บาลีอรรถกถาเล่มที่ ๑๑

หน้าที่ ๒๙๒.

กาเม จชิตฺวานาติ ทุวิเธปิ กาเม ปหาย. ปุนราคจฺฉเตติ วิพฺภมนวเสน อาคจฺฉติ. ปุน ชีวํ มโต หิ โสติ อุปฺปพฺพชิตฺวา ปุน ชีวนฺโตปิ โส มตโกว, ตสฺมา ตํปิ โรทนฺตีติ วทติ. อิทานิสฺส ฆราวาเส อาทีนวํ ทสฺเสนฺตี กุกฺกุฬาติอาทิมาห. ตตฺถ กุกฺกุฬาติ ฆราวาโส กิร อุณฺหฏฺเฐน กุกฺกุฬา นาม โหติ. กสฺส อุชฺฌาปยามเสติ "อภิธาวถ, ภทฺทนฺเต โหตู"ติ เอวํ วตฺวา "ยํ ตฺวํ วิพฺภมิตุกาโม ยกฺเขน ปาปิโต, อิมํ วิปฺปการํ กสฺส มยํ อุชฺฌาปยาม นิชฺฌาปยาม อาโรจยามา"ติ วทติ. ปุน ฑยฺหิตุมิจฺฉสีติ อาทิตฺตฆรโต นิพฺภตํ ภณฺฑํ ^๑- วิย ฆรา นีหริตฺวา พุทฺธสาสเน ปพฺพชิตฺวา ^๒- ปุน มหาฑาหสทิเส ฆราวาเส ฑยฺหิตุํ อิจฺฉสีติ อตฺโถ. โส มาตริ กเถนฺติยา สลฺลกฺเขตฺวา หิโรตฺตปฺปํ ปฏิลภิตฺวา "นตฺถิ มยฺหํ คิหิภาเวน อตฺโถ"ติ อาห. อถสฺส มาตา "สาธุ ตาตา"ติ ตุฏฺฐา ปณีตโภชนํ โภเชตฺวา "กติวสฺโสสิ ตาตา"ติ ปุจฺฉิ. ปริปุณฺณวสฺโสมฺหิ อุปาสิเกติ. "เตนหิ ตาต อุปสมฺปทํ กโรหี"ติ จีวรสาฏเก อทาสิ. โส ติจีวรํ กาเรตฺวา อุปสมฺปนฺโน พุทฺธวจนํ อุคฺคณฺหนฺโต ติปิฏโก ^๓- หุตฺวา สีลาทีนิ อาคตฏฺฐาเน ตํ ตํ ปูเรนฺโต นจิรสฺเสว อรหตฺตํ ปตฺวา มหาธมฺมกถิโก หุตฺวา วีสวสฺสสตํ ฐตฺวา สกลชมฺพูทีปํ โขเภตฺวา ปรินิพฺพายิ. ปญฺจมํ.

อรรถกถาภาษาบาลีอักษรไทย เล่มที่ ๑๑ หน้า ๒๙๒. http://84000.org/tipitaka/pitaka_item/read_th.php?B=11&A=7531&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=11&A=7531&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=15&i=814 เนื้อความพระไตรปิฎกฉบับหลวง :- http://84000.org/tipitaka/read/r.php?B=15&A=6707 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=15&A=5990 The Pali Tipitaka in Roman Character :- http://84000.org/tipitaka/read/roman_read.php?B=15&A=5990 สารบัญพระไตรปิฎกเล่มที่ ๑๕ http://84000.org/tipitaka/read/?index_15