บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

ทสมํ สสปณฺฑิตจริยํ [๑๐] |๑๐.๑๒๖| ปุนาปรํ ยทา โหมิ สสโก ปวนจาริโก ^๑- ติณปณฺณสากผลภกฺโข ปรเหฐนวิวชฺชิโต ฯ |๑๐.๑๒๗| มกฺกโฏ จ สิงฺคาโล จ สุตฺตโปโต ^๒- จหํ ตทา วสาม เอกสมคฺคา ^๓- สายํ ปาโต จ ทิสฺสเร ^๔- ฯ |๑๐.๑๒๘| อหนฺเต อนุสาสามิ กิริเย กลฺยาณปาปเก ปาปานิ ปริวชฺเชถ กลฺยาเณ อภินิวิสฺสถ ฯ |๑๐.๑๒๙| อุโปสถมฺหิ ทิวเส จนฺทํ ทิสฺวาน ปูริตํ เอเตสํ ตตฺถ อาจิกฺขึ ^๕- ทิวโส อชฺชุโปสโถ ฯ |๑๐.๑๓๐| ทานานิ ปฏิยาเทถ ทกฺขิเณยฺยสฺส ทาตเว ทตฺวา ทานํ ทกฺขิเณยฺเย ^๖- อุปวสฺสถุโปสถํ ฯ @เชิงอรรถ: ^๑ ม. ปวนจารโก ฯ ^๒ ม. อุทฺทโปโต ฯ ^๓ ม. ยุ. เอกสมนฺตา ฯ ^๔ ยุ. @ปทิสฺสเร ฯ ^๕ ยุ. อาจิกฺขิ ฯ ^๖ ยุ. ทกฺขิเณยฺยํ ฯ

--------------------------------------------------------------------------------------------- หน้าที่ ๕๖๖.

|๑๐.๑๓๑| เต เม สาธูติ วตฺวาน ยถาสตฺติ ยถาพลํ ทานานิ ปฏิยาเทตฺวา ทกฺขิเณยฺยํ คเวสิสุํ ฯ |๑๐.๑๓๒| อหํ นิปชฺช ^๑- จินฺเตสึ ทานํ ทกฺขิณนุจฺฉวํ ยทิหํ ลเภ ทกฺขิเณยฺยํ กึ เม ทานํ ภวิสฺสติ ฯ |๑๐.๑๓๓| น เม อตฺถิ ติลมุคฺคา น มาสา ตณฺฑุลา ฆตํ อหํ ติเณน ยาเปมิ น สกฺกา ติณทาตเว ฯ |๑๐.๑๓๔| ยทิ โกจิ เอติ ทกฺขิเณยฺโย ภิกฺขาย มม สนฺติเก ทชฺชาหํ สกมตฺตานํ น โส ตุจฺโฉ คมิสฺสติ ฯ |๑๐.๑๓๕| มม สงฺกปฺปมญฺญาย สกฺโก พฺราหฺมณวณฺณินา อาสยํ เม อุปคจฺฉิ ทานํ วีมํสนาย เม ฯ |๑๐.๑๓๖| ตมหํ ทิสฺวาน สนฺตุฏฺโฐ อิทํ วจนมพฺรวึ สาธุ โขสิ อนุปฺปตฺโต ฆาสเหตุ มมนฺติเก ฯ |๑๐.๑๓๗| อทินฺนปุพฺพํ ทานวรํ อชฺช ทสฺสามิ เต อหํ ตุวํ สีลคุณูเปโต อยุตฺตนฺเต ปรเหธนํ ฯ |๑๐.๑๓๘| เอหิ อคฺคึ ปทีเปหิ นานากฏฺเฐ สมานย อหํ ปจิสฺสมตฺตานํ ปกฺกํ ตฺวํ ภกฺขยิสฺสสิ ฯ |๑๐.๑๓๙| สาธูติ โส หฏฺฐมโน นานากฏฺเฐ สมานยิ มหนฺตํ อกาสิ จิตฺตกํ กตฺวานงฺคารคพฺภกํ ฯ |๑๐.๑๔๐| อคฺคึ ตตฺถ ปทีเปสิ ^๒- ยถา โส ขิปฺปํ มหาภเว โผเฏตฺวา รชคเต คตฺเต เอกมนฺตํ อุปาวิสึ ^๓- ฯ @เชิงอรรถ: ^๑ ม. ยุ. นิสชฺช ฯ ^๒ ยุ. ปทีเปติ ฯ ^๓ ยุ. อุปาวิสิ ฯ

--------------------------------------------------------------------------------------------- หน้าที่ ๕๖๗.

|๑๐.๑๔๑| ยทา มหากฏฺฐปุญฺโช อาทิตฺโต ธมธมายติ ^๑- ตทุปฺปติตฺวา ปปติ ^๒- มชฺเฌ ชาลสิขนฺตเร ฯ |๑๐.๑๔๒| ยถา สีโตทกํ นาม ปวิฏฺฐํ ยสฺส กสฺสจิ สเมติ ทรถปริฬาหํ อสฺสาทํ เทติ ปีติ จ ฯ |๑๐.๑๔๓| ตเถว ชลิตํ อคฺคึ ปวิฏฺฐสฺส มมํ ตทา สพฺพํ สเมติ ทรถํ ยถา สีโตทกํ วิย ฯ |๑๐.๑๔๔| ฉวิ จมฺมญฺจ มํสญฺจ นฺหารุ อฏฺฐิ หทยพนฺธนํ เกวลํ สกลํ กายํ พฺราหฺมณสฺส อทาสหนฺติ ฯ สสปณฺฑิตจริยํ ทสมํ ฯ ตสฺสุทฺทานํ อกิตฺติ พฺราหฺมโณ สงฺโข กุรุราชา ธนญฺชโย มหาสุทสฺสโน ราชา มหาโควินฺทพฺราหฺมโณ ฯ เนมิ ^๓- จนฺทกุมาโร จ สิวิ เวสฺสนฺตโร สโส อหเมว ตทา อาสึ โย เต ทานวเร อทา ฯ เอเต ทานปริกฺขารา เอเต ทานสฺส ปารมี ชีวิตํ ยาจเก ทตฺวา อิมํ ^๔- ปารมิ ปูรยึ ฯ ภิกฺขาย อุปคตํ ทิสฺวา สกตฺตานํ ปรจฺจชึ ทาเนน เม สโม นตฺถิ เอสา เม ทานปารมีติ ฯ ทานปารมิตา นิฏฺฐิตา ฯ @เชิงอรรถ: ^๑ ยุ. ธูมมายติ ฯ ^๒ ม. ปปตึ ฯ ^๓ ม. ยุ. นิมิ ฯ ^๔ ยุ. อิทํ ฯ

เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๕๖๕-๕๖๗. http://84000.org/tipitaka/pitaka_item/pali_item_s.php?book=33&item=218&items=1&pagebreak=1 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=33&item=218&items=1&pagebreak=1&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=33&item=218&items=1&pagebreak=1 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=33&item=218&items=1&pagebreak=1 ศึกษาอรรถกถานี้ได้ที่ :- http://84000.org/tipitaka/attha/attha.php?b=33&i=218 The Pali Atthakatha in Thai :- http://84000.org/tipitaka/atthapali/read_th.php?B=52&A=2704 The Pali Atthakatha in Roman :- http://84000.org/tipitaka/atthapali/read_rm.php?B=52&A=2704 สารบัญพระไตรปิฎกเล่มที่ ๓๓ http://84000.org/tipitaka/read/?index_33