ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๗ ภาษาบาลี อักษรไทย พระสุตตันตปิฎกเล่มที่ ๙ สุตฺต. สํ. ขนฺธวารวคฺโค
     [๒๑๕]   เอกํ  สมยํ  ภควา  ราชคเห  วิหรติ  เวฬุวเน  กลนฺทก-
นิวาเป  ฯ  เตน  โข  ปน  สมเยน  อายสฺมา วกฺกลิ กุมฺภการนิเวสเน
วิหรติ   อาพาธิโก   ทุกฺขิโต   พาฬฺหคิลาโน   ฯ   อถ  โข  อายสฺมา
วกฺกลิ   อุปฏฺฐาเก   อามนฺเตสิ   เอถ   ตุเมฺห  อาวุโส  เยน  ภควา
เตนุปสงฺกมถ   อุปสงฺกมิตฺวา   มม   วจเนน   ภควโต   ปาเท  สิรสา
วนฺทถ    วกฺกลิ   ภนฺเต   ภิกฺขุ   อาพาธิโก   ทุกฺขิโต   พาฬฺหคิลาโน
โส    ภควโต    ปาเท   สิรสา   วนฺทตีติ   เอวญฺจ   วเทถ   สาธุ
กิร   ภนฺเต   ภควา   เยน   วกฺกลิ   ภิกฺขุ   เตนุปสงฺกมตุ   อนุกมฺปํ
อุปาทายาติ   ฯ   เอวมาวุโสติ   โข  เต  ภิกฺขู  อายสฺมโต  วกฺกลิสฺส
ปฏิสฺสุตฺวา    เยน    ภควา    เตนุปสงฺกมึสุ    อุปสงฺกมิตฺวา   ฯเปฯ
ภควนฺตํ    เอตทโวจุํ    วกฺกลิ   ภนฺเต   ภิกฺขุ   อาพาธิโก   ทุกฺขิโต
พาฬฺหคิลาโน   โส   ภควโต   ปาเท   สิรสา   วนฺทติ   เอวญฺจ  ปน
วเทติ   สาธุ   กิร   ภนฺเต  ภควา  เยน  วกฺกลิ  ภิกฺขุ  เตนุปสงฺกมตุ
อนุกมฺปํ อุปาทายาติ ฯ อธิวาเสสิ ภควา ตุณฺหีภาเวน ฯ
     [๒๑๖]   อถ  โข  ภควา  นิวาเสตฺวา  ปตฺตจีวรมาทาย เยนายสฺมา
วกฺกลิ   เตนุปสงฺกมิ   ฯ   อทฺทสา   โข   อายสฺมา   วกฺกลิ  ภควนฺตํ
ทูรโตว   อาคจฺฉนฺตํ   ทิสฺวาน   มญฺจเก   สมญฺโจปิ  ๑-  ฯ  อถ  โข
ภควา   อายสฺมนฺตํ   วกฺกลึ  เอตทโวจ  อลํ  วกฺกลิ  มา  ตฺวํ  มญฺจเก
สมญฺโจปิ       สนฺตีมานิ      อาสนานิ      ปญฺญตฺตานิ      ตตฺถาหํ
นิสีทิสฺสามีติ   ฯ   นิสีทิ   ภควา   ปญฺญตฺเต   อาสเน  ฯ  นิสชฺช  โข
ภควา   อายสฺมนฺตํ  วกฺกลึ  เอตทโวจ  กจฺจิ  เต  วกฺกลิ  ขมนียํ  กจฺจิ
ยาปนียํ   กจฺจิ   ทุกฺขา   เวทนา   ปฏิกฺกมนฺติ   โน   อภิกฺกมนฺติ   ฯ
ปฏิกฺกโม สานํ ปญฺญายติ โน อภิกฺกโมติ ฯ
     {๒๑๖.๑}   น  เม  ภนฺเต  ขมนียํ  น  ยาปนียํ พาฬฺหา เม ทุกฺขา
เวทนา   อภิกฺกมนฺติ   โน   ปฏิกฺกมนฺติ  อภิกฺกโม  สานํ  ปญฺญายติ  โน
ปฏิกฺกโมติ  ฯ  กจฺจิ  เต  วกฺกลิ น กิญฺจิ กุกฺกุจฺจํ น โกจิ วิปฺปฏิสาโรติ ฯ
ตคฺฆ  เม  ภนฺเต  อนปฺปกํ  กุกฺกุจฺจํ  อนปฺปโก  [๒]-  วิปฺปฏิสาโรติ  ฯ
กจฺจิ  ปน  ตํ  วกฺกลิ  อตฺตา  สีลโต  น  อุปวทตีติ  ฯ  น โข มํ ภนฺเต
อตฺตา  สีลโต  อุปวทตีติ  ฯ  โน  เจ กิร ตํ วกฺกลิ อตฺตา สีลโต อุปวทติ
อถ   กิญฺจิ  เต  กุกฺกุจฺจํ  โก  จ  วิปฺปฏิสาโรติ  ฯ  จิรปฏิกาหํ  ภนฺเต
ภควนฺตํ   ทสฺสนาย  อุปสงฺกมิตุกาโม  นตฺถิ  จ  เม  กายสฺมึ   ตาวติกา
พลมตฺตา ยาวตาหํ ๓- ภควนฺตํ ทสฺสนาย อุปสงฺกเมยฺยนฺติ ฯ
     {๒๑๖.๒}   อลํ วกฺกลิ กึ เต อิมินา ปูติกาเยน ทิฏฺเฐน ฯ
@เชิงอรรถ:  ม. ยุ. สมโธสิ ฯ   ยุ. จสทฺโท ทิสฺสติ ฯ   โป. ยาหํ ฯ ยุ. ยายาหํ ฯ
     {๒๑๖.๓}   โย  โข  วกฺกลิ  ธมฺมํ  ปสฺสติ  โส  มํ  ปสฺสติ โย มํ
ปสฺสติ  โส  ธมฺมํ  ปสฺสติ  ฯ  ธมฺมํ  หิ  วกฺกลิ  ปสฺสนฺโต  มํ  ปสฺสติ มํ
ปสฺสนฺโต   ธมฺมํ   ปสฺสติ   ฯ   ตํ   กึ  มญฺญสิ  วกฺกลิ  ฯ  รูปํ  นิจฺจํ
วา   อนิจฺจํ  วาติ  ฯ  อนิจฺจํ  ภนฺเต  ฯ  ยํ  ปนานิจฺจํ  ทุกฺขํ  วา  ตํ
สุขํ   วาติ   ฯ   ทุกฺขํ   ภนฺเต  ฯ  ยํ  ปนานิจฺจํ  ทุกฺขํ  วิปริณามธมฺมํ
กลฺลํ  นุ  ตํ  สมนุปสฺสิตุํ  เอตํ  มม  เอโสหมสฺมิ  เอโส  เม อตฺตาติ ฯ
โน   เหตํ   ภนฺเต  ฯ  เวทนา  ฯ  สญฺญา  ฯ  สงฺขารา  ฯ  วิญฺญาณํ
นิจฺจํ  วา  อนิจฺจํ  วาติ  ฯ  อนิจฺจํ  ภนฺเต  ฯเปฯ เอโส เม อตฺตาติ ฯ
โน   เหตํ  ภนฺเต  ฯ  ตสฺมา  ติห  ฯเปฯ  เอวํ  ปสฺสํ  ฯเปฯ  นาปรํ
อิตฺถตฺตายาติ   ปชานาตีติ   ฯ   อถ   โข   ภควา  อายสฺมนฺตํ  วกฺกลึ
อิมินา    โอวาเทน    โอวทิตฺวา    อุฏฺฐายาสนา    เยน   คิชฺฌกูโฏ
ปพฺพโต เตน ปกฺกมิ ๑- ฯ
     [๒๑๗]   อถ   โข   อายสฺมา   วกฺกลิ   อจิรปกฺกนฺตสฺส  ภควโต
อุปฏฺฐาเก   อามนฺเตสิ   เอถ  มํ  อาวุโส  มญฺจกํ  อาโรเปตฺวา  เยน
อิสิคิลิปสฺสํ   ๒-   กาฬสิลา   เตนุปสงฺกมถ   กถํ   หิ   นาม  มาทิโส
อนฺตรฆเร   กาลํ   กตฺตพฺพํ   มญฺเญยฺยาติ   ฯ  เอวมาวุโสติ  โข  เต
ภิกฺขู   อายสฺมโต   วกฺกลิสฺส   ปฏิสฺสุตฺวา   อายสฺมนฺตํ   วกฺกลึ  มญฺจกํ
อาโรเปตฺวา   เยน   อิสิคิลิปสฺสํ  กาฬสิลา  เตนุปสงฺกมึสุ  ฯ  อถ  โข
ภควา   ตญฺจ   รตฺตึ  ตญฺจ  ทิวสาวเสสํ  คิชฺฌกูเฏ  ปพฺพเต  วิหาสิ  ฯ
@เชิงอรรถ:  ม. เตนุปสงฺกมิ ฯ   ยุ. อิสิคิลิปสฺสกาลสิลา ฯ
อถ   โข   เทฺว   เทวตาโย   อภิกฺกนฺตาย   รตฺติยา   อภิกฺกนฺตวณฺณา
เกวลกปฺปํ   คิชฺฌกูฏํ   โอภาเสตฺวา  เยน  ภควา  เตนุปสงฺกมึสุ  ฯเปฯ
เอกมนฺตํ   อฏฺฐํสุ   ฯ   เอกมนฺตํ  ฐิตา  โข  เอกา  เทวตา  ภควนฺตํ
เอตทโวจ   วกฺกลิ   ภนฺเต   ภิกฺขุ   วิโมกฺขาย   เจเตตีติ  ฯ  อปรา
เทวตา   ภควนฺตํ   เอตทโวจ   โส   หิ   นูน  โส  ภนฺเต  สุวิมุตฺโต
วิมุจฺจิสฺสตีติ   ฯ   อิทมโวจุํ   ตา   เทวตาโย   อิทํ   วตฺวา  ภควนฺตํ
อภิวาเทตฺวา ปทกฺขิณํ กตฺวา ตตฺเถวนฺตรธายึสุ ฯ
     [๒๑๘]   อถ  โข  ภควา  ตสฺสา  รตฺติยา อจฺจเยน ภิกฺขู อามนฺเตสิ
เอถ   ตุเมฺห  ภิกฺขเว  เยน  วกฺกลิ  ภิกฺขุ  เตนุปสงฺกมถ  อุปสงฺกมิตฺวา
วกฺกลึ   ภิกฺขุํ   เอวํ   วเทถ   สุณาวุโส   ตฺวํ   ๑-  วกฺกลิ  ภควโต
วจนํ   ทฺวินฺนํ   ๒-   เทวตานํ   อิมํ  อาวุโส  รตฺตึ  เทฺว  เทวตาโย
อภิกฺกนฺตาย     รตฺติยา     อภิกฺกนฺตวณฺณา     เกวลกปฺปํ     คิชฺฌกูฏํ
โอภาเสตฺวา    เยน   ภควา   เตนุปสงฺกมึสุ   อุปสงฺกมิตฺวา   ภควนฺตํ
อภิวาเทตฺวา   เอกมนฺตํ   อฏฺฐํสุ  เอกมนฺตํ  ฐิตา  โข  อาวุโส  เอกา
เทวตา    ภควนฺตํ    เอตทโวจ   วกฺกลิ   ภนฺเต   ภิกฺขุ   วิโมกฺขาย
เจเตตีติ   ฯ   อปรา  เทวตา  ภควนฺตํ  เอตทโวจ  โส  หิ  นูน  โส
ภนฺเต   สุวิมุตฺโต   วิมุจฺจิสฺสตีติ   ฯ   ภควา   จ  ตํ  อาวุโส  วกฺกลิ
เอวมาห   มา   ภายิ   วกฺกลิ   มา   ภายิ  วกฺกลิ  อปาปกนฺเต  ๓-
มรณํ   ภวิสฺสติ   อปาปิกา   กาลกิริยาติ   ฯ  เอวํ  ภนฺเตติ  โข  เต
@เชิงอรรถ:  โป. ยุ. อยํ ปาโฐ นตฺถิ ฯ   โป. ม. ยุ. ทวินฺนญฺจ ฯ  โป. อปาปิกนฺเต ฯ
ภิกฺขู    ภควโต    ปฏิสฺสุตฺวา    เยนายสฺมา    วกฺกลิ   เตนุปสงฺกมึสุ
อุปสงฺกมิตฺวา    อายสฺมนฺตํ    วกฺกลึ    เอตทโวจุํ   สุณาวุโส   วกฺกลิ
ภควโต วจนํ ทฺวินฺนญฺจ เทวตานนฺติ ฯ
     [๒๑๙]   อถ  โข  อายสฺมา  วกฺกลิ  อุปฏฺฐาเก  อามนฺเตสิ  เอถ
มํ   อาวุโส   มญฺจกา   โอโรเปถ   กถํ   หิ   นาม  มาทิโส  อุจฺเจ
อาสเน   นิสีทิตฺวา   ตสฺส   ภควโต   สาสนํ  โสตพฺพํ  มญฺเญยฺยาติ  ฯ
เอวมาวุโสติ    โข   เต   ภิกฺขู   อายสฺมโต   วกฺกลิสฺส   ปฏิสฺสุตฺวา
อายสฺมนฺตํ   วกฺกลึ   มญฺจกา   โอโรเปสุํ   อิมํ   อาวุโส  รตฺตึ  เทฺว
เทวตาโย   อภิกฺกนฺตาย   รตฺติยา   ฯเปฯ  เอกมนฺตํ  อฏฺฐํสุ  เอกมนฺตํ
ฐิตา  โข  อาวุโส  เอกา  เทวตา  ภควนฺตํ  เอตทโวจ  วกฺกลิ  ภนฺเต
ภิกฺขุ วิโมกฺขาย เจเตตีติ ฯ
     {๒๑๙.๑}   อปรา  เทวตา  ภควนฺตํ  เอตทโวจ  โส  หิ  นูน โส
ภนฺเต   สุวิมุตฺโต   วิมุจฺจิสฺสตีติ   ฯ   ภควา   จ  ตํ  อาวุโส  วกฺกลิ
เอวมาห  มา  ภายิ  วกฺกลิ  มา  ภายิ  วกฺกลิ อปาปกนฺเต มรณํ ภวิสฺสติ
อปาปิกา  กาลกิริยาติ  ฯ  เตนหาวุโส  มม วจเนน ภควโต ปาเท สิรสา
วนฺทถ   วกฺกลิ   ภนฺเต   ภิกฺขุ  อาพาธิโก  ทุกฺขิโต  พาฬฺหคิลาโน  โส
ภควโต  ปาเท  สิรสา  วนฺทติ  เอวญฺจ วเทติ  ๑- รูปํ อนิจฺจํตาหํ ภนฺเต
น  กงฺขามิ  ยทนิจฺจํ  ตํ  ทุกฺขนฺติ  น  วิจิกิจฺฉามิ ยทนิจฺจํ ทุกฺขํ วิปริณาม-
ธมฺมํ  นตฺถิ  เม  ตตฺถ ฉนฺโท วา ราโค วา เปมํ  วาติ น วิจิกิจฺฉามิ ฯ
เวทนา   อนิจฺจาตาหํ   ภนฺเต   น   กงฺขามิ   ยทนิจฺจํ   ตํ   ทุกฺขนฺติ
@เชิงอรรถ:  ม. วเทถ ฯ
น    วิจิกิจฺฉามิ   ยทนิจฺจํ   ทุกฺขํ   วิปริณามธมฺมํ   นตฺถิ   เม   ตตฺถ
ฉนฺโท   วา   ราโค   วา   เปมํ   วาติ   น  วิจิกิจฺฉามิ  ฯ  สญฺญา
อนิจฺจาตาหํ   ภนฺเต   น  กงฺขามิ  ยทนิจฺจํ  ตํ  ทุกฺขนฺติ  น  วิจิกิจฺฉามิ
ยทนิจฺจํ    ทุกฺขํ    วิปริณามธมฺมํ    นตฺถิ   เม   ตตฺถ   ฉนฺโท   วา
ราโค   วา   เปมํ   วาติ   น  วิจิกิจฺฉามิ  ฯ  สงฺขารา  อนิจฺจาตาหํ
ภนฺเต   น   กงฺขามิ   ยทนิจฺจํ   ตํ   ทุกฺขนฺติ  น  วิจิกิจฺฉามิ  ยทนิจฺจํ
ทุกฺขํ   วิปริณามธมฺมํ   นตฺถิ  เม  ตตฺถ  ฉนฺโท  วา  ราโค  วา  เปมํ
วาติ   น   วิจิกิจฺฉามิ   ฯ   วิญฺญาณํ   อนิจฺจํตาหํ  ภนฺเต  น  กงฺขามิ
ยทนิจฺจํ   ตํ   ทุกฺขนฺติ   น   วิจิกิจฺฉามิ   ยทนิจฺจํ  ทุกฺขํ  วิปริณามธมฺมํ
นตฺถิ  เม  ตตฺถ  ฉนฺโท  วา  ราโค  วา  เปมํ  วาติ น วิจิกิจฺฉามีติ ฯ
เอวมาวุโสติ    โข   เต   ภิกฺขู   อายสฺมโต   วกฺกลิสฺส   ปฏิสฺสุตฺวา
ปกฺกมึสุ   ฯ   อถ  โข  อายสฺมา  วกฺกลิ  อจิรปกฺกนฺเตสุ  เตสุ  ภิกฺขูสุ
สตฺถํ อาหเรสิ ฯ
     [๒๒๐]   อถ  โข  เต  ภิกฺขู เยน ภควา เตนุปสงฺกมึสุ อุปสงฺกมิตฺวา
เอกมนฺตํ    นิสีทึสุ    ฯ    เอกมนฺตํ    นิสินฺนา    โข   เต   ภิกฺขู
ภควนฺตํ    เอตทโวจุํ    วกฺกลิ   ภนฺเต   ภิกฺขุ   อาพาธิโก   ทุกฺขิโต
พาฬฺหคิลาโน   โส   ภควโต   ปาเท   สิรสา  วนฺทติ  เอวญฺจ  วเทติ
รูปํ   อนิจฺจํตาหํ   ภนฺเต   น   กงฺขามิ   ยทนิจฺจํ   ตํ   ทุกฺขนฺติ   น
วิจิกิจฺฉามิ   ยทนิจฺจํ   ทุกฺขํ   วิปริณามธมฺมํ   นตฺถิ   เม  ตตฺถ  ฉนฺโท
วา  ราโค  วา  เปมํ  วาติ  น  วิจิกิจฺฉามิ  ฯ  เวทนา  ฯ  สญฺญา ฯ
สงฺขารา   ฯ   วิญฺญาณํ   อนิจฺจํตาหํ   ภนฺเต  น  กงฺขามิ  ยทนิจฺจํ  ตํ
ทุกฺขนฺติ    น    วิจิกิจฺฉามิ    ยทนิจฺจํ    ทุกฺขํ   วิปริณามธมฺมํ   นตฺถิ
เม ตตฺถ ฉนฺโท วา ราโค วา เปมํ วาติ น วิจิกิจฺฉามีติ ฯ
     [๒๒๑]   อถ  โข  ภควา  ภิกฺขู  อามนฺเตสิ  อายาม  ภิกฺขเว เยน
อิสิคิลิปสฺสํ   กาฬสิลา   เตนุปสงฺกมิสฺสาม   ยตฺถ   วกฺกลินา  กุลปุตฺเตน
สตฺถํ  อาหริตนฺติ  ฯ  เอวํ  ภนฺเตติ  โข  เต ภิกฺขู ภควโต ปจฺจสฺโสสุํ ฯ
อถ   โข  ภควา  สมฺพหุเลหิ  ภิกฺขูหิ  สทฺธึ  เยน  อิสิคิลิปสฺสํ  กาฬลิลา
เตนุปสงฺกมิ   ฯ   อทฺทสา   โข   ภควา   อายสฺมนฺตํ  วกฺกลึ  ทูรโตว
มญฺจเก   วิวตฺตกฺขนฺธํ   เสยฺยมานํ   ๑-   ฯ  เตน  โข  ปน  สมเยน
ธูมายิตตฺตํ   ติมิรายิตตฺตํ   คจฺฉเตว   ปุริมทิสํ   ๒-   คจฺฉติ  ปจฺฉิมทิสํ
คจฺฉติ   อุตฺตรทิสํ   คจฺฉติ   ทกฺขิณทิสํ   คจฺฉติ   อุทฺธํทิสํ   ๓-  คจฺฉติ
อโธทิสํ  คจฺฉติ  อนุทิสํ  ฯ  อถ  โข  ภควา  ภิกฺขู อามนฺเตสิ ปสฺสถ โน
ตุเมฺห  ภิกฺขเว  เอวํ  ธูมายิตตฺตํ  ติมิรายิตตฺตํ  คจฺฉเตว  ปุริมทิสํ ฯเปฯ
คจฺฉติ  อนุทิสนฺติ  ฯ  เอวํ  ภนฺเต  ฯ  เอโส โข ภิกฺขเว มาโร ปาปิมา
วกฺกลิสฺส    กุลปุตฺตสฺส   วิญฺญาณํ   สมเนฺวสติ   ๔-   กตฺถ   วกฺกลิสฺส
กุลปุตฺตสฺส    วิญฺญาณํ    ปติฏฺฐิตนฺติ   ฯ   อปฺปติฏฺฐิเตน   จ   ภิกฺขเว
วิญฺญาเณน วกฺกลิ กุลปุตฺโต ปรินิพฺพุโตติ ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๑๗ หน้าที่ ๑๔๕-๑๕๑. http://84000.org/tipitaka/pali/pali_item_s.php?book=17&item=215&items=7&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=17&item=215&items=7&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=17&item=215&items=7&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=17&item=215&items=7&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=17&i=215              The Pali Atthakatha in Thai :- http://84000.org/tipitaka/atthapali/read_th.php?B=12&A=7557              The Pali Atthakatha in Roman :- http://84000.org/tipitaka/atthapali/read_rm.php?B=12&A=7557              สารบัญพระไตรปิฎกเล่มที่ ๑๗ http://84000.org/tipitaka/read/?index_17

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :