ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๔ ภาษาบาลี อักษรไทย ที.อ. (สุมงฺคล.๑)

หน้าที่ ๔๓.

      [๓] สมฺพหุลานนฺติ พหุกานํ. ตตฺถ วินยปริยาเยน ตโย ชนา
"สมฺพหุลา"ติ วุจฺจนฺติ, ตโต ปรํ สํโฆ. สุตฺตนฺตปริยาเยน ปน ตโย ตโยว,
ตโต ปฏฺฐาย สมฺพหุลา. อิธ สุตฺตนฺตปริยาเยน  "สมฺพหุลา"ติ เวทิตพฺพา.
มณฺฑลมาเฬติ กตฺถจิ เทฺว กณฺณิกา คเหตฺวา หํสวฏฺฏกฉนฺเนน กตา กูฏาคารสาลาปิ
"มณฺฑลมาโฬ"ติ วุจฺจติ,  กตฺถจิ เอกํ กณฺณิกํ คเหตฺวา ถมฺภปนฺตึ ปริกฺขิปิตฺวา
กตา อุปฏฺฐานสาลาปิ "มณฺฑลมาโฬ"ติ วุจฺจติ, อิธ ปน นิสีทนสาลา
"มณฺฑลมาโฬ"ติ เวทิตพฺพา. สนฺนิสินฺนานนฺติ นิสชฺชนวเสน. สนฺนิปติตานนฺติ
สโมธานวเสน. อยํ สงฺขิยธมฺโมติ สงฺขิยา ๑- วุจฺจติ กถา, กถาธมฺโมติ อตฺโถ.
อุทปาทีติ อุปฺปนฺโน. กตโม ปน โสติ "อจฺฉริยํ อาวุโส"ติ เอวมาทิ. ตตฺถ
อนฺธสฺส ปพฺพตาโรหณํ วิย นิจฺจํ น โหตีติ อจฺฉริยํ. อยํ ตาว สทฺทนโย. อยํ
ปน อฏฺฐกถานโย:- อจฺฉราโยคฺคนฺติ อจฺฉริยํ, อจฺฉรํ ปหริตุํ ยุตฺตนฺติ อตฺโถ.
อภูตปุพฺพํ ภูตนฺติ อพฺภูตํ. อุภยมฺเปตํ วิมฺหยสฺเสว อธิวจนํ. ยาวญฺจิทนฺติ ยาว
จ อิทํ. เตน สุปฏิวิทิตตาย อปฺปเมยฺยตํ ทสฺเสติ.
      เตน ภควตา ชานตา ฯเปฯ สุปฏิวิทิตาติ เอตฺถายํ สงฺเขปตฺโถ:-
โย โส  ภควา สมตึส ปารมิโย ปูเรตฺวา สพฺพกิเลเส ภญฺชิตฺวา ๒-  อนุตฺตรํ
สมฺมาสมฺโพธึ  อภิสมฺพุทฺโธ, เตน ภควตา เตสํ เตสํ สตฺตานํ อาสยานุสยํ ชานตา,
หตฺถตเล ฐปิตํ อามลกํ วิย สพฺพํ เญยฺยธมฺมํ ปสฺสตา.
      อปิจ  ปุพฺเพนิวาสาทีหิ ชานตา, ทิพฺเพน จกฺขุนา ปสฺสตา. ตีหิ
วิชฺชาหิ วา ปน ฉหิ วา อภิญฺญาหิ ชานตา. สพฺพตฺถ อปฺปฏิหเตน สมนฺตจกฺขุนา
ปสฺสตา, สพฺพธมฺมชานนสมตฺถาย วา ปญฺญาย ชานตา, สพฺพสตฺตานํ จกฺขุวิสยาตีตานิ
ติโรกุฑฺฑาทิคตานิปิ รูปานิ อติวิสุทฺเธน มํสจกฺขุนา ปสฺสตา.
อตฺตหิตสาธิกาย วา สมาธิปทฏฺฐานาย ปฏิเวธปญฺญาย ชานตา, ปรหิตสาธิกาย
กรุณาปทฏฺฐานาย เทสนาปญฺญาย ปสฺสตา. อรีนํ หตตฺตา ปจฺจยาทีนญฺจ
อรหตฺตา อรหตา. สมฺมา สามญฺจ สพฺพธมฺมานํ ๓- พุทฺธตฺตา สมฺมาสมฺพุทฺเธน.
อนฺตรายิกธมฺเม วา ชานตา. นิยฺยานิกธมฺเม ปสฺสตา. กิเลสารีนํ หตตฺตา
@เชิงอรรถ:  ก. สงฺขิยาติ        ก. ภินฺทิตฺวา        อิ. สจฺจานํ



เนื้อความอรรถกถาฉบับภาษาบาลี อักษรไทย เล่มที่ ๔ หน้าที่ ๔๓. http://84000.org/tipitaka/read/attha_page.php?book=4&page=43&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=4&A=1125&modeTY=2&pagebreak=1 http://84000.org/tipitaka/atthapali/th_line.php?B=4&A=1125&modeTY=2&pagebreak=1#p43


จบการแสดงผล หน้าที่ ๔๓.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]