อรรถกถาเล่มที่ ๙ ภาษาบาลี อักษรไทย
ม.อ. (ปปญฺจ.๓)
หน้าที่ ๑.

                     ปปญฺจสูทนี นาม มชฺฌิมนิกายฏฺฐกถา
                         มชฺฌิมปณฺณาสกวณฺณนา
                           ----------
                นโม ตสฺส ภควโต อรหโต สมฺมาสมฺพุทฺธสฺส.
                           ๑. คหปติวคฺค
                         ๑ กนฺทรกสุตฺตวณฺณนา
     [๑] เอวมฺเม สุตนฺติ กนฺทรกสุตฺตํ. ตตฺถ จมฺปายนฺติ เอวํนามเก นคเร.
ตสฺส หิ นครสฺส อารามโปกฺขรณีอาทีสุ เตสุ เตสุ ฐาเนสุ จมฺปกรุกฺขาว
อุสฺสนฺนา อเหสุํ, ตสฺมา จมฺปาติ สงฺขํ อคมาสิ. คคฺคราย โปกฺขรณิยา ตีเรติ
ตสฺส จมฺปกนครสฺส ๑- อวิทูเร คคฺคราย นาม ราชมเหสิยา ขนิตตฺตา คคฺคราติ
ลทฺธโวหารา โปกฺขรณี อตฺถิ, ตสฺสา ตีเร สมนฺตโต นีลาทิปญฺจวณฺณกุสุมปฏิมณฺฑิตํ
มหนฺตํ จมฺปกวนํ, ตสฺมึ ภควา กุสุมคนฺธสุคนฺเธ จมฺปกวเน วิหรติ. ตํ
สนฺธาย "คคฺคราย โปกฺขรณิยา ตีเร"ติ วุตฺตํ. มหตา ภิกฺขุสํเฆน สทฺธินฺติ
อทสฺสิตปริจฺเฉเทน มหนฺเตน ภิกฺขุสํเฆน สทฺธึ. เปสฺโสติ ตสฺส นามํ.
หตฺถาโรหปุตฺโตติ หตฺถาจริยปุตฺโต. ๒- กนฺทรโก จ ปริพฺพาชโกติ กนฺทรโกติ
เอวํนาโม ฉนฺนปริพฺพาชโก. อภิวาเทตฺวาติ ฉพฺพณฺณานํ ฆนพุทฺธรสฺมีนํ อนฺตรํ
ปวิสิตฺวา ปสนฺนลาขารเส นิมฺมุชฺชมาโน วิย สิงฺคิสุวณฺณวณฺณํ ทุสฺสวรํ ปสาเรตฺวา
สสีสํ ปารุปมาโน วิย วณฺณคนฺธสมฺปนฺนํ จมฺปกปุปฺผปิลนฺธนํ ๓- สิรสา
สมฺปฏิจฺฉนฺโต วิย สิเนรุปาทํ อุปคจฺฉนฺโต ปุณฺณจนฺโท วิย ภควโต
จกฺกลกฺขณปฏิมณฺฑิเต อลฺลตฺตกวณฺณผุลฺลปทุมสสฺสิริเก ปาเท วนฺทิตฺวาติ อตฺโถ.
เอกมนฺตํ นิสีทีติ ฉนิสชฺชโทสวิรหิเต เอกสฺมึ โอกาเส นิสีทิ.
@เชิงอรรถ: ๑ ฉ.ม. จมฺปานครสฺส ๒ ฉ.ม. หตฺถาจริยสฺส ปุตฺโต
@๓ ฉ.ม. วณฺณคนฺธสมฺปนฺนจมฺปกปุปฺผานิ


เนื้อความอรรถกถาฉบับภาษาบาลี อักษรไทย เล่มที่ ๙ หน้าที่ ๑.
http://84000.org/tipitaka/read/attha_page.php?book=9&page=1&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=9&A=1&modeTY=2&pagebreak=1
http://84000.org/tipitaka/atthapali/th_line.php?B=9&A=1&modeTY=2&pagebreak=1#p1