ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบไทย
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ
                                          วีสติโม สิขิพุทฺธวํโส
     [๒๑]   |๒๑.๑| วิปสฺสิสฺส อปเรน              สมฺพุทฺโธ ทิปทุตฺตโม
                   สิขิวฺหโย ๑- นาม ชิโน            อสโม อปฺปฏิปุคฺคโล ฯ
       |๒๑.๒| มารเสนํ ปมทฺทิตฺวา               ปตฺโต สมฺโพธิมุตฺตมํ
                   ธมฺมจกฺกํ ปวตฺเตสิ                 อนุกมฺปาย ปาณินํ ฯ
       |๒๑.๓| ธมฺมจกฺกํ ปวตฺเตนฺเต              สิขิมฺหิ ชินปุงฺคเว
                   โกฏิสตสหสฺสานํ                    ปฐมาภิสมโย อหุ ฯ
       |๒๑.๔| อปรํปิ ธมฺมํ เทเสนฺเต              คณเสฏฺเฐ นรุตฺตเม
                   นวุติโกฏิสหสฺสานํ                 ทุติยาภิสมโย อหุ ฯ
       |๒๑.๕| ยมกปาฏิหาริยํ ๒-                 ทสฺสยนฺเต สเทวเก
                   อสีติโกฏิสหสฺสานํ                 ตติยาภิสมโย อหุ ฯ
       |๒๑.๖| สนฺนิปาตา ตโย อาสุํ              สิขิสฺสาปิ มเหสิโน
                   ขีณาสวานํ วิมลานํ                สนฺตจิตฺตาน ตาทินํ ฯ
       |๒๑.๗| ภิกฺขุสตสหสฺสานํ                   ปฐโม อาสิ สมาคโม
                   อสีติภิกฺขุสหสฺสานํ                ทุติโย อาสิ สมาคโม ฯ
       |๒๑.๘| สตฺตติภิกฺขุสหสฺสานํ              ตติโย อาสิ สมาคโม
                   อนุปลิตฺโต ปทุมํว                 โตยมฺหิ สมฺปวฑฺฒิตํ ฯ
       |๒๑.๙| อหนฺเตน สมเยน                   อรินฺทโม นาม ขตฺติโย
                   สมฺพุทฺธปฺปมุขํ สงฺฆํ              อนฺนปาเนน ตปฺปยึ ฯ
@เชิงอรรถ:  ยุ. สิขิสฺวหโย ฯ ม. สิขิวฺหโย อาสิ ชิโน ฯ  ม. ยมกปาฏิหาริยญฺจ ฯ ยุ. ยมกํ
@ปาฏิหาริยญฺจ ฯ
       |๒๑.๑๐| พหุทุสฺสวรํ ทตฺวา                ทุสฺสโกฏึ อนปฺปกํ
                     อลงฺกตํ หตฺถิยานํ               สมฺพุทฺธสฺส อทาสหํ ฯ
       |๒๑.๑๑| หตฺถิยานํ นิมฺมินิตฺวา          กปฺปิยํ อุปนามยึ
                     ปูรยึ มานสํ มยฺหํ                นิจฺจํ ทฬฺหมุปฏฺฐิตํ ฯ
       |๒๑.๑๒| โสปิ มํ พุทฺโธ พฺยากาสิ        สิขี โลกคฺคนายโก
                     เอกตฺตึเส อิโต กปฺเป           อยํ พุทฺโธ ภวิสฺสติ ฯ
       |๒๑.๑๓| อหุ กปิลวฺหยา รมฺมา ๑-      นิกฺขมิตฺวา ตถาคโต
                     ปธานํ ปทหิตฺวาน               กตฺวา ทุกฺกรการิกํ ฯ
       |๒๑.๑๔| อชปาลรุกฺขมูลสฺมึ               นิสีทิตฺวา ตถาคโต
                     ตตฺถ ปายาสํ ปคฺคยฺห          เนรญฺชรมุเปหิติ ฯ
       |๒๑.๑๕| เนรญฺชราย ตีรมฺหิ               ปายาสํ อทิ โส ชิโน
                     ปฏิยตฺตวรมคฺเคน               โพธิมูลมฺหิ เอหิติ ฯ
       |๒๑.๑๖| ตโต ปทกฺขิณํ กตฺวา            โพธิมณฺฑํ อนุตฺตรํ
                     อสฺสตฺถรุกฺขมูลมฺหิ              พุชฺฌิสฺสติ มหายโส ฯ
       |๒๑.๑๗| อิมสฺส ชนิกา มาตา             มายา นาม ภวิสฺสติ
                     ปิตา สุทฺโธทโน นาม           อยํ เหสฺสติ โคตโม  ฯ
       |๒๑.๑๘| อนาสวา วีตราคา                สนฺตจิตฺตา สมาหิตา
                     โกลิโต อุปติสฺโส จ              อคฺคา เหสฺสนฺติ สาวกา
                     อานนฺโท นามุปฏฺฐาโก       อุปฏฺฐิสฺสติมํ ชินํ ฯ
@เชิงอรรถ:  ยุ. อหุ กปิลวฺหเย รมฺเม ฯ อิโต ปรํ อีทิสเมว ฯ
       |๒๑.๑๙| เขมา อุปฺปลวณฺณา จ          อคฺคา เหสฺสนฺติ สาวิกา
                     อนาสวา วีตราคา               สนฺตจิตฺตา สมาหิตา ฯ
       |๒๑.๒๐| โพธิ ตสฺส ภควโต                อสฺสตฺโถติ ปวุจฺจติ
                     จิตฺโต จ หตฺถาฬวโก           อคฺคา เหสฺสนฺตุปฏฺฐกา ฯ
       |๒๑.๒๑| นนฺทมาตา จ อุตฺตรา          อคฺคา เหสฺสนฺตุปฏฺฐิกา
                     อายุ วสฺสสตํ ตสฺส               โคตมสฺส ยสสฺสิโน ฯ
       |๒๑.๒๒| อิทํ สุตฺวาน วจนํ                 อสมสฺส มเหสิโน
                     อาโมทิตา นรมรู                 พุทฺธวีชงฺกุโร อยํ ฯ
       |๒๑.๒๓| อุกฺกุฏฺฐิสทฺทา วตฺตนฺติ        อปฺโผเฏนฺติ หสนฺติ จ
                     กตญฺชลี นมสฺสนฺติ             ทสสหสฺสี สเทวกา ฯ
       |๒๑.๒๔| ยทิมสฺส โลกนาถสฺส           วิรชฺฌิสฺสาม สาสนํ
                     อนาคตมฺหิ อทฺธาเน            เหสฺสาม สมฺมุขา อิมํ ฯ
       |๒๑.๒๕| ยถา มนุสฺสา นทึ ตรนฺตา     ปฏิติตฺถํ วิรชฺฌิย
                     เหฏฺฐาติตฺถํ คเหตฺวาน         อุตฺตรนฺติ มหานทึ ฯ
       |๒๑.๒๖| เอวเมว มยํ สพฺเพ               ยทิ มุญฺจามิมํ ชินํ
                     อนาคตมฺหิ อทฺธาเน            เหสฺสาม สมฺมุขา อิมํ ฯ
       |๒๑.๒๗| ตสฺสาปิ วจนํ สุตฺวา             ภิยฺโย จิตฺตํ ปสาทยึ
                     อุตฺตรึ วตฺตมธิฏฺฐาสึ            ทสปารมิปูริยา ฯ
       |๒๑.๒๘| นครํ อรุณวตี นาม              อรุโณ นาม ขตฺติโย
                     ปภาวตี นาม ชนิกา            สิขิสฺส จ มเหสิโน ฯ
       |๒๑.๒๙| สตฺตวสฺสสหสฺสานิ              อคารํ อชฺฌาวสิ โส
                     สุวฑฺฒโก คิริ นารีวาหโน ๑-  ตโย ปสาทมุตฺตมา ฯ
       |๒๑.๓๐| จตุวีสติสหสฺสานิ                 นาริโย สมลงฺกตา
                     สพฺพกามา นาม สา นารี     อตุโล นาม อตฺรโช ฯ
       |๒๑.๓๑| นิมิตฺเต จตุโร ทิสฺวา             หตฺถิยาเนน นิกฺขมิ
                     อฏฺฐมาสํ ปธานจารํ            อจริ ปุริสุตฺตโม ฯ
       |๒๑.๓๒| พฺรหฺมุนา ยาจิโต สนฺโต       สิขี โลกคฺคนายโก
