อรรถกถาเล่มที่ ๑๒ ภาษาบาลี อักษรไทย
สํ.อ. (สารตฺถ.๒)
หน้าที่ ๑๕๗.

                         ๕. จงฺกมสุตฺตวณฺณนา
    [๙๙] ปญฺจเม ปสฺสถ โนติ ปสฺสถ นุ. สพฺเพ โข เอเตติ สาริปุตฺตตฺเถโร
ภควตา "เอตทคฺคํ ภิกฺขเว มม สาวกานํ ภิกฺขูนํ มหาปญฺญานํ ยทิทํ
สาริปุตฺโต"ติ ๑- มหาปญฺเญสุ เอตทคฺเค ฐปิโต. อิติ นํ "ขนฺธนฺตรํ ธาตฺวนฺตรํ
อายตนนฺตรํ สติปฏฺฐานโพธิปกฺขิยธมฺมนฺตรํ ติลกฺขณาหตํ คมฺภีรปญฺหํ
ปุจฺฉิสฺสามา"ติ มหาปญฺญาว ปริวาเรนฺติ. โสปิ เตสํ ปฐวึ ปตฺถรนฺโต วิย
สิเนรุปาทโต วาลิกํ อุทฺธรนฺโต วิย จกฺกวาฬปพฺพตํ ภินฺทนฺโต วิย สิเนรุํ
อุกฺขิปนฺโต วิย อากาสํ วิตฺถาเรนฺโต วิย จนฺทสุริเย อุฏฺฐาเปนฺโต วิย จ
ปุจฺฉิตปุจฺฉิตํ กเถติ. เตน วุตฺตํ "สพฺเพ โข เอเต ภิกฺขเว ภิกฺขู มหาปญฺญา"ติ.
    มหาโมคฺคลฺลาโนปิ ภควตา "เอตทคฺคํ ภิกฺขเว มม สาวกานํ ภิกฺขูนํ
อิทฺธิมนฺตานํ ยทิทํ มหาโมคฺคลฺลาโน"ติ ๒- อิทฺธิมนฺเตสุ เอตทคฺเค ฐปิโต. อิติ นํ
"ปริกมฺมํ อานิสํสํ อธิฏฺฐานํ วิกุพฺพนํ ปุจฺฉิสฺสามา"ติ อิทฺธิมนฺโตว
ปริวาเรนฺติ. โสปิ เตสํ วุตฺตนเยเนว ปุจฺฉิตปุจฺฉิตํ กเถสิ. ๓- เตน วุตฺตํ "สพฺเพ
โข เอเต ภิกฺขเว ภิกฺขู มหิทฺธิกา"ติ.
    มหากสฺสโปปิ ภควตา "เอตทคฺคํ ภิกฺขเว มม สาวกานํ ภิกฺขนํ ธุตวาทานํ ๔-
ยทิทํ มหากสฺสโป"ติ ๕- ธุตวาเทสุ เอตทคฺเค ฐปิโต. อิติ นํ "ธุตงฺคปริหารํ
อานิสํสํ สมาทานํ ๖- อธิฏฺฐานํ เภทํ ปุจฺฉิสฺสามา"ติ ธุตวาทาว ๗- ปริวาเรนฺติ.
โสปิ เตสํ ตเถว ปุจฺฉิตปุจฺฉิตํ พฺยากโรติ. เตน วุตฺตํ "สพฺเพ โข เอเต
ภิกฺขเว ภิกฺขู ธุตวาทา"ติ.
    อนุรุทฺธตฺเถโรปิ ภควตา "เอตทคฺคํ ภิกฺขเว มม สาวกานํ ภิกฺขูนํ
ทิพฺพจกฺขุกานํ ยทิทํ อนุรุทฺโธ"ติ ๘- ทิพฺพจกฺขุเกสุ เอตทคฺเค ฐปิโต. อิติ นํ
"ทิพฺพจกฺขุกสฺส ปริกมฺมํ อานิสํสํ อุปกฺกิเลสํ ปุจฺฉิสฺสามา"ติ ทิพฺพจกฺขุกาว
@เชิงอรรถ: ๑ องฺ.เอกก. ๒๐/๑๘๙/๒๓       ๒ องฺ. เอกก. ๒๐/๑๙๐/๒๓
@๓ ฉ.ม., อิ. กเถติ            ๔ ม. ธุตงฺคธรานํ
@๕ องฺ เอกก. ๒๐/๑๙๑/๒๓       ๖ ฉ.ม. สโมธานํ
@๗ สี. ธุตธราว                ๘ องฺ. เอกก. ๒๐/๑๙๒/๒๓


เนื้อความอรรถกถาฉบับภาษาบาลี อักษรไทย เล่มที่ ๑๒ หน้าที่ ๑๕๗.
http://84000.org/tipitaka/read/attha_page.php?book=12&page=157&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=12&A=3507&modeTY=2&pagebreak=1
http://84000.org/tipitaka/atthapali/th_line.php?B=12&A=3507&modeTY=2&pagebreak=1#p157