paliTIPITAKA Volume 5 - Vinaya Pitaka 5

[171] Tena kho pana samayena āyasmā revato aññatarassa bhikkhuno hatthe āyasmato sārīputtassa cīvaraṃ pāhesi imaṃ cīvaraṃ therassa dehīti . athakho so bhikkhu antarāmagge āyasmato revatassa vissāsā taṃ cīvaraṃ aggahesi . athakho āyasmā revato āyasmatā sārīputtena samāgantvā pucchi ahaṃ bhante therassa cīvaraṃ pāhesiṃ sampattaṃ taṃ cīvaranti . nāhantaṃ āvuso cīvaraṃ passāmīti . athakho āyasmā revato taṃ bhikkhuṃ etadavoca ahaṃ Āvuso āyasmato hatthe therassa cīvaraṃ pāhesiṃ kahantaṃ cīvaranti . Ahaṃ bhante āyasmato vissāsā taṃ cīvaraṃ aggahesinti . bhagavato etamatthaṃ ārocesuṃ. {171.1} Idha pana bhikkhave bhikkhu bhikkhussa hatthe cīvaraṃ pahiṇati imaṃ cīvaraṃ itthannāmassa dehīti . so antarāmagge yo pahiṇati tassa vissāsā gaṇhāti suggahitaṃ . yassa pahīyati tassa vissāsā gaṇhāti duggahitaṃ. {171.2} Idha pana bhikkhave bhikkhu bhikkhussa hatthe cīvaraṃ pahiṇati imaṃ cīvaraṃ itthannāmassa dehīti . so antarāmagge yassa pahīyati tassa vissāsā gaṇhāti duggahitaṃ . yo pahiṇati tassa vissāsā gaṇhāti suggahitaṃ. {171.3} Idha pana bhikkhave bhikkhu bhikkhussa hatthe cīvaraṃ pahiṇati imaṃ cīvaraṃ itthannāmassa dehīti . so antarāmagge suṇāti yo pahiṇati so kālakatoti tassa matakacīvaraṃ adhiṭṭhāti svadhiṭṭhitaṃ ^1-. Yassa pahīyati tassa vissāsā gaṇhāti duggahitaṃ. {171.4} Idha pana bhikkhave bhikkhu bhikkhussa hatthe cīvaraṃ pahiṇati imaṃ cīvaraṃ itthannāmassa dehīti . so antarāmagge suṇāti yassa pahīyati so kālakatoti tassa matakacīvaraṃ adhiṭṭhāti dvadhiṭṭhitaṃ . Yo pahiṇati tassa vissāsā gaṇhāti suggahitaṃ. {171.5} Idha pana bhikkhave bhikkhu bhikkhussa hatthe cīvaraṃ pahiṇati imaṃ cīvaraṃ itthannāmassa dehīti . so antarāmagge suṇāti ubho kālakatāti yo pahiṇati tassa matakacīvaraṃ adhiṭṭhāti svadhiṭṭhitaṃ ^2-. Yassa @Footnote: ^1-2 Po. Ma. Yu. svādhiṭṭhitaṃ. Pahīyati tassa matakacīvaraṃ adhiṭṭhāti dvadhiṭṭhitaṃ. {171.6} Idha pana bhikkhave bhikkhu bhikkhussa hatthe cīvaraṃ pahiṇati imaṃ cīvaraṃ itthannāmassa dammīti . so antarāmagge yo pahiṇati tassa vissāsā gaṇhāti duggahitaṃ . yassa pahīyati tassa vissāsā gaṇhāti suggahitaṃ. {171.7} Idha pana bhikkhave bhikkhu bhikkhussa hatthe cīvaraṃ pahiṇati imaṃ cīvaraṃ itthannāmassa dammīti . so antarāmagge yassa pahīyati tassa vissāsā gaṇhāti suggahitaṃ . yo pahiṇati tassa vissāsā gaṇhāti duggahitaṃ. {171.8} Idha pana bhikkhave bhikkhu bhikkhussa hatthe cīvaraṃ pahiṇati imaṃ cīvaraṃ itthannāmassa dammīti . so antarāmagge suṇāti yo pahiṇati so kālakatoti tassa matakacīvaraṃ adhiṭṭhāti dvadhiṭṭhitaṃ . Yassa pahīyati tassa vissāsā gaṇhāti suggahitaṃ. {171.9} Idha pana bhikkhave bhikkhu bhikkhussa hatthe cīvaraṃ pahiṇati imaṃ cīvaraṃ itthannāmassa dammīti . so antarāmagge suṇāti yassa pahīyati so kālakatoti tassa matakacīvaraṃ adhiṭṭhāti svadhiṭṭhitaṃ . yo pahiṇati tassa vissāsā gaṇhāti duggahitaṃ. {171.10} Idha pana bhikkhave bhikkhu bhikkhussa hatthe cīvaraṃ pahiṇati imaṃ cīvaraṃ itthannāmassa dammīti . so antarāmagge suṇāti ubho kālakatāti yo pahiṇati tassa matakacīvaraṃ adhiṭṭhāti dvadhiṭṭhitaṃ . Yassa pahīyati tassa matakacīvaraṃ adhiṭṭhāti svadhiṭṭhitaṃ.

The Pali Tipitaka in Roman Character Volume 5 page 237-239. http://84000.org/tipitaka/pali/roman_item_s.php?book=5&item=171&items=1 Classified by [Item Number] :- http://84000.org/tipitaka/pali/roman_item_s.php?book=5&item=171&items=1&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=5&item=171&items=1 Compare with The Royal Version of Thai Tipitaka :- http://84000.org/tipitaka/read/byitem_s.php?book=5&item=171&items=1 Study Atthakatha :- http://84000.org/tipitaka/attha/attha.php?b=5&i=171 The Pali Atthakatha in Thai :- http://84000.org/tipitaka/atthapali/read_th.php?B=3&A=5094 The Pali Atthakatha in Roman :- http://84000.org/tipitaka/atthapali/read_rm.php?B=3&A=5094 Contents of The Tipitaka Volume 5 http://84000.org/tipitaka/read/?index_5