                     วตฺตจกฺโก มหาวีโร              มิคทาเย นรุตฺตโม ฯ
       |๒๑.๓๓| อภิภู สมฺภโว นาม ๒-         อเหสุํ อคฺคสาวกา
                     เขมงฺกโร นามุปฏฺฐาโก        สิขิสฺส จ มเหสิโน ฯ
       |๒๑.๓๔| มขิลา ๓- จ ปทุมา จ           อเหสุํ อคฺคสาวิกา
                     โพธิ ตสฺส ภควโต                ปุณฺฑรีโกติ วุจฺจติ ฯ
       |๒๑.๓๕| สิริวฑฺโฒ จ นนฺโท ๔- จ       อเหสุํ อคฺคุปฏฺฐกา
                     จิตฺตา เจว สุจิตฺตา จ            อเหสุํ อคฺคุปฏฺฐิกา ฯ
       |๒๑.๓๖| อุจฺจตฺตเนน โส พุทฺโธ          สตฺตติหตฺถมุคฺคโต
                     กญฺจนคฺฆิกสงฺกาโส            ทฺวตฺตึสวรลกฺขโณ ฯ
       |๒๑.๓๗| ตสฺสาปิ พฺยามปฺปภา กายา  นิจฺฉรนฺติ ๕- นิรนฺตรํ
                     ทิโสทิสํ นิจฺฉรนฺติ                 ตีณิ โยชนานิ โส ปภา ฯ
       |๒๑.๓๘| สตฺตติวสฺสสหสฺสานิ             อายุ ตสฺส มเหสิโน
                     ตาวตา ติฏฺฐมาโน โส           ตาเรสิ ชนตํ พหุํ ฯ
@เชิงอรรถ:  ม. สุจนฺทโก คิริ วสโภ ฯ ยุ. สุจนฺโท คิริ วหโน ฯ  ม. เจว ฯ  ม.
@สขิลา ฯ ยุ. อขิลา เจว ฯ  ยุ. จนฺโท ฯ  ม. ยุ. ทิวารตฺตึ ฯ
       |๒๑.๓๙| ธมฺมเมฆํ วสฺสิตฺวาน ๑-      เตมยิตฺวา สเทวเก
                     เขมตํ ปาปยิตฺวาน              นิพฺพุโต โส สสาวโก ฯ
       |๒๑.๔๐| อนุพฺยญฺชนสมฺปนฺนํ           ทฺวตฺตึสวรลกฺขณํ
                     สพฺพํ สมนฺตรหิตํ                นนุ ริตฺตา สพฺพสงฺขาราติ ฯ
       |๒๑.๔๑| สิขี มุนิวโร พุทฺโธ               อสฺสารามมฺหิ ๒- นิพฺพุโต
                     ตตฺเถว ตสฺส ถูปวโร            ตีณิ โยชนมุคฺคโตติ ฯ
                                           สิขิพุทฺธวํโส วีสติโม ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๕๒๐-๕๒๔. http://84000.org/tipitaka/pitaka_item/pali_item_s.php?book=33&item=201&items=1              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=33&item=201&items=1&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=33&item=201&items=1              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=33&item=201&items=1              ศึกษาอรรถกถานี้ได้ที่ :- http://84000.org/tipitaka/attha/attha.php?b=33&i=201              The Pali Atthakatha in Thai :- http://84000.org/tipitaka/atthapali/read_th.php?B=51&A=7747              The Pali Atthakatha in Roman :- http://84000.org/tipitaka/atthapali/read_rm.php?B=51&A=7747              สารบัญพระไตรปิฎกเล่มที่ ๓๓ http://84000.org/tipitaka/read/?index_33

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบไทย

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :