ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๙ ภาษาบาลี อักษรไทย พระสุตตันตปิฎกเล่มที่ ๑๑ สุตฺต. สํ. มหาวารวคฺโค
     [๕๗๓]   เอกํ   สมยํ  ภควา  โกลิเยสุ  วิหรติ  หลิทฺทวสนนฺนาม
โกลิยานํ    นิคโม    ฯ   อถ   โข   สมฺพหุลา   ภิกฺขู   ปุพฺพณฺหสมยํ
นิวาเสตฺวา    ปตฺตจีวรมาทาย    หลิทฺทวสนํ    ปิณฺฑาย   ปาวิสึสุ   ฯ
อถ   โข   เตสํ   ภิกฺขูนํ  เอตทโหสิ  อติปฺปโค  โข  ตาว  หลิทฺทวสนํ
ปิณฺฑาย    จริตุํ    ยนฺนูน   มยํ   เยน   อญฺญติตฺถิยานํ   ปริพฺพาชกานํ
อาราโม เตนุปสงฺกเมยฺยามาติ ฯ
     [๕๗๔]   อถ  โข  เต  ภิกฺขู  เยน  อญฺญติตฺถิยานํ  ปริพฺพาชกานํ
อาราโม     เตนุปสงฺกมึสุ     อุปสงฺกมิตฺวา     เตหิ    อญฺญติตฺถิเยหิ
ปริพฺพาชเกหิ   สทฺธึ  สมฺโมทึสุ  สมฺโมทนียํ  กถํ  สาราณียํ  วีติสาเรตฺวา
เอกมนฺตํ  นิสีทึสุ  ฯ  เอกมนฺตํ  นิสินฺเน โข เต ภิกฺขู เต ๑- อญฺญติตฺถิยา
ปริพฺพาชกา เอตทโวจุํ ฯ
     [๕๗๕]   สมโณ  อาวุโส  โคตโม  สาวกานํ  เอวํ  ธมฺมํ  เทเสติ
เอถ   ตุเมฺห   ภิกฺขเว   ปญฺจ   นีวรเณ  ปหาย  เจตโส  อุปกฺกิเลเส
ปญฺญาย     ทุพฺพลีกรเณ    เมตฺตาสหคเตน    เจตสา    เอกํ    ทิสํ
ผริตฺวา  วิหรถ  ตถา  ทุติยํ  ฯ  ตถา  ตติยํ  ฯ  ตถา  จตุตฺถํ  ฯ  อิติ
อุทฺธมโธ   ติริยํ  สพฺพธิ  สพฺพตฺตตาย  สพฺพาวนฺตํ  โลกํ  เมตฺตาสหคเตน
เจตสา   วิปุเลน   มหคฺคเตน   อปฺปมาเณน   อเวเรน   อพฺยาปชฺเฌน
ผริตฺวา วิหรถ ฯ
     [๕๗๖]   กรุณาสหคเตน  เจตสา  เอกํ  ทิสํ  ผริตฺวา  วิหรถ ตถา
ทุติยํ  ฯ  ตถา  ตติยํ  ฯ  ตถา  จตุตฺถํ  ฯ  อิติ  อุทฺธมโธ  ติริยํ สพฺพธิ
@เชิงอรรถ:  ม อยํ ปาโฐ นตฺถิ ฯ
สพฺพตฺตตาย    สพฺพาวนฺตํ    โลกํ   กรุณาสหคเตน   เจตสา   วิปุเลน
มหคฺคเตน อปฺปมาเณน อเวเรน อพฺยาปชฺเฌน ผริตฺวา วิหรถ ฯ
     [๕๗๗]   มุทิตาสหคเตน  เจตสา  เอกํ  ทิสํ  ผริตฺวา  วิหรถ ตถา
ทุติยํ  ฯ  ตถา  ตติยํ  ฯ  ตถา  จตุตฺถํ  ฯ  อิติ  อุทฺธมโธ  ติริยํ สพฺพธิ
สพฺพตฺตตาย    สพฺพาวนฺตํ    โลกํ   มุทิตาสหคเตน   เจตสา   วิปุเลน
มหคฺคเตน อปฺปมาเณน อเวเรน อพฺยาปชฺเฌน ผริตฺวา วิหรถ ฯ
     [๕๗๘]   อุเปกฺขาสหคเตน  เจตสา  เอกํ  ทิสํ ผริตฺวา วิหรถ ตถา
ทุติยํ  ฯ  ตถา  ตติยํ  ฯ  ตถา  จตุตฺถํ  ฯ  อิติ  อุทฺธมโธ  ติริยํ สพฺพธิ
สพฺพตฺตตาย   สพฺพาวนฺตํ   โลกํ   อุเปกฺขาสหคเตน   เจตสา   วิปุเลน
มหคฺคเตน อปฺปมาเณน อเวเรน อพฺยาปชฺเฌน ผริตฺวา วิหรถาติ ฯ
     [๕๗๙]   มยมฺปิ  โข  อาวุโส  สาวกานํ  เอวํ  ธมฺมํ เทเสม เอถ
ตุเมฺห   อาวุโส   ปญฺจ  นีวรเณ  ปหาย  เจตโส  อุปกฺกิเลเส  ปญฺญาย
ทุพฺพลีกรเณ เมตฺตาสหคเตน เจตสา เอกํ ทิสํ ผริตฺวา วิหรถ ฯเปฯ
     [๕๘๐]   อุเปกฺขาสหคเตน  เจตสา  เอกํ  ทิสํ ผริตฺวา วิหรถ ตถา
ทุติยํ  ฯ  ตถา  ตติยํ  ฯ  ตถา  จตุตฺถํ  ฯ  อิติ  อุทฺธมโธ  ติริยํ สพฺพธิ
สพฺพตฺตตาย   สพฺพาวนฺตํ   โลกํ   อุเปกฺขาสหคเตน   เจตสา   วิปุเลน
มหคฺคเตน อปฺปมาเณน อเวเรน อพฺยาปชฺเฌน ผริตฺวา วิหรถาติ ฯ
     [๕๘๑]   อิธ  โน อาวุโส โก วิเสโส โก อธิปฺปายโส กินฺนานากรณํ
สมณสฺส    วา    โคตมสฺส    อมฺหากํ    วา    ยทิทํ   ธมฺมเทสนาย
วา ธมฺมเทสนํ อนุสาสนิยา วา อนุสาสนนฺติ ฯ
     [๕๘๒]   อถ  โข  เต  ภิกฺขู  เตสํ  อญฺญติตฺถิยานํ  ปริพฺพาชกานํ
ภาสิตํ      เนว      อภินนฺทึสุ      นปฺปฏิกฺโกสึสุ      อนภินนฺทิตฺวา
อปฺปฏิกฺโกสิตฺวา     อุฏฺฐายาสนา     ปกฺกมึสุ     ภควโต     สนฺติเก
เอตสฺส ภาสิตสฺส อตฺถํ อาชานิสฺสามาติ ฯ
     [๕๘๓]   อถ  โข  เต ภิกฺขู หลิทฺทวสเน ปิณฺฑาย จริตฺวา ปจฺฉาภตฺตํ
ปิณฺฑปาตปฏิกฺกนฺตา     เยน    ภควา    เตนุปสงฺกมึสุ    อุปสงฺกมิตฺวา
ภควนฺตํ    อภิวาเทตฺวา   เอกมนฺตํ  นิสีทึสุ  ฯ  เอกมนฺตํ  นิสินฺนา  โข
เต ภิกฺขู ภควนฺตํ เอตทโวจุํ ฯ
     [๕๘๔]   อิธ  มยํ  ภนฺเต  ปุพฺพณฺหสมยํ นิวาเสตฺวา ปตฺตจีวรมาทาย
หลิทฺทวสนํ   ๑-   ปิณฺฑาย   ปวิสิมฺห   ฯ   เตสํ  โน  ภนฺเต  อมฺหากํ
เอตทโหสิ    อติปฺปโค    โข    ตาว    หลิทฺทวสนํ   ปิณฺฑาย   จริตุํ
ยนฺนูน     มยํ     เยน    อญฺญติตฺถิยานํ    ปริพฺพาชกานํ    อาราโม
เตนุปสงฺกเมยฺยามาติ ฯ
     [๕๘๕]   อถ  โข  มยํ  ภนฺเต  เยน  อญฺญติตฺถิยานํ  ปริพฺพาชกานํ
อาราโม     เตนุปสงฺกมิมฺห     อุปสงฺกมิตฺวา    เตหิ    อญฺญติตฺถิเยหิ
ปริพฺพาชเกหิ     สทฺธึ    สมฺโมทิมฺห    สมฺโมทนียํ    กถํ    สาราณียํ
