paliTIPITAKA Volume 2 - Vinaya Pitaka 2

Aṭṭhamasikkhāpadaṃ [161] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena aññataro mahāmatto pavāsaṃ gacchanto bhikkhūnaṃ santike dūtaṃ pāhesi āgacchantu bhaddantā vassāvāsikaṃ dassāmīti . bhikkhū vassaṃ vutthānaṃ bhagavatā vassāvāsikaṃ anuññātanti kukkuccāyantā nāgamaṃsu . athakho so mahāmatto ujjhāyati khīyati vipāceti kathaṃ hi nāma bhaddantā mayā pahite dūte nāgacchissanti ahaṃ hi senāya gacchāmi dujjānaṃ jīvitaṃ dujjānaṃ maraṇanti . assosuṃ kho bhikkhū tassa mahāmattassa ujjhāyantassa khīyantassa vipācentassa . athakho te bhikkhū bhagavato etamatthaṃ ārocesuṃ . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave accekacīvaraṃ paṭiggahetvā nikkhipitunti. {161.1} Tena kho pana samayena bhikkhū bhagavatā anuññātaṃ accekacīvaraṃ paṭiggahetvā nikkhipitunti . te accekacīvaraṃ ^1- paṭiggahetvā cīvarakālasamayaṃ atikkāmenti . tāni cīvarāni cīvaravaṃse bhaṇḍikābaddhāni tiṭṭhanti . addasā kho āyasmā ānando senāsanacārikaṃ āhiṇḍanto tāni cīvarāni cīvaravaṃse bhaṇḍikābaddhāni ṭhitāni ^2- disvāna ^3- bhikkhū @Footnote: ¹ Ma. Yu. accekacīvarāni . ² Ma. Yu. tiṭuṭhante . ³ Ma. Yu. disvā. Āmantesi ^1- kassimāni āvuso cīvarāni cīvaravaṃse bhaṇḍikābaddhāni tiṭṭhantīti . amhākaṃ āvuso accekacīvarānīti . kīvaciraṃ panāvuso imāni cīvarāni nikkhittānīti . athakho te bhikkhū āyasmato ānandassa yathānikkhittaṃ ārocesuṃ . āyasmā ānando ujjhāyati khīyati vipāceti kathaṃ hi nāma bhikkhū accekacīvarāni paṭiggahetvā cīvarakālasamayaṃ atikkāmessantīti . athakho āyasmā ānando bhagavato etamatthaṃ ārocesi . saccaṃ kira bhikkhave bhikkhū accekacīvaraṃ paṭiggahetvā cīvarakālasamayaṃ atikkāmentīti. Saccaṃ bhagavāti. {161.2} Vigarahi buddho bhagavā kathaṃ hi nāma te bhikkhave moghapurisā accekacīvaraṃ paṭiggahetvā cīvarakālasamayaṃ atikkāmessanti netaṃ bhikkhave appasannānaṃ vā pasādāya pasannānaṃ vā bhiyyobhāvāya .pe. Evañca pana bhikkhave imaṃ sikkhāpadaṃ uddiseyyātha {161.3} dasāhānāgataṃ kattikatemāsipuṇṇamaṃ bhikkhuno paneva accekacīvaraṃ uppajjeyya accekaṃ maññamānena bhikkhunā paṭiggahetabbaṃ paṭiggahetvā yāvacīvarakālasamayaṃ nikkhipitabbaṃ tato ce uttariṃ nikkhipeyya nissaggiyaṃ pācittiyanti.

The Pali Tipitaka in Roman Character Volume 2 page 141-142. http://84000.org/tipitaka/pali/roman_item_s.php?book=2&item=161&items=1 Classified by [Item Number] :- http://84000.org/tipitaka/pali/roman_item_s.php?book=2&item=161&items=1&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=2&item=161&items=1 Compare with The Royal Version of Thai Tipitaka :- http://84000.org/tipitaka/read/byitem_s.php?book=2&item=161&items=1 Study Atthakatha :- http://84000.org/tipitaka/attha/attha.php?b=2&i=161 The Pali Atthakatha in Thai :- http://84000.org/tipitaka/atthapali/read_th.php?B=2&A=5787 The Pali Atthakatha in Roman :- http://84000.org/tipitaka/atthapali/read_rm.php?B=2&A=5787 Contents of The Tipitaka Volume 2 http://84000.org/tipitaka/read/?index_2