paliTIPITAKA Volume 33 - Sutta Pitaka 25

Pañcavīsatimo gotamabuddhavaṃso [26] |26.1| Ahametarahi sambuddho gotamo sakyavaḍḍhano padhānaṃ padahitvāna patto sambodhimuttamaṃ. |26.2| Brahmunā yācito santo dhammacakkaṃ pavattayiṃ aṭṭhārasannaṃ koṭīnaṃ paṭhamābhisamayo ahu. |26.3| Tato parañca desento naradevasamāgame ^1- gaṇanāya na vattabbo dutiyābhisamayo ahu. |26.4| Idhevāhaṃ etarahi ovadiṃ mama atrajaṃ gaṇanāya na vattabbo tatiyābhisamayo ahu. |26.5| Ekosi ^2- sannipāto me sāvakānaṃ mahesinaṃ aḍḍhateḷasasatānaṃ bhikkhūnāsi samāgamo. |26.6| Virocamāno vimalo bhikkhusaṅghassa majjhato ^3- dadāmi patthitaṃ sabbaṃ maṇīva sabbakāmado. @Footnote: ¹ Yu. ... samāgamo. ² Yu. ekova. ³ Ma. majjhago.

--------------------------------------------------------------------------------------------- page544.

|26.7| Phalamākaṅkhamānānaṃ bhavacchandaṃ jahesinaṃ catusaccaṃ pakāsesi ^1- anukampāya pāṇinaṃ. |26.8| Dasavīsasahassānaṃ dhammābhisamayo ahu ekadvinnaṃ abhisamayo gaṇanāto asaṅkhiyo. |26.9| Vitthārikaṃ bahujaññaṃ iddhaṃ phītaṃ suphullitaṃ idha mayhaṃ sakyamunino sāsanaṃ suvisodhitaṃ. |26.10| Anāsavā vītarāgā santacittā samāhitā bhikkhū nekasatā sabbe parivārenti maṃ sadā. |26.11| Idāni ye etarahi jahanti mānusaṃ bhavaṃ appattamānasā sekkhā te bhikkhū viññūgarahitā. |26.12| Ariyañjasaṃ thomayantā sadā dhammaratā janā bujjhissanti jutimanto ^2- saṃsārasaritā ^3- narā. |26.13| Nagaraṃ kapilavatthu me rājā suddhodano pitā mayhaṃ janettikā mātā māyādevīti vuccati. |26.14| Ekūnatiṃsavassāni agāraṃ ajjhāvasihaṃ ^4- sucando ^5- kokanudo koñco tayo pāsādamuttamā. |26.15| Cattāḷīsasahassāni nāriyo samalaṅkatā yasodharā ^6- nāma nārī rāhulo nāma atrajo. |26.16| Nimitte caturo disvā assayānena nikkhamiṃ @Footnote: ¹ Ma. pakāsemi. ² Ma. Yu. satimanto. ³ Ma. saṃsārasaritaṃ gatā. @⁴ Ma. Yu. ajjhahaṃ vasiṃ. ⁵ Ma. rammo surammo subhako. Yu. rāmo surāmo subhato. @⁶ Ma. bhaddakañcanā. Yu. bhaddakaccā.

--------------------------------------------------------------------------------------------- page545.

Chavassaṃ padhānacāraṃ acariṃ dukkaraṃ ahaṃ. |26.17| Bārāṇasīisipatane jino ^1- cakkaṃ pavattayiṃ ahaṃ gotamasambuddho saraṇaṃ sabbapāṇinaṃ. |26.18| Kolito upatisso ca dve bhikkhū aggasāvakā ānando nāmupaṭṭhāko santikāvacaro mama. |26.19| Khemā uppalavaṇṇā ca bhikkhunī aggasāvikā citto ca hatthāḷavako aggupaṭṭhākupāsakā. |26.20| Nandamātā ca uttarā aggupaṭṭhākupāsikā ahaṃ assatthamūlamhi patto sambodhimuttamaṃ. |26.21| Byāmappabhā sadā mayhaṃ soḷasahatthamuggato ^2- appaṃ vassasataṃ āyu mametarahi ^3- vijjati. |26.22| Tāvatā tiṭṭhamānohaṃ tāresiṃ ^4- janataṃ bahuṃ ṭhapayitvāna dhammokkaṃ ^5- pacchimajanabodhanaṃ. |26.23| Ahaṃpi na cirasseva saddhiṃ sāvakasaṅghato idheva parinibbissaṃ aggivāhārasaṅkhayā. |26.24| Tāni ^[6]- atulatejāni imāni ca yasabalāni ^7- iddhiyo ahaṃ ^8- guṇadhāraṇo deho dvattiṃsavaralakkhaṇavicitto. |26.25| Dasadisā ^9- pabhāsetvā sataraṃsīva chappabhā sabbā samantarahessanti nanu rittā sabbasaṅkhārāti. Gotamabuddhavaṃso pañcavīsatimo. @Footnote: ¹ Ma. Yu. cakkaṃ pavattitaṃ mayā. ² Ma. ...muggatā. ³ Ma. Yu. idānetarahi. @⁴ Ma. Yu. tāremi. ⁵ Ma. dhammakkaṃ. ⁶ Ma. Yu. ca. ⁷ Ma. Yu. dasabalāni. @⁸ Ma. Yu. ayañca guṇavaradeho dvattiṃsalakkhaṇācito. ⁹ Yu. asadisā.

--------------------------------------------------------------------------------------------- page546.

Buddhappakiṇṇakakaṇḍo [27] |27.1| Aparimeyye ito kappe caturo āsuṃ vināyakā taṇhaṅkaro medhaṅkaro athopi saraṇaṅkaro dīpaṅkaro ca sambuddho ekakappamhi te jinā. |27.2| Dīpaṅkarassa aparena koṇḍañño ^1- nāma nāyako ekova ekakappamhi tāresi janataṃ bahuṃ. |27.3| Dīpaṅkarassa bhagavato koṇḍaññassa ca satthuno etesaṃ antarā kappā gaṇanāto asaṅkheyyā. |27.4| Koṇḍaññassa aparena maṅgalo nāma nāyako tesaṃpi antarā kappā gaṇanāto asaṅkheyyā ^2-. |27.5| Maṅgalo ca sumano ca revato sobhito muni tepi buddhā ekakappe cakkhumanto pabhaṅkarā. |27.6| Sobhitassa aparena anomadassī mahāmuni ^3- tesaṃpi antarā kappā gaṇanāto asaṅkheyyā. |27.7| Anomadassī padumo nārado cāpi nāyako tepi buddhā ekakappe tamantakaraṇā ^4- munī. |27.8| Nāradassa aparena padumuttaro nāma nāyako ekakappamhi uppanno tāresi janataṃ bahuṃ. |27.9| Nāradassa bhagavato padumuttarassa satthuno tesaṃpi antarā kappā gaṇanāto asaṅkheyyā. @Footnote: ¹ Yu. koṇḍaññassa nāma. ² Ma. asaṅkhiyā. ito paraṃ īdisameva. @³ Ma. Yu. mahāyaso. ⁴ Ma. Yu. ...kārakā.

--------------------------------------------------------------------------------------------- page547.

|27.10| Kappasatasahassamhi eko āsi mahāmuni padumuttaro lokavidū āhutīnaṃ paṭiggaho. |27.11| Tiṃsakappasahassamhi duve āsiṃsu ^1- nāyakā sumedho ca sujāto ca orato padumuttaro. |27.12| Aṭṭhārasakappasate tayo āsiṃsu nāyakā piyadassī atthadassī dhammadassī ca nāyakā. |27.13| Orato ^2- ca sujātassa sambuddhā dipaduttamā ekakappamhi sambuddhā ^3- loke appaṭipuggalā. |27.14| Catunavute ito kappe eko āsi mahāmuni siddhattho so lokavidū sallakkhato ^4- anuttaro. |27.15| Dvenavute ito kappe duve āsiṃsu nāyakā tisso pusso ca sambuddho ^5- asamo appaṭipuggalo. |27.16| Ekanavute ito kappe vipassī lokanāyako sopi buddho kāruṇiko satte mocesi bandhanā. |27.17| Ekattiṃse ito kappe duve āsiṃsu nāyakā sikhī ca vessabhū ceva asamā appaṭipuggalā. |27.18| Imamhi bhaddake kappe tayo āsiṃsu nāyakā kukkusandho konāgamano kassapo cāpi nāyako. |27.19| Ahametarahi sambuddho metteyyo cāpi hessati @Footnote: ¹ Ma. āsuṃ vināyakā. ito paraṃ īdisameva. ² Yu. oraso. ³ Ma. ... te buddhā. @⁴ Ma. sallakatto. Yu. sallagatto. ⁵ Ma. Yu. ... sambuddhā asamā appaṭipuggalā.

--------------------------------------------------------------------------------------------- page548.

Etepime pañca buddhā dhīrā lokānukampakā. |27.20| Etesaṃ dhammarājūnaṃ aññesaṃ nekakoṭinaṃ ācikkhitvāna taṃ maggaṃ nibbuto ^1- so sasāvakoti. Buddhappakiṇṇakakaṇḍo niṭṭhito.