วีติสาเรตฺวา    เอกมนฺตํ    นิสีทิมฺห    ฯ   เอกมนฺตํ   นิสินฺเน   โข
อเมฺห ภนฺเต เต อญฺญติตฺถิยา ปริพฺพาชกา เอตทโวจุํ ฯ
     [๕๘๖]   สมโณ  อาวุโส  โคตโม  สาวกานํ  เอวํ  ธมฺมํ  เทเสติ
@เชิงอรรถ:  ม. ยุ. หลิทฺทวสเน ฯ เอวมุปริ ฯ
เอถ   ตุเมฺห   ภิกฺขเว   ปญฺจ   นีวรเณ  ปหาย  เจตโส  อุปกฺกิเลเส
ปญฺญาย     ทุพฺพลีกรเณ    เมตฺตาสหคเตน    เจตสา    เอกํ    ทิสํ
ผริตฺวา วิหรถ ฯเปฯ
     [๕๘๗]   กรุณาสหคเตน เจตสา ฯ
     [๕๘๘]   มุทิตาสหคเตน เจตสา ฯ
     [๕๘๙]   อุเปกฺขาสหคเตน   เจตสา  เอกํ  ทิสํ  ผริตฺวา  วิหรถ
ตถา  ทุติยํ  ฯ  ตถา  ตติยํ  ฯ  ตถา  จตุตฺถํ  ฯ  อิติ  อุทฺธมโธ  ติริยํ
สพฺพธิ      สพฺพตฺตตาย     สพฺพาวนฺตํ     โลกํ     อุเปกฺขาสหคเตน
เจตสา   วิปุเลน   มหคฺคเตน   อปฺปมาเณน   อเวเรน   อพฺยาปชฺเฌน
ผริตฺวา วิหรถาติ ฯ
     [๕๙๐]   มยมฺปิ   โข   อาวุโส  สาวกานํ  เอวํ  ธมฺมํ  เทเสม
เอถ   ตุเมฺห   อาวุโส   ปญฺจ   นีวรเณ  ปหาย  เจตโส  อุปกฺกิเลเส
ปญฺญาย     ทุพฺพลีกรเณ    เมตฺตาสหคเตน    เจตสา    เอกํ    ทิสํ
ผริตฺวา วิหรถ ฯเปฯ
     [๕๙๑]   กรุณาสหคเตน เจตสา ฯ
     [๕๙๒]   มุทิตาสหคเตน เจตสา ฯ
     [๕๙๓]   อุเปกฺขาสหคเตน   เจตสา  เอกํ  ทิสํ  ผริตฺวา  วิหรถ
ตถา   ทุติยา   ฯ   ตถา   ตติยํ  ฯ  ตถา  จตุตฺถํ  ฯ  อิติ  อุทฺธมโธ
ติริยํ    สพฺพธิ    สพฺพตฺตตาย    สพฺพาวนฺตํ   โลกํ   อุเปกฺขาสหคเตน
เจตสา   วิปุเลน   มหคฺคเตน   อปฺปมาเณน   อเวเรน   อพฺยาปชฺเฌน
ผริตฺวา วิหรถาติ ฯ
     [๕๙๔]   อิธ  โน อาวุโส โก วิเสโส โก อธิปฺปายโส กินฺนานากรณํ
สมณสฺส   วา   โคตมสฺส   อมฺหากํ   วา   ยทิทํ   ธมฺมเทสนาย   วา
ธมฺมเทสนํ อนุสาสนิยา วา อนุสาสนนฺติ ฯ
     [๕๙๕]   อถ  โข  มยํ  ภนฺเต  เตสํ  อญฺญติตฺถิยานํ  ปริพฺพาชกานํ
ภาสิตํ      เนว      อภินนฺทิมฺห     นปฺปฏิกฺโกสิมฺห     อนภินนฺทิตฺวา
อปฺปฏิกฺโกสิตฺวา     อุฏฺฐายาสนา     ปกฺกมิมฺห     ภควโต    สนฺติเก
เอตสฺส ภาสิตสฺส อตฺถํ อาชานิสฺสามาติ ฯ
     [๕๙๖]   เอวํวาทิโน  ภิกฺขเว  อญฺญติตฺถิยา  ปริพฺพาชกา  เอวมสฺสุ
