อรรถกถาเล่มที่ ๙ หน้าที่ ๘.

สมฺมุขีภาเว ฐิเตปิ เตสํ อนฺตราโย โหตีติ. อาม โหติ. น ปน พุทฺเธ ปฏิจฺจ, อถโข กิริยาปริหานิยา วา ปาปมิตฺตตาย วา โหติ. ตตฺถ ^๑- กิริยาปริหานิยา โหติ นาม:- สเจ หิ ธมฺมเสนาปติ ธนญฺชานิยสฺส พฺราหฺมณสฺส อาสยํ ญตฺวา ธมฺมํ อเทสยิสฺส, โส พฺราหฺมโณ โสตาปนฺโน อภวิสฺส, เอวํ ตาว กิริยาปริหานิยา โหติ นาม. ปาปมิตฺตตาย โหติ นาม:- สเจ หิ อชาตสตฺตุ เทวทตฺตสฺส วจนํ คเหตฺวา ปิตุฆาตกมฺมํ นากริสฺส, สามญฺญผลสุตฺตกถิตทิวเสว โสตาปนฺโน อภวิสฺส, ตสฺส วจนํ คเหตฺวา ปิตุฆาตกมฺมสฺส กตตฺตา ปน นาโหสิ, ^๒- เอวํ ปาปมิตฺตตาย โหติ. อิมสฺสาปิ อุปาสกสฺส กิริยาปริหานิ ชาตา, อปรินิฏฺฐิตาย เทสนาย อุฏฺฐหิตฺวา ปกฺกนฺโต. อปิจ ภิกฺขเว เอตฺตาวตาปิ เปสฺโส หตฺถาโรหปุตฺโต มหตา อตฺเถน สํยุตฺโตติ กตเรน มหนฺเตน อตฺเถน? ทฺวีหิ อานิสํเสหิ. โส กิร อุปาสโก สํเฆ จ ปสาทํ ปฏิลภิ, สติปฏฺฐานปริคฺคณฺหณตฺถาย จสฺส อภินโว นโย อุทปาทิ. เตน วุตฺตํ "มหตา อตฺเถน สํยุตฺโต"ติ. กนฺทรโก ปน สํเฆ ปสาทเมว ปฏิลภิ. เอตสฺส ภควา กาโลติ เอตสฺส ธมฺมกฺขานสฺส จตุนฺนํ วา ปน ปุคฺคลานํ วิภชนสฺส กาโล. [๘] โอรพฺภิกาทีสุ อุรพฺภา วุจฺจนฺติ เอฬกา, อุรพฺเภ หนตีติ โอรพฺภิโก. สูกริกาทีสุปิ เอเสว นโย. ลุทฺโทติ ทารุโณ กกฺขโฬ. มจฺฉฆาตโกติ มจฺฉพนฺโธ เกวฏฺโฏ. พนฺธนาคาริโกติ พนฺธนาคารโคปโก. กุรูรกมฺมนฺตาติ ทารุณกมฺมนฺตา. [๙] มุทฺธาวสิตฺโตติ ขตฺติยาภิเสเกน มุทฺธนิ อภิสิตฺโต. ปุรตฺถิเมน นครสฺสาติ นครโต ปุรตฺถิมทิสาย. สนฺถาคารนฺติ ยญฺญสาลํ. ขราชินํ นิวาเสตฺวาติ สขุรํ อชินจมฺมํ นิวาเสตฺวา. สปฺปิเตเลนาติ สปฺปินา จ เตเลน จ. ฐเปตฺวา หิ สปฺปึ อวเสโส โย โกจิ เสฺนโห เตลนฺติ วุจฺจติ. กณฺฑวมาโนติ ^๓- นขานํ ฉินฺนตฺตา กณฺฑวิตพฺพกาเล เตน กณฺฑวมาโน. อนนฺตรหิตายาติ อสณฺฑตาย. สรูปวจฺฉายาติ สทิสวจฺฉาย. สเจ คาวี เสตา โหติ, วจฺโฉปิ เสตโกว. สเจ กปิลา วา ^๔- รตฺตา วา, วจฺโฉปิ ตาทิโสวาติ เอวํ สรูปวจฺฉา. ^๕- @เชิงอรรถ: ^๑ ม. ตตฺถ กถํ ^๒ ฉ.ม. น โหติ ^๓ ฉ.ม. กณฺฑูวมาโนติ @^๔ ฉ.ม. สเจ คาวี กพรา ^๕ ฉ.ม. สรูปวจฺฉาย

เนื้อความอรรถกถาฉบับภาษาบาลี อักษรไทย เล่มที่ ๙ หน้าที่ ๘. http://84000.org/tipitaka/read/attha_page.php?book=9&page=8&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=9&A=184&modeTY=2&pagebreak=1 http://84000.org/tipitaka/atthapali/th_line.php?B=9&A=184&modeTY=2&pagebreak=1#p8