ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๓ ภาษาบาลี อักษรไทย วินย.อ. (สมนฺต.๓)

หน้าที่ ๖๔-๖๖.

หน้าที่ ๖๔.

ลิขิตโก นาม ฯ โส น ปพฺพาเชตพฺโพ ฯ {๙๔} กสาหโต กตทณฺฑ- กมฺโมติ เอตฺถ โย วจนเปสนาทีนิ อกโรนฺโต หญฺญติ น โส กตทณฺฑกมฺโม ฯ โย ปน เกณิยา วา อญฺญถา วา กิญฺจิ คเหตฺวา ขาทิตฺวา ปุน ทาตุํ อสกฺโกนฺโต อยเมว เต ทณฺโฑ โหตูติ กสาหิ หญฺญติ อยํ กสาหโต กตทณฺฑกมฺโม ฯ โส จ กสาหิ วา หโต โหตุ อทฺธทณฺฑกาทีนํ วา อญฺญตเรน ฯ ยาว อลฺลวโณ โหติ ตาว น ปพฺพาเชตพฺโพ ฯ วเณ ปน ปากติเก กตฺวา ปพฺพาเชตพฺโพ ฯ สเจ ปน ชานูหิ วา กปฺปเรหิ วา นาฬิเกรปาสาณาทีหิ วา ฆาเตตฺวา มุตฺโต โหติ สรีเร จสฺส คณฺฐิโย ปญฺญายนฺติ น ปพฺพาเชตพฺโพ ฯ ผาสุกํ กตฺวา เอวํ คณฺฐีสุ สนฺนิสินฺนาสุ ปพฺพาเชตพฺโพ ฯ {๙๕} ลกฺขณาหโต กตทณฺฑกมฺโมติ เอตฺถ กตทณฺฑ- กมฺมภาโว ปุริมนเยเนว เวทิตพฺโพ ฯ ยสฺส ปน ลลาเฏ วา อุราทีสุ วา ตตฺเตน โลเหน ลกฺขณํ อาหตํ โหติ โส เจ ภุชิสฺโส ยาว อลฺลวโณ โหติ ตาว น ปพฺพาเชตพฺโพ ฯ สเจปิสฺส วณา รูฬฺหา โหนฺติ ฉวิยา สมปริจฺเฉทา ลกฺขณมฺปน ปญฺญายติ ติมณฺฑลํ ปฏิจฺฉาเทตฺวา นิวตฺถสฺส อุตฺตราสงฺเค กเต ปฏิจฺฉนฺโนกาเสเยว โหติ ปพฺพาเชตุํ วฏฺฏติ ฯ อปฺปฏิจฺ- ฉนฺโนกาเส เจ น วฏฺฏติ ฯ {๙๖} น ภิกฺขเว อิณายิโกติ เอตฺถ อิณายิโก นาม ยสฺส ปิตุปิตามเหหิ วา อิณํ คหิตํ โหติ สยํ วา อิณํ คหิตํ โหติ ยํ วา อาฐเปตฺวา มาตาปิตูหิ กิญฺจิ คหิตํ โหติ โส ตํ อิณํ ปเรสํ ธาเรตีติ อิณายิโก ฯ ยมฺปน

--------------------------------------------------------------------------------------------- หน้าที่ ๖๕.

อญฺเญ ญาตกา อาฐเปตฺวา กิญฺจิ คณฺหนฺติ โส น อิณายิโก ฯ น หิ เต ตํ อาฐเปตุํ อิสฺสรา ตสฺมา ตํ ปพฺพาเชตุํ วฏฺฏติ ฯ อิตรํ น วฏฺฏติ ฯ สเจ ปนสฺส ญาติสาโลหิตา มยํ ทสฺสาม ปพฺพาเชถ นนฺติ อิณํ อตฺตโน ภารํ กโรนฺติ อญฺโญ วา โกจิ ตสฺส อาจารสมฺปตฺตึ ทิสฺวา ปพฺพาเชถ นํ อหํ อิณํ ทสฺสามีติ วทติ ปพฺพาเชตุํ วฏฺฏติ ฯ เตสุ อสติ ภิกฺขุนา ตถารูปสฺส อุปฏฺฐากสฺสาปิ อาโรเจตพฺพํ สเหตุโก สตฺโต อิณปลิโพเธน น ปพฺพาเชตีติ ฯ สเจ โส ปฏิปชฺชติ ปพฺพาเชตพฺโพ ฯ สเจปิ อตฺตโน กปฺปิยภณฺฑํ อตฺถิ เอตํ ทสฺสามีติ ปพฺพาเชตพฺโพ ฯ สเจ ปน เนว ญาตกาทโย ปฏิปชฺชนฺติ น อตฺตโน ธนํ อตฺถิ ปพฺพาเชตฺวา ภิกฺขาย จริตฺวา โมเจสฺสามีติ ปพฺพาเชตุํ น วฏฺฏติ ฯ สเจ ปพฺพาเชติ ทุกฺกฏํ ปลาโตปิ อาเนตฺวา ทาตพฺโพ ฯ โน เจ เทติ สพฺพํ อิณํ คีวา โหติ อชานิตฺวา ปพฺพาชยโต อนาปตฺติ ฯ ปสฺสนฺเตน ปน อาเนตฺวา อิณสามิกานํ ทสฺเสตพฺโพ ฯ อปสฺสนฺตสฺส คีวา น โหติ ฯ สเจ อิณายิโก อญฺญํ เทสํ คนฺตฺวา ปุจฺฉิยมาโนปิ นาหํ กสฺสจิ กิญฺจิ ธาเรมีติ วตฺวา ปพฺพชติ อิณสามิโก จ ตํ ปริเยสนฺโต ตตฺถ คจฺฉติ ทหโร ตํ ทิสฺวา ปลายติ โส เถรํ อุปสงฺกมิตฺวา อยํ ภนฺเต เกน ปพฺพาชิโต มม เอตฺตกํ นาม ธนํ คเหตฺวา ปลาโตติ วทติ เถเรน วตฺตพฺพํ มยา อุปาสก อนโณ อหนฺติ วเทนฺโต ปพฺพาชิโต กึทานิ กโรมิ ปสฺส เม ปตฺตจีวรมตฺตนฺติ ฯ อยํ ตตฺถ สามีจิ ฯ

--------------------------------------------------------------------------------------------- หน้าที่ ๖๖.

ปลาเต ปน คีวา น โหติ ฯ สเจ ปน นํ เถรสฺส สมฺมุขาว ทิสฺวา อยํ มม อิณายิโกติ วทติ ตว อิณายิกํ ตฺวเมว ชานาหีติ วตฺตพฺโพ ฯ เอวมฺปิ คีวา น โหติ ฯ สเจปิ โส ปพฺพชิโต อยํ อิทานิ กุหึ คมิสฺสตีติ วทติ เถเรน ตฺวํเยว ชานาหีติ วตฺตพฺโพ เอวมฺปิสฺส ปลาเต คีวา น โหติ ฯ สเจ ปน เถโร กุหึทานิ อยํ คมิสฺสติ อิเธว อจฺฉตูติ วทติ สเจ ปลายติ คีวา โหติ ฯ สเจ โส สเหตุกสตฺโต โหติ วตฺตสมฺปนฺโน เถเรน อีทิโส อยนฺติ วตฺตพฺพํ ฯ อิณสามิโก เจ สาธูติ วิสฺสชฺเชติ อิจฺเจตํ กุสลํ สเจ ปน อุปฑฺฒุปฑฺฒํ เทถาติ วทติ ทาตพฺพํ ฯ อปเรน สมเยน อติอาราธโก โหติ สพฺพํ เทถาติ วุตฺเตปิ ทาตพฺพเมว ฯ สเจ ปน อุทฺเทสปริปุจฺฉาทีสุ กุสโล โหติ พหูปกาโร ภิกฺขูนํ ภิกฺขาจารวตฺเตน ปริเยสิตฺวาปิ อิณํ ทาตพฺพเมวาติ ฯ อิณายิกวตฺถุกถา นิฏฺฐิตา ฯ {๙๗} น ภิกฺขเว ทาโสติ เอตฺถ จตฺตาโร ทาสา อนฺโตชาโต ธนกฺกีโต กรมรานีโต สามํ ทาสพฺยํ อุปคโตติ ฯ ตตฺถ อนฺโต- ชาโต นาม ชาติทาโส ฆรทาสิยา ปุตฺโต ฯ ธนกฺกีโต นาม มาตาปิตูนํ สนฺติกา ปุตฺโต วา สามิกานํ สนฺติกา ทาโส วา ธนํ ทตฺวา ทาสจาริตฺตํ อาโรเปตฺวา กีโต เอเต เทฺวปิ น ปพฺพาเชตพฺพา ปพฺพาเชนฺเตน ตตฺถ ตตฺถ จาริตฺตวเสน อทาสํ กตฺวา ปพฺพาเชตพฺพา ฯ กรมรานีโต นาม ติโรรฏฺฐวิโลปํ วา กตฺวา อุปลาเปตฺวา วา ติโรรฏฺฐโต ภุชิสฺสมานุสกานิปิ อาหรนฺติ


เนื้อความอรรถกถาฉบับภาษาบาลี อักษรไทย เล่มที่ ๓ หน้าที่ ๖๔-๖๖. http://84000.org/tipitaka/read/attha_page.php?book=3&page=64&pages=3&modeTY=2&pagebreak=1&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=3&A=1325&modeTY=2&pagebreak=1 http://84000.org/tipitaka/atthapali/th_line.php?B=3&A=1325&modeTY=2&pagebreak=1#p64


จบการแสดงผล หน้าที่ ๖๔-๖๖.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]