ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒ ภาษาบาลี อักษรไทย พระวินัยปิฎกเล่มที่ ๒ วินย. มหาวิภงฺโค (๒)
                               ทุติยสิกฺขาปทํ
     [๑๐]   เตน  สมเยน  พุทฺโธ  ภควา  สาวตฺถิยํ  วิหรติ  เชตวเน
อนาถปิณฺฑิกสฺส   อาราเม   ฯ   เตน  โข  ปน  สมเยน  ภิกฺขู  ภิกฺขูนํ
หตฺเถ   จีวรํ   นิกฺขิปิตฺวา   สนฺตรุตฺตเรน   ชนปทจาริกํ   ปกฺกมนฺติ  ฯ
ตานิ   จีวรานิ   จิรํ   ๑-   นิกฺขิตฺตานิ   กณฺณกิตานิ  โหนฺติ  ฯ  ตานิ
จีวรานิ   ๒-  ภิกฺขู  โอตาเปนฺติ  ฯ  อทฺทสา  โข  อายสฺมา  อานนฺโท
เสนาสนจาริกํ   อาหิณฺฑนฺโต   เต   ภิกฺขู  ตานิ  จีวรานิ  โอตาเปนฺเต
ทิสฺวาน   เยน   เต   ภิกฺขู   เตนุปสงฺกมิ   อุปสงฺกมิตฺวา   เต  ภิกฺขู
เอตทโวจ   กสฺสิมานิ   อาวุโส   จีวรานิ  กณฺณกิตานีติ  ฯ  อถโข  เต
ภิกฺขู   อายสฺมโต   อานนฺทสฺส   เอตมตฺถํ   อาโรเจสุํ   ฯ   อายสฺมา
อานนฺโท   อุชฺฌายติ   ขียติ   วิปาเจติ   กถํ   หิ  นาม  ภิกฺขู  ภิกฺขูนํ
หตฺเถ  จีวรํ  นิกฺขิปิตฺวา  สนฺตรุตฺตเรน ชนปทจาริกํ ปกฺกมิสฺสนฺตีติ ฯ อถโข
อายสฺมา   อานนฺโท   [๓]-  ภควโต  เอตมตฺถํ  อาโรเจสิ  ฯ  อถโข
ภควา  เต  ภิกฺขู  ปฏิปุจฺฉิ  สจฺจํ  กิร  ภิกฺขเว  ภิกฺขู ภิกฺขูนํ หตฺเถ จีวรํ
นิกฺขิปิตฺวา    สนฺตรุตฺตเรน    ชนปทจาริกํ    ปกฺกมนฺตีติ    ฯ    สจฺจํ
ภควาติ  ฯ  วิครหิ  พุทฺโธ  ภควา  กถํ  หิ  นาม เต ภิกฺขเว โมฆปุริสา
ภิกฺขูนํ    หตฺเถ    จีวรํ    นิกฺขิปิตฺวา    สนฺตรุตฺตเรน    ชนปทจาริกํ
@เชิงอรรถ:  โป. จีวรวํเส ฯ   ม. ยุ. อยํ ปาโฐ นตฺถิ ฯ   ม. เต ภิกฺขู
@อเนกปริยาเยน วิครหิตฺวา ฯ เอวมีทิเสสุ ฐาเนสุ ฯ
ปกฺกมิสฺสนฺติ   เนตํ   ภิกฺขเว   อปฺปสนฺนานํ   วา   ปสาทาย  ปสนฺนานํ
วา   ภิยฺโยภาวาย   ฯเปฯ   เอวญฺจ   ปน   ภิกฺขเว   อิมํ  สิกฺขาปทํ
อุทฺทิเสยฺยาถ
     {๑๐.๑}   นิฏฺฐิตจีวรสฺมึ   ภิกฺขุนา  อุพฺภตสฺมึ  กฐิเน  เอกรตฺตมฺปิ
เจ ภิกฺขุ ติจีวเรน วิปฺปวเสยฺย นิสฺสคฺคิยํ ปาจิตฺติยนฺติ ฯ
     {๑๐.๒}   เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ
     [๑๑]   เตน  โข  ปน  สมเยน  อญฺญตโร  ภิกฺขุ โกสมฺพิยํ คิลาโน
โหติ   ฯ   ญาตกา   ตสฺส   ภิกฺขุโน  สนฺติเก  ทูตํ  ปาเหสุํ  อาคจฺฉตุ
ภทฺทนฺโต   มยํ   อุปฏฺฐหิสฺสามาติ  ฯ  ภิกฺขูปิ  เอวมาหํสุ  คจฺฉ  อาวุโส
ญาตกา   ตํ   อุปฏฺฐหิสฺสนฺตีติ   ฯ   โส   เอวมาห   ภควตา  อาวุโส
สิกฺขาปทํ     ปญฺญตฺตํ    น    ติจีวเรน    วิปฺปวสิตพฺพนฺติ    อหญฺจมฺหิ
คิลาโน   น   สกฺโกมิ   ติจีวรมาทาย   ปกฺกมิตุํ   นาหํ  คมิสฺสามีติ  ฯ
ภควโต เอตมตฺถํ อาโรเจสุํ ฯ
     {๑๑.๑}   อถโข  ภควา  เอตสฺมึ นิทาเน เอตสฺมึ ปกรเณ ธมฺมึ กถํ
กตฺวา  ภิกฺขู  อามนฺเตสิ  อนุชานามิ  ภิกฺขเว  คิลานสฺส ภิกฺขุโน ติจีวเรน
อวิปฺปวาสสมฺมตึ  ๑-  ทาตุํ  ฯ  เอวญฺจ  ปน  ภิกฺขเว  ทาตพฺพา ฯ เตน
คิลาเนน   ภิกฺขุนา   สงฺฆํ   อุปสงฺกมิตฺวา  เอกํสํ  อุตฺตราสงฺคํ  กริตฺวา
วุฑฺฒานํ  ภิกฺขูนํ  ปาเท  วนฺทิตฺวา  อุกฺกุฏิกํ  นิสีทิตฺวา  อญฺชลึ ปคฺคเหตฺวา
เอวมสฺส  วจนีโย  อหํ  ภนฺเต  คิลาโน  น สกฺโกมิ ติจีวรมาทาย ปกฺกมิตุํ
โสหํ   ภนฺเต   สงฺฆํ  ติจีวเรน  อวิปฺปวาสสมฺมตึ  ยาจามีติ  ฯ  ทุติยมฺปิ
ยาจิตพฺพา   ตติยมฺปิ   ยาจิตพฺพา   ฯ   พฺยตเตน   ภิกฺขุนา   ปฏิพเลน
@เชิงอรรถ:  ม. ยุ. สมฺมุตึ ฯ เอวมุปริปิ ฯ
สงฺโฆ ญาเปตพฺโพ
     {๑๑.๒}   สุณาตุ  เม  ภนฺเต  สงฺโฆ อยํ อิตฺถนฺนาโม ภิกฺขุ คิลาโน
น  สกฺโกติ  ติจีวรมาทาย  ปกฺกมิตุํ  ฯ  โส  สงฺฆํ  ติจีวเรน อวิปฺปวาส-
สมฺมตึ   ยาจติ   ฯ   ยทิ   สงฺฆสฺส   ปตฺตกลฺลํ  สงฺโฆ  อิตฺถนฺนามสฺส
ภิกฺขุโน ติจีวเรน อวิปฺปวาสสมฺมตึ ทเทยฺย ฯ เอสา ญตฺติ ฯ
     {๑๑.๓}   สุณาตุ  เม  ภนฺเต  สงฺโฆ อยํ อิตฺถนฺนาโม ภิกฺขุ คิลาโน
น  สกฺโกติ  ติจีวรมาทาย  ปกฺกมิตุํ  ฯ  โส  สงฺฆํ  ติจีวเรน อวิปฺปวาส-
สมฺมตึ  ยาจติ  ฯ  สงฺโฆ  อิตฺถนฺนามสฺส  ภิกฺขุโน  ติจีวเรน อวิปฺปวาส-
สมฺมตึ  เทติ  ฯ  ยสฺสายสฺมโต  ขมติ  อิตฺถนฺนามสฺส  ภิกฺขุโน  ติจีวเรน
อวิปฺปวาสสมฺมติยา ทานํ โส ตุณฺหสฺส ยสฺส นกฺขมติ โส ภาเสยฺย ฯ
     {๑๑.๔}   ทินฺนา สงฺเฆน อิตฺถนฺนามสฺส ภิกฺขุโน ติจีวเรน อวิปฺปวาส-
สมฺมติ ฯ ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
     {๑๑.๕}   เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๑๑.๖}   นิฏฺฐิตจีวรสฺมึ   ภิกฺขุนา  อุพฺภตสฺมึ  กฐิเน  เอกรตฺตมฺปิ
เจ   ภิกฺขุ   ติจีวเรน   วิปฺปวเสยฺย   อญฺญตฺร  ภิกฺขุสมฺมติยา  นิสฺสคฺคิยํ
ปาจิตฺติยนฺติ ฯ
     [๑๒]   นิฏฺฐิตจีวรสฺมินฺติ  ภิกฺขุโน  [๑]-  จีวรํ  กตํ วา โหติ นฏฺฐํ
วา   วินฏฺฐํ   วา  ทฑฺฒํ  วา  จีวราสา  วา  อุปจฺฉินฺนา  ฯ  อุพฺภตสฺมึ
กฐิเนติ     อฏฺฐนฺนํ     มาติกานํ    อญฺญตราย    มาติกาย    อุพฺภตํ
โหติ   สงฺเฆน  วา  อนฺตรา  อุพฺภตํ  โหติ  ฯ  เอกรตฺตมฺปิ  เจ  ภิกฺขุ
ติจีวเรน    วิปฺปวเสยฺยาติ    สงฺฆาฏิยา    วา   อุตฺตราสงฺเคน   วา
@เชิงอรรถ:  โป. ภิกฺขุนา ฯ
อนฺตรวาสเกน  วา  เอกรตฺตมฺปิ  ๑-  เจ  วิปฺปวุตฺถํ โหติ ๑- ฯ อญฺญตฺร
ภิกฺขุสมฺมติยาติ    ฐเปตฺวา   ภิกฺขุสมฺมตึ   ฯ   นิสฺสคฺคิยํ   โหตีติ   สห
อรุณุคฺคมเนน   ๒-   นิสฺสคฺคิยํ  โหติ  นิสฺสชฺชิตพฺพํ  สงฺฆสฺส  วา  คณสฺส
วา  ปุคฺคลสฺส  วา  ฯ  เอวญฺจ  ปน ภิกฺขเว นิสฺสชฺชิตพฺพํ ฯ เตน ภิกฺขุนา
สงฺฆํ  อุปสงฺกมิตฺวา  ฯเปฯ  เอวมสฺส  วจนีโย  อิทํ  เม ภนฺเต จีวรํ ๓-
รตฺติวิปฺปวุตฺถํ   ๔-   อญฺญตฺร   ภิกฺขุสมฺมติยา  นิสฺสคฺคิยํ  อิมาหํ  สงฺฆสฺส
นิสฺสชฺชามีติ   ฯเปฯ   ทเทยฺยาติ  ฯเปฯ  ทเทยฺยุนฺติ  ฯเปฯ  อายสฺมโต
ทมฺมีติ ฯ
     [๑๓]   คาโม   เอกูปจาโร   นานูปจาโร   นิเวสนํ  เอกูปจารํ
นานูปจารํ   อุทฺโทสิโต   เอกูปจาโร   นานูปจาโร  อฏฺโฏ  เอกูปจาโร
นานูปจาโร   มาโล   เอกูปจาโร   นานูปจาโร  ปาสาโท  เอกูปจาโร
นานูปจาโร    หมฺมิยํ    เอกูปจารํ   นานูปจารํ   นาวา   เอกูปจารา
นานูปจารา    สตฺโถ   เอกูปจาโร   นานูปจาโร   เขตฺตํ   เอกูปจารํ
นานูปจารํ   ธญฺญกรณํ   เอกูปจารํ   นานูปจารํ   อาราโม  เอกูปจาโร
นานูปจาโร   วิหาโร   เอกูปจาโร   นานูปจาโร   รุกฺขมูลํ  เอกูปจารํ
นานูปจารํ อชฺโฌกาโส เอกูปจาโร นานูปจาโร ฯ
     [๑๔]   คาโม  เอกูปจาโร  นาม เอกกุลสฺส คาโม โหติ ปริกฺขิตฺโต
@เชิงอรรถ: ๑-๑ ม. ยุ. อิเม ปาฐา นตฺถิ ฯ   ม. ยุ. อรุณุคฺคมนา ฯ   ยุ. รา. ติจีวรํ ฯ
@ สี. ยุ รตฺตึ วิปฺปวุตฺถํ ฯ รา. เอกรตฺตํ วิปฺปวุตฺถํ ฯ
จ  อนฺโตคาเม  จีวรํ  นิกฺขิปิตฺวา  อนฺโตคาเม  วตฺถพฺพํ  ฯ  อปริกฺขิตฺโต
โหติ  ยสฺมึ  ฆเร  จีวรํ  นิกฺขิตฺตํ  โหติ  ตสฺมึ  ฆเร  วตฺถพฺพํ หตฺถปาสา
วา  น  วิชหิตพฺพํ  ฯ  นานูปจาโร  นาม  ๑-  นานากุลสฺส  คาโม โหติ
ปริกฺขิตฺโต   จ  ยสฺมึ  ฆเร  จีวรํ  นิกฺขิตฺตํ  โหติ  ตสฺมึ  ฆเร  วตฺถพฺพํ
สภาเย  วา  ทฺวารมูเล  วา  หตฺถปาสา  วา  น  วิชหิตพฺพํ  ฯ  สภายํ
คจฺฉนฺเตน   หตฺถปาเส   จีวรํ   นิกฺขิปิตฺวา   สภาเย   [๒]-  วตฺถพฺพํ
ทฺวารมูเล  วา  หตฺถปาสา  วา  น  วิชหิตพฺพํ ฯ สภาเย จีวรํ นิกฺขิปิตฺวา
สภาเย  [๒]-  วตฺถพฺพํ  ทฺวารมูเล  วา  หตฺถปาสา  วา น วิชหิตพฺพํ ฯ
อปริกฺขิตฺโต  โหติ  ยสฺมึ  ฆเร  จีวรํ  นิกฺขิตฺตํ  โหติ  ตสฺมึ ฆเร วตฺถพฺพํ
หตฺถปาสา วา น วิชหิตพฺพํ ฯ
     [๑๕]    เอกกุลสฺส   นิเวสนํ   โหติ   ปริกฺขิตฺตญฺจ   นานาคพฺภา
นานาโอวรกา    อนฺโตนิเวสเน    จีวรํ    นิกฺขิปิตฺวา   อนฺโตนิเวสเน
วตฺถพฺพํ   ฯ   อปริกฺขิตฺตํ   โหติ   ยสฺมึ   คพฺเภ  จีวรํ  นิกฺขิตฺตํ  โหติ
ตสฺมึ   คพฺเภ   วตฺถพฺพํ  หตฺถปาสา  วา  น  วิชหิตพฺพํ  ฯ  นานากุลสฺส
นิเวสนํ    โหติ    ปริกฺขิตฺตญฺจ    นานาคพฺภา   นานาโอวรกา   ยสฺมึ
คพฺเภ   จีวรํ   นิกฺขิตฺตํ   โหติ  ตสฺมึ  คพฺเภ  วตฺถพฺพํ  ทฺวารมูเล  วา
หตฺถปาสา   วา   น   วิชหิตพฺพํ   ฯ   อปริกฺขิตฺตํ  โหติ  ยสฺมึ  คพฺเภ
จีวรํ     นิกฺขิตฺตํ    โหติ    ตสฺมึ    คพฺเภ    วตฺถพฺพํ    หตฺถปาสา
@เชิงอรรถ:  ม. ยุ. อิทํ ปาฐทฺวยํ นตฺถิ ฯ   ม. ยุ. วา ฯ
วา น วิชหิตพฺพํ ฯ
     [๑๖]   เอกกุลสฺส  อุทฺโทสิโต  โหติ  ปริกฺขิตฺโต  จ  นานาคพฺภา
นานาโอวรกา    อนฺโตอุทฺโทสิเต   จีวรํ   นิกฺขิปิตฺวา   อนฺโตอุทฺโทสิเต
วตฺถพฺพํ   ฯ   อปริกฺขิตฺโต   โหติ   ยสฺมึ  คพฺเภ  จีวรํ  นิกฺขิตฺตํ  โหติ
ตสฺมึ   คพฺเภ   วตฺถพฺพํ  หตฺถปาสา  วา  น  วิชหิตพฺพํ  ฯ  นานากุลสฺส
อุทฺโทสิโต    โหติ    ปริกฺขิตฺโต    จ    นานาคพฺภา   นานาโอวรกา
ยสฺมึ   คพฺเภ   จีวรํ  นิกฺขิตฺตํ  โหติ  ตสฺมึ  คพฺเภ  วตฺถพฺพํ  ทฺวารมูเล
วา   หตฺถปาสา   วา   น   วิชหิตพฺพํ   ฯ   อปริกฺขิตฺโต  โหติ  ยสฺมึ
คพฺเภ   จีวรํ   นิกฺขิตฺตํ   โหติ   ตสฺมึ   คพฺเภ   วตฺถพฺพํ   หตฺถปาสา
วา น วิชหิตพฺพํ ฯ
     [๑๗]   เอกกุลสฺส   อฏฺโฏ  โหติ  อนฺโตอฏฺเฏ  จีวรํ  นิกฺขิปิตฺวา
อนฺโตอฏฺเฏ   วตฺถพฺพํ   ฯ   นานากุลสฺส   อฏฺโฏ   โหติ   นานาคพฺภา
นานาโอวรกา   ยสฺมึ   คพฺเภ   จีวรํ   นิกฺขิตฺตํ   โหติ   ตสฺมึ  คพฺเภ
วตฺถพฺพํ ทฺวารมูเล วา หตฺถปาสา วา น วิชหิตพฺพํ ฯ
     [๑๘]   เอกกุลสฺส   มาโล  โหติ  อนฺโตมาเล  จีวรํ  นิกฺขิปิตฺวา
อนฺโตมาเล   วตฺถพฺพํ   ฯ   นานากุลสฺส   มาโล   โหติ   นานาคพฺภา
นานาโอวรกา   ยสฺมึ   คพฺเภ   จีวรํ   นิกฺขิตฺตํ   โหติ   ตสฺมึ  คพฺเภ
วตฺถพฺพํ ทฺวารมูเล วา หตฺถปาสา วา น วิชหิตพฺพํ ฯ
     [๑๙]   เอกกุลสฺส  ปาสาโท  โหติ  อนฺโตปาสาเท จีวรํ นิกฺขิปิตฺวา
อนฺโตปาสาเท     วตฺถพฺพํ     ฯ    นานากุลสฺส    ปาสาโท    โหติ
นานาคพฺภา    นานาโอวรกา   ยสฺมึ   คพฺเภ   จีวรํ   นิกฺขิตฺตํ   โหติ
ตสฺมึ    คพฺเภ    วตฺถพฺพํ    ทฺวารมูเล   วา   หตฺถปาสา   วา   น
วิชหิตพฺพํ ฯ
     [๒๐]   เอกกุลสฺส  หมฺมิยํ  โหติ  อนฺโตหมฺมิเย  จีวรํ  นิกฺขิปิตฺวา
อนฺโตหมฺมิเย   วตฺถพฺพํ   ฯ   นานากุลสฺส   หมฺมิยํ   โหติ  นานาคพฺภา
นานาโอวรกา   ยสฺมึ   คพฺเภ   จีวรํ   นิกฺขิตฺตํ   โหติ   ตสฺมึ  คพฺเภ
วตฺถพฺพํ ทฺวารมูเล วา หตฺถปาสา วา น วิชหิตพฺพํ ฯ
     [๒๑]   เอกกุลสฺส  นาวา  โหติ  อนฺโตนาวาย  จีวรํ  นิกฺขิปิตฺวา
อนฺโตนาวาย   วตฺถพฺพํ   ฯ   นานากุลสฺส   นาวา   โหติ  นานาคพฺภา
นานาโอวรกา   ยสฺมึ   โอวรเก  จีวรํ  นิกฺขิตฺตํ  โหติ  ตสฺมึ  โอวรเก
วตฺถพฺพํ ทฺวารมูเล วา ๑- หตฺถปาสา วา น วิชหิตพฺพํ ฯ
     [๒๒]   เอกกุลสฺส  สตฺโถ  โหติ  สตฺเถ  จีวรํ  นิกฺขิปิตฺวา  ปุรโต
วา   ปจฺฉโต   วา   สตฺตพฺภนฺตรา   น  วิชหิตพฺพา  ปสฺสโต  อพฺภนฺตรํ
น   วิชหิตพฺพํ   ฯ  นานากุลสฺส  สตฺโถ  โหติ  สตฺเถ  จีวรํ  นิกฺขิปิตฺวา
หตฺถปาสา น วิชหิตพฺพํ ฯ
     [๒๓]   เอกกุลสฺส  เขตฺตํ  โหติ  ปริกฺขิตฺตญฺจ  อนฺโตเขตฺเต  จีวรํ
นิกฺขิปิตฺวา   อนฺโตเขตฺเต   วตฺถพฺพํ   ฯ   อปริกฺขิตฺตํ  โหติ  หตฺถปาสา
น   วิชหิตพฺพํ  ฯ  นานากุลสฺส  เขตฺตํ  โหติ  ปริกฺขิตฺตญฺจ  อนฺโตเขตฺเต
จีวรํ   นิกฺขิปิตฺวา   อนฺโตเขตฺเต   วตฺถพฺพํ  ทฺวารมูเล  วา  หตฺถปาสา
@เชิงอรรถ:  โป. ม. ยุ. ปาฐทฺวยํ นตฺถิ ฯ
ปาสา วา น วิชหิตพฺพํ ฯ อปริกฺขิตฺตํ โหติ หตฺถปาสา น วิชหิตพฺพํ ฯ
     [๒๔]   เอกกุลสฺส   ธญฺญกรณํ   โหติ   ปริกฺขิตฺตญฺจ  อนฺโตธญฺญ-
กรเณ   จีวรํ   นิกฺขิปิตฺวา   อนฺโตธญฺญกรเณ   วตฺถพฺพํ  ฯ  อปริกฺขิตฺตํ
โหติ   หตฺถปาสา   น   วิชหิตพฺพํ   ฯ   นานากุลสฺส   ธญฺญกรณํ  โหติ
ปริกฺขิตฺตญฺจ    อนฺโตธญฺญกรเณ    จีวรํ   นิกฺขิปิตฺวา   ทฺวารมูเล   วา
วตฺถพฺพํ  หตฺถปาสา  วา  น  วิชหิตพฺพํ  ฯ  อปริกฺขิตฺตํ  โหติ  หตฺถปาสา
น วิชหิตพฺพํ ฯ
     [๒๕]   เอกกุลสฺส  อาราโม  โหติ  ปริกฺขิตฺโต  จ  อนฺโตอาราเม
จีวรํ   นิกฺขิปิตฺวา   อนฺโตอาราเม   วตฺถพฺพํ   ฯ   อปริกฺขิตฺโต   โหติ
หตฺถปาสา   น   วิชหิตพฺพํ  ฯ  นานากุลสฺส  อาราโม  โหติ  ปริกฺขิตฺโต
จ    อนฺโตอาราเม    จีวรํ   นิกฺขิปิตฺวา   ทฺวารมูเล   วา   วตฺถพฺพํ
หตฺถปาสา   วา   น   วิชหิตพฺพํ   ฯ   อปริกฺขิตฺโต   โหติ  หตฺถปาสา
น วิชหิตพฺพํ ฯ
     [๒๖]   เอกกุลสฺส   วิหาโร  โหติ  ปริกฺขิตฺโต  จ  อนฺโตวิหาเร
จีวรํ   นิกฺขิปิตฺวา   อนฺโตวิหาเร  วตฺถพฺพํ  ฯ  อปริกฺขิตฺโต  โหติ  ยสฺมึ
วิหาเร   จีวรํ   นิกฺขิตฺตํ   โหติ   ตสฺมึ   วิหาเร  วตฺถพฺพํ  หตฺถปาสา
วา   น   วิชหิตพฺพํ   ฯ   นานากุลสฺส   วิหาโร  โหติ  ปริกฺขิตฺโต  จ
ยสฺมึ    วิหาเร    จีวรํ   นิกฺขิตฺตํ   โหติ   ตสฺมึ   วิหาเร   วตฺถพฺพํ
ทฺวารมูเล   วา   หตฺถปาสา   วา   น   วิชหิตพฺพํ   ฯ   อปริกฺขิตฺโต
โหติ   ยสฺมึ   วิหาเร   จีวรํ   นิกฺขิตฺตํ  โหติ  ตสฺมึ  วิหาเร  วตฺถพฺพํ
หตฺถปาสา วา น วิชหิตพฺพํ ฯ
     [๒๗]   เอกกุลสฺส  รุกฺขมูลํ  โหติ  ยํ  มชฺฌนฺติเก  กาเล  สมนฺตา
ฉายา   ๑-   ผรติ   อนฺโตฉายาย   จีวรํ   นิกฺขิปิตฺวา   อนฺโตฉายาย
วตฺถพฺพํ ฯ นานากุลสฺส รุกฺขมูลํ โหติ หตฺถปาสา น วิชหิตพฺพํ ฯ
     [๒๘]   อชฺโฌกาโส  เอกูปจาโร  นานูปจาโร  นาม  ๒- อคามเก
อรญฺเญ สมนฺตา สตฺตพฺภนฺตรา เอกูปจาโร ตโต ปรํ นานูปจาโร ฯ
     [๒๙]   วิปฺปวุตฺเถ    วิปฺปวุตฺถสญฺญี    อญฺญตฺร    ภิกฺขุสมฺมติยา
นิสฺสคฺคิยํ   ปาจิตฺติยํ   ฯ   วิปฺปวุตฺเถ  เวมติโก  อญฺญตฺร  ภิกฺขุสมฺมติยา
นิสฺสคฺคิยํ    ปาจิตฺติยํ    ฯ    วิปฺปวุตฺเถ    อวิปฺปวุตฺถสญฺญี    อญฺญตฺร
ภิกฺขุสมฺมติยา   นิสฺสคฺคิยํ   ปาจิตฺติยํ  ฯ  อปจฺจุทฺธเฏ  ปจฺจุทฺธฏสญฺญี  ๓-
อญฺญตฺร    ภิกฺขุสมฺมติยา    นิสฺสคฺคิยํ    ปาจิตฺติยํ    ฯ    อวิสฺสชฺชิเต
วิสฺสชฺชิตสญฺญี    อญฺญตฺร    ภิกฺขุสมฺมติยา    นิสฺสคฺคิยํ    ปาจิตฺติยํ   ฯ
อนฏฺเฐ   นฏฺฐสญฺญี   อญฺญตฺร   ภิกฺขุสมฺมติยา   นิสฺสคฺคิยํ   ปาจิตฺติยํ  ฯ
อวินฏฺเฐ   วินฏฺฐสญฺญี   อญฺญตฺร   ภิกฺขุสมฺมติยา  นิสฺสคฺคิยํ  ปาจิตฺติยํ  ฯ
อทฑฺเฒ   ทฑฺฒสญฺญี   อญฺญตฺร   ภิกฺขุสมฺมติยา   นิสฺสคฺคิยํ   ปาจิตฺติยํ  ฯ
อวิลุตฺเต วิลุตฺตสญฺญี อญฺญตฺร ภิกฺขุสมฺมติยา นิสฺสคฺคิยํ ปาจิตฺติยํ ฯ
     [๓๐]   นิสฺสคฺคิยํ    จีวรํ   อนิสฺสชฺชิตฺวา   ปริภุญฺชติ   อาปตฺติ
@เชิงอรรถ:  โป. รุกฺขฉายา ฯ   ม. ยุ. อิทํ ปาฐทฺวยํ นตฺถิ ฯ
@ โป. อปจฺจุทฺธารเก ปจฺจุทฺธารกสญฺญี ฯ
ทุกฺกฏสฺส    ฯ   อวิปฺปวุตฺเถ   วิปฺปวุตฺถสญฺญี   อาปตฺติ   ทุกฺกฏสฺส   ฯ
อวิปฺปวุตฺเถ     เวมติโก    อาปตฺติ    ทุกฺกฏสฺส    ฯ    อวิปฺปวุตฺเถ
อวิปฺปวุตฺถสญฺญี อนาปตฺติ ฯ
     [๓๑]   อนาปตฺติ   อนฺโตอรุเณ   ปจฺจุทฺธรติ   วิสฺสชฺเชติ  นสฺสติ
วินสฺสติ   ทยฺหติ   อจฺฉินฺทิตฺวา   คณฺหาติ   ๑-   วิสฺสาสํ  คณฺหาติ  ๒-
ภิกฺขุสมฺมติยา อุมฺมตฺตกสฺส อาทิกมฺมิกสฺสาติ ฯ
                           ทุติยสิกฺขาปทํ นิฏฺฐิตํ ฯ
                                     -------
@เชิงอรรถ: ๑-๒ ม. ยุ. สพฺพตฺถ คณฺหนฺติ ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๒ หน้าที่ ๗-๑๖. http://84000.org/tipitaka/pitaka_item/pali_item_s.php?book=2&item=10&items=22&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=2&item=10&items=22&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=2&item=10&items=22&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=2&item=10&items=22&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=2&i=10              The Pali Atthakatha in Thai :- http://84000.org/tipitaka/atthapali/read_th.php?B=2&A=3672              The Pali Atthakatha in Roman :- http://84000.org/tipitaka/atthapali/read_rm.php?B=2&A=3672              สารบัญพระไตรปิฎกเล่มที่ ๒ http://84000.org/tipitaka/read/?index_2

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :