อรรถกถาเล่มที่ ๑๔ หน้าที่ ๔๔๕.

[๓๙๘-๔๐๑] อิทฺธิปาเทสุ ฉนฺทํ นิสฺสาย ปวตฺโต สมาธิ ฉนฺทสมาธิ, ปธานภูตา สงฺขารา ปธานสงฺขารา. สมนฺนาคตนฺติ เตหิ ธมฺเมหิ อุเปตํ. อิทฺธิยา ปาทํ, อิทฺธิภูตํ วา ปาทนฺติ อิทฺธิปาทํ. เสเสสุปิ เอเสว นโย. อยเมตฺถ สงฺเขโป, วิตฺถาโร ปน อิทฺธิปาทวิภงฺเค ^๑- อาคโตเอว. วิสุทฺธิมคฺเค ^๒- ปนสฺส อตฺโถ ทีปิโต. ตตฺรายํ ภิกฺขุ ยทา ฉนฺทาทีสุ เอกํ ธุรํ นิสฺสาย วิปสฺสนํ วฑฺเฒตฺวา อรหตฺตํ ปาปุณิ, ตทาสฺส อิทฺธิปาโท ^๓- ปุพฺพภาเค โลกิโย, อปรภาเค โลกุตฺตโร. เอวํ เสสาปีติ. อิมสฺมึปิ สุตฺเต โลกิยโลกุตฺตราว อิทฺธิปาทา กถิตา. [๔๐๒-๔๐๖] สทฺธินฺทฺริยํ ภาเวตีติอาทีสุ สทฺธา จ ^๔- อตฺตโน สทฺธาธุเร อินฺทฏฺฐํ กโรตีติ ^๕- สทฺธินฺทฺริยํ. วิริยินฺทฺริยาทีสุปิ เอเสว นโย. ภาเวตีติ เอตฺถ ปน อาทิกมฺมิโก โยคาวจโร ตีหิ การเณหิ สทฺธินฺทฺริยํ วิโสเธนฺโต สทฺธินฺทฺริยํ ภาเวติ นาม. วิริยินฺทฺริยาทีสุปิ เอเสว นโย. วุตฺตํ เหตํ:- "อสฺสทฺเธ ปุคฺคเล ปริวชฺชยโต, สทฺเธ ปุคฺคเล เสวโต ภชโต ปยิรุปาสโต, ปสาทนิเย สุตฺตนฺเต ปจฺจเวกฺขโต อิเมหิ ตีหิ การเณหิ ^๖- สทฺธินฺทฺริยํ วิสุชฺฌติ. กุสีเต ปุคฺคเล ปริวชฺชยโต, อารทฺธวิริเย ปุคฺคเล เสวโต ภชโต ปยิรุปาสโต, สมฺมปฺปธาเน ปจฺจเวกฺขโต อิเมหิ ตีหิ การเณหิ วิริยินฺทฺริยํ วิสุชฺฌติ. มุฏฺฐสฺสตี ปุคฺคเล ปริวชฺชยโต, อุปฏฺฐิตสฺสตี ปุคฺคเล เสวโต ภชโต ปยิรุปาสโต, สติปฏฺฐาเน ปจฺจเวกฺขโต อิเมหิ ตีหิ การเณหิ สตินฺทฺริยํ วิสุชฺฌติ. @เชิงอรรถ: ^๑ อภิ.วิ. ๓๕/๔๓๑/๒๖๐ ^๒ วิสุทฺธิ. ๒/๒๑๖ อิทฺธิวิธนิทฺเทส ^๓ ฉ.ม. ปฐมิทฺธิปาโท @^๔ ฉ.ม. สทฺธาว ^๕ ฉ.ม. กาเรตีติ ^๖ ปาลิ.,ฉ.ม. ตีหากาเรหิ. เอวมุปริปิ

เนื้อความอรรถกถาฉบับภาษาบาลี อักษรไทย เล่มที่ ๑๔ หน้าที่ ๔๔๕. http://84000.org/tipitaka/read/attha_page.php?book=14&page=445&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=14&A=10615&modeTY=2&pagebreak=1 http://84000.org/tipitaka/atthapali/th_line.php?B=14&A=10615&modeTY=2&pagebreak=1#p445