Atthakatha Book 1 : PALI ROMAN
Vinaya.A. (samanta.1)

page251.
Bhummanam devanam saddam sutva catummaharajikati ettha pana
bhummanam devanam saddam akasatthadevata assosum akasatthanam
catummaharajikati ayamanukkamo veditabbo. Brahmakayikati
asannisatte ca arupavacare ca thapetva sabbepi brahmano assosum
sutva ca saddamanussavesunti veditabba. Itiha tena khanenati evam
tena sudinnassa ajjhacarakkhanena. Tena muhuttenati
ajjhacaramuhutteneva. Yava brahmalokati yava akanitthabrahmaloka.
Abbhugganchiti abhiugganhi abbhutthasi. Ekakolahalamahositi
attho. Puttam vijayiti suvannabimbasadisam pacchimabhavikasattam
janesi. Bijakoti namam akamsuti na annam nama katumadamsu
bijakampi dehiti pitamahiya vuttabhavassa pakatatta bijakotvessa
namam hotuti bijakoti namamakamsu. Puttassa namavaseneva
matapitunampissa namamakamsu. Te aparena samayenati bijakanca bijakamataranca
sandhaya vuttam. Bijakassa kira sattatthavassakale tassa mata bhikkhunisu
so ca bhikkhusu pabbajitva kalyanamitte upanissaya arahatte
patitthahimsu. Tena vuttam ubho agarasma anagariyam pabbajitva
arahattam sacchakamsuti. {37} Evam mataputtanam pabbajja saphala ahosi.
Pita panassa vipatisarabhibhuto vihasi. Tena vuttam athakho
ayasmato sudinnassa ahudeva kukkaccantiadi.
     Tattha ahudevati ahueva. Dakaro padasandhikaro.
Ahosievati attho. Kukkuccanti ajjhacarahetuko pacchanutapo.
---------------------------------------------------------------------------------------------
page252.
Vipatisarotipi tasseva namam. So hi vinnuhi akattabbataya
kucchitakiriyabhavato kukkuccam katam ajjhacaram nivattetum asamatthataya
tam paticca virupasaranabhavato vipatisaroti vuccati. Alabha vata
meti mayham vata alabha. Ye jhanadinam gunanam alabha nama
te mayham na annassati adhippayo. Na  vata me labhati
yepi me patiladdha pabbajjasaranagamanasikkhasamadanaguna tepi
neva mayham labha ajjhacaramalinatta. Dulladdham vata meti
idam sasanam laddhampi me dulladdham. Na vata me suladdhanti
yatha annesam kulaputtanam evam na vata me suladdham. Kasma.
Yoham evam svakkhate dhammavinaye .pe. Brahmacariyam caritunti.
Brahmacariyanti sikkhattayasangahitam maggabrahmacariyam. Kiso ahositi
khaditum va bhunjitum va asakkonto tanuko ahosi appamamsalohito.
Uppanduppandukajatoti sanjatuppanduppandukabhavo
pandupalasapatibhago. Dhamanisanthatagattoti 1- pariyadinnamamsalohitatta
sirajaleneva santharitagatto. Antomanoti anusocanavasena
abbhantareyeva thitacitto. Hadayavatthum nissaya vattanavasena pana sabbepi
antomanayeva. Linamanoti uddese paripacchaya kammatthane
adhisile adhicitte adhipannaya vattapativattapurane ca nikkhittadhuro
avipphariko. Annadatthum kosajjavaseneva lino sankutito mano
assati linamano. Dukkhiti cetodukkhena dukkhi. Dummanoti
dosena dutthamano virupamano va domanassabhibhutataya. Pajjhayiti
@Footnote: 1. paliyampana dhamanisanthatagattoti dissati.
---------------------------------------------------------------------------------------------
page253.
Vipatisaravasena vahacchinno viya gadrabho tamtam cintayi. {38} Sahayaka
bhikkhuti tam evambhutam ganasanganikapapancena vitinamentam disva
yassa vissasika kathaphasuka bhikkhu te nam etadavocum . Pinindriyoti
pasadappatitthanokasassa sampunnatta paripunnacakkhadiindriyo.
So dani tvanti ettha daniti nipato. So pana tvanti
vuttam hoti. Kacci no tvanti kacci nu tvam. Anabhiratoti
ukkanthito gihibhavam patthayamanoti attho. Tasma 1- tameva
anabhiratim patikkhipanto aha na kho aham avuso anabhiratoti.
Adhikusalanam pana dhammanam bhavanaya abhiratovahanti 2-. Atthi me
papakammam katanti maya katam ekam papakammam atthi upalabbhati
samvijjati niccakalam abhimukham viya me titthati. Atha nam pakasento
puranadutiyikayatiadimaha. Alam hi te avuso sudinna
kukkuccayati avuso sudinna tuyhetam papakammam alam samattham
kukkuccaya. Patibalam kukkuccamuppadetunti vuttam hoti. Yam
tvantiadimhi yena papena tvam nasakkissasi brahmacariyam caritum
tam te papam alam kukkuccayati evam sambandho veditabbo. Atha
nam anusasanta nanu avuso bhagavatatiadimahamsu.
     Tattha nanuti anumatigarahatthe nipato. Anekapariyayenati
anekakaranena. Viragayati viragatthaya. No saragayati
@Footnote: 1. iti padam yasma so kukkuccakarana tatharupo hoti na anabhirativasenati evamadikam
@attham joteti. so nattho hoti manne .    2. adhippayoti padena bhavitabbam.
---------------------------------------------------------------------------------------------
page254.
No ragena ranjanatthaya. Bhagavata hi imam me dhammam sutva
satta sabbabhavabhogesu virajjissanti no ranjissantiti etadatthaya
dhammo desitoti adhippayo. Esa nayo sabbapadesu. Idam
panettha pariyayavacanamattam. Visamyogayati kilesehi visamyujjanatthaya.
No samyogayati na samyujjanatthaya. Anupadanayati
aggahanatthaya. No saupadanayati na sangahanatthaya. Tattha
nama tvanti tasmim nama tvam. Saragaya cetessasiti saha
ragena vattamanaya methunadhammaya cetessasi kappessasi. Etadattham
vayamissasiti attho. Esa nayo sabbattha. Puna ragaviragadini
navapadani nibbattitalokuttaranibbanameva sandhaya vuttani. Tasma
ragaviragayati va madanimmadanayati va vuttepi nibbanatthayati
evameva attho datthabbo. Nibbanam hi yasma tam agamma
arabbha sandhaya paticca rago virajjati na hoti tasma
ragaviragoti vuccati. Yasma pana tam agamma manamadapurisamadadayo
mada nimmada amada honti vinassanti tasma madanimmadananti
vuccati. Yasma ca tam agamma sabbapi kamapipasa vinayam
abbhattham yati tasma pipasavinayoti vuccati. Yasma pana tam
agamma pancakamagunalaya samugghatam gacchanti tasma
alayasamugghatoti vuccati. Yasma pana tam agamma tebhumikavattam
upacchijjati tasma vattupacchedoti vuccati. Yasma pana tam
agamma sabbaso tanha khayam gacchati virajjati nirujjhati ca tasma
---------------------------------------------------------------------------------------------
page255.
Tanhakkhayo virago nirodhoti vuccati. Yasma panetam catasso
yoniyo panca gatiyo satta vinnanatthitiyo nava sattavase
aparaparabhavaya vinanato abandhanato samsibbanato vananti
laddhavoharaya tanhaya nikkhantam nissatam visamyuttam tasma nibbananti
vuccatiti. Kamanam pahanam akkhatanti vatthukamanam
kilesakamananca pahanam vuttam. Kamasannanam parinnati sabbasampi
kamasannanam natatiranapahanavasena tividha parinna akkhata.
Kamapipasananti kamesu patabyatanam kame va patumicchanam.
Kamavitakkananti kamupasamhitanam vitakkanam. Kamaparilahananti
pancakamagunikaragavasena uppannaparilahanam antodahanam. Imesu
pancasu thanesu kilesakkhayakaro lokuttaramaggova kathito.
Sabbapathamesu pana tisu thanesu lokiyalokuttaramissako maggo kathitoti
veditabbo. Netam avusoti etam avuso tava papakammam appasannanam
va pasadaya evarupanam pasadatthaya na hoti. Athakhvetanti
athakho etam. Atha khetantipi patho. Annathattayati
pasadannathabhavaya vipatisaraya hoti. Ye maggena anagatasaddha tesam
vipatisaram karoti idisepi nama dhammavinaye mayam pasanna yattheva
duppatipanna bhikkhuti. Ye pana maggenagatasaddha tesam sineru viya
vatehi acalo pasado idisehi vatthuhi ito va darunatarehi.
Tena vuttam ekaccanam annathattayati. {39} Bhagavato etamattham
arocesunti bhagavato etamattham acikkhimsu pativedayimsu arocayamana
---------------------------------------------------------------------------------------------
page256.
Ca neva piyakamyataya na bhedapurekkharataya na tassayasmato avannam
pakasanatthaya na kalisasanam arocanatthaya napi idam sutva
bhagava imassa sasane patitthanam na dassati nikkaddhapessati nanti
mannamana arocesum athakho imam sasane uppannam abbudam
natva bhagava sikkhapadam pannapessati velam mariyadam anam
thapessatiti arocesum.
     Etasmim nidane etasmim pakaraneti ettha sudinnassa
ajjhacaravitikkamo sikkhapadappannattiya karanatta nidananceva
pakaranancati vuttoti veditabbo. Karanam hi yasma nideti
attano phalam handa ganhatha nanti dassentam viya appeti
pakaroti ca nam kattum arabhati karotiyeva va tasma nidananceva
pakaranancati vuccati. Vigarahi buddho bhagavati buddho bhagava
vigarahi nindi yathati vannavannarahanam vannanca avannanca
bhananto aggapuggalo. Na hi bhagavato silavitikkamakarakam puggalam
disva ayam jatiya va gottena va kolaputtiyena va ganthena
va dhutangena va nato yasassi idisam puggalam rakkhitum vattatiti
cittam uppajjati napi pesalam gunavanti disva tassa gunam paticchadetum
cittam uppajjati athakho garahitabbam garahatiyeva pasamsitabbanca
pasamsatiyeva ayanca garahitabbo tasma tam tadilakkhane thito
avikkampamanena cittena vigarahi buddho bhagava ananucchaviyantiadihi
vacanehi. Tatthayam atthavannana yadidam taya moghapurisa
---------------------------------------------------------------------------------------------
page257.
Tucchamanussa kammam katam tam samanakarananam dhammanam
maggaphalanibbanasasananam va na anucchavikam tesam chavim chayam sundarabhavam na
anveti nanugacchati athakho arakava tehi dhammehi
ananucchavikattaeva ca ananulomikam tesam na anulometi athakho vilomam
paccanikabhave thitam ananulomikattaeva ca apatirupam patirupam sadisam
patibhagam na hoti athakho asadisamapatibhagameva apatirupattaeva
ca assamanakam samananam kammam na hoti assamanakatta akappiyam
yam hi samanakammam na hoti tam tesam na kappati akappiyatta
akaraniyam na hi samananam yam na kappati tam karonti tancetam taya
katam tasma ananucchavikam te moghapurisa katam .pe. Akaraniyanti.
Katham hi namati kena nama karanena. Kinnama karanam
passantoti vuttam hoti. Tato karanabhavam dassento parato
nanu maya moghapurisatiadimaha. Tam sabbam vuttatthameva.
Idani yasma yam tena papakammam katam tam vipaccamanam ativiya
dukkhavipakam hoti tasmassa tam vipakam dassetum kataparadham viya
puttam anukampaka matapitaro dayalukena cittena sudinnam paribhasanto
varante moghapurisatiadimaha. Tattha asum sigham etassa visam
agacchatiti asiviso. Ghoram candamassa visanti ghoraviso. Tassa
asivisassa ghoravisassa. Pakkhittanti etassa varanti imina
sambandho. Idisassa asivisassa mukhe angajatam varam pakkhittam.
Sace pakkhittam bhaveyya varam siya sundaram sadhu sutthu siyati
---------------------------------------------------------------------------------------------
page258.
Attho. Na tvevati na tveva varam na sundarameva na sadhueva na
sutthueva. Esa nayo sabbattha. Kanhasappassati kalasappassa.
Angarakasuyati angarapunnakupe angararasimhi va. Adittayati
padittaya gahitaaggivannabhaya. Sampajjalitayati samantato
pajjalitaya acciyo muncantiya. Sanjotibhutayati sappabhaya.
Samantato utthitahi jalahi ekappabhaya samudayabhutayati vuttam
hoti. Tam kissa hetuti yam maya vuttam varanti tam kissa hetu
katarena karanenati ce. Maranam va nigaccheyyati yo tattha
angajatam pakkhipeyya so maranam va nigaccheyya. Itonidananca
kho .pe. Upapajjeyyati yam idam matugamassa angajate
angajatappakkhipanam itonidanam tassa karako puggalo nirayam
upapajjeyya. Evam kammassa mahasavajjatam dassento tam vigarahi na
tassa dukkhagamanam icchamano. Tattha nama tvanti tasmim nama
evarupe kamme evam mahasavajje samanepi tvam. Yam tvanti ettha
yanti hilanatthe nipato. Tvanti tam saddassa vevacanam. Dvihipi
yam va tam va hilitamavannatanti vuttam hoti. Asaddhammanti asatam
nicajananam dhammam. Tehi sevitabbanti attho. Gamadhammanti
gamanam dhammam. Gamavasikamanussanam dhammanti vuttam hoti.
Vasaladhammanti papadhamme vassanti paggharantiti vasala tesam vasalanam
hinapurisanam dhammam. Vasalam va kilesappaggharanakadhammam.
Dutthullanti dutthu ca kilesasandusitam thullanca asukhumam anipunanti vuttam
---------------------------------------------------------------------------------------------
page259.
Hoti. Odakantikanti udakakiccam antikamavasanam assati
odakantiko. Tam odakantikam. Rahassanti rahobhavam paticchanne okase
uppajjanakam. Ayam hi dhammo jigucchaniyatta na sakka avikatum
annesam dassanavisaye katum. Tena vuttam rahassanti.
Dvayadvayasamapattinti dvihi dvihi samapajjitabbam. Dvayam dvayam
samapattintipi patho. Dayadayasamapattintipi pathanti. Tam na sundaram.
Samapajjissasiti etam tattha nama tvanti ettha vuttasamanasaddena
yojetabbam samapajjissasi namati. Bahunam kho .pe. Adikatta
pubbangamoti sasanam sandhaya vadati. Imasmim sasane tvam bahunam
puggalanam akusalanam 1- dhammanam adikatta sabbapathamam karanato
pubbangamo sabbapathamam etam maggam patipannatta dvaradado
upayadassakoti vuttam hoti. Imam hi lesam laddha tava anusikkhamana
bahu puggala nanappakarake makatiya methunapatisevanadike
akusaladhamme karissantiti ayamettha adhippayo. Anekapariyayenati
imehi ananucchavikantiadina nayena vuttehi bahuhi karanehi.
Dubbharataya .pe. Kosajjassa avannam bhasitvati dubbharatadinam
vatthubhutassa asamvarassa avannam nindam garaham bhasitvati attho.
Yasma hi asamvare thitassa puggalassa atta dubbharatanceva
dupposatanca apajjati tasma asamvaro dubbharata dupposatati ca
vuccati. Yasma pana asamvare thitassa atta catusu paccayesu mahicchatam
@Footnote: 1. ito param vasaddena bhavitabbam.
---------------------------------------------------------------------------------------------
page260.
Sineruppamanepi ca paccaye laddha asantutthitam apajjati tasma
asamvaro mahicchata asantutthitati ca vuccati. Yasma ca asamvare thitassa
atta ganasanganikaya ceva kilesasanganikaya ca samvattati kosajjanugato
ca hoti atthakusitavatthuparipuriya samvattati tasma asamvaro
sanganika ceva kosajjancati vuccati. Subharataya .pe.