วจนียา   กถํ   ภาวิตา  ปนาวุโส  เมตฺตา  เจโตวิมุตฺติ  กึคติกา  โหติ
กิมฺปรมา   กิมฺผลา   กิมฺปริโยสานา  ฯ  กถํ  ภาวิตา  ปนาวุโส  กรุณา
เจโตวิมุตฺติ   กึคติกา   โหติ   กิมฺปรมา   กิมฺผลา   กิมฺปริโยสานา  ฯ
กถํ   ภาวิตา   ปนาวุโส  มุทิตา  เจโตวิมุตฺติ  กึคติกา  โหติ  กิมฺปรมา
กิมฺผลา    กิมฺปริโยสานา    ฯ   กถํ   ภาวิตา   ปนาวุโส   อุเปกฺขา
เจโตวิมุตฺติ   กึคติกา   โหติ   กิมฺปรมา   กิมฺผลา  กิมฺปริโยสานาติ  ฯ
เอวํ  ปุฏฺฐา  ภิกฺขเว  อญฺญติตฺถิยา  ปริพฺพาชกา  น  เจว  สมฺปายิสฺสนฺติ
อุตฺตริญฺจ  วิฆาตํ  อาปชฺชิสฺสนฺติ  ฯ  ตํ  กิสฺส  เหตุ  ฯ  ยถา ตํ ภิกฺขเว
อวิสยสฺมึ   ฯ   นาหนฺตํ   ภิกฺขเว  ปสฺสามิ  สเทวเก  โลเก  สมารเก
สพฺรหฺมเก   สสฺสมณพฺราหฺมณิยา   ปชาย   สเทวมนุสฺสาย   โย   อิเมสํ
ปญฺหานํ   เวยฺยากรเณน   จิตฺตํ   อาราเธยฺย  อญฺญตฺร  ตถาคเตน  วา
ตถาคตสาวเกน วา อิโต วา ปน สุตฺวา ฯ
     [๕๙๗]   กถํ  ภาวิตา  จ  ภิกฺขเว  เมตฺตา  เจโตวิมุตฺติ  กึคติกา
โหติ   กิมฺปรมา   กิมฺผลา   กิมฺปริโยสานา   ฯ   อิธ   ภิกฺขเว  ภิกฺขุ
เมตฺตาสหคตํ     สติสมฺโพชฺฌงฺคํ     ภาเวติ    ฯเปฯ    เมตฺตาสหคตํ
อุเปกฺขาสมฺโพชฺฌงฺคํ   ภาเวติ   วิเวกนิสฺสิตํ   วิราคนิสฺสิตํ   นิโรธนิสฺสิตํ
โวสฺสคฺคปริณามึ   ฯ   โส   สเจ   อากงฺขติ   อปฺปฏิกูเล   ปฏิกูลสญฺญี
วิหเรยฺยนฺติ    ปฏิกูลสญฺญี   ตตฺถ   วิหรติ   สเจ   อากงฺขติ   ปฏิกูเล
อปฺปฏิกูลสญฺญี    วิหเรยฺยนฺติ    อปฺปฏิกูลสญฺญี    ตตฺถ    วิหรติ   สเจ
อากงฺขติ    อปฺปฏิกูเล    จ   ปฏิกูเล   จ   ปฏิกูลสญฺญี   วิหเรยฺยนฺติ
ปฏิกูลสญฺญี   ตตฺถ   วิหรติ   สเจ   อากงฺขติ   ปฏิกูเล  จ  อปฺปฏิกูเล
จ     อปฺปฏิกูลสญฺญี    วิหเรยฺยนฺติ    อปฺปฏิกูลสญฺญี    ตตฺถ    วิหรติ
สเจ    อากงฺขติ    อปฺปฏิกูลญฺจ    ปฏิกูลญฺจ   ตทุภยํ   อภินิวชฺเชตฺวา
อุเปกฺขโก  วิหเรยฺยํ  สโต  สมฺปชาโนติ  อุเปกฺขโก  [๑]-  ตตฺถ วิหรติ
สโต   สมฺปชาโน   สุภํ  วา  โข  ปน  วิโมกฺขํ  อุปสมฺปชฺช  วิหรติ  ฯ
สุภปรมาหํ   ภิกฺขเว   เมตฺตาเจโตวิมุตฺตึ   วทามิ   ฯ   อิธ   ปญฺญสฺส
