อรรถกถาเล่มที่ ๒๙ หน้าที่ ๓๒๔.

"สมานภาคนฺ"ติ อุปฑฺฒคาถมาห. ตตฺถ สมานภาคนฺติ สมภาคํ เอกสทิสํ นินฺนานากรณํ. อกฺกุฏฺฐวนฺทิตนฺติ อกฺโกสญฺจ วนฺทนญฺจ. อิทานิ ยถา ตํ สมานภาคํ กยิรติ, ตํ อุปายํ ทสฺเสนฺโต "มโนปโทสนฺ"ติ อุปฑฺฒคาถมาห. ตสฺสตฺโถ:- อกฺกุฏฺโฐ มโนปโทสํ รกฺเขยฺย วนฺทิโต สนฺโต อนุณฺณโต จเรยฺย, ^๑- รญฺญาปิ วนฺทิโต สมาโน "มํ วนฺทตี"ติ อุทฺธจฺจํ นาปชฺเชยฺย. [๗๐๙] อิทานิ อรญฺญปฏิพทฺธกิเลสปฺปหานํ ^๒- ทสฺเสนฺโต "อุจฺจาวจา"ติ คาถมาห. ตสฺสตฺโถ:- อรญฺญสญฺญิเต ทาเยปิ อิฏฺฐานิฏฺฐวเสน อุจฺจาวจา นานปฺปการา อารมฺมณา นิจฺฉรนฺติ, จกฺขฺวาทีนํ อาปาถมาคจฺฉนฺติ, เต จ โข อคฺคิสิขูปมา ปริฬาหชนกฏฺเฐน. ยถา วา ทยฺหมาเน ปวเน ^๓- อคฺคิสิขา นานปฺปการตาย อุจฺจาวจา นิจฺฉรนฺติ สธูมาปิ วิธูมาปิ นีลาปิ ปีตาปิ รตฺตาปิ ขุทฺทกาปิ มหนฺตาปิ, เอวํ สีหพฺยคฺฆมนุสฺสามนุสฺสวิวิธวิหงฺควิรุตปุปฺผผล- ปลฺลวาทิเภทวเสน นานปฺปการตาย ทาเย อุจฺจาวจา อารมฺมณา นิจฺฉรนฺติ ภึสนกาปิ อภึสนกาป รชนียาปิ โลภนียาปิ โทสนียาปิ โมหนียาปิ. เตนาห "อุจฺจาวจา นิจฺฉรนฺติ, ทาเย อคฺคิสิขูปมา"ติ. เอวํ นิจฺฉรนฺเตสุ จ อุจฺจาวเจสุ อารมฺมเณสุ ยา กาจิ อุยฺยานวนจาริกํ คตา สมานา ปกติยา วา ปวนจารินิโย ^๔- กฏฺฐหาริกาทโย รโหคตํ ทิสฺวา หสิตลปิตรุทิตทุนฺนิวตฺถาทีหิ นาริโย มุนึ ปโลเภนฺติ, ตา สุ ตํ มา ปโลภยุนฺติ ^๕- ตา นาริโย ตํ มา ปโลภยุ ํ. ยถา นปฺปโลเภนฺติ, ตถา กโรหีติ วุตฺตํ โหติ. [๗๑๐-๑๑] เอวมสฺส ภควา คาเม จ อรญฺเญ จ ปฏิปตฺติวิธึ ทสฺเสตฺวา อิทานิ สีลสํวรํ ทสฺเสนฺโต "วิรโต เมถุนา ธมฺมา"ติ คาถาทฺวยมาห. @เชิงอรรถ: ^๑ ฉ.ม. จเร ^๒ ฉ.ม. อรญฺญูปนิพทฺธ..... @^๓ ฉ.ม. วเน ^๔ ฉ.ม. วนจารินิโย ^๕ ฉ.ม. ปโลภยุ ํ

เนื้อความอรรถกถาฉบับภาษาบาลี อักษรไทย เล่มที่ ๒๙ หน้าที่ ๓๒๔. http://www.84000.org/tipitaka/read/attha_page.php?book=29&page=324&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://www.84000.org/tipitaka/pitaka_item/read_th.php?B=29&A=7304&modeTY=2&pagebreak=1 http://www.84000.org/tipitaka/atthapali/th_line.php?B=29&A=7304&modeTY=2&pagebreak=1#p324