บาลีอรรถกถาเล่มที่ ๒๙

หน้าที่ ๓๑๓.

ขุรธารา ^๑- ปฏิปาฏิยา ฐปิตา วิย ติฏฺฐติ, ^๒- เตน สา "ติณฺหธารา ขุรธารา"ติ วุจฺจติ. ตํ ติณฺหธารขุรธารํ อุทกาสาย อุเปนฺติ อลฺลียนฺตีติ อตฺโถ. เอวํ อุเปนฺตา จ ปาปกมฺเมน โจทิตา ตตฺถ มนฺทา ปปตนฺติ พาลาติ อตฺโถ. [๖๘๑] สามา สพลาติ เอตํ ปรโต "โสณา"ติ อิมินา โยเชตพฺพํ. สามวณฺณา กมฺมาสวณฺณา จ โสณา ขาทนฺตีติ วุตฺตํ โหติ. กาโกลคณาติ กณฺหกากคณา. ปฏิคิทฺธาติ สุฏฺฐุ สญฺชาตเคธา หุตฺวา, "มหาคิชฺฌา"ติ เอเก. กุลลาติ กุลลปกฺขิโน, "เสนานเมตํ นามนฺ"ติ เอเก. วายสาติ อกณฺหา กากา. อิทมฺปิ เทวทูเต อวุตฺตกมฺมกรณํ. ตตฺถ วุตฺตานิปิ ปน กานิจิ ^๓- อิธ น วุตฺตานิ, ตานิ เอเตสํ ปุริมปจฺฉิมภาคตฺตา วุตฺตาเนว โหนฺตีติ เวทิตพฺพานิ. [๖๘๒] อิทานิ สพฺพเมเวตํ นรกวุตฺตึ ทสฺเสตฺวา โอวทนฺโต "กิจฺฉา วตายนฺ"ติ คาถมาห. ตสฺสตฺโถ:- กิจฺฉา วต อิธ นรเก นานปฺปการกมฺมกรณเภทา วุตฺติ, ยํ ชโน ปสฺสติ ^๔- กิพฺพิสการี. ตสฺมา อิธ ชีวิตเสเส ชีวิตสนฺตติยา วิชฺชมานาย อิธ โลเก ฐิโตเยว สมาโน สรณคมนาทิกุสลธมฺมานุฏฺฐาเนน กิจฺจกโร นโร สิยา ภเวยฺย. กิจฺจกโร ภวนฺโตปิ จ สาตจฺจการิตาวเสเนว ภเวยฺย, น ปมชฺเชยฺยํ, ^๕- มุหุตฺตมฺปิ น ปมาทมาปชฺเชยฺยาติ อยเมตฺถ สมุจฺจยวณฺณนา. ยสฺมา ปน วุตฺตาวเสสานิ ปทานิ ปุพฺเพ วุตฺตนยตฺตา อุตฺตานตฺถตฺตา จ สุวิญฺเญยฺยาเนว, ตสฺมา อนุปทวณฺณนา น กตาติ. ปรมตฺถโชติกาย ขุทฺทกฏฺฐกถาย สุตฺตนิปาตฏฺฐกถาย โกกาลิกสุตฺตวณฺณนา นิฏฺฐิตา. ------------------ @เชิงอรรถ: ^๑ ฉ.ม. ขุรา ^๒ ฉ.ม. ติฏฺฐนฺติ ^๓ ก. ปเนตานิ @^๔ ฉ.ม. ผุสติ ^๕ ฉ.ม.,อิ. น ปมชฺเช

อรรถกถาภาษาบาลีอักษรไทย เล่มที่ ๒๙ หน้า ๓๑๓. http://84000.org/tipitaka/pitaka_item/read_th.php?B=29&A=7054&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=29&A=7054&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=25&i=384 เนื้อความพระไตรปิฎกฉบับหลวง :- http://84000.org/tipitaka/read/r.php?B=25&A=9435 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=25&A=9512 The Pali Tipitaka in Roman Character :- http://84000.org/tipitaka/read/roman_read.php?B=25&A=9512 สารบัญพระไตรปิฎกเล่มที่ ๒๕ http://84000.org/tipitaka/read/?index_25