paliTIPITAKA Volume 19 - Sutta Pitaka 11

page28.

Paṭipattivaggo catuttho [89] Sāvatthīnidānaṃ . micchāpaṭipattiñca vo bhikkhave desessāmi sammāpaṭipattiñca taṃ suṇātha. [90] Katamā ca bhikkhave micchāpaṭipatti. Seyyathīdaṃ. Micchādiṭṭhi .pe. Micchāsamādhi. Ayaṃ vuccati bhikkhave micchāpaṭipatti. [91] Katamā ca bhikkhave sammāpaṭipatti. Seyyathīdaṃ. Sammādiṭṭhi .pe. Sammāsamādhi. Ayaṃ vuccati bhikkhave sammāpaṭipattīti. [92] Sāvatthīnidānaṃ . micchāpaṭipannañca vo bhikkhave desissāmi sammāpaṭipannañca taṃ suṇātha. [93] Katamo ca bhikkhave micchāpaṭipanno . idha bhikkhave ekacco micchādiṭṭhiko hoti .pe. micchāsamādhi . ayaṃ vuccati bhikkhave ^1- micchāpaṭipanno. [94] Katamo ca bhikkhave sammāpaṭipanno. Idha bhikkhave ekacco sammādiṭṭhiko hoti .pe. sammāsamādhi . ayaṃ vuccati bhikkhave sammāpaṭipannoti. [95] Sāvatthīnidānaṃ . yesaṃ kesañci bhikkhave ariyo aṭṭhaṅgiko maggo viraddho viraddho tesaṃ ariyo aṭṭhaṅgiko maggo sammādukkhakkhayagāmī. Yesaṃ kesañci bhikkhave ariyo aṭṭhaṅgiko maggo āraddho āraddho tesaṃ ariyo aṭṭhaṅgiko maggo sammādukkhakkhayagāmī. @Footnote: ¹ Yu. ayaṃ pāṭho natthi.

--------------------------------------------------------------------------------------------- page29.

[96] Katamo ca bhikkhave ariyo aṭṭhaṅgiko maggo. Seyyathīdaṃ. Sammādiṭṭhi .pe. sammāsamādhi . yesaṃ kesañci ^[1]- ariyo aṭṭhaṅgiko maggo viraddho viraddho tesaṃ ariyo aṭṭhaṅgiko maggo sammādukkhakkhayāgāmī. Yesaṃ kesañci bhikkhave ariyo aṭṭhaṅgiko maggo āraddho āraddho tesaṃ ariyo aṭṭhaṅgiko maggo sammādukkhakkhayagāmīti. [97] Sāvatthīnidānaṃ . aṭṭhime bhikkhave dhammā bhāvitā bahulīkatā apārā pāraṃ gamanāya saṃvattanti . katame aṭṭha . Seyyathīdaṃ . sammādiṭṭhi .pe. sammāsamādhi . ime kho ^[2]- aṭṭha dhammā bhāvitā bahulīkatā apārā pāraṃ gamanāya saṃvattantīti . Idamavoca bhagavā idaṃ vatvāna sugato athāparaṃ etadavoca satthā [98] Appakā te manussesu ye janā pāragāmino athāyaṃ itarā pajā tīramevānudhāvati. Ye ca kho sammadakkhāte dhamme dhammānuvattino te janā pāramessanti maccudheyyaṃ suduttaraṃ. Kaṇhaṃ dhammaṃ vippahāya sukkaṃ bhāvetha paṇḍito okā anokamāgamma viveke yattha dūramaṃ tatrābhiratimiccheyya hitvā kāme akiñcano pariyodapeyya attānaṃ cittaklesehi paṇḍito. @Footnote: ¹ Ma. Yu. bhikkhave ayaṃ .... ² Po. Ma. Yu. bhikkhave.

--------------------------------------------------------------------------------------------- page30.

Yesaṃ sambodhiyaṅgesu sammā cittaṃ subhāvitaṃ ādānapaṭinissagge anupādāya ye ratā khīṇāsavā jutimanto te loke parinibbutāti. [99] Sāvatthīnidānaṃ . sāmaññañca vo bhikkhave desessāmi sāmaññaphalāni ca taṃ suṇātha. [100] Katamañca ^[1]- bhikkhave sāmaññaṃ. Ayamevāriyo aṭṭhaṅgiko maggo . seyyathīdaṃ . sammādiṭṭhi .pe. sammāsamādhi . idaṃ vuccati bhikkhave sāmaññaṃ. [101] Katamāni ca bhikkhave sāmaññaphalāni . sotāpattiphalaṃ sakadāgāmiphalaṃ anāgāmiphalaṃ arahattaphalaṃ . imāni vuccanti bhikkhave sāmaññaphalāni. [102] Sāvatthīnidānaṃ . sāmaññañca vo bhikkhave desissāmi sāmaññatthañca taṃ suṇātha. [103] Katamañca ^[2]- bhikkhave sāmaññaṃ. Ayamevāriyo aṭṭhaṅgiko maggo . seyyathīdaṃ . sammādiṭṭhi .pe. sammāsamādhi . idaṃ vuccati bhikkhave sāmaññaṃ. [104] Katamo ca bhikkhave sāmaññattho . yo kho bhikkhave rāgakkhayo dosakkhayo mohakkhayo . ayaṃ vuccati bhikkhave sāmaññatthoti. [105] Sāvatthīnidānaṃ . brahmaññañca vo bhikkhave desissāmi @Footnote: ^1-2 Ma. kho.

--------------------------------------------------------------------------------------------- page31.

Brahmaññaphalāni ca taṃ suṇātha. [106] Katamañca ^[1]- bhikkhave brahmaññaṃ. Ayamevāriyo aṭṭhaṅgiko maggo . seyyathīdaṃ . sammādiṭṭhi .pe. sammāsamādhi . idaṃ vuccati bhikkhave brahmaññaṃ. [107] Katamāni ca bhikkhave brahmaññaphalāni . sotāpattiphalaṃ sakadāgāmiphalaṃ anāgāmiphalaṃ arahattaphalaṃ . imāni vuccanti bhikkhave brahmaññaphalānīti. [108] Sāvatthīnidānaṃ . brahmaññañca vo bhikkhave desissāmi brahmaññatthañca taṃ suṇātha. [109] Katamañca bhikkhave brahmaññaṃ . ayameva ariyo aṭṭhaṅgiko maggo . seyyathīdaṃ . sammādiṭṭhi .pe. sammāsamādhi . Idaṃ vuccati bhikkhave brahmaññaṃ. [110] Katamo ca bhikkhave brahmaññattho . yo ca ^2- bhikkhave rāgakkhayo dosakkhayo mohakkhayo . ayaṃ vuccati bhikkhave brahmaññatthoti. [111] Sāvatthīnidānaṃ . brahmacariyañca vo bhikkhave desissāmi brahmacariyaphalāni ca taṃ suṇātha. [112] Katamañca bhikkhave brahmacariyaṃ . ayamevāriyo aṭṭhaṅgiko maggo . seyyathīdaṃ . sammādiṭṭhi .pe. sammāsamādhi . idaṃ vuccati bhikkhave brahmacariyaṃ. @Footnote: ^1-2 Ma. Yu. kho.

--------------------------------------------------------------------------------------------- page32.

[113] Katamāni ca bhikkhave brahmacariyaphalāni . sotāpattiphalaṃ sakadāgāmiphalaṃ anāgāmiphalaṃ arahattaphalaṃ . imāni vuccanti bhikkhave brahmacariyaphalānīti. [114] Sāvatthīnidānaṃ . brahmacariyañca vo bhikkhave desissāmi brahmacariyatthañca taṃ suṇātha. [115] Katamañca bhikkhave brahmacariyaṃ . ayamevāriyo aṭṭhaṅgiko maggo . seyyathīdaṃ . sammādiṭṭhi .pe. sammāsamādhi . idaṃ vuccati bhikkhave brahmacariyaṃ. [116] Katamo ca bhikkhave brahmacariyattho . Yo ca ^1- bhikkhave rāgakkhayo dosakkhayo mohakkhayo . ayaṃ vuccati bhikkhave brahmacariyatthoti. Paṭipattivaggo catuttho. Tassuddānaṃ paṭipatti paṭipanno ca viraddhañca ^2- pāraṃ gamā sāmaññena ^[3]- dve vuttā brahmaññā apare duve brahmacariyena dve vuttā vaggo tena pavuccatīti. ---------- @Footnote: ¹ Ma. Yu. kho. ² Po. viraddhaṃ aparaṃ gamā. ³ Ma. ca.