paliTIPITAKA Volume 19 - Sutta Pitaka 11

[1703] Sāvatthī . cattārīmāni bhikkhave ariyasaccāni . Katamāni cattāri . dukkhaṃ ariyasaccaṃ .pe. dukkhanirodhagāminīpaṭipadā ariyasaccaṃ . imāni kho bhikkhave cattāri ariyasaccāni . Imesaṃ kho bhikkhave catunnaṃ ariyasaccānaṃ yathābhūtaṃ abhisambuddhattā tathāgato arahaṃ sammāsambuddhoti vuccati . tasmā tiha bhikkhave idaṃ dukkhanti yogo karaṇīyo .pe. ayaṃ dukkhanirodhagāminī paṭipadāti yogo karaṇīyoti. [1704] Sāvatthī . ye hi keci bhikkhave atītamaddhānaṃ arahanto sammāsambuddhā yathābhūtaṃ abhisambujjhiṃsu sabbe te cattāri ariyasaccāni yathābhūtaṃ abhisambujjhiṃsu . yepi ^1- hi keci bhikkhave anāgatamaddhānaṃ arahanto sammāsambuddhā yathābhūtaṃ abhisambujjhissanti sabbe te cattāri ariyasaccāni yathābhūtaṃ abhisambujjhissanti . yepi hi keci bhikkhave etarahi arahanto sammāsambuddhā yathābhūtaṃ abhisambujjhanti @Footnote: ¹ Po. Ma. ye hi keci. evamuparipi. Sabbe te cattāri ariyasaccāni yathābhūtaṃ abhisambujjhanti . katamāni cattāri . dukkhaṃ ariyasaccaṃ dukkhasamudayo ariyasaccaṃ dukkhanirodho ariyasaccaṃ dukkhanirodhagāminīpaṭipadā ariyasaccaṃ . yepi hi keci bhikkhave atītamaddhānaṃ arahanto sammāsambuddhā yathābhūtaṃ abhisambujjhiṃsu abhisambujjhissanti abhisambujjhanti sabbe te imāni cattāri ariyasaccāni yathābhūtaṃ abhisambujjhanti . tasmā tiha bhikkhave idaṃ dukkhanti yogo karaṇīyo .pe. ayaṃ dukkhanirodhagāminī paṭipadāti yogo karaṇīyoti. [1705] Jānato ahaṃ bhikkhave passato āsavānaṃ khayaṃ vadāmi no ajānato apassato . kiñca bhikkhave jānato kiṃ ^1- passato āsavānaṃ khayo hoti . idaṃ dukkhanti bhikkhave jānato passato āsavānaṃ khayo hoti ayaṃ dukkhasamudayoti jānato passato āsavānaṃ khayo hoti ayaṃ dukkhanirodhoti jānato passato āsavānaṃ khayo hoti ayaṃ dukkhanirodhagāminī paṭipadāti jānato passato āsavānaṃ khayo hoti . evaṃ kho bhikkhave jānato evaṃ passato āsavānaṃ khayo hoti . tasmā tiha bhikkhave idaṃ dukkhanti yogo karaṇīyo .pe. Ayaṃ dukkhanirodhagāminī paṭipadāti yogo karaṇīyoti. [1706] Ye hi keci bhikkhave anukampeyyātha ye ca sotabbaṃ maññeyyuṃ mittā vā amaccā vā ñātī vā sālohitā vā te vo bhikkhave catunnaṃ ariyasaccānaṃ yathābhūtaṃ abhisamayāya samādapetabbā @Footnote: ¹ Ma. Yu. ayaṃ pāṭho natthi. Nivesetabbā patiṭṭhāpetabbā . katamesaṃ catunnaṃ . dukkhassa ariyasaccassa dukkhasamudayassa ariyasaccassa dukkhanirodhassa ariyasaccassa dukkhanirodhagāminīpaṭipadāya ariyasaccassa . ye hi keci bhikkhave anukampeyyātha ye ca sotabbaṃ maññeyyuṃ mittā vā amaccā vā ñātī vā sālohitā vā .pe. te vo bhikkhave imesaṃ catunnaṃ ariyasaccānaṃ yathābhūtaṃ abhisamayāya samādapetabbā nivesetabbā patiṭṭhāpetabbā . tasmā tiha bhikkhave idaṃ dukkhanti yogo karaṇīyo .pe. Ayaṃ dukkhanirodhagāminī paṭipadāti yogo karaṇīyoti.

The Pali Tipitaka in Roman Character Volume 19 page 543-545. http://84000.org/tipitaka/pitaka_item/roman_item_s.php?book=19&item=1703&items=4 Classified by [Item Number] :- http://84000.org/tipitaka/pitaka_item/roman_item_s.php?book=19&item=1703&items=4&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=19&item=1703&items=4 Compare with The Royal Version of Thai Tipitaka :- http://84000.org/tipitaka/read/byitem_s.php?book=19&item=1703&items=4 Study Atthakatha :- http://84000.org/tipitaka/attha/attha.php?b=19&i=1703 Contents of The Tipitaka Volume 19 http://84000.org/tipitaka/read/?index_19