บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
อรรถกถาเล่มที่ ๓ ภาษาบาลี อักษรไทย วินย.อ. (สมนฺต.๓) หน้าที่ ๓๗๙-๓๘๐.
คนฺตฺวา ตตฺถ เสนาสนํ คณฺหติ อิเธวิทานิ วสิสฺสามีติ อาลยํ วา กโรติ อิจฺจสฺส อาลเยน วา คหณํ อาลเยน วา อาลโย ปฏิปฺปสฺสมฺภติ ฯ สพฺพตฺถ ปจฺฉิเม ปจฺฉิเม คหเณ วา อาลเย วา ติฏฺฐติ ฯ โย ปน เอกสฺมึ วิหาเร เสนาสนํ คเหตฺวา อญฺญสฺมึ วิหาเร วสิสฺสามีติ คจฺฉติ ตสฺส อุปจารสีมาติกฺกเม เสนาสนคาโห ปฏิปฺปสฺสมฺภติ ฯ ยทิ ปน สเจ ตตฺถ ผาสุํ ภวิสฺสติ วสิสฺสามิ โน เจ อาคมิสฺสามีติ คนฺตฺวา อผาสุกภาวํ ญตฺวา ปจฺฉา คจฺฉติ วฏฺฏติ ฯ {๓๒๐} ติวสฺสนฺตเรนาติ เอตฺถ ติวสฺสนฺตโร นาม โย ทฺวีหิ วสฺเสหิ มหนฺตตโร วา ทหรตโร วา โหติ ฯ โย ปน เอเกน วสฺเสน มหนฺตตโร วา ทหรตโร วา โย วา ปน สมานวสฺโส ตตฺถ วตฺตพฺพเมว นตฺถิ ฯ อิเม จ สพฺเพ เอกสฺมึ มญฺเจ วา ปีเฐ วา เทฺว เทฺว หุตฺวา นิสีทิตุํ ลภนฺติ ฯ ยํ ติณฺณนฺนํ ปโหติ ฯ ตํ สํหาริมํ วา โหตุ อสํหาริมํ วา ฯ ตถารูเป อปิ ผลกขณฺเฑ อนุปสมฺปนฺเนนาปิ สทฺธึ นิสีทิตุํ วฏฺฏติ ฯ หตฺถิขนกนฺติ หตฺถีนํ หตฺถิกุมฺเภ ปติฏฺฐิตํ ฯ เอวํ กตสฺส กิเรตํ นามํ ฯ สพฺพํ ปาสาทปริโภคนฺติ สุวณฺณรชตาทิวิจิตฺรานิปิ กวาฏานิ มญฺจปีฐานิ ตาลวณฺฏานิ สุวณฺณรชตมยานิ ปานียฆฏานิ ปานียสราวกานิ วา ยงฺกิญฺจิ จิตฺตกมฺมกตํ สพฺพํ วฏฺฏติ ฯ ปาสาทสฺส ทาสีทาสเขตฺตวตฺถุโคมหิสํ เทมาติ วทนฺติ ฯ ปาเฏกฺกํ คหณกิจฺจํ นตฺถิ ฯ ปาสาเท ปฏิคฺคหิเต ปฏิคฺคหิตเมว โหติ ฯ--------------------------------------------------------------------------------------------- หน้าที่ ๓๘๐.
โคณกาทีนิ สงฺฆิกวิหาเร วา ปุคฺคลิกวิหาเร วา มญฺจปีฐเกสุ อตฺถริตฺวา ปริภุญฺชิตุํ น วฏฺฏติ ฯ ธมฺมาสเน ปน คิหิวิกฏนีหาเรน ลพฺภติ ฯ ตตฺราปิ นิปชฺชิตุํ น วฏฺฏติ ฯ {๓๒๑} ปญฺจิมานีติ ราสิวเสน ปญฺจ ฯ สรูปวเสน ปเนตานิ พหูนิ โหนฺติ ฯ ตตฺถ อาราโม นาม ปุปฺผาราโม วา ผลาราโม วา ฯ อารามวตฺถุ นาม เตสํเยว อารามานํ อตฺถาย ปริจฺฉินฺทิตฺวา ฐปิโตกาโส เตสุ วา อาราเมสุ วินฏฺเฐสุ เตสํ โปราณภูมิภาโค ฯ วิหาโร นาม ยงฺกิญฺจิ ปาสาทาทิเสนาสนํ ฯ วิหารวตฺถุ นาม ตสฺส ปติฏฺฐาโนกาโส ฯ มญฺโจ นาม มสารโก มุทฺทิกาพทฺโธ กุลีรปาทโก ฯ อาหจฺจปาทโกติ อิเมสํ ปุพฺเพ วุตฺตานํ จตุนฺนํ มญฺจานํ อญฺญตโร ฯ ปีฐนฺนาม มสารกาทีนํเยว จตุนฺนํ ปีฐานํ อญฺญตรํ ฯ ภิสี นาม อุณฺณภิสีอาทีนํ ปญฺจนฺนํ อญฺญตรา ฯ พิมฺโพหนํ นาม วุตฺตปฺปการานํ พิมฺโพหนานํ อญฺญตรํ ฯ โลหกุมฺภี นาม กาฬโลเหน วา ตมฺพโลเหน วา เยนเกนจิ โลเหน กตา กุมฺภี ฯ โลหภาณกาทีสุปิ เอเสว นโย ฯ เอตฺถ ปน ภาณกนฺติ อรญฺขโร วุจฺจติ ฯ วารโกติ ฆโฏ ฯ กฏาหนฺติ กฏาหเมว ฯ วาสีอาทีสุ วลฺลีอาทีสุ จ ทูวิญฺเญยฺยํ นาม นตฺถิ ฯ เอวํ ทฺวิสงฺคหานิ เทฺว โหนฺติ ตติยํ จตุสงฺคหํ จตุตฺถํ นวโกฏฺฐาสํ ปญฺจมํ อฏฺฐเภทนํเนื้อความอรรถกถาฉบับภาษาบาลี อักษรไทย เล่มที่ ๓ หน้าที่ ๓๗๙-๓๘๐. http://84000.org/tipitaka/read/attha_page.php?book=3&page=379&pages=2&modeTY=2&pagebreak=1&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=3&A=7773&modeTY=2&pagebreak=1 http://84000.org/tipitaka/atthapali/th_line.php?B=3&A=7773&modeTY=2&pagebreak=1#p379
จบการแสดงผล หน้าที่ ๓๗๙-๓๘๐.
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]