paliTIPITAKA Volume 7 - Vinaya Pitaka 7

[427] Piṇḍacārikena bhikkhave bhikkhunā idāni gāmaṃ pavisissāmīti timaṇḍalaṃ paṭicchādentena parimaṇḍalaṃ nivāsetvā Kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo {427.1} supaṭicchannena antaraghare gantabbaṃ susaṃvutena antaraghare gantabbaṃ okkhittacakkhunā antaraghare gantabbaṃ na ukkhittakāya antaraghare gantabbaṃ na ujjagghikāya antaraghare gantabbaṃ appasaddena antaraghare gantabbaṃ na kāyappacālakaṃ antaraghare gantabbaṃ na bāhuppacālakaṃ antaraghare gantabbaṃ na sīsappacālakaṃ antaraghare gantabbaṃ na khambhakatena antaraghare gantabbaṃ na oguṇṭhitena antaraghare gantabbaṃ na ukkuṭikāya antaraghare gantabbaṃ {427.2} nivesanaṃ pavisantena sallakkhetabbaṃ iminā pavisissāmi iminā nikkhamissāmīti nātisahasā pavisitabbaṃ nātisahasā nikkhamitabbaṃ nātidūre ṭhātabbaṃ nāccāsanne ṭhātabbaṃ nāticiraṃ ṭhātabbaṃ nātilahukaṃ nivattitabbaṃ ṭhitakena sallakkhetabbaṃ bhikkhaṃ dātukāmā vā adātukāmā vāti sace kammaṃ vā nikkhipati āsanā vā vuṭṭhāti kaṭacchuṃ vā parāmasati bhājanaṃ vā parāmasati ṭhapeti vā dātukāmiyāti ^1- ṭhātabbaṃ bhikkhāya dīyamānāya vāmena hatthena saṅghāṭiṃ uccāretvā dakkhiṇena hatthena pattaṃ paṇāmetvā ubhohi hatthehi pattaṃ pariggahetvā bhikkhā paṭiggahetabbā na ca bhikkhādāyikāya @Footnote: ¹ Ma. dātukāmāssāti. Yu. dātukāmā viyāti. Mukhaṃ oloketabbaṃ ^1- sallakkhetabbaṃ sūpaṃ dātukāmā vā adātukāmā vāti sace kaṭacchuṃ vā parāmasati bhājanaṃ vā parāmasati ṭhapeti vā dātukāmiyāti ṭhātabbaṃ bhikkhāya dinnāya saṅghāṭiyā pattaṃ paṭicchādetvā sādhukaṃ ataramānena nivattitabbaṃ {427.3} supaṭicchannena antaraghare gantabbaṃ susaṃvutena antaraghare gantabbaṃ okkhittacakkhunā antaraghare gantabbaṃ na ukkhittakāya antaraghare gantabbaṃ na ujjagghikāya antaraghare gantabbaṃ appasaddena antaraghare gantabbaṃ na kāyappacālakaṃ antaraghare gantabbaṃ na bāhuppacālakaṃ antaraghare gantabbaṃ na sīsappacālakaṃ antaraghare gantabbaṃ na khambhakatena antaraghare gantabbaṃ na oguṇṭhitena antaraghare gantabbaṃ na ukkuṭikāya antaraghare gantabbaṃ {427.4} yo paṭhamaṃ gāmato piṇḍāya paṭikkamati tena āsanaṃ paññāpetabbaṃ pādodakaṃ pādapīṭhaṃ pādakathalikaṃ upanikkhipitabbaṃ avakkārapāṭiṃ dhovitvā upaṭṭhāpetabbaṃ ^2- pānīyaṃ paribhojanīyaṃ upaṭṭhāpetabbaṃ yo pacchā gāmato piṇḍāya paṭikkamati sace hoti bhuttāvaseso sace ākaṅkhati bhuñjitabbaṃ no ce ākaṅkhati apaharite vā chaḍḍetabbaṃ appāṇake vā udake opilāpetabbaṃ tena āsanaṃ uddharitabbaṃ pādodakaṃ pādapīṭhaṃ pādakathalikaṃ paṭisāmetabbaṃ avakkārapāṭiṃ dhovitvā paṭisāmetabbaṃ pānīyaṃ paribhojanīyaṃ @Footnote: ¹ Yu. Ma. ulloketabbaṃ. ² Ma. avakkārapāṭi ...tabbā. Paṭisāmetabbaṃ bhattaggaṃ sammajjitabbaṃ yo passati pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ tena upaṭṭhāpetabbaṃ sacassa hoti avisayhaṃ hatthavikārena dutiyaṃ āmantetvā hatthavilaṅghakena upaṭṭhāpetabbaṃ na ca tappaccayā vācā bhinditabbā {427.5} idaṃ kho bhikkhave piṇḍacārikānaṃ bhikkhūnaṃ vattaṃ yathā piṇḍacārikehi bhikkhūhi sammā vattitabbanti.

The Pali Tipitaka in Roman Character Volume 7 page 230-233. http://84000.org/tipitaka/pitaka_item/roman_item_s.php?book=7&item=427&items=1 Classified by [Item Number] :- http://84000.org/tipitaka/pitaka_item/roman_item_s.php?book=7&item=427&items=1&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=7&item=427&items=1 Compare with The Royal Version of Thai Tipitaka :- http://84000.org/tipitaka/read/byitem_s.php?book=7&item=427&items=1 Study Atthakatha :- http://84000.org/tipitaka/attha/attha.php?b=7&i=427 Contents of The Tipitaka Volume 7 http://84000.org/tipitaka/read/?index_7