อรรถกถาเล่มที่ ๒๘ หน้าที่ ๑๗๓.

ตุสฺสมาโน โมทมาโนติ อตฺโถ. อสตํ ธมฺโม นาม ทฺวาสฏฺฐิ ทิฏฺฐิคตานิ, ทสากุสลกมฺมปถา วา. ตํ อสตํ ธมฺมํ โรเจติ ปิเหติ ปตฺเถติ เสวติ. เอวเมตาย คาถาย อสนฺตปิยตา สนฺตอปฺปิยตา อสตํ ธมฺมโรจนญฺจ ^๑- ติวิธํ ปราภวโต มุขํ วุตฺตํ. เอเตน หิ สมนฺนาคโต ปุริโส ปราภวติ ปริหายติ, เนว อิธ น หุรํ วุฑฺฒึ ปาปุณาติ, ตสฺมา "ปราภวโต มุขนฺ"ติ วุจฺจติ. วิตฺถารํ ปเนตฺถ "อเสวนา จ พาลานํ, ปณฺฑิตานญฺจ เสวนา"ติ คาถาวณฺณนายํ วกฺขาม. [๙๖] นิทฺทาสีลี นาม โย คจฺฉนฺโตปิ นิสีทนฺโตปิ ติฏฺฐนฺโตปิ สยาโนปิ นิทฺทายติ เอว. สภาสีลี นาม สงฺคณิการามตํ ภสฺสารามตมนุยุตฺโต. อนุฏฺฐาตาติ วีริยเตชวิรหิโต อุฏฺฐานสีโล น โหติ, อญฺเญหิ โจทิยมาโน คหฏฺโฐ วา สมาโน คหฏฺฐกมฺมํ, ปพฺพชิโต วา ปพฺพชิตกมฺมํ น อารภติ. อลโสติ ชาติอลโส, อจฺจนฺตาภิภูโต ถิเนน ฐิตฏฺฐาเน ฐิโต เอว โหติ, นิสินฺโน ^๒- นิสินฺนฏฺฐาเน นิสินฺโน เอว โหติ, อตฺตโน อุสฺสาเหน อญฺญํ อิริยาปถํ น กปฺเปติ. อตีเต อรญฺเญ อคฺคิมฺหิ ทาปิเต ^๓- อปลายนอลสา เจตฺถ นิทสฺสนํ. อยเมตฺถ อุกฺกฏฺฐปริจฺเฉโท ตโต ลามกปริจฺเฉเทนาปิ ปน อลโส อลโสเตฺวว เวทิตพฺโพ. ธโชว รถสฺส, ธูโมว อคฺคิโน, โกโธ ปญฺญาณมสฺสาติ โกธปญฺญาโณ. โทสจริโต ขิปฺปโกโธ ^๔- อรุกูปมจิตฺโต ปุคฺคโล เอวรูโป โหติ. อิมาย คาถาย นิทฺทาสีลตา สภาสีลตา อนุฏฺฐานสีลตา ^๕- อลสตา โกธปญฺญาณตาติ ปญฺจวิธํ ปราภวมุขํ วุตฺตํ. เอเตน หิ สมนฺนาคโต เนว คหฏฺโฐ คหฏฺฐวุฑฺฒึ, น ปพฺพชิโต ปพฺพชิตวุฑฺฒึ ปาปุณาติ, อญฺญทตฺถุ ปริหายติเยว ปราภวติเยว, ตสฺมา "ปราภวโต มุขนฺ"ติ วุจฺจติ. @เชิงอรรถ: ^๑ ฉ.ม. อสทฺธมฺมโรจนญฺจาติ ^๒ ฉ.ม. อยํ ปาโฐ น ทิสฺสติ @^๓ ฉ.ม. อุฏฺฐิเต ^๔ ฉ.ม. ขิปฺปโกปิ ^๕ ฉ.ม. อนุฏฺฐานตา

เนื้อความอรรถกถาฉบับภาษาบาลี อักษรไทย เล่มที่ ๒๘ หน้าที่ ๑๗๓. http://84000.org/tipitaka/read/attha_page.php?book=28&page=173&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=28&A=4144&modeTY=2&pagebreak=1 http://84000.org/tipitaka/atthapali/th_line.php?B=28&A=4144&modeTY=2&pagebreak=1#p173