paliTIPITAKA Volume 23 - Sutta Pitaka 15

[224] ²⁰ Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . athakho anāthapiṇḍiko gahapati yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca {224.1} api nu te gahapati kule dānaṃ diyyatīti. Diyyati me bhante kule dānaṃ tañca kho lūkhaṃ kāṇājakaṃ bilaṅgadutiyanti . lūkhaṃ vāpi gahapati dānaṃ deti paṇītaṃ vā tañca asakkaccaṃ deti apacittiṃ ^1- katvā deti asahatthā deti apaviddhaṃ deti anāgamanadiṭṭhiko deti yattha yattha tassa tassa dānassa vipāko nibbattati na uḷārāya bhattabhogāya cittaṃ namati na uḷārāya vatthabhogāya cittaṃ namati na uḷārāya yānabhogāya cittaṃ namati na uḷāresu pañcasu kāmaguṇesu bhogāya cittaṃ namati yepissa te honti puttāti vā dārāti vā dāsāti vā pessāti vā kammakarāti vā tepi na sussusanti na sotaṃ odahanti na aññā cittaṃ upaṭṭhapenti taṃ kissa hetu evañcetaṃ ^2- gahapati hoti asakkaccakatānaṃ kammānaṃ vipāko {224.2} lūkhaṃ vāpi gahapati dānaṃ deti paṇītaṃ vā tañca sakkaccaṃ deti pacittiṃ katvā deti sahatthā deti anapaviddhaṃ deti āgamanadiṭṭhiko deti yattha yattha tassa tassa dānassa vipāko nibbattati uḷārāya bhattabhogāya cittaṃ namati uḷārāya vatthabhogāya cittaṃ namati uḷārāya yānabhogāya cittaṃ namati uḷāresu pañcasu kāmaguṇesu bhogāya cittaṃ namati yepissa te honti @Footnote: ¹ Ma. acittīkatvā . ² Ma. evaṃ hetaṃ. Puttāti vā dārāti vā dāsāti vā pessāti vā kammakarāti vā tepi sussusanti sotaṃ odahanti aññā cittaṃ upaṭṭhahanti taṃ kissa hetu evañcetaṃ gahapati hoti sakkaccakatānaṃ kammānaṃ vipāko. {224.3} Bhūtapubbaṃ gahapati velāmo nāma brāhmaṇo ahosi so evarūpaṃ dānaṃ adāsi mahādānaṃ caturāsīti suvaṇṇapāṭisahassāni adāsi rūpiyapūrāni caturāsīti rūpiyapāṭisahassāni adāsi suvaṇṇapūrāni caturāsīti kaṃsapāṭisahassāni adāsi hiraññapūrāni caturāsīti hatthisahassāni adāsi sovaṇṇālaṅkārāni sovaṇṇaddhajāni hemajālapaṭicchannāni ^1- caturāsīti rathasahassāni adāsi sīhacammaparivārāni byagghacammaparivārāni dīpicammaparivārāni paṇḍukambalaparivārāni sovaṇṇālaṅkārāni sovaṇṇaddhajāni hemajālapaṭicchannāni caturāsīti dhenusahassāni adāsi dukulasaṇṭhanāni ^2- kaṃsūpadhāraṇāni caturāsīti kaññāsahassāni adāsi āmuttamaṇikuṇḍalāyo caturāsīti pallaṅkasahassāni adāsi gonakatthatāni paṭikatthatāni paṭalikatthatāni kadalimigapavarapaccattharaṇāni sauttaracchadāni ubhatolohitakūpadhānāni caturāsīti vatthakoṭisahassāni adāsi khomasukhumānaṃ koseyyasukhumānaṃ kappāsikasukhumānaṃ ko pana vādo annassa pānassa khajjassa bhojanassa lepanassa seyyassa najjo maññe visandanti {224.4} siyā kho pana te gahapati evamassa añño nūna tena samayena velāmo brāhmaṇo ahosi so taṃ dānaṃ adāsi mahādānanti na kho panetaṃ gahapati evaṃ daṭṭhabbaṃ ahaṃ tena samayena velāmo @Footnote: ¹ Sī. Yu. hemajālasañchannāni . ² Ma. dukūlasandhanāni. Yu. dukūlasanthanāni. Brāhmaṇo ahosiṃ ahaṃ taṃ dānaṃ adāsiṃ mahādānaṃ tasmiṃ kho pana gahapati dāne na koci dakkhiṇeyyo ahosi na taṃ koci dakkhiṇaṃ visodheti yaṃ gahapati velāmo brāhmaṇo dānaṃ adāsi mahādānaṃ yo cekaṃ diṭṭhisampannaṃ bhojeyya idaṃ tato mahapphalataraṃ yo ca sataṃ diṭṭhisampannānaṃ bhojeyya yo cekaṃ sakadāgāmiṃ bhojeyya .pe. Yo ca sataṃ sakadāgāmīnaṃ bhojeyya yo cekaṃ anāgāmiṃ bhojeyya yo ca sataṃ anāgāmīnaṃ bhojeyya yo cekaṃ arahantaṃ bhojeyya yo ca sataṃ arahantānaṃ bhojeyya yo cekaṃ paccekabuddhaṃ bhojeyya yo ca sataṃ paccekabuddhānaṃ bhojeyya yo ca tathāgataṃ arahantaṃ sammāsambuddhaṃ bhojeyya yo ca buddhappamukhaṃ bhikkhusaṅghaṃ bhojeyya yo ca cātuddisaṃ saṅghaṃ uddissa vihāraṃ kārāpeyya yo ca pasannacitto buddhañca dhammañca saṅghañca saraṇaṃ gaccheyya yo ca pasannacitto sikkhāpadāni samādiyeyya pāṇātipātā veramaṇī ^1- adinnādānā veramaṇī kāmesu micchācārā veramaṇī musāvādā veramaṇī surāmeraya- majjapamādaṭṭhānā veramaṇī yo ca antamaso gaddūhanamattampi ^2- mettacittaṃ bhāveyya idaṃ tato mahapphalataraṃ yañca gahapati velāmo brāhmaṇo dānaṃ adāsi mahādānaṃ yo cekaṃ diṭṭhisampannaṃ bhojeyya yo ca sataṃ diṭṭhisampannānaṃ bhojeyya yo cekaṃ sakadāgāmiṃ bhojeyya yo ca sataṃ sakadāgāmīnaṃ bhojeyya @Footnote: ¹ Ma. veramaṇiṃ. evamuparipi . ² Sī. gandhūhanamattampi. Ma. gandhohanamattampi. @evamuparipi. Yo cekaṃ anāgāmiṃ bhojeyya yo ca sataṃ anāgāmīnaṃ bhojeyya yo cekaṃ arahantaṃ bhojeyya yo ca sataṃ arahantānaṃ bhojeyya yo cekaṃ paccekabuddhaṃ bhojeyya yo ca sataṃ paccekabuddhānaṃ bhojeyya yo ca tathāgataṃ arahantaṃ sammāsambuddhaṃ bhojeyya yo ca buddhappamukhaṃ bhikkhusaṅghaṃ bhojeyya yo ca cātuddisaṃ saṅghaṃ uddissa vihāraṃ kārāpeyya yo ca pasannacitto buddhañca dhammañca saṅghañca saraṇaṃ gaccheyya yo ca pasannacitto sikkhāpadāni samādiyeyya pāṇātipātā veramaṇī .pe. surāmerayamajjapamādaṭṭhānā veramaṇī yo ca antamaso gaddūhanamattampi mettacittaṃ bhāveyya yo ca accharāsaṅghātamattampi aniccasaññaṃ bhāveyya idaṃ tato mahapphalataranti. Sīhanādavaggo dutiyo. Tassuddānaṃ vuttho ^1- saupādiseso ca koṭṭhitena samiddhinā gaṇḍasaññā kule sattā ^2- devatā velāmena cāti. -------------

The Pali Tipitaka in Roman Character Volume 23 page 405-408. http://www.84000.org/tipitaka/pali/roman_item_s.php?book=23&item=224&items=1 Classified by [Item Number] :- http://www.84000.org/tipitaka/pali/roman_item_s.php?book=23&item=224&items=1&mode=bracket Compare with The Pali Tipitaka in Thai Character :- http://www.84000.org/tipitaka/read/pali_item_s.php?book=23&item=224&items=1 Compare with The Royal Version of Thai Tipitaka :- http://www.84000.org/tipitaka/read/byitem_s.php?book=23&item=224&items=1 Study Atthakatha :- http://www.84000.org/tipitaka/attha/attha.php?b=23&i=224 The Pali Atthakatha in Thai :- http://www.84000.org/tipitaka/atthapali/read_th.php?B=16&A=6671 The Pali Atthakatha in Roman :- http://www.84000.org/tipitaka/atthapali/read_rm.php?B=16&A=6671 Contents of The Tipitaka Volume 23 http://www.84000.org/tipitaka/read/?index_23