ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๘ ภาษาบาลี อักษรไทย พระวินัยปิฎกเล่มที่ ๘ วินย. ปริวาโร
     [๑๑๐๘]   กถํ   สญฺญาปนีเย   ฐาเน   สญฺญาเปติ   ฯ   อธมฺมํ
อธมฺโมติ   ทีเปนฺโต   สญฺญาปนีเย   ฐาเน   สญฺญาเปติ  ธมฺมํ  ธมฺโมติ
ทีเปนฺโต   สญฺญาปนีเย   ฐาเน   สญฺญาเปติ   ฯเปฯ  ทุฏฺฐุลฺลํ  อาปตฺตึ
ทุฏฺฐุลฺลา    อาปตฺตีติ    ทีเปนฺโต    สญฺญาปนีเย   ฐาเน   สญฺญาเปติ
อทุฏฺฐุลฺลํ    อาปตฺตึ    อทุฏฺฐุลฺลา   อาปตฺตีติ   ทีเปนฺโต   สญฺญาปนีเย
ฐาเน สญฺญาเปติ เอวํ สญฺญาปนีเย ฐาเน สญฺญาเปติ ฯ
     [๑๑๐๙]   กถํ   นิชฺฌาปนีเย   ฐาเน   นิชฺฌาเปติ   ฯ   อธมฺมํ
อธมฺโมติ   ทีเปนฺโต   นิชฺฌาปนีเย   ฐาเน   นิชฺฌาเปติ  ธมฺมํ  ธมฺโมติ
ทีเปนฺโต   นิชฺฌาปนีเย   ฐาเน   นิชฺฌาเปติ   ฯเปฯ  ทุฏฺฐุลฺลํ  อาปตฺตึ
ทุฏฺฐุลฺลา    อาปตฺตีติ    ทีเปนฺโต    นิชฺฌาปนีเย   ฐาเน   นิชฺฌาเปติ
อทุฏฺฐุลฺลํ    อาปตฺตึ    อทุฏฺฐุลฺลา   อาปตฺตีติ   ทีเปนฺโต   นิชฺฌาปนีเย
ฐาเน นิชฺฌาเปติ เอวํ นิชฺฌาปนีเย ฐาเน นิชฺฌาเปติ ฯ
     [๑๑๑๐]   กถํ  เปกฺขนีเย  ฐาเน  เปกฺขติ  ฯ  อธมฺมํ  อธมฺโมติ
ทีเปนฺโต    เปกฺขนีเย   ฐาเน   เปกฺขติ   ธมฺมํ   ธมฺโมติ   ทีเปนฺโต
เปกฺขนีเย    ฐาเน   เปกฺขติ   ฯเปฯ   ทุฏฺฐุลฺลํ   อาปตฺตึ   ทุฏฺฐุลฺลา
อาปตฺตีติ   ทีเปนฺโต   เปกฺขนีเย   ฐาเน   เปกฺขติ  อทุฏฺฐุลฺลํ  อาปตฺตึ
อทุฏฺฐุลฺลา   อาปตฺตีติ   ทีเปนฺโต   เปกฺขนีเย   ฐาเน   เปกฺขติ  เอวํ
เปกฺขนีเย ฐาเน เปกฺขติ ฯ
     [๑๑๑๑]   กถํ  ปสาทนีเย  ฐาเน  ปสาเทติ  ฯ  อธมฺมํ  อธมฺโมติ
ทีเปนฺโต   ปสาทนีเย   ฐาเน   ปสาเทติ   ธมฺมํ   ธมฺโมติ   ทีเปนฺโต
ปสาทนีเย   ฐาเน   ปสาเทติ   ฯเปฯ   ทุฏฺฐุลฺลํ   อาปตฺตึ   ทุฏฺฐุลฺลา
อาปตฺตีติ    ทีเปนฺโต    ปสาทนีเย    ฐาเน    ปสาเทติ    อทุฏฺฐุลฺลํ
อาปตฺตึ    อทุฏฺฐุลฺลา    อาปตฺตีติ    ทีเปนฺโต    ปสาทนีเย    ฐาเน
ปสาเทติ เอวํ ปสาทนีเย ฐาเน ปสาเทติ ฯ
     [๑๑๑๒]   กถํ   ลทฺธปกฺโขมฺหีติ   ปรํ   ปกฺขํ   อวชานาติ   ฯ
อิเธกจฺโจ   ลทฺธปกฺโข   โหติ   ลทฺธปริวาโร   ปกฺขวา   ญาติวา  อยํ
อลทฺธปกฺโข    อลทฺธปริวาโร    น    ปกฺขวา   น   ญาติวาติ   ตสฺส
อวชานนฺโต     อธมฺมํ     ธมฺโมติ     ทีเปติ     ธมฺมํ     อธมฺโมติ
ทีเปติ    ฯเปฯ    ทุฏฺฐุลฺลํ   อาปตฺตึ   อทุฏฺฐุลฺลา   อาปตฺตีติ   ทีเปติ
อทุฏฺฐุลฺลํ   อาปตฺตึ   ทุฏฺฐุลฺลา   อาปตฺตีติ  ทีเปติ  เอวํ  ลทฺธปกฺโขมฺหีติ
ปรํ ปกฺขํ อวชานาติ ฯ
     [๑๑๑๓]   กถํ    พหุสฺสุโตมฺหีติ    อปฺปสฺสุตํ    อวชานาติ   ฯ
อิเธกจฺโจ   พหุสฺสุโต   โหติ   สุตธโร   สุตสนฺนิจโย   อยํ  อปฺปสฺสุโต
อปฺปาคโม     อปฺปธโรติ    ตสฺส    อวชานนฺโต    อธมฺมํ    ธมฺโมติ
ทีเปติ    ธมฺมํ    อธมฺโมติ    ทีเปติ    ฯเปฯ    ทุฏฺฐุลฺลํ    อาปตฺตึ
อทุฏฺฐุลฺลา     อาปตฺตีติ    ทีเปติ    อทุฏฺฐุลฺลํ    อาปตฺตึ    ทุฏฺฐุลฺลา
อาปตฺตีติ ทีเปติ เอวํ พหุสฺสุโตมฺหีติ อปฺปสฺสุตํ อวชานาติ ฯ
     [๑๑๑๔]   กถํ  เถรตโรมฺหีติ  นวกตรํ  อวชานาติ  ฯ  อิเธกจฺโจ
เถโร    โหติ    รตฺตญฺญู    จิรปพฺพชิโต   อยํ   นวโก   อปฺปญฺญาโต
อปฺปสฺสุโต   ๑-   อปฺปกตญฺญู   อิมสฺส   วจนํ   อกตํ   ภวิสฺสตีติ  ตสฺส
อวชานนฺโต     อธมฺมํ     ธมฺโมติ     ทีเปติ     ธมฺมํ     อธมฺโมติ
@เชิงอรรถ:  ม. ยุ. อยํ ปาโฐ น ทิสฺสติ ฯ
ทีเปติ    ฯเปฯ    ทุฏฺฐุลฺลํ   อาปตฺตึ   อทุฏฺฐุลฺลา   อาปตฺตีติ   ทีเปติ
อทุฏฺฐุลฺลํ   อาปตฺตึ   ทุฏฺฐุลฺลา   อาปตฺตีติ   ทีเปติ  เอวํ  เถรตโรมฺหีติ
นวกตรํ อวชานาติ ฯ
     [๑๑๑๕]   อสมฺปตฺตํ  น  พฺยาหริตพฺพนฺติ  อโนติณฺณํ  ภาสํ  ๑-
โอตาเรตพฺพํ   ฯ   สมฺปตฺตํ   ธมฺมโต   วินยโต   น   ปริหาเปตพฺพนฺติ
ยํ   อตฺถาย   สงฺโฆ   สนฺนิปติโต   โหติ   ตํ  อตฺถํ  ธมฺมโต  วินยโต
น ปริหาเปตพฺพํ ฯ
     [๑๑๑๖]   เยน  ธมฺเมนาติ  ภูเตน  วตฺถุนา  ฯ  เยน  วินเยนาติ
โจเทตฺวา    สาเรตฺวา    ฯ   เยน   สตฺถุสาสเนนาติ   ญตฺติสมฺปทาย
อนุสฺสาวนสมฺปทาย  ฯ  เยน  ธมฺเมน  เยน  วินเยน  เยน สตฺถุสาสเนน
ตํ อธิกรณํ วูปสมฺมติ ตถา ตํ อธิกรณํ วูปสเมตพฺพนฺติ
     {๑๑๑๖.๑}   อนุวิชฺชเกน   โจทโก   ปุจฺฉิตพฺโพ   ยํ   โข  ตฺวํ
อาวุโส    อิมสฺส    ภิกฺขุโน    ปวารณํ   ฐเปสิ   กิมฺหิ   นํ   ฐเปสิ
สีลวิปตฺติยา     ฐเปสิ     อาจารวิปตฺติยา     ฐเปสิ    ทิฏฺฐิวิปตฺติยา
ฐเปสีติ   ฯ   โส   เจ   เอวํ   วเทยฺย   สีลวิปตฺติยา   วา  ฐเปมิ
อาจารวิปตฺติยา    วา    ฐเปมิ    ทิฏฺฐิวิปตฺติยา   วา   ฐเปมีติ   ฯ
โส    เอวมสฺส   วจนีโย   ชานาติ   ปนายสฺมา   สีลวิปตฺตึ   ชานาติ
อาจารวิปตฺตึ   ชานาติ   ทิฏฺฐิวิปตฺตินฺติ   ฯ   โส   เจ  เอวํ  วเทยฺย
ชานามิ   โข   อหํ  อาวุโส  สีลวิปตฺตึ  ชานามิ  อาจารวิปตฺตึ  ชานามิ
@เชิงอรรถ:  ม. ยุ. ภารํ ฯ
ทิฏฺฐิวิปตฺตินฺติ    ฯ    โส    เอวมสฺส    วจนีโย   กตมา   ปนาวุโส
สีลวิปตฺติ    กตมา    อาจารวิปตฺติ    กตมา   ทิฏฺฐิวิปตฺตีติ   ฯ   โส
เจ   เอวํ   วเทยฺย   จตฺตาริ  ปาราชิกานิ  เตรส  สงฺฆาทิเสสา  อยํ
สีลวิปตฺติ    ถุลฺลจฺจยํ    ปาจิตฺติยํ    ปาฏิเทสนียํ    ทุกฺกฏํ   ทุพฺภาสิตํ
อยํ     อาจารวิปตฺติ     มิจฺฉาทิฏฺฐิ     อนฺตคฺคาหิกา    ทิฏฺฐิ    อยํ
ทิฏฺฐิวิปตฺตีติ ฯ
     {๑๑๑๖.๒}   โส  เอวมสฺส  วจนีโย  ยํ  โข  ตฺวํ  อาวุโส อิมสฺส
ภิกฺขุโน   ปวารณํ   ฐเปสิ   ทิฏฺเฐน  ฐเปสิ  สุเตน  ฐเปสิ  ปริสงฺกาย
ฐเปสีติ  ฯ  โส  เจ  เอวํ  วเทยฺย ทิฏฺเฐน วา ฐเปมิ สุเตน วา ฐเปมิ
ปริสงฺกาย วา ฐเปมีติ ฯ
     {๑๑๑๖.๓}   โส  เอวมสฺส  วจนีโย  ยํ  โข  ตฺวํ  อาวุโส อิมสฺส
ภิกฺขุโน  ทิฏฺเฐน  ปวารณํ  ฐเปสิ  กินฺเต  ทิฏฺฐํ  กินฺติ  เต  ทิฏฺฐํ  กทา
เต  ทิฏฺฐํ  กตฺถ  เต  ทิฏฺฐํ  ปาราชิกํ  อชฺฌาปชฺชนฺโต ทิฏฺโฐ สงฺฆาทิเสสํ
อชฺฌาปชฺชนฺโต   ทิฏฺโฐ   ถุลฺลจฺจยํ   อชฺฌาปชฺชนฺโต   ทิฏฺโฐ   ปาจิตฺติยํ
อชฺฌาปชฺชนฺโต   ทิฏฺโฐ   ปาฏิเทสนียํ   อชฺฌาปชฺชนฺโต   ทิฏฺโฐ   ทุกฺกฏํ
อชฺฌาปชฺชนฺโต   ทิฏฺโฐ   ทุพฺภาสิตํ   อชฺฌาปชฺชนฺโต   ทิฏฺโฐ   กตฺถ  จ
ตฺวํ  อโหสิ  กตฺถ  จายํ  ภิกฺขุ  อโหสิ  กิญฺจ  ตฺวํ  กโรสิ  กิญฺจายํ ภิกฺขุ
กโรตีติ  ฯ  โส  เจ  เอวํ  วเทยฺย  น  โข อหํ อาวุโส อิมสฺส ภิกฺขุโน
ทิฏฺเฐน ปวารณํ ฐเปมิ อปิจ สุเตน ปวารณํ ฐเปมีติ ฯ
     {๑๑๑๖.๔}   โส     เอวมสฺส     วจนีโย     ยํ     โข
ตฺวํ      อาวุโส      อิมสฺส      ภิกฺขุโน      สุเตน      ปวารณํ
ฐเปสิ   กินฺเต   สุตํ  กินฺติ  เต  สุตํ  กทา  เต  สุตํ  กตฺถ  เต  สุตํ
ปาราชิกํ      อชฺฌาปนฺโนติ     สุตํ     สงฺฆาทิเสสํ     อชฺฌาปนฺโนติ
สุตํ     ถุลฺลจฺจยํ    อชฺฌาปนฺโนติ    สุตํ    ปาจิตฺติยํ    อชฺฌาปนฺโนติ
สุตํ     ปาฏิเทสนียํ    อชฺฌาปนฺโนติ    สุตํ    ทุกฺกฏํ    อชฺฌาปนฺโนติ
สุตํ    ทุพฺภาสิตํ    อชฺฌาปนฺโนติ    สุตํ    ภิกฺขุสฺส    สุตํ   ภิกฺขุนิยา
สุตํ    สิกฺขมานาย    สุตํ    สามเณรสฺส    สุตํ    สามเณริยา   สุตํ
อุปาสกสฺส    สุตํ    อุปาสิกาย   สุตํ   ราชูนํ   สุตํ   ราชมหามตฺตานํ
สุตํ   ติตฺถิยานํ   สุตํ   ติตฺถิยสาวกานํ   สุตนฺติ   ฯ   โส   เจ  เอวํ
วเทยฺย   น   โข   อหํ   อาวุโส   อิมสฺส   ภิกฺขุโน  สุเตน  ปวารณํ
ฐเปมิ อปิจ ปริสงฺกาย ปวารณํ ฐเปมีติ ฯ
     {๑๑๑๖.๕}   โส  เอวมสฺส  วจนีโย  ยํ  โข  ตฺวํ  อาวุโส อิมสฺส
ภิกฺขุโน   ปริสงฺกาย   ปวารณํ   ฐเปสิ   กึ  ปริสงฺกสิ  กินฺติ  ปริสงฺกสิ
กทา   ปริสงฺกสิ   กตฺถ   ปริสงฺกสิ   ปาราชิกํ  อชฺฌาปนฺโนติ  ปริสงฺกสิ
สงฺฆาทิเสสํ     อชฺฌาปนฺโนติ    ปริสงฺกสิ    ถุลฺลจฺจยํ    อชฺฌาปนฺโนติ
ปริสงฺกสิ     ปาจิตฺติยํ     อชฺฌาปนฺโนติ     ปริสงฺกสิ     ปาฏิเทสนียํ
อชฺฌาปนฺโนติ      ปริสงฺกสิ     ทุกฺกฏํ     อชฺฌาปนฺโนติ     ปริสงฺกสิ
ทุพฺภาสิตํ    อชฺฌาปนฺโนติ    ปริสงฺกสิ    ภิกฺขุสฺส    สุตฺวา   ปริสงฺกสิ
ภิกฺขุนิยา   สุตฺวา  ปริสงฺกสิ  สิกฺขมานาย  สุตฺวา  ปริสงฺกสิ  สามเณรสฺส
สุตฺวา   ปริสงฺกสิ   สามเณริยา   สุตฺวา   ปริสงฺกสิ  อุปาสกสฺส  สุตฺวา
ปริสงฺกสิ   อุปาสิกาย   สุตฺวา   ปริสงฺกสิ   ราชูนํ   สุตฺวา   ปริสงฺกสิ
ราชมหามตฺตานํ    สุตฺวา    ปริสงฺกสิ    ติตฺถิยานํ   สุตฺวา   ปริสงฺกสิ
ติตฺถิยสาวกานํ สุตฺวา ปริสงฺกสีติ ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๘ หน้าที่ ๔๑๗-๔๒๓. http://84000.org/tipitaka/pali/pali_item_s.php?book=8&item=1108&items=9&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=8&item=1108&items=9&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=8&item=1108&items=9&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=8&item=1108&items=9&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=8&i=1108              สารบัญพระไตรปิฎกเล่มที่ ๘ http://84000.org/tipitaka/read/?index_8

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :