อรรถกถาเล่มที่ ๒ ภาษาบาลี อักษรไทย
วินย.อ. (สมนฺต.๒)
หน้าที่ ๕๖๓-๕๖๔.

หน้าที่ ๕๖๓.
     {๑๑๖๗-๑๑๖๘} เอกาทสเม ฯ ปริวาสิยฉนฺททาเนนาติ ปริวาสิเยน
ฉนฺททาเนน ฯ ตตฺถ จตุพฺพิธปาริวาสิยํ ปริสปาริวาสิยํ รตฺติปาริวาสิยํ
ฉนฺทปาริวาสิยํ อชฺฌาสยปาริวาสิยนฺติ ฯ ปริสปาริวาสิยํ นาม ภิกฺขู
เกนจิเทว กรณีเยน สนฺนิปติตา โหนฺติ ฯ อถ เมโฆ วา อุฏฺเฐติ
อุสฺสารณา วา กรียติ มนุสฺสา วา อชฺโฌตฺถรนฺตา อาคจฺฉนฺติ
ภิกฺขู อโนกาโส มยํ อญฺญตฺถ คจฺฉามาติ ฉนฺทํ อวิสฺสชฺเชตฺวาว
อุฏฺฐหนฺติ ฯ อิทํ ปริสปาริวาสิยํ ฯ กิญฺจาปิ ปริสปาริวาสิยํ ฉนฺทสฺส
ปน อวิสฏฺฐตฺตา กมฺมํ กาตุํ วฏฺฏติ ฯ ปุน ภิกฺขู อุโปสถาทีนิ
กริสฺสามาติ รตฺตึ สนฺนิปติตฺวา ยาว สพฺเพ สนฺนิปตนฺติ ตาว
ธมฺมํ สุณิสฺสามาติ เอกํ อชฺเฌสนฺติ ฯ ตสฺมึ ธมฺมกถํ กเถนฺเตเยว
อรุโณ อุคฺคจฺฉิ ฯ สเจ จาตุทฺทสิกํ อุโปสถํ กริสฺสามาติ นิสินฺนา
ปณฺณรโสติ กาตุํ วฏฺฏติ ฯ สเจ ปณฺณรสิกํ กาตุํ นิสินฺนา
ปาฏิปเท อนุโปสโถ อุโปสถํ กาตุํ น วฏฺฏติ ฯ อญฺญํ ปน
สงฺฆกิจฺจํ กาตุํ วฏฺฏติ ฯ อิทํ รตฺติปาริวาสิยํ นาม ฯ ปุน ภิกฺขู
กิญฺจิเทว อพฺภานาทิสงฺฆกมฺมํ กริสฺสามาติ นิสินฺนา โหนฺติ ฯ ตเตฺรโก
นกฺขตฺตปาฐโก ภิกฺขุ เอวํ วเทติ อชฺช นกฺขตฺตํ ทารุณํ มา
อิมํ กมฺมํ กโรถาติ ฯ เต ตสฺส วจเนน ฉนฺทํ วิสฺสชฺเชตฺวา ตเถว
นิสินฺนา โหนฺติ ฯ อถญฺโญ อาคนฺตฺวา นกฺขตฺตํ ปฏิมาเนนฺตํ อตฺโถ
พาลํ อุปจฺจคาติ ๑- วตฺวา กึ นกฺขตฺเตน กโรถาติ วทติ ฯ อิทํ
ฉนฺทปาริวาสิยญฺเจว อชฺฌาสยปาริวาสิยญฺจ ฯ เอตสฺมึ ปาริวาสิเย
ปุน ฉนฺทปาริสุทฺธึ อนาเนตฺวา กมฺมํ กาตุํ น วฏฺฏติ ฯ วุฏฺฐิตาย
@เชิงอรรถ: ๑. ชา. ขฺ. ๒๗/๑๖. ตทฏฺฐกถา. ๒/๓๕.
---------------------------------------------------------------------------------------------
หน้าที่ ๕๖๔.
ปริสายาติ ฉนฺทํ วิสฺสชฺเชตฺวา กาเยน วา ฉนฺทวิสฺสชฺชนมตฺเตเนว วา
อุฏฺฐิตาย ฯ {๑๑๖๙} อนาปตฺติ อวุฏฺฐิตาย ปริสายาติ ฉนฺทํ อวิสฺสชฺเชตฺวา
อวุฏฺฐิตาย อนาปตฺติ ฯ เสสํ อุตฺตานเมว ฯ ติสมุฏฺฐานํ กิริยา
สญฺญาวิโมกฺขํ สจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ
ติเวทนนฺติ ฯ
                       เอกาทสมํ ฯ
     {๑๑๗๐} ทฺวาทสเม ฯ อุปสฺสโย น สมฺมตีติ วสโนกาโส นปฺปโหติ ฯ
เสสํ อุตฺตานเมว ฯ สมุฏฺฐานาทีนิ อนนฺตรสทิสาเนวาติ ฯ
                       ทฺวาทสมํ ฯ
     {๑๑๗๕} เตรสเม ฯ เอกํ วสฺสํ เทฺวติ เอกนฺตริเก เอกสฺมึ สํวจฺฉเร
เทฺว วุฏฺฐาเปติ ฯ เสสํ อุตฺตานเมว ฯ สมุฏฺฐานาทีนิปิ
วุตฺตสทิสาเนวาติ ฯ
                     เตรสมสิกฺขาปทํ ฯ
                  กุมารีภูตวคฺโค อฏฺฐโม ฯ
     {๑๑๘๑} ฉตฺตวคฺคสฺส ปฐมสิกฺขาปเท ฯ สกึปิ ธาเรติ อาปตฺติ
ปาจิตฺติยสฺสาติ มคฺคคมเน เอกปฺปโยเคเนว ทิวสํปิ ธาเรติ เอกาว
อาปตฺติ ฯ สเจ กทฺทมาทีนิ ปตฺวา อุปาหนา โอมุญฺจิตฺวา
ฉตฺตเมว ธาเรนฺตี คจฺฉติ ทุกฺกฏํ ฯ อถาปิ คจฺฉาทีนิ ทิสฺวา
ฉตฺตํ อปนาเมตฺวา อุปาหนารุฬฺหาว คจฺฉติ ทุกฺกฏเมว ฯ สเจ
ฉตฺตํปิ อปนาเมตฺวา อุปาหนาปิ โอมุญฺจิตฺวา ปุน ธาเรติ
ปาจิตฺติยํ ฯ เอวํ ปโยคคณนาย อาปตฺติโย เวทิตพฺพา ฯ เสสํ


เนื้อความอรรถกถาฉบับภาษาบาลี อักษรไทย เล่มที่ ๒ หน้าที่ ๕๖๓-๕๖๔.
http://84000.org/tipitaka/read/attha_page.php?book=2&page=563&pages=2&modeTY=2&pagebreak=1&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=2&A=11846&modeTY=2&pagebreak=1
http://84000.org/tipitaka/atthapali/th_line.php?B=2&A=11846&modeTY=2&pagebreak=1#p563