อรรถกถาเล่มที่ ๑๕ ภาษาบาลี อักษรไทย
องฺ.อ. (มโนรถ.๒)
หน้าที่ ๒๓๔.

     ภควาปิสฺส วิตฺถารกถํ กเถตุํ เตนหานนฺทาติอาทิมาห. ตตฺถ ยาวตาติ ยตฺตกํ
ฐานํ. จนฺทิมสุริยาติ จนฺทิมา จ สุริโย จ. ปริหรนฺตีติ วิจรนฺติ. ทิสา ภนฺตีติ
สพฺพา ทิสา โอภาสนฺติ. วิโรจนาติ วิโรจมานา. เอตฺตาวตา เอกจกฺกวาฬํ
ปริจฺฉินฺทิตฺวา ทสฺสิตํ โหติ. อิทานิ ตํ สหสฺสคุณํ กตฺวา ทสฺเสนฺโต ตาว สหสฺสธา
โลโกติ อาห. ตสฺมึ สหสฺสธา โลเกติ ตสฺมึ สหสฺสจกฺกวาเฬ. สหสฺสํ
จาตุมฺมหาราชิกานนฺติ สหสฺสํ จาตุมฺมหาราชิกานํ เทวโลกานํ. ๑- ยสฺมา
ปน เอเกกสฺมึ จกฺกวาเฬ จตฺตาโร จตฺตาโร มหาราชาโน, ตสฺมา จตฺตาริ
มหาราชสหสฺสานีติ วุตฺตํ. อิมินา อุปาเยน สพฺพตฺถ อตฺโถ เวทิตพฺโพ. จูฬนิกาติ
ขุทฺทิกา. อยํ สาวกานํ วิสโย. กสฺมา ปเนสา อานีตาติ? มชฺฌิมิกาย
โลกธาตุยา ปริจฺเฉททสฺสนตฺถํ.
     ยาวตาติ ยตฺตกา. ตาว สหสฺสธาติ ตาว สหสฺสภาเคน. ทฺวิสหสฺสี มชฺฌิมิกา
โลกธาตูติ อยํ สหสฺสจกฺกวาฬานิ สหสฺสภาเคน คเณตฺวา ทสสหสฺสจกฺกวาฬปริมาณา ๒-
ทฺวิสหสฺสี มชฺฌิมิกา นาม โลกธาตุ. อยํ สาวกานํ อวิสโย, พุทฺธานเมว วิสโย.
เอตฺตเกปิ หิ ฐาเน ตถาคตา อนฺธการํ วิธมิตฺวา สรีโรภาสํ ทสฺเสตฺวา สเรน
วิญฺญาเปตุํ สกฺโกนฺตีติ ทีเปติ. เอตฺตเกน พุทฺธานํ ชาติกฺเขตฺตํ นาม
ทสฺสิตํ. โพธิสตฺตานํ หิ ปจฺฉิมภเว เทวโลกโต จวิตฺวา มาตุกุจฺฉิยํ
ปฏิสนฺธิคหณทิวเส จ กุจฺฉิโต นิกฺขมนทิวเส จ มหาภินิกฺขมนทิวเส จ
สมฺโพธิธมฺมจกฺกปฺปวตฺตนอายุสงฺขารโวสฺสชฺชนปรินิพฺพานทิวเสสุ จ เอตฺตกํ ฐานํ
กมฺปติ.
     ติสหสฺสี มหาสหสฺสีติ สหสฺสิโต ปฏฺฐาย ตติยาติ ติสหสฺสี, สหสฺสํ
๓- สหสฺสธา กตฺวา คณิตํ มชฺฌิมิกํ สหสฺสธา กตฺวา คณิตตฺตา ๓- มหนฺเตหิ สหสฺเสหิ
คณิตาติ มหาสหสฺสี. เอตฺตาวตา โกฏิสตสหสฺสจกฺกวาฬปริมาโณ โลโก ทสฺสิโต
โหติ. ภควา อากงฺขมาโน เอตฺตเก ฐาเน อนฺธการํ วิธมิตฺวา สรีโรภาสํ ทสฺเสตฺวา
@เชิงอรรถ: ๑ ม. เทวานํ   ๒ ฉ. ทสสตสหสฺสจกฺกวาฬปริมาณา  ๓-๓ ม. สหสฺสธา กตฺวา คณิตตฺตา


เนื้อความอรรถกถาฉบับภาษาบาลี อักษรไทย เล่มที่ ๑๕ หน้าที่ ๒๓๔.
http://84000.org/tipitaka/read/attha_page.php?book=15&page=234&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=15&A=5430&modeTY=2&pagebreak=1
http://84000.org/tipitaka/atthapali/th_line.php?B=15&A=5430&modeTY=2&pagebreak=1#p234