ภิกฺขุโน อุตฺตริวิมุตฺตึ อปฺปฏิวิชฺฌโต ฯ
     [๕๙๘]   กถํ  ภาวิตา  จ  ภิกฺขเว กรุณา เจโตวิมุตฺติ กึคติกา โหติ
กิมฺปรมา   กิมฺผลา  กิมฺปริโยสานา  ฯ  อิธ  ภิกฺขเว  ภิกฺขุ  กรุณาสหคตํ
สติสมฺโพชฺฌงฺคํ    ภาเวติ    ฯเปฯ   กรุณาสหคตํ   อุเปกฺขาสมฺโพชฺฌงฺคํ
ภาเวติ   วิเวกนิสฺสิตํ   วิราคนิสฺสิตํ   นิโรธนิสฺสิตํ   โวสฺสคฺคปริณามึ  ฯ
@เชิงอรรถ:  ม. จ ฯ
โส     สเจ     อากงฺขติ    อปฺปฏิกูเล    ปฏิกูลสญฺญี    วิหเรยฺยนฺติ
ปฏิกูลสญฺญี    ตตฺถ    วิหรติ   ฯเปฯ   สเจ   อากงฺขติ   อปฺปฏิกูลญฺจ
ปฏิกูลญฺจ    ตทุภยํ    อภินิวชฺเชตฺวา    อุเปกฺขโก    วิหเรยฺยํ   สโต
สมฺปชาโนติ   อุเปกฺขโก   ตตฺถ   วิหรติ   สโต   สมฺปชาโน   สพฺพโส
วา     ปน     รูปสญฺญานํ    สมติกฺกมา    ปฏิฆสญฺญานํ    อตฺถงฺคมา
นานตฺตสญฺญานํ   อมนสิการา   อนนฺโต   อากาโสติ   อากาสานญฺจายตนํ
อุปสมฺปชฺช     วิหรติ     ฯ     อากาสานญฺจายตนปรมาหํ     ภิกฺขเว
กรุณาเจโตวิมุตฺตึ   วทามิ   ฯ   อิธ   ปญฺญสฺส   ภิกฺขุโน   อุตฺตริวิมุตฺตึ
อปฺปฏิวิชฺฌโต ฯ
     [๕๙๙]   กถํ   ภาวิตา   จ  ภิกฺขเว  มุทิตาเจโตวิมุตฺติ  กึคติกา
โหติ   กิมฺปรมา   กิมฺผลา   กิมฺปริโยสานา   ฯ   อิธ   ภิกฺขเว  ภิกฺขุ
มุทิตาสหคตํ     สติสมฺโพชฺฌงฺคํ     ภาเวติ     ฯเปฯ     มุทิตาสหคตํ
อุเปกฺขาสมฺโพชฺฌงฺคํ   ภาเวติ   วิเวกนิสฺสิตํ   วิราคนิสฺสิตํ   นิโรธนิสฺสิตํ
โวสฺสคฺคปริณามึ   ฯ   โส   สเจ   อากงฺขติ   อปฺปฏิกูเล   ปฏิกูลสญฺญี
วิหเรยฺยนฺติ    ปฏิกูลสญฺญี    ตตฺถ   วิหรติ   ฯเปฯ   สเจ   อากงฺขติ
อปฺปฏิกูลญฺจ     ปฏิกูลญฺจ     ตทุภยํ     อภินิวชฺเชตฺวา     อุเปกฺขโก
วิหเรยฺยํ  สโต  สมฺปชาโนติ  อุเปกฺขโก  ตตฺถ  วิหรติ  สโต  สมฺปชาโน
สพฺพโส     วา     ปน    อากาสานญฺจายตนํ    สมติกฺกมฺม    อนนฺตํ
วิญฺญาณนฺติ       วิญฺญาณญฺจายตนํ      อุปสมฺปชฺช      วิหรติ      ฯ
วิญฺญาณญฺจายตนปรมาหํ           ภิกฺขเว           มุทิตาเจโตวิมุตฺตึ
วทามิ ฯ อิธ ปญฺญสฺส ภิกฺขุโน อุตฺตริวิมุตฺตึ อปฺปฏิวิชฺฌโต ฯ
     [๖๐๐]   กถํ  ภาวิตา  จ  ภิกฺขเว  อุเปกฺขาเจโตวิมุตฺติ  กึคติกา
