ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๕ ภาษาบาลี อักษรไทย พระอภิธรรมปิฎกเล่มที่ ๒ อภิ. วิภงฺโค

     [๘๓๕]   ตตฺถ   กตมา   ฉสุ  อภิญฺญาสุ  ปญฺญา  อิทฺธิวิเธ  ญาณํ
โสตธาตุวิสุทฺธิยา    ญาณํ    ปรจิตฺเต    ญาณํ   ปุพฺเพนิวาสานุสฺสติญาณํ
สตฺตานํ    จุตูปปาเต    ญาณํ   อาสวานํ   ขเย   ญาณํ   อิมา   ฉสุ
อภิญฺญาสุ ปญฺญา ฯ เอวํ ฉพฺพิเธน ญาณวตฺถุ ฯ
@เชิงอรรถ:  อญฺญตฺถ ...นิคฺคยฺหวาริตปฺปตฺโตติปิ ทิสฺสติ ฯ
     [๘๓๖]   ตตฺถ   กตมานิ  สตฺตสตฺตริ  ญาณวตฺถูนิ  ฯ  ชาติปจฺจยา
ชรามรณนฺติ   ญาณํ   อสติ   ชาติยา  นตฺถิ  ชรามรณนฺติ  ญาณํ  อตีตมฺปิ
อทฺธานํ    ชาติปจฺจยา    ชรามรณนฺติ   ญาณํ   อสติ   ชาติยา   นตฺถิ
ชรามรณนฺติ    ญาณํ   อนาคตมฺปิ   อทฺธานํ   ชาติปจฺจยา   ชรามรณนฺติ
ญาณํ    อสติ    ชาติยา    นตฺถิ   ชรามรณนฺติ   ญาณํ   ยมฺปิสฺส   ตํ
ธมฺมฏฺฐิติญาณํ    ตมฺปิ    ขยธมฺมํ   วยธมฺมํ   วิราคธมฺมํ   นิโรธธมฺมนฺติ
ญาณํ   ฯ   ภวปจฺจยา   ชาตีติ   ญาณํ  ฯเปฯ  อุปาทานปจฺจยา  ภโวติ
ญาณํ   ฯเปฯ   ตณฺหาปจฺจยา  อุปาทานนฺติ  ญาณํ  ฯเปฯ  เวทนาปจฺจยา
ตณฺหาติ      ญาณํ     ฯเปฯ     ผสฺสปจฺจยา     เวทนาติ     ญาณํ
ฯเปฯ    สฬายตนปจฺจยา    ผสฺโสติ    ญาณํ   ฯเปฯ   นามรูปปจฺจยา
สฬายตนนฺติ    ญาณํ    ฯเปฯ    วิญฺญาณปจฺจยา    นามรูปนฺติ    ญาณํ
ฯเปฯ    สงฺขารปจฺจยา    วิญฺญาณนฺติ   ญาณํ   ฯเปฯ   อวิชฺชาปจฺจยา
สงฺขาราติ   ญาณํ   อสติ   อวิชฺชาย   นตฺถิ  สงฺขาราติ  ญาณํ  อตีตมฺปิ
อทฺธานํ   อวิชฺชาปจฺจยา   สงฺขาราติ   ญาณํ   อสติ   อวิชฺชาย   นตฺถิ
สงฺขาราติ    ญาณํ   อนาคตมฺปิ   อทฺธานํ   อวิชฺชาปจฺจยา   สงฺขาราติ
ญาณํ  อสติ  อวิชฺชาย  นตฺถิ  สงฺขาราติ  ญาณํ  ยมฺปิสฺส  ตํ ธมฺมฏฺฐิติญาณํ
ตมฺปิ    ขยธมฺมํ    วยธมฺมํ    วิราคธมฺมํ    นิโรธธมฺมนฺติ   ญาณํ   ฯ
อิมานิ สตฺตสตฺตริ ญาณวตฺถูนิ ฯ เอวํ สตฺตวิเธน ญาณวตฺถุ ฯ
     [๘๓๗]   ตตฺถ   กตมา   จตูสุ   มคฺเคสุ   จตูสุ  ผเลสุ  ปญฺญา
โสตาปตฺติมคฺเค    ปญฺญา    โสตาปตฺติผเล    ปญฺญา   สกทาคามิมคฺเค
ปญฺญา   สกทาคามิผเล   ปญฺญา   อนาคามิมคฺเค   ปญฺญา  อนาคามิผเล
ปญฺญา     อรหตฺตมคฺเค     ปญฺญา     อรหตฺตผเล    ปญฺญา    อิมา
จตูสุ มคฺเคสุ จตูสุ ผเลสุ ปญฺญา ฯ เอวํ อฏฺฐวิเธน ญาณวตฺถุ ฯ
     [๘๓๘]   ตตฺถ   กตมา   นวสุ   อนุปุพฺพวิหารสมาปตฺตีสุ   ปญฺญา
ปฐมชฺฌานสมาปตฺติยา      ปญฺญา      ทุติยชฺฌานสมาปตฺติยา     ปญฺญา
ตติยชฺฌานสมาปตฺติยา      ปญฺญา     จตุตฺถชฺฌานสมาปตฺติยา     ปญฺญา
อากาสานญฺจายตนสมาปตฺติยา      ปญฺญา     วิญฺญาณญฺจายตนสมาปตฺติยา
ปญฺญา       อากิญฺจญฺญายตนสมาปตฺติยา       ปญฺญา      เนวสญฺญา-
นาสญฺญายตนสมาปตฺติยา          ปญฺญา         สญฺญาเวทยิตนิโรธ-
สมาปตฺติยาวุฏฺฐิตสฺส        ปจฺจเวกฺขณาญาณํ       อิมา       นวสุ
อนุปุพฺพวิหารสมาปตฺตีสุ ปญฺญา ฯ เอวํ นววิเธน ญาณวตฺถุ ฯ
     [๘๓๙]   ตตฺถ   กตมํ   ตถาคตสฺส  ฐานญฺจ  ฐานโต  อฏฺฐานญฺจ
อฏฺฐานโต   ยถาภูตํ   ญาณํ  ฯ  อิธ  ตถาคโต  อฏฺฐานเมตํ  อนวกาโส
ยํ    ทิฏฺฐิสมฺปนฺโน   ปุคฺคโล   กญฺจิ   สงฺขารํ   นิจฺจโต   อุปคจฺเฉยฺย
เนตํ  ฐานํ  วิชฺชตีติ  ปชานาติ  ฐานญฺจ  โข  เอตํ  วิชฺชติ  ยํ ปุถุชฺชโน
กญฺจิ   สงฺขารํ   นิจฺจโต  อุปคจฺเฉยฺย  ฐานเมตํ  วิชฺชตีติ  ปชานาติ  ฯ
อฏฺฐานเมตํ    อนวกาโส   ยํ   ทิฏฺฐิสมฺปนฺโน   ปุคฺคโล  กญฺจิ  สงฺขารํ
สุขโต   อุปคจฺเฉยฺย   เนตํ   ฐานํ   วิชฺชตีติ   ปชานาติ  ฐานญฺจ  โข
เอตํ   วิชฺชติ   ยํ   ปุถุชฺชโน   กญฺจิ   สงฺขารํ   สุขโต   อุปคจฺเฉยฺย
ฐานเมตํ วิชฺชตีติ ปชานาติ ฯ
     {๘๓๙.๑}   อฏฺฐานเมตํ     อนวกาโส    ยํ    ทิฏฺฐิสมฺปนฺโน
ปุคฺคโล     กญฺจิ    ธมฺมํ    อตฺตโต    อุปคจฺเฉยฺย    เนตํ    ฐานํ
วิชฺชตีติ   ปชานาติ   ฐานญฺจ   โข   เอตํ  วิชฺชติ  ยํ  ปุถุชฺชโน  กญฺจิ
ธมฺมํ  อตฺตโต  อุปคจฺเฉยฺย  ฐานเมตํ  วิชฺชตีติ  ปชานาติ  ฯ อฏฺฐานเมตํ
อนวกาโส   ยํ   ทิฏฺฐิสมฺปนฺโน   ปุคฺคโล   มาตรํ   ชีวิตา  โวโรเปยฺย
เนตํ  ฐานํ  วิชฺชตีติ  ปชานาติ  ฐานญฺจ  โข  เอตํ  วิชฺชติ  ยํ ปุถุชฺชโน
มาตรํ ชีวิตา โวโรเปยฺย ฐานเมตํ วิชฺชตีติ ปชานาติ ฯ
     {๘๓๙.๒}   อฏฺฐานเมตํ  อนวกาโส  ยํ  ทิฏฺฐิสมฺปนฺโน ปุคฺคโล ปิตรํ
ชีวิตา  โวโรเปยฺย  ฯเปฯ  อรหนฺตํ  ชีวิตา  โวโรเปยฺย  ฯเปฯ ทุฏฺเฐน
จิตฺเตน  ตถาคตสฺส  โลหิตํ  อุปฺปาเทยฺย  ฯเปฯ  สงฺฆํ  ภินฺเทยฺย  ฯเปฯ
อญฺญํ   สตฺถารํ   อุทฺทิเสยฺย   ฯเปฯ   อฏฺฐมํ   ภวํ  นิพฺพตฺเตยฺย  เนตํ
ฐานํ   วิชฺชตีติ   ปชานาติ   ฐานญฺจ   โข  เอตํ  วิชฺชติ  ยํ  ปุถุชฺชโน
อฏฺฐมํ ภวํ นิพฺพตฺเตยฺย ฐานเมตํ วิชฺชตีติ ปชานาติ ฯ
     {๘๓๙.๓}   อฏฺฐานเมตํ   อนวกาโส   ยํ  เอกิสฺสา  โลกธาตุยา
เทฺว   อรหนฺโต   สมฺมาสมฺพุทฺธา   อปุพฺพํ   อจริมํ   อุปฺปชฺเชยฺยุํ  เนตํ
ฐานํ  วิชฺชตีติ  ปชานาติ  ฐานญฺจ โข เอตํ วิชฺชติ ยํ เอกิสฺสา โลกธาตุยา
เอโก  อรหํ  สมฺมาสมฺพุทฺโธ  อุปฺปชฺเชยฺย  ฐานเมตํ  วิชฺชตีติ ปชานาติ ฯ
อฏฺฐานเมตํ   อนวกาโส   ยํ   เอกิสฺสา   โลกธาตุยา  เทฺว  ราชาโน
จกฺกวตฺติโน  อปุพฺพํ  อจริมํ  อุปฺปชฺเชยฺยุํ  เนตํ  ฐานํ  วิชฺชตีติ  ปชานาติ
ฐานญฺจ   โข   เอตํ  วิชฺชติ  ยํ  เอกิสฺสา  โลกธาตุยา  เอโก  ราชา
จกฺกวตฺติ   อุปฺปชฺเชยฺย   ฐานเมตํ   วิชฺชตีติ  ปชานาติ  ฯ  อฏฺฐานเมตํ
อนวกาโส   ยํ  อิตฺถี  อรหํ  อสฺส  สมฺมาสมฺพุทฺโธ  เนตํ  ฐานํ  วิชฺชตีติ
ปชานาติ  ฐานญฺจ  โข  เอตํ  วิชฺชติ  ยํ ปุริโส อรหํ อสฺส สมฺมาสมฺพุทฺโธ
ฐานเมตํ   วิชฺชตีติ   ปชานาติ   ฯ   อฏฺฐานเมตํ  อนวกาโส  ยํ  อิตฺถี
ราชา   อสฺส   จกฺกวตฺติ   เนตํ   ฐานํ   วิชฺชตีติ   ปชานาติ  ฐานญฺจ
โข  เอตํ  วิชฺชติ  ยํ  ปุริโส  ราชา  อสฺส  จกฺกวตฺติ  ฐานเมตํ วิชฺชตีติ
ปชานาติ ฯ
     {๘๓๙.๔}   อฏฺฐานเมตํ   อนวกาโส  ยํ  อิตฺถี  สกฺกตฺตํ  กเรยฺย
มารตฺตํ   กเรยฺย   พฺรหฺมตฺตํ   กเรยฺย  เนตํ  ฐานํ  วิชฺชตีติ  ปชานาติ
ฐานญฺจ  โข  เอตํ  วิชฺชติ  ยํ  ปุริโส  สกฺกตฺตํ  กเรยฺย มารตฺตํ กเรยฺย
พฺรหฺมตฺตํ กเรยฺย ฐานเมตํ วิชฺชตีติ ปชานาติ ฯ
     {๘๓๙.๕}   อฏฺฐานเมตํ   อนวกาโส   ยํ  กายทุจฺจริตสฺส  อิฏฺโฐ
กนฺโต   มนาโป   วิปาโก  นิพฺพตฺเตยฺย  เนตํ  ฐานํ  วิชฺชตีติ  ปชานาติ
ฐานญฺจ  โข  เอตํ  วิชฺชติ  ยํ  กายทุจฺจริตสฺส  อนิฏฺโฐ อกนฺโต อมนาโป
วิปาโก นิพฺพตฺเตยฺย ฐานเมตํ  วิชฺชตีติ ปชานาติ ฯ
     {๘๓๙.๖}   อฏฺฐานเมตํ    อนวกาโส   ยํ   วจีทุจฺจริตสฺส   ยํ
มโนทุจฺจริตสฺส   อิฏฺโฐ   กนฺโต   มนาโป   วิปาโก  นิพฺพตฺเตยฺย  เนตํ
ฐานํ   วิชฺชตีติ  ปชานาติ  ฐานญฺจ  โข  เอตํ  วิชฺชติ  ยํ  วจีทุจฺจริตสฺส
ยํ   มโนทุจฺจริตสฺส   อนิฏฺโฐ   อกนฺโต  อมนาโป  วิปาโก  นิพฺพตฺเตยฺย
ฐานเมตํ วิชฺชตีติ ปชานาติ ฯ
     {๘๓๙.๗}   อฏฺฐานเมตํ   อนวกาโส   ยํ  กายสุจริตสฺส  อนิฏฺโฐ
อกนฺโต  อมนาโป  วิปาโก  นิพฺพตฺเตยฺย  เนตํ  ฐานํ  วิชฺชตีติ  ปชานาติ
ฐานญฺจ  โข  เอตํ  วิชฺชติ  ยํ กายสุจริตสฺส อิฏฺโฐ กนฺโต มนาโป วิปาโก
นิพฺพตฺเตยฺย ฐานเมตํ วิชฺชตีติ ปชานาติ ฯ
     {๘๓๙.๘}   อฏฺฐานเมตํ  อนวกาโส  ยํ วจีสุจริตสฺส ยํ มโนสุจริตสฺส
อนิฏฺโฐ   อกนฺโต  อมนาโป  วิปาโก  นิพฺพตฺเตยฺย  เนตํ  ฐานํ  วิชฺชตีติ
ปชานาติ  ฐานญฺจ  โข  เอตํ  วิชฺชติ  ยํ  วจีสุจริตสฺส  ยํ  มโนสุจริตสฺส
อิฏฺโฐ กนฺโต มนาโป วิปาโก นิพฺพตฺเตยฺย ฐานเมตํ วิชฺชตีติ ปชานาติ ฯ
     {๘๓๙.๙}   อฏฺฐานเมตํ  อนวกาโส  ยํ  กายทุจฺจริตสมงฺคี ตนฺนิทานํ
ตปฺปจฺจยา  กายสฺส  เภทา  ปรํ  มรณา  สุคตึ  สคฺคํ  โลกํ  อุปปชฺเชยฺย
เนตํ  ฐานํ  วิชฺชตีติ ปชานาติ ฐานญฺจ โข เอตํ วิชฺชติ ยํ กายทุจฺจริตสมงฺคี
ตนฺนิทานํ  ตปฺปจฺจยา  กายสฺส  เภทา  ปรํ  มรณา  อปายํ ทุคฺคตึ วินิปาตํ
นิรยํ อุปปชฺเชยฺย ฐานเมตํ วิชฺชตีติ ปชานาติ ฯ
     {๘๓๙.๑๐}   อฏฺฐานเมตํ   อนวกาโส   ยํ   วจีทุจฺจริตสมงฺคี  ยํ
มโนทุจฺจริตสมงฺคี   ตนฺนิทานํ   ตปฺปจฺจยา   กายสฺส  เภทา  ปรํ  มรณา
สุคตึ  สคฺคํ  โลกํ  อุปปชฺเชยฺย  เนตํ  ฐานํ  วิชฺชตีติ  ปชานาติ  ฐานญฺจ
โข   เอตํ  วิชฺชติ  ยํ  วจีทุจฺจริตสมงฺคี  ยํ  มโนทุจฺจริตสมงฺคี  ตนฺนิทานํ
ตปฺปจฺจยา   กายสฺส  เภทา  ปรํ  มรณา  อปายํ  ทุคฺคตึ  วินิปาตํ  นิรยํ
อุปปชฺเชยฺย ฐานเมตํ วิชฺชตีติ ปชานาติ ฯ
     {๘๓๙.๑๑}   อฏฺฐานเมตํ    อนวกาโส    ยํ   กายสุจริตสมงฺคี
ตนฺนิทานํ   ตปฺปจฺจยา   กายสฺส   เภทา   ปรํ   มรณา  อปายํ  ทุคฺคตึ
วินิปาตํ   นิรยํ   อุปปชฺเชยฺย   เนตํ  ฐานํ  วิชฺชตีติ  ปชานาติ  ฐานญฺจ
โข   เอตํ   วิชฺชติ  ยํ  กายสุจริตสมงฺคี  ตนฺนิทานํ  ตปฺปจฺจยา  กายสฺส
เภทา     ปรํ     มรณา     สุคตึ     สคฺคํ    โลกํ    อุปปชฺเชยฺย
ฐานเมตํ วิชฺชตีติ ปชานาติ ฯ
     {๘๓๙.๑๒}   อฏฺฐานเมตํ   อนวกาโส   ยํ   วจีสุจริตสมงฺคี   ยํ
มโนสุจริตสมงฺคี   ตนฺนิทานํ   ตปฺปจฺจยา   กายสฺส   เภทา  ปรํ  มรณา
อปายํ   ทุคฺคตึ   วินิปาตํ   นิรยํ   อุปปชฺเชยฺย   เนตํ   ฐานํ  วิชฺชตีติ
ปชานาติ  ฐานญฺจ  โข  เอตํ  วิชฺชติ ยํ วจีสุจริตสมงฺคี ยํ มโนสุจริตสมงฺคี
ตนฺนิทานํ   ตปฺปจฺจยา   กายสฺส  เภทา  ปรํ  มรณา  สุคตึ  สคฺคํ  โลกํ
อุปปชฺเชยฺย  ฐานเมตํ  วิชฺชตีติ  ปชานาติ  ฯ  เย  เย ธมฺมา เยสํ เยสํ
ธมฺมานํ  เหตู  ปจฺจยา  อุปฺปาทาย  ตํ  ตํ ฐานํ เย เย ธมฺมา เยสํ เยสํ
ธมฺมานํ  น  เหตู  น  ปจฺจยา  อุปฺปาทาย  ตํ  ตํ  อฏฺฐานนฺติ  ยา ตตฺถ
ปญฺญา    ปชานนา    ฯเปฯ   อโมโห   ธมฺมวิจโย   สมฺมาทิฏฺฐิ   อิทํ
ตถาคตสฺส ฐานญฺจ ฐานโต อฏฺฐานญฺจ อฏฺฐานโต ยถาภูตํ ญาณํ ฯ
     [๘๔๐]   ตตฺถ    กตมํ    ตถาคตสฺส   อตีตานาคตปจฺจุปฺปนฺนานํ
กมฺมสมาทานานํ   ฐานโส   เหตุโส   วิปากํ   ยถาภูตํ   ญาณํ  ฯ  อิธ
ตถาคโต     ปชานาติ    อตฺเถกจฺจานิ    ปาปกานิ    กมฺมสมาทานานิ
คติสมฺปตฺติปฏิพาฬฺหานิ     น     วิปจนฺติ     อตฺเถกจฺจานิ    ปาปกานิ
กมฺมสมาทานานิ        อุปธิสมฺปตฺติปฏิพาฬฺหานิ       น       วิปจนฺติ
อตฺเถกจฺจานิ     ปาปกานิ    กมฺมสมาทานานิ    กาลสมฺปตฺติปฏิพาฬฺหานิ
น      วิปจนฺติ      อตฺเถกจฺจานิ      ปาปกานิ     กมฺมสมาทานานิ
ปโยคสมฺปตฺติปฏิพาฬฺหานิ     น    วิปจนฺติ    อตฺเถกจฺจานิ    ปาปกานิ
กมฺมสมาทานานิ     คติวิปตฺตึ     อาคมฺม     วิปจนฺติ    อตฺเถกจฺจานิ
ปาปกานิ      กมฺมสมาทานานิ     อุปธิวิปตฺตึ     อาคมฺม     วิปจนฺติ
อตฺเถกจฺจานิ     ปาปกานิ    กมฺมสมาทานานิ    กาลวิปตฺตึ    อาคมฺม
วิปจนฺติ    อตฺเถกจฺจานิ    ปาปกานิ    กมฺมสมาทานานิ    ปโยควิปตฺตึ
อาคมฺม     วิปจนฺติ     อตฺเถกจฺจานิ    กลฺยาณานิ    กมฺมสมาทานานิ
คติวิปตฺติปฏิพาฬฺหานิ     น     วิปจนฺติ     อตฺเถกจฺจานิ    กลฺยาณานิ
กมฺมสมาทานานิ    อุปธิวิปตฺติปฏิพาฬฺหานิ    น   วิปจนฺติ   อตฺเถกจฺจานิ
กลฺยาณานิ    กมฺมสมาทานานิ    กาลวิปตฺติปฏิพาฬฺหานิ    น    วิปจนฺติ
อตฺเถกจฺจานิ    กลฺยาณานิ    กมฺมสมาทานานิ    ปโยควิปตฺติปฏิพาฬฺหานิ
น   วิปจนฺติ   อตฺเถกจฺจานิ   กลฺยาณานิ   กมฺมสมาทานานิ   คติสมฺปตฺตึ
อาคมฺม     วิปจนฺติ     อตฺเถกจฺจานิ    กลฺยาณานิ    กมฺมสมาทานานิ
อุปธิสมฺปตฺตึ      อาคมฺม     วิปจนฺติ     อตฺเถกจฺจานิ     กลฺยาณานิ
กมฺมสมาทานานิ     กาลสมฺปตฺตึ    อาคมฺม    วิปจนฺติ    อตฺเถกจฺจานิ
กลฺยาณานิ    กมฺมสมาทานานิ   ปโยคสมฺปตฺตึ   อาคมฺม   วิปจนฺตีติ   ฯ
ยา   ตตฺถ   ปญฺญา   ปชานนา  ฯเปฯ  อโมโห  ธมฺมวิจโย  สมฺมาทิฏฺฐิ
อิทํ      ตถาคตสฺส      อตีตานาคตปจฺจุปฺปนฺนานํ      กมฺมสมาทานานํ
ฐานโส เหตุโส วิปากํ ยถาภูตํ ญาณํ ฯ
     [๘๔๑]   ตตฺถ   กตมํ  ตถาคตสฺส  สพฺพตฺถคามินึ  ปฏิปทํ  ยถาภูตํ
ญาณํ   ฯ   อิธ   ตถาคโต   อยํ   มคฺโค   อยํ  ปฏิปทา  นิรยคามินีติ
ปชานาติ    อยํ   มคฺโค   อยํ   ปฏิปทา   ติรจฺฉานคามินีติ   ปชานาติ
อยํ   มคฺโค   อยํ   ปฏิปทา   ปิตฺติวิสยคามินีติ   ปชานาติ  อยํ  มคฺโค
อยํ   ปฏิปทา   มนุสฺสโลกคามินีติ   ปชานาติ  อยํ  มคฺโค  อยํ  ปฏิปทา
เทวโลกคามินีติ   ปชานาติ   อยํ   มคฺโค  อยํ  ปฏิปทา  นิพฺพานคามินีติ
ปชานาติ   ฯ  ยา  ตตฺถ  ปญฺญา  ปชานนา  ฯเปฯ  อโมโห  ธมฺมวิจโย
สมฺมาทิฏฺฐิ อิทํ ตถาคตสฺส สพฺพตฺถคามินึ ปฏิปทํ ยถาภูตํ ญาณํ ฯ
     [๘๔๒]   ตตฺถ   กตมํ   ตถาคตสฺส  อเนกธาตุํ  นานาธาตุํ  โลกํ
ยถาภูตํ  ญาณํ  ฯ  อิธ  ตถาคโต  ขนฺธนานตฺตํ  ปชานาติ  อายตนนานตฺตํ
ปชานาติ    ธาตุนานตฺตํ    ปชานาติ    อเนกธาตุํ   นานาธาตุํ   โลกํ
ปชานาติ   ฯ  ยา  ตตฺถ  ปญฺญา  ปชานนา  ฯเปฯ  อโมโห  ธมฺมวิจโย
สมฺมาทิฏฺฐิ   อิทํ   ตถาคตสฺส   อเนกธาตุํ   นานาธาตุํ   โลกํ  ยถาภูตํ
ญาณํ ฯ
     [๘๔๓]   ตตฺถ  กตมํ  ตถาคตสฺส  สตฺตานํ  นานาธิมุตฺติกตํ  ยถาภูตํ
ญาณํ   ฯ   อิธ  ตถาคโต  ปชานาติ  สนฺติ  สตฺตา  หีนาธิมุตฺติกา  สนฺติ
