ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๒ ภาษาบาลี อักษรไทย วินย.อ. (สมนฺต.๒)

หน้าที่ ๕๕๓-๕๕๔.

หน้าที่ ๕๕๓.

{๙๙๙} ฉฏฺเฐ สพฺพํ นคฺควคฺเค อาคาริกสิกฺขาปเท วุตฺตนเยเนว เวทิตพฺพํ ฯ อยํ ปน วิเสโส ฯ ตํ ฉสฺสมุฏฺฐานํ อิทํ สหตฺถาติ วุตฺตตฺตา เอฬกโลมสมุฏฺฐานํ กิริยา โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ ติจิตฺตํ ติเวทนนฺติ ฯ ฉฏฺฐํ ฯ {๑๐๐๗} สตฺตเม ฯ ปุนปริยาเยติ ปุนวาเร ฯ อาปทาสูติ มหคฺฆํ จีวรํ สรีรโต โมเจตฺวา สุปฏิสามิตํ โจรา หรนฺติ เอวรูปาสุ อาปทาสุ อนิสฺสชฺชิตฺวา นิวาเสนฺติยา อนาปตฺติ ฯ เสสํ อุตฺตานเมวาติ ฯ กฐินสมุฏฺฐานํ กายวาจโต กายวาจาจิตฺตโต จ สมุฏฺฐาติ กิริยากิริยํ โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ สตฺตมํ ฯ {๑๐๐๘} อฏฺฐเม ฯ อนิสฺสชฺชิตฺวาติ รกฺขณตฺถาย อทตฺวา อิมํ ชคฺเคยฺยาสีติ เอวํ อนาปุจฺฉิตฺวาติ อตฺโถ ฯ {๑๐๑๒} ปริเยสิตฺวา น ลภตีติ ปฏิชคฺคิกํ น ลภติ ฯ คิลานายาติ วจีเภทํ กาตุํ อสมตฺถาย ฯ อาปทาสูติ รฏฺเฐ ภิชฺชนฺเต อาวาเส ฉฑฺเฑตฺวา คจฺฉนฺติ เอวรูปาสุ อาปทาสุ อนาปตฺติ ฯ เสสํ อุตฺตานเมว ฯ สมุฏฺฐานาทีนิ อนนฺตรสิกฺขาปทสทิสาเนวาติ ฯ อฏฺฐมํ ฯ {๑๐๑๕-๑๐๑๖} นวเม ฯ พาหิรกํ อนตฺถสํหิตนฺติ หตฺถิอสฺสรถธนุถรุ- สิปฺปอถพฺพนขีลนวสีกรณโสสาปนมนฺตาคทปฺปโยคาทิเภทํ ปรูปฆาตกรํ ฯ

--------------------------------------------------------------------------------------------- หน้าที่ ๕๕๔.

ปริตฺตนฺติ ยกฺขปริตฺตนาคมณฺฑลาทิเภทํ สพฺพํปิ วฏฺฏติ ฯ เสสํ อุตฺตานเมว ฯ ปทโสธมฺมสมุฏฺฐานํ วาจโต วาจาจิตฺตโต จ สมุฏฺฐาติ กิริยา โนสญฺญาวิโมกฺขํ อจิตฺตกํ ปณฺณตฺติวชฺชํ วจีกมฺมํ ติจิตฺตํ ติเวทนนฺติ ฯ นวมํ ฯ {๑๐๑๘} ทสเม ฯ วาเจยฺยาติ ปทํ วิเสโส ฯ เสสํ นวเม วุตฺตนเยเนว เวทิตพฺพํ สทฺธึ สมุฏฺฐานาทีหีติ ฯ ทสมํ ฯ จิตฺตาคารวคฺโค ปญฺจโม ฯ {๑๐๒๕} อารามวคฺคสฺส ปฐมสิกฺขาปเท ฯ ปริกฺเขปํ อติกฺกมนฺติยา อุปจารํ โอกฺกมนฺติยาติ เอตฺถ ปฐมปาเท ทุกฺกฏํ ทุติยปาเท ปาจิตฺติยํ ฯ {๑๐๒๗} สีสานุโลกิกาติ ปฐมํ ปวิสนฺตีนํ ภิกฺขุนีนํ สีสํ อนุโลเกนฺตี ปวิสติ อนาปตฺติ ฯ ยตฺถ ภิกฺขุนิโย ปฐมตรํ ปวิสิตฺวา สชฺฌายเจติยวนฺทนาทีนิ กโรนฺติ ตตฺถ ตาสํ สนฺติกํ คจฺฉามีติ คนฺตุํ วฏฺฏติ ฯ อาปทาสูติ เกนจิ อุปทฺทูตา โหติ เอวรูปาสุ อาปทาสุ ปวิสิตุํ วฏฺฏติ ฯ เสสํ อุตฺตานเมว ฯ ธุรนิกฺเขปสมุฏฺฐานํ กิริยากิรยํ สญฺญาวิโมกฺขํ สจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ ปฐมํ ฯ {๑๐๒๘} ทุติเย ฯ อายสฺมา กปฺปิตโกติ อยํ ชฏิลสหสฺสสฺส อพฺภนฺตโร


เนื้อความอรรถกถาฉบับภาษาบาลี อักษรไทย เล่มที่ ๒ หน้าที่ ๕๕๓-๕๕๔. http://84000.org/tipitaka/read/attha_page.php?book=2&page=553&pages=2&modeTY=2&pagebreak=1&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=2&A=11638&modeTY=2&pagebreak=1 http://84000.org/tipitaka/atthapali/th_line.php?B=2&A=11638&modeTY=2&pagebreak=1#p553


จบการแสดงผล หน้าที่ ๕๕๓-๕๕๔.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]