paliTIPITAKA Volume 7 - Vinaya Pitaka 7

Vattakkhandhakaṃ [414] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena āgantukā bhikkhū saupāhanāpi ārāmaṃ pavisanti chattapaggahitāpi ārāmaṃ pavisanti oguṇṭhitāpi ārāmaṃ pavisanti sīsepi cīvaraṃ karitvā ārāmaṃ pavisanti pānīyenapi pāde dhovanti vuḍḍhatarepi āvāsike bhikkhū na abhivādenti napi ^1- senāsanaṃ pucchanti . Aññataropi āgantuko bhikkhu anajjhāvutthaṃ vihāraṃ ghaṭikaṃ ugghāṭetvā kavāṭaṃ paṇāmetvā sahasā pāvisi . tassa uparipiṭṭhito ahi khandhe papati . so bhīto vissaramakāsi . bhikkhū upadhāvitvā taṃ bhikkhuṃ etadavocuṃ kissa tvaṃ āvuso vissaramakāsīti . Athakho so bhikkhu bhikkhūnaṃ etamatthaṃ ārocesi. {414.1} Ye te bhikkhū appicchā .pe. Te ujjhāyanti khīyanti vipācenti kathaṃ hi nāma āgantukā bhikkhū saupāhanāpi ārāmaṃ pavisissanti chattapaggahitāpi ārāmaṃ pavisissanti oguṇṭhitāpi ārāmaṃ pavisissanti sīsepi cīvaraṃ karitvā ārāmaṃ pavisissanti pānīyenapi pāde dhovissanti vuḍḍhatarepi āvāsike bhikkhū na abhivādissanti napi senāsanaṃ pucchissantīti . athakho te bhikkhū bhagavato etamatthaṃ ārocesuṃ .pe. @Footnote: ¹ Yu. Rā. pisaddo na paññāyati. Saccaṃ kira bhikkhave āgantukā bhikkhū saupāhanāpi ārāmaṃ pavisanti chattapaggahitāpi ārāmaṃ pavisanti oguṇṭhitāpi ārāmaṃ pavisanti sīsepi cīvaraṃ karitvā ārāmaṃ pavisanti pānīyenapi pāde dhovanti vuḍḍhatarepi āvāsike bhikkhū na abhivādenti napi senāsanaṃ pucchantīti . saccaṃ bhagavāti . vigarahi buddho bhagavā kathaṃ hi nāma bhikkhave āgantukā bhikkhū saupāhanāpi ārāmaṃ pavisissanti chattapaggahitāpi ārāmaṃ pavisissanti oguṇṭhitāpi ārāmaṃ pavisissanti sīsepi cīvaraṃ karitvā ārāmaṃ pavisissanti pānīyenapi pāde dhovissanti vuḍḍhatarepi āvāsike bhikkhū na abhivādessanti napi senāsanaṃ pucchissanti netaṃ bhikkhave appasannānaṃ vā pasādāya .pe. vigarahitvā dhammiṃ kathaṃ katvā bhikkhū āmantesi tenahi bhikkhave āgantukānaṃ bhikkhūnaṃ vattaṃ paññāpessāmi yathā āgantukehi bhikkhūhi sammā ^1- vattitabbaṃ.

The Pali Tipitaka in Roman Character Volume 7 page 213-214. http://84000.org/tipitaka/pali/roman_item_s.php?book=7&item=414&items=1 Classified by [Item Number] :- http://84000.org/tipitaka/pali/roman_item_s.php?book=7&item=414&items=1&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=7&item=414&items=1 Compare with The Royal Version of Thai Tipitaka :- http://84000.org/tipitaka/read/byitem_s.php?book=7&item=414&items=1 Study Atthakatha :- http://84000.org/tipitaka/attha/attha.php?b=7&i=414 The Pali Atthakatha in Thai :- http://84000.org/tipitaka/atthapali/read_th.php?B=3&A=8927 The Pali Atthakatha in Roman :- http://84000.org/tipitaka/atthapali/read_rm.php?B=3&A=8927 Contents of The Tipitaka Volume 7 http://84000.org/tipitaka/read/?index_7