สตฺตา   ปณีตาธิมุตฺติกา   หีนาธิมุตฺติกา   สตฺตา   หีนาธิมุตฺติเก   สตฺเต
เสวนฺติ   ภชนฺติ   ปยิรุปาสนฺติ   ปณีตาธิมุตฺติกา   สตฺตา  ปณีตาธิมุตฺติเก
สตฺเต   เสวนฺติ   ภชนฺติ   ปยิรุปาสนฺติ  อตีตมฺปิ  อทฺธานํ  หีนาธิมุตฺติกา
สตฺตา   หีนาธิมุตฺติเก   สตฺเต  เสวึสุ  ภชึสุ  ปยิรุปาสึสุ  ปณีตาธิมุตฺติกา
สตฺตา   ปณีตาธิมุตฺติเก   สตฺเต   เสวึสุ   ภชึสุ  ปยิรุปาสึสุ  อนาคตมฺปิ
อทฺธานํ  หีนาธิมุตฺติกา  สตฺตา  หีนาธิมุตฺติเก  สตฺเต  เสวิสฺสนฺติ ภชิสฺสนฺติ
ปยิรุปาสิสฺสนฺติ     ปณีตาธิมุตฺติกา    สตฺตา    ปณีตาธิมุตฺติเก    สตฺเต
เสวิสฺสนฺติ   ภชิสฺสนฺติ  ปยิรุปาสิสฺสนฺตีติ  ฯ  ยา  ตตฺถ  ปญฺญา  ปชานนา
ฯเปฯ   อโมโห   ธมฺมวิจโย   สมฺมาทิฏฺฐิ   อิทํ   ตถาคตสฺส   สตฺตานํ
นานาธิมุตฺติกตํ ยถาภูตํ ญาณํ ฯ
     [๘๔๔]   ตตฺถ    กตมํ   ตถาคตสฺส   ปรสตฺตานํ   ปรปุคฺคลานํ
อินฺทฺริยปโรปริยตฺตํ   ยถาภูตํ   ญาณํ  ฯ  อิธ  ตถาคโต  สตฺตานํ  อาสยํ
ปชานาติ    อนุสยํ   ปชานาติ   จริตํ   ปชานาติ   อธิมุตฺตึ   ปชานาติ
อปฺปรชกฺเข  มหารชกฺเข  ติกฺขินฺทฺริเย  มุทินฺทฺริเย  สฺวากาเร  ทฺวากาเร
สุวิญฺญาปเย   ทูวิญฺญาปเย   ภพฺพาภพฺเพ   สตฺเต   ปชานาติ  ฯ  กตโม
จ   สตฺตานํ   อาสโย   สสฺสโต  โลโกติ  วา  อสสฺสโต  โลโกติ  วา
อนฺตวา  โลโกติ  วา  อนนฺตวา  โลโกติ  วา  ตํ  ชีวํ  ตํ  สรีรนฺติ วา
อญฺญํ   ชีวํ   อญฺญํ   สรีรนฺติ   วา   โหติ  ตถาคโต  ปรมฺมรณาติ  วา
น  โหติ  ตถาคโต  ปรมฺมรณาติ  วา  โหติ  จ  น  จ  โหติ  ตถาคโต
ปรมฺมรณาติ  วา  เนว  โหติ  น  น  โหติ  ตถาคโต  ปรมฺมรณาติ  วา
อิติ   ภวทิฏฺฐิสนฺนิสฺสิตา   วา   สตฺตา   โหนฺติ  วิภวทิฏฺฐิสนฺนิสฺสิตา  วา
เอเต   วา  ปน  อุโภ  อนฺเต  อนุปคมฺม  อิทปฺปจฺจยตาปฏิจฺจสมุปฺปนฺเนสุ
ธมฺเมสุ   อนุโลมิกา   ขนฺติ   ปฏิลทฺธา   โหติ   ยถาภูตํ   วา   ญาณํ
อยํ สตฺตานํ อาสโย ฯ
     {๘๔๔.๑}   กตโม  จ  สตฺตานํ อนุสโย สตฺตานุสยา กามราคานุสโย
ปฏิฆานุสโย   มานานุสโย   ทิฏฺฐานุสโย   วิจิกิจฺฉานุสโย  ภวราคานุสโย
อวิชฺชานุสโย  ยํ  โลเก ปิยรูปํ สาตรูปํ เอตฺถ สตฺตานํ ราคานุสโย อนุเสติ
ยํ  โลเก  อปฺปิยรูปํ  อสาตรูปํ  เอตฺถ  สตฺตานํ  ปฏิฆานุสโย อนุเสติ อิติ
อิเมสุ ทฺวีสุ ธมฺเมสุ อวิชฺชา อนุปติตา ตเทกฏฺโฐ มาโน จ ทิฏฺฐิ จ วิจิกิจฺฉา
จ  ทฏฺฐพฺพา  อยํ สตฺตานํ อนุสโย ฯ กตมํ จ สตฺตานํ จริตํ ปุญฺญาภิสงฺขาโร
อปุญฺญาภิสงฺขาโร   อาเนญฺชาภิสงฺขาโร   ปริตฺตภูมโก   วา   มหาภูมโก
วา อิทํ สตฺตานํ จริตํ ฯ
     {๘๔๔.๒}   กตมา  จ  สตฺตานํ  อธิมุตฺติ  สนฺติ สตฺตา หีนาธิมุตฺติกา
สนฺติ    สตฺตา   ปณีตาธิมุตฺติกา   หีนาธิมุตฺติกา   สตฺตา   หีนาธิมุตฺติเก
สตฺเต    เสวนฺติ    ภชนฺติ    ปยิรุปาสนฺติ    ปณีตาธิมุตฺติกา    สตฺตา
ปณีตาธิมุตฺติเก   สตฺเต   เสวนฺติ  ภชนฺติ  ปยิรุปาสนฺติ  อตีตมฺปิ  อทฺธานํ
หีนาธิมุตฺติกา   สตฺตา   หีนาธิมุตฺติเก   สตฺเต  เสวึสุ  ภชึสุ  ปยิรุปาสึสุ
ปณีตาธิมุตฺติกา    สตฺตา    ปณีตาธิมุตฺติเก    สตฺเต    เสวึสุ    ภชึสุ
ปยิรุปาสึสุ   อนาคตมฺปิ   อทฺธานํ   หีนาธิมุตฺติกา   สตฺตา  หีนาธิมุตฺติเก
สตฺเต   เสวิสฺสนฺติ   ภชิสฺสนฺติ   ปยิรุปาสิสฺสนฺติ   ปณีตาธิมุตฺติกา  สตฺตา
ปณีตาธิมุตฺติเก    สตฺเต   เสวิสฺสนฺติ   ภชิสฺสนฺติ   ปยิรุปาสิสฺสนฺติ   อยํ
สตฺตานํ อธิมุตฺติ ฯ
     {๘๔๔.๓}   กตเม  เต  สตฺตา  มหารชกฺขา ทส กิเลสวตฺถูนิ โลโภ
โทโส  โมโห  มาโน  ทิฏฺฐิ  วิจิกิจฺฉา ถีนํ อุทฺธจฺจํ อหิริกํ อโนตฺตปฺปํ เยสํ
สตฺตานํ   อิมานิ   ทส   กิเลสวตฺถูนิ  อาเสวิตานิ  ภาวิตานิ  พหุลีกตานิ
อุสฺสทคตานิ อิเม เต สตฺตา มหารชกฺขา ฯ
     {๘๔๔.๔}   กตเม  เต  สตฺตา  อปฺปรชกฺขา  เยสํ  สตฺตานํ อิมานิ
ทส   กิเลสวตฺถูนิ   อนาเสวิตานิ  อภาวิตานิ  อพหุลีกตานิ  อนุสฺสทคตานิ
อิเม เต สตฺตา อปฺปรชกฺขา ฯ
     {๘๔๔.๕}   กตเม  เต  สตฺตา  มุทินฺทฺริยา ปญฺจินฺทฺริยานิ สทฺธินฺทฺริยํ
วิริยินฺทฺริยํ  สตินฺทฺริยํ  สมาธินฺทฺริยํ  ปญฺญินฺทฺริยํ  เยสํ  สตฺตานํ อิมานิ
ปญฺจินฺทฺริยานิ    อนาเสวิตานิ   อภาวิตานิ   อพหุลีกตานิ   อนุสฺสทคตานิ
อิเม เต สตฺตา มุทินฺทฺริยา ฯ
     {๘๔๔.๖}   กตเม  เต  สตฺตา  ติกฺขินฺทฺริยา  เยสํ  สตฺตานํ อิมานิ
ปญฺจินฺทฺริยานิ     อาเสวิตานิ    ภาวิตานิ    พหุลีกตานิ    อุสฺสทคตานิ
อิเม เต สตฺตา ติกฺขินฺทฺริยา ฯ
     {๘๔๔.๗}   กตเม  เต  สตฺตา ทฺวาการา เย เต สตฺตา ปาปาสยา
ปาปานุสยา   ปาปจริตา   ปาปาธิมุตฺติกา  มหารชกฺขา  มุทินฺทฺริยา  อิเม
เต สตฺตา ทฺวาการา ฯ
     {๘๔๔.๘}   กตเม เต สตฺตา สฺวาการา เย เต สตฺตา กลฺยาณาสยา
กลฺยาณจริตา   กลฺยาณาธิมุตฺติกา   อปฺปรชกฺขา   ติกฺขินฺทฺริยา  อิเม  เต
สตฺตา สฺวาการา ฯ
     {๘๔๔.๙}   กตเม  เต  สตฺตา  ทูวิญฺญาปยา  เย  จ  เต  สตฺตา
ทฺวาการา  เตว  เต  สตฺตา  ทูวิญฺญาปยา  เย  จ เต สตฺตา สฺวาการา
เตว เต สตฺตา สุวิญฺญาปยา ฯ
     {๘๔๔.๑๐}   กตเม  เต สตฺตา อภพฺพา เย เต สตฺตา กมฺมาวรเณน
สมนฺนาคตา   กิเลสาวรเณน   สมนฺนาคตา   วิปากาวรเณน  สมนฺนาคตา
อสฺสทฺธา   อจฺฉนฺทิกา   ทุปฺปญฺญา   อภพฺพา   นิยามํ  โอกฺกมิตุํ  กุสเลสุ
ธมฺเมสุ สมฺมตฺตํ อิเม เต สตฺตา อภพฺพา ฯ
     {๘๔๔.๑๑}   กตเม เต สตฺตา ภพฺพา เย เต สตฺตา น กมฺมาวรเณน
สมนฺนาคตา    น    กิเลสาวรเณน   สมนฺนาคตา   น   วิปากาวรเณน
สมนฺนาคตา   สทฺธา   ฉนฺทิกา   ปญฺญวนฺโต   ภพฺพา   นิยามํ  โอกฺกมิตุํ
กุสเลสุ  ธมฺเมสุ  สมฺมตฺตํ  อิเม  เต  สตฺตา  ภพฺพาติ  ยา  ตตฺถ ปญฺญา
ปชานนา   ฯเปฯ   อโมโห   ธมฺมวิจโย   สมฺมาทิฏฺฐิ   อิทํ  ตถาคตสฺส
ปรสตฺตานํ ปรปุคฺคลานํ อินฺทฺริยปโรปริยตฺตํ ยถาภูตํ ญาณํ ฯ
     [๘๔๕]   ตตฺถ   กตมํ   ตถาคตสฺส   ฌานวิโมกฺขสมาธิสมาปตฺตีนํ
สงฺกิเลสํ   โวทานํ  วุฏฺฐานํ  ยถาภูตํ  ญาณํ  ฯ  ฌายีติ  จตฺตาโร  ฌายี
อตฺเถกจฺโจ   ฌายี   สมฺปตฺตึเยว  สมานํ  วิปตฺตีติ  ปจฺเจติ  อตฺเถกจฺโจ
ฌายี     วิปตฺตึเยว     สมานํ    สมฺปตฺตีติ    ปจฺเจติ    อตฺเถกจฺโจ
ฌายี   สมฺปตฺตึเยว   สมานํ   สมฺปตฺตีติ   ปจฺเจติ   อตฺเถกจฺโจ   ฌายี
วิปตฺตึเยว สมานํ วิปตฺตีติ ปจฺเจติ อิเม จตฺตาโร ฌายี ฯ
     {๘๔๕.๑}   อปเรปิ จตฺตาโร ฌายี อตฺเถกจฺโจ ฌายี ทนฺธํ สมาปชฺชติ
ขิปฺปํ   วุฏฺฐาติ   อตฺเถกจฺโจ   ฌายี   ขิปฺปํ  สมาปชฺชติ  ทนฺธํ  วุฏฺฐาติ
อตฺเถกจฺโจ   ฌายี   ทนฺธํ   สมาปชฺชติ   ทนฺธํ   วุฏฺฐาติ   อตฺเถกจฺโจ
ฌายี ขิปฺปํ สมาปชฺชติ ขิปฺปํ วุฏฺฐาติ อิเม จตฺตาโร ฌายี ฯ
     {๘๔๕.๒}   อปเรปิ  จตฺตาโร  ฌายี  อตฺเถกจฺโจ  ฌายี  สมาธิสฺมึ
สมาธิกุสโล   โหติ   น   สมาธิสฺมึ   สมาปตฺติกุสโล  อตฺเถกจฺโจ  ฌายี
สมาธิสฺมึ   สมาปตฺติกุสโล  โหติ  น  สมาธิสฺมึ  สมาธิกุสโล  อตฺเถกจฺโจ
ฌายี   สมาธิสฺมึ   สมาธิกุสโล   จ  โหติ  สมาธิสฺมึ  สมาปตฺติกุสโล  จ
อตฺเถกจฺโจ   ฌายี   เนว   สมาธิสฺมึ  สมาธิกุสโล  โหติ  น  สมาธิสฺมึ
สมาปตฺติกุสโล   อิเม   จตฺตาโร   ฌายี  ฯ  ฌานนฺติ  จตฺตาริ  ฌานานิ
ปฐมํ ฌานํ ทุติยํ ฌานํ ตติยํ ฌานํ จตุตฺถํ ฌานํ ฯ
     {๘๔๕.๓}   วิโมกฺโขติ  อฏฺฐ  วิโมกฺขา รูปี รูปานิ ปสฺสติ อยํ ปฐโม
วิโมกฺโข  อชฺฌตฺตํ  อรูปสญฺญี  พหิทฺธา  รูปานิ  ปสฺสติ อยํ ทุติโย วิโมกฺโข
สุภนฺเตฺวว   อธิมุตฺโต  โหติ  อยํ  ตติโย  วิโมกฺโข  สพฺพโส  รูปสญฺญานํ
สมติกฺกมา    ปฏิฆสญฺญานํ    อตฺถงฺคมา    นานตฺตสญฺญานํ   อมนสิการา
อนนฺโต    อากาโสติ    อากาสานญฺจายตนํ   อุปสมฺปชฺช   วิหรติ   อยํ
จตุตฺโถ   วิโมกฺโข   สพฺพโส   อากาสานญฺจายตนํ   สมติกฺกมฺม   อนนฺตํ
วิญฺญาณนฺติ    วิญฺญาณญฺจายตนํ    อุปสมฺปชฺช    วิหรติ    อยํ   ปญฺจโม
วิโมกฺโข    สพฺพโส    วิญฺญาณญฺจายตนํ    สมติกฺกมฺม    นตฺถิ   กิญฺจีติ
อากิญฺจญฺญายตนํ   อุปสมฺปชฺช   วิหรติ   อยํ   ฉฏฺโฐ  วิโมกฺโข  สพฺพโส
อากิญฺจญฺญายตนํ     สมติกฺกมฺม     เนวสญฺญานาสญฺญายตนํ    อุปสมฺปชฺช
วิหรติ    อยํ    สตฺตโม   วิโมกฺโข   สพฺพโส   เนวสญฺญานาสญฺญายตนํ
สมติกฺกมฺม    สญฺญาเวทยิตนิโรธํ    อุปสมฺปชฺช   วิหรติ   อยํ   อฏฺฐโม
วิโมกฺโข ฯ
     {๘๔๕.๔}   สมาธีติ   ตโย   สมาธี   สวิตกฺกสวิจาโร   สมาธิ
อวิตกฺกวิจารมตฺโต สมาธิ อวิตกฺกอวิจาโร สมาธิ ฯ
     {๘๔๕.๕}   สมาปตฺตีติ      นว     อนุปุพฺพวิหารสมาปตฺติโย
ปฐมชฺฌานสมาปตฺติ        ทุติยชฺฌานสมาปตฺติ        ตติยชฺฌานสมาปตฺติ
จตุตฺถชฺฌานสมาปตฺติ อากาสานญฺจายตนสมาปตฺติ
วิญฺญาณญฺจายตนสมาปตฺติ อากิญฺจญฺญายตนสมาปตฺติ
เนวสญฺญานาสญฺญายตนสมาปตฺติ สญฺญาเวทยิตนิโรธสมาปตฺติ ฯ
     {๘๔๕.๖}   สงฺกิเลสนฺติ   หานภาคิโย   ธมฺโม   ฯ   โวทานนฺติ
วิเสสภาคิโย  ธมฺโม  ฯ  วุฏฺฐานนฺติ  โวทานมฺปิ  วุฏฺฐานํ  ตมฺหา  ตมฺหา
สมาธิมฺหา    วุฏฺฐานมฺปิ   วุฏฺฐานนฺติ   ยา   ตตฺถ   ปญฺญา   ปชานนา
ฯเปฯ   อโมโห   ธมฺมวิจโย  สมฺมาทิฏฺฐิ  อิทํ  ตถาคตสฺส  ฌานวิโมกฺข-
สมาธิสมาปตฺตีนํ สงฺกิเลสํ โวทานํ วุฏฺฐานํ ยถาภูตํ ญาณํ ฯ
     [๘๔๖]   ตตฺถ   กตมํ   ตถาคตสฺส   ปุพฺเพนิวาสานุสฺสตึ  ยถาภูตํ
ญาณํ   ฯ   อิธ  ตถาคโต  อเนกวิหิตํ  ปุพฺเพนิวาสํ  อนุสฺสรติ  เสยฺยถีทํ
เอกมฺปิ   ชาตึ   เทฺวปิ   ชาติโย  ติสฺโสปิ  ชาติโย  จตสฺโสปิ  ชาติโย
ปญฺจปิ    ชาติโย   ทสปิ   ชาติโย   วีสํปิ   ชาติโย   ตึสํปิ   ชาติโย
จตฺตาลีสํปิ    ชาติโย    ปญฺญาสํปิ    ชาติโย   ชาติสตํปิ   ชาติสหสฺสํปิ
ชาติสตสหสฺสํปิ     อเนเกปิ    สํวฏฺฏกปฺเป    อเนเกปิ    วิวฏฺฏกปฺเป
อเนเกปิ    สํวฏฺฏวิวฏฺฏกปฺเป    อมุตฺราสึ    เอวํนาโม    เอวํโคตฺโต
เอวํวณฺโณ     เอวมาหาโร    เอวํสุขทุกฺขปฏิสํเวที    เอวมายุปริยนฺโต
โส   ตโต   จุโต  อมุตฺร  อุทปาทึ  ตตฺราปาสึ  เอวํนาโม  เอวํโคตฺโต
เอวํวณฺโณ     เอวมาหาโร    เอวํสุขทุกฺขปฏิสํเวที    เอวมายุปริยนฺโต
โส   ตโต   จุโต   อิธุปปนฺโนติ   อิติ   สาการํ  สอุทฺเทสํ  อเนกวิหิตํ
ปุพฺเพนิวาสํ  อนุสฺสรติ  ฯ  ยา  ตตฺถ  ปญฺญา  ปชานนา  ฯเปฯ  อโมโห
ธมฺมวิจโย    สมฺมาทิฏฺฐิ    ฯ    อิทํ   ตถาคตสฺส   ปุพฺเพนิวาสานุสฺสตึ
ยถาภูตํ ญาณํ ฯ
     [๘๔๗]   ตตฺถ  กตมํ  ตถาคตสฺส  สตฺตานํ  จุตูปปาตํ  ญาณํ  ฯ อิธ
ตถาคโต  ทิพฺเพน  จกฺขุนา  วิสุทฺเธน  อติกฺกนฺตมานุสเกน  สตฺเต  ปสฺสติ
จวมาเน   อุปปชฺชมาเน   หีเน   ปณีเต   สุวณฺเณ   ทุพฺพณฺเณ   สุคเต
ทุคฺคเต   ยถากมฺมุปเค   สตฺเต   ปชานาติ  อิเม  วต  โภนฺโต  สตฺตา
กายทุจฺจริเตน   สมนฺนาคตา   วจีทุจฺจริเตน  สมนฺนาคตา  มโนทุจฺจริเตน
สมนฺนาคตา   อริยานํ  อุปวาทกา  มิจฺฉาทิฏฺฐิกา  มิจฺฉาทิฏฺฐิกมฺมสมาทานา
เต    กายสฺส    เภทา    ปรมฺมรณา    อปายํ    ทุคฺคตึ    วินิปาตํ
นิรยํ   อุปปนฺนา   อิเม   วา   ปน   โภนฺโต   สตฺตา   กายสุจริเตน
สมนฺนาคตา    วจีสุจริเตน    สมนฺนาคตา   มโนสุจริเตน   สมนฺนาคตา
อริยานํ    อนุปวาทกา    สมฺมาทิฏฺฐิกา   สมฺมาทิฏฺฐิกมฺมสมาทานา   เต
กายสฺส   เภทา   ปรมฺมรณา   สุคตึ   สคฺคํ   โลกํ   อุปปนฺนาติ   อิติ
ทิพฺเพน  จกฺขุนา  วิสุทฺเธน  อติกฺกนฺตมานุสเกน  สตฺเต  ปสฺสติ  จวมาเน
อุปปชฺชมาเน    หีเน   ปณีเต   สุวณฺเณ   ทุพฺพณฺเณ   สุคเต   ทุคฺคเต
ยถากมฺมุปเค   สตฺเต   ปชานาติ   ฯ   ยา   ตตฺถ   ปญฺญา  ปชานนา
ฯเปฯ   อโมโห   ธมฺมวิจโย   สมฺมาทิฏฺฐิ   อิทํ   ตถาคตสฺส   สตฺตานํ
จุตูปปาตํ ยถาภูตํ ญาณํ ฯ
     [๘๔๘]   ตตฺถ  กตมํ  ตถาคตสฺส  อาสวานํ  ขยํ  ยถาภูตํ  ญาณํ ฯ
อิธ   ตถาคโต   อาสวานํ   ขยา   อนาสวํ   เจโตวิมุตฺตึ  ปญฺญาวิมุตฺตึ
ทิฏฺเฐว   ธมฺเม   สยํ  อภิญฺญา  สจฺฉิกตฺวา  อุปสมฺปชฺช  วิหรติ  ฯ  ยา
ตตฺถ    ปญฺญา   ปชานนา   ฯเปฯ   อโมโห   ธมฺมวิจโย   สมฺมาทิฏฺฐิ
อิทํ ตถาคตสฺส อาสวานํ ขยํ ยถาภูตํ ญาณนฺติ ฯ
                               ญาณวิภงฺโค สมตฺโต ฯ
                                     ----------


             เนื้อความพระไตรปิฎกฉบับภาษาบาลี อักษรไทย เล่มที่ ๓๕ หน้าที่ ๔๕๒-๔๖๗. https://84000.org/tipitaka/read/pali_read.php?B=35&A=9137&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=35&A=9137&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=35&item=835&items=14              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=35&siri=64              ศึกษาอรรถกถานี้ได้ที่ :- https://84000.org/tipitaka/attha/attha.php?b=35&i=835              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=54&A=10653              The Pali Atthakatha in Roman :- https://84000.org/tipitaka/atthapali/read_rm.php?B=54&A=10653              สารบัญพระไตรปิฎกเล่มที่ ๓๕ https://84000.org/tipitaka/read/?index_35 https://84000.org/tipitaka/english/?index_35

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]