อรรถกถาเล่มที่ ๒๑ หน้าที่ ๕๐.

เอตรหิ กถาย สนฺนิสินฺนาติ ปุจฺฉิตฺวา, "อิมาย นามาติ วุตฺเต, "ภิกฺขเว อิเม สตฺตา นาม เยภุยฺเยน ภวนิสฺสิตา ภเวสุเยว ลคฺคา วิหรนฺติ, ปารคามิโน นาม อปฺปกาติ อนุสนฺธึ ฆเฏตฺวา ธมฺมํ เทเสนฺโต อิมา คาถา อภาสิ "อปฺปกา เต มนุสฺเสสุ, เย ชนา ปารคามิโน; อถายํ อิตรา ปชา ตีรเมวานุธาวติ. เย จ โข สมฺมทกฺขาเต ธมฺเม ธมฺมานุวตฺติโน, เต ชนา ปารเมสฺสนฺติ มจฺจุเธยฺยํ สุทุตฺตรนฺติ. ตตฺถ "อปฺปกาติ โถกา น พหู. ปารคามิโนติ: นิพฺพานคามิโน. อถายํ อิตรา ปชาติ: ยา ปนายํ อวเสสา ปชา สกฺกายทิฏฺฐิตีรเมวานุธาวติ, อยเมว พหุตราติ อตฺโถ. สมฺมทกฺขาเตติ: สมฺมา อกฺขาเต สุกถิเต. ธมฺเมติ: เทสนาธมฺเม. ธมฺมานุวตฺติโนติ: ตํ ธมฺมํ สุตฺวา ตทนุจฺฉวิกํ ปฏิปทํ ปูเรตฺวา มคฺคผลสจฺฉิกรณวเสน ธมฺมานุวตฺติโน. ปารเมสฺสนฺตีติ: เต เอวรูปา ชนา นิพฺพานปารํ คมิสฺสนฺติ. มจฺจุเธยฺยนฺติ: กิเลสมารสงฺขาตสฺส มจฺจุสฺส นิวาสนฏฺฐานภูตํ เตภูมิกวฏฺฏํ. สุทุตฺตรนฺติ; เย ชนา ธมฺมานุวตฺติโน, เต เอตํ สุทุตฺตรํ ทุรติกฺกมํ มารเธยฺยํ ตริตฺวา อติกฺกมิตฺวา นิพฺพานปารํ คมิสฺสนฺตีติ อตฺโถ. เทสนาวสาเน พหู โสตาปตฺติผลาทีนิ ปาปุณึสูติ. ธมฺมสฺสวนวตฺถุ. ---------

เนื้อความอรรถกถาฉบับภาษาบาลี อักษรไทย เล่มที่ ๒๑ หน้าที่ ๕๐. http://84000.org/tipitaka/read/attha_page.php?book=21&page=50&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=21&A=1025&modeTY=2&pagebreak=1 http://84000.org/tipitaka/atthapali/th_line.php?B=21&A=1025&modeTY=2&pagebreak=1#p50