TIPITAKA Volume 27 : PALI ROMAN
Sutta Pitaka Vol 19 : Sutta. Khu. Jā.(1): Eka-Cattālīsanipātajātakaṃ

     [1564] Etha lakkhaṇasītā ca            ubho otarathodakaṃ
                  evāyaṃ bharato āha            rājā dasaratho mato.
     [1565] Kena rāma pabhāvena            socitabbaṃ na socasi
                  pitaraṃ kālakataṃ sutvā          na taṃ pasahate dukhaṃ.
     [1566] Yaṃ na sakkā naṃ pāletuṃ 1-    posena lapataṃ bahuṃ
                  sa kissa viññū medhāvī        attānamupatāpaye.
     [1567] Daharā ca hi ye vuḍḍhā        ye bālā ye ca paṇḍitā
                  addhā ceva daliddā ca        sabbe maccuparāyanā.
     [1568] Phalānamiva pakkānaṃ             niccaṃ patanato bhayaṃ
                  evaṃ jātāna maccānaṃ         niccaṃ maraṇato bhayaṃ.
     [1569] Sāyameke na dissanti         pāto diṭṭhā bahū janā
                  pāto eke na dissanti      sāyaṃ diṭṭhā bahū janā.
     [1570] Paridevayamāno ce              kiñcidatthaṃ udabbahe
                  sammuḷho hiṃsamattānaṃ        kayirā taṃ vicakkhaṇo.
     [1571] Kīso vivaṇṇo bhavati            hiṃsamattānamattano
                  na tena petā pālenti       niratthā paridevanā.
     [1572] Yathā saraṇamādittaṃ            vārināva nibbāpaye 2-
                  evampi dhīro sutavā             medhāvī paṇḍito naro
                  khippamuppatitaṃ sokaṃ            vāto tūlaṃva dhaṃsaye.
@Footnote: 1 Ma. nipāletuṃ .  2 Ma. vārinā parinibbaye.
---------------------------------------------------------------------------------------------
page318.
     [1573] Ekova macco acceti          ekova jāyate kule
                  saṃyogaparamātveva              sambhogā sabbapāṇinaṃ.
     [1574] Tasmā hi dhīrassa bahussutassa
                       sampassato lokamimaṃ parañca
                       aññāya dhammaṃ hadayaṃ manañca
                       sokā mahantāpi na tāpayanti.
     [1575] Sohaṃ yasañca bhogañca         bhariyāpi 1- ca ñātake
                  sesaṃ sampālayissāmi 2-    kiccametaṃ 3- vijānato.
     [1576] Dasavassasahassāni              saṭṭhivassasatāni ca
                  kambugīvo mahābāhu           rāmo rajjamakārayīti.
                                    Dasarathajātakaṃ sattamaṃ.
                                            ---------
                                      8 Saṃvarajātakaṃ


             The Pali Tipitaka in Roman Character Volume 27 page 317-318.
http://84000.org/tipitaka/pitaka_item/roman_item_s.php?book=27&item=1564&items=13&pagebreak=1&mode=bracket
             Classified by content :-
http://84000.org/tipitaka/pitaka_item/roman_item_s.php?book=27&item=1564&items=13&pagebreak=1
             Compare with The Pali Tipitaka in Thai Character :-
http://84000.org/tipitaka/read/pali_item_s.php?book=27&item=1564&items=13&pagebreak=1&mode=bracket
             Compare with The Royal Version of Thai Tipitaka :-
http://84000.org/tipitaka/read/byitem_s.php?book=27&item=1564&items=13&pagebreak=1&mode=bracket
             Study Atthakatha :-
http://84000.org/tipitaka/attha/attha.php?b=27&i=1564
             The Pali Atthakatha in Thai :-
http://84000.org/tipitaka/atthapali/read_th.php?B=40&A=981
             The Pali Atthakatha in Roman :-
http://84000.org/tipitaka/atthapali/read_rm.php?B=40&A=981
             Contents of The Tipitaka Volume 27
http://84000.org/tipitaka/read/?index_27