ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒ ภาษาบาลี อักษรไทย พระวินัยปิฎกเล่มที่ ๒ วินย. มหาวิภงฺโค (๒)
                               ตติยสิกฺขาปทํ
     [๒๕๕]   เตน  สมเยน  พุทฺโธ  ภควา  สาวตฺถิยํ  วิหรติ เชตวเน
อนาถปิณฺฑิกสฺส   อาราเม   ฯ   เตน   โข   ปน  สมเยน  ฉพฺพคฺคิยา
ภิกฺขู      ภิกฺขูนํ     ภณฺฑนชาตานํ     กลหชาตานํ     วิวาทาปนฺนานํ
เปสุญฺญํ    อุปสํหรนฺติ    อิมสฺส   สุตฺวา   อมุสฺส   อกฺขายนฺติ   อิมสฺส
เภทาย   อมุสฺส    สุตฺวา   อิมสฺส   อกฺขายนฺติ  อมุสฺส  เภทาย  เตน
อนุปฺปนฺนานิ     เจว     ภณฺฑนานิ     อุปฺปชฺชนฺติ    อุปฺปนฺนานิ    จ
ภณฺฑนานิ   ภิยฺโยภาวาย   เวปุลฺลาย   สํวตฺตนฺติ   ฯ   เย  เต  ภิกฺขู
อปฺปิจฺฉา   ฯเปฯ   เต   อุชฺฌายนฺติ    ขียนฺติ   วิปาเจนฺติ   กถํ   หิ
นาม     ฉพฺพคฺคิยา    ภิกฺขู    ภิกฺขูนํ    ภณฺฑนชาตานํ    กลหชาตานํ
วิวาทาปนฺนานํ    เปสุญฺญํ    อุปสํหริสฺสนฺติ    อิมสฺส    สุตฺวา   อมุสฺส
อกฺขายิสฺสนฺติ   อิมสฺส   เภทาย   อมุสฺส   สุตฺวา  อิมสฺส  อกฺขายิสฺสนฺติ
อมุสฺส    เภทาย   เตน   อนุปฺปนฺนานิ   เจว   ภณฺฑนานิ   อุปฺปชฺชนฺติ
อุปฺปนฺนานิ จ ภณฺฑนานิ ภิยฺโยภาวาย เวปุลฺลาย สํวตฺตนฺตีติ ฯ
     {๒๕๕.๑}   อถโข  เต  ภิกฺขู  ภควโต  เอตมตฺถํ อาโรเจสุํ ฯเปฯ
สจฺจํ    กิร    ตุเมฺห   ภิกฺขเว   ภิกฺขูนํ   ภณฺฑนชาตานํ   กลหชาตานํ
วิวาทาปนฺนานํ     เปสุญฺญํ     อุปสํหรถ    อิมสฺส    สุตฺวา    อมุสฺส
อกฺขายถ    อิมสฺส    เภทาย    อมุสฺส    สุตฺวา   อิมสฺส   อกฺขายถ
อมุสฺส    เภทาย   เตน   อนุปฺปนฺนานิ   เจว   ภณฺฑนานิ   อุปฺปชฺชนฺติ
อุปฺปนฺนานิ   จ   ภณฺฑนานิ   ภิยฺโยภาวาย   เวปุลฺลาย   สํวตฺตนฺตีติ  ฯ
สจฺจํ  ภควาติ  ฯ  วิครหิ  พุทฺโธ  ภควา  กถํ  หิ นาม ตุเมฺห โมฆปุริสา
ภิกฺขูนํ     ภณฺฑนชาตานํ     กลหชาตานํ     วิวาทาปนฺนานํ    เปสุญฺญํ
อุปสํหริสฺสถ   อิมสฺส   สุตฺวา   อมุสฺส   อกฺขายิสฺสถ   อิมสฺส   เภทาย
อมุสฺส    สุตฺวา    อิมสฺส    อกฺขายิสฺสถ    อมุสฺส    เภทาย   เตน
อนุปฺปนฺนานิ     เจว     ภณฺฑนานิ     อุปฺปชฺชนฺติ    อุปฺปนฺนานิ    จ
ภณฺฑนานิ    ภิยฺโยภาวาย    เวปุลฺลาย   สํวตฺตนฺติ   เนตํ   โมฆปุริสา
อปฺปสนฺนานํ   วา   ปสาทาย   ฯเปฯ   เอวญฺจ   ปน   ภิกฺขเว   อิมํ
สิกฺขาปทํ อุทฺทิเสยฺยาถ
     {๒๕๕.๒}   ภิกฺขุเปสุญฺเญ ปาจิตฺติยนฺติ ฯ
