ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๕ ภาษาบาลี อักษรไทย พระสุตตันตปิฎกเล่มที่ ๗ สุตฺต. สํ. สคาถวคฺโค
                            อฏฺฐมํ ปโรสหสฺสสุตฺตํ
     [๗๔๗]   เอกํ  สมยํ ภควา สาวตฺถิยํ วิหรติ เชตวเน อนาถปิณฺฑิกสฺส
อาราเม  มหตา  ภิกฺขุสงฺเฆน  สทฺธึ  อฑฺฒเตรเสหิ  ภิกฺขุสเตหิ  ฯ  เตน
โข   ปน   สมเยน   ภควา  ภิกฺขู  นิพฺพานปฏิสํยุตฺตาย  ธมฺมิยา  กถาย
สนฺทสฺเสติ  สมาทเปติ  สมุตฺเตเชติ  สมฺปหํเสติ  ฯ เต จ ภิกฺขู อฏฺฐิกตฺวา
มนสิกตฺวา สพฺพเจตโส สมนฺนาหริตฺวา โอหิตโสตา ธมฺมํ สุณนฺติ ฯ
     [๗๔๘]   อถ   โข   อายสฺมโต  วงฺคีสสฺส  เอตทโหสิ  อยํ  โข
ภควา    ภิกฺขู    นิพฺพานปฏิสํยุตฺตาย    ธมฺมิยา    กถาย   สนฺทสฺเสติ
สมาทเปติ    สมุตฺเตเชติ    สมฺปหํเสติ   เต   จ   ภิกฺขู   อฏฺฐิกตฺวา
มนสิกตฺวา   สพฺพเจตโส   สมนฺนาหริตฺวา   โอหิตโสตา   ธมฺมํ   สุณนฺติ
ยนฺนูนาหํ   ภควนฺตํ   สมฺมุขา   สรูปาหิ   คาถาหิ   อภิตฺถเวยฺยนฺติ   ฯ
อถ  โข  อายสฺมา  วงฺคีโส  อุฏฺฐายาสนา  เอกํสํ  อุตฺตราสงฺคํ  กริตฺวา
เยน    ภควา   เตนญฺชลิมฺปณาเมตฺวา   ภควนฺตํ   เอตทโวจ   ปฏิภาติ
มํ   ภควา   ปฏิภาติ   มํ   สุคตาติ  ฯ  ปฏิภาตุ  ตํ  วงฺคีสาติ  ภควา
อโวจ ฯ
     [๗๔๙]   อถ  โข  อายสฺมา  วงฺคีโส  ภควนฺตํ  สมฺมุขา  สรูปาหิ
คาถาหิ อภิตฺถวิ
          ปโรสหสฺส ภิกฺขูนํ                 สุคตํ ปยิรุปาสติ
          เทเสนฺตํ วิรชํ ธมฺมํ                 นิพฺพานํ อกุโตภยํ
          สุณนฺติ ธมฺมํ วิมลํ                  สมฺมาสมฺพุทฺธเทสิตํ
          โสภติ วต สมฺพุทฺโธ              ภิกฺขุสงฺฆปุรกฺขโต
          นาคนาโมสิ ภควา                 อิสีนํ อิสิสตฺตโม
          มหาเมโฆว หุตฺวาน               สาวเก อภิวสฺสติ
          ทิวาวิหารา นิกฺขมฺม               สตฺถุทสฺสนกามตา ๑-
          สาวโก เต มหาวีร                  ปาเท วนฺทติ วงฺคีโสติ ฯ
กึ   นุ   เต   วงฺคีส   อิมา   คาถาโย   ปุพฺเพ  ปริวิตกฺกิตา  อุทาหุ
ฐานโสว   ตํ   ปฏิภนฺตีติ   ฯ   น   โข  เม  ภนฺเต  อิมา  คาถาโย
ปุพฺเพ   ปริวิตกฺกิตา   อถ   โข   ฐานโสว   มํ  ปฏิภนฺตีติ  ฯ  เตนหิ
ตํ    วงฺคีส    ภิยฺโยโส   มตฺตาย   ปุพฺเพ   อปริวิตกฺกิตา   คาถาโย
ปฏิภนฺตูติ ฯ
     [๗๕๐]   เอวํ  ภนฺเตติ  โข  อายสฺมา  วงฺคีโส ภควโต ปฏิสฺสุตฺวา
@เชิงอรรถ:  ม. ยุ. สตฺถุทสฺสนกามยตา ฯ
ภิยฺโยโส มตฺตาย ภควนฺตํ ปุพฺเพ อปริวิตกฺกิตาหิ คาถาหิ อภิตฺถวิ
                อุมฺมคฺคสตํ ๑- มารสฺส อภิภุยฺย
                จรสิ ปภิชฺช ขีลานิ
                ตํ ปสฺสถ พนฺธปมุญฺจกรํ
                อสิตํ ภาคโส ปวิภชฺชํ
                โอฆสฺส หิ นิตฺถรณตฺถํ
                อเนกวิหิตํ มคฺคํ อกฺขาสิ
                ตสฺมึ เจ อมเต อกฺขาเต
                ธมฺมทฺทสา ฐิตา อสํหิรา
                ปชฺโชตกโร อติวิชฺฌ ธมฺมํ ๒-
                สพฺพทิฏฺฐีนํ อติกฺกมมทฺทส
          ญตฺวา จ สจฺฉิกตฺวา จ            อคฺคํ โส เทสยิ ทสฏฺฐานํ
          เอวํ สุเทสิเต ธมฺเม                 โก ปมาโท วิชานตํ [๓]-
                ตสฺมา หิ ตสฺส ภควโต สาสเน
                อปฺปมตฺโต สทา นมสฺสมนุสิกฺเขติ ฯ



             เนื้อความพระไตรปิฎกฉบับภาษาบาลีอักษรไทย เล่มที่ ๑๕ หน้าที่ ๒๘๒-๒๘๔. http://84000.org/tipitaka/pali/pali_item_s.php?book=15&item=747&items=4&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=15&item=747&items=4&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=15&item=747&items=4&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=15&item=747&items=4&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=15&i=747              The Pali Atthakatha in Thai :- http://84000.org/tipitaka/atthapali/read_th.php?B=11&A=6849              The Pali Atthakatha in Roman :- http://84000.org/tipitaka/atthapali/read_rm.php?B=11&A=6849              สารบัญพระไตรปิฎกเล่มที่ ๑๕ http://84000.org/tipitaka/read/?index_15

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :