhino ekantasukhī attā
hoti arogo parammaraṇāti tyāhaṃ upasaṅkamitvā evaṃ vadāmi
saccaṃ kira tumhe āyasmanto evaṃvādino evaṃdiṭṭhino ekantasukhī
attā hoti arogo parammaraṇāti . te ce me evaṃ puṭṭhā āmāti
paṭijānanti tyāhaṃ evaṃ vadāmi apica pana tumhe āyasmanto
ekantasukhaṃ lokaṃ jānaṃ passaṃ viharathāti.
{300.1} Iti puṭṭhā noti vadanti tyāhaṃ evaṃ vadāmi apica pana
tumhe āyasmanto ekaṃ vā rattiṃ ekaṃ vā divasaṃ upaḍḍhaṃ vā rattiṃ
upaḍḍhaṃ vā divasaṃ ekantasukhiṃ attānaṃ sampajānathāti . iti puṭṭhā
noti vadanti tyāhaṃ evaṃ vadāmi apica pana tumhe āyasmanto
jānātha ayaṃ maggo ayaṃ paṭipadā ekantasukhassa lokassa sacchikiriyāyāti.
Iti puṭṭhā noti vadanti tyāhaṃ evaṃ vadāmi apica pana tumhe āyasmanto
yā tā devatā ekantasukhaṃ lokaṃ upapannā tāsaṃ bhāsamānānaṃ saddaṃ
suṇātha supaṭipannattha mārisā ujupaṭipannattha mārisā ekantasukhassa
lokassa sacchikiriyāya mayaṃpi hi mārisā evaṃpaṭipannā ekantasukhaṃ
lokaṃ upapannāti . iti puṭṭhā noti vadanti . taṃ kiṃ maññasi
poṭṭhapāda nanu evaṃ sante tesaṃ samaṇabrāhmaṇānaṃ appāṭihirikataṃ
Bhāsitaṃ sampajjatīti . addhā kho bhante evaṃ sante tesaṃ
samaṇabrāhmaṇānaṃ appāṭihirikataṃ bhāsitaṃ sampajjatīti.
The Pali Tipitaka in Roman Character Volume 9 page 1-240.
http://84000.org/tipitaka/pitaka_item/roman_item_s.php?book=9&item=1&items=385
Classified by [Item Number] :-
http://84000.org/tipitaka/pitaka_item/roman_item_s.php?book=9&item=1&items=385&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=9&item=1&items=385
Compare with The Royal Version of Thai Tipitaka :-
http://84000.org/tipitaka/read/byitem_s.php?book=9&item=1&items=385
Study Atthakatha :-
http://84000.org/tipitaka/attha/attha.php?b=9&i=1
The Pali Atthakatha in Thai :-
http://84000.org/tipitaka/atthapali/read_th.php?B=4&A=1
The Pali Atthakatha in Roman :-
http://84000.org/tipitaka/atthapali/read_rm.php?B=4&A=1
Contents of The Tipitaka Volume 9
http://84000.org/tipitaka/read/?index_9
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