โหติ   กิมฺปรมา   กิมฺผลา   กิมฺปริโยสานา   ฯ   อิธ   ภิกฺขเว  ภิกฺขุ
อุเปกฺขาสหคตํ    สติสมฺโพชฺฌงฺคํ    ภาเวติ    ฯเปฯ    อุเปกฺขาสหคตํ
อุเปกฺขาสมฺโพชฺฌงฺคํ   ภาเวติ   วิเวกนิสฺสิตํ   วิราคนิสฺสิตํ   นิโรธนิสฺสิตํ
โวสฺสคฺคปริณามึ   ฯ   โส   สเจ   อากงฺขติ   อปฺปฏิกูเล   ปฏิกูลสญฺญี
วิหเรยฺยนฺติ    ปฏิกูลสญฺญี   ตตฺถ   วิหรติ   สเจ   อากงฺขติ   ปฏิกูเล
อปฺปฏิกูลสญฺญี    วิหเรยฺยนฺติ    อปฺปฏิกูลสญฺญี    ตตฺถ    วิหรติ   สเจ
อากงฺขติ    อปฺปฏิกูเล    จ   ปฏิกูเล   จ   ปฏิกูลสญฺญี   วิหเรยฺยนฺติ
ปฏิกูลสญฺญี   ตตฺถ   วิหรติ  สเจ  อากงฺขติ  ปฏิกูเล  จ  อปฺปฏิกูเล  จ
อปฺปฏิกูลสญฺญี    วิหเรยฺยนฺติ    อปฺปฏิกูลสญฺญ    ตตฺถ    วิหรติ   สเจ
อากงฺขติ   อปฺปฏิกูลญฺจ   ปฏิกูลญฺจ   ตทุภยํ   อภินิวชฺเชตฺวา  อุเปกฺขโก
วิหเรยฺยํ  สโต  สมฺปชาโนติ  อุเปกฺขโก  ตตฺถ  วิหรติ  สโต  สมฺปชาโน
สพฺพโส    วา    ปน    วิญฺญาณญฺจายตนํ   สมติกฺกมฺม   นตฺถิ   กิญฺจีติ
อากิญฺจญฺญายตนํ    อุปสมฺปชฺช    วิหรติ    ฯ    อากิญฺจญฺญายตนปรมาหํ
ภิกฺขเว    อุเปกฺขาเจโตวิมุตฺตึ   วทามิ   ฯ   อิธ   ปญฺญสฺส   ภิกฺขุโน
อุตฺตริวิมุตฺตึ อปฺปฏิวิชฺฌโตติ ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๑๙ หน้าที่ ๑๕๙-๑๖๖. http://84000.org/tipitaka/pali/pali_item_s.php?book=19&item=573&items=28&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=19&item=573&items=28&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=19&item=573&items=28&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=19&item=573&items=28&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=19&i=573              The Pali Atthakatha in Thai :- http://84000.org/tipitaka/atthapali/read_th.php?B=13&A=5239              The Pali Atthakatha in Roman :- http://84000.org/tipitaka/atthapali/read_rm.php?B=13&A=5239              สารบัญพระไตรปิฎกเล่มที่ ๑๙ http://84000.org/tipitaka/read/?index_19

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :