อรรถกถาเล่มที่ ๕๑ ภาษาบาลี อักษรไทย
พุทฺธ.อ. (มธุรตฺถ.)
หน้าที่ ๘๑.

     อถ โข เต ภิกฺขู เถรสฺส วจนํ สุตฺวา อตฺตโน อตฺตโน
ปตฺตจีวรมาทาย สุวมฺมิตา วิย มหานาคา ปภินฺนกิเลสา ฉินฺนพนฺธนา อปฺปิจฺฉา
สนฺตุฏฺฐา ปวิวิตฺตา อสํสฏฺฐา สีลสมาธิปญฺญาวิมุตฺติวิมุตฺติญาณทสฺสนสมฺปนฺนา
ตรมานา สนฺนิปตึสุ. เตน วุตฺตํ:-
      [๔๙] "สาธูติ เต ปฏิสฺสุตฺวา      นิปกา สํวุตินฺทฺริยา
           ปตฺตจีวรมาทาย           ตรมานา อุปาคมุนฺ"ติ.
     ตตฺถ สาธูติ อยํ สาธุสทฺโท อายาจนสมฺปฏิจฺฉนสมฺปหํสนสุนฺทราทีสุ
ทิสฺสติ. ตถา เหส "สาธุ เม ภนฺเต ภควา สงฺขิตฺเตน ธมฺมํ เทเสตู"ติอาทีสุ ๑-
อายาจเน ทิสฺสติ. "สาธุ ภนฺเตติ โข โส ภิกฺขุ ภควโต ภาสิตํ อภินนฺทิตฺวา
อนุโมทิตฺวา"ติอาทีสุ ๒- สมฺปฏิจฺฉเน. "สาธุ สาธุ สาริปุตฺตา"ติ อาทีสุ ๓-
สมฺปหํสเน.
           "สาธุ ธมฺมรุจิ ราชา       สาธุ ปญฺญาณวา นโร
           สาธุ มิตฺตานมทฺทุพฺโภ       ปาปสฺสากรณํ สุขนฺ"ติ-
อาทีสุ ๔- สุนฺทเร. อิธ สมฺปฏิจฺฉเน. ตสฺมา สาธุ สุฏฺฐูติ เถรสฺส วจนํ
สมฺปฏิจฺฉิตฺวาติ อตฺโถ. ๕- นิปกาติ ปณฺฑิตา ปญฺญวนฺตา. สํวุตินฺทฺริยาติ
อินฺทฺริเยสุ คุตฺตทฺวารา, อินฺทฺริยสํวรสมนฺนาคตาติ อตฺโถ. ตรมานาติ ตุรินา.
อุปาคมุนฺติ เถรํ อุปสงฺกมึสุ.
     [๕๐-๕๑] อิทานิ ธมฺมเสนาปติสฺส ปวตฺตึ ทสฺเสนฺเตหิ สงฺคีติการเกหิ
"ขีณาสเวหิ วิมเลหี"ติอาทิคาถาโย วุตฺตา. ตตฺถ ทนฺเตหีติ กาเยน จ จิตฺเตน
จ ทนฺเตหิ. อุตฺตเม ทเมติ อรหตฺเต, นิมิตฺตตฺเถ ภุมฺมํ ทฏฺฐพฺพํ. เตหิ ภิกฺขูหีติ
@เชิงอรรถ: ๑ สํ.สฬา. ๑๘/๑๓๑/๘๙ (สฺยา) สํ.มหา. ๑๙/๓๘๑/๑๔๓, องฺ.จตุกฺก. ๒๑/๒๕๗/๒๗๖
@๒ ม.อุ. ๑๔/๘๖/๖๗           ๓ ที.ปา. ๑๑/๓๔๙/๒๔๐
@๔ ขุ.ชา. ๒๘/๕๐/๒๐ (สฺยา)    ๕ สุ.วิ. ๑/๑๘๙/๑๕๔-๕, ป.สู. ๑/๑/๒๐, สา.ป. ๒/๘


เนื้อความอรรถกถาฉบับภาษาบาลี อักษรไทย เล่มที่ ๕๑ หน้าที่ ๘๑.
http://84000.org/tipitaka/read/attha_page.php?book=51&page=81&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=51&A=1797&modeTY=2&pagebreak=1
http://84000.org/tipitaka/atthapali/th_line.php?B=51&A=1797&modeTY=2&pagebreak=1#p81