ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๑๕ ภาษาบาลี อักษรไทย องฺ.อ. (มโนรถ.๒)

หน้าที่ ๗๗.

                             ติกนิปาต
                          ๑. ปฐมปณฺณาสก
                     ๑. พาลวคฺค ๑. ภยสุตฺตวณฺณนา
      [๑] ติกนิปาตสฺส ปฐเม ภยานีติอาทีสุ ภยนฺติ จิตฺตุตฺราโส. อุปทฺทโวติ
อเนกคฺคตากาโร. อุปสคฺโคติ อุปสคฺคากาโร ตตฺถ ตตฺถ ลคฺคนากาโร.
      เตสํ เอวํ นานตฺตํ เวทิตพฺพํ:- ปพฺพตวิสมนิสฺสิตา โจรา ชนปทวาสีนํ
เปเสนฺติ "มยํ อสุกทิวเส นาม ตุมฺหากํ คามํ วิลุมฺปิสฺสามา"ติ. ๑- เต ตํ ปวุตฺตึ
สุตกาลโต ปฏฺฐาย ภยํ สนฺตาสํ อาปชฺชนฺติ. อยํ จิตฺตุตฺราโส นาม. "กถํ โน ๒-
โจรา กุปิตา อนตฺถํปิ อาวเหยฺยุนฺ"ติ ๓- หตฺถสารํ คเหตฺวา ทฺวิปทจตุปฺปเทหิ
สทฺธึ อรญฺญํ ปวิสิตฺวา ตตฺถ ตตฺถ ภูมิยํ นิปชฺชนฺติ ฑํสมกสาทีหิ ขชฺชมานา,
คุมฺพนฺตรานิ ปวิสนฺตา ๔- ขาณุกณฺฏเก มทฺทนฺติ. เตสํ เอวํ วิจรนฺตานํ
วิกฺขิตฺตภาโว อเนกคฺคตากาโร นาม. ตโต โจเรสุ ยถาวุตฺตทิวเส อนาคจฺฉนฺเตสุ
"ตุจฺฉกสาสนํ ภวิสฺสติ, กึ คามํ ปวิสิสฺสามา"ติ ๕- สปริกฺขารา คามํ ปวิสนฺติ. อถ
เตสํ ปวิฏฺฐภาวํ ญตฺวา คามํ ปริวาเรตฺวา ทฺวาเร อคฺคึ ทตฺวา มนุสฺเส ฆาเตตฺวา
โจรา สพฺพํ วิภวํ วิลุมฺปิตฺวา คจฺฉนฺติ. เตสุ ฆาติตาวเสสา อคฺคึ นิพฺพาเปตฺวา
โกฏฺฐกจฺฉายาภิตฺติจฺฉายาทีสุ ตตฺถ ตตฺถ ลคฺคิตฺวา นิสีทนฺติ นฏฺฐํ อนุโสจมานา.
อยํ อุปสฏฺฐากาโร ลคฺคนากาโร นาม.
      นฬาคาราติ นเฬหิ ฉนฺนปริจฺฉนฺนา อคารา. เสสสมฺภารา ปเนตฺถ รุกฺขมยา
โหนฺติ. ติณาคาเรปิ เอเสว นโย. กูฏาคารานีติ กูฏสงฺคหิตานิ อคารานิ.
@เชิงอรรถ:  ฉ.ม.,อิ. ปหริสฺสามาติ   ฉ.ม. ยถา โน เต, สี.,อิ. ยถา เต   ม. กเรยฺยุนฺติ
@ ม. ปวิสนฺติ   ก. คามํ ปวิสามาติ



เนื้อความอรรถกถาฉบับภาษาบาลี อักษรไทย เล่มที่ ๑๕ หน้าที่ ๗๗. http://84000.org/tipitaka/read/attha_page.php?book=15&page=77&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=15&A=1696&modeTY=2&pagebreak=1 http://84000.org/tipitaka/atthapali/th_line.php?B=15&A=1696&modeTY=2&pagebreak=1#p77


จบการแสดงผล หน้าที่ ๗๗.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]