     [๒๕๖]   เปสุญฺญํ  นาม  ทฺวีหากาเรหิ  เปสุญฺญํ  โหติ  ปิยกมฺยสฺส
วา   เภทาธิปฺปายสฺส   วา   ฯ   ทสหิ  อากาเรหิ  เปสุญฺญํ  อุปสํหรติ
ชาติโตปิ    นามโตปิ   โคตฺตโตปิ   กมฺมโตปิ   สิปฺปโตปิ   อาพาธโตปิ
ลิงฺคโตปิ   กิเลสโตปิ   อาปตฺติโตปิ  อกฺโกสโตปิ  ฯ  ชาติ  นาม  เทฺว
ชาติโย   หีนา   จ   ชาติ  อุกฺกฏฺฐา  จ  ชาติ  ฯ  หีนา  นาม  ชาติ
จณฺฑาลชาติ     เวณชาติ     เนสาทชาติ    รถการชาติ    ปุกฺกุสชาติ
เอสา   หีนา   นาม   ชาติ   ฯ   อุกฺกฏฺฐา   นาม  ชาติ  ขตฺติยชาติ
พฺราหฺมณชาติ    เอสา    อุกฺกฏฺฐา   นาม   ชาติ   ฯเปฯ   อกฺโกโส
นาม   เทฺว  อกฺโกสา  หีโน  จ  อกฺโกโส  อุกฺกฏฺโฐ  จ  อกฺโกโส  ฯ
หีโน    นาม    อกฺโกโส   โอฏฺโฐสิ   เมณฺโฑสิ   โคโณสิ   คทฺรโภสิ
ติรจฺฉานคโตสิ    เนรยิโกสิ   นตฺถิ   ตุยฺหํ   สุคติ   ทุคฺคติเยว   ตุยฺหํ
ปาฏิกงฺขาติ    ยกาเรน   วา   ภกาเรน   วา   กาฏโกฏจิกาย   วา
เอโส   หีโน  นาม  อกฺโกโส  ฯ  อุกฺกฏฺโฐ  นาม  อกฺโกโส  ปณฺฑิโตสิ
พฺยตฺโตสิ   เมธาวีสิ   พหุสฺสุโตสิ   ธมฺมกถิโกสิ   นตฺถิ   ตุยฺหํ   ทุคฺคติ
สุคติเยว ตุยฺหํ ปาฏิกงฺขาติ เอโส อุกฺกฏฺโฐ นาม อกฺโกโส ฯ
     [๒๕๗]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ    อุปสํหรติ   อิตฺถนฺนาโม   ตํ   จณฺฑาโล   เวโณ   เนสาโท
รถกาโร ปุกฺกุโสติ ภณตีติ อาปตฺติ วาจาย วาจาย ปาจิตฺติยสฺส ฯ
     [๒๕๘]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ   อุปสํหรติ   อิตฺถนฺนาโม   ตํ   ขตฺติโย   พฺราหฺมโณติ   ภณตีติ
อาปตฺติ วาจาย วาจาย ปาจิตฺติยสฺส ฯ
     [๒๕๙]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ     อุปสํหรติ    อิตฺถนฺนาโม    ตํ    อวกณฺณโก    ชวกณฺณโก
ธนิฏฺฐโก     สวิฏฺฐโก    กุลวฑฺฒโกติ    ภณตีติ    อาปตฺติ    วาจาย
วาจาย ปาจิตฺติยสฺส ฯ
     [๒๖๐]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ    อุปสํหรติ    อิตฺถนฺนาโม    ตํ    พุทฺธรกฺขิโต   ธมฺมรกฺขิโต
สงฺฆรกฺขิโตติ ภณตีติ อาปตฺติ วาจาย วาจาย ปาจิตฺติยสฺส ฯ
     [๒๖๑]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ   อุปสํหรติ   อิตฺถนฺนาโม   ตํ   โกสิโย   ภารทฺวาโชติ  ภณตีติ
อาปตฺติ วาจาย วาจาย ปาจิตฺติยสฺส ฯ
     [๒๖๒]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ     อุปสํหรติ    อิตฺถนฺนาโม    ตํ    โคตโม    โมคฺคลฺลาโน
กจฺจายโน     วาเสฏฺโฐติ    ภณตีติ    อาปตฺติ    วาจาย    วาจาย
ปาจิตฺติยสฺส ฯ
     [๒๖๓]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ    อุปสํหรติ    อิตฺถนฺนาโม    ตํ    โกฏฺฐโก    ปุปฺผฉฑฺฑโกติ
ภณตีติ อาปตฺติ วาจาย วาจาย ปาจิตฺติยสฺส ฯ
     [๒๖๔]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ    อุปสํหรติ   อิตฺถนฺนาโม   ตํ   กสโก   วาณิโช   โครกฺโขติ
ภณตีติ อาปตฺติ วาจาย วาจาย ปาจิตฺติยสฺส ฯ
     [๒๖๕]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ     อุปสํหรติ     อิตฺถนฺนาโม    ตํ    นฬกาโร    กุมฺภกาโร
เปสกาโร    จมฺมกาโร    นหาปิโตติ    ภณตีติ    อาปตฺติ    วาจาย
วาจาย ปาจิตฺติยสฺส ฯ
     [๒๖๖]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ    อุปสํหรติ    อิตฺถนฺนาโม   ตํ   มุทฺธิโก   คณโก   เลขโกติ
ภณตีติ อาปตฺติ วาจาย วาจาย ปาจิตฺติยสฺส ฯ
     [๒๖๗]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ    อุปสํหรติ   อิตฺถนฺนาโม   ตํ   กุฏฺฐิโก   คณฺฑิโก   กิลาสิโก
โสสิโก อปมาริโกติ ภณตีติ อาปตฺติ วาจาย วาจาย ปาจิตฺติยสฺส ฯ
     [๒๖๘]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ     อุปสํหรติ     อิตฺถนฺนาโม     ตํ    มธุเมหิโกติ    ภณตีติ
อาปตฺติ วาจาย วาจาย ปาจิตฺติยสฺส ฯ
     [๒๖๙]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ   อุปสํหรติ   อิตฺถนฺนาโม   ตํ   อติทีโฆ   อติรสฺโส   อติกโณฺห
อจฺโจทาโตติ ภณตีติ อาปตฺติ วาจาย วาจาย ปาจิตฺติยสฺส ฯ
     [๒๗๐]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ     อุปสํหรติ     อิตฺถนฺนาโม    ตํ    นาติทีโฆ    นาติรสฺโส
นาติกโณฺห    นาจฺโจทาโตติ    ภณตีติ    อาปตฺติ    วาจาย   วาจาย
ปาจิตฺติยสฺส ฯ
     [๒๗๑]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ   อุปสํหรติ   อิตฺถนฺนาโม   ตํ   ราคปริยุฏฺฐิโต   โทสปริยุฏฺฐิโต
โมหปริยุฏฺฐิโตติ ภณตีติ อาปตฺติ วาจาย วาจาย ปาจิตฺติยสฺส ฯ
     [๒๗๒]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ     อุปสํหรติ     อิตฺถนฺนาโม     ตํ    วีตราโค    วีตโทโส
วีตโมโหติ ภณตีติ อาปตฺติ วาจาย วาจาย ปาจิตฺติยสฺส ฯ
     [๒๗๓]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ     อุปสํหรติ    อิตฺถนฺนาโม    ตํ    ปาราชิกํ    อชฺฌาปนฺโน
สงฺฆาทิเสสํ     อชฺฌาปนฺโน     ถุลฺลจฺจยํ     อชฺฌาปนฺโน    ปาจิตฺติยํ
อชฺฌาปนฺโน     ปาฏิเทสนียํ     อชฺฌาปนฺโน     ทุกฺกฏํ    อชฺฌาปนฺโน
ทุพฺภาสิตํ     อชฺฌาปนฺโนติ    ภณตีติ    อาปตฺติ    วาจาย    วาจาย
ปาจิตฺติยสฺส ฯ
     [๒๗๔]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ   อุปสํหรติ   อิตฺถนฺนาโม   ตํ   โสตาปนฺโนติ   ภณตีติ  อาปตฺติ
วาจาย วาจาย ปาจิตฺติยสฺส ฯ
     [๒๗๕]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ   อุปสํหรติ   อิตฺถนฺนาโม  ตํ  โอฏฺโฐ  เมณฺโฑ  โคโณ  คทฺรโภ
ติรจฺฉานคโต    เนรยิโก    นตฺถิ    ตสฺส   สุคติ   ทุคฺคติเยว   ตสฺส
ปาฏิกงฺขาติ ภณตีติ อาปตฺติ วาจาย วาจาย ปาจิตฺติยสฺส ฯ
     [๒๗๖]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ    อุปสํหรติ    อิตฺถนฺนาโม   ตํ   ปณฺฑิโต   พฺยตฺโต   เมธาวี
พหุสฺสุโต    ธมฺมกถิโก    นตฺถิ    ตสฺส    ทุคฺคติ    สุคติเยว   ตสฺส
ปาฏิกงฺขาติ ภณตีติ อาปตฺติ วาจาย วาจาย ปาจิตฺติยสฺส ฯ
     [๒๗๗]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ    อุปสํหรติ    อิตฺถนฺนาโม    สนฺติ    อิเธกจฺเจ    จณฺฑาลา
เวณา   เนสาทา   รถการา   ปุกฺกุสาติ   ภณติ   น  โส  อญฺญํ  ภณติ
ตญฺเญว ภณตีติ อาปตฺติ วาจาย วาจาย ทุกฺกฏสฺส ฯ
     [๒๗๘]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ     อุปสํหรติ    อิตฺถนฺนาโม    สนฺติ    อิเธกจฺเจ    ขตฺติยา
พฺราหฺมณาติ    ภณติ    น    โส    อญฺญํ    ภณติ   ตญฺเญว   ภณตีติ
อาปตฺติ วาจาย วาจาย ทุกฺกฏสฺส ฯเปฯ
     [๒๗๙]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ     อุปสํหรติ    อิตฺถนฺนาโม    สนฺติ    อิเธกจฺเจ    ปณฺฑิตา
พฺยตฺตา    เมธาวิโน    พหุสฺสุตา   ธมฺมกถิกา   นตฺถิ   เตสํ   ทุคฺคติ
สุคติเยว   เตสํ   ปาฏิกงฺขาติ   ภณติ   น   โส  อญฺญํ  ภณติ  ตญฺเญว
ภณตีติ อาปตฺติ วาจาย วาจาย ทุกฺกฏสฺส ฯ
     [๒๘๐]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ    อุปสํหรติ    อิตฺถนฺนาโม    เย    นูน   จณฺฑาลา   เวณา
เนสาทา   รถการา   ปุกฺกุสาติ   ภณติ   น  โส  อญฺญํ  ภณติ  ตญฺเญว
ภณตีติ   อาปตฺติ   วาจาย   วาจาย   ทุกฺกฏสฺส   ฯเปฯ   อุปสมฺปนฺโน
อุปสมฺปนฺนสฺส      สุตฺวา      อุปสมฺปนฺนสฺส     เปสุญฺญํ     อุปสํหรติ
อิตฺถนฺนาโม    เย    นูน   ปณฺฑิตา   พฺยตฺตา   เมธาวิโน   พหุสฺสุตา
ธมฺมกถิกา    นตฺถิ    เตสํ    ทุคฺคติ   สุคติเยว   เตสํ   ปาฏิกงฺขาติ
ภณติ   น   โส   อญฺญํ   ภณติ   ตญฺเญว   ภณตีติ   อาปตฺติ   วาจาย
วาจาย ทุกฺกฏสฺส ฯ
     [๒๘๑]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ    อุปสํหรติ    อิตฺถนฺนาโม    น    มยํ    จณฺฑาลา   เวณา
เนสาทา   รถการา   ปุกฺกุสาติ   ภณติ   น  โส  อญฺญํ  ภณติ  ตญฺเญว
ภณตีติ   อาปตฺติ   วาจาย   วาจาย   ทุกฺกฏสฺส   ฯเปฯ   อุปสมฺปนฺโน
อุปสมฺปนฺนสฺส          สุตฺวา         อุปสมฺปนฺนสฺส         เปสุญฺญํ
อุปสํหรติ    อิตฺถนฺนาโม    น    มยํ   ปณฺฑิตา   พฺยตฺตา   เมธาวิโน
พหุสฺสุตา    ธมฺมกถิกา   นตฺถิ   อมฺหากํ   ทุคฺคติ   สุคติเยว   อมฺหากํ
ปาฏิกงฺขาติ    ภณติ    น    โส    อญฺญํ    ภณติ   ตญฺเญว   ภณตีติ
อาปตฺติ วาจาย วาจาย ทุกฺกฏสฺส ฯ
     [๒๘๒]   อุปสมฺปนฺโน    อุปสมฺปนฺนสฺส    สุตฺวา   อุปสมฺปนฺนสฺส
เปสุญฺญํ    อุปสํหรติ    อาปตฺติ   วาจาย   วาจาย   ปาจิตฺติยสฺส   ฯ
อุปสมฺปนฺโน     อุปสมฺปนฺนสฺส     สุตฺวา     อนุปสมฺปนฺนสฺส    เปสุญฺญํ
อุปสํหรติ    อาปตฺติ    ทุกฺกฏสฺส    ฯ    อุปสมฺปนฺโน   อนุปสมฺปนฺนสฺส
สุตฺวา    อุปสมฺปนฺนสฺส   เปสุญฺญํ   อุปสํหรติ   อาปตฺติ   ทุกฺกฏสฺส   ฯ
อุปสมฺปนฺโน     อนุปสมฺปนฺนสฺส     สุตฺวา    อนุปสมฺปนฺนสฺส    เปสุญฺญํ
อุปสํหรติ อาปตฺติ ทุกฺกฏสฺส ฯ
     [๒๘๓]   อนาปตฺติ   นปิยกมฺยสฺส   นเภทาธิปฺปายสฺส  อุมฺมตฺตกสฺส
อาทิกมฺมิกสฺสาติ ฯ
                           ตติยสิกฺขาปทํ นิฏฺฐิตํ ฯ
                                    -------



             เนื้อความพระไตรปิฎกฉบับภาษาบาลีอักษรไทย เล่มที่ ๒ หน้าที่ ๑๘๓-๑๙๐. http://84000.org/tipitaka/pali/pali_item_s.php?book=2&item=255&items=29&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=2&item=255&items=29&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=2&item=255&items=29&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=2&item=255&items=29&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=2&i=255              The Pali Atthakatha in Thai :- http://84000.org/tipitaka/atthapali/read_th.php?B=2&A=6092              The Pali Atthakatha in Roman :- http://84000.org/tipitaka/atthapali/read_rm.php?B=2&A=6092              สารบัญพระไตรปิฎกเล่มที่ ๒ http://84000.org/tipitaka/read/?index_2

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :