ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ThaiVersion   PaliThai   PaliRoman 
read First itemread Previous itemไม่แสดงหมายเลขหน้า
ในกรณี :- 
   บรรทัดแรกของแต่ละหน้าread Next itemread Last item chage to ROMAN letter
TIPITAKA Volume 13 : PALI ROMAN Sutta Pitaka Vol 5 : Sutta. Ma. Ma.

page179.

Ladukikopamasuttam 1- [175] Evamme sutam ekam samayam bhagava anguttarapesu viharati apanam nama anguttarapanam nigamo . atha kho bhagava pubbanhasamayam nivasetva pattacivaramadaya apanam pindaya pavisi . apane pindaya caritva pacchabhattam pindapatapatikkanto yenannataro vanasando tenupasankami divaviharaya tam vanasandam ajjhogahetva 2- annatarasmim rukkhamule divaviharam nisidi . Ayasmapi kho udayi pubbanhasamayam nivasetva pattacivaramadaya apanam pindaya pavisi . apane pindaya caritva pacchabhattam pindapatapatikkanto yena so vanasando tenupasankami divaviharaya tam vanasandam ajjhogahetva 3- annatarasmim rukkhamule divaviharam nisidi . atha kho ayasmato udayissa rahogatassa patisallinassa evam cetaso parivitakko udapadi bahunnam vata no bhagava dukkhadhammanam apahatta 4- bahunnam vata no bhagava sukhadhammanam upahatta bahunnam vata no bhagava akusalanam dhammanam apahatta bahunnam vata no bhagava kusalanam dhammanam upahattati . atha kho ayasma udayi sayanhasamayam patisallana vutthito yena bhagava tenupasankami upasankamitva bhagavantam abhivadetva ekamantam nisidi. [176] Ekamantam nisinno kho ayasma udayi bhagavantam @Footnote: 1 Ma. latukikopamasuttam . 2-3 Po. Ma. ajjhogahetva. Yu. ajjhogahitva. @4 Po. upahanta.

--------------------------------------------------------------------------------------------- page180.

Etadavoca idha mayham bhante rahogatassa patisallinassa evam cetaso parivitakko udapadi bahunnam vata no bhagava dukkhadhammanam apahatta bahunnam vata no bhagava sukhadhammanam upahatta bahunnam vata no bhagava akusalanam dhammanam apahatta bahunnam vata no bhagava kusalanam dhammanam upahattati . mayanhi bhante pubbe sayanceva bhunjama pato ca diva ca vikale . ahu kho so 1- bhante samayo yam bhagava bhikkhu amantesi ingha tumhe bhikkhave etam diva vikalabhojanam pajahathati . tassa mayham bhante ahudeva annathattam ahudeva 2- domanassam yampi no saddha gahapatika diva vikale panitam khadaniyam bhojaniyam denti tassapi no bhagava pahanamaha tassapi no sugato patinissaggamahati te mayam bhante bhagavati pemanca garavanca hirinca ottappanca sampassamana evantam diva vikalabhojanam pajahimha te mayam bhante sayanceva bhunjama pato ca ahu kho so bhante samayo yam bhagava bhikkhu amantesi ingha tumhe bhikkhave etam rattim vikalabhojanam pajahathati tassa mayham bhante ahudeva annathattam ahudeva domanassam yampi no imesam dvinnam bhattanam panitasankhatataram 3- tassapi no bhagava pahanamaha tassapi no sugato patinissaggamahati. {176.1} Bhutapubbam bhante annataro puriso diva supeyyam 4- labhitva pajapatim 5- evamaha handa 6- imam nikkhipatha sayam sabbeva @Footnote: 1 Po. ahu so kho. aparampi idisameva . 2 Yu. ahu . 3 Ma. panitasankhatam. @Yu. panitasankhatataram . 4 Ma. sukhapeyyam . 5 Ma. Yu. ayam patho natthi. @6 Ma. Yu. handa ca imam.

--------------------------------------------------------------------------------------------- page181.

Samagga bhunjissamati yakaci bhante sankhatiyo sabba ta rattim appa diva te mayam bhante bhagavati pemanca garavanca hirinca ottappanca sampassamana evantam rattim vikalabhojanam pajahimha . bhutapubbam bhante bhikkhu rattandhakaratimisayam pindaya caranta candanikampi pavisanti oligallepi papatanti kantakarajimpi 1- arohanti suttampi gavim arohanti manavehipi samagacchanti katakammehipi akatakammehipi matugamopi te asaddhammena nimanteti . bhutapubbaham bhante rattandhakaratimisayam pindaya carami addasa kho mam bhante annatara itthi vijjantarikaya bhajanam dhovanti disva mam bhita vissaramakasi abbhumme 2- pisaco vata manti. {176.2} Evam vutte aham bhante tam itthim etadavocam na 3- bhagini pisaco bhikkhu pindaya thitoti . bhikkhussa atu mari 4- bhikkhussa matu mari varante bhikkhu tinhena govikantanena 5- kucchi 6- parikanto 7- na tveva 8- yam rattandhakaratimisayam kucchihetu pindaya carasiti 9- . tassa mayham bhante tadanussarato evam hoti bahunnam vata no bhagava dukkhadhammanam apahatta bahunnam vata no bhagava sukhadhammanam upahatta bahunnam vata no bhagava akusalanam dhammanam apahatta bahunnam vata no bhagava kusalanam dhammanam upahattati. [177] Evameva panudayi idhekacce moghapurisa idam pajahathati @Footnote: 1 Si. Yu. kantakavattampi. Ma. kantakavatampi . 2 Ma. abbhu me. @3 Ma. naham . 4 Ma. mari . 5 Yu. govikattanena . 6 Ma. kotthake kucchim. @7 Yu. parikatto . 8 Ma. natveva varam. Yu. na tvevaya . 9 Yu. carasa.

--------------------------------------------------------------------------------------------- page182.

Maya vuccamana te evamahamsu kim panimassa appamattakassa oramattakassa adhisallikhatevayam 1- samanoti te tanceva nappajahanti mayi ca appaccayam upatthapenti 2- ye ca bhikkhu sikkhakama tesantam udayi hoti balavam bandhanam dalham bandhanam thiram bandhanam aputikam bandhanam thulo kalingaro . seyyathapi udayi ladukika sakunika putilataya bandhanena bandha 3- tattheva vadham va bandham va maranam va agameti yo nu kho udayi evam vadeyya yena sa ladukika sakunika putilataya bandhanena bandha tattheva vadham va bandham va maranam va agameti tanhi tassa abalam bandhanam dubbalam bandhanam putikam bandhanam asarakam bandhananti samma 4- nu kho so udayi vadamano vadeyyati. {177.1} No hetam bhante yena sa bhante ladukika sakunika putilataya bandhanena bandha tattheva vadham va bandham va maranam va agameti tanhi tassa balavam bandhanam dalham bandhanam thiram bandhanam aputikam bandhanam thulo kalingaroti evameva kho udayi idhekacce moghapurisa idam pajahathati maya vuccamana te evamahamsu kim panimassa appamattakassa oramattakassa adhisallikhatevayam 5- samanoti te tanceva nappajahanti mayi ca appaccayam upatthapenti ye ca bhikkhu sikkhakama tesantam udayi hoti balavam bandhanam dalham bandhanam thiram bandhanam aputikam bandhanam thulo kalingaro. @Footnote: 1-5 Ma. adhisallekhatevayam . 2 Ma. Yu. upatthapenti . 3 Si. Yu. baddha. @4 Yu. sammannu.

--------------------------------------------------------------------------------------------- page183.

[178] Idha panudayi ekacce kulaputta idam pajahathati maya vuccamana te evamahamsu kim panimassa appamattakassa oramattakassa pahatabbassa yassa no bhagava pahanamaha yassa no sugato patinissaggamahati te tanceva pajahanti mayi ca na appaccayam upatthapenti ye ca bhikkhu sikkhakama te tam pahaya appossukka pannaloma paradavutta 1- migabhutena cetasa viharanti tesantam udayi hoti abalam bandhanam dubbalam bandhanam putikam bandhanam asarakam bandhanam . seyyathapi udayi ranno nago isadanto urulhavabhijato 2- sangamavacaro dalhehi varattehi 3- bandhanehi bandho isakamyeva kayam sannametva tani bandhanani sanchinditva sampadaletva yenakamam pakkamati yo nu kho udayi evam vadeyya yehi so ranno nago isadanto urulhavabhijato sangamavacaro dalhehi varattehi bandhanehi bandho isakamyeva tayam 4- sannametva tani bandhanani sanchinditva sampadaletva yenakamam pakkamati tanhi tassa balavam bandhanam dalham bandhanam thiram bandhanam aputikam bandhanam thulo kalingaroti samma nu kho so udayi vadamano vadeyyati. {178.1} No hetam bhante yehi bhante so ranno nago isadanto urulhavabhijato sangamavacaro dalhehi varattehi bandhanehi bandho isakamyeva kayam sannametva tani bandhanani @Footnote: 1 Ma. paradattavutta . 2 Yu. ubbulhavabhijato. aparampi idisameva. @3 Yu. varattehi . 4 Yu. kayam.

--------------------------------------------------------------------------------------------- page184.

Sanchinditva sampadaletva yenakamam pakkamati tanhi tassa abalam bandhanam .pe. Asarakam bandhananti. {178.2} Evameva kho udayi idhekacce kulaputta idam pajahathati maya vuccamana te evamahamsu kim panimassa appamattakassa oramattakassa pahatabbassa yassa no bhagava pahanamaha yassa no sugato patinissaggamahati te tanceva pajahanti mayi ca na appaccayam upatthapenti ye ca bhikkhu sikkhakama te tam pahaya appossukka pannaloma paradavutta migabhutena cetasa viharanti tesantam udayi hoti abalam bandhanam putikam bandhanam asarakam bandhanam. [179] Seyyathapi udayi puriso daliddo assako analiyo 1- tassassa ekam agarakam oluggaviluggam kakatidayim 2- na paramarupam eka kalopika 3- oluggavilugga na paramarupa ekissa kumbhiya dhannasamavapakam na paramarupam eka jayika na paramarupa so aramagatam bhikkhum passeyya sudhotahatthapadam manunnam bhojanam bhuttavim sitaya chayaya nisinnam adhicitte yuttam . tassa evamassa sukham vata bho samannam arogyam vata bho samannam so vatassam 4- yoham kesamassum oharetva kasayani vatthani acchadetva agarasma anagariyam pabbajeyyanti . so na sakkuneyya ekam agarakam oluggaviluggam kakatidayim na paramarupam pahaya ekam @Footnote: 1 Si. Yu. analhiyo . 2 Po. kakatisayam . ito param idisameva. @3 Yu. khatopika . 4 Ma. vatassa.

--------------------------------------------------------------------------------------------- page185.

Kalopikam oluggaviluggam na paramarupam pahaya ekissa kumbhiya dhannasamavapakam na paramarupam pahaya ekam jayikam na paramarupam pahaya kesamassum oharetva kasayani vatthani acchadetva agarasma anagariyam pabbajitum . yo nu kho udayi evam vadeyya yehi so puriso bandhanehi bandho na sakkoti ekam agarakam oluggaviluggam kakatidayim na paramarupam pahaya ekam kalopikam oluggaviluggam na paramarupam pahaya ekissa kumbhiya dhannasamavapakam na paramarupam pahaya ekam jayikam na paramarupam pahaya kesamassum oharetva kasayani vatthani acchadetva agarasma anagariyam pabbajitum tanhi tassa abalam bandhanam dubbalam bandhanam putikam bandhanam asarakam bandhananti samma nu kho so udayi vadamano vadeyyati. {179.1} No hetam bhante yehi 1- bhante so puriso bandhanehi bandho na sakkoti ekam agarakam oluggaviluggam kakatidayim na paramarupam pahaya ekam kalopikam oluggaviluggam na paramarupam pahaya ekissa kumbhiya dhannasamavapakam na paramarupam pahaya ekam jayikam na paramarupam pahaya kesamassum oharetva kasayani vatthani acchadetva agarasma anagariyam pabbajitum tanhi tassa balavam bandhanam dalham bandhanam thiram bandhanam aputikam bandhanam thulo kalingaroti. {179.2} Evameva kho udayi idhekacce moghapurisa idam pajahathati maya vuccamana te evamahamsu kim panimassa appamattakassa oramattakassa @Footnote: 1 Ma. Yu. yehi so bhante.

--------------------------------------------------------------------------------------------- page186.

Adhisallikhatevayam samanoti te tanceva nappajahanti mayi ca appaccayam upatthapenti ye ca bhikkhu sikkhakama tesantam udayi hoti balavam bandhanam dalham bandhanam thiram bandhanam aputikam bandhanam thulo kalingaroti. [180] Seyyathapi udayi gahapati va gahapatiputto va addho mahaddhano mahabhogo nekanam nikkhagananam cayo nekanam dhannagananam cayo nekanam khettagananam cayo nekanam vatthugananam cayo nekanam bhariyagananam cayo nekanam dasagananam cayo nekanam dasigananam cayo so aramagatam bhikkhum passeyya sudhotahatthapadam manunnam bhojanam bhuttavim sitaya chayaya nisinnam adhicitte 1- yuttam . Tassa evamassa sukham vata bho samannam arogyam vata bho samannam so vatassam yoham kesamassum oharetva kasayani vatthani acchadetva agarasma anagariyam pabbajeyyanti . so sakkuneyya nekani nikkhaganani pahaya nekani dhannaganani pahaya nekani khettaganani pahaya nekani vatthuganani pahaya nekani bhariyaganani pahaya nekani dasaganani pahaya nekani dasiganani pahaya kesamassum oharetva kasayani vatthani acchadetva agarasma anagariyam pabbajitum . yo nu kho udayi evam vadeyya yehi so gahapati va gahapatiputto va bandhanehi bandho sakkoti nekani nikkhaganani pahaya nekani dhannaganani pahaya nekani @Footnote: 1 Po. vivitate.

--------------------------------------------------------------------------------------------- page187.

Khettaganani pahaya nekani vatthuganani pahaya nekani bhariyaganani pahaya nekani dasaganani pahaya nekani dasiganani pahaya kesamassum oharetva kasayani vatthani acchadetva agarasma anagariyam pabbajitum tanhi tassa balavam bandhanam dalham bandhanam thiram bandhanam aputikam bandhanam thulo kalingaroti samma nu kho so udayi vadamano vadeyyati. {180.1} No hetam bhante yehi bhante so gahapati va gahapatiputto va bandhanehi bandho sakkoti nekani nikkhaganani pahaya nekani dhannaganani pahaya nekani khettaganani pahaya nekani vatthuganani pahaya nekani bhariyaganani pahaya nekani dasaganani pahaya nekani dasiganani pahaya kesamassum oharetva kasayani vatthani acchadetva agarasma anagariyam pabbajitum tanhi tassa abalam bandhanam dubbalam bandhanam putikam bandhanam asarakam bandhananti. {180.2} Evameva kho udayi idhekacce kulaputta idam pajahathati maya vuccamana te evamahamsu kim panimassa appamattakassa oramattakassa pahatabbassa yassa no bhagava pahanamaha yassa no sugato patinissaggamahati te tanceva pajahanti mayi ca na appaccayam upatthapenti ye ca bhikkhu sikkhakama te tam pahaya appossukka pannaloma paradavutta migabhutena cetasa viharanti tesantam udayi hoti abalam bandhanam dubbalam bandhanam putikam bandhanam asarakam bandhanam. [181] Cattarome udayi puggala santo samvijjamana lokasmim

--------------------------------------------------------------------------------------------- page188.

Katame cattaro idhudayi ekacco puggalo upadhipahanaya patipanno hoti upadhipatinissaggaya tamenam upadhipahanaya patipannam upadhi- patinissaggaya upadhipatisamyutta sarasankappa samudacaranti so te adhivaseti nappajahati na vinodeti na byantikaroti 1- na anabhavangameti imam kho aham udayi puggalam samyuttoti vadami no visamyutto tam kissa hetu indriyavemattata hi me udayi imasmim puggale vidita. {181.1} Idha panudayi ekacco puggalo upadhipahanaya patipanno hoti upadhipatinissaggaya tamenam upadhipahanaya patipannam upadhipatinissaggaya upadhipatisamyutta sarasankappa samudacaranti so te nadhivaseti pajahati vinodeti byantikaroti anabhavangameti imampi kho aham udayi puggalam samyuttoti vadami no visamyutto tam kissa hetu indriyavemattata hi me udayi imasmim puggale vidita. {181.2} Idha panudayi ekacco puggalo upadhipahanaya patipanno hoti upadhipatinissaggaya tamenam upadhipahanaya patipannam upadhi- patinissaggaya kadaci karahaci satisammosa upadhipatisamyutta sarasankappa samudacaranti dandho udayi satuppado atha kho nam khippameva pajahati vinodeti byantikaroti anabhavangameti . seyyathapi udayi puriso divasasantatte 2- ayokatahe dve va tini va udakaphusitani nipateyya dandho udayi udakaphusitanam nipato atha kho nam khippameva parikkhayam pariyadanam gaccheyya evameva kho udayi @Footnote: 1 Ma. byantim karoti. Yu. bayantikaroti . 2 Ma. divasam.

--------------------------------------------------------------------------------------------- page189.

Idhekacco puggalo upadhipahanaya patipanno hoti upadhipatinissaggaya tamenam upadhipahanaya patipannam upadhipatinissaggaya kadaci karahaci satisammosa upadhipatisamyutta sarasankappa samudacaranti dandho udayi satuppado atha kho nam khippameva pajahati vinodeti byantikaroti anabhavangameti imampi kho aham udayi puggalam samyuttoti vadami no visamyutto tam kissa hetu indriyavemattata hi me udayi imasmim puggale vidita. {181.3} Idha panudayi ekacco puggalo upadhi dukkhassa mulanti iti viditva nirupadhi 1- hoti upadhisankhaye vimutto imam kho aham udayi puggalam visamyuttoti vadami no samyutto tam kissa hetu indriyavemattata hi me udayi imasmim puggale vidita . Ime 2- kho udayi cattaro puggala santo samvijjamana lokasmim. [182] Panca kho ime udayi kamaguna katame panca cakkhuvinneyya rupa ittha kanta manapa piyarupa kamupasanhita rajaniya sotavinneyya sadda ... ghanavinneyya gandha ... Jivhavinneyya rasa ... kayavinneyya photthabba ittha kanta manapa piyarupa kamupasanhita rajaniya . ime kho udayi panca kamaguna . yam kho udayi ime panca kamagune paticca uppajjati sukham somanassam idam vuccati kamasukham milhasukham puthujjanasukham anariyasukham na asevitabbam 3- na bhavetabbam na bahulikatabbam @Footnote: 1 Yu. nirupadhi . 2 Ma. Yu. ime kho ... lokasminti ime patha na dissanti. @3 Ma. sevitabbam.

--------------------------------------------------------------------------------------------- page190.

Bhayitabbam etassa sukhassati vadami. [183] Idhudayi bhikkhu vivicceva kamehi .pe. pathamam jhanam upasampajja viharati vitakkavicaranam vupasama .pe. dutiyam jhanam upasampajja viharati pitiya ca viraga .pe. tatiyam jhanam upasampajja viharati sukhassa ca pahana .pe. catuttham jhanam upasampajja viharati idam vuccati nekkhammasukham vivekasukham upasamasukham sambodhisukham 1- asevitabbam bhavetabbam bahulikatabbam na bhayitabbam etassa sukhassati vadami. [184] Idhudayi bhikkhu vivicceva kamehi .pe. pathamam jhanam upasampajja viharati . idam kho aham udayi injitasmim vadami kinca tattha injitasmim yedeva 2- tattha vitakkavicara aniruddha honti idam tattha injitasmim . idhudayi bhikkhu vitakkavicaranam vupasama .pe. dutiyam jhanam upasampajja viharati . idampi kho aham udayi injitasmim vadami kinca tattha injitasmim yadeva tattha pitisukham aniruddham hoti idam tattha injitasmim . idhudayi bhikkhu pitiya ca viraga .pe. tatiyam jhanam upasampajja viharati . Idampi kho aham udayi injitasmim vadami kinca tattha injitasmim yadeva tattha upekkhasukham aniruddham hoti idam tattha injitasmim . Idhudayi bhikkhu sukhassa ca pahana .pe. catuttham jhanam upasampajja viharati. Idam kho aham udayi anenjitasmim 3- vadami. @Footnote: 1 Ma. Yu. sambodhasukham . 2 Ma. yadeva . 3 Ma. Yu. aninjitasmim.

--------------------------------------------------------------------------------------------- page191.

[185] Idhudayi bhikkhu vivicceva kamehi .pe. pathamam jhanam upasampajja viharati . idam kho aham udayi analanti vadami pajahathati vadami samatikkamathati vadami . ko ca tassa samatikkamo idhudayi bhikkhu vitakkavicaranam vupasama .pe. dutiyam jhanam upasampajja viharati ayam tassa samatikkamo . idampi kho aham udayi analanti vadami pajahathati vadami samatikkamathati vadami . Ko ca tassa samatikkamo idhudayi bhikkhu pitiya ca viraga .pe. Tatiyam jhanam upasampajja viharati ayam tassa samatikkamo . idampi kho aham udayi analanti vadami pajahathati vadami samatikkamathati vadami . ko ca tassa samatikkamo idhudayi bhikkhu sukhassa ca pahana .pe. catuttham jhanam upasampajja viharati ayam tassa samatikkamo . Idampi kho aham udayi analanti vadami pajahathati vadami samatikkamathati vadami. {185.1} Ko ca tassa samatikkamo idhudayi bhikkhu sabbaso rupasannanam samatikkama patighasannanam atthangama nanattasannanam amanasikara ananto akasoti akasanancayatanam upasampajja viharati ayam tassa samatikkamo . idampi kho aham udayi analanti vadami pajahathati vadami samatikkamathati vadami . ko ca tassa samatikkamo idhudayi bhikkhu sabbaso akasanancayatanam samatikkamma anantam vinnananti vinnanancayatanam upasampajja viharati ayam tassa

--------------------------------------------------------------------------------------------- page192.

Samatikkamo. {185.2} Idampi kho aham udayi analanti vadami pajahathati vadami samatikkamathati vadami . ko ca tassa samatikkamo idhudayi bhikkhu sabbaso vinnanancayatanam samatikkamma natthi kinciti akincannayatanam upasampajja viharati ayam tassa samatikkamo . Idampi kho aham udayi analanti vadami pajahathati vadami samatikkamathati vadami . ko ca tassa samatikkamo idhudayi bhikkhu sabbaso akincannayatanam samatikkamma nevasanna- nasannayatanam upasampajja viharati ayam tassa samatikkamo . Idampi kho aham udayi analanti vadami pajahathati vadami samatikkamathati vadami . ko ca tassa samatikkamo idhudayi [1]- sabbaso nevasannanasannayatanam samatikkamma sannavedayitanirodham upasampajja viharati ayam tassa samatikkamo . iti kho aham udayi nevasannanasannayatanassapi pahanam vadami . passasi no tvam udayi tam sannojanam anum va thulam va yassaham no pahanam vadamiti. No hetam bhanteti. {185.3} Idamavoca bhagava attamano ayasma udayi bhagavato bhasitam abhinanditi. Ladukikopamasuttam 2- nitthitam chattham. ------------ @Footnote: 1 Ma. Yu. etthantare bhikkhuti patho dissati . 2 Si. Ma. Yu. latukikopamasuttam.


             The Pali Tipitaka in Roman Character Volume 13 page 179-192. http://84000.org/tipitaka/pitaka_item/roman_item_s.php?book=13&item=175&items=11&pagebreak=1&modeTY=2              Classified by [Item Number] :- http://84000.org/tipitaka/pitaka_item/roman_item_s.php?book=13&item=175&items=11&pagebreak=1&modeTY=2&mode=bracket              Compare with The Pali Tipitaka in Thai Character :- http://84000.org/tipitaka/read/pali_item_s.php?book=13&item=175&items=11&pagebreak=1&modeTY=2              Compare with The Royal Version of Thai Tipitaka :- http://84000.org/tipitaka/read/byitem_s.php?book=13&item=175&items=11&pagebreak=1&modeTY=2              Study Atthakatha :- http://84000.org/tipitaka/attha/attha.php?b=13&i=175              The Pali Atthakatha in Thai :- http://84000.org/tipitaka/atthapali/read_th.php?B=9&A=3060              The Pali Atthakatha in Roman :- http://84000.org/tipitaka/atthapali/read_rm.php?B=9&A=3060              Contents of The Tipitaka Volume 13 http://84000.org/tipitaka/read/?index_13

read First itemread Previous itemไม่แสดงหมายเลขหน้า
ในกรณี :- 
   บรรทัดแรกของแต่ละหน้าread Next itemread Last item chage to ROMAN letter

บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]

Background color :