พระไตรปิฎกเล่มที่ ๓๓ ภาษาบาลี อักษรไทย
พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                                     เตวีสติโม โกนาคมนพุทฺธวํโส
     [๒๔]   |๒๔.๑| กุกฺกุสนฺธสฺส อปเรน         สมฺพุทฺโธ ทิปทุตฺตโม
                   โกนาคมโน นาม ชิโน            โลกเชฏฺโฐ นราสโภ ฯ
       |๒๔.๒| ทสธมฺเม ปูรยิตฺวาน               กนฺตารํ สมติกฺกมิ
                   ปวาหาย ๒- มลํ สพฺพํ           ปตฺโต สมฺโพธิมุตฺตมํ ฯ
       |๒๔.๓| ธมฺมจกฺกํ ปวตฺเตนฺเต             โกนาคมเน ๓- วินายเก
                   ตึสโกฏิสหสฺสานํ                  ปฐมาภิสมโย อหุ ฯ
       |๒๔.๔| ปาฏิหีรํ กโรนฺเต จ                 ปรวาทปฺปมทฺทเน
                   วีสติโกฏิสหสฺสานํ                 ทุติยาภิสมโย อหุ ฯ
       |๒๔.๕| ตโต วิกุพฺพนํ กตฺวา                ชิโน เทวปุรํ คโต
                   วสติ ตตฺถ สมฺพุทฺโธ               สิลาย ปณฺฑุกมฺพเล ฯ
       |๒๔.๖| ปกรเณ สตฺต เทเสนฺโต           วสฺสํ วสติ โส มุนิ
                   ทสโกฏิสหสฺสานํ                   ตติยาภิสมโย อหุ ฯ
@เชิงอรรถ: ๑ ยุ. สีหนาทญฺจ ฯ ๒ ม. ยุ. ปวาหิย ฯ ๓ ม. โกนาคมนนายเก ฯ ยุ. โกนาคมเน
@นายเก ฯ
---------------------------------------------------------------------------------------------
หน้าที่ ๕๓๔.
       |๒๔.๗| ตสฺสาปิ เทวเทวสฺส                เอโก อาสิ สมาคโม
                   ขีณาสวานํ วิมลานํ               สนฺตจิตฺตาน ตาทินํ ฯ
       |๒๔.๘| ตึสภิกฺขุสหสฺสานํ                   ตทา อาสิ สมาคโม
                   โอฆานมติกฺกนฺตานํ ๑-         ภิชฺชิตานญฺจ มจฺจุยา ฯ
       |๒๔.๙| อหนฺเตน สมเยน                   ปพฺพโต นาม ขตฺติโย
                   มิตฺตามจฺเจหิ สมฺปนฺโน          พลพาหนมปฺปกํ ๒- ฯ
       |๒๔.๑๐| สมฺพุทฺธทสฺสนํ คนฺตฺวา        สุตฺวา ธมฺมมนุตฺตรํ
                     นิมนฺเตตฺวา สชินํ สงฺฆํ         ทานํ ทตฺวา ยทิจฺฉกํ ฯ
       |๒๔.๑๑| ปตฺตุณฺณํ จีนปฏญฺจ            โกเสยฺยํ กมฺพลํปิจ
                     โสวณฺณปาทุกญฺเจว           อทาสิ ๓- สตฺถุ สาวเก ฯ
       |๒๔.๑๒| โสปิ มํ มุนิ พฺยากาสิ           สงฺฆมชฺเฌ นิสีทิย
                     อิมสฺมึ ภทฺทเก กปฺเป           อยํ พุทฺโธ ภวิสฺสติ ฯ
       |๒๔.๑๓| อหุ กปิลวฺหยา รมฺมา           นิกฺขมิตฺวา ตถาคโต
                     ปธานํ ปทหิตฺวาน               กตฺวา ทุกฺกรการิกํ ฯ
       |๒๔.๑๔| อชปาลรุกฺขมูลสฺมึ               นิสีทิตฺวา ตถาคโต
                     ตตฺถ ปายาสํ ปคฺคยฺห          เนรญฺชรมุเปหิติ ฯ
       |๒๔.๑๕| เนรญฺชราย ตีรมฺหิ               ปายาสํ อทิ โส ชิโน
                     ปฏิยตฺตวรมคฺเคน                โพธิมณฺฑมฺหิ เอหิติ ฯ
       |๒๔.๑๖| ตโต ปทกฺขิณํ กตฺวา             โพธิมณฺฑํ อนุตฺตรํ
                     อสฺสตฺถรุกฺขมูลมฺหิ               พุชฺฌิสฺสติ มหายโส ฯ
@เชิงอรรถ: ๑ ยุ. อติกฺกนฺตจตุโรฆานํ ฯ ๒ ม. ยุ. อนนฺตพลวาหนํ ฯ ๓ ม. ยุ. อทาสึ ฯ
---------------------------------------------------------------------------------------------
หน้าที่ ๕๓๕.
       |๒๔.๑๗| อิมสฺส ชนิกา มาตา             มายา นาม ภวิสฺสติ
                     ปิตา สุทฺโธทโน นาม           อยํ เหสฺสติ โคตโม ฯ
       |๒๔.๑๘| อนาสวา วีตราคา                สนฺตจิตฺตา สมาหิตา
                     โกลิโต อุปติสฺโส จ              อคฺคา เหสฺสนฺติ สาวกา
                     อานนฺโท นามุปฏฺฐาโก        อุปฏฺฐิสฺสติมํ ชินํ ฯ
       |๒๔.๑๙| เขมา อุปฺปลวณฺณา จ          อคฺคา เหสฺสนฺติ สาวิกา
                     อนาสวา วีตราคา                สนฺตจิตฺตา สมาหิตา ฯ
       |๒๔.๒๐| โพธิ ตสฺส ภควโต                อสฺสตฺโถติ ปวุจฺจติ
                     จิตฺโต จ หตฺถาฬวโก            อคฺคา เหสฺสนฺตุปฏฺฐกา ฯ
       |๒๔.๒๑| นนฺทมาตา จ อุตฺตรา           อคฺคา เหสฺสนฺตุปฏฺฐิกา
                     อายุ วสฺสสตํ ตสฺส               โคตมสฺส ยสสฺสิโน ฯ
       |๒๔.๒๒| อิทํ สุตฺวาน วจนํ                 อสมสฺส มเหสิโน
                     อาโมทิตา นรมรู                 พุทฺธวีชงฺกุโร อยํ ฯ
       |๒๔.๒๓| อุกฺกุฏฺฐิสทฺทา วตฺตนฺติ         อปฺโผเฏนฺติ หสนฺติ จ
                     กตญฺชลี นมสฺสนฺติ              ทสสหสฺสี สเทวกา ฯ
       |๒๔.๒๔| ยทิมสฺส โลกนาถสฺส            วิรชฺฌิสฺสาม สาสนํ
                     อนาคตมฺหิ อทฺธาเน            เหสฺสาม สมฺมุขา อิมํ ฯ
       |๒๔.๒๕| ยถา มนุสฺสา นทึ ตรนฺตา     ปฏิติตฺถํ วิรชฺฌิย
                     เหฏฺฐาติตฺถํ คเหตฺวาน         อุตฺตรนฺติ มหานทึ ฯ
                     เอวเมว มยํ สพฺเพ               ยทิ มุญฺจามิมํ ชินํ
---------------------------------------------------------------------------------------------
หน้าที่ ๕๓๖.
                     อนาคตมฺหิ อทฺธาเน            เหสฺสาม สมฺมุขา อิมํ ฯ
       |๒๔.๒๖| ตสฺสาปิ วจนํ สุตฺวา             ภิยฺโย จิตฺตํ ปสาทยึ
                     อุตฺตรึ วตฺตมธิฏฺฐาสึ            ทสปารมิปูริยา ฯ
       |๒๔.๒๗| สพฺพญฺญุตํ คเวสนฺโต          ทานํ ทตฺวา นรุตฺตโม ๑-
                     โอหายาหํ มหารชฺชํ             ปพฺพชึ ชินสนฺติเก ฯ
       |๒๔.๒๘| นครํ โสภวตี นาม               โสโภ นามาสิ ขตฺติโย
                     วสติ ตตฺถ นคเร                  สมฺพุทฺธสฺส มหากุลํ ฯ
       |๒๔.๒๙| พฺราหฺมโณ ยญฺญทตฺโต จ    อาสิ พุทฺธสฺส โส ปิตา
                     อุตฺตรา นาม ชนิกา             โกนาคมนสฺส สตฺถุโน ฯ
       |๒๔.๓๐| ตีณิ วสฺสสหสฺสานิ              อคารํ อชฺฌาวสิ โส
                     ตุสิตสนฺตุสิตสนฺตุฏฺฐา         ตโย ปาสาทมุตฺตมา ฯ
       |๒๔.๓๑| อนูนโสฬสสหสฺสานิ            นาริโย สมลงฺกตา
                     รุจิคตฺตา นาม นารี              สตฺถวาโห นาม อตฺรโช ฯ
       |๒๔.๓๒| นิมิตฺเต จตุโร ทิสฺวา            หตฺถิยาเนน นิกฺขมิ
                     ฉมาสํ ปธานจารํ                อจริ ปุริสุตฺตโม ฯ
       |๒๔.๓๓| พฺรหฺมุนา ยาจิโต สนฺโต      โกนาคมโน ๒- โลกนายโก
                     วตฺตจกฺโก มหาวีโร             มิคทาเย นรุตฺตโม ฯ
       |๒๔.๓๔| ภิยฺโยโส ๓- อุตฺตโร นาม    อเหสุํ อคฺคสาวกา
                     โสตฺถิโช นามุปฏฺฐาโก           โกนาคมนสฺส ยสสฺสิโน ๔- ฯ
@เชิงอรรถ: ๑ ม. ยุ. นรุตฺตเม ฯ ๒ ม. โกนาคมนนายโก ฯ ๓ ม. ภิยฺยโส ฯ ๔ ม. ยุ.
@สตฺถุโน ฯ
---------------------------------------------------------------------------------------------
หน้าที่ ๕๓๗.
       |๒๔.๓๕| สมุทฺทา อุตฺตรา เจว           อเหสุํ อคฺคสาวิกา
                     โพธิ ตสฺส ภควโต               อุทุมฺพโรติ วุจฺจติ ฯ
       |๒๔.๓๖| อุคฺโค จ โสมเทโว จ            อเหสุํ อคฺคุปฏฺฐกา
                     สีวลา เจว สามา จ             อเหสุํ อคฺคุปฏฺฐิกา ฯ
       |๒๔.๓๗| อุจฺจตฺตเนน โส พุทฺโธ         ตึสหตฺถสมุคฺคโต
                     อุกฺกามุเข ยถา ตมฺพํ ๑-     เอวํ รํสีหิ มณฺฑิโต ฯ
       |๒๔.๓๘| ตึสวสฺสสหสฺสานิ               อายุ พุทฺธสฺส ตาวเท
                     ตาวตา ติฏฺฐมาโน โส         ตาเรสิ ชนตํ พหุํ ฯ
       |๒๔.๓๙| ธมฺมเจติยํ ๒- สมุสฺสิตฺวา    ธมฺมทุสฺสวิภูสิตํ
                     ธมฺมปุปฺผคุฬํ กตฺวา           นิพฺพุโต โส สสาวโก ฯ
       |๒๔.๔๐| มหาวิลาโส ตสฺส ชโน        สิริธมฺมปฺปกาสโน
                     สพฺพํ สมนฺตรหิตํ               นนุ ริตฺตา สพฺพสงฺขาราติ ฯ
       |๒๔.๔๑| โกนาคมโน สมฺพุทฺโธ        ปพฺพตารามมฺหิ นิพฺพุโต
                     ธาตุวิตฺถาริกํ อาสิ             เตสุ เตสุ ปเทสโตติ ฯ
                                    โกนาคมนพุทฺธวํโส เตวีสติโม ฯ
                                       จตุวีสติโม กสฺสปพุทฺธวํโส
     [๒๕]   |๒๕.๑| โกนาคมนสฺส อปเรน      สมฺพุทฺโธ ทิปทุตฺตโม
                    กสฺสโป นาม นาเมน ๓-   ธมฺมราชา ปภงฺกโร ฯ
@เชิงอรรถ: ๑ ม. ยุ. กมฺพุ ฯ ๒ ม. ธมฺมเจตึ สมุสฺเสตฺวา ฯ ๓ ม. โคตฺเตน ฯ
---------------------------------------------------------------------------------------------
หน้าที่ ๕๓๘.
                   ส ๑- ฉฑฺฑิตํ กุลมูลํ              พหูนํ ๒- ปาณปูชิตํ
       |๒๕.๒| ทตฺวาน ทายเก ทานํ              ปูรยิตฺวาน มานสํ
                   อุสโภวาฬกํ ๓- เภตฺวา           ปตฺโต สมฺโพธิมุตฺตมํ ฯ
       |๒๕.๓| ธมฺมจกฺกํ ปวตฺเตนฺเต             กสฺสเป โลกนายเก
                   วีสติโกฏิสหสฺสานํ                ปฐมาภิสมโย อหุ ฯ
       |๒๕.๔| จตุมาสํ ยทา พุทฺโธ               โลเก จรติ จาริกํ
                   ทสโกฏิสหสฺสานํ                  ทุติยาภิสมโย อหุ ฯ
       |๒๕.๕| ยมกํ วิกุพฺพนํ กตฺวา              ญาณธาตุํ ปกิตฺตยิ
                   ปญฺจโกฏิสหสฺสานํ               ตติยาภิสมโย อหุ ฯ
       |๒๕.๖| สุธมฺมเทวปุเร ๔- รมฺเม          ตตฺถ ธมฺมํ ปกิตฺตยิ ๕-
                   ตีณิ โกฏิสหสฺสานิ                เทวานํ โพธยี ชิโน ฯ
       |๒๕.๗| นรเทวสฺส ยกฺขสฺส                 อปเร จ ธมฺมเทสเน
                   เอเตสานํ อภิสมโย ๖-           คณนาโต อสงฺขิโย ๗- ฯ
       |๒๕.๘| ตสฺสาปิ เทวเทวสฺส                เอโก อาสิ สมาคโม
                   ขีณาสวานํ วิมลานํ               สนฺตจิตฺตาน ตาทินํ ฯ
       |๒๕.๙| วีสติภิกฺขุสหสฺสานํ                 ตทา อาสิ สมาคโม
                   อภิกฺกนฺตภวนฺตานํ ๘-          หิริสีเลน ตาทินํ ฯ
       |๒๕.๑๐| อหํ ตทา มาณวโก              โชติปาโลติ วิสฺสุโต
                     อชฺฌายิโก มนฺตธโร            ติณฺณํ เวทาน ปารคู ฯ
@เชิงอรรถ: ๑ ม. ยุ. สญฺฉฑฺฑิตํ ฯ ๒ ม. พหฺวนฺนปานโภชนํ ฯ ๓ ม. ยุ. อุสโภว อาฬกํ ฯ
@๔ ม. สุธมฺมา... ฯ ๕ ยุ. ปกาสยิ ฯ ๖-๗ ม. ยุ. อภิสมยา ... อสงฺขิยา ฯ ๘ ม.
@อติกฺกนฺตภวนฺตานํ ฯ
---------------------------------------------------------------------------------------------
หน้าที่ ๕๓๙.
       |๒๕.๑๑| ลกฺขเณ อิติหาเส จ              สทฺธมฺเม ปารมึ คโต
                     ภุมฺมนฺตลิกฺเข ๑- กุสโล       กตวิชฺโช อนามโย ฯ
       |๒๕.๑๒| กสฺสปสฺส ภควโต                ฆฏิกาโร นามุปฏฺฐโก
                     สคารโว สปฺปติสฺโส             นิพฺพุโต ตติเย ผเล ฯ
       |๒๕.๑๓| อาทาย มํ ฆฏิกาโร             อุปคญฺฉิ กสฺสปํ ชินํ
                     ตสฺส ธมฺมํ สุณิตฺวาน           ปพฺพชึ ตสฺส สนฺติเก ฯ
       |๒๕.๑๔| อารทฺธวิริโย หุตฺวา              วตฺตาวตฺเตสุ โกวิโท
                     น กฺวจิ ปริหายามิ               ปูเรมิ ๒- ชินสาสนํ ฯ
       |๒๕.๑๕| ยาวตา พุทฺธภณิตํ              นวงฺคสตฺถุสาสนํ
                     สพฺพํ ปริยาปุณิตฺวาน          โสภยึ ชินสาสนํ ฯ
       |๒๕.๑๖| มม อจฺฉริยํ ทิสฺวา               โสปิ พุทฺโธ วิยากริ
                     อิมมฺหิ ภทฺทเก กปฺเป          อยํ พุทฺโธ ภวิสฺสติ ฯ
       |๒๕.๑๗| อหุ กปิลวฺหยา รมฺมา          นิกฺขมิตฺวา ตถาคโต
                     ปธานํ ปทหิตฺวาน               กตฺวา ทุกฺกรการิกํ ฯ
       |๒๕.๑๘| อชปาลรุกฺขมูลมฺหิ              นิสีทิตฺวา ตถาคโต
                     ตตฺถ ปายาสํ สมาทาย ๓-    เนรญฺชรมุเปหิติ ฯ
       |๒๕.๑๙| เนรญฺชราย ตีรมฺหิ              ปายาสํ ปริภุญฺชิย
                     ปฏิยตฺตวรมคฺเคน               โพธิมูลมฺหิ ๔- เอหิติ ฯ
       |๒๕.๒๐| ตโต ปทกฺขิณํ กตฺวา            โพธิมณฺฑํ อนุตฺตรํ ๕-
                     อสฺสตฺถมูเล สมฺโพธึ            พุชฺฌิสฺสติ มหายโส ฯ
@เชิงอรรถ: ๑ ม. ยุ. ภูมนฺต... ฯ ๒ ม. ปูเรสึ ฯ ๓ ม. ยุ. ปคฺคยฺห ฯ ๔ ม. ยุ.
@โพธิมูลมุเปหิติ ฯ ๕ ม. ยุ. อนุตฺตโร ฯ
---------------------------------------------------------------------------------------------
หน้าที่ ๕๔๐.
       |๒๕.๒๑| อิมสฺส ชนิกา มาตา             มายา นาม ภวิสฺสติ
                     ปิตา สุทฺโธทโน นาม           อยํ เหสฺสติ โคตโม ฯ
       |๒๕.๒๒| โกลิโต อุปติสฺโส จ              อคฺคา เหสฺสนฺติ สาวกา
                     อนาสวา วีตราคา                สนฺตจิตฺตา สมาหิตา
                     อานนฺโท นามุปฏฺฐาโก        อุปฏฺฐิสฺสติมํ ชินํ ฯ
       |๒๕.๒๓| เขมา อุปฺปลวณฺณา จ          อคฺคา เหสฺสนฺติ สาวิกา
                     อนาสวา วีตราคา                สนฺตจิตฺตา สมาหิตา ฯ
       |๒๕.๒๔| โพธิ ตสฺส ภควโต               อสฺสตฺโถติ ปวุจฺจติ
                     จิตฺโต จ หตฺถาฬวโก            อคฺคา เหสฺสนฺตุปฏฺฐกา ฯ
       |๒๕.๒๕| นนฺทมาตา จ อุตฺตรา           อคฺคา เหสฺสนฺตุปฏฺฐิกา
                     อายุ วสฺสสตํ ตสฺส               โคตมสฺส ยสสฺสิโน ฯ
       |๒๕.๒๖| อิทํ สุตฺวาน วจนํ                 อสมสฺส มเหสิโน
                     อาโมทิตา นรมรู                 พุทฺธวีชงฺกุโร อยํ ๑- ฯ
       |๒๕.๒๗| อุกฺกุฏฺฐิสทฺทา วตฺตนฺติ ๒-    อปฺโผเฏนฺติ หสนฺติ จ
                     กตญฺชลี นมสฺสนฺติ              ทสสหสฺสี สเทวกา ฯ
       |๒๕.๒๘| ยทิมสฺส โลกนาถสฺส           วิรชฺฌิสฺสาม สาสนํ
                     อนาคตมฺหิ อทฺธาเน            เหสฺสาม สมฺมุขา อิมํ ฯ
       |๒๕.๒๙| ยถา มนุสฺสา นทึ ตรนฺตา     ปฏิติตฺถํ วิรชฺฌิย
                     เหฏฺฐาติตฺถํ คเหตฺวาน          อุตฺตรนฺติ มหานทึ ฯ
@เชิงอรรถ: ๑ ม. ยุ. พุทฺธวีชํ กิร อยํ ฯ ๒ ม. ยุ. ปวตฺตนฺติ ฯ
---------------------------------------------------------------------------------------------
หน้าที่ ๕๔๑.
       |๒๕.๓๐| เอวเมว มยํ สพฺเพ               ยทิ มุญฺจามิมํ ชินํ
                     อนาคตมฺหิ อทฺธาเน            เหสฺสาม สมฺมุขา อิมํ ฯ
       |๒๕.๓๑| ตสฺสาปิ วจนํ สุตฺวา             ภิยฺโย จิตฺตํ ปสาทยึ
                     อุตฺตรึ วตฺตมธิฏฺฐาสึ            ทสปารมิปูริยา ฯ
       |๒๕.๓๒| เอวมหํ สํสริตฺวา                 ปริวชฺเชนฺโต อนาจรํ
                     ทุกฺกรํ ปกตํ ๑- มยฺหํ           โพธิยาเยว การณา ฯ
       |๒๕.๓๓| นครํ พาราณสี นาม            กิกี นามาสิ ขตฺติโย
                     วสติ ตตฺถ นคเร                  สมฺพุทฺธสฺส มหากุลํ ฯ
       |๒๕.๓๔| พฺราหฺมโณ พฺรหฺมทตฺโต จ   อาสิ พุทฺธสฺส โส ปิตา
                     มาตา ๒- ธนวตี นาม          กสฺสปสฺส มเหสิโน ฯ
       |๒๕.๓๕| ทุเว วสฺสสหสฺสานิ              อคารํ อชฺฌาวสิ โส
                     หํโส ยโส สิริจนฺโท ๓-         ตโย ปาสาทมุตฺตมา ฯ
       |๒๕.๓๖| ติโสฬสสหสฺสานิ                นาริโย สมลงฺกตา
                     สุนนฺทา นาม สา นารี         วิชิตเสโน นาม อตฺรโช ฯ
       |๒๕.๓๗| นิมิตฺเต จตุโร ทิสฺวา            ปาสาเทนาภินิกฺขมิ
                     สตฺตาหํ ปธานจารํ              อจริ ปุริสุตฺตโม ฯ
       |๒๕.๓๘| พฺรหฺมุนา ยาจิโต สนฺโต      กสฺสโป โลกนายโก
                     วตฺตจกฺโก มหาวีโร              มิคทาเย นรุตฺตโม ฯ
       |๒๕.๓๙| ติสฺโส จ ภารทฺวาโช จ          อเหสุํ อคฺคสาวกา
                     สพฺพมิตฺโต นามุปฏฺฐาโก     กสฺสปสฺส มเหสิโน ฯ
@เชิงอรรถ: ๑ ม. ยุ. จ กตํ ฯ ๒ ม. ยุ. ชนิกา ฯ ๓ ม. ยุ. สิรินนฺโท ฯ
---------------------------------------------------------------------------------------------
หน้าที่ ๕๔๒.
       |๒๕.๔๐| อนุลา จ อุรุเวลา จ             อเหสุํ อคฺคสาวิกา
                     โพธิ ตสฺส ภควโต                นิโคฺรโธติ ปวุจฺจติ ฯ
       |๒๕.๔๑| สุมงฺคโล ฆฏิกาโร จ            อเหสุํ อคฺคุปฏฺฐกา
                     วิชิตเสนา จ ภทฺทา จ           อเหสุํ อคฺคุปฏฺฐิกา ฯ
       |๒๕.๔๒| อุจฺจตฺตเนน โส พุทฺโธ          วีสติรตนมุคฺคโต ๑-
                     วิชฺชุลฏฺฐิว อากาเส             จนฺโทว คหปูริโต ฯ
       |๒๕.๔๓| วีสติวสฺสสหสฺสานิ              อายุ ตสฺส มเหสิโน
                     ตาวตา ติฏฺฐมาโน โส          ตาเรสิ ชนตํ พหุํ ฯ
       |๒๕.๔๔| ธมฺมตฬากํ มาปยิตฺวา ๒-    สีลํ ทตฺวา วิเลปนํ
                     ธมฺมทุสฺสํ นิวาเสตฺวา           ธมฺมมาลํ วิภชฺชิย ๓- ฯ
       |๒๕.๔๕| ธมฺมวิมลมาทาสํ                ฐปยิตฺวา มหาชเน
                     เกจิ นิพฺพานํ ปตฺเถนฺตา       ปสฺสนฺตุ เม อลงฺกรํ ฯ
       |๒๕.๔๖| สีลกญฺจุกํ ทตฺวาน              ฌานกวจจมฺมิกํ ๔-
                     ธมฺมจมฺมํ ปารุปิตฺวา           ทตฺวา สนฺนาหมุตฺตมํ ฯ
       |๒๕.๔๗| สติผลกํ ทตฺวาน                 ติขิณญาณกุนฺติมํ
                     ธมฺมขคฺควรํ ทตฺวา              สีลสตฺตุปฺปมทฺทนํ ๕- ฯ
       |๒๕.๔๘| เตวิชฺชาภูสํ ๖- ทตฺวาน        อาเวฬํ จตุโร ผเล
                     ฉฬภิญฺญาภรณํ ทตฺวา        ธมฺมปุปฺผปิลนฺธนํ ฯ
       |๒๕.๔๙| สทฺธมฺมปณฺฑรจฺฉตฺตํ          ทตฺวา ปาปนิวารณํ
                     มาปยิตฺวา อภยํ ปุปฺผํ          นิพฺพุโต โส สสาวโก ฯ
@เชิงอรรถ: ๑ ม. วีสติรตนุคฺคโต ฯ ๒ ยุ. มาเปตฺวา ฯ ๓ ยุ. วิราชิย ฯ ๔ ม. ...วมฺมิตํ ฯ
@ยุ. ... วมฺมิกํ ฯ ๕ ม. ยุ. สีลสํสคฺคมทฺทนํ ฯ ๖ ม. เตวิชฺชาภูสนํ ทตฺวาน ฯ
---------------------------------------------------------------------------------------------
หน้าที่ ๕๔๓.
       |๒๕.๕๐| เอโส หิ สมฺมาสมฺพุทฺโธ       อปฺปเมยฺโย ทุราสโท
                     เอโส หิ ธมฺมรตโน              สฺวากฺขาโต เอหิปสฺสิโก ฯ
       |๒๕.๕๑| เอโส หิ สงฺฆรตโน              สุปฏิปนฺโน อนุตฺตโร
                     สพฺพํ สมนฺตรหิตํ                นนุ ริตฺตา สพฺพสงฺขาราติ ฯ
       |๒๕.๕๒| มหากสฺสโป ชิโน สตฺถา      เสตพฺยารามมฺหิ นิพฺพุโต
                     ตตฺเถว ตสฺส ชินถูโป           โยชนุพฺเพธมุคฺคโตติ ฯ
                                      กสฺสปพุทฺธวํโส จตุวีสติโม ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๕๓๓-๕๔๓.
http://84000.org/tipitaka/pali/pali_item_s.php?book=33&item=204&items=2&pagebreak=1&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pali/pali_item_s.php?book=33&item=204&items=2&pagebreak=1&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=33&item=204&items=2&pagebreak=1&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=33&item=204&items=2&pagebreak=1&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=33&i=204
             The Pali Atthakatha in Thai :-
http://84000.org/tipitaka/atthapali/read_th.php?B=51&A=8225
             The Pali Atthakatha in Roman :-
http://84000.org/tipitaka/atthapali/read_rm.php?B=51&A=8225
             สารบัญพระไตรปิฎกเล่มที่ ๓๓
http://84000.org/tipitaka/read/?index_33