อรรถกถาเล่มที่ ๑๖ ภาษาบาลี อักษรไทย
องฺ.อ. (มโนรถ.๓)
หน้าที่ ๗.

                       ๓. อุปกฺกิเลสสุตฺตวณฺณนา
    [๒๓] ตติเย น จ ปภสฺสรนฺติ น จ ปภาวนฺตํ. ปภงฺคุ จาติ ปภิชฺชน-
สภาวํ. อโยติ กาฬโลหํ. โลหนฺติ ฐเปตฺวา อิธ วุตฺตานิ จตฺตาริ อวเสสโลหํ.
สชฺฌุนฺติ ๑- รชตํ. จิตฺตสฺสาติ จตุภูมิกกุสลจิตฺตสฺส. เตภูมิกสฺส ตาว
อุปกฺกิเลสา โหนฺติ, ๒- โลกุตฺตรสฺส กถํ โหนฺตีติ? อุปฺปชฺชิตุํ อทาเนน. ๓-
ยทคฺเคน หิ อุปฺปชฺชิตุํ น เทนฺติ, ตทคฺเคเนว เต โลกิยสฺสปิ โลกุตฺตรสฺสปิ
อุปกฺกิเลสา นาม โหนฺติ. ปภงฺคุ จาติ อารมฺมเณ จุณฺณวิจุณฺณภาวูปคมเนน
ภิชฺชนสภาวํ. สมฺมา สมาธิยติ อาสวานํ ขยายาติ อาสวานํ ขยสงฺขาตอรหตฺตสฺส อตฺถาย
เหตุนา การเณน สมาธิยติ. เอตฺตาวตา จิตฺตํ วิโสเธตฺวา อรหตฺเต ปติฏฺฐิตํ ขีณาสวํ
ทสฺเสติ. อิทานิสฺส อภิญฺญาปฏิเวธํ ทสฺเสนฺโต ยสฺส ยสฺส จาติอาทิมาห. ตํ
อุตฺตานตฺถเมวาติ.
                         ๔. ทุสฺสีลสุตฺตวณฺณนา
    [๒๔] จตุตฺเถ หตูปนิโสติ ฉินฺนูปนิสฺสโย ๔- หตการโณ. ยถาภูตญาณ-
ทสฺสนนฺติ นามรูปปริจฺเฉทญาณํ อาทึ กตฺวา ตรุณวิปสฺสนา. นิพฺพิทาวิราโคติ
นิพฺพิทา จ วิราโค จ. ตตฺถ นิพฺพิทา พลววิปสฺสนา. วิราโค มคฺโค. วิมุตฺติญาณ-
ทสฺสนนฺติ ผลวิมุตฺติ จ ปจฺจเวกฺขณญาณญฺจ.
                        ๕. อนุคฺคหิตสุตฺตวณฺณนา
    [๒๕] ปญฺจเม สมฺมาทิฏฺฐีติ วิปสฺสนาสมฺมาทิฏฺฐิ. เจโตวิมุตฺติผลาติอาทีสุ
เจโตวิมุตฺตีติ มคฺคผลสมาธิ. ปญฺญาวิมุตฺตีติ ผลญาณํ. สีลานุคฺคหิตาติ สีเลน
อนุคฺคหิตา อนุรกฺขิตา. สุตานุคฺคหิตาติ พาหุสจฺเจน อนุคฺคหิตา. สากจฺฉานุคฺ-
คหิตาติ ธมฺมสากจฺฉาย อนุคฺคหิตา. สมถานุคฺคหิตาติ จิตฺเตกคฺคตาย อนุคฺคหิตา.
@เชิงอรรถ: ๑ ฉ.ม. สชฺฌนฺติ  ๒ ฉ.ม. โหนฺตุ
@๓ ฉ.ม. อปฺปทาเนน  ๔ ฉ.ม. หตอุปนิสฺสโย


เนื้อความอรรถกถาฉบับภาษาบาลี อักษรไทย เล่มที่ ๑๖ หน้าที่ ๗.
http://84000.org/tipitaka/read/attha_page.php?book=16&page=7&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=16&A=135&modeTY=2&pagebreak=1
http://84000.org/tipitaka/atthapali/th_line.php?B=16&A=135&modeTY=2&pagebreak=1#p7