ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๒ ภาษาบาลี อักษรไทย วินย.อ. (สมนฺต.๒)

หน้าที่ ๕๑๔-๕๑๖.

หน้าที่ ๕๑๔.

เวทิตพฺพํ ฯ เตเนวสฺส ปทภาชเน หตฺถคฺคหณํ วา สาทิเยยฺยาติ หตฺโถ นาม กุปฺปรํ อุปาทาย ยาว อคฺคนขา เอตสฺส อสทฺธมฺมสฺส ปฏิเสวนตฺถาย อุพฺภกฺขกํ อโธชานุมณฺฑลํ คหณํ สาทิยติ อาปตฺติ ถุลฺลจฺจยสฺสาติ วุตฺตํ ฯ เอตฺถ จ อสทฺธมฺโมติ กายสํสคฺโค เวทิตพฺโพ น เมถุนธมฺโม ฯ น หิ เมถุนสฺส สามนฺตา ถุลฺลจฺจยํ โหติ ฯ วิญฺญู ปฏิพโล กายสํสคฺคํ สมาปชฺชิตุนฺติ วจนํปิ เจตฺถ สาธกํ ฯ ติสฺสิตฺถิโย เมถุนนฺตํ น เสเว ตโย ปุริเส ตโย จ อนริยปณฺฑเก น จาจเร เมถุนํ พฺยญฺชนสฺมึ เฉชฺชํ สิยา เมถุนธมฺมปจฺจยา ปญฺหาเมสา กุสเลหิ จินฺติตาติ ๑- อิมาย ปริวาเร วุตฺตาย เสทโมจนคาถาย วิรุชฺฌตีติ เจ ฯ น เมถุนธมฺมสฺส ปุพฺพภาคตฺตา ฯ ปริวาเรเยว หิ เมถุนธมฺมสฺส ปุพฺพภาโค ชานิตพฺโพติ วณฺโณ อวณฺโณ กายสํสคฺโค ทุฏฺฐุลฺลวาจา อตฺตกามปาริจริยา วนมนุปฺปทานนฺติ เอวํ สุกฺกวิสฏฺฐิอาทีนิ ปญฺจ สิกฺขาปทานิ เมถุนธมฺมสฺส ปุพฺพภาโคติ วุตฺตานิ ฯ ตสฺมา กายสํสคฺโค เมถุนธมฺมสฺส ปุพฺพภาคตฺตา ปจฺจโย โหติ ฯ อิติ เฉชฺชํ สิยา เมถุนธมฺมปจฺจยาติ เอตฺถ อิมินา ปริยาเยน อตฺโถ เวทิตพฺโพ ฯ เอเตนูปาเยน สพฺพปเทสุ วินิจฺฉโย เวทิตพฺโพ ฯ อปิจ สงฺเกตํ วา คจฺเฉยฺยาติ เอตสฺส ปทภาชเน อิตฺถนฺนามํ อาคจฺฉาติ เอวํ นามกํ ฐานํ อาคจฺฉาติ อตฺโถ ฯ {๖๗๖} อฏฺฐมํ วตฺถุํ ปริปูเรนฺตี อสฺสมณี @เชิงอรรถ: ๑. วิ. ปริวาร. ๘/๕๓๔-๕๓๕.

--------------------------------------------------------------------------------------------- หน้าที่ ๕๑๕.

โหตีติ อนุโลมโต วา ปฏิโลมโต วา เอกนฺตริกาย วา เยน เตน นเยน อฏฺฐมวตฺถุํ ปริปูเรนฺตีเยว อสฺสมณี โหติ ฯ ยา ปน เอกํ วา วตฺถุํ สตฺต วา วตฺถูนิ สตฺตกฺขตฺตุํปิ ปูเรนฺตี เนว อสฺสมณี โหติ อาปนฺนา อาปตฺติโย เทเสตฺวา มุจฺจติ ฯ อปิเจตฺถ คณนูปิกา อาปตฺติ เวทิตพฺพา ฯ วุตฺตํ เหตํ อตฺถาปตฺติ เทสิตา คณนูปิกา อตฺถาปตฺติ เทสิตา น คณนูปิกาติ ฯ ตตฺรายํ วินิจฺฉโย อิทานิ นาปชฺชิสฺสามีติ ธุรนิกฺเขปํ กตฺวา เทสิตา คณนูปิกา เทสิตคณนํ อุเปติ ปาราชิกสฺส องฺคํ น โหติ ฯ ตสฺมา ยา เอกํ อาปนฺนา ธุรนิกฺเขปํ กตฺวา เทเสตฺวา ปุน กิเลสวเสน อาปชฺชติ ปุน เทเสติ เอวํ อฏฺฐ วตฺถูนิ ปูเรนฺตีปิ ปาราชิกา น โหติ ฯ ยา ปน อาปชฺชิตฺวา ปุนปิ อญฺญํ วตฺถุํ อาปชฺชิสฺสามีติ สอุสฺสาหาว เทเสติ ตสฺสา สา อาปตฺติ อคณนูปิกา เทสิตาปิ อเทสิตาว โหติ เทสิตคณนํ น คจฺฉติ ปาราชิกสฺเสว องฺคํ โหติ อฏฺฐเม วตฺถุมฺหิ ปริปุณฺณมตฺเต ปาราชิกา โหติ ฯ เสสํ อุตฺตานเมวาติ ฯ ธุรนิกฺเขปสมุฏฺฐานํ กายวาจาจิตฺตโต สมุฏฺฐาติ กิริยา สญฺญาวิโมกฺขํ สจิตฺตกํ โลกวชฺชํ กายกมฺมํ วจีกมฺมํ อกุสลจิตฺตํ ทฺวิเวทนนฺติ ฯ จตุตฺถปาราชิกสิกฺขาปทํ สมตฺตํ วณฺณนากฺกเมนาติ ฯ อุทฺทิฏฺฐา โข อยฺยาโย อฏฺฐ ปาราชิกา ธมฺมาติ ภิกฺขู อารพฺภ ปญฺญตฺตา สาธารณา จตฺตาโร อิเม จ จตฺตาโรติ เอวํ ปาฏิโมกฺขุทฺเทสมตฺเตน อุทฺทิฏฺฐา โข อยฺยาโย อฏฺฐ ปาราชิกา

--------------------------------------------------------------------------------------------- หน้าที่ ๕๑๖.

ธมฺมาติ เอวเมตฺถ อตฺโถ ทฏฺฐพฺโพ ฯ เสสํ มหาวิภงฺเค วุตฺตนยเมวาติ ฯ สมนฺตปาสาทิกาย วินยสํวณฺณนาย ภิกฺขุนีวิภงเค ปาราชิกกณฺฑวณฺณนา นิฏฺฐิตา ฯ ------------ สตฺตรสกณฺฑวณฺณนา ปาราชิกานนฺตรสฺส อยํ ทานิ ภวิสฺสติ สงฺฆาทิเสสกณฺฑสฺส อนุตฺตานตฺถวณฺณนา ฯ {๖๗๘} อุทฺโทสิตนฺติ ภณฺฑมาโล ฯ มายฺโย เอวํ อวจาติ อยฺโย มา เอวํ อวจ ฯ อปินฺวยฺยาติ อปินุ อยฺยา ฯ อจฺจาวทถาติ อติกฺกมิตฺวา วทถ อกฺโกสถาติ วุตฺตํ โหติ ฯ {๖๗๙} อุสูยวาทิกาติ มานุสูยวเสน โกธุสูยวเสน วิวทมานา ฯ ยสฺมา ปน สา อตฺถโต อฏฺฏการิกา โหติ ตสฺมา อุสูยวาทิกา นาม อฏฺฏการิกา วุจฺจตีติ ปทภาชเน วุตฺตํ ฯ เอตฺถ จ อฏฺโฏติ โวหาริกวินิจฺฉโย วุจฺจติ ยํ ปพฺพชิตา อธิกรณนฺติปิ วทนฺติ ฯ ทุติยํ วา ปริเยสตีติ สกฺขึ วา สหายํ วา ปริเยสติ ทุกฺกฏํ ฯ คจฺฉติ วาติ อุปสฺสโย วา โหตุ ภิกฺขาจารมคฺโค วา ยตฺถ ฐิตาย อฏฺฏํ กริสฺสามีติ จิตฺตํ อุปฺปชฺชติ ตโต โวหาริกานํ สนฺติกํ คจฺฉนฺติยา ปทวาเร ปทวาเร ทุกฺกฏํ ฯ เอกสฺส อาโรเจตีติ ทฺวีสุ ชเนสุ ยสฺส กสฺสจิ เอกสฺส กถํ โย โกจิ โวหาริกานํ อาโรเจติ ฯ ทุติยสฺส อาโรเจตีติ


เนื้อความอรรถกถาฉบับภาษาบาลี อักษรไทย เล่มที่ ๒ หน้าที่ ๕๑๔-๕๑๖. http://84000.org/tipitaka/read/attha_page.php?book=2&page=514&pages=3&modeTY=2&pagebreak=1&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=2&A=10816&modeTY=2&pagebreak=1 http://84000.org/tipitaka/atthapali/th_line.php?B=2&A=10816&modeTY=2&pagebreak=1#p514


จบการแสดงผล หน้าที่ ๕๑๔-๕๑๖.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]