|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
|
TIPITAKA Volume 3 : PALI ROMAN Vinaya Pitaka Vol 3 : Vinaya. Bhikkhunī
|
|
Naggavaggassa dasamasikkhāpadaṃ [253] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena aññatarena upāsakena saṅghaṃ uddissa vihāro kārāpito hoti. So tassa vihārassa mahe ubhatosaṅghassa akālacīvaraṃ dātukāmo hoti . tena kho pana samayena ubhatosaṅghassa kaṭhinaṃ atthataṃ hoti . athakho so upāsako saṅghaṃ upasaṅkamitvā kaṭhinuddhāraṃ yāci. Bhagavato etamatthaṃ ārocesuṃ. {253.1} Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave kaṭhinaṃ uddharituṃ evañca pana bhikkhave kaṭhinaṃ uddharitabbaṃ . byattena bhikkhunā paṭibalena saṅgho ñāpetabbo suṇātu me bhante saṅgho yadi saṅghassa pattakallaṃ saṅgho kaṭhinaṃ uddhareyya . esā ñatti . suṇātu me bhante saṅgho saṅgho kaṭhinaṃ uddharati . yassāyasmato khamati kaṭhinassa uddhāro so tuṇhassa yassa nakkhamati so bhāseyya . uddhataṃ saṅghena kaṭhinaṃ. Khamati saṅghassa tasmā tuṇhī. Evametaṃ dhārayāmīti. [254] Athakho so upāsako bhikkhunīsaṅghaṃ upasaṅkamitvā kaṭhinuddhāraṃ yāci . thullanandā bhikkhunī cīvaraṃ amhākaṃ bhavissatīti kaṭhinuddhāraṃ paṭibāhi . athakho so upāsako ujjhāyati khīyati vipāceti kathaṃ hi nāma bhikkhuniyo amhākaṃ kaṭhinuddhāraṃ na dassantīti . assosuṃ--------------------------------------------------------------------------------------------- page146.
Kho bhikkhuniyo tassa upāsakassa ujjhāyantassa khīyantassa vipācentassa . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma ayyā thullanandā dhammikaṃ kaṭhinuddhāraṃ paṭibāhissatīti .pe. saccaṃ kira bhikkhave thullanandā bhikkhunī dhammikaṃ kaṭhinuddhāraṃ paṭibāhatīti. Saccaṃ bhagavāti. {254.1} Vigarahi buddho bhagavā kathaṃ hi nāma bhikkhave thullanandā bhikkhunī dhammikaṃ kaṭhinuddhāraṃ paṭibāhissati netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {254.2} yā pana bhikkhunī dhammikaṃ kaṭhinuddhāraṃ paṭibāheyya pācittiyanti. [255] Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . dhammiko nāma kaṭhinuddhāro samaggo bhikkhunīsaṅgho sannipatitvā uddharati . paṭibāheyyāti kathaṃ idaṃ kaṭhinaṃ uddhareyyāti paṭibāhati āpatti pācittiyassa. [256] Dhammike dhammikasaññā paṭibāhati āpatti pācittiyassa . dhammike vematikā paṭibāhati āpatti dukkaṭassa . Dhammike adhammikasaññā paṭibāhati anāpatti . adhammike dhammikasaññā āpatti dukkaṭassa . adhammike vematikā āpatti dukkaṭassa. Adhammike adhammikasaññā anāpatti. [257] Anāpatti ānisaṃsaṃ dassetvā paṭibāhati ummattikāya--------------------------------------------------------------------------------------------- page147.
Ādikammikāyāti. Naggavaggo tatiyo. --------The Pali Tipitaka in Roman Character Volume 3 page 145-147. http://84000.org/tipitaka/pitaka_item/roman_item_s.php?book=3&item=253&items=5&pagebreak=1 Classified by [Item Number] :- http://84000.org/tipitaka/pitaka_item/roman_item_s.php?book=3&item=253&items=5&pagebreak=1&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=3&item=253&items=5&pagebreak=1 Compare with The Royal Version of Thai Tipitaka :- http://84000.org/tipitaka/read/byitem_s.php?book=3&item=253&items=5&pagebreak=1 Study Atthakatha :- http://84000.org/tipitaka/attha/attha.php?b=3&i=253 The Pali Atthakatha in Thai :- http://84000.org/tipitaka/atthapali/read_th.php?B=2&A=11525 The Pali Atthakatha in Roman :- http://84000.org/tipitaka/atthapali/read_rm.php?B=2&A=11525 Contents of The Tipitaka Volume 3 http://84000.org/tipitaka/read/?index_3
       |
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]