Viriyarambhassa vannam bhasitvati subharatadinam vatthubhutassa samvarassa ca vannam
bhasitvati attho. Yasma hi asamvaram pahaya samvare thitassa atta
subharo hoti suposo catusu paccayesu appicchatam nittanhabhavam
apajjati ekamekasminca paccaye yathalabhayathabalayathasaruppavasena
tippabhedaya santutthiya samvattati tasma samvaro subharata ceva suposata
ca appiccho ca santuttho cati vuccati. Yasma pana asamvaram pahaya samvare
thitassa atta kilesanam sallekhataya ceva niddhunanataya ca samvattati
tasma samvaro sallekho ca dhuto cati vuccati. Yasma ca asamvaram pahaya
samvare thitassa atta kayavacanam appasadikam appasadaniyam asantamasaruppam
kayavaciduccaritam cittassa appasadikamappasadaniyam asantamasaruppam
akusalavitakkattayanca anupagamma tabbiparitassa kayavacisucaritassa
kusalavitakkattayasseva ca pasadikassa pasadaniyassa santassa saruppassa
paripuriya samvattati tasma samvaro pasadikoti vuccati. Yasma
pana asamvaram pahaya samvare thitassa atta sabbakilesapacayabhutaya vivattaya
atthaviriyarambhavatthuparipuriya ca samvattati tasma samvaro apacayoceva
viriyarambho cati vuccatiti. Bhikkhunam tadanucchavikam tadanulomikanti
---------------------------------------------------------------------------------------------
page261.
Tattha sannipatitanam bhikkhunam yam idani sikkhapadam pannapessati
tassa anucchavikanceva anulomikanca yo cayam subharatadihi samvaro vutto
tassa anucchavikanceva anulomikanceva samvarappahanapatisamyuttam
asuttantanibaddham palivinimuttam okkantikadhammadesanam katvati attho. Bhagava
kira idisesu thanesu pancavannakusumamalam karonto viya ratanadamam
sajjento viya ye patikkhipanadhippaya asamvarabhirata te samparayikena
vattabhayena tajjento anekappakaram adinavam dassento ye sikkhakama
samvare thita te appekacce arahatte patitthapento appekacce
anagamisakadagamisotapattiphalesu upanissayavirahitepi saggamagge
patitthapento dighanikayappamanampi majjhimanikayappamanampi
dhammadesanam karoti. Tam sandhayetam vuttam bhikkhunam tadanucchavikam tadanulomikam
dhammim katham katvati. Tena hiti tena sudinnassa ajjhacarena
karanabhutena. Sikkhapadanti ettha sikkhitabbati sikkha. Pajjate iminati
padam. Sikkhaya padam sikkhapadam. Sikkhaya adhigamupayoti attho.
Athava mulam nissayo patitthati vuttam hoti. Methunaviratiya
methunasamvarassetam adhivacanam. Methunasamvaro hi tadannesam sikkhasankhatanam
silavipassanajhanamaggadhammanam vuttatthavasena padatta idha
sikkhapadanti adhippeto. Ayanca attho sikkhapadavibhange vuttanayena
veditabbo. Apica tadatthadipakam vacanampi sikkhapadanti veditabbam.
Vuttampi cetam sikkhapadanti yo tattha namakayo padakayo
niruttikayo byanjanakayoti. Athava yatha anabhijjha dhammapadanti vutte
---------------------------------------------------------------------------------------------
page262.
Anabhijjha eko dhammakotthasoti attho hoti evamidhapi
sikkhapadanti sikkhakotthaso sikkhaya eko padesotipi attho
veditabbo. Dasa atthavase paticcati dasa karanavase
sikkhapadappannattihetuadhigamaniye hitavisese paticca agamma arabbha.
Dasannam hitavisesanam nippattim sampassamanoti vuttam hoti. Idani te
dasa atthavase dassento sanghasutthutayatiadimaha.
     Tattha sanghasutthuta nama sanghassa sutthubhavo. Sutthu devati
agatatthane viya sutthu bhanteti vacanasampaticchabhavo. Yo ca
tathagatassa vacanam sampaticchati tassa tam digharattam hitaya sukhaya hoti.
Tasma sanghassa sutthu bhanteti mama vacanasampaticchanattham pannapessami
asampaticchane adinavam sampaticchane ca anisamsam dassetva na
balakarena abhibhavitvati etamattham avikaronto aha sanghasutthutayati.
Sanghaphasutayati sanghassa phasubhavaya sahajivitaya sukhaviharatthayati
attho. Dummankunam puggalanam niggahayati dummanku
nama dussilapuggala ye mankutam apadiyamanapi dukkhena apajjanti
vitikkamam karonta va katva va na lajjanti tesam niggahatthaya.
Te hi sikkhapade asati kim tumhehi dittham kim sutam kim amhehi katam
katamasmim vatthusmim katamam apattim aropetva amhe nigganhathati
sangham vihethessanti sikkhapade pana sati te sangho sikkhapadam dassetva
dhammena vinayena satthu sasanena niggahessati. Tena vuttam dummankunam
puggalanam niggahayati .pesalanam bhikkhunam phasuviharayati
---------------------------------------------------------------------------------------------
page263.
Pesalanam bhikkhunam phasuviharatthaya. Piyasila hi bhikkhu
kattabbakattabbam savajjanavajjam velam mariyadam ajananta
sikkhattayaparipuriya ghatamana sanditthamana 1- kilamanti ubbalha
honti kattabbakattabbam pana savajjanavajjam velam mariyadam natva
sikkhattayaparipuriya ghatanta na kilamanti na ubbalha honti. Tena
nesam sikkhapadappannapana phasuviharaya samvattati. Yo va dummankunam
niggaho sveva etesam phasuviharo. Dussilapuggale nissaya hi
uposatho na titthati pavarana na titthati sanghakammani nappavattanti
samaggi na hoti. Bhikkhu anekagga uddesaparipucchakammatthanadini
anuyunjitum na sakkonti. Dussilesu pana niggahitesu sabbopi
ayam upaddavo na hoti tato pesala bhikkhu phasum viharanti.
Evam pesalanam bhikkhunam phasuviharayati ettha dvidha attho veditabbo.
Ditthadhammikanam asavanam samvarayati ditthadhammika asava nama
asamvare thitena tasmimyeva attabhave pattabba
panippaharadandappaharahatthacchedapadacchedaakittiayasavipatisaradayo
dukkhavisesa. Iti imesam ditthadhammikanam asavanam samvaraya pidhanaya
agamanamaggathakanayati attho. Samparayikanam asavanam
patighatayati samparayika asava nama asamvare thitena katapapakammamulaka
samparaye narakadisu pattabba dukkhavisesa tesam patighatatthaya.
Patippassambhanatthaya vupasamanatthayati vuttam hoti. Appasannanam
@Footnote: 1. sandiddhamanati bhaveyya diha samsayeti dhatuto nipphannatta pariyonaddhatitiadisu
@nahadhatu viya.
---------------------------------------------------------------------------------------------
page264.
Va pasadayati sikkhapadappannattiya hi sati sikkhapadappannattim
natva va yathapannattam patipajjamane bhikkhu disva va yepi
appasanna panditamanussa te yani vata loke mahajanassa
rajjanadussanamuyhanatthanani tehi ime samana sakyaputtiya araka virata
viharanti dukkaram vata karonti bhariyam vata karontiti pasadam
apajjanti vinayapitake potthakam disva micchaditthikativedi brahmano
viya. Tena vuttam appasannanam va pasadayati. Pasannanam va
bhiyyobhavayati yepi sasane pasanna kulaputta tepi sikkhapadappannattim
va natva yathapannattam patipajjamane bhikkhu va disva
aho ayya dukkarakarino ye yavajivam ekabhattam brahmacariyam
vinayasamvaram anupalentiti bhiyyo bhiyyo pasidanti. Tena vuttam pasannanam
va bhiyyobhavayati. Saddhammatthitiyati tividho saddhammo
pariyattisaddhammo patipattisaddhammo adhigamasaddhammoti. Tattha
pitakattayasangahitam sabbampi buddhavacanam pariyattisaddhammo nama. Terasa
dhutangaguna cuddasa khandhakavattani dveasiti mahavattani silasamadhivipassanati
ayam patipattisaddhammo nama. Cattaro ariyamagga cattari
ca samannaphalani nibbanancati ayam adhigamasaddhammo nama. So
sabbopi yasma sikkhapadappannattiya sati bhikkhu sikkhapadanca
tassa vibhanganca tadatthajotanattham annanca buddhavacanam pariyapunanti
yathapannattanca patipajjamana patipattim puretva patipattiya
adhigantabbam lokuttaradhammam adhigacchanti tasma sikkhapadappannattiya
---------------------------------------------------------------------------------------------
page265.
Ciratthitiko hoti. Tena vuttam saddhammatthitiyati.
Vinayanuggahayati sikkhapadappannattiya hi sati samvaravinayo ca pahanavinayo
ca samathavinayo ca pannattivinayo cati catubbidhopi vinayo anuggahito
hoti upatthambhito supatthambhito. Tena vuttam vinayanuggahayati.
Sabbaneva cetani padani sikkhapadam pannapessamiti imina
vacanena saddhim yojetabbani. Tatrayam pathamapacchimapadayojana
sanghasutthutaya sikkhapadam pannapessami .pe. Vinayanuggahaya
sikkhapadam pannapessamiti. Apicettha yam sanghasutthu tam sanghaphasu
yam sanghaphasu tam dummankunam puggalanam niggahayati evam
sankhalikanayam yam sanghasutthu tam sanghaphasu yam sanghasutthu tam dummankunam
puggalanam niggahayati evanca ekekapadamulakam dasakkhattum yojanam
katva yam vuttam parivare 1-
       atthasatam dhammasatam      dve niruttisatani ca
       cattari ca nanasatani               atthavase pakaraneti
tam sabbam veditabbam. Tam panetam yasma parivareyeva avibhavissati
tasma idha na vannitanti.
     Evam sikkhapadappannattiya anisamsam dassetva tasmim
sikkhapade bhikkhuhi kattabbakiccam dipento evanca pana bhikkhave imam
sikkhapadam uddiseyyathati aha. Kim vuttam hoti. Bhikkhave imam
pana maya iti sandassitanisamsam sikkhapadam evam patimokkhuddese
@Footnote: 1. vi. pa. 8/357.
---------------------------------------------------------------------------------------------
page266.
Uddiseyyatha ca pariyapuneyyatha ca dhareyyatha ca annesanca
vaceyyathati. Atirekanayanattho hi ettha casaddo tenayamattho
anito hotiti. Idani yam vuttam imam sikkhapadanti tam dassento
yo pana bhikkhu methunam dhammam patiseveyya parajiko hoti asamvasoti
aha. Evam mulacchejjavasena dalham katva pathamaparajike
pannatte aparampi anuppannattatthaya makkativatthu udapadi.
Tassuppattidipanatthametam vuttam evancidam bhagavata bhikkhunam  sikkhapadam
pannattam hotiti. Tassattho bhagavata bhikkhunam idam sikkhapadam
evam pannattam hoti ca idanca annam vatthu udapaditi.


             The Pali Atthakatha in Roman Book 1 page 251-266.
http://84000.org/tipitaka/pitaka_item/read_rm.php?B=1&A=5274&modeTY=2&pagebreak=1
             อรรถกถาบาลีอักษรไทย :-
http://84000.org/tipitaka/pitaka_item/read_th.php?B=1&A=5274&modeTY=2&pagebreak=1
             อ่านอรรถกถาแปลไทย :-
http://84000.org/tipitaka/attha/attha.php?b=1&i=10
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=1&A=316
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=1&A=340
             The Pali Tipitaka in Roman Character :-
http://84000.org/tipitaka/read/roman_read.php?B=1&A=340
             Contents of The Tipitaka Volume 1
http://84000.org/tipitaka/read/?index_1