ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๔ ภาษาบาลี อักษรไทย ที.อ. (สุมงฺคล.๑)

หน้าที่ ๙๗.

      ตตฺถ วทนฺติ เอเตนาติ วาโท, ทิฏฺฐิคตสฺเสตํ อธิวจนํ, สสฺสโต
วาโท เอเตสนฺติ สสฺสตวาทา, สสฺสตทิฏฺฐิโนติ อตฺโถ. เอเตเนว นเยน อิโต
ปเรสํปิ เอวรูปานํ ปทานํ อตฺโถ เวทิตพฺโพ. สสฺสตํ อตฺตานญฺจ โลกญฺจาติ
รูปาทีสุ อญฺญตรํ "อตฺตา"ติ จ "โลโก"ติ จ คเหตฺวา ตํ สสฺสตํ อมรํ นิจฺจํ
ธุวํ ปญฺญเปนฺติ. ยถาห "รูปํ อตฺตาเจว โลโก จ สสฺสโต จาติ อตฺตานญฺจ
โลกญฺจ ปญฺญเปนฺติ, ตถา เวทนํ. สญฺญํ. สงฺขาเร. วิญฺญาณํ อตฺตาเจว โลโก จ
สสฺสโต จาติ อตฺตานญฺจ โลกญฺจ ปญฺญเปนฺตี"ติ. ๑-
      [๓๑] อาตปฺปมนฺวายาติ อาทีสุ วีริยํ กิเลสานํ อาตปฺปนภาเวน
อาตปฺปนฺติ วุตฺตํ. ตเทว ปทหนวเสน ปธานํ. ปุนปุปฺนํ ปยุตฺตวเสน อนุโยโค.
อิติ เอวํ ติปฺปเภทํปิ วีริยํ อนฺวาย อาคมฺม ปฏิจฺจาติ อตฺโถ. อปฺปมาโท วฺจฺจติ
สติยา อวิปฺปวาโส. สมฺมามนสิกาโรติ อุปายมนสิกาโร ปฐมมนสิกาโร, อตฺถโต
ญาณนฺติ วุตฺตํ โหติ. ยสฺมึ หิ มนสิกาเร ฐิตสฺส ปุพฺเพนิวาสานุสฺสติญาณํ อิชฺฌติ,
อยํ อิมสฺมึ ฐาเน "มนสิกาโร"ติ อธิปฺเปโต. ตสฺมา วีริยญฺจ สติญฺจ ญาณญฺจ
อาคมฺมาติ อยเมตฺถ สงฺเขปตฺโถ. ตถารูปนฺติ ตถาชาติกํ. เจโตสมาธินฺติ จิตฺตสมาธึ.
ผุสตีติ วินฺทติ ปฏิลภติ. ยถา สมาหิเต จิตฺเตติ เยน สมาธินา สมฺมา อาหิเต
สุฏฺฐุ ฐปิเต จิตฺตมฺหิ. อเนกวิหิตํ ปุพฺเพนิวาสนฺติ อาทีนํ อตฺโถ วิสุทฺธิมคฺเค
วุตฺโต.
      โส เอวมาหาติ โส เอวํ ฌานานุภาวสมฺปนฺโน หุตฺวา ทิฏฺฐิคติโก
เอวํ วทติ. วญฺโฌติ วญฺฌปสุวญฺฌตาลาทโย วิย อผโล กสฺสจิ อชนโกติ.
เอเตน "อตฺตา"ติ จ "โลโก"ติ จ คหิตานํ ฌานทีนํ รูปาทิชนกภาวํ ปฏิกฺขิปติ.
ปพฺพตกูฏํ วิย ฐิโตติ กูฏฏฺโฐ. เอสิกฏฺฐายิฏฺฐิโตติ เอสิกฏฺฐายี วิย หุตฺวา
ฐิโตติ เอสิกฏฺฐายิฏฺฐิโต. ยถา สุนิขาโต เอสิกตฺถมฺโภ นิจฺจโล ติฏฺฐติ, เอวํ
ฐิโตติ อตฺโถ. อุภเยนปิ โลกสฺส วินาสาภาวํ ทีเปติ. เกจิ ปน "อีสิกฏฺฐายิฏฺฐิโต"ติ
ปาลึ วตฺวา มุญฺเช อีสิกา วิย ฐิโต"ติ วทนฺติ. ตตฺรายํ อธิปฺปาโย:-
ยทิทํ ชายตีติ วุจฺจติ, ตํ มุญฺชโต อีสิกา วิย วิชฺชมานเมว นิกฺขมติ. ยสฺมา จ
@เชิงอรรถ:  ขุ. ปฏิ. ๓๑/๑๔๐ อนฺตคฺคาหิกทิฏฺฐินิทฺเทเส วิตฺถาโร ทฏฺฐพฺโพ



เนื้อความอรรถกถาฉบับภาษาบาลี อักษรไทย เล่มที่ ๔ หน้าที่ ๙๗. http://84000.org/tipitaka/read/attha_page.php?book=4&page=97&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=4&A=2548&modeTY=2&pagebreak=1 http://84000.org/tipitaka/atthapali/th_line.php?B=4&A=2548&modeTY=2&pagebreak=1#p97


จบการแสดงผล หน้าที่ ๙๗.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]