อรรถกถาเล่มที่ ๑๒ หน้าที่ ๓๖๓-๓๖๔.

๕-๑๐. สมณสุตฺตาทิวณฺณนา [๑๐๗-๑๑๒] ปญฺจมาทีสุ จตูสุ จตฺตาริ สจฺจานิ กถิตานิ. นวมทสเมสุ กิเลสปฺปหานนฺติ. ปญฺจมาทีนิ. อนฺตวคฺโค ปฐโม. ------------- (๑๒) ๒. ธมฺมกถิกวคฺค ๑-๒. อวิชฺชาสุตฺตาทิวณฺณนา [๑๑๓-๑๑๔] ธมฺมกถิกวคฺคสฺส ปฐเม เอตฺตาวตา จ อวิชฺชาคโต โหตีติ ยาวตา อิมาย จตูสุ สจฺเจสุ อญาณภูตาย อวิชฺชาย สมนฺนาคโต, เอตฺตาวตา อวิชฺชาคโต โหตีติ อตฺโถ. ทุติเยปิ เอเสว นโย. ปฐมทุติยานิ. ๓. ธมฺมกถิกสุตฺตวณฺณนา [๑๑๕] ตติเย ปฐเมน ธมฺมกถิโก, ทุติเยน เสขภูมิ, ตติเยน อเสขภูมีติ เอวํ ธมฺมกถิกํ ปุจฺฉิเตน วิเสเสตฺวา เทฺว ภูมิโย กถิตา. ตติยํ. ๔. ทุติยธมฺมกถิกสุตฺตวณฺณนา [๑๑๖] จตุตฺเถ ติสฺสนฺนมฺปิ ปุจฺฉานํ ตีณิ วิสฺสชฺชนานิ กถิตานิ. จตุตฺถํ. ๕-๙. พนฺธนสุตฺตาทิวณฺณนา [๑๑๗-๑๒๑] ปญฺจเม อตีรทสฺสีติ ตีรํ วุจฺจติ วฏฺฏํ, ตํ น ปสฺสติ. อปารทสฺสีติ ปารํ วุจฺจติ นิพฺพานํ, ตํ น ปสฺสติ. พทฺโธติ กิเลสพนฺธเนน พทฺโธ หุตฺวา ชายติ จ ชิยฺยติ จ มิยฺยติ จ อสฺมา โลกา ปรํ โสกํ คจฺฉตีติ. อิมสฺมึ สุตฺเต วฏฺฏทุกฺขํ กถิตนฺติ. ฉฏฺฐาทีนิ อุตฺตานตฺถาเนว. ปญฺจมาทีนิ. ๑๐. สีลวนฺตสุตฺตวณฺณนา [๑๒๒] ทสเม อนิจฺจโตติอาทีสุ หุตฺวา อภาวากาเรน อนิจฺจโต, ปฏิปีฬนากาเรน ทุกฺขโต, อาพาธฏฺเฐน โรคโต, อนฺโตโทสฏฺเฐน คณฺฑโต, เตสํ เตสํ คณฺฑานํ ปจฺจยภาเวน วา ขณนฏฺเฐน วา สลฺลโต, ทุกฺขฏฺเฐน อฆโต, วิสภาคมหาภูตสมุฏฺฐานอาพาธปจฺจยฏฺเฐน อาพาธโต, อสกฏฺเฐน ปรโต, ปลุชฺชนฏฺเฐน ปโลกโต, สตฺตสุญฺญตฏฺเฐน สุญฺญโต, อตฺตาภาเวน อนตฺตโต. เอวเมตฺถ "อนิจฺจโต ปโลกโต"ติ ทฺวีหิ ปเทหิ อนิจฺจมนสิกาโร, "สุญฺญโต อนตฺตโต"ติ ทฺวีหิ อนตฺตมนสิกาโร, เสเสหิ ทุกฺขมนสิกาโร วุตฺโตติ เวทิตพฺโพ. เสสเมตฺถ อุตฺตานตฺถเมว. ทสมํ. ๑๑. สุตวนฺตสุตฺตวณฺณนา [๑๒๓] ตถา เอกาทสเม. ทสมสฺมึ หิ "สีลวตา"ติ จตุปาริสุทฺธิสีลํ วุตฺตํ, อิธ สุตวตาติ กมฺมฏฺฐานํ วุตฺตํ. อิทเมว นานากรณํ. เอกาทสมํ. ๑๒-๑๓. กปฺปสุตฺตาทิวณฺณนา [๑๒๔-๑๒๕] ทฺวาทสมเตรสมานิ ราหุโลวาทสทิสาเนวาติ. ทฺวาทสมเตรสมานิ. ธมฺมกถิกวคฺโค ทุติโย. ----------------

เนื้อความอรรถกถาฉบับภาษาบาลี อักษรไทย เล่มที่ ๑๒ หน้าที่ ๓๖๓-๓๖๔. http://84000.org/tipitaka/read/attha_page.php?book=12&page=363&pages=2&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=12&A=8011&modeTY=2&pagebreak=1 http://84000.org/tipitaka/atthapali/th_line.php?B=12&A=8011&modeTY=2&pagebreak=1#p363