paliTIPITAKA Volume 7 - Vinaya Pitaka 7

[59] Tena kho pana samayena bhikkhū tattha tattha khīlaṃ nikhaṇitvā @Footnote: ¹ Yu. Rā. satthuyā. ² Ma. saritakasipāṭikanti.

--------------------------------------------------------------------------------------------- page24.

Sambandhitvā cīvaraṃ sibbenti . cīvaraṃ vikaṇṇaṃ hoti . bhagavato etamatthaṃ ārocesuṃ .pe. anujānāmi bhikkhave kaṭhinaṃ kaṭhinarajjuṃ tattha tattha obandhitvā cīvaraṃ sibbetunti . visame kaṭhinaṃ pattharanti . kaṭhinaṃ paribhijjati .pe. na bhikkhave visame kaṭhinaṃ pattharitabbaṃ yo patthareyya āpatti dukkaṭassāti . chamāyaṃ kaṭhinaṃ pattharanti . kaṭhinaṃ paṃsukitaṃ hoti .pe. anujānāmi bhikkhave tiṇasanthārakanti . kaṭhinassa anto jirati .pe. anujānāmi bhikkhave anuvātaṃ paribhaṇḍaṃ āropetunti . kaṭhinaṃ nappahoti .pe. anujānāmi bhikkhave daṇḍakaṭhinaṃ vidalakaṃ ^1- salākaṃ vinaddhanarajjuṃ vinaddhanasuttakaṃ vinaddhitvā ^2- cīvaraṃ sibbetunti . suttantarikāyo visamā honti .pe. anujānāmi bhikkhave kaḷimbakanti . suttā vaṅkā honti .pe. Anujānāmi bhikkhave moghasuttakanti. [60] Tena kho pana samayena bhikkhū adhotehi pādehi kaṭhinaṃ akkamanti . kaṭhinaṃ dussati . bhagavato etamatthaṃ ārocesuṃ .pe. na bhikkhave adhotehi pādehi kaṭhinaṃ akkamitabbaṃ yo akkameyya āpatti dukkaṭassāti. [61] Tena kho pana samayena bhikkhū allehi pādehi kaṭhinaṃ akkamanti . kaṭhinaṃ dussati . bhagavato etamatthaṃ ārocesuṃ @Footnote: ¹ Ma. Yu. pidalakaṃ. ² Yu. vinandharajjuṃ vinandhanasuttakaṃ vinandhitvā.

--------------------------------------------------------------------------------------------- page25.

.pe. Na bhikkhave allehi pādehi kaṭhinaṃ akkamitabbaṃ yo akkameyya āpatti dukkaṭassāti. [62] Tena kho pana samayena bhikkhū saupāhanā kaṭhinaṃ akkamanti. Kaṭhinaṃ dussati . bhagavato etamatthaṃ ārocesuṃ .pe. na bhikkhave saupāhanena kaṭhinaṃ akkamitabbaṃ yo akkameyya āpatti dukkaṭassāti. [63] Tena kho pana samayena bhikkhū cīvaraṃ sibbentā aṅguliyā paṭiggaṇhanti . aṅguliyo dukkhā honti . bhagavato etamatthaṃ ārocesuṃ .pe. Anujānāmi bhikkhave paṭiggahanti. [64] Tena kho pana samayena chabbaggiyā bhikkhū uccāvace paṭiggahe dhārenti sovaṇṇamayaṃ rūpiyamayaṃ . manussā ujjhāyanti khīyanti vipācenti .pe. seyyathāpi gihī kāmabhoginoti . bhagavato etamatthaṃ ārocesuṃ .pe. na bhikkhave uccāvacā paṭiggahā dhāretabbā yo dhāreyya āpatti dukkaṭassa anujānāmi bhikkhave aṭṭhimayaṃ .pe. Saṅkhanābhimayanti. [65] Tena kho pana samayena sūciyopi satthakāpi paṭiggahāpi nassanti. Bhagavato etamatthaṃ ārocesuṃ . anujānāmi bhikkhave āvesanavitthakanti. Āvesanavitthake samākulā honti . bhagavato etamatthaṃ ārocesuṃ . Anujānāmi bhikkhave paṭiggahatthavikanti . aṃsavaddhako na hoti .pe. Anujānāmi bhikkhave aṃsavaddhakaṃ bandhanasuttakanti.

The Pali Tipitaka in Roman Character Volume 7 page 23-25. http://84000.org/tipitaka/pitaka_item/roman_item_s.php?book=7&item=59&items=7&pagebreak=1 Classified by [Item Number] :- http://84000.org/tipitaka/pitaka_item/roman_item_s.php?book=7&item=59&items=7&pagebreak=1&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=7&item=59&items=7&pagebreak=1 Compare with The Royal Version of Thai Tipitaka :- http://84000.org/tipitaka/read/byitem_s.php?book=7&item=59&items=7&pagebreak=1 Study Atthakatha :- http://84000.org/tipitaka/attha/attha.php?b=7&i=59 Contents of The Tipitaka Volume 7 http://84000.org/tipitaka/read/?index_7